𑁫. 𑀉𑀧𑀲𑀻𑀯𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁦𑁦. ‘‘𑀳𑀺𑀫𑀯𑀦𑁆𑀢𑀲𑁆𑀲𑀸𑀯𑀺𑀤𑀽𑀭𑁂, 𑀅𑀦𑁄𑀫𑁄 𑀦𑀸𑀫 𑀧𑀩𑁆𑀩𑀢𑁄;

𑀅𑀲𑁆𑀲𑀫𑁄 𑀲𑀼𑀓𑀢𑁄 𑀫𑀬𑁆𑀳𑀁, 𑀧𑀡𑁆𑀡𑀲𑀸𑀮𑀸 𑀲𑀼𑀫𑀸𑀧𑀺𑀢𑀸.

𑁧𑁦𑁧. ‘‘𑀦𑀤𑀻 𑀘 𑀲𑀦𑁆𑀤𑀢𑀻 𑀢𑀢𑁆𑀣, 𑀲𑀼𑀧𑀢𑀺𑀢𑁆𑀣𑀸 𑀫𑀦𑁄𑀭𑀫𑀸;

𑀅𑀦𑀽𑀧𑀢𑀺𑀢𑁆𑀣𑁂 𑀚𑀸𑀬𑀦𑁆𑀢𑀺, 𑀧𑀤𑀼𑀫𑀼𑀧𑁆𑀧𑀮𑀓𑀸 𑀩𑀳𑀽.

𑁧𑁦𑁨. ‘‘𑀧𑀸𑀞𑀻𑀦𑀸 𑀧𑀸𑀯𑀼𑀲𑀸 𑀫𑀘𑁆𑀙𑀸, 𑀩𑀮𑀚𑀸 𑀫𑀼𑀜𑁆𑀚𑀭𑁄𑀳𑀺𑀢𑀸;

𑀫𑀘𑁆𑀙𑀓𑀘𑁆𑀙𑀧𑀲𑀜𑁆𑀙𑀦𑁆𑀦𑀸 [𑀫𑀘𑁆𑀙𑀓𑀘𑁆𑀙𑀧𑀲𑀫𑁆𑀧𑀦𑁆𑀦𑀸 (?)], 𑀦𑀤𑀺𑀓𑀸 𑀲𑀦𑁆𑀤𑀢𑁂 𑀢𑀤𑀸.

𑁧𑁦𑁩. ‘‘𑀢𑀺𑀫𑀺𑀭𑀸 𑀧𑀼𑀧𑁆𑀨𑀺𑀢𑀸 𑀢𑀢𑁆𑀣, 𑀅𑀲𑁄𑀓𑀸 𑀔𑀼𑀤𑁆𑀤𑀫𑀸𑀮𑀓𑀸;

𑀧𑀼𑀦𑁆𑀦𑀸𑀕𑀸 𑀕𑀺𑀭𑀺𑀧𑀼𑀦𑁆𑀦𑀸𑀕𑀸, 𑀲𑀫𑁆𑀧𑀯𑀦𑁆𑀢𑀺 𑀫𑀫𑀲𑁆𑀲𑀫𑀁.

𑁧𑁦𑁪. ‘‘𑀓𑀼𑀝𑀚𑀸 𑀧𑀼𑀧𑁆𑀨𑀺𑀢𑀸 𑀢𑀢𑁆𑀣, 𑀢𑀺𑀡𑀲𑀽𑀮𑀯𑀦𑀸𑀦𑀺 𑀘;

𑀲𑀸𑀮𑀸 𑀘 𑀲𑀴𑀮𑀸 𑀢𑀢𑁆𑀣, 𑀘𑀫𑁆𑀧𑀓𑀸 𑀧𑀼𑀧𑁆𑀨𑀺𑀢𑀸 𑀩𑀳𑀽.

𑁧𑁦𑁫. ‘‘𑀅𑀚𑁆𑀚𑀼𑀦𑀸 𑀅𑀢𑀺𑀫𑀼𑀢𑁆𑀢𑀸 𑀘, 𑀫𑀳𑀸𑀦𑀸𑀫𑀸 𑀘 𑀧𑀼𑀧𑁆𑀨𑀺𑀢𑀸;

𑀅𑀲𑀦𑀸 𑀫𑀥𑀼𑀕𑀦𑁆𑀥𑀻 𑀘, 𑀧𑀼𑀧𑁆𑀨𑀺𑀢𑀸 𑀢𑁂 𑀫𑀫𑀲𑁆𑀲𑀫𑁂.

𑁧𑁦𑁬. ‘‘𑀉𑀤𑁆𑀤𑀸𑀮𑀓𑀸 𑀧𑀸𑀝𑀮𑀺𑀓𑀸, 𑀬𑀽𑀣𑀺𑀓𑀸 𑀘 𑀧𑀺𑀬𑀗𑁆𑀕𑀼𑀓𑀸;

𑀩𑀺𑀫𑁆𑀩𑀺𑀚𑀸𑀮𑀓𑀲𑀜𑁆𑀙𑀦𑁆𑀦𑀸, 𑀲𑀫𑀦𑁆𑀢𑀸 𑀅𑀟𑁆𑀠𑀬𑁄𑀚𑀦𑀁.

