𑁫. 𑀧𑀤𑀼𑀫𑀓𑀽𑀝𑀸𑀕𑀸𑀭𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁫𑁩. ‘‘𑀧𑀺𑀬𑀤𑀲𑁆𑀲𑀻 𑀦𑀸𑀫 𑀪𑀕𑀯𑀸, 𑀲𑀬𑀫𑁆𑀪𑀽 𑀮𑁄𑀓𑀦𑀸𑀬𑀓𑁄;

𑀯𑀺𑀯𑁂𑀓𑀓𑀸𑀫𑁄 𑀲𑀫𑁆𑀩𑀼𑀤𑁆𑀥𑁄, 𑀲𑀫𑀸𑀥𑀺𑀓𑀼𑀲𑀮𑁄 𑀫𑀼𑀦𑀺.

𑁩𑁫𑁪. ‘‘𑀯𑀦𑀲𑀡𑁆𑀟𑀁 𑀲𑀫𑁄𑀕𑀬𑁆𑀳, 𑀧𑀺𑀬𑀤𑀲𑁆𑀲𑀻 𑀫𑀳𑀸𑀫𑀼𑀦𑀺;

𑀧𑀁𑀲𑀼𑀓𑀽𑀮𑀁 𑀧𑀢𑁆𑀣𑀭𑀺𑀢𑁆𑀯𑀸, 𑀦𑀺𑀲𑀻𑀤𑀺 𑀧𑀼𑀭𑀺𑀲𑀼𑀢𑁆𑀢𑀫𑁄.

𑁩𑁫𑁫. ‘‘𑀫𑀺𑀕𑀮𑀼𑀤𑁆𑀤𑁄 𑀧𑀼𑀭𑁂 𑀆𑀲𑀺𑀁, 𑀅𑀭𑀜𑁆𑀜𑁂 [𑀯𑀺𑀧𑀺𑀦𑁂 (𑀲𑀻.), 𑀇𑀭𑀺𑀦𑁂 (𑀲𑁆𑀬𑀸. 𑀓.)] 𑀓𑀸𑀦𑀦𑁂 𑀅𑀳𑀁;

𑀧𑀲𑀤𑀁 𑀫𑀺𑀕𑀫𑁂𑀲𑀦𑁆𑀢𑁄, 𑀆𑀳𑀺𑀡𑁆𑀟𑀸𑀫𑀺 𑀅𑀳𑀁 𑀢𑀤𑀸.

𑁩𑁫𑁬. ‘‘𑀢𑀢𑁆𑀣𑀤𑁆𑀤𑀲𑀸𑀲𑀺𑀁 𑀲𑀫𑁆𑀩𑀼𑀤𑁆𑀥𑀁, 𑀑𑀖𑀢𑀺𑀡𑁆𑀡𑀫𑀦𑀸𑀲𑀯𑀁;

𑀧𑀼𑀧𑁆𑀨𑀺𑀢𑀁 𑀲𑀸𑀮𑀭𑀸𑀚𑀁𑀯, 𑀲𑀢𑀭𑀁𑀲𑀺𑀁𑀯 𑀉𑀕𑁆𑀕𑀢𑀁.

𑁩𑁫𑁭. ‘‘𑀤𑀺𑀲𑁆𑀯𑀸𑀦𑀳𑀁 𑀤𑁂𑀯𑀤𑁂𑀯𑀁, 𑀧𑀺𑀬𑀤𑀲𑁆𑀲𑀺𑀁 𑀫𑀳𑀸𑀬𑀲𑀁;

𑀚𑀸𑀢𑀲𑁆𑀲𑀭𑀁 𑀲𑀫𑁄𑀕𑀬𑁆𑀳, 𑀧𑀤𑀼𑀫𑀁 𑀆𑀳𑀭𑀺𑀁 𑀢𑀤𑀸.

𑁩𑁫𑁮. ‘‘𑀆𑀳𑀭𑀺𑀢𑁆𑀯𑀸𑀦 𑀧𑀤𑀼𑀫𑀁, 𑀲𑀢𑀧𑀢𑁆𑀢𑀁 𑀫𑀦𑁄𑀭𑀫𑀁;

𑀓𑀽𑀝𑀸𑀕𑀸𑀭𑀁 𑀓𑀭𑀺𑀢𑁆𑀯𑀸𑀦, 𑀙𑀸𑀤𑀬𑀺𑀁 𑀧𑀤𑀼𑀫𑁂𑀦𑀳𑀁.

