𑁪𑁦. 𑀧𑀺𑀮𑀺𑀦𑁆𑀤𑀯𑀘𑁆𑀙𑀯𑀕𑁆𑀕𑁄

𑁧. 𑀧𑀺𑀮𑀺𑀦𑁆𑀤𑀯𑀘𑁆𑀙𑀢𑁆𑀣𑁂𑀭𑀅𑀧𑀤𑀸𑀦𑀁

𑁧. ‘‘𑀦𑀕𑀭𑁂 𑀳𑀁𑀲𑀯𑀢𑀺𑀬𑀸, 𑀆𑀲𑀺𑀁 𑀤𑁄𑀯𑀸𑀭𑀺𑀓𑁄 𑀅𑀳𑀁;

𑀅𑀓𑁆𑀔𑁄𑀪𑀁 𑀅𑀫𑀺𑀢𑀁 𑀪𑁄𑀕𑀁, 𑀖𑀭𑁂 𑀲𑀦𑁆𑀦𑀺𑀘𑀺𑀢𑀁 𑀫𑀫.

𑁨. ‘‘𑀭𑀳𑁄𑀕𑀢𑁄 𑀦𑀺𑀲𑀻𑀤𑀺𑀢𑁆𑀯𑀸, 𑀧𑀳𑀁𑀲𑀺𑀢𑁆𑀯𑀸𑀦 𑀫𑀸𑀦𑀲𑀁 [𑀲𑀫𑁆𑀧𑀳𑀁𑀲𑀺𑀢𑁆𑀯 𑀫𑀸𑀦𑀲𑀁 (𑀲𑀻.)];

𑀦𑀺𑀲𑀚𑁆𑀚 𑀧𑀸𑀲𑀸𑀤𑀯𑀭𑁂, 𑀏𑀯𑀁 𑀘𑀺𑀦𑁆𑀢𑁂𑀲𑀳𑀁 𑀢𑀤𑀸.

(𑀘𑀺𑀦𑁆𑀢𑀦𑀸𑀓𑀸𑀭𑁄)

𑁩. ‘‘‘𑀩𑀳𑀽 𑀫𑁂𑀥𑀺𑀕𑀢𑀸 𑀪𑁄𑀕𑀸, 𑀨𑀻𑀢𑀁 𑀅𑀦𑁆𑀢𑁂𑀧𑀼𑀭𑀁 𑀫𑀫;

𑀭𑀸𑀚𑀸𑀧𑀺 [𑀭𑀸𑀚𑀺𑀲𑀺 (𑀓.)] 𑀲𑀦𑁆𑀦𑀺𑀫𑀦𑁆𑀢𑁂𑀲𑀺, 𑀆𑀦𑀦𑁆𑀤𑁄 𑀧𑀣𑀯𑀺𑀲𑁆𑀲𑀭𑁄.

𑁪. ‘‘‘𑀅𑀬𑀜𑁆𑀘 𑀩𑀼𑀤𑁆𑀥𑁄 𑀉𑀧𑁆𑀧𑀦𑁆𑀦𑁄, 𑀅𑀥𑀺𑀘𑁆𑀘𑀼𑀧𑁆𑀧𑀢𑁆𑀢𑀺𑀓𑁄 𑀫𑀼𑀦𑀺;

𑀲𑀁𑀯𑀺𑀚𑁆𑀚𑀦𑁆𑀢𑀺 𑀘 𑀫𑁂 𑀪𑁄𑀕𑀸, 𑀤𑀸𑀦𑀁 𑀤𑀲𑁆𑀲𑀸𑀫𑀺 𑀲𑀢𑁆𑀣𑀼𑀦𑁄.

𑁫. ‘‘‘𑀧𑀤𑀼𑀫𑁂𑀦 𑀭𑀸𑀚𑀧𑀼𑀢𑁆𑀢𑁂𑀦, 𑀤𑀺𑀦𑁆𑀦𑀁 𑀤𑀸𑀦𑀯𑀭𑀁 𑀚𑀺𑀦𑁂;

𑀳𑀢𑁆𑀣𑀺𑀦𑀸𑀕𑁂 𑀘 𑀧𑀮𑁆𑀮𑀗𑁆𑀓𑁂, 𑀅𑀧𑀲𑁆𑀲𑁂𑀦𑀜𑁆𑀘𑀦𑀧𑁆𑀧𑀓𑀁.

𑁬. ‘‘‘𑀅𑀳𑀫𑁆𑀧𑀺 𑀤𑀸𑀦𑀁 𑀤𑀲𑁆𑀲𑀸𑀫𑀺, 𑀲𑀗𑁆𑀖𑁂 𑀕𑀡𑀯𑀭𑀼𑀢𑁆𑀢𑀫𑁂;

𑀅𑀤𑀺𑀦𑁆𑀦𑀧𑀼𑀩𑁆𑀩𑀫𑀜𑁆𑀜𑁂𑀲𑀁, 𑀪𑀯𑀺𑀲𑁆𑀲𑀁 𑀆𑀤𑀺𑀓𑀫𑁆𑀫𑀺𑀓𑁄.

𑁭. ‘‘‘𑀘𑀺𑀦𑁆𑀢𑁂𑀢𑁆𑀯𑀸𑀳𑀁 𑀩𑀳𑀼𑀯𑀺𑀥𑀁, 𑀬𑀸𑀕𑁂 𑀬𑀲𑁆𑀲 𑀲𑀼𑀔𑀁𑀨𑀮𑀁;

𑀧𑀭𑀺𑀓𑁆𑀔𑀸𑀭𑀤𑀸𑀦𑀫𑀤𑁆𑀤𑀓𑁆𑀔𑀺𑀁, 𑀫𑀫 𑀲𑀗𑁆𑀓𑀧𑁆𑀧𑀧𑀽𑀭𑀡𑀁.

𑁮. ‘‘‘𑀧𑀭𑀺𑀓𑁆𑀔𑀸𑀭𑀸𑀦𑀺 𑀤𑀲𑁆𑀲𑀸𑀫𑀺, 𑀲𑀗𑁆𑀖𑁂 𑀕𑀡𑀯𑀭𑀼𑀢𑁆𑀢𑀫𑁂;

𑀅𑀤𑀺𑀦𑁆𑀦𑀧𑀼𑀩𑁆𑀩𑀫𑀜𑁆𑀜𑁂𑀲𑀁, 𑀪𑀯𑀺𑀲𑁆𑀲𑀁 𑀆𑀤𑀺𑀓𑀫𑁆𑀫𑀺𑀓𑁄’.