𑁧𑁦𑁭. ‘‘𑀫𑀸𑀢𑀕𑁆𑀕𑀸𑀭𑀸 [𑀫𑀸𑀢𑀗𑁆𑀕𑀯𑀸 (𑀲𑀻.), 𑀫𑀸𑀢𑀓𑀭𑀸 (𑀲𑁆𑀬𑀸.), 𑀫𑀸𑀢𑀗𑁆𑀕𑀸 𑀯𑀸 (𑀧𑀻.)] 𑀲𑀢𑁆𑀢𑀮𑀺𑀬𑁄, 𑀧𑀸𑀝𑀮𑀻 𑀲𑀺𑀦𑁆𑀤𑀼𑀯𑀸𑀭𑀓𑀸;

𑀅𑀗𑁆𑀓𑁄𑀮𑀓𑀸 𑀩𑀳𑀽 𑀢𑀢𑁆𑀣, 𑀢𑀸𑀮𑀓𑀼𑀝𑁆𑀞𑀺 [𑀢𑀸𑀮𑀓𑀽𑀝𑀸 (𑀲𑀻. 𑀲𑁆𑀬𑀸.), 𑀢𑀸𑀮𑀓𑀼𑀝𑁆𑀞𑀸 (𑀧𑀻.)] 𑀘 𑀧𑀼𑀧𑁆𑀨𑀺𑀢𑀸;

𑀲𑁂𑀮𑁂𑀬𑁆𑀬𑀓𑀸 𑀩𑀳𑀽 𑀢𑀢𑁆𑀣, 𑀧𑀼𑀧𑁆𑀨𑀺𑀢𑀸 𑀫𑀫 𑀅𑀲𑁆𑀲𑀫𑁂.

𑁧𑁦𑁮. ‘‘𑀏𑀢𑁂𑀲𑀼 𑀧𑀼𑀧𑁆𑀨𑀚𑀸𑀢𑁂𑀲𑀼 [𑀧𑀼𑀧𑁆𑀨𑀫𑀸𑀦𑁂𑀲𑀼 (𑀲𑀻. 𑀧𑀻.)], 𑀲𑁄𑀪𑀦𑁆𑀢𑀺 𑀧𑀸𑀤𑀧𑀸 𑀩𑀳𑀽;

𑀲𑀫𑀦𑁆𑀢𑀸 𑀢𑁂𑀦 𑀕𑀦𑁆𑀥𑁂𑀦, 𑀯𑀸𑀬𑀢𑁂 𑀫𑀫 𑀅𑀲𑁆𑀲𑀫𑁄.

𑁧𑁦𑁯. ‘‘𑀳𑀭𑀻𑀢𑀓𑀸 𑀆𑀫𑀮𑀓𑀸, 𑀅𑀫𑁆𑀩𑀚𑀫𑁆𑀩𑀼𑀯𑀺𑀪𑀻𑀢𑀓𑀸 [𑀯𑀺𑀪𑀺𑀝𑀓𑀸 (𑀲𑀻.)];

𑀓𑁄𑀮𑀸 𑀪𑀮𑁆𑀮𑀸𑀢𑀓𑀸 𑀩𑀺𑀮𑁆𑀮𑀸, 𑀨𑀸𑀭𑀼𑀲𑀓𑀨𑀮𑀸𑀦𑀺 𑀘.

𑁧𑁧𑁦. ‘‘𑀢𑀺𑀦𑁆𑀤𑀼𑀓𑀸 𑀘 𑀧𑀺𑀬𑀸𑀮𑀸 𑀘, 𑀫𑀥𑀼𑀓𑀸 𑀓𑀸𑀲𑀼𑀫𑀸𑀭𑀬𑁄;

𑀮𑀩𑀼𑀚𑀸 𑀧𑀦𑀲𑀸 𑀢𑀢𑁆𑀣, 𑀓𑀤𑀮𑀻 𑀩𑀤𑀭𑀻𑀨𑀮𑀸 [𑀫𑀦𑁆𑀤𑀭𑀺𑀨𑀮𑀸 (𑀓.), 𑀘𑀦𑁆𑀤𑀭𑀻𑀨𑀮𑀸 (𑀲𑁆𑀬𑀸. 𑀧𑀻.)].

𑁧𑁧𑁧. ‘‘𑀅𑀫𑁆𑀩𑀸𑀝𑀓𑀸 𑀩𑀳𑀽 𑀢𑀢𑁆𑀣, 𑀯𑀮𑁆𑀮𑀺𑀓𑀸𑀭𑀨𑀮𑀸𑀦𑀺 𑀘;

𑀩𑀻𑀚𑀧𑀽𑀭𑀲𑀧𑀸𑀭𑀺𑀬𑁄 [𑀘𑀺𑀭𑀲𑀁𑀭𑀲𑀧𑀸𑀓𑀸 𑀘 (𑀲𑁆𑀬𑀸.), 𑀯𑀺𑀝𑀧𑀸 𑀘 𑀲𑀧𑀸𑀓𑀸 𑀘 (𑀧𑀻), 𑀯𑀺𑀤𑀧𑀭𑀧𑀤𑀸𑀤𑀬𑁄 (𑀓.)], 𑀨𑀮𑀺𑀢𑀸 𑀫𑀫 𑀅𑀲𑁆𑀲𑀫𑁂.

𑁧𑁧𑁨. ‘‘𑀆𑀴𑀓𑀸 𑀇𑀲𑀺𑀫𑀼𑀕𑁆𑀕𑀸 𑀘, 𑀢𑀢𑁄 𑀫𑁄𑀤𑀨𑀮𑀸 𑀩𑀳𑀽;

𑀅𑀯𑀝𑀸 𑀧𑀓𑁆𑀓𑀪𑀭𑀺𑀢𑀸 [𑀲𑀓𑁆𑀓𑀭𑀸𑀭𑀺𑀢𑀸 (𑀓.)], 𑀧𑀺𑀮𑀓𑁆𑀔𑀼𑀤𑀼𑀫𑁆𑀩𑀭𑀸𑀦𑀺 𑀘.

