𑁭. 𑀳𑁂𑀫𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁮𑁩. ‘‘𑀧𑀩𑁆𑀪𑀸𑀭𑀓𑀽𑀝𑀁 𑀦𑀺𑀲𑁆𑀲𑀸𑀬, 𑀅𑀦𑁄𑀫𑁄 𑀦𑀸𑀫 𑀢𑀸𑀧𑀲𑁄;

𑀅𑀲𑁆𑀲𑀫𑀁 𑀲𑀼𑀓𑀢𑀁 𑀓𑀢𑁆𑀯𑀸, 𑀧𑀡𑁆𑀡𑀲𑀸𑀮𑁂 𑀯𑀲𑀻 𑀢𑀤𑀸.

𑁧𑁮𑁪. ‘‘𑀲𑀺𑀤𑁆𑀥𑀁 𑀢𑀲𑁆𑀲 𑀢𑀧𑁄 𑀓𑀫𑁆𑀫𑀁, 𑀲𑀺𑀤𑁆𑀥𑀺𑀧𑀢𑁆𑀢𑁄 𑀲𑀓𑁂 𑀩𑀮𑁂;

𑀲𑀓𑀲𑀸𑀫𑀜𑁆𑀜𑀯𑀺𑀓𑁆𑀓𑀦𑁆𑀢𑁄, 𑀆𑀢𑀸𑀧𑀻 𑀦𑀺𑀧𑀓𑁄 𑀫𑀼𑀦𑀺.

𑁧𑁮𑁫. ‘‘𑀯𑀺𑀲𑀸𑀭𑀤𑁄 𑀲𑀲𑀫𑀬𑁂, 𑀧𑀭𑀯𑀸𑀤𑁂 𑀘 𑀓𑁄𑀯𑀺𑀤𑁄;

𑀧𑀝𑁆𑀞𑁄 𑀪𑀽𑀫𑀦𑁆𑀢𑀮𑀺𑀓𑁆𑀔𑀫𑁆𑀳𑀺, 𑀉𑀧𑁆𑀧𑀸𑀢𑀫𑁆𑀳𑀺 𑀘 𑀓𑁄𑀯𑀺𑀤𑁄.

𑁧𑁮𑁬. ‘‘𑀯𑀻𑀢𑀲𑁄𑀓𑁄 𑀦𑀺𑀭𑀸𑀭𑀫𑁆𑀪𑁄, 𑀅𑀧𑁆𑀧𑀸𑀳𑀸𑀭𑁄 𑀅𑀮𑁄𑀮𑀼𑀧𑁄;

𑀮𑀸𑀪𑀸𑀮𑀸𑀪𑁂𑀦 𑀲𑀦𑁆𑀢𑀼𑀝𑁆𑀞𑁄, 𑀛𑀸𑀬𑀻 𑀛𑀸𑀦𑀭𑀢𑁄 𑀫𑀼𑀦𑀺.

𑁧𑁮𑁭. ‘‘𑀧𑀺𑀬𑀤𑀲𑁆𑀲𑀻 𑀦𑀸𑀫 𑀲𑀫𑁆𑀩𑀼𑀤𑁆𑀥𑁄, 𑀅𑀕𑁆𑀕𑁄 𑀓𑀸𑀭𑀼𑀡𑀺𑀓𑁄 𑀫𑀼𑀦𑀺;

𑀲𑀢𑁆𑀢𑁂 𑀢𑀸𑀭𑁂𑀢𑀼𑀓𑀸𑀫𑁄 𑀲𑁄, 𑀓𑀭𑀼𑀡𑀸𑀬 𑀨𑀭𑀻 𑀢𑀤𑀸.

𑁧𑁮𑁮. ‘‘𑀩𑁄𑀥𑀦𑁂𑀬𑁆𑀬𑀁 𑀚𑀦𑀁 𑀤𑀺𑀲𑁆𑀯𑀸, 𑀧𑀺𑀬𑀤𑀲𑁆𑀲𑀻 𑀫𑀳𑀸𑀫𑀼𑀦𑀺;

𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑀫𑁆𑀧𑀺, 𑀕𑀦𑁆𑀢𑁆𑀯𑀸 𑀑𑀯𑀤𑀢𑁂 𑀫𑀼𑀦𑀺.

