𑁬. 𑀩𑀸𑀓𑀼𑀮𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁮𑁬. ‘‘𑀳𑀺𑀫𑀯𑀦𑁆𑀢𑀲𑁆𑀲𑀸𑀯𑀺𑀤𑀽𑀭𑁂, 𑀲𑁄𑀪𑀺𑀢𑁄 𑀦𑀸𑀫 𑀧𑀩𑁆𑀩𑀢𑁄;

𑀅𑀲𑁆𑀲𑀫𑁄 𑀲𑀼𑀓𑀢𑁄 𑀫𑀬𑁆𑀳𑀁, 𑀲𑀓𑀲𑀺𑀲𑁆𑀲𑁂𑀳𑀺 𑀫𑀸𑀧𑀺𑀢𑁄.

𑁩𑁮𑁭. ‘‘𑀫𑀡𑁆𑀟𑀧𑀸 𑀘 𑀩𑀳𑀽 𑀢𑀢𑁆𑀣, 𑀧𑀼𑀧𑁆𑀨𑀺𑀢𑀸 𑀲𑀺𑀦𑁆𑀤𑀼𑀯𑀸𑀭𑀓𑀸;

𑀓𑀧𑀺𑀢𑁆𑀣𑀸 𑀘 𑀩𑀳𑀽 𑀢𑀢𑁆𑀣, 𑀧𑀼𑀧𑁆𑀨𑀺𑀢𑀸 𑀚𑀻𑀯𑀚𑀻𑀯𑀓𑀸 [𑀘𑀫𑁆𑀧𑀓𑀸 𑀦𑀸𑀕𑀓𑁂𑀢𑀓𑀸 (𑀲𑁆𑀬𑀸.)].

𑁩𑁮𑁮. ‘‘𑀦𑀺𑀕𑁆𑀕𑀼𑀡𑁆𑀟𑀺𑀬𑁄 𑀩𑀳𑀽 𑀢𑀢𑁆𑀣, 𑀩𑀤𑀭𑀸𑀫𑀮𑀓𑀸𑀦𑀺 𑀘;

𑀨𑀸𑀭𑀼𑀲𑀓𑀸 𑀅𑀮𑀸𑀩𑀽 𑀘, 𑀧𑀼𑀡𑁆𑀟𑀭𑀻𑀓𑀸 𑀘 𑀧𑀼𑀧𑁆𑀨𑀺𑀢𑀸.

𑁩𑁮𑁯. ‘‘𑀆𑀴𑀓𑀸 [𑀅𑀴𑀓𑁆𑀓𑀸 (𑀲𑁆𑀬𑀸.)] 𑀩𑁂𑀮𑀼𑀯𑀸 𑀢𑀢𑁆𑀣, 𑀓𑀤𑀮𑀻 𑀫𑀸𑀢𑀼𑀮𑀼𑀗𑁆𑀕𑀓𑀸;

𑀫𑀳𑀸𑀦𑀸𑀫𑀸 𑀩𑀳𑀽 𑀢𑀢𑁆𑀣, 𑀅𑀚𑁆𑀚𑀼𑀦𑀸 𑀘 𑀧𑀺𑀬𑀗𑁆𑀕𑀼𑀓𑀸.

𑁩𑁯𑁦. ‘‘𑀓𑁄𑀲𑀫𑁆𑀩𑀸 𑀲𑀴𑀮𑀸 𑀦𑀺𑀫𑁆𑀩𑀸 [𑀦𑀻𑀧𑀸 (𑀲𑀻.)], 𑀦𑀺𑀕𑁆𑀭𑁄𑀥𑀸 𑀘 𑀓𑀧𑀺𑀢𑁆𑀣𑀦𑀸;

𑀏𑀤𑀺𑀲𑁄 𑀅𑀲𑁆𑀲𑀫𑁄 𑀫𑀬𑁆𑀳𑀁, 𑀲𑀲𑀺𑀲𑁆𑀲𑁄𑀳𑀁 𑀢𑀳𑀺𑀁 𑀯𑀲𑀺𑀁.