𑁧𑁧𑁩. ‘‘𑀧𑀺𑀧𑁆𑀨𑀺𑀮𑀻 𑀫𑀭𑀻𑀘𑀸 𑀢𑀢𑁆𑀣, 𑀦𑀺𑀕𑁆𑀭𑁄𑀥𑀸 𑀘 𑀓𑀧𑀺𑀢𑁆𑀣𑀦𑀸;

𑀉𑀤𑀼𑀫𑁆𑀩𑀭𑀓𑀸 𑀩𑀳𑀯𑁄, 𑀓𑀡𑁆𑀟𑀼𑀧𑀡𑁆𑀡𑀸 𑀘 𑀳𑀭𑀺𑀬𑁄 [𑀓𑀡𑁆𑀟𑀧𑀓𑁆𑀓𑀸 𑀘 𑀧𑀸𑀭𑀺𑀬𑁄 (𑀲𑀻. 𑀲𑁆𑀬𑀸. 𑀧𑀻.)].

𑁧𑁧𑁪. ‘‘𑀏𑀢𑁂 𑀘𑀜𑁆𑀜𑁂 𑀘 𑀩𑀳𑀯𑁄, 𑀨𑀮𑀺𑀢𑀸 𑀅𑀲𑁆𑀲𑀫𑁂 𑀫𑀫;

𑀧𑀼𑀧𑁆𑀨𑀭𑀼𑀓𑁆𑀔𑀸𑀧𑀺 𑀩𑀳𑀯𑁄, 𑀧𑀼𑀧𑁆𑀨𑀺𑀢𑀸 𑀫𑀫 𑀅𑀲𑁆𑀲𑀫𑁂.

𑁧𑁧𑁫. ‘‘𑀆𑀮𑀼𑀯𑀸 𑀘 𑀓𑀴𑀫𑁆𑀩𑀸 𑀘, 𑀩𑀺𑀴𑀸𑀮𑀻 𑀢𑀓𑁆𑀓𑀮𑀸𑀦𑀺 𑀘;

𑀆𑀮𑀓𑀸 𑀢𑀸𑀮𑀓𑀸 𑀘𑁂𑀯, 𑀯𑀺𑀚𑁆𑀚𑀦𑁆𑀢𑀺 𑀅𑀲𑁆𑀲𑀫𑁂 𑀫𑀫.

𑁧𑁧𑁬. ‘‘𑀅𑀲𑁆𑀲𑀫𑀲𑁆𑀲𑀸𑀯𑀺𑀤𑀽𑀭𑁂 𑀫𑁂, 𑀫𑀳𑀸𑀚𑀸𑀢𑀲𑁆𑀲𑀭𑁄 𑀅𑀳𑀼;

𑀅𑀘𑁆𑀙𑁄𑀤𑀓𑁄 𑀲𑀻𑀢𑀚𑀮𑁄, 𑀲𑀼𑀧𑀢𑀺𑀢𑁆𑀣𑁄 𑀫𑀦𑁄𑀭𑀫𑁄.

𑁧𑁧𑁭. ‘‘𑀧𑀤𑀼𑀫𑀼𑀧𑁆𑀧𑀮𑀸 𑀩𑀳𑀽 𑀢𑀢𑁆𑀣, 𑀧𑀼𑀡𑁆𑀟𑀭𑀻𑀓𑀲𑀫𑀸𑀬𑀼𑀢𑀸;

𑀫𑀦𑁆𑀤𑀸𑀮𑀓𑁂𑀳𑀺 𑀲𑀜𑁆𑀙𑀦𑁆𑀦𑀸, 𑀦𑀸𑀦𑀸𑀕𑀦𑁆𑀥𑀲𑀫𑁂𑀭𑀺𑀢𑀸.

𑁧𑁧𑁮. ‘‘𑀕𑀩𑁆𑀪𑀁 𑀕𑀡𑁆𑀳𑀦𑁆𑀢𑀺 𑀧𑀤𑀼𑀫𑀸, 𑀅𑀜𑁆𑀜𑁂 𑀧𑀼𑀧𑁆𑀨𑀦𑁆𑀢𑀺 𑀓𑁂𑀲𑀭𑀻;

𑀑𑀧𑀼𑀧𑁆𑀨𑀧𑀢𑁆𑀢𑀸 𑀢𑀺𑀝𑁆𑀞𑀦𑁆𑀢𑀺, 𑀧𑀤𑀼𑀫𑀸𑀓𑀡𑁆𑀡𑀺𑀓𑀸 𑀩𑀳𑀽.

𑁧𑁧𑁯. ‘‘𑀫𑀥𑀼 𑀪𑀺𑀲𑀫𑁆𑀳𑀸 𑀲𑀯𑀢𑀺, 𑀔𑀻𑀭𑀁 𑀲𑀧𑁆𑀧𑀺 𑀫𑀼𑀮𑀸𑀴𑀺𑀪𑀺;

𑀲𑀫𑀦𑁆𑀢𑀸 𑀢𑁂𑀦 𑀕𑀦𑁆𑀥𑁂𑀦, 𑀦𑀸𑀦𑀸𑀕𑀦𑁆𑀥𑀲𑀫𑁂𑀭𑀺𑀢𑀸.