𑁧𑁮𑁯. ‘‘𑀫𑀫𑀼𑀤𑁆𑀥𑀭𑀺𑀢𑀼𑀓𑀸𑀫𑁄 𑀲𑁄, 𑀫𑀫𑀲𑁆𑀲𑀫𑀫𑀼𑀧𑀸𑀕𑀫𑀺;

𑀦 𑀤𑀺𑀝𑁆𑀞𑁄 𑀫𑁂 𑀚𑀺𑀦𑁄 𑀧𑀼𑀩𑁆𑀩𑁂, 𑀦 𑀲𑀼𑀢𑁄𑀧𑀺 𑀘 𑀓𑀲𑁆𑀲𑀘𑀺.

𑁧𑁯𑁦. ‘‘𑀉𑀧𑁆𑀧𑀸𑀢𑀸 𑀲𑀼𑀧𑀺𑀦𑀸 𑀫𑀬𑁆𑀳𑀁, 𑀮𑀓𑁆𑀔𑀡𑀸 𑀲𑀼𑀧𑁆𑀧𑀓𑀸𑀲𑀺𑀢𑀸;

𑀧𑀝𑁆𑀞𑁄 𑀪𑀽𑀫𑀦𑁆𑀢𑀮𑀺𑀓𑁆𑀔𑀫𑁆𑀳𑀺, 𑀦𑀓𑁆𑀔𑀢𑁆𑀢𑀧𑀤𑀓𑁄𑀯𑀺𑀤𑁄.

𑁧𑁯𑁧. ‘‘𑀲𑁄𑀳𑀁 𑀩𑀼𑀤𑁆𑀥𑀲𑁆𑀲 𑀲𑀼𑀢𑁆𑀯𑀸𑀦, 𑀢𑀢𑁆𑀣 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁;

𑀢𑀺𑀝𑁆𑀞𑀦𑁆𑀢𑁄 [𑀪𑀼𑀜𑁆𑀚𑀦𑁆𑀢𑁄 (𑀲𑀻. 𑀧𑀻. 𑀓.)] 𑀯𑀸 𑀦𑀺𑀲𑀺𑀦𑁆𑀦𑁄 𑀯𑀸, 𑀲𑀭𑀸𑀫𑀺 𑀦𑀺𑀘𑁆𑀘𑀓𑀸𑀮𑀺𑀓𑀁.

𑁧𑁯𑁨. ‘‘𑀫𑀬𑀺 𑀏𑀯𑀁 𑀲𑀭𑀦𑁆𑀢𑀫𑁆𑀳𑀺, 𑀪𑀕𑀯𑀸𑀧𑀺 𑀅𑀦𑀼𑀲𑁆𑀲𑀭𑀺;

𑀩𑀼𑀤𑁆𑀥𑀁 𑀅𑀦𑀼𑀲𑁆𑀲𑀭𑀦𑁆𑀢𑀲𑁆𑀲, 𑀧𑀻𑀢𑀺 𑀫𑁂 𑀳𑁄𑀢𑀺 𑀢𑀸𑀯𑀤𑁂.

𑁧𑁯𑁩. ‘‘𑀓𑀸𑀮𑀜𑁆𑀘 𑀧𑀼𑀦𑀭𑀸𑀕𑀫𑁆𑀫, 𑀉𑀧𑁂𑀲𑀺 𑀫𑀁 𑀫𑀳𑀸𑀫𑀼𑀦𑀺;

𑀲𑀫𑁆𑀧𑀢𑁆𑀢𑁂𑀧𑀺 𑀦 𑀚𑀸𑀦𑀸𑀫𑀺, 𑀅𑀬𑀁 𑀩𑀼𑀤𑁆𑀥𑁄 𑀫𑀳𑀸𑀫𑀼𑀦𑀺.

𑁧𑁯𑁪. ‘‘𑀅𑀦𑀼𑀓𑀫𑁆𑀧𑀓𑁄 𑀓𑀸𑀭𑀼𑀡𑀺𑀓𑁄, 𑀧𑀺𑀬𑀤𑀲𑁆𑀲𑀻 𑀫𑀳𑀸𑀫𑀼𑀦𑀺;

𑀲𑀜𑁆𑀚𑀸𑀦𑀸𑀧𑁂𑀲𑀺 𑀅𑀢𑁆𑀢𑀸𑀦𑀁, ‘𑀅𑀳𑀁 𑀩𑀼𑀤𑁆𑀥𑁄 𑀲𑀤𑁂𑀯𑀓𑁂’.

𑁧𑁯𑁫. ‘‘𑀲𑀜𑁆𑀚𑀸𑀦𑀺𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑀁, 𑀧𑀺𑀬𑀤𑀲𑁆𑀲𑀺𑀁 𑀫𑀳𑀸𑀫𑀼𑀦𑀺𑀁;

𑀲𑀓𑀁 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺𑀁.

