𑁮. 𑀢𑁄𑀤𑁂𑀬𑁆𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁨𑁪. ‘‘𑀭𑀸𑀚𑀸 𑀅𑀚𑀺𑀢𑀜𑁆𑀚𑀬𑁄 [𑀭𑀸𑀚𑀸𑀲𑀺 𑀯𑀺𑀚𑀬𑁄 (𑀲𑀻. 𑀅𑀝𑁆𑀞.), 𑀭𑀸𑀚𑀸 𑀯𑀺𑀚𑀺𑀢𑀚𑀬𑁄 (𑀲𑁆𑀬𑀸.)] 𑀦𑀸𑀫, 𑀓𑁂𑀢𑀼𑀫𑀢𑀻𑀧𑀼𑀭𑀼𑀢𑁆𑀢𑀫𑁂;

𑀲𑀽𑀭𑁄 𑀯𑀺𑀓𑁆𑀓𑀫𑀲𑀫𑁆𑀧𑀦𑁆𑀦𑁄, 𑀧𑀼𑀭𑀫𑀚𑁆𑀛𑀸𑀯𑀲𑀻 𑀢𑀤𑀸.

𑁨𑁨𑁫. ‘‘𑀢𑀲𑁆𑀲 𑀭𑀜𑁆𑀜𑁄 𑀧𑀫𑀢𑁆𑀢𑀲𑁆𑀲, 𑀅𑀝𑀯𑀺𑀬𑁄 𑀲𑀫𑀼𑀝𑁆𑀞𑀳𑀼𑀁;

𑀑𑀢𑀸𑀭𑀸 [𑀉𑀢𑁆𑀢𑀭𑀸 (𑀲𑁆𑀬𑀸.), 𑀑𑀘𑀭𑀸 (𑀧𑀻.)] 𑀢𑀼𑀡𑁆𑀟𑀺𑀓𑀸 𑀘𑁂𑀯, 𑀭𑀝𑁆𑀞𑀁 𑀯𑀺𑀤𑁆𑀥𑀁𑀲𑀬𑀼𑀁 𑀢𑀤𑀸.

𑁨𑁨𑁬. ‘‘𑀧𑀘𑁆𑀘𑀦𑁆𑀢𑁂 𑀓𑀼𑀧𑀺𑀢𑁂 𑀔𑀺𑀧𑁆𑀧𑀁, 𑀲𑀦𑁆𑀦𑀺𑀧𑀸𑀢𑁂𑀲𑀺𑀭𑀺𑀦𑁆𑀤𑀫𑁄;

𑀪𑀝𑁂 𑀘𑁂𑀯 𑀩𑀮𑀢𑁆𑀣𑁂 𑀘, 𑀅𑀭𑀺𑀁 𑀦𑀺𑀕𑁆𑀕𑀸𑀳𑀬𑀺 𑀢𑀤𑀸.

𑁨𑁨𑁭. ‘‘𑀳𑀢𑁆𑀣𑀸𑀭𑁄𑀳𑀸 𑀅𑀦𑀻𑀓𑀝𑁆𑀞𑀸, 𑀲𑀽𑀭𑀸 𑀘 𑀘𑀫𑁆𑀫𑀬𑁄𑀥𑀺𑀦𑁄;

𑀥𑀦𑀼𑀕𑁆𑀕𑀳𑀸 𑀘 𑀉𑀕𑁆𑀕𑀸 𑀘, 𑀲𑀩𑁆𑀩𑁂 𑀲𑀦𑁆𑀦𑀺𑀧𑀢𑀼𑀁 𑀢𑀤𑀸.

𑁨𑁨𑁮. ‘‘𑀆𑀴𑀸𑀭𑀺𑀓𑀸 𑀘 𑀓𑀧𑁆𑀧𑀓𑀸, 𑀦𑁆𑀳𑀸𑀧𑀓𑀸 𑀫𑀸𑀮𑀓𑀸𑀭𑀓𑀸;

𑀲𑀽𑀭𑀸 𑀯𑀺𑀚𑀺𑀢𑀲𑀗𑁆𑀕𑀸𑀫𑀸, 𑀲𑀩𑁆𑀩𑁂 𑀲𑀦𑁆𑀦𑀺𑀧𑀢𑀼𑀁 𑀢𑀤𑀸.