𑁧𑁨𑁦. ‘‘𑀓𑀼𑀫𑀼𑀤𑀸 𑀅𑀫𑁆𑀩𑀕𑀦𑁆𑀥𑀺 𑀘, 𑀦𑀬𑀺𑀢𑀸 𑀤𑀺𑀲𑁆𑀲𑀭𑁂 𑀩𑀳𑀽;

𑀚𑀸𑀢𑀲𑁆𑀲𑀭𑀲𑁆𑀲𑀸𑀦𑀼𑀓𑀽𑀮𑀁, 𑀓𑁂𑀢𑀓𑀸 𑀧𑀼𑀧𑁆𑀨𑀺𑀢𑀸 𑀩𑀳𑀽.

𑁧𑁨𑁧. ‘‘𑀲𑀼𑀨𑀼𑀮𑁆𑀮𑀸 𑀩𑀦𑁆𑀥𑀼𑀚𑀻𑀯𑀸 𑀘, 𑀲𑁂𑀢𑀯𑀸𑀭𑀻 𑀲𑀼𑀕𑀦𑁆𑀥𑀺𑀓𑀸;

𑀓𑀼𑀫𑁆𑀪𑀺𑀮𑀸 𑀲𑀼𑀲𑀼𑀫𑀸𑀭𑀸 𑀘, 𑀕𑀳𑀓𑀸 𑀢𑀢𑁆𑀣 𑀚𑀸𑀬𑀭𑁂.

𑁧𑁨𑁨. ‘‘𑀉𑀕𑁆𑀕𑀸𑀳𑀓𑀸 𑀅𑀚𑀕𑀭𑀸, 𑀢𑀢𑁆𑀣 𑀚𑀸𑀢𑀲𑁆𑀲𑀭𑁂 𑀩𑀳𑀽;

𑀧𑀸𑀞𑀻𑀦𑀸 𑀧𑀸𑀯𑀼𑀲𑀸 𑀫𑀘𑁆𑀙𑀸, 𑀩𑀮𑀚𑀸 𑀫𑀼𑀜𑁆𑀚𑀭𑁄𑀳𑀺𑀢𑀸.

𑁧𑁨𑁩. ‘‘𑀫𑀘𑁆𑀙𑀓𑀘𑁆𑀙𑀧𑀲𑀜𑁆𑀙𑀦𑁆𑀦𑀸, 𑀅𑀣𑁄 𑀧𑀧𑀝𑀓𑀸𑀳𑀺 [𑀧𑀫𑁆𑀧𑀝𑀓𑁂𑀳𑀺 (𑀲𑀻.), 𑀲𑀧𑀝𑀓𑁂𑀳𑀺 (𑀲𑁆𑀬𑀸.), 𑀧𑀧𑁆𑀧𑀝𑀓𑁂𑀳𑀺 (𑀧𑀻)] 𑀘;

𑀧𑀸𑀭𑁂𑀯𑀢𑀸 𑀭𑀯𑀺𑀳𑀁𑀲𑀸, 𑀓𑀼𑀓𑀼𑀢𑁆𑀣𑀸 [𑀓𑀼𑀓𑁆𑀓𑀼𑀢𑁆𑀣𑀸 (𑀲𑁆𑀬𑀸. 𑀓.), 𑀓𑀼𑀢𑁆𑀣𑀓𑀸 (𑀧𑀻.)] 𑀘 𑀦𑀤𑀻𑀘𑀭𑀸.

𑁧𑁨𑁪. ‘‘𑀤𑀺𑀦𑁆𑀤𑀺𑀪𑀸 [𑀝𑀺𑀝𑁆𑀝𑀺𑀪𑀸 (𑀧𑀻.)] 𑀘𑀓𑁆𑀓𑀯𑀸𑀓𑀸 𑀘, 𑀧𑀫𑁆𑀧𑀓𑀸 𑀚𑀻𑀯𑀚𑀻𑀯𑀓𑀸;

𑀓𑀮𑀦𑁆𑀤𑀓𑀸 𑀉𑀓𑁆𑀓𑀼𑀲𑀸 𑀘, 𑀲𑁂𑀦𑀓𑀸 𑀉𑀤𑁆𑀥𑀭𑀸 𑀩𑀳𑀽.

𑁧𑁨𑁫. ‘‘𑀓𑁄𑀝𑁆𑀞𑀓𑀸 𑀲𑀼𑀓𑀧𑁄𑀢𑀸 𑀘, 𑀢𑀼𑀮𑀺𑀬𑀸 𑀘𑀫𑀭𑀸 𑀩𑀳𑀽;

𑀓𑀸𑀭𑁂𑀦𑀺𑀬𑁄 [𑀓𑀸𑀲𑁂𑀦𑀺𑀬𑀸 (𑀲𑁆𑀬𑀸.)] 𑀘 𑀢𑀺𑀮𑀓𑀸 [𑀓𑀺𑀮𑀓𑀸 (𑀓.)], 𑀉𑀧𑀚𑀻𑀯𑀦𑁆𑀢𑀺 𑀢𑀁 𑀲𑀭𑀁.