𑁩𑁯𑁧. ‘‘𑀅𑀦𑁄𑀫𑀤𑀲𑁆𑀲𑀻 𑀪𑀕𑀯𑀸, 𑀲𑀬𑀫𑁆𑀪𑀽 𑀮𑁄𑀓𑀦𑀸𑀬𑀓𑁄;

𑀕𑀯𑁂𑀲𑀁 𑀧𑀝𑀺𑀲𑀮𑁆𑀮𑀸𑀦𑀁, 𑀫𑀫𑀲𑁆𑀲𑀫𑀫𑀼𑀧𑀸𑀕𑀫𑀺.

𑁩𑁯𑁨. ‘‘𑀉𑀧𑁂𑀢𑀫𑁆𑀳𑀺 𑀫𑀳𑀸𑀯𑀻𑀭𑁂, 𑀅𑀦𑁄𑀫𑀤𑀲𑁆𑀲𑀺𑀫𑀳𑀸𑀬𑀲𑁂;

𑀔𑀡𑁂𑀦 𑀮𑁄𑀓𑀦𑀸𑀣𑀲𑁆𑀲, 𑀯𑀸𑀢𑀸𑀩𑀸𑀥𑁄 𑀲𑀫𑀼𑀝𑁆𑀞𑀳𑀺.

𑁩𑁯𑁩. ‘‘𑀯𑀺𑀘𑀭𑀦𑁆𑀢𑁄 𑀅𑀭𑀜𑁆𑀜𑀫𑁆𑀳𑀺, 𑀅𑀤𑁆𑀤𑀲𑀁 𑀮𑁄𑀓𑀦𑀸𑀬𑀓𑀁;

𑀉𑀧𑀕𑀦𑁆𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑀁, 𑀘𑀓𑁆𑀔𑀼𑀫𑀦𑁆𑀢𑀁 𑀫𑀳𑀸𑀬𑀲𑀁.

𑁩𑁯𑁪. ‘‘𑀇𑀭𑀺𑀬𑀜𑁆𑀘𑀸𑀧𑀺 𑀤𑀺𑀲𑁆𑀯𑀸𑀦, 𑀉𑀧𑀮𑀓𑁆𑀔𑁂𑀲𑀳𑀁 𑀢𑀤𑀸;

𑀅𑀲𑀁𑀲𑀬𑀜𑁆𑀳𑀺 𑀩𑀼𑀤𑁆𑀥𑀲𑁆𑀲, 𑀩𑁆𑀬𑀸𑀥𑀺 𑀦𑁄 𑀉𑀤𑀧𑀚𑁆𑀚𑀣.

𑁩𑁯𑁫. ‘‘𑀔𑀺𑀧𑁆𑀧𑀁 𑀅𑀲𑁆𑀲𑀫𑀫𑀸𑀕𑀜𑁆𑀙𑀺𑀁, 𑀫𑀫 𑀲𑀺𑀲𑁆𑀲𑀸𑀦 𑀲𑀦𑁆𑀢𑀺𑀓𑁂;

𑀪𑁂𑀲𑀚𑁆𑀚𑀁 𑀓𑀢𑁆𑀢𑀼𑀓𑀸𑀫𑁄𑀳𑀁, 𑀲𑀺𑀲𑁆𑀲𑁂 𑀆𑀫𑀦𑁆𑀢𑀬𑀺𑀁 𑀢𑀤𑀸.

𑁩𑁯𑁬. ‘‘𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸𑀦 𑀫𑁂 𑀯𑀸𑀓𑁆𑀬𑀁, 𑀲𑀺𑀲𑁆𑀲𑀸 𑀲𑀩𑁆𑀩𑁂 𑀲𑀕𑀸𑀭𑀯𑀸;

𑀏𑀓𑀚𑁆𑀛𑀁 𑀲𑀦𑁆𑀦𑀺𑀧𑀢𑀺𑀁𑀲𑀼, 𑀲𑀢𑁆𑀣𑀼𑀕𑀸𑀭𑀯𑀢𑀸 𑀫𑀫.

