𑁧𑁦. 𑀧𑀼𑀩𑁆𑀩𑀓𑀫𑁆𑀫𑀧𑀺𑀮𑁄𑀢𑀺𑀓𑀩𑀼𑀤𑁆𑀥𑀅𑀧𑀤𑀸𑀦𑀁

𑁬𑁪. ‘‘𑀅𑀦𑁄𑀢𑀢𑁆𑀢𑀲𑀭𑀸𑀲𑀦𑁆𑀦𑁂, 𑀭𑀫𑀡𑀻𑀬𑁂 𑀲𑀺𑀮𑀸𑀢𑀮𑁂;

𑀦𑀸𑀦𑀸𑀭𑀢𑀦𑀧𑀚𑁆𑀚𑁄𑀢𑁂, 𑀦𑀸𑀦𑀸𑀕𑀦𑁆𑀥𑀯𑀦𑀦𑁆𑀢𑀭𑁂.

𑁬𑁫. ‘‘𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦, 𑀧𑀭𑁂𑀢𑁄 [𑀉𑀧𑁂𑀢𑁄 (𑀉𑀤𑀸𑀦𑀝𑁆𑀞𑀓𑀣𑀸𑀬𑀁 𑁪 𑀯𑀕𑁆𑀕𑁂, 𑁮 𑀲𑀼𑀢𑁆𑀢𑁂)] 𑀮𑁄𑀓𑀦𑀸𑀬𑀓𑁄;

𑀆𑀲𑀻𑀦𑁄 𑀩𑁆𑀬𑀸𑀓𑀭𑀻 𑀢𑀢𑁆𑀣, 𑀧𑀼𑀩𑁆𑀩𑀓𑀫𑁆𑀫𑀸𑀦𑀺 𑀅𑀢𑁆𑀢𑀦𑁄.

𑁬𑁬. [𑀲𑀼𑀡𑀸𑀣 𑀪𑀺𑀓𑁆𑀔𑀯𑁂 𑀫𑀬𑁆𑀳𑀁, 𑀬𑀁 𑀓𑀫𑁆𑀫𑀁 𑀧𑀓𑀢𑀁 𑀫𑀬𑀸; 𑀏𑀓𑀁 𑀅𑀭𑀜𑁆𑀜𑀺𑀓𑀁 𑀪𑀺𑀓𑁆𑀔𑀼𑀁, 𑀤𑀺𑀲𑁆𑀯𑀸 𑀤𑀺𑀦𑁆𑀦𑀁 𑀧𑀺𑀮𑁄𑀢𑀺𑀓𑀁; 𑀧𑀢𑁆𑀣𑀺𑀢𑀁 𑀧𑀞𑀫𑀁 𑀩𑀼𑀤𑁆𑀥𑀁, 𑀩𑀼𑀤𑁆𑀥𑀢𑁆𑀢𑀸𑀬 𑀫𑀬𑀸 𑀢𑀤𑀸; 𑀧𑀺𑀮𑁄𑀢𑀺𑀬𑀲𑁆𑀲 𑀓𑀫𑁆𑀫𑀲𑁆𑀲, 𑀩𑀼𑀤𑁆𑀥𑀢𑁆𑀢𑁂𑀧𑀺 𑀯𑀺𑀧𑀘𑁆𑀘𑀢𑀺; 𑀕𑁄𑀧𑀸𑀮𑀓𑁄 𑀧𑀼𑀭𑁂 𑀆𑀲𑀺𑀁, 𑀕𑀸𑀯𑀺𑀁 𑀧𑀸𑀚𑁂𑀢𑀺 𑀕𑁄𑀘𑀭𑀁; 𑀧𑀺𑀯𑀦𑁆𑀢𑀺𑀁 𑀉𑀤𑀓𑀁 𑀆𑀯𑀺𑀮𑀁, 𑀕𑀸𑀯𑀺𑀁 𑀤𑀺𑀲𑁆𑀯𑀸 𑀦𑀺𑀯𑀸𑀭𑀬𑀺𑀁; 𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀇𑀥 𑀧𑀘𑁆𑀙𑀺𑀫𑀓𑁂 𑀪𑀯𑁂; 𑀯𑀺𑀧𑀸𑀲𑀺𑀢𑁄 𑀬𑀤𑀺𑀘𑁆𑀙𑀓𑀁, 𑀦 𑀳𑀺 𑀧𑀸𑀢𑀼𑀁 𑀮𑀪𑀸𑀫𑀳𑀁 (𑀲𑁆𑀬𑀸.)] ‘‘𑀲𑀼𑀡𑀸𑀣 𑀪𑀺𑀓𑁆𑀔𑀯𑁄 𑀫𑀬𑁆𑀳𑀁, 𑀬𑀁 𑀓𑀫𑁆𑀫𑀁 𑀧𑀓𑀢𑀁 𑀫𑀬𑀸;