𑁧𑁨𑁬. ‘‘𑀲𑀻𑀳𑀸 𑀩𑁆𑀬𑀕𑁆𑀖𑀸 𑀘 𑀤𑀻𑀧𑀻 𑀘, 𑀅𑀘𑁆𑀙𑀓𑁄𑀓𑀢𑀭𑀘𑁆𑀙𑀓𑀸;

𑀯𑀸𑀦𑀭𑀸 𑀓𑀺𑀦𑁆𑀦𑀭𑀸 𑀘𑁂𑀯, 𑀤𑀺𑀲𑁆𑀲𑀦𑁆𑀢𑀺 𑀫𑀫 𑀅𑀲𑁆𑀲𑀫𑁂.

𑁧𑁨𑁭. ‘‘𑀢𑀸𑀦𑀺 𑀕𑀦𑁆𑀥𑀸𑀦𑀺 𑀖𑀸𑀬𑀦𑁆𑀢𑁄, 𑀪𑀓𑁆𑀔𑀬𑀦𑁆𑀢𑁄 𑀨𑀮𑀸𑀦𑀳𑀁;

𑀕𑀦𑁆𑀥𑁄𑀤𑀓𑀁 𑀧𑀺𑀯𑀦𑁆𑀢𑁄 𑀘, 𑀯𑀲𑀸𑀫𑀺 𑀫𑀫 𑀅𑀲𑁆𑀲𑀫𑁂.

𑁧𑁨𑁮. ‘‘𑀏𑀡𑀻𑀫𑀺𑀕𑀸 𑀯𑀭𑀸𑀳𑀸 𑀘, 𑀧𑀲𑀤𑀸 𑀔𑀼𑀤𑁆𑀤𑀭𑀽𑀧𑀓𑀸;

𑀅𑀕𑁆𑀕𑀺𑀓𑀸 𑀚𑁄𑀢𑀺𑀓𑀸 𑀘𑁂𑀯, 𑀯𑀲𑀦𑁆𑀢𑀺 𑀫𑀫 𑀅𑀲𑁆𑀲𑀫𑁂.

𑁧𑁨𑁯. ‘‘𑀳𑀁𑀲𑀸 𑀓𑁄𑀜𑁆𑀘𑀸 𑀫𑀬𑀽𑀭𑀸 𑀘, 𑀲𑀸𑀮𑀺𑀓𑀸𑀧𑀺 𑀘 𑀓𑁄𑀓𑀺𑀮𑀸;

𑀫𑀚𑁆𑀚𑀸𑀭𑀺𑀓𑀸 [𑀫𑀜𑁆𑀚𑀭𑀺𑀓𑀸 (𑀲𑀻. 𑀲𑁆𑀬𑀸. 𑀧𑀻.)] 𑀩𑀳𑀽 𑀢𑀢𑁆𑀣, 𑀓𑁄𑀲𑀺𑀓𑀸 𑀧𑁄𑀝𑁆𑀞𑀲𑀻𑀲𑀓𑀸.

𑁧𑁩𑁦. ‘‘𑀧𑀺𑀲𑀸𑀘𑀸 𑀤𑀸𑀦𑀯𑀸 𑀘𑁂𑀯, 𑀓𑀼𑀫𑁆𑀪𑀡𑁆𑀟𑀸 𑀭𑀓𑁆𑀔𑀲𑀸 𑀩𑀳𑀽;

𑀕𑀭𑀼𑀴𑀸 𑀧𑀦𑁆𑀦𑀕𑀸 𑀘𑁂𑀯, 𑀯𑀲𑀦𑁆𑀢𑀺 𑀫𑀫 𑀅𑀲𑁆𑀲𑀫𑁂.

𑁧𑁩𑁧. ‘‘𑀫𑀳𑀸𑀦𑀼𑀪𑀸𑀯𑀸 𑀇𑀲𑀬𑁄, 𑀲𑀦𑁆𑀢𑀘𑀺𑀢𑁆𑀢𑀸 𑀲𑀫𑀸𑀳𑀺𑀢𑀸;

𑀓𑀫𑀡𑁆𑀟𑀮𑀼𑀥𑀭𑀸 𑀲𑀩𑁆𑀩𑁂, 𑀅𑀚𑀺𑀦𑀼𑀢𑁆𑀢𑀭𑀯𑀸𑀲𑀦𑀸;

𑀚𑀝𑀸𑀪𑀸𑀭𑀪𑀭𑀺𑀢𑀸𑀯 [𑀢𑁂 𑀚𑀝𑀸𑀪𑀸𑀭𑀪𑀭𑀺𑀢𑀸 (𑀲𑀻. 𑀧𑀻.), 𑀚𑀝𑀸𑀪𑀸𑀭𑀪𑀭𑀺𑀢𑀸 𑀘 (𑀲𑁆𑀬𑀸.)], 𑀯𑀲𑀦𑁆𑀢𑀺 𑀫𑀫 𑀅𑀲𑁆𑀲𑀫𑁂.

𑁧𑁩𑁨. ‘‘𑀬𑀼𑀕𑀫𑀢𑁆𑀢𑀜𑁆𑀘 𑀧𑁂𑀓𑁆𑀔𑀦𑁆𑀢𑀸, 𑀦𑀺𑀧𑀓𑀸 𑀲𑀦𑁆𑀢𑀯𑀼𑀢𑁆𑀢𑀺𑀦𑁄;

𑀮𑀸𑀪𑀸𑀮𑀸𑀪𑁂𑀦 𑀲𑀦𑁆𑀢𑀼𑀝𑁆𑀞𑀸, 𑀯𑀲𑀦𑁆𑀢𑀺 𑀫𑀫 𑀅𑀲𑁆𑀲𑀫𑁂.