𑁨𑁨𑁯. ‘‘𑀔𑀕𑁆𑀕𑀳𑀢𑁆𑀣𑀸 𑀘 𑀧𑀼𑀭𑀺𑀲𑀸, 𑀘𑀸𑀧𑀳𑀢𑁆𑀣𑀸 𑀘 𑀯𑀫𑁆𑀫𑀺𑀦𑁄;

𑀮𑀼𑀤𑁆𑀤𑀸 𑀯𑀺𑀚𑀺𑀢𑀲𑀗𑁆𑀕𑀸𑀫𑀸, 𑀲𑀩𑁆𑀩𑁂 𑀲𑀦𑁆𑀦𑀺𑀧𑀢𑀼𑀁 𑀢𑀤𑀸.

𑁨𑁩𑁦. ‘‘𑀢𑀺𑀥𑀸𑀧𑀪𑀺𑀦𑁆𑀦𑀸 𑀫𑀸𑀢𑀗𑁆𑀕𑀸, 𑀓𑀼𑀜𑁆𑀚𑀭𑀸 𑀲𑀝𑁆𑀞𑀺𑀳𑀸𑀬𑀦𑀸;

𑀲𑀼𑀯𑀡𑁆𑀡𑀓𑀘𑁆𑀙𑀸𑀮𑀗𑁆𑀓𑀸𑀭𑀸, 𑀲𑀩𑁆𑀩𑁂 𑀲𑀦𑁆𑀦𑀺𑀧𑀢𑀼𑀁 𑀢𑀤𑀸.

𑁨𑁩𑁧. ‘‘𑀔𑀫𑀸 𑀲𑀻𑀢𑀲𑁆𑀲 𑀉𑀡𑁆𑀳𑀲𑁆𑀲, 𑀉𑀓𑁆𑀓𑀸𑀭𑀼𑀳𑀭𑀡𑀲𑁆𑀲 𑀘;

𑀬𑁄𑀥𑀸𑀚𑀻𑀯𑀸 𑀓𑀢𑀓𑀫𑁆𑀫𑀸, 𑀲𑀩𑁆𑀩𑁂 𑀲𑀦𑁆𑀦𑀺𑀧𑀢𑀼𑀁 𑀢𑀤𑀸.

𑁨𑁩𑁨. ‘‘𑀲𑀗𑁆𑀔𑀲𑀤𑁆𑀤𑀁 𑀪𑁂𑀭𑀺𑀲𑀤𑁆𑀤𑀁, 𑀅𑀣𑁄 𑀉𑀢𑀼𑀚 [𑀉𑀤𑁆𑀥𑀯 (𑀲𑀻.), 𑀉𑀤𑁆𑀤𑀝 (𑀲𑁆𑀬𑀸.)] 𑀲𑀤𑁆𑀤𑀓𑀁;

𑀏𑀢𑁂𑀳𑀺 𑀢𑁂 𑀳𑀸𑀲𑀬𑀦𑁆𑀢𑀸, 𑀲𑀩𑁆𑀩𑁂 𑀲𑀦𑁆𑀦𑀺𑀧𑀢𑀼𑀁 𑀢𑀤𑀸.

𑁨𑁩𑁩. ‘‘𑀢𑀺𑀲𑀽𑀮𑀓𑁄𑀦𑁆𑀢𑀺𑀫𑀦𑁆𑀢𑁂𑀳𑀺 [𑀢𑀺𑀲𑀽𑀮𑀓𑁄𑀦𑁆𑀢𑀫𑀦𑁆𑀢𑁂𑀳𑀺 (𑀲𑀻.), 𑀓𑀯𑀘𑁂𑀳𑀺 𑀢𑁄𑀫𑀭𑁂𑀳𑀺 (𑀲𑀻.), 𑀥𑀦𑀽𑀳𑀺 𑀢𑁄𑀫𑀭𑁂𑀳𑀺 (𑀲𑁆𑀬𑀸.)] 𑀘;

𑀓𑁄𑀝𑁆𑀝𑁂𑀦𑁆𑀢𑀸𑀦𑀁 𑀦𑀺𑀧𑀸𑀢𑁂𑀦𑁆𑀢𑀸 [𑀓𑁄𑀝𑁆𑀝𑀬𑀦𑁆𑀢𑀸 𑀦𑀺𑀯𑀢𑁆𑀢𑁂𑀦𑁆𑀢𑀸 (𑀲𑁆𑀬𑀸.)], 𑀲𑀩𑁆𑀩𑁂 𑀲𑀦𑁆𑀦𑀺𑀧𑀢𑀼𑀁 𑀢𑀤𑀸.