𑁩𑁫𑁯. ‘‘𑀅𑀦𑀼𑀓𑀫𑁆𑀧𑀓𑁄 𑀓𑀸𑀭𑀼𑀡𑀺𑀓𑁄, 𑀧𑀺𑀬𑀤𑀲𑁆𑀲𑀻 𑀫𑀳𑀸𑀫𑀼𑀦𑀺;

𑀲𑀢𑁆𑀢𑀭𑀢𑁆𑀢𑀺𑀦𑁆𑀤𑀺𑀯𑀁 𑀩𑀼𑀤𑁆𑀥𑁄, 𑀓𑀽𑀝𑀸𑀕𑀸𑀭𑁂 𑀯𑀲𑀻 𑀚𑀺𑀦𑁄.

𑁩𑁬𑁦. ‘‘𑀧𑀼𑀭𑀸𑀡𑀁 𑀙𑀟𑁆𑀟𑀬𑀺𑀢𑁆𑀯𑀸𑀦, 𑀦𑀯𑁂𑀦 𑀙𑀸𑀤𑀬𑀺𑀁 𑀅𑀳𑀁;

𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸𑀦, 𑀅𑀝𑁆𑀞𑀸𑀲𑀺𑀁 𑀢𑀸𑀯𑀤𑁂 𑀅𑀳𑀁.

𑁩𑁬𑁧. ‘‘𑀯𑀼𑀝𑁆𑀞𑀳𑀺𑀢𑁆𑀯𑀸 𑀲𑀫𑀸𑀥𑀺𑀫𑁆𑀳𑀸, 𑀧𑀺𑀬𑀤𑀲𑁆𑀲𑀻 𑀫𑀳𑀸𑀫𑀼𑀦𑀺;

𑀤𑀺𑀲𑀁 𑀅𑀦𑀼𑀯𑀺𑀮𑁄𑀓𑁂𑀦𑁆𑀢𑁄, 𑀦𑀺𑀲𑀻𑀤𑀺 𑀮𑁄𑀓𑀦𑀸𑀬𑀓𑁄.

𑁩𑁬𑁨. ‘‘𑀢𑀤𑀸 𑀲𑀼𑀤𑀲𑁆𑀲𑀦𑁄 𑀦𑀸𑀫, 𑀉𑀧𑀝𑁆𑀞𑀸𑀓𑁄 𑀫𑀳𑀺𑀤𑁆𑀥𑀺𑀓𑁄;

𑀘𑀺𑀢𑁆𑀢𑀫𑀜𑁆𑀜𑀸𑀬 𑀩𑀼𑀤𑁆𑀥𑀲𑁆𑀲, 𑀧𑀺𑀬𑀤𑀲𑁆𑀲𑀺𑀲𑁆𑀲 𑀲𑀢𑁆𑀣𑀼𑀦𑁄.

𑁩𑁬𑁩. ‘‘𑀅𑀲𑀻𑀢𑀺𑀬𑀸 𑀲𑀳𑀲𑁆𑀲𑁂𑀳𑀺, 𑀪𑀺𑀓𑁆𑀔𑀽𑀳𑀺 𑀧𑀭𑀺𑀯𑀸𑀭𑀺𑀢𑁄;

𑀯𑀦𑀦𑁆𑀢𑁂 𑀲𑀼𑀔𑀫𑀸𑀲𑀻𑀦𑀁, 𑀉𑀧𑁂𑀲𑀺 𑀮𑁄𑀓𑀦𑀸𑀬𑀓𑀁.

𑁩𑁬𑁪. ‘‘𑀬𑀸𑀯𑀢𑀸 𑀯𑀦𑀲𑀡𑁆𑀟𑀫𑁆𑀳𑀺, 𑀅𑀥𑀺𑀯𑀢𑁆𑀣𑀸 𑀘 𑀤𑁂𑀯𑀢𑀸;

𑀩𑀼𑀤𑁆𑀥𑀲𑁆𑀲 𑀘𑀺𑀢𑁆𑀢𑀫𑀜𑁆𑀜𑀸𑀬, 𑀲𑀩𑁆𑀩𑁂 𑀲𑀦𑁆𑀦𑀺𑀧𑀢𑀼𑀁 𑀢𑀤𑀸.