𑁧𑁩𑁩. ‘‘𑀯𑀸𑀓𑀘𑀻𑀭𑀁 𑀥𑀼𑀦𑀦𑁆𑀢𑀸 𑀢𑁂, 𑀨𑁄𑀝𑁂𑀦𑁆𑀢𑀸𑀚𑀺𑀦𑀘𑀫𑁆𑀫𑀓𑀁;

𑀲𑀩𑀮𑁂𑀳𑀺 𑀉𑀧𑀢𑁆𑀣𑀤𑁆𑀥𑀸, 𑀕𑀘𑁆𑀙𑀦𑁆𑀢𑀺 𑀅𑀫𑁆𑀩𑀭𑁂 𑀢𑀤𑀸.

𑁧𑁩𑁪. ‘‘𑀦 𑀢𑁂 𑀤𑀓𑀁 𑀆𑀳𑀭𑀦𑁆𑀢𑀺, 𑀓𑀝𑁆𑀞𑀁 𑀯𑀸 𑀅𑀕𑁆𑀕𑀺𑀤𑀸𑀭𑀼𑀓𑀁;

𑀲𑀬𑀜𑁆𑀘 𑀉𑀧𑀲𑀫𑁆𑀧𑀦𑁆𑀦𑀸, 𑀧𑀸𑀝𑀺𑀳𑀻𑀭𑀲𑁆𑀲𑀺𑀤𑀁 𑀨𑀮𑀁.

𑁧𑁩𑁫. ‘‘𑀮𑁄𑀳𑀤𑁄𑀡𑀺𑀁 𑀕𑀳𑁂𑀢𑁆𑀯𑀸𑀦, 𑀯𑀦𑀫𑀚𑁆𑀛𑁂 𑀯𑀲𑀦𑁆𑀢𑀺 𑀢𑁂;

𑀓𑀼𑀜𑁆𑀚𑀭𑀸𑀯 𑀫𑀳𑀸𑀦𑀸𑀕𑀸, 𑀅𑀲𑀫𑁆𑀪𑀻𑀢𑀸𑀯 𑀓𑁂𑀲𑀭𑀻.

𑁧𑁩𑁬. ‘‘𑀅𑀜𑁆𑀜𑁂 𑀕𑀘𑁆𑀙𑀦𑁆𑀢𑀺 𑀕𑁄𑀬𑀸𑀦𑀁, 𑀅𑀜𑁆𑀜𑁂 𑀧𑀼𑀩𑁆𑀩𑀯𑀺𑀤𑁂𑀳𑀓𑀁 [𑀧𑀼𑀩𑁆𑀩𑀯𑀺𑀤𑁂𑀳𑀦𑀁 (𑀲𑁆𑀬𑀸. 𑀧𑀻. 𑀓.)];

𑀅𑀜𑁆𑀜𑁂 𑀘 𑀉𑀢𑁆𑀢𑀭𑀓𑀼𑀭𑀼𑀁, 𑀲𑀓𑀁 𑀩𑀮𑀫𑀯𑀲𑁆𑀲𑀺𑀢𑀸 [𑀩𑀮𑀫𑀧𑀲𑁆𑀲𑀺𑀢𑀸 (𑀲𑁆𑀬𑀸. 𑀧𑀻. 𑀓.)].

𑁧𑁩𑁭. ‘‘𑀢𑀢𑁄 𑀧𑀺𑀡𑁆𑀟𑀁 𑀆𑀳𑀭𑀺𑀢𑁆𑀯𑀸, 𑀧𑀭𑀺𑀪𑀼𑀜𑁆𑀚𑀦𑁆𑀢𑀺 𑀏𑀓𑀢𑁄;

𑀲𑀩𑁆𑀩𑁂𑀲𑀁 𑀧𑀓𑁆𑀓𑀫𑀦𑁆𑀢𑀸𑀦𑀁, 𑀉𑀕𑁆𑀕𑀢𑁂𑀚𑀸𑀦 𑀢𑀸𑀤𑀺𑀦𑀁.

𑁧𑁩𑁮. ‘‘𑀅𑀚𑀺𑀦𑀘𑀫𑁆𑀫𑀲𑀤𑁆𑀤𑁂𑀦, 𑀯𑀦𑀁 𑀲𑀤𑁆𑀤𑀸𑀬𑀢𑁂 𑀢𑀤𑀸;

𑀏𑀤𑀺𑀲𑀸 𑀢𑁂 𑀫𑀳𑀸𑀯𑀻𑀭, 𑀲𑀺𑀲𑁆𑀲𑀸 𑀉𑀕𑁆𑀕𑀢𑀧𑀸 𑀫𑀫.

𑁧𑁩𑁯. ‘‘𑀧𑀭𑀺𑀯𑀼𑀢𑁄 𑀅𑀳𑀁 𑀢𑁂𑀳𑀺, 𑀯𑀲𑀸𑀫𑀺 𑀫𑀫 𑀅𑀲𑁆𑀲𑀫𑁂;

𑀢𑁄𑀲𑀺𑀢𑀸 𑀲𑀓𑀓𑀫𑁆𑀫𑁂𑀦, 𑀯𑀺𑀦𑀻𑀢𑀸𑀧𑀺 𑀲𑀫𑀸𑀕𑀢𑀸.