𑀧𑀺𑀮𑁄𑀢𑀺𑀓𑀲𑁆𑀲 𑀓𑀫𑁆𑀫𑀲𑁆𑀲, 𑀩𑀼𑀤𑁆𑀥𑀢𑁆𑀢𑁂𑀧𑀺 𑀯𑀺𑀧𑀘𑁆𑀘𑀢𑀺 [𑀲𑀼𑀡𑀸𑀣 𑀪𑀺𑀓𑁆𑀔𑀯𑁂 𑀫𑀬𑁆𑀳𑀁, 𑀬𑀁 𑀓𑀫𑁆𑀫𑀁 𑀧𑀓𑀢𑀁 𑀫𑀬𑀸; 𑀏𑀓𑀁 𑀅𑀭𑀜𑁆𑀜𑀺𑀓𑀁 𑀪𑀺𑀓𑁆𑀔𑀼𑀁, 𑀤𑀺𑀲𑁆𑀯𑀸 𑀤𑀺𑀦𑁆𑀦𑀁 𑀧𑀺𑀮𑁄𑀢𑀺𑀓𑀁; 𑀧𑀢𑁆𑀣𑀺𑀢𑀁 𑀧𑀞𑀫𑀁 𑀩𑀼𑀤𑁆𑀥𑀁, 𑀩𑀼𑀤𑁆𑀥𑀢𑁆𑀢𑀸𑀬 𑀫𑀬𑀸 𑀢𑀤𑀸; 𑀧𑀺𑀮𑁄𑀢𑀺𑀬𑀲𑁆𑀲 𑀓𑀫𑁆𑀫𑀲𑁆𑀲, 𑀩𑀼𑀤𑁆𑀥𑀢𑁆𑀢𑁂𑀧𑀺 𑀯𑀺𑀧𑀘𑁆𑀘𑀢𑀺; 𑀕𑁄𑀧𑀸𑀮𑀓𑁄 𑀧𑀼𑀭𑁂 𑀆𑀲𑀺𑀁, 𑀕𑀸𑀯𑀺𑀁 𑀧𑀸𑀚𑁂𑀢𑀺 𑀕𑁄𑀘𑀭𑀁; 𑀧𑀺𑀯𑀦𑁆𑀢𑀺𑀁 𑀉𑀤𑀓𑀁 𑀆𑀯𑀺𑀮𑀁, 𑀕𑀸𑀯𑀺𑀁 𑀤𑀺𑀲𑁆𑀯𑀸 𑀦𑀺𑀯𑀸𑀭𑀬𑀺𑀁; 𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀇𑀥 𑀧𑀘𑁆𑀙𑀺𑀫𑀓𑁂 𑀪𑀯𑁂; 𑀯𑀺𑀧𑀸𑀲𑀺𑀢𑁄 𑀬𑀤𑀺𑀘𑁆𑀙𑀓𑀁, 𑀦 𑀳𑀺 𑀧𑀸𑀢𑀼𑀁 𑀮𑀪𑀸𑀫𑀳𑀁 (𑀲𑁆𑀬𑀸.)].

[𑁧]

𑁬𑁭. ‘‘𑀫𑀼𑀦𑀸𑀴𑀺 𑀦𑀸𑀫𑀳𑀁 𑀥𑀼𑀢𑁆𑀢𑁄, 𑀧𑀼𑀩𑁆𑀩𑁂 𑀅𑀜𑁆𑀜𑀸𑀲𑀼 𑀚𑀸𑀢𑀺𑀲𑀼 [𑀅𑀜𑁆𑀜𑀸𑀬 𑀚𑀸𑀢𑀺𑀬𑀸 (𑀉𑀤𑀸𑀦 𑀅𑀝𑁆𑀞.)];

𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀲𑀼𑀭𑀪𑀺𑀁 [𑀲𑀭𑀪𑀼𑀁 (𑀲𑀻.)], 𑀅𑀩𑁆𑀪𑀸𑀘𑀺𑀓𑁆𑀔𑀺𑀁 𑀅𑀤𑀽𑀲𑀓𑀁.

