𑁩𑁯. 𑀅𑀯𑀝𑀨𑀮𑀯𑀕𑁆𑀕𑁄

𑁧. 𑀅𑀯𑀝𑀨𑀮𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧. ‘‘𑀲𑀢𑀭𑀁𑀲𑀺 𑀦𑀸𑀫 𑀪𑀕𑀯𑀸, 𑀲𑀬𑀫𑁆𑀪𑀽 𑀅𑀧𑀭𑀸𑀚𑀺𑀢𑁄;

𑀯𑀺𑀯𑁂𑀓𑀓𑀸𑀫𑁄 𑀲𑀫𑁆𑀩𑀼𑀤𑁆𑀥𑁄, 𑀕𑁄𑀘𑀭𑀸𑀬𑀸𑀪𑀺𑀦𑀺𑀓𑁆𑀔𑀫𑀺.

𑁨. ‘‘𑀨𑀮𑀳𑀢𑁆𑀣𑁄 𑀅𑀳𑀁 𑀤𑀺𑀲𑁆𑀯𑀸, 𑀉𑀧𑀕𑀘𑁆𑀙𑀺𑀁 𑀦𑀭𑀸𑀲𑀪𑀁;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀅𑀯𑀝𑀁 [𑀅𑀯𑀡𑁆𑀝𑀁 (𑀲𑀻.), 𑀅𑀫𑁆𑀩𑀝𑀁 (𑀲𑁆𑀬𑀸.)] 𑀅𑀤𑀤𑀺𑀁 𑀨𑀮𑀁.

𑁩. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀨𑀮𑀫𑀤𑀤𑀺𑀁 𑀅𑀳𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀨𑀮𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁪. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸;

𑀦𑀸𑀕𑁄𑀯 𑀩𑀦𑁆𑀥𑀦𑀁 𑀙𑁂𑀢𑁆𑀯𑀸, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁫. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺, 𑀫𑀫 𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁬. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀅𑀯𑀝𑀨𑀮𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀅𑀯𑀝𑀨𑀮𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀞𑀫𑀁.

𑁨. 𑀮𑀩𑀼𑀚𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁭. ‘‘𑀦𑀕𑀭𑁂 𑀩𑀦𑁆𑀥𑀼𑀫𑀢𑀺𑀬𑀸, 𑀆𑀲𑀺𑀁 𑀆𑀭𑀸𑀫𑀺𑀓𑁄 𑀢𑀤𑀸;

𑀅𑀤𑁆𑀤𑀲𑀁 𑀯𑀺𑀭𑀚𑀁 𑀩𑀼𑀤𑁆𑀥𑀁, 𑀕𑀘𑁆𑀙𑀦𑁆𑀢𑀁 𑀅𑀦𑀺𑀮𑀜𑁆𑀚𑀲𑁂.

𑁮. ‘‘𑀮𑀩𑀼𑀚𑀲𑁆𑀲 𑀨𑀮𑀁 𑀕𑀬𑁆𑀳, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲𑀤𑀸𑀲𑀳𑀁;

𑀆𑀓𑀸𑀲𑁂 𑀞𑀺𑀢𑀓𑁄 𑀲𑀦𑁆𑀢𑁄, 𑀧𑀝𑀺𑀕𑀡𑁆𑀳𑀺 𑀫𑀳𑀸𑀬𑀲𑁄.

𑁯. ‘‘𑀯𑀺𑀢𑁆𑀢𑀺𑀲𑀜𑁆𑀚𑀦𑀦𑀁 𑀫𑀬𑁆𑀳𑀁, 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀸𑀯𑀳𑀁;

𑀨𑀮𑀁 𑀩𑀼𑀤𑁆𑀥𑀲𑁆𑀲 𑀤𑀢𑁆𑀯𑀸𑀦, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸.

𑁧𑁦. ‘‘𑀅𑀥𑀺𑀕𑀘𑁆𑀙𑀺𑀁 𑀢𑀤𑀸 𑀧𑀻𑀢𑀺𑀁, 𑀯𑀺𑀧𑀼𑀮𑀜𑁆𑀘 𑀲𑀼𑀔𑀼𑀢𑁆𑀢𑀫𑀁;

𑀉𑀧𑁆𑀧𑀚𑁆𑀚𑀢𑁂𑀯 𑀭𑀢𑀦𑀁, 𑀦𑀺𑀩𑁆𑀩𑀢𑁆𑀢𑀲𑁆𑀲 𑀢𑀳𑀺𑀁 𑀢𑀳𑀺𑀁.