𑁧𑁪𑁦. ‘‘𑀆𑀭𑀸𑀥𑀬𑀺𑀁𑀲𑀼 𑀫𑀁 𑀏𑀢𑁂, 𑀲𑀓𑀓𑀫𑁆𑀫𑀸𑀪𑀺𑀮𑀸𑀲𑀺𑀦𑁄;

𑀲𑀻𑀮𑀯𑀦𑁆𑀢𑁄 𑀘 𑀦𑀺𑀧𑀓𑀸, 𑀅𑀧𑁆𑀧𑀫𑀜𑁆𑀜𑀸𑀲𑀼 𑀓𑁄𑀯𑀺𑀤𑀸.

𑁧𑁪𑁧. ‘‘𑀧𑀤𑀼𑀫𑀼𑀢𑁆𑀢𑀭𑁄 𑀮𑁄𑀓𑀯𑀺𑀤𑀽, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄;

𑀲𑀫𑀬𑀁 𑀲𑀁𑀯𑀺𑀤𑀺𑀢𑁆𑀯𑀸𑀦, 𑀉𑀧𑀕𑀘𑁆𑀙𑀺 𑀯𑀺𑀦𑀸𑀬𑀓𑁄.

𑁧𑁪𑁨. ‘‘𑀉𑀧𑀕𑀦𑁆𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑁄, 𑀆𑀢𑀸𑀧𑀻 𑀦𑀺𑀧𑀓𑁄 𑀫𑀼𑀦𑀺;

𑀧𑀢𑁆𑀢𑀁 𑀧𑀕𑁆𑀕𑀬𑁆𑀳 𑀲𑀫𑁆𑀩𑀼𑀤𑁆𑀥𑁄, 𑀪𑀺𑀓𑁆𑀔𑀸𑀬 𑀫𑀫𑀼𑀧𑀸𑀕𑀫𑀺.

𑁧𑁪𑁩. ‘‘𑀉𑀧𑀸𑀕𑀢𑀁 𑀫𑀳𑀸𑀯𑀻𑀭𑀁, 𑀚𑀮𑀚𑀼𑀢𑁆𑀢𑀫𑀦𑀸𑀬𑀓𑀁;

𑀢𑀺𑀡𑀲𑀦𑁆𑀣𑀭𑀁 [𑀢𑀺𑀡𑀢𑁆𑀣𑀭𑀁 (𑀲𑁆𑀬𑀸.), 𑀢𑀺𑀡𑀢𑁆𑀣𑀢𑀁 (𑀓.)] 𑀧𑀜𑁆𑀜𑀸𑀧𑁂𑀢𑁆𑀯𑀸, 𑀲𑀸𑀮𑀧𑀼𑀧𑁆𑀨𑁂𑀳𑀺 𑀑𑀓𑀺𑀭𑀺𑀁.

𑁧𑁪𑁪. ‘‘𑀦𑀺𑀲𑀸𑀤𑁂𑀢𑁆𑀯𑀸𑀦 [𑀦𑀺𑀲𑀻𑀤𑁂𑀢𑁆𑀯𑀸𑀦 (𑀲𑀻.), 𑀦𑀺𑀲𑀻𑀤𑀺𑀢𑁆𑀯𑀸𑀦 (𑀲𑁆𑀬𑀸. 𑀧𑀻.)] 𑀲𑀫𑁆𑀩𑀼𑀤𑁆𑀥𑀁, 𑀳𑀝𑁆𑀞𑁄 𑀲𑀁𑀯𑀺𑀕𑁆𑀕𑀫𑀸𑀦𑀲𑁄;

𑀔𑀺𑀧𑁆𑀧𑀁 𑀧𑀩𑁆𑀩𑀢𑀫𑀸𑀭𑀼𑀬𑁆𑀳, 𑀅𑀕𑀴𑀼𑀁 [𑀅𑀕𑀭𑀼𑀁 (𑀲𑀻.)] 𑀅𑀕𑁆𑀕𑀳𑀺𑀁 𑀅𑀳𑀁.

𑁧𑁪𑁫. ‘‘𑀓𑀼𑀫𑁆𑀪𑀫𑀢𑁆𑀢𑀁 𑀕𑀳𑁂𑀢𑁆𑀯𑀸𑀦, 𑀧𑀦𑀲𑀁 𑀤𑁂𑀯𑀕𑀦𑁆𑀥𑀺𑀓𑀁;

𑀔𑀦𑁆𑀥𑁂 𑀆𑀭𑁄𑀧𑀬𑀺𑀢𑁆𑀯𑀸𑀦, 𑀉𑀧𑀕𑀘𑁆𑀙𑀺𑀁 𑀯𑀺𑀦𑀸𑀬𑀓𑀁.

𑁧𑁪𑁬. ‘‘𑀨𑀮𑀁 𑀩𑀼𑀤𑁆𑀥𑀲𑁆𑀲 𑀤𑀢𑁆𑀯𑀸𑀦, 𑀅𑀕𑀴𑀼𑀁 𑀅𑀦𑀼𑀮𑀺𑀫𑁆𑀧𑀳𑀁;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀩𑀼𑀤𑁆𑀥𑀲𑁂𑀝𑁆𑀞𑀁 𑀅𑀯𑀦𑁆𑀤𑀺𑀳𑀁.

𑁧𑁪𑁭. ‘‘𑀧𑀤𑀼𑀫𑀼𑀢𑁆𑀢𑀭𑁄 𑀮𑁄𑀓𑀯𑀺𑀤𑀽, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄;

𑀇𑀲𑀺𑀫𑀚𑁆𑀛𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

𑁧𑁪𑁮. ‘‘‘𑀬𑁄 𑀫𑁂 𑀨𑀮𑀜𑁆𑀘 𑀅𑀕𑀴𑀼𑀁, 𑀆𑀲𑀦𑀜𑁆𑀘 𑀅𑀤𑀸𑀲𑀺 𑀫𑁂;

𑀢𑀫𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀲𑀼𑀡𑀸𑀣 𑀫𑀫 𑀪𑀸𑀲𑀢𑁄.