𑁩𑁬𑁫. ‘‘𑀲𑀫𑀸𑀕𑀢𑁂𑀲𑀼 𑀬𑀓𑁆𑀔𑁂𑀲𑀼, 𑀓𑀼𑀫𑁆𑀪𑀡𑁆𑀟𑁂 𑀲𑀳𑀭𑀓𑁆𑀔𑀲𑁂;

𑀪𑀺𑀓𑁆𑀔𑀼𑀲𑀗𑁆𑀖𑁂 𑀘 𑀲𑀫𑁆𑀧𑀢𑁆𑀢𑁂, 𑀕𑀸𑀣𑀸 𑀧𑀩𑁆𑀬𑀸𑀳𑀭𑀻 [𑀲𑀩𑁆𑀬𑀸𑀳𑀭𑀻 (𑀲𑁆𑀬𑀸.), 𑀫𑀸𑀩𑁆𑀬𑀸𑀳𑀭𑀻 (𑀲𑀻.)] 𑀚𑀺𑀦𑁄.

𑁩𑁬𑁬. ‘‘‘𑀬𑁄 𑀫𑀁 𑀲𑀢𑁆𑀢𑀸𑀳𑀁 𑀧𑀽𑀚𑁂𑀲𑀺, 𑀆𑀯𑀸𑀲𑀜𑁆𑀘 𑀅𑀓𑀸𑀲𑀺 𑀫𑁂;

𑀢𑀫𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀲𑀼𑀡𑀸𑀣 𑀫𑀫 𑀪𑀸𑀲𑀢𑁄.

𑁩𑁬𑁭. ‘‘‘𑀲𑀼𑀤𑀼𑀤𑁆𑀤𑀲𑀁 𑀲𑀼𑀦𑀺𑀧𑀼𑀡𑀁, 𑀕𑀫𑁆𑀪𑀻𑀭𑀁 𑀲𑀼𑀧𑁆𑀧𑀓𑀸𑀲𑀺𑀢𑀁;

𑀜𑀸𑀡𑁂𑀦 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀲𑀼𑀡𑀸𑀣 𑀫𑀫 𑀪𑀸𑀲𑀢𑁄.

𑁩𑁬𑁮. ‘‘‘𑀘𑀢𑀼𑀤𑁆𑀤𑀲𑀸𑀦𑀺 𑀓𑀧𑁆𑀧𑀸𑀦𑀺, 𑀤𑁂𑀯𑀭𑀚𑁆𑀚𑀁 𑀓𑀭𑀺𑀲𑁆𑀲𑀢𑀺;

𑀓𑀽𑀝𑀸𑀕𑀸𑀭𑀁 𑀫𑀳𑀦𑁆𑀢𑀲𑁆𑀲 [𑀩𑁆𑀭𑀳𑀁 𑀢𑀲𑁆𑀲 (𑀲𑀻. 𑀲𑁆𑀬𑀸.)], 𑀧𑀤𑁆𑀫𑀧𑀼𑀧𑁆𑀨𑁂𑀳𑀺 𑀙𑀸𑀤𑀺𑀢𑀁.

𑁩𑁬𑁯. ‘‘‘𑀆𑀓𑀸𑀲𑁂 𑀥𑀸𑀭𑀬𑀺𑀲𑁆𑀲𑀢𑀺, 𑀧𑀼𑀧𑁆𑀨𑀓𑀫𑁆𑀫𑀲𑁆𑀲𑀺𑀤𑀁 [𑀧𑀼𑀩𑁆𑀩𑀓𑀫𑁆𑀫𑀲𑁆𑀲𑀺𑀤𑀁 (𑀲𑁆𑀬𑀸.)] 𑀨𑀮𑀁;

𑀘𑀢𑀼𑀩𑁆𑀩𑀻𑀲𑁂 [𑀘𑀢𑀼𑀤𑁆𑀤𑀲𑁂 (𑀲𑁆𑀬𑀸.)] 𑀓𑀧𑁆𑀧𑀲𑀢𑁂, 𑀯𑁄𑀓𑀺𑀡𑁆𑀡𑀁 𑀲𑀁𑀲𑀭𑀺𑀲𑁆𑀲𑀢𑀺.

𑁩𑁭𑁦. ‘‘‘𑀢𑀢𑁆𑀣 𑀧𑀼𑀧𑁆𑀨𑀫𑀬𑀁 𑀩𑁆𑀬𑀫𑁆𑀳𑀁, 𑀆𑀓𑀸𑀲𑁂 𑀥𑀸𑀭𑀬𑀺𑀲𑁆𑀲𑀢𑀺;

𑀬𑀣𑀸 𑀧𑀤𑀼𑀫𑀧𑀢𑁆𑀢𑀫𑁆𑀳𑀺, 𑀢𑁄𑀬𑀁 𑀦 𑀉𑀧𑀮𑀺𑀫𑁆𑀧𑀢𑀺.

