𑁧𑁦. 𑀅𑀚𑀺𑀢𑀢𑁆𑀣𑁂𑀭𑀅𑀧𑀤𑀸𑀦𑀁

𑁪𑁮𑁪. ‘‘𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄, 𑀲𑀩𑁆𑀩𑀥𑀫𑁆𑀫𑀸𑀦 𑀧𑀸𑀭𑀕𑀽;

𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀳𑀺𑀫𑀯𑀦𑁆𑀢𑀁, 𑀦𑀺𑀲𑀻𑀤𑀺 𑀮𑁄𑀓𑀦𑀸𑀬𑀓𑁄.

𑁪𑁮𑁫. ‘‘𑀦𑀸𑀳𑀁 𑀅𑀤𑁆𑀤𑀓𑁆𑀔𑀺𑀁 [𑀧𑀲𑁆𑀲𑀸𑀫𑀺 (?)] 𑀲𑀫𑁆𑀩𑀼𑀤𑁆𑀥𑀁, 𑀦𑀧𑀺 𑀲𑀤𑁆𑀤𑀁 𑀲𑀼𑀡𑁄𑀫𑀳𑀁;

𑀫𑀫 𑀪𑀓𑁆𑀔𑀁 𑀕𑀯𑁂𑀲𑀦𑁆𑀢𑁄, 𑀆𑀳𑀺𑀡𑁆𑀟𑀸𑀫𑀺 𑀯𑀦𑁂 𑀅𑀳𑀁 [𑀢𑀤𑀸 (𑀲𑀻.)].

𑁪𑁮𑁬. ‘‘𑀢𑀢𑁆𑀣𑀤𑁆𑀤𑀲𑁆𑀲𑀸𑀲𑀺𑀁 𑀲𑀫𑁆𑀩𑀼𑀤𑁆𑀥𑀁, 𑀤𑁆𑀯𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑀁;

𑀤𑀺𑀲𑁆𑀯𑀸𑀦 𑀯𑀺𑀢𑁆𑀢𑀺𑀫𑀸𑀧𑀚𑁆𑀚𑀺𑀁 [𑀘𑀺𑀢𑁆𑀢𑀫𑀸𑀧𑀚𑁆𑀚𑀺 (𑀲𑀻.), 𑀘𑀺𑀢𑁆𑀢𑀫𑀸𑀧𑀚𑁆𑀚𑀺𑀁 (𑀲𑁆𑀬𑀸.)], 𑀲𑀢𑁆𑀢𑁄 𑀓𑁄 𑀦𑀸𑀫𑀬𑀁 𑀪𑀯𑁂.

𑁪𑁮𑁭. ‘‘𑀮𑀓𑁆𑀔𑀡𑀸𑀦𑀺 𑀯𑀺𑀮𑁄𑀓𑁂𑀢𑁆𑀯𑀸, 𑀫𑀫 𑀯𑀺𑀚𑁆𑀚𑀁 𑀅𑀦𑀼𑀲𑁆𑀲𑀭𑀺𑀁;

𑀲𑀼𑀢𑀜𑁆𑀳𑀺 𑀫𑁂𑀢𑀁 𑀯𑀼𑀟𑁆𑀠𑀸𑀦𑀁, 𑀧𑀡𑁆𑀟𑀺𑀢𑀸𑀦𑀁 𑀲𑀼𑀪𑀸𑀲𑀺𑀢𑀁.

𑁪𑁮𑁮. ‘‘𑀢𑁂𑀲𑀁 𑀬𑀣𑀸 𑀢𑀁 𑀯𑀘𑀦𑀁, 𑀅𑀬𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺;

𑀬𑀁𑀦𑀽𑀦𑀸𑀳𑀁 𑀲𑀓𑁆𑀓𑀭𑁂𑀬𑁆𑀬𑀁, 𑀕𑀢𑀺𑀁 𑀫𑁂 𑀲𑁄𑀥𑀬𑀺𑀲𑁆𑀲𑀢𑀺.

𑁪𑁮𑁯. ‘‘𑀔𑀺𑀧𑁆𑀧𑀁 𑀅𑀲𑁆𑀲𑀫𑀫𑀸𑀕𑀦𑁆𑀢𑁆𑀯𑀸, 𑀫𑀥𑀼𑀢𑁂𑀮𑀁 𑀕𑀳𑀺𑀁 𑀅𑀳𑀁;

𑀓𑁄𑀮𑀫𑁆𑀩𑀓𑀁 𑀕𑀳𑁂𑀢𑁆𑀯𑀸𑀦, 𑀉𑀧𑀕𑀘𑁆𑀙𑀺𑀁 𑀯𑀺𑀦𑀸𑀬𑀓𑀁 [𑀦𑀭𑀸𑀲𑀪𑀁 (𑀲𑀻.)].