𑁨𑁩𑁪. ‘‘𑀓𑀺𑀫𑁂𑀯𑀸𑀢𑀺𑀦𑀺𑀲𑀸𑀫𑁂𑀢𑁆𑀯𑀸 [𑀓𑀯𑀘𑀸𑀦𑀺𑀯𑀸𑀲𑁂𑀢𑁆𑀯𑀸 (𑀲𑁆𑀬𑀸.)], 𑀲𑀭𑀸𑀚𑀸 𑀅𑀚𑀺𑀢𑀜𑁆𑀚𑀬𑁄 [𑀅𑀚𑀺𑀦𑀁 𑀚𑀺𑀦𑁄 (𑀲𑀻.), 𑀅𑀚𑀺𑀢𑀜𑁆𑀚𑀺𑀦𑁄 (𑀲𑁆𑀬𑀸.)];

𑀲𑀝𑁆𑀞𑀺 𑀧𑀸𑀡𑀲𑀳𑀲𑁆𑀲𑀸𑀦𑀺, 𑀲𑀽𑀮𑁂 𑀉𑀢𑁆𑀢𑀸𑀲𑀬𑀺𑀁 𑀢𑀤𑀸.

𑁨𑁩𑁫. ‘‘𑀲𑀤𑁆𑀤𑀁 𑀫𑀸𑀦𑀼𑀲𑀓𑀸𑀓𑀁𑀲𑀼, 𑀅𑀳𑁄 𑀭𑀸𑀚𑀸 𑀅𑀥𑀫𑁆𑀫𑀺𑀓𑁄;

𑀦𑀺𑀭𑀬𑁂 𑀧𑀘𑁆𑀘𑀫𑀸𑀦𑀲𑁆𑀲, 𑀓𑀤𑀸 𑀅𑀦𑁆𑀢𑁄 𑀪𑀯𑀺𑀲𑁆𑀲𑀢𑀺.

𑁨𑁩𑁬. ‘‘𑀲𑀬𑀦𑁂𑀳𑀁 𑀢𑀼𑀯𑀝𑁆𑀝𑁂𑀦𑁆𑀢𑁄, 𑀧𑀲𑁆𑀲𑀸𑀫𑀺 𑀦𑀺𑀭𑀬𑁂 𑀢𑀤𑀸;

𑀦 𑀲𑀼𑀧𑀸𑀫𑀺 𑀤𑀺𑀯𑀸𑀭𑀢𑁆𑀢𑀺𑀁, 𑀲𑀽𑀮𑁂𑀦 𑀢𑀚𑁆𑀚𑀬𑀦𑁆𑀢𑀺 𑀫𑀁.

𑁨𑁩𑁭. ‘‘𑀓𑀺𑀁 𑀧𑀫𑀸𑀤𑁂𑀦 𑀭𑀚𑁆𑀚𑁂𑀦, 𑀯𑀸𑀳𑀦𑁂𑀦 𑀩𑀮𑁂𑀦 𑀘;

𑀦 𑀢𑁂 𑀧𑀳𑁄𑀦𑁆𑀢𑀺 𑀥𑀸𑀭𑁂𑀢𑀼𑀁, 𑀢𑀸𑀧𑀬𑀦𑁆𑀢𑀺 [𑀢𑀸𑀲𑀬𑀦𑁆𑀢𑀺 (𑀲𑀻. 𑀲𑁆𑀬𑀸.)] 𑀫𑀫𑀁 𑀲𑀤𑀸.

𑁨𑁩𑁮. ‘‘𑀓𑀺𑀁 𑀫𑁂 𑀧𑀼𑀢𑁆𑀢𑁂𑀳𑀺 𑀤𑀸𑀭𑁂𑀳𑀺, 𑀭𑀚𑁆𑀚𑁂𑀦 𑀲𑀓𑀮𑁂𑀦 𑀘;

𑀬𑀁𑀦𑀽𑀦 𑀧𑀩𑁆𑀩𑀚𑁂𑀬𑁆𑀬𑀸𑀳𑀁, 𑀕𑀢𑀺𑀫𑀕𑁆𑀕𑀁 𑀯𑀺𑀲𑁄𑀥𑀬𑁂.

𑁨𑁩𑁯. ‘‘𑀲𑀝𑁆𑀞𑀺 𑀦𑀸𑀕𑀲𑀳𑀲𑁆𑀲𑀸𑀦𑀺, 𑀲𑀩𑁆𑀩𑀸𑀮𑀗𑁆𑀓𑀸𑀭𑀪𑀽𑀲𑀺𑀢𑁂;

𑀲𑀼𑀯𑀡𑁆𑀡𑀓𑀘𑁆𑀙𑁂 𑀫𑀸𑀢𑀗𑁆𑀕𑁂, 𑀳𑁂𑀫𑀓𑀧𑁆𑀧𑀦𑀯𑀸𑀲𑀲𑁂.