𑁩𑁯𑁭. ‘‘𑀔𑀺𑀧𑁆𑀧𑀁 𑀧𑀩𑁆𑀩𑀢𑀫𑀸𑀭𑀼𑀬𑁆𑀳, 𑀲𑀩𑁆𑀩𑁄𑀲𑀥𑀫𑀳𑀸𑀲𑀳𑀁 [𑀫𑀓𑀸𑀲𑀳𑀁 (𑀲𑁆𑀬𑀸. 𑀓.)];

𑀧𑀸𑀦𑀻𑀬𑀬𑁄𑀕𑀁 [𑀧𑀸𑀦𑀻𑀬𑀬𑁄𑀕𑁆𑀕𑀁 (𑀲𑀻.)] 𑀓𑀢𑁆𑀯𑀸𑀦, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲𑀤𑀸𑀲𑀳𑀁.

𑁩𑁯𑁮. ‘‘𑀧𑀭𑀺𑀪𑀼𑀢𑁆𑀢𑁂 𑀫𑀳𑀸𑀯𑀻𑀭𑁂, 𑀲𑀩𑁆𑀩𑀜𑁆𑀜𑀼𑀮𑁄𑀓𑀦𑀸𑀬𑀓𑁂;

𑀔𑀺𑀧𑁆𑀧𑀁 𑀯𑀸𑀢𑁄 𑀯𑀽𑀧𑀲𑀫𑀺, 𑀲𑀼𑀕𑀢𑀲𑁆𑀲 𑀫𑀳𑁂𑀲𑀺𑀦𑁄.

𑁩𑁯𑁯. ‘‘𑀧𑀲𑁆𑀲𑀤𑁆𑀥𑀁 𑀤𑀭𑀣𑀁 𑀤𑀺𑀲𑁆𑀯𑀸, 𑀅𑀦𑁄𑀫𑀤𑀲𑁆𑀲𑀻 𑀫𑀳𑀸𑀬𑀲𑁄;

𑀲𑀓𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

𑁪𑁦𑁦. ‘‘‘𑀬𑁄 𑀫𑁂 𑀧𑀸𑀤𑀸𑀲𑀺 𑀪𑁂𑀲𑀚𑁆𑀚𑀁, 𑀩𑁆𑀬𑀸𑀥𑀺𑀜𑁆𑀘 𑀲𑀫𑀬𑀻 𑀫𑀫;

𑀢𑀫𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀲𑀼𑀡𑀸𑀣 𑀫𑀫 𑀪𑀸𑀲𑀢𑁄.

𑁪𑁦𑁧. ‘‘‘𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀦𑀺, 𑀤𑁂𑀯𑀮𑁄𑀓𑁂 𑀭𑀫𑀺𑀲𑁆𑀲𑀢𑀺;

𑀯𑀸𑀤𑀺𑀢𑁂 𑀢𑀽𑀭𑀺𑀬𑁂 𑀢𑀢𑁆𑀣, 𑀫𑁄𑀤𑀺𑀲𑁆𑀲𑀢𑀺 𑀲𑀤𑀸 𑀅𑀬𑀁.

𑁪𑁦𑁨. ‘‘‘𑀫𑀦𑀼𑀲𑁆𑀲𑀮𑁄𑀓𑀫𑀸𑀕𑀦𑁆𑀢𑁆𑀯𑀸, 𑀲𑀼𑀓𑁆𑀓𑀫𑀽𑀮𑁂𑀦 𑀘𑁄𑀤𑀺𑀢𑁄;

𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀁 𑀭𑀸𑀚𑀸 𑀘, 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺.

𑁪𑁦𑁩. ‘‘‘𑀧𑀜𑁆𑀘𑀧𑀜𑁆𑀜𑀸𑀲𑀓𑀧𑁆𑀧𑀫𑁆𑀳𑀺, 𑀅𑀦𑁄𑀫𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀘𑀸𑀢𑀼𑀭𑀦𑁆𑀢𑁄 𑀯𑀺𑀚𑀺𑀢𑀸𑀯𑀻, 𑀚𑀫𑁆𑀩𑀼𑀫𑀡𑁆𑀟𑀲𑁆𑀲 [𑀚𑀫𑁆𑀩𑀼𑀤𑀻𑀧𑀲𑁆𑀲 (𑀲𑁆𑀬𑀸.)] 𑀇𑀲𑁆𑀲𑀭𑁄.