𑁪𑁯𑁦. ‘‘𑀢𑀺𑀤𑀡𑁆𑀟𑀓𑁂 𑀕𑀳𑁂𑀢𑁆𑀯𑀸𑀦, 𑀅𑀩𑁆𑀪𑁄𑀓𑀸𑀲𑁂 𑀞𑀧𑁂𑀲𑀳𑀁;

𑀧𑀤𑀻𑀧𑀁 𑀧𑀚𑁆𑀚𑀮𑀺𑀢𑁆𑀯𑀸𑀦, 𑀅𑀝𑁆𑀞𑀓𑁆𑀔𑀢𑁆𑀢𑀼𑀁 𑀅𑀯𑀦𑁆𑀤𑀳𑀁.

𑁪𑁯𑁧. ‘‘𑀲𑀢𑁆𑀢𑀭𑀢𑁆𑀢𑀺𑀦𑁆𑀤𑀺𑀯𑀁 𑀩𑀼𑀤𑁆𑀥𑁄, 𑀦𑀺𑀲𑀻𑀤𑀺 𑀧𑀼𑀭𑀺𑀲𑀼𑀢𑁆𑀢𑀫𑁄;

𑀢𑀢𑁄 𑀭𑀢𑁆𑀬𑀸 𑀯𑀺𑀯𑀲𑀸𑀦𑁂, 𑀯𑀼𑀝𑁆𑀞𑀸𑀲𑀺 𑀮𑁄𑀓𑀦𑀸𑀬𑀓𑁄.

𑁪𑁯𑁨. ‘‘𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀲𑀩𑁆𑀩𑀭𑀢𑁆𑀢𑀺𑀦𑁆𑀤𑀺𑀯𑀁 𑀅𑀳𑀁;

𑀤𑀻𑀧𑀁 𑀩𑀼𑀤𑁆𑀥𑀲𑁆𑀲 𑀧𑀸𑀤𑀸𑀲𑀺𑀁, 𑀧𑀲𑀦𑁆𑀦𑁄 𑀲𑁂𑀳𑀺 𑀧𑀸𑀡𑀺𑀪𑀺.

𑁪𑁯𑁩. ‘‘𑀲𑀩𑁆𑀩𑁂 𑀯𑀦𑀸 𑀕𑀦𑁆𑀥𑀫𑀬𑀸, 𑀧𑀩𑁆𑀩𑀢𑁂 𑀕𑀦𑁆𑀥𑀫𑀸𑀤𑀦𑁂;

𑀩𑀼𑀤𑁆𑀥𑀲𑁆𑀲 𑀆𑀦𑀼𑀪𑀸𑀯𑁂𑀦, 𑀆𑀕𑀘𑁆𑀙𑀼𑀁 𑀩𑀼𑀤𑁆𑀥𑀲𑀦𑁆𑀢𑀺𑀓𑀁 [𑀉𑀧𑀕𑀘𑁆𑀙𑀼𑀁 𑀢𑀤𑀸 𑀚𑀺𑀦𑀁 (𑀲𑀻.)].

𑁪𑁯𑁪. ‘‘𑀬𑁂 𑀓𑁂𑀘𑀺 𑀧𑀼𑀧𑁆𑀨𑀕𑀦𑁆𑀥𑀸𑀲𑁂, 𑀧𑀼𑀧𑁆𑀨𑀺𑀢𑀸 𑀥𑀭𑀡𑀻𑀭𑀼𑀳𑀸;

𑀩𑀼𑀤𑁆𑀥𑀲𑁆𑀲 𑀆𑀦𑀼𑀪𑀸𑀯𑁂𑀦, 𑀲𑀩𑁆𑀩𑁂 𑀲𑀦𑁆𑀦𑀺𑀧𑀢𑀼𑀁 𑀢𑀤𑀸.