𑁨𑁪𑁦. ‘‘𑀆𑀭𑀽𑀴𑁆𑀳𑁂 𑀕𑀸𑀫𑀡𑀻𑀬𑁂𑀳𑀺, 𑀢𑁄𑀫𑀭𑀗𑁆𑀓𑀼𑀲𑀧𑀸𑀡𑀺𑀪𑀺;

𑀲𑀗𑁆𑀕𑀸𑀫𑀸𑀯𑀘𑀭𑁂 𑀞𑀸𑀦𑁂, 𑀅𑀦𑀧𑁂𑀓𑁆𑀔𑁄 𑀯𑀺𑀳𑀸𑀬𑀳𑀁;

𑀲𑀓𑀓𑀫𑁆𑀫𑁂𑀦 𑀲𑀦𑁆𑀢𑀢𑁆𑀢𑁄, 𑀦𑀺𑀓𑁆𑀔𑀫𑀺𑀁 𑀅𑀦𑀕𑀸𑀭𑀺𑀬𑀁.

𑁨𑁪𑁧. ‘‘𑀲𑀝𑁆𑀞𑀺 𑀅𑀲𑁆𑀲𑀲𑀳𑀲𑁆𑀲𑀸𑀦𑀺, 𑀲𑀩𑁆𑀩𑀸𑀮𑀗𑁆𑀓𑀸𑀭𑀪𑀽𑀲𑀺𑀢𑁂;

𑀆𑀚𑀸𑀦𑀻𑀬𑁂𑀯 𑀚𑀸𑀢𑀺𑀬𑀸, 𑀲𑀺𑀦𑁆𑀥𑀯𑁂 𑀲𑀻𑀖𑀯𑀸𑀳𑀦𑁂.

𑁨𑁪𑁨. ‘‘𑀆𑀭𑀽𑀴𑁆𑀳𑁂 𑀕𑀸𑀫𑀡𑀻𑀬𑁂𑀳𑀺, 𑀘𑀸𑀧𑀳𑀢𑁆𑀣𑁂𑀳𑀺 𑀯𑀫𑁆𑀫𑀺𑀪𑀺;

𑀧𑀳𑀸𑀭𑁂𑀢𑁆𑀯𑀸𑀦 [𑀧𑀳𑀸𑀬𑀺𑀢𑁆𑀯𑀸𑀦 (𑀲𑀻. 𑀧𑀻.), 𑀙𑀟𑁆𑀟𑀬𑀺𑀢𑁆𑀯𑀸𑀦 (𑀲𑁆𑀬𑀸.)] 𑀢𑁂 𑀲𑀩𑁆𑀩𑁂, 𑀦𑀺𑀓𑁆𑀔𑀫𑀺𑀁 𑀅𑀦𑀕𑀸𑀭𑀺𑀬𑀁.

𑁨𑁪𑁩. ‘‘𑀲𑀝𑁆𑀞𑀺 𑀭𑀣𑀲𑀳𑀲𑁆𑀲𑀸𑀦𑀺, 𑀲𑀩𑁆𑀩𑀸𑀮𑀗𑁆𑀓𑀸𑀭𑀪𑀽𑀲𑀺𑀢𑁂;

𑀤𑀻𑀧𑁂 𑀅𑀣𑁄𑀧𑀺 𑀯𑁂𑀬𑀕𑁆𑀖𑁂, 𑀲𑀦𑁆𑀦𑀤𑁆𑀥𑁂 𑀉𑀲𑁆𑀲𑀺𑀢𑀤𑁆𑀥𑀚𑁂;

𑀢𑁂 𑀲𑀩𑁆𑀩𑁂 𑀧𑀭𑀺𑀳𑀸𑀭𑁂𑀢𑁆𑀯𑀸 [𑀧𑀭𑀺𑀯𑀚𑁆𑀚𑁂𑀢𑁆𑀯𑀸 (𑀲𑁆𑀬𑀸.), 𑀧𑀭𑀺𑀳𑀸𑀬𑀺𑀢𑁆𑀯𑀸 (𑀧𑀻.)], 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁.

𑁨𑁪𑁪. ‘‘𑀲𑀝𑁆𑀞𑀺 𑀥𑁂𑀦𑀼𑀲𑀳𑀲𑁆𑀲𑀸𑀦𑀺, 𑀲𑀩𑁆𑀩𑀸 𑀓𑀁𑀲𑀽𑀧𑀥𑀸𑀭𑀡𑀸;

𑀢𑀸𑀬𑁄𑀧𑀺 [𑀕𑀸𑀯𑀺𑀬𑁄 (𑀲𑁆𑀬𑀸.), 𑀥𑁂𑀦𑀼𑀬𑁄 (𑀓.)] 𑀙𑀟𑁆𑀟𑀬𑀺𑀢𑁆𑀯𑀸𑀦, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁.