𑁩𑁭𑁧. ‘‘‘𑀢𑀣𑁂𑀯𑀻𑀫𑀲𑁆𑀲 𑀜𑀸𑀡𑀫𑁆𑀳𑀺, 𑀓𑀺𑀮𑁂𑀲𑀸 𑀦𑁄𑀧𑀮𑀺𑀫𑁆𑀧𑀭𑁂;

𑀫𑀦𑀲𑀸 𑀯𑀺𑀦𑀺𑀯𑀝𑁆𑀝𑁂𑀢𑁆𑀯𑀸, 𑀧𑀜𑁆𑀘 𑀦𑀻𑀯𑀭𑀡𑁂 𑀅𑀬𑀁.

𑁩𑁭𑁨. ‘‘‘𑀘𑀺𑀢𑁆𑀢𑀁 𑀚𑀦𑁂𑀢𑁆𑀯𑀸 𑀦𑁂𑀓𑁆𑀔𑀫𑁆𑀫𑁂, 𑀅𑀕𑀸𑀭𑀸 𑀧𑀩𑁆𑀩𑀚𑀺𑀲𑁆𑀲𑀢𑀺;

𑀢𑀢𑁄 𑀧𑀼𑀧𑁆𑀨𑀫𑀬𑁂 𑀩𑁆𑀬𑀫𑁆𑀳𑁂, 𑀥𑀸𑀭𑁂𑀦𑁆𑀢𑁂 [𑀧𑀼𑀧𑁆𑀨𑀫𑀬𑀁 𑀩𑁆𑀬𑀫𑁆𑀳𑀁, 𑀥𑀸𑀭𑁂𑀦𑁆𑀢𑀁 (𑀲𑁆𑀬𑀸. 𑀓.)] 𑀦𑀺𑀓𑁆𑀔𑀫𑀺𑀲𑁆𑀲𑀢𑀺.

𑁩𑁭𑁩. ‘‘‘𑀭𑀼𑀓𑁆𑀔𑀫𑀽𑀮𑁂 𑀯𑀲𑀦𑁆𑀢𑀲𑁆𑀲, 𑀦𑀺𑀧𑀓𑀲𑁆𑀲 𑀲𑀢𑀻𑀫𑀢𑁄;

𑀢𑀢𑁆𑀣 𑀧𑀼𑀧𑁆𑀨𑀫𑀬𑀁 𑀩𑁆𑀬𑀫𑁆𑀳𑀁, 𑀫𑀢𑁆𑀣𑀓𑁂 𑀥𑀸𑀭𑀬𑀺𑀲𑁆𑀲𑀢𑀺.

𑁩𑁭𑁪. ‘‘‘𑀘𑀻𑀯𑀭𑀁 𑀧𑀺𑀡𑁆𑀟𑀧𑀸𑀢𑀜𑁆𑀘, 𑀧𑀘𑁆𑀘𑀬𑀁 𑀲𑀬𑀦𑀸𑀲𑀦𑀁;

𑀤𑀢𑁆𑀯𑀸𑀦 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲, 𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺𑀦𑀸𑀲𑀯𑁄’.

𑁩𑁭𑁫. ‘‘𑀓𑀽𑀝𑀸𑀕𑀸𑀭𑁂𑀦 𑀘𑀭𑀢𑀸 [𑀘𑀭𑀡𑀸 (𑀲𑀻. 𑀧𑀻. 𑀓.), 𑀘𑀭𑀺𑀢𑁂 (𑀲𑁆𑀬𑀸.)], 𑀧𑀩𑁆𑀩𑀚𑁆𑀚𑀁 𑀅𑀪𑀺𑀦𑀺𑀓𑁆𑀔𑀫𑀺𑀁;

𑀭𑀼𑀓𑁆𑀔𑀫𑀽𑀮𑁂 𑀯𑀲𑀦𑁆𑀢𑀫𑁆𑀧𑀺 [𑀯𑀲𑀦𑁆𑀢𑀫𑁆𑀳𑀺 (𑀲𑀻.), 𑀯𑀲𑀢𑁄𑀧𑀺 (?)], 𑀓𑀽𑀝𑀸𑀕𑀸𑀭𑀁 𑀥𑀭𑀻𑀬𑀢𑀺.