𑁪𑁯𑁫. ‘‘𑀬𑀸𑀯𑀢𑀸 𑀳𑀺𑀫𑀯𑀦𑁆𑀢𑀫𑁆𑀳𑀺, 𑀦𑀸𑀕𑀸 𑀘 𑀕𑀭𑀼𑀴𑀸 𑀉𑀪𑁄;

𑀥𑀫𑁆𑀫𑀜𑁆𑀘 𑀲𑁄𑀢𑀼𑀓𑀸𑀫𑀸 𑀢𑁂, 𑀆𑀕𑀘𑁆𑀙𑀼𑀁 𑀩𑀼𑀤𑁆𑀥𑀲𑀦𑁆𑀢𑀺𑀓𑀁.

𑁪𑁯𑁬. ‘‘𑀤𑁂𑀯𑀮𑁄 𑀦𑀸𑀫 𑀲𑀫𑀡𑁄, 𑀩𑀼𑀤𑁆𑀥𑀲𑁆𑀲 𑀅𑀕𑁆𑀕𑀲𑀸𑀯𑀓𑁄;

𑀯𑀲𑀻𑀲𑀢𑀲𑀳𑀲𑁆𑀲𑁂𑀳𑀺, 𑀩𑀼𑀤𑁆𑀥𑀲𑀦𑁆𑀢𑀺𑀓𑀼𑀧𑀸𑀕𑀫𑀺.

𑁪𑁯𑁭. ‘‘𑀧𑀤𑀼𑀫𑀼𑀢𑁆𑀢𑀭𑁄 𑀮𑁄𑀓𑀯𑀺𑀤𑀽, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄;

𑀪𑀺𑀓𑁆𑀔𑀼𑀲𑀗𑁆𑀖𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

𑁪𑁯𑁮. ‘‘‘𑀬𑁄 𑀫𑁂 𑀤𑀻𑀧𑀁 𑀧𑀤𑀻𑀧𑁂𑀲𑀺, 𑀧𑀲𑀦𑁆𑀦𑁄 𑀲𑁂𑀳𑀺 𑀧𑀸𑀡𑀺𑀪𑀺;

𑀢𑀫𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀲𑀼𑀡𑀸𑀣 𑀫𑀫 𑀪𑀸𑀲𑀢𑁄.

𑁪𑁯𑁯. ‘‘‘𑀲𑀝𑁆𑀞𑀺 𑀓𑀧𑁆𑀧𑀲𑀳𑀲𑁆𑀲𑀸𑀦𑀺, 𑀤𑁂𑀯𑀮𑁄𑀓𑁂 𑀭𑀫𑀺𑀲𑁆𑀲𑀢𑀺;

𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀁 𑀭𑀸𑀚𑀸 𑀘, 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺.

𑀲𑁄𑀴𑀲𑀫𑀁 𑀪𑀸𑀡𑀯𑀸𑀭𑀁.

𑁫𑁦𑁦. ‘‘‘𑀙𑀢𑁆𑀢𑀺𑀲𑀓𑁆𑀔𑀢𑁆𑀢𑀼𑀁 𑀤𑁂𑀯𑀺𑀦𑁆𑀤𑁄, 𑀤𑁂𑀯𑀭𑀚𑁆𑀚𑀁 𑀓𑀭𑀺𑀲𑁆𑀲𑀢𑀺;

𑀧𑀣𑀯𑀺𑀬𑀁 𑀲𑀢𑁆𑀢𑀲𑀢𑀁, 𑀯𑀺𑀧𑀼𑀮𑀁 𑀭𑀚𑁆𑀚𑀁 𑀓𑀭𑀺𑀲𑁆𑀲𑀢𑀺.

𑁫𑁦𑁧. ‘‘‘𑀧𑀤𑁂𑀲𑀭𑀚𑁆𑀚𑀁 𑀯𑀺𑀧𑀼𑀮𑀁, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀁;

𑀇𑀫𑀺𑀦𑀸 𑀤𑀻𑀧𑀤𑀸𑀦𑁂𑀦, 𑀤𑀺𑀩𑁆𑀩𑀘𑀓𑁆𑀔𑀼 𑀪𑀯𑀺𑀲𑁆𑀲𑀢𑀺.

𑁫𑁦𑁨. ‘‘‘𑀲𑀫𑀦𑁆𑀢𑀢𑁄 𑀅𑀝𑁆𑀞𑀓𑁄𑀲𑀁 [𑀅𑀟𑁆𑀠𑀓𑁄𑀲𑀁 (𑀲𑀻. 𑀲𑁆𑀬𑀸.)], 𑀧𑀲𑁆𑀲𑀺𑀲𑁆𑀲𑀢𑀺 𑀅𑀬𑀁 𑀲𑀤𑀸;

𑀤𑁂𑀯𑀮𑁄𑀓𑀸 𑀘𑀯𑀦𑁆𑀢𑀲𑁆𑀲, 𑀦𑀺𑀩𑁆𑀩𑀢𑁆𑀢𑀦𑁆𑀢𑀲𑁆𑀲 𑀚𑀦𑁆𑀢𑀼𑀦𑁄.