𑁨𑁪𑁫. ‘‘𑀲𑀝𑁆𑀞𑀺 𑀇𑀢𑁆𑀣𑀺𑀲𑀳𑀲𑁆𑀲𑀸𑀦𑀺, 𑀲𑀩𑁆𑀩𑀸𑀮𑀗𑁆𑀓𑀸𑀭𑀪𑀽𑀲𑀺𑀢𑀸;

𑀯𑀺𑀘𑀺𑀢𑁆𑀢𑀯𑀢𑁆𑀣𑀸𑀪𑀭𑀡𑀸, 𑀆𑀫𑀼𑀓𑁆𑀓𑀫𑀡𑀺𑀓𑀼𑀡𑁆𑀟𑀮𑀸.

𑁨𑁪𑁬. ‘‘𑀅𑀴𑀸𑀭𑀧𑀫𑁆𑀳𑀸 𑀳𑀲𑀼𑀮𑀸, 𑀲𑀼𑀲𑀜𑁆𑀜𑀸 𑀢𑀦𑀼𑀫𑀚𑁆𑀛𑀺𑀫𑀸;

𑀢𑀸 𑀳𑀺𑀢𑁆𑀯𑀸 𑀓𑀦𑁆𑀤𑀫𑀸𑀦𑀸𑀬𑁄, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁.

𑁨𑁪𑁭. ‘‘𑀲𑀝𑁆𑀞𑀺 𑀕𑀸𑀫𑀲𑀳𑀲𑁆𑀲𑀸𑀦𑀺, 𑀧𑀭𑀺𑀧𑀼𑀡𑁆𑀡𑀸𑀦𑀺 𑀲𑀩𑁆𑀩𑀲𑁄;

𑀙𑀟𑁆𑀟𑀬𑀺𑀢𑁆𑀯𑀸𑀦 𑀢𑀁 𑀭𑀚𑁆𑀚𑀁, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁.

𑁨𑁪𑁮. ‘‘𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸𑀦, 𑀳𑀺𑀫𑀯𑀦𑁆𑀢𑀫𑀼𑀧𑀸𑀕𑀫𑀺𑀁;

𑀪𑀸𑀕𑀻𑀭𑀣𑀻𑀦𑀤𑀻𑀢𑀻𑀭𑁂, 𑀅𑀲𑁆𑀲𑀫𑀁 𑀫𑀸𑀧𑀬𑀺𑀁 𑀅𑀳𑀁.

𑁨𑁪𑁯. ‘‘𑀧𑀡𑁆𑀡𑀲𑀸𑀮𑀁 𑀓𑀭𑀺𑀢𑁆𑀯𑀸𑀦, 𑀅𑀕𑁆𑀬𑀸𑀕𑀸𑀭𑀁 𑀅𑀓𑀸𑀲𑀳𑀁;

𑀆𑀭𑀤𑁆𑀥𑀯𑀻𑀭𑀺𑀬𑁄 𑀧𑀳𑀺𑀢𑀢𑁆𑀢𑁄, 𑀯𑀲𑀸𑀫𑀺 𑀅𑀲𑁆𑀲𑀫𑁂 𑀅𑀳𑀁.

𑁨𑁫𑁦. ‘‘𑀫𑀡𑁆𑀟𑀧𑁂 𑀭𑀼𑀓𑁆𑀔𑀫𑀽𑀮𑁂 𑀯𑀸, 𑀲𑀼𑀜𑁆𑀜𑀸𑀕𑀸𑀭𑁂 𑀘 𑀛𑀸𑀬𑀢𑁄;

𑀦 𑀢𑀼 𑀯𑀺𑀚𑁆𑀚𑀢𑀺 𑀢𑀸𑀲𑁄 𑀫𑁂, 𑀦 𑀧𑀲𑁆𑀲𑁂 𑀪𑀬𑀪𑁂𑀭𑀯𑀁.

𑁨𑁫𑁧. ‘‘𑀲𑀼𑀫𑁂𑀥𑁄 𑀦𑀸𑀫 𑀲𑀫𑁆𑀩𑀼𑀤𑁆𑀥𑁄, 𑀅𑀕𑁆𑀕𑁄 𑀓𑀸𑀭𑀼𑀡𑀺𑀓𑁄 𑀫𑀼𑀦𑀺;

𑀜𑀸𑀡𑀸𑀮𑁄𑀓𑁂𑀦 𑀚𑁄𑀢𑀦𑁆𑀢𑁄, 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺 𑀢𑀸𑀯𑀤𑁂.