(𑀤𑀸𑀦𑀯𑀢𑁆𑀣𑀼𑀲𑀫𑁆𑀧𑀸𑀤𑀦𑀁)

𑁯. ‘‘𑀦𑀴𑀓𑀸𑀭𑁂 𑀉𑀧𑀸𑀕𑀫𑁆𑀫, 𑀙𑀢𑁆𑀢𑀁 𑀓𑀸𑀭𑁂𑀲𑀺 𑀢𑀸𑀯𑀤𑁂;

𑀙𑀢𑁆𑀢𑀲𑀢𑀲𑀳𑀲𑁆𑀲𑀸𑀦𑀺, 𑀏𑀓𑀢𑁄 𑀲𑀦𑁆𑀦𑀺𑀧𑀸𑀢𑀬𑀺𑀁.

𑁧𑁦. ‘‘𑀤𑀼𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺, 𑀏𑀓𑀢𑁄 𑀲𑀦𑁆𑀦𑀺𑀧𑀸𑀢𑀬𑀺𑀁;

𑀧𑀢𑁆𑀢𑀲𑀢𑀲𑀳𑀲𑁆𑀲𑀸𑀦𑀺, 𑀏𑀓𑀢𑁄 𑀲𑀦𑁆𑀦𑀺𑀧𑀸𑀢𑀬𑀺𑀁.

𑁧𑁧. ‘‘𑀯𑀸𑀲𑀺𑀬𑁄 𑀲𑀢𑁆𑀣𑀓𑁂 𑀘𑀸𑀧𑀺, 𑀲𑀽𑀘𑀺𑀬𑁄 𑀦𑀔𑀙𑁂𑀤𑀦𑁂;

𑀳𑁂𑀝𑁆𑀞𑀸𑀙𑀢𑁆𑀢𑁂 𑀞𑀧𑀸𑀧𑁂𑀲𑀺𑀁, 𑀓𑀸𑀭𑁂𑀢𑁆𑀯𑀸 𑀢𑀤𑀦𑀼𑀘𑁆𑀙𑀯𑁂.

𑁧𑁨. ‘‘𑀯𑀺𑀥𑀽𑀧𑀦𑁂 𑀢𑀸𑀮𑀯𑀡𑁆𑀝𑁂, 𑀫𑁄𑀭𑀳𑀢𑁆𑀣𑁂 𑀘 𑀘𑀸𑀫𑀭𑁂;

𑀧𑀭𑀺𑀲𑁆𑀲𑀸𑀯𑀦𑁂 𑀢𑁂𑀮𑀥𑀸𑀭𑁂 [𑀢𑁂𑀮𑀥𑀭𑁂 (𑀲𑀻.)], 𑀓𑀸𑀭𑀬𑀺𑀁 𑀢𑀤𑀦𑀼𑀘𑁆𑀙𑀯𑁂.

𑁧𑁩. ‘‘𑀲𑀽𑀘𑀺𑀖𑀭𑁂 𑀅𑀁𑀲𑀩𑀤𑁆𑀥𑁂, 𑀅𑀣𑁄𑀧𑀺 𑀓𑀸𑀬𑀩𑀦𑁆𑀥𑀦𑁂;

𑀆𑀥𑀸𑀭𑀓𑁂 𑀘 𑀲𑀼𑀓𑀢𑁂, 𑀓𑀸𑀭𑀬𑀺𑀁 𑀢𑀤𑀦𑀼𑀘𑁆𑀙𑀯𑁂.

𑁧𑁪. ‘‘𑀧𑀭𑀺𑀪𑁄𑀕𑀪𑀸𑀚𑀦𑁂 𑀘, 𑀅𑀣𑁄𑀧𑀺 𑀮𑁄𑀳𑀣𑀸𑀮𑀓𑁂;

𑀪𑁂𑀲𑀚𑁆𑀚𑁂 𑀧𑀽𑀭𑀬𑀺𑀢𑁆𑀯𑀸𑀦, 𑀳𑁂𑀝𑁆𑀞𑀸𑀙𑀢𑁆𑀢𑁂 𑀞𑀧𑁂𑀲𑀳𑀁.

𑁧𑁫. ‘‘𑀯𑀘𑀁 𑀉𑀲𑀻𑀭𑀁 𑀮𑀝𑁆𑀞𑀺𑀫𑀥𑀼𑀁, 𑀧𑀺𑀧𑁆𑀨𑀮𑀻 𑀫𑀭𑀺𑀘𑀸𑀦𑀺 𑀘;

𑀳𑀭𑀻𑀢𑀓𑀺𑀁 𑀲𑀺𑀗𑁆𑀕𑀻𑀯𑁂𑀭𑀁, 𑀲𑀩𑁆𑀩𑀁 𑀧𑀽𑀭𑁂𑀲𑀺 𑀪𑀸𑀚𑀦𑁂.

𑁧𑁬. ‘‘𑀉𑀧𑀸𑀳𑀦𑀸 𑀧𑀸𑀤𑀼𑀓𑀸𑀬𑁄, 𑀅𑀣𑁄 𑀉𑀤𑀓𑀧𑀼𑀜𑁆𑀙𑀦𑁂;

𑀓𑀢𑁆𑀢𑀭𑀤𑀡𑁆𑀟𑁂 𑀲𑀼𑀓𑀢𑁂, 𑀓𑀸𑀭𑀬𑀺𑀁 𑀢𑀤𑀦𑀼𑀘𑁆𑀙𑀯𑁂.

𑁧𑁭. ‘‘𑀑𑀲𑀥𑀜𑁆𑀚𑀦𑀦𑀸𑀴𑀻 𑀘 [𑀑𑀲𑀥𑀁 𑀅𑀜𑁆𑀚𑀦𑀸𑀧𑀺𑀘 (𑀲𑁆𑀬𑀸.)], 𑀲𑀮𑀸𑀓𑀸 𑀥𑀫𑁆𑀫𑀓𑀼𑀢𑁆𑀢𑀭𑀸;

𑀓𑀼𑀜𑁆𑀘𑀺𑀓𑀸 𑀧𑀜𑁆𑀘𑀯𑀡𑁆𑀡𑁂𑀳𑀺, 𑀲𑀺𑀩𑁆𑀩𑀺𑀢𑁂 𑀓𑀼𑀜𑁆𑀘𑀺𑀓𑀸𑀖𑀭𑁂.

𑁧𑁮. ‘‘𑀆𑀬𑁄𑀕𑁂 𑀥𑀽𑀫𑀦𑁂𑀢𑁆𑀢𑁂 𑀘, 𑀅𑀣𑁄𑀧𑀺 𑀤𑀻𑀧𑀥𑀸𑀭𑀓𑁂;

𑀢𑀼𑀫𑁆𑀩𑀓𑁂 𑀘 𑀓𑀭𑀡𑁆𑀟𑁂 𑀘, 𑀓𑀸𑀭𑀬𑀺𑀁 𑀢𑀤𑀦𑀼𑀘𑁆𑀙𑀯𑁂.