𑁬𑁮. ‘‘𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀦𑀺𑀭𑀬𑁂 𑀲𑀁𑀲𑀭𑀺𑀁 𑀘𑀺𑀭𑀁;

𑀩𑀳𑀽𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀤𑀼𑀓𑁆𑀔𑀁 𑀯𑁂𑀤𑁂𑀲𑀺 𑀯𑁂𑀤𑀦𑀁.

𑁬𑁯. ‘‘𑀢𑁂𑀦 𑀓𑀫𑁆𑀫𑀸𑀯𑀲𑁂𑀲𑁂𑀦, 𑀇𑀥 𑀧𑀘𑁆𑀙𑀺𑀫𑀓𑁂 𑀪𑀯𑁂;

𑀅𑀩𑁆𑀪𑀓𑁆𑀔𑀸𑀦𑀁 𑀫𑀬𑀸 𑀮𑀤𑁆𑀥𑀁, 𑀲𑀼𑀦𑁆𑀤𑀭𑀺𑀓𑀸𑀬 𑀓𑀸𑀭𑀡𑀸.

[𑁨]

𑁭𑁦. ‘‘𑀲𑀩𑁆𑀩𑀸𑀪𑀺𑀪𑀼𑀲𑁆𑀲 𑀩𑀼𑀤𑁆𑀥𑀲𑁆𑀲, 𑀦𑀦𑁆𑀤𑁄 𑀦𑀸𑀫𑀸𑀲𑀺 𑀲𑀸𑀯𑀓𑁄;

𑀢𑀁 𑀅𑀩𑁆𑀪𑀓𑁆𑀔𑀸𑀬 𑀦𑀺𑀭𑀬𑁂, 𑀘𑀺𑀭𑀁 𑀲𑀁𑀲𑀭𑀺𑀢𑀁 𑀫𑀬𑀸.

𑁭𑁧. ‘‘𑀤𑀲𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀦𑀺𑀭𑀬𑁂 𑀲𑀁𑀲𑀭𑀺𑀁 𑀘𑀺𑀭𑀁;

𑀫𑀦𑀼𑀲𑁆𑀲𑀪𑀸𑀯𑀁 𑀮𑀤𑁆𑀥𑀸𑀳𑀁, 𑀅𑀩𑁆𑀪𑀓𑁆𑀔𑀸𑀦𑀁 𑀩𑀳𑀼𑀁 𑀮𑀪𑀺𑀁.

𑁭𑁨. ‘‘𑀢𑁂𑀦 𑀓𑀫𑁆𑀫𑀸𑀯𑀲𑁂𑀲𑁂𑀦, 𑀘𑀺𑀜𑁆𑀘𑀫𑀸𑀦𑀯𑀺𑀓𑀸 𑀫𑀫𑀁;

𑀅𑀩𑁆𑀪𑀸𑀘𑀺𑀓𑁆𑀔𑀺 𑀅𑀪𑀽𑀢𑁂𑀦, 𑀚𑀦𑀓𑀸𑀬𑀲𑁆𑀲 𑀅𑀕𑁆𑀕𑀢𑁄.

[𑁩]

𑁭𑁩. ‘‘𑀩𑁆𑀭𑀸𑀳𑁆𑀫𑀡𑁄 𑀲𑀼𑀢𑀯𑀸 𑀆𑀲𑀺𑀁, 𑀅𑀳𑀁 𑀲𑀓𑁆𑀓𑀢𑀧𑀽𑀚𑀺𑀢𑁄;

𑀫𑀳𑀸𑀯𑀦𑁂 𑀧𑀜𑁆𑀘𑀲𑀢𑁂, 𑀫𑀦𑁆𑀢𑁂 𑀯𑀸𑀘𑁂𑀫𑀺 𑀫𑀸𑀡𑀯𑁂.