𑁧𑁧. ‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀨𑀮𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀨𑀮𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁧𑁨. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁧𑁩. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁧𑁪. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀮𑀩𑀼𑀚𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀮𑀩𑀼𑀚𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀼𑀢𑀺𑀬𑀁.

𑁩. 𑀉𑀤𑀼𑀫𑁆𑀩𑀭𑀨𑀮𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁫. ‘‘𑀯𑀺𑀦𑀢𑀸𑀦𑀤𑀺𑀬𑀸 𑀢𑀻𑀭𑁂, 𑀯𑀺𑀳𑀸𑀲𑀺 𑀧𑀼𑀭𑀺𑀲𑀼𑀢𑁆𑀢𑀫𑁄;

𑀅𑀤𑁆𑀤𑀲𑀁 𑀯𑀺𑀭𑀚𑀁 𑀩𑀼𑀤𑁆𑀥𑀁, 𑀏𑀓𑀕𑁆𑀕𑀁 𑀲𑀼𑀲𑀫𑀸𑀳𑀺𑀢𑀁.

𑁧𑁬. ‘‘𑀢𑀲𑁆𑀫𑀺𑀁 𑀧𑀲𑀦𑁆𑀦𑀫𑀸𑀦𑀲𑁄, 𑀓𑀺𑀮𑁂𑀲𑀫𑀮𑀥𑁄𑀯𑀦𑁂;

𑀉𑀤𑀼𑀫𑁆𑀩𑀭𑀨𑀮𑀁 𑀕𑀬𑁆𑀳, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲𑀤𑀸𑀲𑀳𑀁.

𑁧𑁭. ‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀨𑀮𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀨𑀮𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁧𑁮. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁧𑁯. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁨𑁦. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀉𑀤𑀼𑀫𑁆𑀩𑀭𑀨𑀮𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀉𑀤𑀼𑀫𑁆𑀩𑀭𑀨𑀮𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀢𑀢𑀺𑀬𑀁.

𑁪. 𑀧𑀺𑀮𑀓𑁆𑀔𑀨𑀮𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁧. ‘‘𑀯𑀦𑀦𑁆𑀢𑀭𑁂 𑀩𑀼𑀤𑁆𑀥𑀁 𑀤𑀺𑀲𑁆𑀯𑀸, 𑀅𑀢𑁆𑀣𑀤𑀲𑁆𑀲𑀺𑀁 𑀫𑀳𑀸𑀬𑀲𑀁;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀧𑀺𑀮𑀓𑁆𑀔𑀲𑁆𑀲𑀸𑀤𑀤𑀺𑀁 𑀨𑀮𑀁 [𑀧𑀺𑀮𑀓𑁆𑀔𑀲𑁆𑀲 𑀨𑀮𑀁 𑀅𑀤𑀁 (𑀲𑀻.), 𑀧𑀺𑀮𑀓𑁆𑀔𑀼𑀲𑁆𑀲 𑀨𑀮𑀁 𑀅𑀤𑀁 (𑀲𑁆𑀬𑀸.)].

𑁨𑁨. ‘‘𑀅𑀝𑁆𑀞𑀸𑀭𑀲𑁂 𑀓𑀧𑁆𑀧𑀲𑀢𑁂, 𑀬𑀁 𑀨𑀮𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀨𑀮𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁨𑁩. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁨𑁪. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁨𑁫. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀺𑀮𑀓𑁆𑀔𑀨𑀮𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀺𑀮𑀓𑁆𑀔𑀨𑀮𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀘𑀢𑀼𑀢𑁆𑀣𑀁.

𑁫. 𑀨𑀸𑀭𑀼𑀲𑀨𑀮𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁬. ‘‘𑀲𑀼𑀯𑀡𑁆𑀡𑀯𑀡𑁆𑀡𑀁 𑀲𑀫𑁆𑀩𑀼𑀤𑁆𑀥𑀁, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑀁;

𑀭𑀣𑀺𑀬𑀁 𑀧𑀝𑀺𑀧𑀚𑁆𑀚𑀦𑁆𑀢𑀁, 𑀨𑀸𑀭𑀼𑀲𑀨𑀮𑀫𑀤𑀸𑀲𑀳𑀁.

𑁨𑁭. ‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀨𑀮𑀫𑀤𑀤𑀺𑀁 𑀅𑀳𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀨𑀮𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁨𑁮. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁨𑁯. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁩𑁦. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀨𑀸𑀭𑀼𑀲𑀨𑀮𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀨𑀸𑀭𑀼𑀲𑀨𑀮𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀜𑁆𑀘𑀫𑀁.

