𑁪. 𑀥𑁄𑀢𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁭𑁨. ‘‘𑀕𑀗𑁆𑀕𑀸 𑀪𑀸𑀕𑀻𑀭𑀣𑀻 𑀦𑀸𑀫, 𑀳𑀺𑀫𑀯𑀦𑁆𑀢𑀸 𑀧𑀪𑀸𑀯𑀺𑀢𑀸 [𑀳𑀺𑀫𑀯𑀦𑁆𑀢𑀧𑁆𑀧𑀪𑀸𑀯𑀺𑀢𑀸 (𑀲𑀻.)];

𑀳𑀁𑀲𑀯𑀢𑀺𑀬𑀸 𑀤𑁆𑀯𑀸𑀭𑁂𑀦, 𑀅𑀦𑀼𑀲𑀦𑁆𑀤𑀢𑀺 𑀢𑀸𑀯𑀤𑁂.

𑁭𑁩. ‘‘𑀲𑁄𑀪𑀺𑀢𑁄 𑀦𑀸𑀫 𑀆𑀭𑀸𑀫𑁄, 𑀕𑀗𑁆𑀕𑀸𑀓𑀽𑀮𑁂 𑀲𑀼𑀫𑀸𑀧𑀺𑀢𑁄;

𑀢𑀢𑁆𑀣 𑀧𑀤𑀼𑀫𑀼𑀢𑁆𑀢𑀭𑁄 𑀩𑀼𑀤𑁆𑀥𑁄, 𑀯𑀲𑀢𑁂 𑀮𑁄𑀓𑀦𑀸𑀬𑀓𑁄.

𑁭𑁪. ‘‘𑀢𑀺𑀤𑀲𑁂𑀳𑀺 𑀬𑀣𑀸 𑀇𑀦𑁆𑀤𑁄, 𑀫𑀦𑀼𑀚𑁂𑀳𑀺 𑀧𑀼𑀭𑀓𑁆𑀔𑀢𑁄;

𑀦𑀺𑀲𑀻𑀤𑀺 𑀢𑀢𑁆𑀣 𑀪𑀕𑀯𑀸, 𑀅𑀲𑀫𑁆𑀪𑀻𑀢𑁄𑀯 𑀓𑁂𑀲𑀭𑀻.

𑁭𑁫. ‘‘𑀦𑀕𑀭𑁂 𑀳𑀁𑀲𑀯𑀢𑀺𑀬𑀸, 𑀯𑀲𑀸𑀫𑀺 [𑀅𑀳𑁄𑀲𑀺𑀁 (𑀲𑁆𑀬𑀸.)] 𑀩𑁆𑀭𑀸𑀳𑁆𑀫𑀡𑁄 𑀅𑀳𑀁;

𑀙𑀴𑀗𑁆𑀕𑁄 𑀦𑀸𑀫 𑀦𑀸𑀫𑁂𑀦, 𑀏𑀯𑀁𑀦𑀸𑀫𑁄 𑀫𑀳𑀸𑀫𑀼𑀦𑀺.

𑁭𑁬. ‘‘𑀅𑀝𑁆𑀞𑀸𑀭𑀲 𑀲𑀺𑀲𑁆𑀲𑀲𑀢𑀸, 𑀧𑀭𑀺𑀯𑀸𑀭𑁂𑀦𑁆𑀢𑀺 𑀫𑀁 𑀢𑀤𑀸;

𑀢𑁂𑀳𑀺 𑀲𑀺𑀲𑁆𑀲𑁂𑀳𑀺 𑀲𑀫𑀺𑀢𑁄, 𑀕𑀗𑁆𑀕𑀸𑀢𑀻𑀭𑀁 𑀉𑀧𑀸𑀕𑀫𑀺𑀁.