𑁭𑁪. ‘‘𑀢𑀢𑁆𑀣𑀸𑀕𑀢𑁄 [𑀢𑀫𑀸𑀕𑀢𑁄 (𑀓.)] 𑀇𑀲𑀺 𑀪𑀻𑀫𑁄, 𑀧𑀜𑁆𑀘𑀸𑀪𑀺𑀜𑁆𑀜𑁄 𑀫𑀳𑀺𑀤𑁆𑀥𑀺𑀓𑁄;

𑀢𑀁 𑀘𑀸𑀳𑀁 𑀆𑀕𑀢𑀁 𑀤𑀺𑀲𑁆𑀯𑀸, 𑀅𑀩𑁆𑀪𑀸𑀘𑀺𑀓𑁆𑀔𑀺𑀁 𑀅𑀤𑀽𑀲𑀓𑀁.

𑁭𑁫. ‘‘𑀢𑀢𑁄𑀳𑀁 𑀅𑀯𑀘𑀁 𑀲𑀺𑀲𑁆𑀲𑁂, 𑀓𑀸𑀫𑀪𑁄𑀕𑀻 𑀅𑀬𑀁 𑀇𑀲𑀺;

𑀫𑀬𑁆𑀳𑀫𑁆𑀧𑀺 𑀪𑀸𑀲𑀫𑀸𑀦𑀲𑁆𑀲, 𑀅𑀦𑀼𑀫𑁄𑀤𑀺𑀁𑀲𑀼 𑀫𑀸𑀡𑀯𑀸.

𑁭𑁬. ‘‘𑀢𑀢𑁄 𑀫𑀸𑀡𑀯𑀓𑀸 𑀲𑀩𑁆𑀩𑁂, 𑀪𑀺𑀓𑁆𑀔𑀫𑀸𑀦𑀁 𑀓𑀼𑀮𑁂 𑀓𑀼𑀮𑁂;

𑀫𑀳𑀸𑀚𑀦𑀲𑁆𑀲 𑀆𑀳𑀁𑀲𑀼, 𑀓𑀸𑀫𑀪𑁄𑀕𑀻 𑀅𑀬𑀁 𑀇𑀲𑀺.

𑁭𑁭. ‘‘𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀧𑀜𑁆𑀘 𑀪𑀺𑀓𑁆𑀔𑀼𑀲𑀢𑀸 𑀇𑀫𑁂;

𑀅𑀩𑁆𑀪𑀓𑁆𑀔𑀸𑀦𑀁 𑀮𑀪𑀼𑀁 𑀲𑀩𑁆𑀩𑁂, 𑀲𑀼𑀦𑁆𑀤𑀭𑀺𑀓𑀸𑀬 𑀓𑀸𑀭𑀡𑀸.

[𑁪]

𑁭𑁮. ‘‘𑀯𑁂𑀫𑀸𑀢𑀼𑀪𑀸𑀢𑀭𑀁 𑀧𑀼𑀩𑁆𑀩𑁂, 𑀥𑀦𑀳𑁂𑀢𑀼 𑀳𑀦𑀺𑀁 𑀅𑀳𑀁;

𑀧𑀓𑁆𑀔𑀺𑀧𑀺𑀁 𑀕𑀺𑀭𑀺𑀤𑀼𑀕𑁆𑀕𑀲𑁆𑀫𑀺𑀁, 𑀲𑀺𑀮𑀸𑀬 𑀘 𑀅𑀧𑀺𑀁𑀲𑀬𑀺𑀁.

𑁭𑁯. ‘‘𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀤𑁂𑀯𑀤𑀢𑁆𑀢𑁄 𑀲𑀺𑀮𑀁 𑀔𑀺𑀧𑀺;

𑀅𑀗𑁆𑀕𑀼𑀝𑁆𑀞𑀁 𑀧𑀺𑀁𑀲𑀬𑀻 𑀧𑀸𑀤𑁂, 𑀫𑀫 𑀧𑀸𑀲𑀸𑀡𑀲𑀓𑁆𑀔𑀭𑀸.