𑁬. 𑀯𑀮𑁆𑀮𑀺𑀨𑀮𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁧. ‘‘𑀲𑀩𑁆𑀩𑁂 𑀚𑀦𑀸 𑀲𑀫𑀸𑀕𑀫𑁆𑀫, 𑀅𑀕𑀫𑀺𑀁𑀲𑀼 𑀯𑀦𑀁 𑀢𑀤𑀸;

𑀨𑀮𑀫𑀦𑁆𑀯𑁂𑀲𑀫𑀸𑀦𑀸 𑀢𑁂, 𑀅𑀮𑀪𑀺𑀁𑀲𑀼 𑀨𑀮𑀁 𑀢𑀤𑀸.

𑁩𑁨. ‘‘𑀢𑀢𑁆𑀣𑀤𑁆𑀤𑀲𑀸𑀲𑀺𑀁 𑀲𑀫𑁆𑀩𑀼𑀤𑁆𑀥𑀁, 𑀲𑀬𑀫𑁆𑀪𑀼𑀁 𑀅𑀧𑀭𑀸𑀚𑀺𑀢𑀁;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀯𑀮𑁆𑀮𑀺𑀨𑀮𑀫𑀤𑀸𑀲𑀳𑀁.

𑁩𑁩. ‘‘𑀏𑀓𑀢𑁆𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀨𑀮𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀨𑀮𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁩𑁪. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁩𑁫. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁩𑁬. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀯𑀮𑁆𑀮𑀺𑀨𑀮𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀯𑀮𑁆𑀮𑀺𑀨𑀮𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀙𑀝𑁆𑀞𑀁.

𑁭. 𑀓𑀤𑀮𑀺𑀨𑀮𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁭. ‘‘𑀓𑀡𑀺𑀓𑀸𑀭𑀁𑀯 𑀚𑀮𑀺𑀢𑀁, 𑀧𑀼𑀡𑁆𑀡𑀫𑀸𑀬𑁂𑀯 [𑀧𑀼𑀡𑁆𑀡𑀫𑀸𑀲𑁂𑀯 (𑀲𑀻. 𑀓.)] 𑀘𑀦𑁆𑀤𑀺𑀫𑀁;

𑀚𑀮𑀦𑁆𑀢𑀁 𑀤𑀻𑀧𑀭𑀼𑀓𑁆𑀔𑀁𑀯, 𑀅𑀤𑁆𑀤𑀲𑀁 𑀮𑁄𑀓𑀦𑀸𑀬𑀓𑀁.

𑁩𑁮. ‘‘𑀓𑀤𑀮𑀺𑀨𑀮𑀁 𑀧𑀕𑁆𑀕𑀬𑁆𑀳, 𑀅𑀤𑀸𑀲𑀺𑀁 𑀲𑀢𑁆𑀣𑀼𑀦𑁄 𑀅𑀳𑀁;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀯𑀦𑁆𑀤𑀺𑀢𑁆𑀯𑀸𑀦 𑀅𑀧𑀓𑁆𑀓𑀫𑀺𑀁.

𑁩𑁯. ‘‘𑀏𑀓𑀢𑁆𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀨𑀮𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀨𑀮𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁪𑁦. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁪𑁧. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁪𑁨. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀓𑀤𑀮𑀺𑀨𑀮𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀓𑀤𑀮𑀺𑀨𑀮𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀲𑀢𑁆𑀢𑀫𑀁.

𑁮. 𑀧𑀦𑀲𑀨𑀮𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁪𑁩. ‘‘𑀅𑀚𑁆𑀚𑀼𑀦𑁄 𑀦𑀸𑀫 𑀲𑀫𑁆𑀩𑀼𑀤𑁆𑀥𑁄, 𑀳𑀺𑀫𑀯𑀦𑁆𑀢𑁂 𑀯𑀲𑀻 𑀢𑀤𑀸;

𑀘𑀭𑀡𑁂𑀦 𑀘 𑀲𑀫𑁆𑀧𑀦𑁆𑀦𑁄, 𑀲𑀫𑀸𑀥𑀺𑀓𑀼𑀲𑀮𑁄 𑀫𑀼𑀦𑀺.