𑁭𑁭. ‘‘𑀢𑀢𑁆𑀣𑀤𑁆𑀤𑀲𑀸𑀲𑀺𑀁 𑀲𑀫𑀡𑁂, 𑀦𑀺𑀓𑁆𑀓𑀼𑀳𑁂 𑀥𑁄𑀢𑀧𑀸𑀧𑀓𑁂;

𑀪𑀸𑀕𑀻𑀭𑀣𑀺𑀁 𑀢𑀭𑀦𑁆𑀢𑁂𑀳𑀁 [𑀢𑀭𑀦𑁆𑀢𑁄𑀳𑀁 (𑀲𑁆𑀬𑀸. 𑀧𑀻.)], 𑀏𑀯𑀁 𑀘𑀺𑀦𑁆𑀢𑁂𑀲𑀺 𑀢𑀸𑀯𑀤𑁂.

𑁭𑁮. ‘‘𑀲𑀸𑀬𑀁 𑀧𑀸𑀢𑀁 [𑀲𑀸𑀬𑀧𑀸𑀢𑀁 (𑀧𑀻.)] 𑀢𑀭𑀦𑁆𑀢𑀸𑀫𑁂, 𑀩𑀼𑀤𑁆𑀥𑀧𑀼𑀢𑁆𑀢𑀸 𑀫𑀳𑀸𑀬𑀲𑀸;

𑀯𑀺𑀳𑁂𑀲𑀬𑀦𑁆𑀢𑀺 𑀅𑀢𑁆𑀢𑀸𑀦𑀁, 𑀢𑁂𑀲𑀁 𑀅𑀢𑁆𑀢𑀸 𑀯𑀺𑀳𑀜𑁆𑀜𑀢𑀺.

𑁭𑁯. ‘‘𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲, 𑀩𑀼𑀤𑁆𑀥𑁄 𑀅𑀕𑁆𑀕𑁄 𑀧𑀯𑀼𑀘𑁆𑀘𑀢𑀺;

𑀦𑀢𑁆𑀣𑀺 𑀫𑁂 𑀤𑀓𑁆𑀔𑀺𑀡𑁂 𑀓𑀸𑀭𑀁, 𑀕𑀢𑀺𑀫𑀕𑁆𑀕𑀯𑀺𑀲𑁄𑀥𑀦𑀁.

𑁮𑁦. ‘‘𑀬𑀁𑀦𑀽𑀦 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲, 𑀲𑁂𑀢𑀼𑀁 𑀕𑀗𑁆𑀕𑀸𑀬 𑀓𑀸𑀭𑀬𑁂;

𑀓𑀸𑀭𑀸𑀧𑁂𑀢𑁆𑀯𑀸 𑀇𑀫𑀁 𑀓𑀫𑁆𑀫𑀁 [𑀲𑁂𑀢𑀼𑀁 (𑀲𑁆𑀬𑀸.)], 𑀲𑀦𑁆𑀢𑀭𑀸𑀫𑀺 𑀇𑀫𑀁 𑀪𑀯𑀁.

𑁮𑁧. ‘‘𑀲𑀢𑀲𑀳𑀲𑁆𑀲𑀁 𑀤𑀢𑁆𑀯𑀸𑀦, 𑀲𑁂𑀢𑀼𑀁 𑀓𑀸𑀭𑀸𑀧𑀬𑀺𑀁 𑀅𑀳𑀁;

𑀲𑀤𑁆𑀤𑀳𑀦𑁆𑀢𑁄 𑀓𑀢𑀁 𑀓𑀸𑀭𑀁, 𑀯𑀺𑀧𑀼𑀮𑀁 𑀫𑁂 𑀪𑀯𑀺𑀲𑁆𑀲𑀢𑀺.

𑁮𑁨. ‘‘𑀓𑀸𑀭𑀸𑀧𑁂𑀢𑁆𑀯𑀸𑀦 𑀢𑀁 𑀲𑁂𑀢𑀼𑀁, 𑀉𑀧𑁂𑀲𑀺𑀁 𑀮𑁄𑀓𑀦𑀸𑀬𑀓𑀁;

𑀲𑀺𑀭𑀲𑀺 𑀅𑀜𑁆𑀚𑀮𑀺𑀁 𑀓𑀢𑁆𑀯𑀸, 𑀇𑀫𑀁 𑀯𑀘𑀦𑀫𑀩𑁆𑀭𑀯𑀺𑀁.