[𑁫]

𑁮𑁦. ‘‘𑀧𑀼𑀭𑁂𑀳𑀁 𑀤𑀸𑀭𑀓𑁄 𑀳𑀼𑀢𑁆𑀯𑀸, 𑀓𑀻𑀴𑀫𑀸𑀦𑁄 𑀫𑀳𑀸𑀧𑀣𑁂;

𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀤𑀺𑀲𑁆𑀯𑀸𑀦, 𑀫𑀕𑁆𑀕𑁂 𑀲𑀓𑀮𑀺𑀓𑀁 [𑀲𑀓𑁆𑀔𑀮𑀺𑀓𑀁 (𑀓.)] 𑀔𑀺𑀧𑀺𑀁 [𑀤𑀳𑀺𑀁 (𑀲𑁆𑀬𑀸.)].

𑁮𑁧. ‘‘𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀇𑀥 𑀧𑀘𑁆𑀙𑀺𑀫𑀓𑁂 𑀪𑀯𑁂;

𑀯𑀥𑀢𑁆𑀣𑀁 𑀫𑀁 𑀤𑁂𑀯𑀤𑀢𑁆𑀢𑁄, 𑀅𑀪𑀺𑀫𑀸𑀭𑁂 𑀧𑀬𑁄𑀚𑀬𑀺.

[𑁬]

𑁮𑁨. ‘‘𑀳𑀢𑁆𑀣𑀸𑀭𑁄𑀳𑁄 𑀧𑀼𑀭𑁂 𑀆𑀲𑀺𑀁, 𑀧𑀘𑁆𑀘𑁂𑀓𑀫𑀼𑀦𑀺𑀫𑀼𑀢𑁆𑀢𑀫𑀁;

𑀧𑀺𑀡𑁆𑀟𑀸𑀬 𑀯𑀺𑀘𑀭𑀦𑁆𑀢𑀁 𑀢𑀁, 𑀆𑀲𑀸𑀤𑁂𑀲𑀺𑀁 𑀕𑀚𑁂𑀦𑀳𑀁.

𑁮𑁩. ‘‘𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀪𑀦𑁆𑀢𑁄 [𑀤𑀦𑁆𑀢𑁄 (𑀓.)] 𑀦𑀸𑀴𑀸𑀕𑀺𑀭𑀻 𑀕𑀚𑁄;

𑀕𑀺𑀭𑀺𑀩𑁆𑀩𑀚𑁂 𑀧𑀼𑀭𑀯𑀭𑁂, 𑀤𑀸𑀭𑀼𑀡𑁄 𑀲𑀫𑀼𑀧𑀸𑀕𑀫𑀺 [𑀫𑀁 𑀉𑀧𑀸𑀕𑀫𑀺 (𑀲𑀻.)].

[𑁭]

𑁮𑁪. ‘‘𑀭𑀸𑀚𑀸𑀳𑀁 𑀧𑀢𑁆𑀣𑀺𑀯𑁄 [𑀧𑀢𑁆𑀢𑀺𑀓𑁄 (𑀲𑁆𑀬𑀸. 𑀓.), 𑀔𑀢𑁆𑀢𑀺𑀬𑁄 (𑀉𑀤𑀸𑀦 𑀅𑀝𑁆𑀞.)] 𑀆𑀲𑀺𑀁, 𑀲𑀢𑁆𑀢𑀺𑀬𑀸 𑀧𑀼𑀭𑀺𑀲𑀁 𑀳𑀦𑀺𑀁;

𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀦𑀺𑀭𑀬𑁂 𑀧𑀘𑁆𑀘𑀺𑀲𑀁 𑀪𑀼𑀲𑀁.

𑁮𑁫. ‘‘𑀓𑀫𑁆𑀫𑀼𑀦𑁄 𑀢𑀲𑁆𑀲 𑀲𑁂𑀲𑁂𑀦, 𑀇𑀤𑀸𑀦𑀺 𑀲𑀓𑀮𑀁 𑀫𑀫;

𑀧𑀸𑀤𑁂 𑀙𑀯𑀺𑀁 𑀧𑀓𑀧𑁆𑀧𑁂𑀲𑀺 [𑀧𑀓𑁄𑀧𑁂𑀲𑀺 (𑀲𑀻.)], 𑀦 𑀳𑀺 𑀓𑀫𑁆𑀫𑀁 𑀯𑀺𑀦𑀲𑁆𑀲𑀢𑀺.