𑁧𑁯𑁬. ‘‘‘𑀅𑀜𑁆𑀜𑁂 [𑀲𑀩𑁆𑀩𑁂 (𑀲𑁆𑀬𑀸.)] 𑀧𑀻𑀞𑁂 𑀘 𑀧𑀮𑁆𑀮𑀗𑁆𑀓𑁂, 𑀆𑀲𑀦𑁆𑀤𑀻𑀲𑀼 𑀦𑀺𑀲𑀻𑀤𑀭𑁂;

𑀢𑀼𑀯𑀫𑁆𑀧𑀺 𑀲𑀩𑁆𑀩𑀤𑀲𑁆𑀲𑀸𑀯𑀻, 𑀦𑀺𑀲𑀻𑀤 𑀭𑀢𑀦𑀸𑀲𑀦𑁂’.

𑁧𑁯𑁭. ‘‘𑀲𑀩𑁆𑀩𑀭𑀢𑀦𑀫𑀬𑀁 𑀧𑀻𑀞𑀁, 𑀦𑀺𑀫𑁆𑀫𑀺𑀦𑀺𑀢𑁆𑀯𑀸𑀦 𑀢𑀸𑀯𑀤𑁂;

𑀧𑀺𑀬𑀤𑀲𑁆𑀲𑀺𑀲𑁆𑀲 𑀫𑀼𑀦𑀺𑀦𑁄, 𑀅𑀤𑀸𑀲𑀺𑀁 𑀇𑀤𑁆𑀥𑀺𑀦𑀺𑀫𑁆𑀫𑀺𑀢𑀁.

𑁧𑁯𑁮. ‘‘𑀭𑀢𑀦𑁂 𑀘 𑀦𑀺𑀲𑀺𑀦𑁆𑀦𑀲𑁆𑀲, 𑀧𑀻𑀞𑀓𑁂 𑀇𑀤𑁆𑀥𑀺𑀦𑀺𑀫𑁆𑀫𑀺𑀢𑁂;

𑀓𑀼𑀫𑁆𑀪𑀫𑀢𑁆𑀢𑀁 𑀚𑀫𑁆𑀩𑀼𑀨𑀮𑀁, 𑀅𑀤𑀸𑀲𑀺𑀁 𑀢𑀸𑀯𑀤𑁂 𑀅𑀳𑀁.

𑁧𑁯𑁯. ‘‘𑀫𑀫 𑀳𑀸𑀲𑀁 𑀚𑀦𑁂𑀢𑁆𑀯𑀸𑀦, 𑀧𑀭𑀺𑀪𑀼𑀜𑁆𑀚𑀺 𑀫𑀳𑀸𑀫𑀼𑀦𑀺;

𑀢𑀤𑀸 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀲𑀢𑁆𑀣𑀸𑀭𑀁 𑀅𑀪𑀺𑀯𑀸𑀤𑀬𑀺𑀁.

𑁨𑁦𑁦. ‘‘𑀧𑀺𑀬𑀤𑀲𑁆𑀲𑀻 𑀢𑀼 𑀪𑀕𑀯𑀸, 𑀮𑁄𑀓𑀚𑁂𑀝𑁆𑀞𑁄 𑀦𑀭𑀸𑀲𑀪𑁄;

𑀭𑀢𑀦𑀸𑀲𑀦𑀫𑀸𑀲𑀻𑀦𑁄, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

𑁨𑁦𑁧. ‘‘‘𑀬𑁄 𑀫𑁂 𑀭𑀢𑀦𑀫𑀬𑀁 𑀧𑀻𑀞𑀁, 𑀅𑀫𑀢𑀜𑁆𑀘 𑀨𑀮𑀁 𑀅𑀤𑀸;

𑀢𑀫𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀲𑀼𑀡𑀸𑀣 𑀫𑀫 𑀪𑀸𑀲𑀢𑁄.

𑁨𑁦𑁨. ‘‘‘𑀲𑀢𑁆𑀢𑀲𑀢𑁆𑀢𑀢𑀺 𑀓𑀧𑁆𑀧𑀸𑀦𑀺, 𑀤𑁂𑀯𑀮𑁄𑀓𑁂 𑀭𑀫𑀺𑀲𑁆𑀲𑀢𑀺;

𑀧𑀜𑁆𑀘𑀲𑀢𑁆𑀢𑀢𑀺𑀓𑁆𑀔𑀢𑁆𑀢𑀼𑀜𑁆𑀘, 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺.