𑁮𑁩. ‘‘‘𑀲𑀢𑀲𑀳𑀲𑁆𑀲𑀲𑁆𑀲 𑀯𑀬𑀁 [𑀯𑀬𑀁 𑀲𑀢𑀲𑀳𑀲𑁆𑀲𑀁𑀯 (𑀓.)], 𑀤𑀢𑁆𑀯𑀸 [𑀓𑀢𑁆𑀯𑀸 (𑀲𑀻. 𑀧𑀻.)] 𑀓𑀸𑀭𑀸𑀧𑀺𑀢𑁄 𑀫𑀬𑀸;

𑀢𑀯𑀢𑁆𑀣𑀸𑀬 𑀫𑀳𑀸𑀲𑁂𑀢𑀼, 𑀧𑀝𑀺𑀕𑁆𑀕𑀡𑁆𑀳 𑀫𑀳𑀸𑀫𑀼𑀦𑁂.

𑁮𑁪. ‘‘‘𑀧𑀤𑀼𑀫𑀼𑀢𑁆𑀢𑀭𑁄 𑀮𑁄𑀓𑀯𑀺𑀤𑀽, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄;

𑀪𑀺𑀓𑁆𑀔𑀼𑀲𑀗𑁆𑀖𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

𑁮𑁫. ‘‘‘𑀬𑁄 𑀫𑁂 𑀲𑁂𑀢𑀼𑀁 𑀅𑀓𑀸𑀭𑁂𑀲𑀺, 𑀧𑀲𑀦𑁆𑀦𑁄 𑀲𑁂𑀳𑀺 𑀧𑀸𑀡𑀺𑀪𑀺;

𑀢𑀫𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀲𑀼𑀡𑀸𑀣 𑀫𑀫 𑀪𑀸𑀲𑀢𑁄.

(𑀲𑁂𑀢𑀼𑀤𑀸𑀦𑀆𑀦𑀺𑀲𑀁𑀲𑁄)

𑁮𑁬. ‘‘‘𑀤𑀭𑀺𑀢𑁄 𑀧𑀩𑁆𑀩𑀢𑀢𑁄 𑀯𑀸, 𑀭𑀼𑀓𑁆𑀔𑀢𑁄 𑀧𑀢𑀺𑀢𑁄𑀧𑀺𑀬𑀁;

𑀘𑀼𑀢𑁄𑀧𑀺 𑀮𑀘𑁆𑀙𑀢𑀻 𑀞𑀸𑀦𑀁, 𑀲𑁂𑀢𑀼𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁮𑁭. ‘‘‘𑀯𑀺𑀭𑀽𑀴𑁆𑀳𑀫𑀽𑀮𑀲𑀦𑁆𑀢𑀸𑀦𑀁, 𑀦𑀺𑀕𑁆𑀭𑁄𑀥𑀫𑀺𑀯 𑀫𑀸𑀮𑀼𑀢𑁄;

𑀅𑀫𑀺𑀢𑁆𑀢𑀸 𑀦𑀧𑁆𑀧𑀲𑀳𑀦𑁆𑀢𑀺, 𑀲𑁂𑀢𑀼𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁮𑁮. ‘‘‘𑀦𑀸𑀲𑁆𑀲 𑀘𑁄𑀭𑀸 𑀧𑀲𑀳𑀦𑁆𑀢𑀺, 𑀦𑀸𑀢𑀺𑀫𑀜𑁆𑀜𑀦𑁆𑀢𑀺 𑀔𑀢𑁆𑀢𑀺𑀬𑀸;

𑀲𑀩𑁆𑀩𑁂 𑀢𑀭𑀺𑀲𑁆𑀲𑀢𑀸𑀫𑀺𑀢𑁆𑀢𑁂, 𑀲𑁂𑀢𑀼𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁮𑁯. ‘‘‘𑀅𑀩𑁆𑀪𑁄𑀓𑀸𑀲𑀕𑀢𑀁 𑀲𑀦𑁆𑀢𑀁, 𑀓𑀞𑀺𑀦𑀸𑀢𑀧𑀢𑀸𑀧𑀺𑀢𑀁;

𑀧𑀼𑀜𑁆𑀜𑀓𑀫𑁆𑀫𑁂𑀦 𑀲𑀁𑀬𑀼𑀢𑁆𑀢𑀁, 𑀦 𑀪𑀯𑀺𑀲𑁆𑀲𑀢𑀺 𑀯𑁂𑀤𑀦𑀸 [𑀢𑀸𑀯𑀤𑁂 (𑀓.)].

