𑁬. 𑀦𑀦𑁆𑀤𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁬𑁧. ‘‘𑀫𑀺𑀕𑀮𑀼𑀤𑁆𑀤𑁄 𑀧𑀼𑀭𑁂 𑀆𑀲𑀺𑀁, 𑀅𑀭𑀜𑁆𑀜𑁂 𑀓𑀸𑀦𑀦𑁂 𑀅𑀳𑀁;

𑀧𑀲𑀤𑀁 𑀫𑀺𑀕𑀫𑁂𑀲𑀦𑁆𑀢𑁄, 𑀲𑀬𑀫𑁆𑀪𑀼𑀁 𑀅𑀤𑁆𑀤𑀲𑀁 𑀅𑀳𑀁 [𑀚𑀺𑀦𑀁 (𑀲𑀻.)].

𑁧𑁬𑁨. ‘‘𑀅𑀦𑀼𑀭𑀼𑀤𑁆𑀥𑁄 𑀦𑀸𑀫 𑀲𑀫𑁆𑀩𑀼𑀤𑁆𑀥𑁄, 𑀲𑀬𑀫𑁆𑀪𑀽 𑀅𑀧𑀭𑀸𑀚𑀺𑀢𑁄;

𑀯𑀺𑀯𑁂𑀓𑀓𑀸𑀫𑁄 𑀲𑁄 𑀥𑀻𑀭𑁄, 𑀯𑀦𑀫𑀚𑁆𑀛𑁄𑀕𑀳𑀻 𑀢𑀤𑀸.

𑁧𑁬𑁩. ‘‘𑀘𑀢𑀼𑀤𑀡𑁆𑀟𑁂 𑀕𑀳𑁂𑀢𑁆𑀯𑀸𑀦, 𑀘𑀢𑀼𑀝𑁆𑀞𑀸𑀦𑁂 𑀞𑀧𑁂𑀲𑀳𑀁;

𑀫𑀡𑁆𑀟𑀧𑀁 𑀲𑀼𑀓𑀢𑀁 𑀓𑀢𑁆𑀯𑀸, 𑀧𑀤𑁆𑀫𑀧𑀼𑀧𑁆𑀨𑁂𑀳𑀺 𑀙𑀸𑀤𑀬𑀺𑀁.

𑁧𑁬𑁪. ‘‘𑀫𑀡𑁆𑀟𑀧𑀁 𑀙𑀸𑀤𑀬𑀺𑀢𑁆𑀯𑀸𑀦, 𑀲𑀬𑀫𑁆𑀪𑀼𑀁 𑀅𑀪𑀺𑀯𑀸𑀤𑀬𑀺𑀁;

𑀥𑀦𑀼𑀁 𑀢𑀢𑁆𑀣𑁂𑀯 𑀦𑀺𑀓𑁆𑀔𑀺𑀧𑁆𑀧, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁.

𑁧𑁬𑁫. ‘‘𑀦𑀘𑀺𑀭𑀁 𑀧𑀩𑁆𑀩𑀚𑀺𑀢𑀲𑁆𑀲 [𑀧𑀩𑁆𑀩𑀚𑀺𑀢𑀲𑁆𑀲 𑀅𑀘𑀺𑀭𑀁 (𑀲𑀻.)], 𑀩𑁆𑀬𑀸𑀥𑀺 𑀫𑁂 𑀉𑀤𑀧𑀚𑁆𑀚𑀣;

𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸𑀦, 𑀢𑀢𑁆𑀣 𑀓𑀸𑀮𑀗𑁆𑀓𑀢𑁄 𑀅𑀳𑀁.

𑁧𑁬𑁬. ‘‘𑀧𑀼𑀩𑁆𑀩𑀓𑀫𑁆𑀫𑁂𑀦 𑀲𑀁𑀬𑀼𑀢𑁆𑀢𑁄, 𑀢𑀼𑀲𑀺𑀢𑀁 𑀅𑀕𑀫𑀸𑀲𑀳𑀁;

𑀢𑀢𑁆𑀣 𑀲𑁄𑀡𑁆𑀡𑀫𑀬𑀁 𑀩𑁆𑀬𑀫𑁆𑀳𑀁, 𑀦𑀺𑀩𑁆𑀩𑀢𑁆𑀢𑀢𑀺 𑀬𑀤𑀺𑀘𑁆𑀙𑀓𑀁.