𑁪𑁪. ‘‘𑀓𑀼𑀫𑁆𑀪𑀫𑀢𑁆𑀢𑀁 𑀕𑀳𑁂𑀢𑁆𑀯𑀸𑀦, 𑀧𑀦𑀲𑀁 𑀚𑀻𑀯𑀚𑀻𑀯𑀓𑀁 [𑀤𑁂𑀯𑀕𑀦𑁆𑀥𑀺𑀓𑀁 (𑁪𑁧 𑀯𑀕𑁆𑀕𑁂, 𑁫 𑀅𑀧𑀤𑀸𑀦𑁂)];

𑀙𑀢𑁆𑀢𑀧𑀡𑁆𑀡𑁂 𑀞𑀧𑁂𑀢𑁆𑀯𑀸𑀦, 𑀅𑀤𑀸𑀲𑀺𑀁 𑀲𑀢𑁆𑀣𑀼𑀦𑁄 𑀅𑀳𑀁.

𑁪𑁫. ‘‘𑀏𑀓𑀢𑁆𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀨𑀮𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀨𑀮𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁪𑁬. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁪𑁭. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁪𑁮. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀦𑀲𑀨𑀮𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀦𑀲𑀨𑀮𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀅𑀝𑁆𑀞𑀫𑀁.

𑁯. 𑀲𑁄𑀡𑀓𑁄𑀝𑀺𑀯𑀻𑀲𑀢𑁆𑀣𑁂𑀭𑀅𑀧𑀤𑀸𑀦𑀁

𑁪𑁯. ‘‘𑀯𑀺𑀧𑀲𑁆𑀲𑀺𑀦𑁄 𑀧𑀸𑀯𑀘𑀦𑁂, 𑀏𑀓𑀁 𑀮𑁂𑀡𑀁 𑀫𑀬𑀸 𑀓𑀢𑀁;

𑀘𑀸𑀢𑀼𑀤𑁆𑀤𑀺𑀲𑀲𑁆𑀲 𑀲𑀗𑁆𑀖𑀲𑁆𑀲, 𑀩𑀦𑁆𑀥𑀼𑀫𑀸𑀭𑀸𑀚𑀥𑀸𑀦𑀺𑀬𑀸.

𑁫𑁦. ‘‘𑀤𑀼𑀲𑁆𑀲𑁂𑀳𑀺 𑀪𑀽𑀫𑀺𑀁 𑀮𑁂𑀡𑀲𑁆𑀲, 𑀲𑀦𑁆𑀣𑀭𑀺𑀢𑁆𑀯𑀸 𑀧𑀭𑀺𑀘𑁆𑀘𑀚𑀺𑀁;

𑀉𑀤𑀕𑁆𑀕𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀅𑀓𑀸𑀲𑀺𑀁 𑀧𑀡𑀺𑀥𑀺𑀁 𑀢𑀤𑀸.

𑁫𑁧. ‘‘𑀆𑀭𑀸𑀥𑀬𑁂𑀬𑁆𑀬𑀁 𑀲𑀫𑁆𑀩𑀼𑀤𑁆𑀥𑀁, 𑀧𑀩𑁆𑀩𑀚𑁆𑀚𑀜𑁆𑀘 𑀮𑀪𑁂𑀬𑁆𑀬𑀳𑀁;

𑀅𑀦𑀼𑀢𑁆𑀢𑀭𑀜𑁆𑀘 𑀦𑀺𑀩𑁆𑀩𑀸𑀦𑀁, 𑀨𑀼𑀲𑁂𑀬𑁆𑀬𑀁 𑀲𑀦𑁆𑀢𑀺𑀫𑀼𑀢𑁆𑀢𑀫𑀁.

𑁫𑁨. ‘‘𑀢𑁂𑀦𑁂𑀯 𑀲𑀼𑀓𑁆𑀓𑀫𑀽𑀮𑁂𑀦, 𑀓𑀧𑁆𑀧𑁂 [𑀓𑀧𑁆𑀧𑀁 (𑀲𑀻.), 𑀓𑀧𑁆𑀧 (𑀓.)] 𑀦𑀯𑀼𑀢𑀺 𑀲𑀁𑀲𑀭𑀺𑀁;

𑀤𑁂𑀯𑀪𑀽𑀢𑁄 𑀫𑀦𑀼𑀲𑁆𑀲𑁄 𑀘, 𑀓𑀢𑀧𑀼𑀜𑁆𑀜𑁄 𑀯𑀺𑀭𑁄𑀘𑀳𑀁.