𑁧𑁯. ‘‘𑀲𑀡𑁆𑀟𑀸𑀲𑁂 𑀧𑀺𑀧𑁆𑀨𑀮𑁂 𑀘𑁂𑀯, 𑀅𑀣𑁄𑀧𑀺 𑀫𑀮𑀳𑀸𑀭𑀓𑁂;

𑀪𑁂𑀲𑀚𑁆𑀚𑀣𑀯𑀺𑀓𑁂 𑀘𑁂𑀯, 𑀓𑀸𑀭𑀬𑀺𑀁 𑀢𑀤𑀦𑀼𑀘𑁆𑀙𑀯𑁂.

𑁨𑁦. ‘‘𑀆𑀲𑀦𑁆𑀤𑀺𑀬𑁄 𑀧𑀻𑀞𑀓𑁂 𑀘, 𑀧𑀮𑁆𑀮𑀗𑁆𑀓𑁂 𑀘𑀢𑀼𑀭𑁄𑀫𑀬𑁂;

𑀢𑀤𑀦𑀼𑀘𑁆𑀙𑀯𑁂 𑀓𑀸𑀭𑀬𑀺𑀢𑁆𑀯𑀸, 𑀳𑁂𑀝𑁆𑀞𑀸𑀙𑀢𑁆𑀢𑁂 𑀞𑀧𑁂𑀲𑀳𑀁.

𑁨𑁧. ‘‘𑀉𑀡𑁆𑀡𑀸𑀪𑀺𑀲𑀻 𑀢𑀽𑀮𑀪𑀺𑀲𑀻, 𑀅𑀣𑁄𑀧𑀺 𑀧𑀻𑀞𑀺𑀓𑀸𑀪𑀺𑀲𑀻 [𑀧𑀻𑀞𑀓𑀸𑀪𑀺𑀲𑀻 (𑀲𑁆𑀬𑀸. 𑀓.)];

𑀩𑀺𑀫𑁆𑀩𑁄𑀳𑀦𑁂 [𑀩𑀺𑀩𑁆𑀩𑁄𑀳𑀦𑁂 (𑀲𑁆𑀬𑀸. 𑀓.)] 𑀘 𑀲𑀼𑀓𑀢𑁂, 𑀓𑀸𑀭𑀬𑀺𑀁 𑀢𑀤𑀦𑀼𑀘𑁆𑀙𑀯𑁂.

𑁨𑁨. ‘‘𑀓𑀼𑀭𑀼𑀯𑀺𑀦𑁆𑀤𑁂 𑀫𑀥𑀼𑀲𑀺𑀢𑁆𑀣𑁂, 𑀢𑁂𑀮𑀁 𑀳𑀢𑁆𑀣𑀧𑁆𑀧𑀢𑀸𑀧𑀓𑀁;

𑀲𑀺𑀧𑀸𑀝𑀺𑀨𑀮𑀓𑁂 𑀲𑀼𑀘𑀻, 𑀫𑀜𑁆𑀘𑀁 𑀅𑀢𑁆𑀣𑀭𑀡𑁂𑀦 𑀘.

𑁨𑁩. ‘‘𑀲𑁂𑀦𑀸𑀲𑀦𑁂 𑀧𑀸𑀤𑀧𑀼𑀜𑁆𑀙𑁂, 𑀲𑀬𑀦𑀸𑀲𑀦𑀤𑀡𑁆𑀟𑀓𑁂;

𑀤𑀦𑁆𑀢𑀧𑁄𑀡𑁂 𑀘 𑀆𑀝𑀮𑀻 [𑀓𑀣𑀮𑀺𑀁 (𑀲𑁆𑀬𑀸.)], 𑀲𑀻𑀲𑀸𑀮𑁂𑀧𑀦𑀕𑀦𑁆𑀥𑀓𑁂.

𑁨𑁪. ‘‘𑀅𑀭𑀡𑀻 𑀨𑀮𑀧𑀻𑀞𑁂 [𑀧𑀮𑀸𑀮𑀧𑀻𑀞𑁂 (𑀲𑀻.)] 𑀘, 𑀧𑀢𑁆𑀢𑀧𑀺𑀥𑀸𑀦𑀣𑀸𑀮𑀓𑁂;

𑀉𑀤𑀓𑀲𑁆𑀲 𑀓𑀝𑀘𑁆𑀙𑀽 𑀘, 𑀘𑀼𑀡𑁆𑀡𑀓𑀁 𑀭𑀚𑀦𑀫𑁆𑀩𑀡𑀁 [𑀭𑀚𑀦𑀫𑁆𑀫𑀡𑀁 (𑀲𑀻.)].

𑁨𑁫. ‘‘𑀲𑀫𑁆𑀫𑀚𑁆𑀚𑀦𑀁 [𑀲𑀫𑁆𑀫𑀼𑀜𑁆𑀚𑀦𑀁 (𑀲𑁆𑀬𑀸.), 𑀲𑀫𑁆𑀫𑀚𑁆𑀚𑀦𑀺𑀁, 𑀲𑀫𑁆𑀫𑀼𑀜𑁆𑀚𑀦𑀺𑀁 (?)] 𑀉𑀤𑀧𑀢𑁆𑀢𑀁, 𑀢𑀣𑀸 𑀯𑀲𑁆𑀲𑀺𑀓𑀲𑀸𑀝𑀺𑀓𑀁;

𑀦𑀺𑀲𑀻𑀤𑀦𑀁 𑀓𑀡𑁆𑀟𑀼𑀘𑁆𑀙𑀸𑀤𑀺, 𑀅𑀣 𑀅𑀦𑁆𑀢𑀭𑀯𑀸𑀲𑀓𑀁.

𑁨𑁬. ‘‘𑀉𑀢𑁆𑀢𑀭𑀸𑀲𑀗𑁆𑀕𑀲𑀗𑁆𑀖𑀸𑀝𑀻, 𑀦𑀢𑁆𑀣𑀼𑀓𑀁 𑀫𑀼𑀔𑀲𑁄𑀥𑀦𑀁;

𑀩𑀺𑀴𑀗𑁆𑀕𑀮𑁄𑀡𑀁 𑀧𑀳𑀽𑀢𑀜𑁆𑀘 [𑀮𑁄𑀡𑀪𑀽𑀢𑀜𑁆𑀘 (𑀓.)], 𑀫𑀥𑀼𑀜𑁆𑀘 𑀤𑀥𑀺𑀧𑀸𑀦𑀓𑀁.