𑁨𑁦𑁩. ‘‘‘𑀤𑁆𑀯𑀢𑁆𑀢𑀺𑀁𑀲𑀓𑁆𑀔𑀢𑁆𑀢𑀼𑀁 𑀤𑁂𑀯𑀺𑀦𑁆𑀤𑁄, 𑀤𑁂𑀯𑀭𑀚𑁆𑀚𑀁 𑀓𑀭𑀺𑀲𑁆𑀲𑀢𑀺;

𑀧𑀤𑁂𑀲𑀭𑀚𑁆𑀚𑀁 𑀯𑀺𑀧𑀼𑀮𑀁, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀁.

𑁨𑁦𑁪. ‘‘‘𑀲𑁄𑀡𑁆𑀡𑀫𑀬𑀁 𑀭𑀽𑀧𑀺𑀫𑀬𑀁, 𑀧𑀮𑁆𑀮𑀗𑁆𑀓𑀁 𑀲𑀼𑀓𑀢𑀁 𑀩𑀳𑀼𑀁;

𑀮𑁄𑀳𑀺𑀢𑀗𑁆𑀕𑀫𑀬𑀜𑁆𑀘𑁂𑀯, 𑀮𑀘𑁆𑀙𑀢𑀺 𑀭𑀢𑀦𑀸𑀫𑀬𑀁.

𑁨𑁦𑁫. ‘‘‘𑀘𑀗𑁆𑀓𑀫𑀦𑁆𑀢𑀫𑁆𑀧𑀺 𑀫𑀦𑀼𑀚𑀁, 𑀧𑀼𑀜𑁆𑀜𑀓𑀫𑁆𑀫𑀲𑀫𑀗𑁆𑀕𑀺𑀦𑀁;

𑀧𑀮𑁆𑀮𑀗𑁆𑀓𑀸𑀦𑀺 𑀅𑀦𑁂𑀓𑀸𑀦𑀺, 𑀧𑀭𑀺𑀯𑀸𑀭𑁂𑀲𑁆𑀲𑀭𑁂 𑀢𑀤𑀸.

𑁨𑁦𑁬. ‘‘‘𑀓𑀽𑀝𑀸𑀕𑀸𑀭𑀸 𑀘 𑀧𑀸𑀲𑀸𑀤𑀸, 𑀲𑀬𑀦𑀜𑁆𑀘 𑀫𑀳𑀸𑀭𑀳𑀁;

𑀇𑀫𑀲𑁆𑀲 𑀘𑀺𑀢𑁆𑀢𑀫𑀜𑁆𑀜𑀸𑀬, 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀦𑁆𑀢𑀺 𑀢𑀸𑀯𑀤𑁂.

𑁨𑁦𑁭. ‘‘‘𑀲𑀝𑁆𑀞𑀺 𑀦𑀸𑀕𑀲𑀳𑀲𑁆𑀲𑀸𑀦𑀺, 𑀲𑀩𑁆𑀩𑀸𑀮𑀗𑁆𑀓𑀸𑀭𑀪𑀽𑀲𑀺𑀢𑀸;

𑀲𑀼𑀯𑀡𑁆𑀡𑀓𑀘𑁆𑀙𑀸 𑀫𑀸𑀢𑀗𑁆𑀕𑀸, 𑀳𑁂𑀫𑀓𑀧𑁆𑀧𑀦𑀯𑀸𑀲𑀲𑀸 [𑀳𑁂𑀫𑀓𑀧𑁆𑀧𑀦𑀺𑀯𑀸𑀲𑀦𑀸 (𑀲𑀻. 𑀲𑁆𑀬𑀸.), 𑀳𑁂𑀫𑀓𑀧𑁆𑀧𑀦𑀺𑀯𑀸𑀲𑀲𑀸 (𑀓.)].

𑁨𑁦𑁮. ‘‘‘𑀆𑀭𑀽𑀴𑁆𑀳𑀸 𑀕𑀸𑀫𑀡𑀻𑀬𑁂𑀳𑀺, 𑀢𑁄𑀫𑀭𑀗𑁆𑀓𑀼𑀲𑀧𑀸𑀡𑀺𑀪𑀺;

𑀇𑀫𑀁 𑀧𑀭𑀺𑀘𑀭𑀺𑀲𑁆𑀲𑀦𑁆𑀢𑀺, 𑀭𑀢𑁆𑀦𑀧𑀻𑀞𑀲𑁆𑀲𑀺𑀤𑀁 𑀨𑀮𑀁.