𑁧𑁬𑁭. ‘‘𑀲𑀳𑀲𑁆𑀲𑀬𑀼𑀢𑁆𑀢𑀁 𑀳𑀬𑀯𑀸𑀳𑀺𑀁, 𑀤𑀺𑀩𑁆𑀩𑀬𑀸𑀦𑀫𑀥𑀺𑀝𑁆𑀞𑀺𑀢𑁄;

𑀆𑀭𑀼𑀳𑀺𑀢𑁆𑀯𑀸𑀦 𑀢𑀁 𑀬𑀸𑀦𑀁, 𑀕𑀘𑁆𑀙𑀸𑀫𑀳𑀁 𑀬𑀤𑀺𑀘𑁆𑀙𑀓𑀁.

𑁧𑁬𑁮. ‘‘𑀢𑀢𑁄 𑀫𑁂 𑀦𑀺𑀬𑁆𑀬𑀫𑀸𑀦𑀲𑁆𑀲, 𑀤𑁂𑀯𑀪𑀽𑀢𑀲𑁆𑀲 𑀫𑁂 𑀲𑀢𑁄;

𑀲𑀫𑀦𑁆𑀢𑀸 𑀬𑁄𑀚𑀦𑀲𑀢𑀁, 𑀫𑀡𑁆𑀟𑀧𑁄 𑀫𑁂 𑀥𑀭𑀻𑀬𑀢𑀺.

𑁧𑁬𑁯. ‘‘𑀲𑀬𑀦𑁂𑀳𑀁 𑀢𑀼𑀯𑀝𑁆𑀝𑀸𑀫𑀺, 𑀅𑀘𑁆𑀙𑀦𑁆𑀦𑁂 [𑀅𑀘𑁆𑀘𑀦𑁆𑀢𑀁 (𑀲𑀻.), 𑀅𑀘𑁆𑀘𑀦𑁆𑀢 (𑀧𑀻.)] 𑀧𑀼𑀧𑁆𑀨𑀲𑀦𑁆𑀣𑀢𑁂;

𑀅𑀦𑁆𑀢𑀮𑀺𑀓𑁆𑀔𑀸 𑀘 𑀧𑀤𑀼𑀫𑀸, 𑀯𑀲𑁆𑀲𑀦𑁆𑀢𑁂 𑀦𑀺𑀘𑁆𑀘𑀓𑀸𑀮𑀺𑀓𑀁.

𑁧𑁭𑁦. ‘‘𑀫𑀭𑀻𑀘𑀺𑀓𑁂 𑀨𑀦𑁆𑀤𑀫𑀸𑀦𑁂, 𑀢𑀧𑁆𑀧𑀫𑀸𑀦𑁂 𑀘 𑀆𑀢𑀧𑁂;

𑀦 𑀫𑀁 𑀢𑀸𑀧𑁂𑀢𑀺 𑀆𑀢𑀸𑀧𑁄, 𑀫𑀡𑁆𑀟𑀧𑀲𑁆𑀲 𑀇𑀤𑀁 𑀨𑀮𑀁.

𑁧𑁭𑁧. ‘‘𑀤𑀼𑀕𑁆𑀕𑀢𑀺𑀁 𑀲𑀫𑀢𑀺𑀓𑁆𑀓𑀦𑁆𑀢𑁄, 𑀅𑀧𑀸𑀬𑀸 𑀧𑀺𑀳𑀺𑀢𑀸 𑀫𑀫;

𑀫𑀡𑁆𑀟𑀧𑁂 𑀭𑀼𑀓𑁆𑀔𑀫𑀽𑀮𑁂 𑀯𑀸, 𑀲𑀦𑁆𑀢𑀸𑀧𑁄 𑀫𑁂 𑀦 𑀯𑀺𑀚𑁆𑀚𑀢𑀺.