𑁨𑁭. ‘‘𑀥𑀽𑀧𑀁 [𑀥𑀽𑀫𑀁 (𑀓.)] 𑀲𑀺𑀢𑁆𑀣𑀁 𑀧𑀺𑀮𑁄𑀢𑀺𑀜𑁆𑀘, 𑀫𑀼𑀔𑀧𑀼𑀜𑁆𑀙𑀦𑀲𑀼𑀢𑁆𑀢𑀓𑀁;

𑀤𑀸𑀢𑀩𑁆𑀩𑀁 𑀦𑀸𑀫 𑀬𑀁 𑀅𑀢𑁆𑀣𑀺, 𑀬𑀜𑁆𑀘 𑀓𑀧𑁆𑀧𑀢𑀺 𑀲𑀢𑁆𑀣𑀼𑀦𑁄.

𑁨𑁮. ‘‘𑀲𑀩𑁆𑀩𑀫𑁂𑀢𑀁 𑀲𑀫𑀸𑀦𑁂𑀢𑁆𑀯𑀸, 𑀆𑀦𑀦𑁆𑀤𑀁 𑀉𑀧𑀲𑀗𑁆𑀓𑀫𑀺𑀁;

𑀉𑀧𑀲𑀗𑁆𑀓𑀫𑁆𑀫 𑀭𑀸𑀚𑀸𑀦𑀁, 𑀚𑀦𑁂𑀢𑀸𑀭𑀁 𑀫𑀳𑁂𑀲𑀺𑀦𑁄 [𑀫𑀳𑁂𑀲𑀺𑀦𑀁 (𑀲𑀻.), 𑀫𑀳𑀸𑀬𑀲𑀁 (𑀲𑁆𑀬𑀸.), 𑀫𑀳𑀺𑀲𑁆𑀲𑀭𑀁 (𑀓.)];

𑀲𑀺𑀭𑀲𑀸 𑀅𑀪𑀺𑀯𑀸𑀤𑁂𑀢𑁆𑀯𑀸, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺𑀁.

(𑀤𑀸𑀦𑁄𑀓𑀸𑀲𑀬𑀸𑀘𑀦𑀸)

𑁨𑁯. ‘‘‘𑀏𑀓𑀢𑁄 𑀚𑀸𑀢𑀲𑀁𑀯𑀤𑁆𑀥𑀸, 𑀉𑀪𑀺𑀦𑁆𑀦𑀁 𑀏𑀓𑀢𑁄 𑀫𑀦𑀁 [𑀬𑀲𑁄 (𑀲𑁆𑀬𑀸.), 𑀫𑀦𑁄 (?)];

𑀲𑀸𑀥𑀸𑀭𑀡𑀸 𑀲𑀼𑀔𑀤𑀼𑀓𑁆𑀔𑁂, 𑀉𑀪𑁄 𑀘 𑀅𑀦𑀼𑀯𑀢𑁆𑀢𑀓𑀸.

𑁩𑁦. ‘‘‘𑀅𑀢𑁆𑀣𑀺 𑀘𑁂𑀢𑀲𑀺𑀓𑀁 𑀤𑀼𑀓𑁆𑀔𑀁, 𑀢𑀯𑀸𑀥𑁂𑀬𑁆𑀬𑀁 𑀅𑀭𑀺𑀦𑁆𑀤𑀫;

𑀬𑀤𑀺 𑀲𑀓𑁆𑀓𑁄𑀲𑀺 𑀢𑀁 𑀤𑀼𑀓𑁆𑀔𑀁, 𑀯𑀺𑀦𑁄𑀤𑁂𑀬𑁆𑀬𑀸𑀲𑀺 𑀔𑀢𑁆𑀢𑀺𑀬.

𑁩𑁧. ‘‘‘𑀢𑀯 𑀤𑀼𑀓𑁆𑀔𑀁 𑀫𑀫 𑀤𑀼𑀓𑁆𑀔𑀁, 𑀉𑀪𑀺𑀦𑁆𑀦𑀁 𑀏𑀓𑀢𑁄 𑀫𑀦𑁄 [𑀫𑀦𑀁 (𑀲𑀻. 𑀲𑁆𑀬𑀸.)];

𑀦𑀺𑀝𑁆𑀞𑀺𑀢𑀦𑁆𑀢𑀺 𑀯𑀺𑀚𑀸𑀦𑀸𑀳𑀺, 𑀫𑀫𑀸𑀥𑁂𑀬𑁆𑀬𑀁 𑀲𑀘𑁂 𑀢𑀼𑀯𑀁.

𑁩𑁨. ‘‘‘𑀚𑀸𑀦𑀸𑀳𑀺 𑀔𑁄 𑀫𑀳𑀸𑀭𑀸𑀚, 𑀤𑀼𑀓𑁆𑀔𑀁 𑀫𑁂 𑀤𑀼𑀩𑁆𑀩𑀺𑀦𑁄𑀤𑀬𑀁;

𑀧𑀳𑀼 𑀲𑀫𑀸𑀦𑁄 𑀕𑀚𑁆𑀚𑀲𑀼, 𑀏𑀓𑀁 𑀢𑁂 𑀤𑀼𑀘𑁆𑀘𑀚𑀁 𑀯𑀭𑀁.

𑁩𑁩. ‘‘‘𑀬𑀸𑀯𑀢𑀸 𑀯𑀺𑀚𑀺𑀢𑁂 𑀅𑀢𑁆𑀣𑀺, 𑀬𑀸𑀯𑀢𑀸 𑀫𑀫 𑀚𑀻𑀯𑀺𑀢𑀁;

𑀏𑀢𑁂𑀳𑀺 𑀬𑀤𑀺 𑀢𑁂 𑀅𑀢𑁆𑀣𑁄, 𑀤𑀲𑁆𑀲𑀸𑀫𑀺 𑀅𑀯𑀺𑀓𑀫𑁆𑀧𑀺𑀢𑁄.

𑁩𑁪. ‘‘‘𑀕𑀚𑁆𑀚𑀺𑀢𑀁 𑀔𑁄 𑀢𑀬𑀸 𑀤𑁂𑀯, 𑀫𑀺𑀘𑁆𑀙𑀸 𑀢𑀁 𑀩𑀳𑀼 𑀕𑀚𑁆𑀚𑀺𑀢𑀁;

𑀚𑀸𑀦𑀺𑀲𑁆𑀲𑀸𑀫𑀺 𑀢𑀼𑀯𑀁 𑀅𑀚𑁆𑀚, 𑀲𑀩𑁆𑀩𑀥𑀫𑁆𑀫𑁂 [𑀲𑀘𑁆𑀘𑀥𑀫𑁆𑀫𑁂 (?)] 𑀧𑀢𑀺𑀝𑁆𑀞𑀺𑀢𑀁.