𑁨𑁦𑁯. ‘‘‘𑀲𑀝𑁆𑀞𑀺 𑀅𑀲𑁆𑀲𑀲𑀳𑀲𑁆𑀲𑀸𑀦𑀺, 𑀲𑀩𑁆𑀩𑀸𑀮𑀗𑁆𑀓𑀸𑀭𑀪𑀽𑀲𑀺𑀢𑀸;

𑀆𑀚𑀸𑀦𑀻𑀬𑀸𑀯 𑀚𑀸𑀢𑀺𑀬𑀸, 𑀲𑀺𑀦𑁆𑀥𑀯𑀸 𑀲𑀻𑀖𑀯𑀸𑀳𑀺𑀦𑁄.

𑁨𑁧𑁦. ‘‘‘𑀆𑀭𑀽𑀴𑁆𑀳𑀸 𑀕𑀸𑀫𑀡𑀻𑀬𑁂𑀳𑀺, 𑀇𑀮𑁆𑀮𑀺𑀬𑀸𑀘𑀸𑀧𑀥𑀸𑀭𑀺𑀪𑀺;

𑀢𑁂𑀧𑀺𑀫𑀁 𑀧𑀭𑀺𑀘𑀭𑀺𑀲𑁆𑀲𑀦𑁆𑀢𑀺, 𑀭𑀢𑁆𑀦𑀧𑀻𑀞𑀲𑁆𑀲𑀺𑀤𑀁 𑀨𑀮𑀁.

𑁨𑁧𑁧. ‘‘‘𑀲𑀝𑁆𑀞𑀺 𑀭𑀣𑀲𑀳𑀲𑁆𑀲𑀸𑀦𑀺, 𑀲𑀩𑁆𑀩𑀸𑀮𑀗𑁆𑀓𑀸𑀭𑀪𑀽𑀲𑀺𑀢𑀸;

𑀤𑀻𑀧𑀸 𑀅𑀣𑁄𑀧𑀺 𑀯𑁂𑀬𑀕𑁆𑀖𑀸, 𑀲𑀦𑁆𑀦𑀤𑁆𑀥𑀸 𑀉𑀲𑁆𑀲𑀺𑀢𑀤𑁆𑀥𑀚𑀸.

𑁨𑁧𑁨. ‘‘‘𑀆𑀭𑀽𑀴𑁆𑀳𑀸 𑀕𑀸𑀫𑀡𑀻𑀬𑁂𑀳𑀺, 𑀘𑀸𑀧𑀳𑀢𑁆𑀣𑁂𑀳𑀺 𑀯𑀫𑁆𑀫𑀺𑀪𑀺;

𑀧𑀭𑀺𑀯𑀸𑀭𑁂𑀲𑁆𑀲𑀦𑁆𑀢𑀺𑀫𑀁 𑀦𑀺𑀘𑁆𑀘𑀁, 𑀭𑀢𑁆𑀦𑀧𑀻𑀞𑀲𑁆𑀲𑀺𑀤𑀁 𑀨𑀮𑀁.

𑁨𑁧𑁩. ‘‘‘𑀲𑀝𑁆𑀞𑀺 𑀥𑁂𑀦𑀼𑀲𑀳𑀲𑁆𑀲𑀸𑀦𑀺, 𑀤𑁄𑀳𑀜𑁆𑀜𑀸 𑀧𑀼𑀗𑁆𑀕𑀯𑀽𑀲𑀪𑁂;

𑀯𑀘𑁆𑀙𑀓𑁂 𑀚𑀦𑀬𑀺𑀲𑁆𑀲𑀦𑁆𑀢𑀺, 𑀭𑀢𑁆𑀦𑀧𑀻𑀞𑀲𑁆𑀲𑀺𑀤𑀁 𑀨𑀮𑀁.

𑁨𑁧𑁪. ‘‘‘𑀲𑁄𑀴𑀲𑀺𑀢𑁆𑀣𑀺𑀲𑀳𑀲𑁆𑀲𑀸𑀦𑀺, 𑀲𑀩𑁆𑀩𑀸𑀮𑀗𑁆𑀓𑀸𑀭𑀪𑀽𑀲𑀺𑀢𑀸;

𑀯𑀺𑀘𑀺𑀢𑁆𑀢𑀯𑀢𑁆𑀣𑀸𑀪𑀭𑀡𑀸, 𑀆𑀫𑀼𑀓𑁆𑀓𑀫𑀡𑀺𑀓𑀼𑀡𑁆𑀟𑀮𑀸.