𑁪𑁦𑁪. ‘‘‘𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄;

𑀢𑀸𑀯𑀢𑀺𑀁𑀲𑁂𑀧𑀺 𑀔𑁄𑀪𑁂𑀢𑁆𑀯𑀸, 𑀇𑀲𑁆𑀲𑀭𑀁 𑀓𑀸𑀭𑀬𑀺𑀲𑁆𑀲𑀢𑀺.

𑁪𑁦𑁫. ‘‘‘𑀤𑁂𑀯𑀪𑀽𑀢𑁄 𑀫𑀦𑀼𑀲𑁆𑀲𑁄 𑀯𑀸, 𑀅𑀧𑁆𑀧𑀸𑀩𑀸𑀥𑁄 𑀪𑀯𑀺𑀲𑁆𑀲𑀢𑀺;

𑀧𑀭𑀺𑀕𑁆𑀕𑀳𑀁 𑀯𑀺𑀯𑀚𑁆𑀚𑁂𑀢𑁆𑀯𑀸, 𑀩𑁆𑀬𑀸𑀥𑀺𑀁 𑀮𑁄𑀓𑁂 𑀢𑀭𑀺𑀲𑁆𑀲𑀢𑀺.

𑁪𑁦𑁬. ‘‘‘𑀅𑀧𑁆𑀧𑀭𑀺𑀫𑁂𑀬𑁆𑀬𑁂 𑀇𑀢𑁄 𑀓𑀧𑁆𑀧𑁂, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

𑁪𑁦𑁭. ‘‘‘𑀢𑀲𑁆𑀲 𑀥𑀫𑁆𑀫𑁂𑀲𑀼 𑀤𑀸𑀬𑀸𑀤𑁄, 𑀑𑀭𑀲𑁄 𑀥𑀫𑁆𑀫𑀦𑀺𑀫𑁆𑀫𑀺𑀢𑁄;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺𑀦𑀸𑀲𑀯𑁄.

𑁪𑁦𑁮. ‘‘‘𑀓𑀺𑀮𑁂𑀲𑁂 𑀛𑀸𑀧𑀬𑀺𑀢𑁆𑀯𑀸𑀦, 𑀢𑀡𑁆𑀳𑀸𑀲𑁄𑀢𑀁 𑀢𑀭𑀺𑀲𑁆𑀲𑀢𑀺;

𑀩𑀸𑀓𑀼𑀮𑁄 [𑀩𑀓𑁆𑀓𑀼𑀮𑁄 (𑀲𑀻. 𑀲𑁆𑀬𑀸.)] 𑀦𑀸𑀫 𑀦𑀸𑀫𑁂𑀦, 𑀳𑁂𑀲𑁆𑀲𑀢𑀺 𑀲𑀢𑁆𑀣𑀼 𑀲𑀸𑀯𑀓𑁄.

𑁪𑁦𑁯. ‘‘‘𑀇𑀤𑀁 𑀲𑀩𑁆𑀩𑀁 𑀅𑀪𑀺𑀜𑁆𑀜𑀸𑀬, 𑀕𑁄𑀢𑀫𑁄 𑀲𑀓𑁆𑀬𑀧𑀼𑀗𑁆𑀕𑀯𑁄;

𑀪𑀺𑀓𑁆𑀔𑀼𑀲𑀗𑁆𑀖𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀏𑀢𑀤𑀕𑁆𑀕𑁂 𑀞𑀧𑁂𑀲𑁆𑀲𑀢𑀺’.