𑁨𑁫𑁨. ‘‘𑀫𑀫 𑀅𑀲𑁆𑀲𑀫𑀲𑀸𑀫𑀦𑁆𑀢𑀸, 𑀬𑀓𑁆𑀔𑁄 𑀆𑀲𑀺 𑀫𑀳𑀺𑀤𑁆𑀥𑀺𑀓𑁄;

𑀩𑀼𑀤𑁆𑀥𑀲𑁂𑀝𑁆𑀞𑀫𑁆𑀳𑀺 𑀉𑀧𑁆𑀧𑀦𑁆𑀦𑁂, 𑀆𑀭𑁄𑀘𑁂𑀲𑀺 𑀫𑀫𑀁 𑀢𑀤𑀸.

𑁨𑁫𑁩. ‘‘𑀩𑀼𑀤𑁆𑀥𑁄 𑀮𑁄𑀓𑁂 𑀲𑀫𑀼𑀧𑁆𑀧𑀦𑁆𑀦𑁄, 𑀲𑀼𑀫𑁂𑀥𑁄 𑀦𑀸𑀫 𑀘𑀓𑁆𑀔𑀼𑀫𑀸;

𑀢𑀸𑀭𑁂𑀢𑀺 𑀚𑀦𑀢𑀁 𑀲𑀩𑁆𑀩𑀁, 𑀢𑀫𑁆𑀧𑀺 𑀲𑁄 𑀢𑀸𑀭𑀬𑀺𑀲𑁆𑀲𑀢𑀺.

𑁨𑁫𑁪. ‘‘𑀬𑀓𑁆𑀔𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸, 𑀲𑀁𑀯𑀺𑀕𑁆𑀕𑁄 𑀆𑀲𑀺 𑀢𑀸𑀯𑀤𑁂;

𑀩𑀼𑀤𑁆𑀥𑁄 𑀩𑀼𑀤𑁆𑀥𑁄𑀢𑀺 𑀘𑀺𑀦𑁆𑀢𑁂𑀦𑁆𑀢𑁄, 𑀅𑀲𑁆𑀲𑀫𑀁 𑀧𑀝𑀺𑀲𑀸𑀫𑀬𑀺𑀁.

𑁨𑁫𑁫. ‘‘𑀅𑀕𑁆𑀕𑀺𑀤𑀸𑀭𑀼𑀜𑁆𑀘 𑀙𑀟𑁆𑀟𑁂𑀢𑁆𑀯𑀸, 𑀲𑀁𑀲𑀸𑀫𑁂𑀢𑁆𑀯𑀸𑀦 𑀲𑀦𑁆𑀣𑀢𑀁;

𑀅𑀲𑁆𑀲𑀫𑀁 𑀅𑀪𑀺𑀯𑀦𑁆𑀤𑀺𑀢𑁆𑀯𑀸, 𑀦𑀺𑀓𑁆𑀔𑀫𑀺𑀁 𑀯𑀺𑀧𑀺𑀦𑀸 𑀅𑀳𑀁.

𑁨𑁫𑁬. ‘‘𑀢𑀢𑁄 𑀘𑀦𑁆𑀤𑀦𑀫𑀸𑀤𑀸𑀬, 𑀕𑀸𑀫𑀸 𑀕𑀸𑀫𑀁 𑀧𑀼𑀭𑀸 𑀧𑀼𑀭𑀁;

𑀤𑁂𑀯𑀤𑁂𑀯𑀁 𑀕𑀯𑁂𑀲𑀦𑁆𑀢𑁄, 𑀉𑀧𑀕𑀘𑁆𑀙𑀺𑀁 𑀯𑀺𑀦𑀸𑀬𑀓𑀁.

𑁨𑁫𑁭. ‘‘𑀪𑀕𑀯𑀸 𑀢𑀫𑁆𑀳𑀺 𑀲𑀫𑀬𑁂, 𑀲𑀼𑀫𑁂𑀥𑁄 𑀮𑁄𑀓𑀦𑀸𑀬𑀓𑁄;

𑀘𑀢𑀼𑀲𑀘𑁆𑀘𑀁 𑀧𑀓𑀸𑀲𑁂𑀦𑁆𑀢𑁄, 𑀩𑁄𑀥𑁂𑀢𑀺 𑀚𑀦𑀢𑀁 𑀩𑀳𑀼𑀁.