𑁩𑁫. ‘‘‘𑀅𑀢𑀺𑀩𑀸𑀴𑁆𑀳𑀁 𑀦𑀺𑀧𑀻𑀴𑁂𑀲𑀺, 𑀤𑀤𑀫𑀸𑀦𑀲𑁆𑀲 𑀫𑁂 𑀲𑀢𑁄;

𑀓𑀺𑀁 𑀢𑁂 𑀫𑁂 𑀧𑀻𑀴𑀺𑀢𑁂𑀦𑀢𑁆𑀣𑁄, 𑀧𑀢𑁆𑀣𑀺𑀢𑀁 𑀢𑁂 𑀓𑀣𑁂𑀳𑀺 𑀫𑁂.

𑁩𑁬. ‘‘‘𑀇𑀘𑁆𑀙𑀸𑀫𑀳𑀁 𑀫𑀳𑀸𑀭𑀸𑀚, 𑀩𑀼𑀤𑁆𑀥𑀲𑁂𑀝𑁆𑀞𑀁 𑀅𑀦𑀼𑀢𑁆𑀢𑀭𑀁;

𑀪𑁄𑀚𑀬𑀺𑀲𑁆𑀲𑀸𑀫𑀺 𑀲𑀫𑁆𑀩𑀼𑀤𑁆𑀥𑀁, 𑀯𑀚𑁆𑀚𑀁 [𑀯𑀜𑁆𑀘𑀼𑀁 (?)] 𑀫𑁂 𑀫𑀸𑀳𑀼 𑀚𑀻𑀯𑀺𑀢𑀁.

𑁩𑁭. ‘‘‘𑀅𑀜𑁆𑀜𑀁 𑀢𑁂𑀳𑀁 𑀯𑀭𑀁 𑀤𑀫𑁆𑀫𑀺, 𑀫𑀸 𑀬𑀸𑀘𑀺𑀢𑁆𑀣𑁄 𑀢𑀣𑀸𑀕𑀢𑀁 [𑀅𑀬𑀸𑀘𑀺𑀢𑁄 𑀢𑀣𑀸𑀕𑀢𑁄 (𑀲𑁆𑀬𑀸. 𑀓.)];

𑀅𑀤𑁂𑀬𑁆𑀬𑁄 𑀓𑀲𑁆𑀲𑀘𑀺 𑀩𑀼𑀤𑁆𑀥𑁄, 𑀫𑀡𑀺 𑀚𑁄𑀢𑀺𑀭𑀲𑁄 𑀬𑀣𑀸.

𑁩𑁮. ‘‘‘𑀦𑀦𑀼 𑀢𑁂 𑀕𑀚𑁆𑀚𑀺𑀢𑀁 𑀤𑁂𑀯, 𑀬𑀸𑀯 𑀚𑀻𑀯𑀺𑀢𑀫𑀢𑁆𑀢𑀦𑁄 [𑀯𑀺𑀚𑀺𑀢𑀫𑀢𑁆𑀣𑀺𑀢𑀁 (𑀓.), 𑀚𑀻𑀯𑀺𑀢𑀫𑀢𑁆𑀣𑀺𑀓𑀁 (𑀲𑁆𑀬𑀸.)];

𑀚𑀻𑀯𑀺𑀢𑀁 [𑀯𑀺𑀚𑀺𑀢𑀁 (𑀓.)] 𑀤𑀤𑀫𑀸𑀦𑁂𑀦, 𑀬𑀼𑀢𑁆𑀢𑀁 𑀤𑀸𑀢𑀼𑀁 𑀢𑀣𑀸𑀕𑀢𑀁.

𑁩𑁯. ‘‘‘𑀞𑀧𑀦𑀻𑀬𑁄 𑀫𑀳𑀸𑀯𑀻𑀭𑁄, 𑀅𑀤𑁂𑀬𑁆𑀬𑁄 𑀓𑀲𑁆𑀲𑀘𑀺 𑀚𑀺𑀦𑁄;

𑀦 𑀫𑁂 𑀧𑀝𑀺𑀲𑁆𑀲𑀼𑀢𑁄 𑀩𑀼𑀤𑁆𑀥𑁄, 𑀯𑀭𑀲𑁆𑀲𑀼 𑀅𑀫𑀺𑀢𑀁 𑀥𑀦𑀁.

𑁪𑁦. ‘‘‘𑀯𑀺𑀦𑀺𑀘𑁆𑀙𑀬𑀁 𑀧𑀸𑀧𑀼𑀡𑀸𑀫, 𑀧𑀼𑀘𑁆𑀙𑀺𑀲𑁆𑀲𑀸𑀫 𑀯𑀺𑀦𑀺𑀘𑁆𑀙𑀬𑁂;

𑀬𑀣𑀸𑀲𑀡𑁆𑀞𑀁 [𑀬𑀣𑀸𑀲𑀦𑁆𑀢𑀁 (𑀲𑀻.)] 𑀓𑀣𑁂𑀲𑁆𑀲𑀦𑁆𑀢𑀺, 𑀧𑀝𑀺𑀧𑀼𑀘𑁆𑀙𑀸𑀫 𑀢𑀁 𑀢𑀣𑀸.

𑁪𑁧. ‘‘‘𑀭𑀜𑁆𑀜𑁄 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸𑀦, 𑀅𑀕𑀫𑀸𑀲𑀺𑀁 𑀯𑀺𑀦𑀺𑀘𑁆𑀙𑀬𑀁;

𑀧𑀼𑀭𑀢𑁄 𑀅𑀓𑁆𑀔𑀤𑀲𑁆𑀲𑀸𑀦𑀁, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺𑀁.

𑁪𑁨. ‘‘‘𑀲𑀼𑀡𑀦𑁆𑀢𑀼 𑀫𑁂 𑀅𑀓𑁆𑀔𑀤𑀲𑁆𑀲𑀸, 𑀭𑀸𑀚𑀸 𑀯𑀭𑀫𑀤𑀸𑀲𑀺 𑀫𑁂;

𑀦 𑀓𑀺𑀜𑁆𑀘𑀺 𑀞𑀧𑀬𑀺𑀢𑁆𑀯𑀸𑀦, 𑀚𑀻𑀯𑀺𑀢𑀫𑁆𑀧𑀺 [𑀯𑀺𑀚𑀺𑀢𑀁𑀧𑀺 (𑀓.)] 𑀧𑀯𑀸𑀭𑀬𑀺.