𑁪𑁧𑁦. ‘‘𑀅𑀦𑁄𑀫𑀤𑀲𑁆𑀲𑀻 𑀪𑀕𑀯𑀸, 𑀲𑀬𑀫𑁆𑀪𑀽 𑀮𑁄𑀓𑀦𑀸𑀬𑀓𑁄;

𑀯𑀺𑀯𑁂𑀓𑀸𑀦𑀼𑀯𑀺𑀮𑁄𑀓𑁂𑀦𑁆𑀢𑁄, 𑀫𑀫𑀲𑁆𑀲𑀫𑀫𑀼𑀧𑀸𑀕𑀫𑀺.

𑁪𑁧𑁧. ‘‘𑀉𑀧𑀸𑀕𑀢𑀁 𑀫𑀳𑀸𑀯𑀻𑀭𑀁, 𑀲𑀩𑁆𑀩𑀜𑁆𑀜𑀼𑀁 𑀮𑁄𑀓𑀦𑀸𑀬𑀓𑀁;

𑀲𑀩𑁆𑀩𑁄𑀲𑀥𑁂𑀦 𑀢𑀧𑁆𑀧𑁂𑀲𑀺𑀁, 𑀧𑀲𑀦𑁆𑀦𑁄 𑀲𑁂𑀳𑀺 𑀧𑀸𑀡𑀺𑀪𑀺.

𑁪𑁧𑁨. ‘‘𑀢𑀲𑁆𑀲 𑀫𑁂 𑀲𑀼𑀓𑀢𑀁 𑀓𑀫𑁆𑀫𑀁, 𑀲𑀼𑀔𑁂𑀢𑁆𑀢𑁂 𑀩𑀻𑀚𑀲𑀫𑁆𑀧𑀤𑀸;

𑀔𑁂𑀧𑁂𑀢𑀼𑀁 𑀦𑁂𑀯 𑀲𑀓𑁆𑀓𑁄𑀫𑀺, 𑀢𑀤𑀸 𑀳𑀺 𑀲𑀼𑀓𑀢𑀁 𑀫𑀫.

𑁪𑁧𑁩. ‘‘𑀮𑀸𑀪𑀸 𑀫𑀫 𑀲𑀼𑀮𑀤𑁆𑀥𑀁 𑀫𑁂, 𑀬𑁄𑀳𑀁 𑀅𑀤𑁆𑀤𑀓𑁆𑀔𑀺 𑀦𑀸𑀬𑀓𑀁;

𑀢𑁂𑀦 𑀓𑀫𑁆𑀫𑀸𑀯𑀲𑁂𑀲𑁂𑀦, 𑀧𑀢𑁆𑀢𑁄𑀫𑁆𑀳𑀺 𑀅𑀘𑀮𑀁 𑀧𑀤𑀁.

𑁪𑁧𑁪. ‘‘𑀲𑀩𑁆𑀩𑀫𑁂𑀢𑀁 𑀅𑀪𑀺𑀜𑁆𑀜𑀸𑀬, 𑀕𑁄𑀢𑀫𑁄 𑀲𑀓𑁆𑀬𑀧𑀼𑀗𑁆𑀕𑀯𑁄;

𑀪𑀺𑀓𑁆𑀔𑀼𑀲𑀗𑁆𑀖𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺 𑀫𑀁.

𑁪𑁧𑁫. ‘‘𑀅𑀧𑀭𑀺𑀫𑁂𑀬𑁆𑀬𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀓𑀫𑁆𑀫𑀫𑀓𑀭𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀪𑁂𑀲𑀚𑁆𑀚𑀲𑁆𑀲 𑀇𑀤𑀁 𑀨𑀮𑀁.

𑁪𑁧𑁬. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸;

𑀲𑀩𑁆𑀩𑀸𑀲𑀯𑀸 𑀧𑀭𑀺𑀓𑁆𑀔𑀻𑀡𑀸, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄.

𑁪𑁧𑁭. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁪𑁧𑁮. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀩𑀸𑀓𑀼𑀮𑁄 [𑀩𑀓𑁆𑀓𑀼𑀮𑁄 (𑀲𑀻. 𑀲𑁆𑀬𑀸.)] 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺;

𑀩𑀸𑀓𑀼𑀮𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀙𑀝𑁆𑀞𑀁.