𑁨𑁫𑁮. ‘‘𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸𑀦, 𑀲𑀻𑀲𑁂 𑀓𑀢𑁆𑀯𑀸𑀦 𑀘𑀦𑁆𑀤𑀦𑀁;

𑀲𑀫𑁆𑀩𑀼𑀤𑁆𑀥𑀁 𑀅𑀪𑀺𑀯𑀸𑀤𑁂𑀢𑁆𑀯𑀸, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀳𑀁.

𑁨𑁫𑁯. ‘‘‘𑀯𑀲𑁆𑀲𑀺𑀓𑁂 𑀧𑀼𑀧𑁆𑀨𑀫𑀸𑀦𑀫𑁆𑀳𑀺, 𑀲𑀦𑁆𑀢𑀺𑀓𑁂 𑀉𑀧𑀯𑀸𑀬𑀢𑀺;

𑀢𑁆𑀯𑀁 𑀯𑀻𑀭 𑀕𑀼𑀡𑀕𑀦𑁆𑀥𑁂𑀦, 𑀤𑀺𑀲𑀸 𑀲𑀩𑁆𑀩𑀸 𑀧𑀯𑀸𑀬𑀲𑀺.

𑁨𑁬𑁦. ‘‘‘𑀘𑀫𑁆𑀧𑀓𑁂 𑀦𑀸𑀕𑀯𑀦𑀺𑀓𑁂, 𑀅𑀢𑀺𑀫𑀼𑀢𑁆𑀢𑀓𑀓𑁂𑀢𑀓𑁂;

𑀲𑀸𑀮𑁂𑀲𑀼 𑀧𑀼𑀧𑁆𑀨𑀫𑀸𑀦𑁂𑀲𑀼, 𑀅𑀦𑀼𑀯𑀸𑀢𑀁 𑀧𑀯𑀸𑀬𑀢𑀺.

𑁨𑁬𑁧. ‘‘‘𑀢𑀯 𑀕𑀦𑁆𑀥𑀁 𑀲𑀼𑀡𑀺𑀢𑁆𑀯𑀸𑀦, 𑀳𑀺𑀫𑀯𑀦𑁆𑀢𑀸 𑀇𑀥𑀸𑀕𑀫𑀺𑀁;

𑀧𑀽𑀚𑁂𑀫𑀺 𑀢𑀁 𑀫𑀳𑀸𑀯𑀻𑀭, 𑀮𑁄𑀓𑀚𑁂𑀝𑁆𑀞 𑀫𑀳𑀸𑀬𑀲’.

𑁨𑁬𑁨. ‘‘𑀯𑀭𑀘𑀦𑁆𑀤𑀦𑁂𑀦𑀸𑀦𑀼𑀮𑀺𑀫𑁆𑀧𑀺𑀁, 𑀲𑀼𑀫𑁂𑀥𑀁 𑀮𑁄𑀓𑀦𑀸𑀬𑀓𑀁;

𑀲𑀓𑀁 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀢𑀼𑀡𑁆𑀳𑀻 𑀅𑀝𑁆𑀞𑀸𑀲𑀺 𑀢𑀸𑀯𑀤𑁂.

𑁨𑁬𑁩. ‘‘𑀲𑀼𑀫𑁂𑀥𑁄 𑀦𑀸𑀫 𑀪𑀕𑀯𑀸, 𑀮𑁄𑀓𑀚𑁂𑀝𑁆𑀞𑁄 𑀦𑀭𑀸𑀲𑀪𑁄;

𑀪𑀺𑀓𑁆𑀔𑀼𑀲𑀗𑁆𑀖𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

𑁨𑁬𑁪. ‘‘‘𑀬𑁄 𑀫𑁂 𑀕𑀼𑀡𑁂 𑀧𑀓𑀺𑀢𑁆𑀢𑁂𑀲𑀺, 𑀘𑀦𑁆𑀤𑀦𑀜𑁆𑀘 𑀅𑀧𑀽𑀚𑀬𑀺;

𑀢𑀫𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀲𑀼𑀡𑀸𑀣 𑀫𑀫 𑀪𑀸𑀲𑀢𑁄.

𑁨𑁬𑁫. ‘‘‘𑀆𑀤𑁂𑀬𑁆𑀬𑀯𑀸𑀓𑁆𑀬𑀯𑀘𑀦𑁄, 𑀩𑁆𑀭𑀳𑁆𑀫𑀸 𑀉𑀚𑀼 𑀧𑀢𑀸𑀧𑀯𑀸;

𑀧𑀜𑁆𑀘𑀯𑀻𑀲𑀢𑀺𑀓𑀧𑁆𑀧𑀸𑀦𑀺, 𑀲𑀧𑁆𑀧𑀪𑀸𑀲𑁄 𑀪𑀯𑀺𑀲𑁆𑀲𑀢𑀺.