𑁩𑁭𑁬. ‘‘𑀘𑀻𑀯𑀭𑁂 𑀧𑀺𑀡𑁆𑀟𑀧𑀸𑀢𑁂 𑀘, 𑀘𑁂𑀢𑀦𑀸 𑀫𑁂 𑀦 𑀯𑀺𑀚𑁆𑀚𑀢𑀺;

𑀧𑀼𑀜𑁆𑀜𑀓𑀫𑁆𑀫𑁂𑀦 𑀲𑀁𑀬𑀼𑀢𑁆𑀢𑁄, 𑀮𑀪𑀸𑀫𑀺 𑀧𑀭𑀺𑀦𑀺𑀝𑁆𑀞𑀺𑀢𑀁.

𑁩𑁭𑁭. ‘‘𑀕𑀡𑀦𑀸𑀢𑁄 𑀅𑀲𑀗𑁆𑀔𑁂𑀬𑁆𑀬𑀸, 𑀓𑀧𑁆𑀧𑀓𑁄𑀝𑀻 𑀩𑀳𑀽 𑀫𑀫;

𑀭𑀺𑀢𑁆𑀢𑀓𑀸 𑀢𑁂 𑀅𑀢𑀺𑀓𑁆𑀓𑀦𑁆𑀢𑀸, 𑀧𑀫𑀼𑀢𑁆𑀢𑀸 𑀮𑁄𑀓𑀦𑀸𑀬𑀓𑀸.

𑁩𑁭𑁮. ‘‘𑀅𑀝𑁆𑀞𑀸𑀭𑀲𑁂 𑀓𑀧𑁆𑀧𑀲𑀢𑁂, 𑀧𑀺𑀬𑀤𑀲𑁆𑀲𑀻 𑀯𑀺𑀦𑀸𑀬𑀓𑁄;

𑀢𑀫𑀳𑀁 𑀧𑀬𑀺𑀭𑀼𑀧𑀸𑀲𑀺𑀢𑁆𑀯𑀸, 𑀇𑀫𑀁 𑀬𑁄𑀦𑀺𑀁 𑀉𑀧𑀸𑀕𑀢𑁄.

𑁩𑁭𑁯. ‘‘𑀇𑀥 𑀧𑀲𑁆𑀲𑀸𑀫𑀺 [𑀇𑀥𑀤𑁆𑀤𑀲𑀸𑀲𑀺𑀁 (𑀲𑀻.)] 𑀲𑀫𑁆𑀩𑀼𑀤𑁆𑀥𑀁, 𑀅𑀦𑁄𑀫𑀁 𑀦𑀸𑀫 𑀘𑀓𑁆𑀔𑀼𑀫𑀁;

𑀢𑀫𑀳𑀁 𑀉𑀧𑀕𑀦𑁆𑀢𑁆𑀯𑀸𑀦, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁.

𑁩𑁮𑁦. ‘‘𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀩𑀼𑀤𑁆𑀥𑁄, 𑀫𑀕𑁆𑀕𑀁 𑀫𑁂 𑀤𑁂𑀲𑀬𑀻 𑀚𑀺𑀦𑁄;

𑀢𑀲𑁆𑀲 𑀥𑀫𑁆𑀫𑀁 𑀲𑀼𑀡𑀺𑀢𑁆𑀯𑀸𑀦, 𑀧𑀢𑁆𑀢𑁄𑀫𑁆𑀳𑀺 𑀅𑀘𑀮𑀁 𑀧𑀤𑀁.

𑁩𑁮𑁧. ‘‘𑀢𑁄𑀲𑀬𑀺𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑀁, 𑀕𑁄𑀢𑀫𑀁 𑀲𑀓𑁆𑀬𑀧𑀼𑀗𑁆𑀕𑀯𑀁;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁩𑁮𑁨. ‘‘𑀅𑀝𑁆𑀞𑀸𑀭𑀲𑁂 𑀓𑀧𑁆𑀧𑀲𑀢𑁂, 𑀬𑀁 𑀩𑀼𑀤𑁆𑀥𑀫𑀪𑀺𑀧𑀽𑀚𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁩𑁮𑁩. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸;

𑀲𑀩𑁆𑀩𑀸𑀲𑀯𑀸 𑀧𑀭𑀺𑀓𑁆𑀔𑀻𑀡𑀸, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄.

𑁩𑁮𑁪. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁩𑁮𑁫. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀤𑀼𑀫𑀓𑀽𑀝𑀸𑀕𑀸𑀭𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀤𑀼𑀫𑀓𑀽𑀝𑀸𑀕𑀸𑀭𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀜𑁆𑀘𑀫𑀁.