𑁪𑁩. ‘‘‘𑀢𑀲𑁆𑀲 𑀫𑁂 𑀯𑀭𑀤𑀺𑀦𑁆𑀦𑀲𑁆𑀲, 𑀩𑀼𑀤𑁆𑀥𑀲𑁂𑀝𑁆𑀞𑀁 𑀯𑀭𑀺𑀁 𑀅𑀳𑀁;

𑀲𑀼𑀤𑀺𑀦𑁆𑀦𑁄 𑀳𑁄𑀢𑀺 𑀫𑁂 𑀩𑀼𑀤𑁆𑀥𑁄, 𑀙𑀺𑀦𑁆𑀤𑀣 𑀲𑀁𑀲𑀬𑀁 𑀫𑀫.

𑁪𑁪. ‘‘‘𑀲𑁄𑀲𑁆𑀲𑀸𑀫 𑀢𑀯 𑀯𑀘𑀦𑀁, 𑀪𑀽𑀫𑀺𑀧𑀸𑀮𑀲𑁆𑀲 𑀭𑀸𑀚𑀺𑀦𑁄;

𑀉𑀪𑀺𑀦𑁆𑀦𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀙𑀺𑀦𑁆𑀤𑀺𑀲𑁆𑀲𑀸𑀫𑁂𑀢𑁆𑀣 𑀲𑀁𑀲𑀬𑀁.

𑁪𑁫. ‘‘‘𑀲𑀩𑁆𑀩𑀁 𑀤𑁂𑀯 𑀢𑀬𑀸 𑀤𑀺𑀦𑁆𑀦𑀁, 𑀇𑀫𑀲𑁆𑀲 𑀲𑀩𑁆𑀩𑀕𑀸𑀳𑀺𑀓𑀁 [𑀲𑀩𑁆𑀩𑀕𑀸𑀳𑀺𑀢𑀁 (𑀲𑁆𑀬𑀸. 𑀓.)];

𑀦 𑀓𑀺𑀜𑁆𑀘𑀺 𑀞𑀧𑀬𑀺𑀢𑁆𑀯𑀸𑀦, 𑀚𑀻𑀯𑀺𑀢𑀫𑁆𑀧𑀺 𑀧𑀯𑀸𑀭𑀬𑀺.

𑁪𑁬. ‘‘‘𑀓𑀺𑀘𑁆𑀙𑀧𑁆𑀧𑀢𑁆𑀢𑁄𑀯 𑀳𑀼𑀢𑁆𑀯𑀸𑀦, 𑀬𑀸𑀘𑀻 𑀯𑀭𑀫𑀦𑀼𑀢𑁆𑀢𑀭𑀁 [𑀬𑀸𑀯𑀚𑀻𑀯𑀫𑀦𑀼𑀢𑁆𑀢𑀭𑀁 (𑀲𑁆𑀬𑀸. 𑀓.)];

𑀇𑀫𑀁 𑀲𑀼𑀤𑀼𑀓𑁆𑀔𑀺𑀢𑀁 𑀜𑀢𑁆𑀯𑀸, 𑀅𑀤𑀸𑀲𑀺𑀁 𑀲𑀩𑁆𑀩𑀕𑀸𑀳𑀺𑀓𑀁.

𑁪𑁭. ‘‘‘𑀧𑀭𑀸𑀚𑀬𑁄 𑀢𑀼𑀯𑀁 [𑀢𑀯𑀁 (𑀲𑀻.)] 𑀤𑁂𑀯, 𑀅𑀲𑁆𑀲 𑀤𑁂𑀬𑁆𑀬𑁄 𑀢𑀣𑀸𑀕𑀢𑁄;

𑀉𑀪𑀺𑀦𑁆𑀦𑀁 𑀲𑀁𑀲𑀬𑁄 𑀙𑀺𑀦𑁆𑀦𑁄, 𑀬𑀣𑀸𑀲𑀡𑁆𑀞𑀫𑁆𑀳𑀺 [𑀬𑀣𑀸𑀲𑀦𑁆𑀢𑀫𑁆𑀳𑀺 (𑀲𑀻.)] 𑀢𑀺𑀝𑁆𑀞𑀣.

𑁪𑁮. ‘‘‘𑀭𑀸𑀚𑀸 𑀢𑀢𑁆𑀣𑁂𑀯 𑀞𑀢𑁆𑀯𑀸𑀦, 𑀅𑀓𑁆𑀔𑀤𑀲𑁆𑀲𑁂𑀢𑀤𑀩𑁆𑀭𑀯𑀺;

𑀲𑀫𑁆𑀫𑀸 𑀫𑀬𑁆𑀳𑀫𑁆𑀧𑀺 𑀤𑁂𑀬𑁆𑀬𑀸𑀣, 𑀧𑀼𑀦 𑀩𑀼𑀤𑁆𑀥𑀁 𑀮𑀪𑀸𑀫𑀳𑀁.

𑁪𑁯. ‘‘‘𑀧𑀽𑀭𑁂𑀢𑁆𑀯𑀸 𑀢𑀯 𑀲𑀗𑁆𑀓𑀧𑁆𑀧𑀁, 𑀪𑁄𑀚𑀬𑀺𑀢𑁆𑀯𑀸 𑀢𑀣𑀸𑀕𑀢𑀁;

𑀧𑀼𑀦 𑀤𑁂𑀬𑁆𑀬𑀸𑀲𑀺 [𑀤𑁂𑀬𑁆𑀬𑀸𑀣 (𑀓.)] 𑀲𑀫𑁆𑀩𑀼𑀤𑁆𑀥𑀁, 𑀆𑀦𑀦𑁆𑀤𑀲𑁆𑀲 𑀬𑀲𑀲𑁆𑀲𑀺𑀦𑁄’.

(𑀦𑀺𑀫𑀦𑁆𑀢𑀦𑀓𑀣𑀸)

𑁫𑁦. ‘‘𑀅𑀓𑁆𑀔𑀤𑀲𑁆𑀲𑁂𑀪𑀺𑀯𑀸𑀤𑁂𑀢𑁆𑀯𑀸, 𑀆𑀦𑀦𑁆𑀤𑀜𑁆𑀘𑀸𑀧𑀺 𑀔𑀢𑁆𑀢𑀺𑀬𑀁;

𑀢𑀼𑀝𑁆𑀞𑁄 𑀧𑀫𑀼𑀤𑀺𑀢𑁄 𑀳𑀼𑀢𑁆𑀯𑀸, 𑀲𑀫𑁆𑀩𑀼𑀤𑁆𑀥𑀫𑀼𑀧𑀲𑀗𑁆𑀓𑀫𑀺𑀁.