𑁫𑁦𑁩. ‘‘‘𑀤𑀺𑀯𑀸 𑀯𑀸 𑀬𑀤𑀺 𑀯𑀸 𑀭𑀢𑁆𑀢𑀺𑀁, 𑀧𑀤𑀻𑀧𑀁 𑀥𑀸𑀭𑀬𑀺𑀲𑁆𑀲𑀢𑀺;

𑀚𑀸𑀬𑀫𑀸𑀦𑀲𑁆𑀲 𑀲𑀢𑁆𑀢𑀲𑁆𑀲, 𑀧𑀼𑀜𑁆𑀜𑀓𑀫𑁆𑀫𑀲𑀫𑀗𑁆𑀕𑀺𑀦𑁄.

𑁫𑁦𑁪. ‘‘‘𑀬𑀸𑀯𑀢𑀸 𑀦𑀕𑀭𑀁 𑀆𑀲𑀺, 𑀢𑀸𑀯𑀢𑀸 𑀚𑁄𑀢𑀬𑀺𑀲𑁆𑀲𑀢𑀺;

𑀉𑀧𑀧𑀚𑁆𑀚𑀢𑀺 𑀬𑀁 𑀬𑁄𑀦𑀺𑀁, 𑀤𑁂𑀯𑀢𑁆𑀢𑀁 𑀅𑀣 𑀫𑀸𑀦𑀼𑀲𑀁.

𑁫𑁦𑁫. ‘‘‘𑀅𑀲𑁆𑀲𑁂𑀯 𑀤𑀻𑀧𑀤𑀸𑀦𑀲𑁆𑀲, [𑀅𑀝𑁆𑀞𑀤𑀻𑀧𑀨𑀮𑁂𑀦 𑀳𑀺; 𑀉𑀧𑀝𑁆𑀞𑀺𑀲𑁆𑀲𑀦𑁆𑀢𑀺𑀫𑀁 𑀚𑀦𑁆𑀢𑀼𑀁 (𑀲𑁆𑀬𑀸.), 𑀅𑀝𑁆𑀞 𑀤𑀻𑀧𑀸 𑀨𑀮𑁂𑀦 𑀳𑀺; 𑀦 𑀚𑀳𑀺𑀲𑁆𑀲𑀦𑁆𑀢𑀺’𑀫𑀁 𑀚𑀦𑁆𑀢𑀼𑀁 (?)] 𑀅𑀝𑁆𑀞𑀤𑀻𑀧𑀨𑀮𑁂𑀦 𑀳𑀺;

𑀦 𑀚𑀬𑀺𑀲𑁆𑀲𑀦𑁆𑀢𑀺𑀫𑀁 𑀚𑀦𑁆𑀢𑀽 [𑀅𑀝𑁆𑀞𑀤𑀻𑀧𑀨𑀮𑁂𑀦 𑀳𑀺; 𑀉𑀧𑀝𑁆𑀞𑀺𑀲𑁆𑀲𑀦𑁆𑀢𑀺𑀫𑀁 𑀚𑀦𑁆𑀢𑀼𑀁 (𑀲𑁆𑀬𑀸.), 𑀅𑀝𑁆𑀞 𑀤𑀻𑀧𑀸 𑀨𑀮𑁂𑀦 𑀳𑀺; 𑀦 𑀚𑀳𑀺𑀲𑁆𑀲𑀦𑁆𑀢𑀺’𑀫𑀁 𑀚𑀦𑁆𑀢𑀼𑀁 (?)], 𑀤𑀻𑀧𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁫𑁦𑁬. ‘‘‘𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑁆𑀳𑀺, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

𑁫𑁦𑁭. ‘‘‘𑀢𑀲𑁆𑀲 𑀥𑀫𑁆𑀫𑁂𑀲𑀼 𑀤𑀸𑀬𑀸𑀤𑁄, 𑀑𑀭𑀲𑁄 𑀥𑀫𑁆𑀫𑀦𑀺𑀫𑁆𑀫𑀺𑀢𑁄;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺𑀦𑀸𑀲𑀯𑁄.