𑁧𑁭𑁨. ‘‘𑀫𑀳𑀻𑀲𑀜𑁆𑀜𑀁 𑀅𑀥𑀺𑀝𑁆𑀞𑀸𑀬, 𑀮𑁄𑀡𑀢𑁄𑀬𑀁 𑀢𑀭𑀸𑀫𑀳𑀁;

𑀢𑀲𑁆𑀲 𑀫𑁂 𑀲𑀼𑀓𑀢𑀁 𑀓𑀫𑁆𑀫𑀁, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁧𑁭𑁩. ‘‘𑀅𑀧𑀣𑀫𑁆𑀧𑀺 [𑀅𑀩𑁆𑀪𑀫𑁆𑀳𑀺 (𑀲𑁆𑀬𑀸. 𑀓.)] 𑀧𑀣𑀁 𑀓𑀢𑁆𑀯𑀸, 𑀕𑀘𑁆𑀙𑀸𑀫𑀺 𑀅𑀦𑀺𑀮𑀜𑁆𑀚𑀲𑁂;

𑀅𑀳𑁄 𑀫𑁂 𑀲𑀼𑀓𑀢𑀁 𑀓𑀫𑁆𑀫𑀁, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁧𑁭𑁪. ‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀚𑀸𑀦𑀸𑀫𑀺, 𑀤𑀺𑀩𑁆𑀩𑀘𑀓𑁆𑀔𑀼 𑀯𑀺𑀲𑁄𑀥𑀺𑀢𑀁;

𑀆𑀲𑀯𑀸 𑀫𑁂 𑀧𑀭𑀺𑀓𑁆𑀔𑀻𑀡𑀸, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁧𑁭𑁫. ‘‘𑀚𑀳𑀺𑀢𑀸 𑀧𑀼𑀭𑀺𑀫𑀸 𑀚𑀸𑀢𑀺, 𑀩𑀼𑀤𑁆𑀥𑀲𑁆𑀲 𑀑𑀭𑀲𑁄 𑀅𑀳𑀁;

𑀤𑀸𑀬𑀸𑀤𑁄𑀫𑁆𑀳𑀺 𑀘 𑀲𑀤𑁆𑀥𑀫𑁆𑀫𑁂, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁧𑁭𑁬. ‘‘𑀆𑀭𑀸𑀥𑀺𑀢𑁄𑀫𑁆𑀳𑀺 𑀲𑀼𑀕𑀢𑀁, 𑀕𑁄𑀢𑀫𑀁 𑀲𑀓𑁆𑀬𑀧𑀼𑀗𑁆𑀕𑀯𑀁;

𑀥𑀫𑁆𑀫𑀥𑀚𑁄 𑀥𑀫𑁆𑀫𑀤𑀸𑀬𑀸𑀤𑁄 [𑀥𑀫𑁆𑀫𑀸𑀤𑀸𑀲𑁄 (𑀓.)], 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁧𑁭𑁭. ‘‘𑀉𑀧𑀝𑁆𑀞𑀺𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑀁, 𑀕𑁄𑀢𑀫𑀁 𑀲𑀓𑁆𑀬𑀧𑀼𑀗𑁆𑀕𑀯𑀁;

𑀧𑀸𑀭𑀗𑁆𑀕𑀫𑀦𑀺𑀬𑀁 𑀫𑀕𑁆𑀕𑀁, 𑀅𑀧𑀼𑀘𑁆𑀙𑀺𑀁 𑀮𑁄𑀓𑀦𑀸𑀬𑀓𑀁.

𑁧𑁭𑁮. ‘‘𑀅𑀚𑁆𑀛𑀺𑀝𑁆𑀞𑁄 𑀓𑀣𑀬𑀻 𑀩𑀼𑀤𑁆𑀥𑁄, 𑀕𑀫𑁆𑀪𑀻𑀭𑀁 𑀦𑀺𑀧𑀼𑀡𑀁 𑀧𑀤𑀁;

𑀢𑀲𑁆𑀲𑀸𑀳𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸𑀦, 𑀧𑀢𑁆𑀢𑁄𑀫𑁆𑀳𑀺 𑀆𑀲𑀯𑀓𑁆𑀔𑀬𑀁.

𑁧𑁭𑁯. ‘‘𑀅𑀳𑁄 𑀫𑁂 𑀲𑀼𑀓𑀢𑀁 𑀓𑀫𑁆𑀫𑀁, 𑀧𑀭𑀺𑀫𑀼𑀢𑁆𑀢𑁄𑀫𑁆𑀳𑀺 𑀚𑀸𑀢𑀺𑀬𑀸;

𑀲𑀩𑁆𑀩𑀸𑀲𑀯𑀧𑀭𑀺𑀓𑁆𑀔𑀻𑀡𑁄, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄.

𑁧𑁮𑁦. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁧𑁮𑁧. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁧𑁮𑁨. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀦𑀦𑁆𑀤𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀦𑀦𑁆𑀤𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀙𑀝𑁆𑀞𑀁.