𑁫𑁧. ‘‘𑀉𑀧𑀲𑀗𑁆𑀓𑀫𑁆𑀫 𑀲𑀫𑁆𑀩𑀼𑀤𑁆𑀥𑀁, 𑀑𑀖𑀢𑀺𑀡𑁆𑀡𑀫𑀦𑀸𑀲𑀯𑀁;

𑀲𑀺𑀭𑀲𑀸 𑀅𑀪𑀺𑀯𑀸𑀤𑁂𑀢𑁆𑀯𑀸, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺𑀁.

𑁫𑁨. ‘𑀯𑀲𑀻𑀲𑀢𑀲𑀳𑀲𑁆𑀲𑁂𑀳𑀺, 𑀅𑀥𑀺𑀯𑀸𑀲𑁂𑀳𑀺 𑀘𑀓𑁆𑀔𑀼𑀫;

𑀳𑀸𑀲𑀬𑀦𑁆𑀢𑁄 𑀫𑀫 𑀘𑀺𑀢𑁆𑀢𑀁, 𑀦𑀺𑀯𑁂𑀲𑀦𑀫𑀼𑀧𑁂𑀳𑀺 𑀫𑁂’.

𑁫𑁩. ‘‘𑀧𑀤𑀼𑀫𑀼𑀢𑁆𑀢𑀭𑁄 𑀮𑁄𑀓𑀯𑀺𑀤𑀽, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄;

𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀅𑀥𑀺𑀯𑀸𑀲𑁂𑀲𑀺 𑀘𑀓𑁆𑀔𑀼𑀫𑀸.

𑁫𑁪. ‘‘𑀅𑀥𑀺𑀯𑀸𑀲𑀦𑀫𑀜𑁆𑀜𑀸𑀬, 𑀅𑀪𑀺𑀯𑀸𑀤𑀺𑀬 𑀲𑀢𑁆𑀣𑀼𑀦𑁄;

𑀳𑀝𑁆𑀞𑁄 𑀉𑀤𑀕𑁆𑀕𑀘𑀺𑀢𑁆𑀢𑁄𑀳𑀁, 𑀦𑀺𑀯𑁂𑀲𑀦𑀫𑀼𑀧𑀸𑀕𑀫𑀺𑀁.

(𑀤𑀸𑀦𑀧𑀝𑀺𑀬𑀸𑀤𑀦𑀁)

𑁫𑁫. ‘‘𑀫𑀺𑀢𑁆𑀢𑀸𑀫𑀘𑁆𑀘𑁂 𑀲𑀫𑀸𑀦𑁂𑀢𑁆𑀯𑀸, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺𑀁;

‘𑀲𑀼𑀤𑀼𑀮𑁆𑀮𑀪𑁄 𑀫𑀬𑀸 𑀮𑀤𑁆𑀥𑁄, 𑀫𑀡𑀺 𑀚𑁄𑀢𑀺𑀭𑀲𑁄 𑀬𑀣𑀸.

𑁫𑁬. ‘‘‘𑀓𑁂𑀦 𑀢𑀁 𑀧𑀽𑀚𑀬𑀺𑀲𑁆𑀲𑀸𑀫, 𑀅𑀧𑁆𑀧𑀫𑁂𑀬𑁆𑀬𑁄 𑀅𑀦𑀽𑀧𑀫𑁄;

𑀅𑀢𑀼𑀮𑁄 𑀅𑀲𑀫𑁄 𑀥𑀻𑀭𑁄, 𑀚𑀺𑀦𑁄 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄.

𑁫𑁭. ‘‘‘𑀢𑀣𑀸𑀲𑀫𑀲𑀫𑁄 𑀘𑁂𑀯, 𑀅𑀤𑀼𑀢𑀺𑀬𑁄 𑀦𑀭𑀸𑀲𑀪𑁄;

𑀤𑀼𑀓𑁆𑀓𑀭𑀁 𑀅𑀥𑀺𑀓𑀸𑀭𑀜𑁆𑀳𑀺, 𑀩𑀼𑀤𑁆𑀥𑀸𑀦𑀼𑀘𑁆𑀙𑀯𑀺𑀓𑀁 𑀫𑀬𑀸.

𑁫𑁮. ‘‘‘𑀦𑀸𑀦𑀸𑀧𑀼𑀧𑁆𑀨𑁂 𑀲𑀫𑀸𑀦𑁂𑀢𑁆𑀯𑀸, 𑀓𑀭𑁄𑀫 𑀧𑀼𑀧𑁆𑀨𑀫𑀡𑁆𑀟𑀧𑀁;

𑀩𑀼𑀤𑁆𑀥𑀸𑀦𑀼𑀘𑁆𑀙𑀯𑀺𑀓𑀁 𑀏𑀢𑀁, 𑀲𑀩𑁆𑀩𑀧𑀽𑀚𑀸 𑀪𑀯𑀺𑀲𑁆𑀲𑀢𑀺’.

𑁫𑁯. ‘‘𑀉𑀧𑁆𑀧𑀮𑀁 𑀧𑀤𑀼𑀫𑀁 𑀯𑀸𑀧𑀺, 𑀯𑀲𑁆𑀲𑀺𑀓𑀁 𑀅𑀥𑀺𑀫𑀼𑀢𑁆𑀢𑀓𑀁 [𑀅𑀢𑀺𑀫𑀼𑀢𑁆𑀢𑀓𑀁 (?)];

𑀘𑀫𑁆𑀧𑀓𑀁 [𑀘𑀦𑁆𑀤𑀦𑀁 (𑀓.)] 𑀦𑀸𑀕𑀧𑀼𑀧𑁆𑀨𑀜𑁆𑀘, 𑀫𑀡𑁆𑀟𑀧𑀁 𑀓𑀸𑀭𑀬𑀺𑀁 𑀅𑀳𑀁.

𑁬𑁦. ‘‘𑀲𑀢𑀸𑀲𑀦𑀲𑀳𑀲𑁆𑀲𑀸𑀦𑀺, 𑀙𑀢𑁆𑀢𑀘𑁆𑀙𑀸𑀬𑀸𑀬 𑀧𑀜𑁆𑀜𑀧𑀺𑀁;

𑀧𑀘𑁆𑀙𑀺𑀫𑀁 𑀆𑀲𑀦𑀁 𑀫𑀬𑁆𑀳𑀁, 𑀅𑀥𑀺𑀓𑀁 𑀲𑀢𑀫𑀕𑁆𑀖𑀢𑀺.