𑁫𑁦𑁮. ‘‘‘𑀢𑁄𑀲𑀬𑀺𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑀁, 𑀕𑁄𑀢𑀫𑀁 𑀲𑀓𑁆𑀬𑀧𑀼𑀗𑁆𑀕𑀯𑀁;

𑀅𑀚𑀺𑀢𑁄 𑀦𑀸𑀫 𑀦𑀸𑀫𑁂𑀦, 𑀳𑁂𑀲𑁆𑀲𑀢𑀺 𑀲𑀢𑁆𑀣𑀼 𑀲𑀸𑀯𑀓𑁄’.

𑁫𑁦𑁯. ‘‘𑀲𑀝𑁆𑀞𑀺 𑀓𑀧𑁆𑀧𑀲𑀳𑀲𑁆𑀲𑀸𑀦𑀺, 𑀤𑁂𑀯𑀮𑁄𑀓𑁂 𑀭𑀫𑀺𑀁 𑀅𑀳𑀁;

𑀢𑀢𑁆𑀭𑀸𑀧𑀺 𑀫𑁂 𑀤𑀻𑀧𑀲𑀢𑀁, 𑀚𑁄𑀢𑀢𑁂 𑀦𑀺𑀘𑁆𑀘𑀓𑀸𑀮𑀺𑀓𑀁 [𑀲𑀩𑁆𑀩𑀓𑀸𑀮𑀺𑀓𑀁 (𑀲𑀻.)].

𑁫𑁧𑁦. ‘‘𑀤𑁂𑀯𑀮𑁄𑀓𑁂 𑀫𑀦𑀼𑀲𑁆𑀲𑁂 𑀯𑀸, 𑀦𑀺𑀤𑁆𑀥𑀸𑀯𑀦𑁆𑀢𑀺 𑀧𑀪𑀸 𑀫𑀫;

𑀩𑀼𑀤𑁆𑀥𑀲𑁂𑀝𑁆𑀞𑀁 𑀲𑀭𑀺𑀢𑁆𑀯𑀸𑀦, 𑀪𑀺𑀬𑁆𑀬𑁄 𑀳𑀸𑀲𑀁 𑀚𑀦𑁂𑀲𑀳𑀁.

𑁫𑁧𑁧. ‘‘𑀢𑀼𑀲𑀺𑀢𑀸𑀳𑀁 𑀘𑀯𑀺𑀢𑁆𑀯𑀸𑀦, 𑀑𑀓𑁆𑀓𑀫𑀺𑀁 𑀫𑀸𑀢𑀼𑀓𑀼𑀘𑁆𑀙𑀺𑀬𑀁;

𑀚𑀸𑀬𑀫𑀸𑀦𑀲𑁆𑀲 𑀲𑀦𑁆𑀢𑀲𑁆𑀲, 𑀆𑀮𑁄𑀓𑁄 𑀯𑀺𑀧𑀼𑀮𑁄 𑀅𑀳𑀼.

𑁫𑁧𑁨. ‘‘𑀅𑀕𑀸𑀭𑀸 𑀅𑀪𑀺𑀦𑀺𑀓𑁆𑀔𑀫𑁆𑀫, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁;

𑀩𑀸𑀯𑀭𑀺𑀁 𑀉𑀧𑀲𑀗𑁆𑀓𑀫𑁆𑀫, 𑀲𑀺𑀲𑁆𑀲𑀢𑁆𑀢𑀁 𑀅𑀚𑁆𑀛𑀼𑀧𑀸𑀕𑀫𑀺𑀁.

𑁫𑁧𑁩. ‘‘𑀳𑀺𑀫𑀯𑀦𑁆𑀢𑁂 𑀯𑀲𑀦𑁆𑀢𑁄𑀳𑀁, 𑀅𑀲𑁆𑀲𑁄𑀲𑀺𑀁 𑀮𑁄𑀓𑀦𑀸𑀬𑀓𑀁;

𑀉𑀢𑁆𑀢𑀫𑀢𑁆𑀣𑀁 𑀕𑀯𑁂𑀲𑀦𑁆𑀢𑁄, 𑀉𑀧𑀕𑀘𑁆𑀙𑀺𑀁 𑀯𑀺𑀦𑀸𑀬𑀓𑀁.