𑁧𑁪𑁯. ‘‘‘𑀕𑀸𑀫𑁂 𑀯𑀸 𑀬𑀤𑀺 𑀯𑀸𑀭𑀜𑁆𑀜𑁂, 𑀧𑀩𑁆𑀪𑀸𑀭𑁂𑀲𑀼 𑀕𑀼𑀳𑀸𑀲𑀼 𑀯𑀸;

𑀇𑀫𑀲𑁆𑀲 𑀘𑀺𑀢𑁆𑀢𑀫𑀜𑁆𑀜𑀸𑀬, 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺 𑀪𑁄𑀚𑀦𑀁.

𑁧𑁫𑁦. ‘‘‘𑀤𑁂𑀯𑀮𑁄𑀓𑁂 𑀫𑀦𑀼𑀲𑁆𑀲𑁂 𑀯𑀸, 𑀉𑀧𑀧𑀦𑁆𑀦𑁄 𑀅𑀬𑀁 𑀦𑀭𑁄;

𑀪𑁄𑀚𑀦𑁂𑀳𑀺 𑀘 𑀯𑀢𑁆𑀣𑁂𑀳𑀺, 𑀧𑀭𑀺𑀲𑀁 𑀢𑀧𑁆𑀧𑀬𑀺𑀲𑁆𑀲𑀢𑀺.

𑁧𑁫𑁧. ‘‘‘𑀉𑀧𑀧𑀚𑁆𑀚𑀢𑀺 𑀬𑀁 𑀬𑁄𑀦𑀺𑀁, 𑀤𑁂𑀯𑀢𑁆𑀢𑀁 𑀅𑀣 𑀫𑀸𑀦𑀼𑀲𑀁;

𑀅𑀓𑁆𑀔𑁄𑀪𑀪𑁄𑀕𑁄 𑀳𑀼𑀢𑁆𑀯𑀸𑀦, 𑀲𑀁𑀲𑀭𑀺𑀲𑁆𑀲𑀢𑀺𑀬𑀁 𑀦𑀭𑁄.

𑁧𑁫𑁨. ‘‘‘𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑀸𑀦𑀺, 𑀤𑁂𑀯𑀮𑁄𑀓𑁂 𑀭𑀫𑀺𑀲𑁆𑀲𑀢𑀺;

𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀁 𑀭𑀸𑀚𑀸 𑀘, 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺.

𑁧𑁫𑁩. ‘‘‘𑀏𑀓𑀲𑀢𑁆𑀢𑀢𑀺𑀓𑁆𑀔𑀢𑁆𑀢𑀼𑀜𑁆𑀘, 𑀤𑁂𑀯𑀭𑀚𑁆𑀚𑀁 𑀓𑀭𑀺𑀲𑁆𑀲𑀢𑀺;

𑀧𑀤𑁂𑀲𑀭𑀚𑁆𑀚𑀁 𑀯𑀺𑀧𑀼𑀮𑀁, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀁.

𑁧𑁫𑁪. ‘‘‘𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑁆𑀳𑀺, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

𑁧𑁫𑁫. ‘‘‘𑀢𑀲𑁆𑀲 𑀥𑀫𑁆𑀫𑁂𑀲𑀼 𑀤𑀸𑀬𑀸𑀤𑁄, 𑀑𑀭𑀲𑁄 𑀥𑀫𑁆𑀫𑀦𑀺𑀫𑁆𑀫𑀺𑀢𑁄 [(𑀉𑀧𑀲𑀻𑀯𑁄 𑀦𑀸𑀫 𑀦𑀸𑀫𑁂𑀦, 𑀳𑁂𑀲𑁆𑀲𑀢𑀺 𑀲𑀢𑁆𑀣𑀼 𑀲𑀸𑀯𑀓𑁄) (𑀲𑁆𑀬𑀸.)];

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀯𑀺𑀳𑀭𑀺𑀲𑁆𑀲𑀢𑀺𑀦𑀸𑀲𑀯𑁄’.

𑁧𑁫𑁬. ‘‘𑀲𑀼𑀮𑀤𑁆𑀥𑀮𑀸𑀪𑁄 𑀮𑀤𑁆𑀥𑁄 𑀫𑁂, 𑀬𑁄𑀳𑀁 𑀅𑀤𑁆𑀤𑀓𑁆𑀔𑀺𑀁 𑀦𑀸𑀬𑀓𑀁;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁧𑁫𑁭. ‘‘𑀕𑀸𑀫𑁂 𑀯𑀸 𑀬𑀤𑀺 𑀯𑀸𑀭𑀜𑁆𑀜𑁂, 𑀧𑀩𑁆𑀪𑀸𑀭𑁂𑀲𑀼 𑀕𑀼𑀳𑀸𑀲𑀼 𑀯𑀸;

𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀪𑁄𑀚𑀦𑀁 𑀳𑁄𑀢𑀺 𑀫𑁂 𑀲𑀤𑀸.

𑁧𑁫𑁮. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁧𑁫𑁯. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁧𑁬𑁦. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀉𑀧𑀲𑀻𑀯𑁄 [𑀉𑀧𑀲𑀺𑀯𑁄 (𑀓.)] 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀉𑀧𑀲𑀻𑀯𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀜𑁆𑀘𑀫𑀁.