𑁬𑁧. ‘‘𑀲𑀢𑀸𑀲𑀦𑀲𑀳𑀲𑁆𑀲𑀸𑀦𑀺, 𑀙𑀢𑁆𑀢𑀘𑁆𑀙𑀸𑀬𑀸𑀬 𑀧𑀜𑁆𑀜𑀧𑀺𑀁;

𑀧𑀝𑀺𑀬𑀸𑀤𑁂𑀢𑁆𑀯𑀸 𑀅𑀦𑁆𑀦𑀧𑀸𑀦𑀁, 𑀓𑀸𑀮𑀁 𑀆𑀭𑁄𑀘𑀬𑀺𑀁 𑀅𑀳𑀁.

𑁬𑁨. ‘‘𑀆𑀭𑁄𑀘𑀺𑀢𑀫𑁆𑀳𑀺 𑀓𑀸𑀮𑀫𑁆𑀳𑀺, 𑀧𑀤𑀼𑀫𑀼𑀢𑁆𑀢𑀭𑁄 𑀫𑀳𑀸𑀫𑀼𑀦𑀺;

𑀯𑀲𑀻𑀲𑀢𑀲𑀳𑀲𑁆𑀲𑁂𑀳𑀺, 𑀦𑀺𑀯𑁂𑀲𑀦𑀫𑀼𑀧𑁂𑀲𑀺 𑀫𑁂.

𑁬𑁩. ‘‘𑀥𑀸𑀭𑁂𑀦𑁆𑀢𑀁 𑀉𑀧𑀭𑀺𑀘𑁆𑀙𑀢𑁆𑀢𑀁 [𑀥𑀸𑀭𑁂𑀦𑁆𑀢𑀫𑀼𑀧𑀭𑀺𑀘𑁆𑀙𑀢𑁆𑀢𑁂 (𑀲𑀻.)], 𑀲𑀼𑀨𑀼𑀮𑁆𑀮𑀧𑀼𑀧𑁆𑀨𑀫𑀡𑁆𑀟𑀧𑁂;

𑀯𑀲𑀻𑀲𑀢𑀲𑀳𑀲𑁆𑀲𑁂𑀳𑀺, 𑀦𑀺𑀲𑀻𑀤𑀺 𑀧𑀼𑀭𑀺𑀲𑀼𑀢𑁆𑀢𑀫𑁄.

𑁬𑁪. ‘‘‘𑀙𑀢𑁆𑀢𑀲𑀢𑀲𑀳𑀲𑁆𑀲𑀸𑀦𑀺, 𑀲𑀢𑀲𑀳𑀲𑁆𑀲𑀫𑀸𑀲𑀦𑀁;

𑀓𑀧𑁆𑀧𑀺𑀬𑀁 𑀅𑀦𑀯𑀚𑁆𑀚𑀜𑁆𑀘, 𑀧𑀝𑀺𑀕𑀡𑁆𑀳𑀸𑀳𑀺 𑀘𑀓𑁆𑀔𑀼𑀫’.

𑁬𑁫. ‘‘𑀧𑀤𑀼𑀫𑀼𑀢𑁆𑀢𑀭𑁄 𑀮𑁄𑀓𑀯𑀺𑀤𑀽, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄;

𑀫𑀫𑀁 𑀢𑀸𑀭𑁂𑀢𑀼𑀓𑀸𑀫𑁄 𑀲𑁄, 𑀲𑀫𑁆𑀧𑀝𑀺𑀘𑁆𑀙𑀺 𑀫𑀳𑀸𑀫𑀼𑀦𑀺.

(𑀤𑀸𑀦𑀓𑀣𑀸)

𑁬𑁬. ‘‘𑀪𑀺𑀓𑁆𑀔𑀼𑀦𑁄 𑀏𑀓𑀫𑁂𑀓𑀲𑁆𑀲, 𑀧𑀘𑁆𑀘𑁂𑀓𑀁 𑀧𑀢𑁆𑀢𑀫𑀤𑀸𑀲𑀳𑀁;

𑀚𑀳𑀺𑀁𑀲𑀼 𑀲𑀼𑀫𑁆𑀪𑀓𑀁 [𑀧𑀼𑀩𑁆𑀩𑀓𑀁 (𑀲𑀻.), 𑀲𑀫𑁆𑀪𑀢𑀁 (𑀲𑁆𑀬𑀸.), 𑀫𑀢𑁆𑀢𑀺𑀓𑀁 (?)] 𑀧𑀢𑁆𑀢𑀁, 𑀮𑁄𑀳𑀧𑀢𑁆𑀢𑀁 𑀅𑀥𑀸𑀭𑀬𑀼𑀁.

𑁬𑁭. ‘‘𑀲𑀢𑁆𑀢𑀭𑀢𑁆𑀢𑀺𑀦𑁆𑀤𑀺𑀯𑀁 𑀩𑀼𑀤𑁆𑀥𑁄, 𑀦𑀺𑀲𑀻𑀤𑀺 𑀧𑀼𑀧𑁆𑀨𑀫𑀡𑁆𑀟𑀧𑁂;

𑀩𑁄𑀥𑀬𑀦𑁆𑀢𑁄 𑀩𑀳𑀽 𑀲𑀢𑁆𑀢𑁂, 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀬𑀺.

𑁬𑁮. ‘‘𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀦𑁆𑀢𑁄, 𑀳𑁂𑀝𑁆𑀞𑀢𑁄 𑀧𑀼𑀧𑁆𑀨𑀫𑀡𑁆𑀟𑀧𑁂;

𑀘𑀼𑀮𑁆𑀮𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀁, 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑀼.

𑁬𑁯. ‘‘𑀲𑀢𑁆𑀢𑀫𑁂 𑀤𑀺𑀯𑀲𑁂 𑀧𑀢𑁆𑀢𑁂, 𑀧𑀤𑀼𑀫𑀼𑀢𑁆𑀢𑀭𑁄 𑀫𑀳𑀸𑀫𑀼𑀦𑀺;

𑀙𑀢𑁆𑀢𑀘𑁆𑀙𑀸𑀬𑀸𑀬𑀫𑀸𑀲𑀻𑀦𑁄, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

(𑀩𑁆𑀬𑀸𑀓𑀭𑀡𑀁)

𑁭𑁦. ‘‘‘𑀅𑀦𑀽𑀦𑀓𑀁 𑀤𑀸𑀦𑀯𑀭𑀁, 𑀬𑁄 𑀫𑁂 𑀧𑀸𑀤𑀸𑀲𑀺 𑀫𑀸𑀡𑀯𑁄;

𑀢𑀫𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀲𑀼𑀡𑀸𑀣 𑀫𑀫 𑀪𑀸𑀲𑀢𑁄.