𑁫𑁧𑁪. ‘‘𑀤𑀦𑁆𑀢𑁄 𑀩𑀼𑀤𑁆𑀥𑁄 𑀤𑀫𑁂𑀢𑀸𑀯𑀻, 𑀑𑀖𑀢𑀺𑀡𑁆𑀡𑁄 𑀦𑀺𑀭𑀽𑀧𑀥𑀺;

𑀦𑀺𑀩𑁆𑀩𑀸𑀦𑀁 𑀓𑀣𑀬𑀻 𑀩𑀼𑀤𑁆𑀥𑁄, 𑀲𑀩𑁆𑀩𑀤𑀼𑀓𑁆𑀔𑀧𑁆𑀧𑀫𑁄𑀘𑀦𑀁.

𑁫𑁧𑁫. ‘‘𑀢𑀁 𑀫𑁂 𑀆𑀕𑀫𑀦𑀁 𑀲𑀺𑀤𑁆𑀥𑀁, 𑀢𑁄𑀲𑀺𑀢𑁄𑀳𑀁 𑀫𑀳𑀸𑀫𑀼𑀦𑀺𑀁;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁫𑁧𑁬. ‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀬𑀁 𑀤𑀻𑀧𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀤𑀻𑀧𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁫𑁧𑁭. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁫𑁧𑁮. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁫𑁧𑁯. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀅𑀚𑀺𑀢𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀅𑀚𑀺𑀢𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀲𑀫𑀁.

𑀧𑀺𑀮𑀺𑀦𑁆𑀤𑀯𑀘𑁆𑀙𑀯𑀕𑁆𑀕𑁄 𑀘𑀢𑁆𑀢𑀸𑀮𑀻𑀲𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀧𑀺𑀮𑀺𑀦𑁆𑀤𑀯𑀘𑁆𑀙𑁄 𑀲𑁂𑀮𑁄 𑀘, 𑀲𑀩𑁆𑀩𑀓𑀺𑀢𑁆𑀢𑀻 𑀫𑀥𑀼𑀁𑀤𑀤𑁄;

𑀓𑀽𑀝𑀸𑀕𑀸𑀭𑀻 𑀩𑀸𑀓𑀼𑀮𑁄 𑀘, 𑀕𑀺𑀭𑀺 𑀲𑀴𑀮𑀲𑀯𑁆𑀳𑀬𑁄.

𑀲𑀩𑁆𑀩𑀤𑁄 𑀅𑀚𑀺𑀢𑁄 𑀘𑁂𑀯, 𑀕𑀸𑀣𑀸𑀬𑁄 𑀕𑀡𑀺𑀢𑀸 𑀇𑀳;

𑀲𑀢𑀸𑀦𑀺 𑀧𑀜𑁆𑀘 𑀕𑀸𑀣𑀸𑀦𑀁, 𑀯𑀻𑀲𑀢𑀺 𑀘 𑀢𑀤𑀼𑀢𑁆𑀢𑀭𑀻𑀢𑀺.

𑀅𑀣 𑀯𑀕𑁆𑀕𑀼𑀤𑁆𑀤𑀸𑀦𑀁 𑁋

𑀧𑀤𑀼𑀫𑀸𑀭𑀓𑁆𑀔𑀤𑁄 𑀘𑁂𑀯, 𑀉𑀫𑀸 𑀕𑀦𑁆𑀥𑁄𑀤𑀓𑁂𑀦 𑀘;

𑀏𑀓𑀧𑀤𑁆𑀫 𑀲𑀤𑁆𑀤𑀲𑀜𑁆𑀜𑀻, 𑀫𑀦𑁆𑀤𑀸𑀭𑀁 𑀩𑁄𑀥𑀺𑀯𑀦𑁆𑀤𑀓𑁄.

𑀅𑀯𑀝𑀜𑁆𑀘 𑀧𑀺𑀮𑀺𑀦𑁆𑀤𑀺 [𑀏𑀯𑀫𑁂𑀯 𑀤𑀺𑀲𑁆𑀲𑀢𑀺] 𑀘, 𑀕𑀸𑀣𑀸𑀬𑁄 𑀕𑀡𑀺𑀢𑀸 𑀇𑀳;

𑀘𑀢𑀼𑀲𑀢𑁆𑀢𑀢𑀺 𑀕𑀸𑀣𑀸𑀬𑁄, 𑀏𑀓𑀸𑀤𑀲 𑀲𑀢𑀸𑀦𑀺 𑀘.

𑀧𑀤𑀼𑀫𑀯𑀕𑁆𑀕𑀤𑀲𑀓𑀁.