𑁫𑁩. ‘‘𑀢𑀢𑁄 𑀓𑀫𑁆𑀫𑀸𑀯𑀲𑁂𑀲𑁂𑀦, 𑀇𑀥 𑀧𑀘𑁆𑀙𑀺𑀫𑀓𑁂 𑀪𑀯𑁂;

𑀘𑀫𑁆𑀧𑀸𑀬𑀁 𑀅𑀕𑁆𑀕𑀲𑁂𑀝𑁆𑀞𑀺𑀲𑁆𑀲, 𑀚𑀸𑀢𑁄𑀫𑁆𑀳𑀺 𑀏𑀓𑀧𑀼𑀢𑁆𑀢𑀓𑁄.

𑁫𑁪. ‘‘𑀚𑀸𑀢𑀫𑀢𑁆𑀢𑀲𑁆𑀲 𑀫𑁂 𑀲𑀼𑀢𑁆𑀯𑀸, 𑀧𑀺𑀢𑀼 𑀙𑀦𑁆𑀤𑁄 𑀅𑀬𑀁 𑀅𑀳𑀼;

𑀤𑀤𑀸𑀫𑀳𑀁 𑀓𑀼𑀫𑀸𑀭𑀲𑁆𑀲, 𑀯𑀻𑀲𑀓𑁄𑀝𑀻 𑀅𑀦𑀽𑀦𑀓𑀸.

𑁫𑁫. ‘‘𑀘𑀢𑀼𑀭𑀗𑁆𑀕𑀼𑀮𑀸 𑀘 𑀫𑁂 𑀮𑁄𑀫𑀸, 𑀚𑀸𑀢𑀸 𑀧𑀸𑀤𑀢𑀮𑁂 𑀉𑀪𑁄;

𑀲𑀼𑀔𑀼𑀫𑀸 𑀫𑀼𑀤𑀼𑀲𑀫𑁆𑀨𑀲𑁆𑀲𑀸, 𑀢𑀽𑀮𑀸𑀧𑀺𑀘𑀼𑀲𑀫𑀸 𑀲𑀼𑀪𑀸.

𑁫𑁬. ‘‘𑀅𑀢𑀻𑀢𑀸 𑀦𑀯𑀼𑀢𑀺 𑀓𑀧𑁆𑀧𑀸, 𑀅𑀬𑀁 𑀏𑀓𑁄 𑀘 𑀉𑀢𑁆𑀢𑀭𑀺;

𑀦𑀸𑀪𑀺𑀚𑀸𑀦𑀸𑀫𑀺 𑀦𑀺𑀓𑁆𑀔𑀺𑀢𑁆𑀢𑁂, 𑀧𑀸𑀤𑁂 𑀪𑀽𑀫𑁆𑀬𑀸 𑀅𑀲𑀦𑁆𑀣𑀢𑁂.

𑁫𑁭. ‘‘𑀆𑀭𑀸𑀥𑀺𑀢𑁄 𑀫𑁂 𑀲𑀫𑁆𑀩𑀼𑀤𑁆𑀥𑁄, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁;

𑀅𑀭𑀳𑀢𑁆𑀢𑀜𑁆𑀘 𑀫𑁂 𑀧𑀢𑁆𑀢𑀁, 𑀲𑀻𑀢𑀺𑀪𑀽𑀢𑁄𑀫𑁆𑀳𑀺 𑀦𑀺𑀩𑁆𑀩𑀼𑀢𑁄.

𑁫𑁮. ‘‘𑀅𑀕𑁆𑀕𑁄 𑀆𑀭𑀤𑁆𑀥𑀯𑀻𑀭𑀺𑀬𑀸𑀦𑀁, 𑀦𑀺𑀤𑁆𑀤𑀺𑀝𑁆𑀞𑁄 𑀲𑀩𑁆𑀩𑀤𑀲𑁆𑀲𑀺𑀦𑀸;

𑀔𑀻𑀡𑀸𑀲𑀯𑁄𑀫𑁆𑀳𑀺 𑀅𑀭𑀳𑀸, 𑀙𑀴𑀪𑀺𑀜𑁆𑀜𑁄 𑀫𑀳𑀺𑀤𑁆𑀥𑀺𑀓𑁄.