𑁨𑁧𑁫. ‘‘‘𑀅𑀴𑀸𑀭𑀧𑀫𑁆𑀳𑀸 𑀳𑀲𑀼𑀮𑀸, 𑀲𑀼𑀲𑀜𑁆𑀜𑀸 𑀢𑀦𑀼𑀫𑀚𑁆𑀛𑀺𑀫𑀸;

𑀧𑀭𑀺𑀯𑀸𑀭𑁂𑀲𑁆𑀲𑀦𑁆𑀢𑀺𑀫𑀁 𑀦𑀺𑀘𑁆𑀘𑀁, 𑀭𑀢𑁆𑀦𑀧𑀻𑀞𑀲𑁆𑀲𑀺𑀤𑀁 𑀨𑀮𑀁.

𑁨𑁧𑁬. ‘‘‘𑀅𑀝𑁆𑀞𑀸𑀭𑀲𑁂 𑀓𑀧𑁆𑀧𑀲𑀢𑁂, 𑀕𑁄𑀢𑀫𑁄 𑀦𑀸𑀫 𑀘𑀓𑁆𑀔𑀼𑀫𑀸;

𑀢𑀫𑀦𑁆𑀥𑀓𑀸𑀭𑀁 𑀯𑀺𑀥𑀫𑀺𑀢𑁆𑀯𑀸, 𑀩𑀼𑀤𑁆𑀥𑁄 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

𑁨𑁧𑁭. ‘‘‘𑀢𑀲𑁆𑀲 𑀤𑀲𑁆𑀲𑀦𑀫𑀸𑀕𑀫𑁆𑀫, 𑀧𑀩𑁆𑀩𑀚𑀺𑀲𑁆𑀲𑀢𑀺𑀓𑀺𑀜𑁆𑀘𑀦𑁄;

𑀢𑁄𑀲𑀬𑀺𑀢𑁆𑀯𑀸𑀦 𑀲𑀢𑁆𑀣𑀸𑀭𑀁, 𑀲𑀸𑀲𑀦𑁂𑀪𑀺𑀭𑀫𑀺𑀲𑁆𑀲𑀢𑀺.

𑁨𑁧𑁮. ‘‘‘𑀢𑀲𑁆𑀲 𑀥𑀫𑁆𑀫𑀁 𑀲𑀼𑀡𑀺𑀢𑁆𑀯𑀸𑀦, 𑀓𑀺𑀮𑁂𑀲𑁂 𑀖𑀸𑀢𑀬𑀺𑀲𑁆𑀲𑀢𑀺;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺𑀦𑀸𑀲𑀯𑁄’.

𑁨𑁧𑁯. ‘‘𑀯𑀻𑀭𑀺𑀬𑀁 𑀫𑁂 𑀥𑀼𑀭𑀥𑁄𑀭𑀬𑁆𑀳𑀁, 𑀬𑁄𑀕𑀓𑁆𑀔𑁂𑀫𑀸𑀥𑀺𑀯𑀸𑀳𑀦𑀁;

𑀉𑀢𑁆𑀢𑀫𑀢𑁆𑀣𑀁 𑀧𑀢𑁆𑀣𑀬𑀦𑁆𑀢𑁄, 𑀲𑀸𑀲𑀦𑁂 𑀯𑀺𑀳𑀭𑀸𑀫𑀳𑀁.

𑁨𑁨𑁦. ‘‘𑀇𑀤𑀁 𑀧𑀘𑁆𑀙𑀺𑀫𑀓𑀁 𑀫𑀬𑁆𑀳𑀁, 𑀘𑀭𑀺𑀫𑁄 𑀯𑀢𑁆𑀢𑀢𑁂 𑀪𑀯𑁄;

𑀲𑀩𑁆𑀩𑀸𑀲𑀯𑀸 𑀧𑀭𑀺𑀓𑁆𑀔𑀻𑀡𑀸, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄.

𑁨𑁨𑁧. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁨𑁨𑁨. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁨𑁨𑁩. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀳𑁂𑀫𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺;

𑀳𑁂𑀫𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀲𑀢𑁆𑀢𑀫𑀁.

𑀲𑀢𑁆𑀢𑀭𑀲𑀫𑀁 𑀪𑀸𑀡𑀯𑀸𑀭𑀁.