[𑁮]

𑁮𑁬. ‘‘𑀅𑀳𑀁 𑀓𑁂𑀯𑀝𑁆𑀝𑀕𑀸𑀫𑀲𑁆𑀫𑀺𑀁, 𑀅𑀳𑀼𑀁 𑀓𑁂𑀯𑀝𑁆𑀝𑀤𑀸𑀭𑀓𑁄;

𑀫𑀘𑁆𑀙𑀓𑁂 𑀖𑀸𑀢𑀺𑀢𑁂 𑀤𑀺𑀲𑁆𑀯𑀸, 𑀚𑀦𑀬𑀺𑀁 𑀲𑁄𑀫𑀦𑀲𑁆𑀲𑀓𑀁 [𑀲𑁄𑀫𑀦𑀲𑁆𑀲𑀳𑀁 (𑀉𑀤𑀸𑀦 𑀅𑀝𑁆𑀞.)].

𑁮𑁭. ‘‘𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀲𑀻𑀲𑀤𑀼𑀓𑁆𑀔𑀁 𑀅𑀳𑀽 𑀫𑀫;

𑀲𑀩𑁆𑀩𑁂 𑀲𑀓𑁆𑀓𑀸 𑀘 𑀳𑀜𑁆𑀜𑀺𑀁𑀲𑀼, 𑀬𑀤𑀸 𑀳𑀦𑀺 𑀯𑀺𑀝𑀝𑀽𑀪𑁄 [𑀯𑀺𑀝𑀝𑀼𑀪𑁄 (𑀲𑁆𑀬𑀸. 𑀓.)].

[𑁯]

𑁮𑁮. ‘‘𑀨𑀼𑀲𑁆𑀲𑀲𑁆𑀲𑀸𑀳𑀁 𑀧𑀸𑀯𑀘𑀦𑁂, 𑀲𑀸𑀯𑀓𑁂 𑀧𑀭𑀺𑀪𑀸𑀲𑀬𑀺𑀁;

𑀬𑀯𑀁 𑀔𑀸𑀤𑀣 𑀪𑀼𑀜𑁆𑀚𑀣, 𑀫𑀸 𑀘 𑀪𑀼𑀜𑁆𑀚𑀣 𑀲𑀸𑀮𑀬𑁄.

𑁮𑁯. ‘‘𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀢𑁂𑀫𑀸𑀲𑀁 𑀔𑀸𑀤𑀺𑀢𑀁 𑀬𑀯𑀁;

𑀦𑀺𑀫𑀦𑁆𑀢𑀺𑀢𑁄 𑀩𑁆𑀭𑀸𑀳𑁆𑀫𑀡𑁂𑀦, 𑀯𑁂𑀭𑀜𑁆𑀚𑀸𑀬𑀁 𑀯𑀲𑀺𑀁 𑀢𑀤𑀸.

[𑁧𑁦]

𑁯𑁦. ‘‘𑀦𑀺𑀩𑁆𑀩𑀼𑀤𑁆𑀥𑁂 𑀯𑀢𑁆𑀢𑀫𑀸𑀦𑀫𑁆𑀳𑀺, 𑀫𑀮𑁆𑀮𑀧𑀼𑀢𑁆𑀢𑀁 𑀦𑀺𑀳𑁂𑀞𑀬𑀺𑀁 [𑀦𑀺𑀲𑁂𑀥𑀬𑀺𑀁 (𑀲𑁆𑀬𑀸. 𑀓.)];

𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀧𑀺𑀝𑁆𑀞𑀺𑀤𑀼𑀓𑁆𑀔𑀁 𑀅𑀳𑀽 𑀫𑀫.

[𑁧𑁧]

𑁯𑁧. ‘‘𑀢𑀺𑀓𑀺𑀘𑁆𑀙𑀓𑁄 𑀅𑀳𑀁 𑀆𑀲𑀺𑀁, 𑀲𑁂𑀝𑁆𑀞𑀺𑀧𑀼𑀢𑁆𑀢𑀁 𑀯𑀺𑀭𑁂𑀘𑀬𑀺𑀁;

𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀳𑁄𑀢𑀺 𑀧𑀓𑁆𑀔𑀦𑁆𑀤𑀺𑀓𑀸 𑀫𑀫.