𑁯𑁦. ‘‘‘𑀤𑁂𑀯𑀮𑁄𑀓𑁂 𑀫𑀦𑀼𑀲𑁆𑀲𑁂 𑀯𑀸, 𑀳𑀢𑁆𑀣𑀺𑀬𑀸𑀦𑀁 𑀲𑀼𑀦𑀺𑀫𑁆𑀫𑀺𑀢𑀁;

𑀢𑀲𑁆𑀲 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺 𑀢𑀸𑀯𑀤𑁂.

𑁯𑁧. ‘‘‘𑀲𑀳𑀲𑁆𑀲𑀲𑁆𑀲𑀸 𑀯𑀸𑀢𑀚𑀯𑀸, 𑀲𑀺𑀦𑁆𑀥𑀯𑀸 𑀲𑀻𑀖𑀯𑀸𑀳𑀦𑀸;

𑀲𑀸𑀬𑀁 𑀧𑀸𑀢𑀁 𑀉𑀧𑁂𑀲𑁆𑀲𑀦𑁆𑀢𑀺, 𑀲𑁂𑀢𑀼𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁯𑁨. ‘‘‘𑀆𑀕𑀦𑁆𑀢𑁆𑀯𑀸𑀦 𑀫𑀦𑀼𑀲𑁆𑀲𑀢𑁆𑀢𑀁, 𑀲𑀼𑀔𑀺𑀢𑁄𑀬𑀁 𑀪𑀯𑀺𑀲𑁆𑀲𑀢𑀺;

𑀯𑁂𑀳𑀸𑀲𑀁 [𑀇𑀳𑀸𑀧𑀺 (𑀲𑀻. 𑀲𑁆𑀬𑀸. 𑀧𑀻.)] 𑀫𑀦𑀼𑀚𑀲𑁆𑀲𑁂𑀯, 𑀳𑀢𑁆𑀣𑀺𑀬𑀸𑀦𑀁 𑀪𑀯𑀺𑀲𑁆𑀲𑀢𑀺.

𑁯𑁩. ‘‘‘𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑁆𑀳𑀺, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

𑁯𑁪. ‘‘‘𑀢𑀲𑁆𑀲 𑀥𑀫𑁆𑀫𑁂𑀲𑀼 𑀤𑀸𑀬𑀸𑀤𑁄, 𑀑𑀭𑀲𑁄 𑀥𑀫𑁆𑀫𑀦𑀺𑀫𑁆𑀫𑀺𑀢𑁄;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺𑀦𑀸𑀲𑀯𑁄’.

𑁯𑁫. ‘‘𑀅𑀳𑁄 𑀫𑁂 𑀲𑀼𑀓𑀢𑀁 𑀓𑀫𑁆𑀫𑀁, 𑀚𑀮𑀚𑀼𑀢𑁆𑀢𑀫𑀦𑀸𑀫𑀓𑁂;

𑀢𑀢𑁆𑀣 𑀓𑀸𑀭𑀁 𑀓𑀭𑀺𑀢𑁆𑀯𑀸𑀦, 𑀧𑀢𑁆𑀢𑁄𑀳𑀁 𑀆𑀲𑀯𑀓𑁆𑀔𑀬𑀁.

𑁯𑁬. ‘‘𑀧𑀥𑀸𑀦𑀁 𑀧𑀳𑀺𑀢𑀢𑁆𑀢𑁄𑀫𑁆𑀳𑀺, 𑀉𑀧𑀲𑀦𑁆𑀢𑁄 𑀦𑀺𑀭𑀽𑀧𑀥𑀺;

𑀦𑀸𑀕𑁄𑀯 𑀩𑀦𑁆𑀥𑀦𑀁 𑀙𑁂𑀢𑁆𑀯𑀸, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁯𑁭. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁯𑁮. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁯𑁯. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀥𑁄𑀢𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀥𑁄𑀢𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀘𑀢𑀼𑀢𑁆𑀣𑀁.