𑁨𑁬𑁬. ‘‘‘𑀙𑀩𑁆𑀩𑀻𑀲𑀢𑀺𑀓𑀧𑁆𑀧𑀲𑀢𑁂, 𑀤𑁂𑀯𑀮𑁄𑀓𑁂 𑀭𑀫𑀺𑀲𑁆𑀲𑀢𑀺;

𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀁 𑀭𑀸𑀚𑀸 𑀘, 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺.

𑁨𑁬𑁭. ‘‘‘𑀢𑁂𑀢𑁆𑀢𑀺𑀁𑀲𑀓𑁆𑀔𑀢𑁆𑀢𑀼𑀁 𑀤𑁂𑀯𑀺𑀦𑁆𑀤𑁄, 𑀤𑁂𑀯𑀭𑀚𑁆𑀚𑀁 𑀓𑀭𑀺𑀲𑁆𑀲𑀢𑀺;

𑀧𑀤𑁂𑀲𑀭𑀚𑁆𑀚𑀁 𑀯𑀺𑀧𑀼𑀮𑀁, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀁.

𑁨𑁬𑁮. ‘‘‘𑀢𑀢𑁄 𑀘𑀼𑀢𑁄𑀬𑀁 𑀫𑀦𑀼𑀚𑁄, 𑀫𑀦𑀼𑀲𑁆𑀲𑀢𑁆𑀢𑀁 𑀕𑀫𑀺𑀲𑁆𑀲𑀢𑀺;

𑀧𑀼𑀜𑁆𑀜𑀓𑀫𑁆𑀫𑁂𑀦 𑀲𑀁𑀬𑀼𑀢𑁆𑀢𑁄, 𑀩𑁆𑀭𑀳𑁆𑀫𑀩𑀦𑁆𑀥𑀼 𑀪𑀯𑀺𑀲𑁆𑀲𑀢𑀺.

𑁨𑁬𑁯. ‘‘‘𑀅𑀚𑁆𑀛𑀸𑀬𑀓𑁄 𑀫𑀦𑁆𑀢𑀥𑀭𑁄, 𑀢𑀺𑀡𑁆𑀡𑀁 𑀯𑁂𑀤𑀸𑀦 𑀧𑀸𑀭𑀕𑀽;

𑀢𑀺𑀮𑀓𑁆𑀔𑀡𑁂𑀦 𑀲𑀫𑁆𑀧𑀦𑁆𑀦𑁄, 𑀩𑀸𑀯𑀭𑀻 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄.

𑁨𑁭𑁦. ‘‘‘𑀢𑀲𑁆𑀲 𑀲𑀺𑀲𑁆𑀲𑁄 𑀪𑀯𑀺𑀢𑁆𑀯𑀸𑀦, 𑀳𑁂𑀲𑁆𑀲𑀢𑀺 𑀫𑀦𑁆𑀢𑀧𑀸𑀭𑀕𑀽;

𑀉𑀧𑀕𑀦𑁆𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑀁, 𑀕𑁄𑀢𑀫𑀁 𑀲𑀓𑁆𑀬𑀧𑀼𑀗𑁆𑀕𑀯𑀁.

𑁨𑁭𑁧. ‘‘‘𑀧𑀼𑀘𑁆𑀙𑀺𑀢𑁆𑀯𑀸 𑀦𑀺𑀧𑀼𑀡𑁂 𑀧𑀜𑁆𑀳𑁂, 𑀪𑀸𑀯𑀬𑀺𑀢𑁆𑀯𑀸𑀦 𑀅𑀜𑁆𑀚𑀲𑀁 [𑀳𑀸𑀲𑀬𑀺𑀢𑁆𑀯𑀸𑀦 𑀫𑀸𑀦𑀲𑀁 (𑀲𑁆𑀬𑀸.), 𑀪𑀸𑀯𑀬𑀺𑀢𑁆𑀯𑀸𑀦 𑀲𑀜𑁆𑀘𑀬𑀁 (𑀓.)];

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀯𑀺𑀳𑀭𑀺𑀲𑁆𑀲𑀢𑀺𑀦𑀸𑀲𑀯𑁄’.

𑁨𑁭𑁨. ‘‘𑀢𑀺𑀯𑀺𑀥𑀕𑁆𑀕𑀺 𑀦𑀺𑀩𑁆𑀩𑀼𑀢𑀸 𑀫𑀬𑁆𑀳𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁨𑁭𑁩. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁨𑁭𑁪. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁨𑁭𑁫. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀢𑁄𑀤𑁂𑀬𑁆𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀢𑁄𑀤𑁂𑀬𑁆𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀅𑀝𑁆𑀞𑀫𑀁.