[𑁧𑁨]

𑁯𑁨. ‘‘𑀅𑀯𑀘𑀸𑀳𑀁 𑀚𑁄𑀢𑀺𑀧𑀸𑀮𑁄, 𑀲𑀼𑀕𑀢𑀁 𑀓𑀲𑁆𑀲𑀧𑀁 𑀢𑀤𑀸;

𑀓𑀼𑀢𑁄 𑀦𑀼 𑀩𑁄𑀥𑀺 𑀫𑀼𑀡𑁆𑀟𑀲𑁆𑀲, 𑀩𑁄𑀥𑀺 𑀧𑀭𑀫𑀤𑀼𑀮𑁆𑀮𑀪𑀸.

𑁯𑁩. ‘‘𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀅𑀘𑀭𑀺𑀁 𑀤𑀼𑀓𑁆𑀓𑀭𑀁 𑀩𑀳𑀼𑀁;

𑀙𑀩𑁆𑀩𑀲𑁆𑀲𑀸𑀦𑀼𑀭𑀼𑀯𑁂𑀴𑀸𑀬𑀁, 𑀢𑀢𑁄 𑀩𑁄𑀥𑀺𑀫𑀧𑀸𑀧𑀼𑀡𑀺𑀁.

𑁯𑁪. ‘‘𑀦𑀸𑀳𑀁 𑀏𑀢𑁂𑀦 𑀫𑀕𑁆𑀕𑁂𑀦, 𑀧𑀸𑀧𑀼𑀡𑀺𑀁 𑀩𑁄𑀥𑀺𑀫𑀼𑀢𑁆𑀢𑀫𑀁;

𑀓𑀼𑀫𑁆𑀫𑀕𑁆𑀕𑁂𑀦 𑀕𑀯𑁂𑀲𑀺𑀲𑁆𑀲𑀁, 𑀧𑀼𑀩𑁆𑀩𑀓𑀫𑁆𑀫𑁂𑀦 𑀯𑀸𑀭𑀺𑀢𑁄.

𑁯𑁫. ‘‘𑀧𑀼𑀜𑁆𑀜𑀧𑀸𑀧𑀧𑀭𑀺𑀓𑁆𑀔𑀻𑀡𑁄, 𑀲𑀩𑁆𑀩𑀲𑀦𑁆𑀢𑀸𑀧𑀯𑀚𑁆𑀚𑀺𑀢𑁄;

𑀅𑀲𑁄𑀓𑁄 𑀅𑀦𑀼𑀧𑀸𑀬𑀸𑀲𑁄, 𑀦𑀺𑀩𑁆𑀩𑀸𑀬𑀺𑀲𑁆𑀲𑀫𑀦𑀸𑀲𑀯𑁄.

𑁯𑁬. ‘‘𑀏𑀯𑀁 𑀚𑀺𑀦𑁄 𑀯𑀺𑀬𑀸𑀓𑀸𑀲𑀺, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀅𑀕𑁆𑀕𑀢𑁄;

𑀲𑀩𑁆𑀩𑀸𑀪𑀺𑀜𑁆𑀜𑀸𑀩𑀮𑀧𑁆𑀧𑀢𑁆𑀢𑁄, 𑀅𑀦𑁄𑀢𑀢𑁆𑀢𑁂 𑀫𑀳𑀸𑀲𑀭𑁂’’𑀢𑀺.

𑀇𑀢𑁆𑀣𑀁 𑀲𑀼𑀤𑀁 𑀪𑀕𑀯𑀸 𑀅𑀢𑁆𑀢𑀦𑁄 𑀧𑀼𑀩𑁆𑀩𑀘𑀭𑀺𑀢𑀁 𑀓𑀫𑁆𑀫𑀧𑀺𑀮𑁄𑀢𑀺𑀓𑀁 𑀦𑀸𑀫 𑀩𑀼𑀤𑁆𑀥𑀸𑀧𑀤𑀸𑀦𑀥𑀫𑁆𑀫𑀧𑀭𑀺𑀬𑀸𑀬𑀁 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀼𑀩𑁆𑀩𑀓𑀫𑁆𑀫𑀧𑀺𑀮𑁄𑀢𑀺𑀓𑀁 𑀦𑀸𑀫 𑀩𑀼𑀤𑁆𑀥𑀸𑀧𑀤𑀸𑀦𑀁 𑀤𑀲𑀫𑀁.

𑀅𑀯𑀝𑀨𑀮𑀯𑀕𑁆𑀕𑁄 𑀏𑀓𑀽𑀦𑀘𑀢𑁆𑀢𑀸𑀮𑀻𑀲𑀫𑁄.