𑁫𑁯. ‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀤𑀸𑀦𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀮𑁂𑀡𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁬𑁦. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁬𑁧. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁬𑁨. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑁬𑁩. ‘‘𑀣𑁂𑀭𑁄 𑀓𑁄𑀝𑀺𑀯𑀻𑀲𑁄 [𑀓𑁄𑀝𑀺𑀯𑀺𑀲𑁄 (𑀲𑁆𑀬𑀸. 𑀓.), 𑀓𑁄𑀴𑀺𑀯𑀺𑀲𑁄 (𑀅𑀜𑁆𑀜𑀝𑁆𑀞𑀸𑀦𑁂𑀲𑀼)] 𑀲𑁄𑀡𑁄, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀅𑀕𑁆𑀕𑀢𑁄;

𑀧𑀜𑁆𑀳𑀁 𑀧𑀼𑀝𑁆𑀞𑁄 𑀯𑀺𑀬𑀸𑀓𑀸𑀲𑀺, 𑀅𑀦𑁄𑀢𑀢𑁆𑀢𑁂 𑀫𑀳𑀸𑀲𑀭𑁂’’𑀢𑀺.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑁄𑀡𑁄 𑀓𑁄𑀝𑀺𑀯𑀻𑀲𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑁄𑀡𑀓𑁄𑀝𑀺𑀯𑀻𑀲𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀦𑀯𑀫𑀁.

𑁧𑁦. 𑀧𑀼𑀩𑁆𑀩𑀓𑀫𑁆𑀫𑀧𑀺𑀮𑁄𑀢𑀺𑀓𑀩𑀼𑀤𑁆𑀥𑀅𑀧𑀤𑀸𑀦𑀁

𑁬𑁪. ‘‘𑀅𑀦𑁄𑀢𑀢𑁆𑀢𑀲𑀭𑀸𑀲𑀦𑁆𑀦𑁂, 𑀭𑀫𑀡𑀻𑀬𑁂 𑀲𑀺𑀮𑀸𑀢𑀮𑁂;

𑀦𑀸𑀦𑀸𑀭𑀢𑀦𑀧𑀚𑁆𑀚𑁄𑀢𑁂, 𑀦𑀸𑀦𑀸𑀕𑀦𑁆𑀥𑀯𑀦𑀦𑁆𑀢𑀭𑁂.

𑁬𑁫. ‘‘𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦, 𑀧𑀭𑁂𑀢𑁄 [𑀉𑀧𑁂𑀢𑁄 (𑀉𑀤𑀸𑀦𑀝𑁆𑀞𑀓𑀣𑀸𑀬𑀁 𑁪 𑀯𑀕𑁆𑀕𑁂, 𑁮 𑀲𑀼𑀢𑁆𑀢𑁂)] 𑀮𑁄𑀓𑀦𑀸𑀬𑀓𑁄;

𑀆𑀲𑀻𑀦𑁄 𑀩𑁆𑀬𑀸𑀓𑀭𑀻 𑀢𑀢𑁆𑀣, 𑀧𑀼𑀩𑁆𑀩𑀓𑀫𑁆𑀫𑀸𑀦𑀺 𑀅𑀢𑁆𑀢𑀦𑁄.

𑁬𑁬. [𑀲𑀼𑀡𑀸𑀣 𑀪𑀺𑀓𑁆𑀔𑀯𑁂 𑀫𑀬𑁆𑀳𑀁, 𑀬𑀁 𑀓𑀫𑁆𑀫𑀁 𑀧𑀓𑀢𑀁 𑀫𑀬𑀸; 𑀏𑀓𑀁 𑀅𑀭𑀜𑁆𑀜𑀺𑀓𑀁 𑀪𑀺𑀓𑁆𑀔𑀼𑀁, 𑀤𑀺𑀲𑁆𑀯𑀸 𑀤𑀺𑀦𑁆𑀦𑀁 𑀧𑀺𑀮𑁄𑀢𑀺𑀓𑀁; 𑀧𑀢𑁆𑀣𑀺𑀢𑀁 𑀧𑀞𑀫𑀁 𑀩𑀼𑀤𑁆𑀥𑀁, 𑀩𑀼𑀤𑁆𑀥𑀢𑁆𑀢𑀸𑀬 𑀫𑀬𑀸 𑀢𑀤𑀸; 𑀧𑀺𑀮𑁄𑀢𑀺𑀬𑀲𑁆𑀲 𑀓𑀫𑁆𑀫𑀲𑁆𑀲, 𑀩𑀼𑀤𑁆𑀥𑀢𑁆𑀢𑁂𑀧𑀺 𑀯𑀺𑀧𑀘𑁆𑀘𑀢𑀺; 𑀕𑁄𑀧𑀸𑀮𑀓𑁄 𑀧𑀼𑀭𑁂 𑀆𑀲𑀺𑀁, 𑀕𑀸𑀯𑀺𑀁 𑀧𑀸𑀚𑁂𑀢𑀺 𑀕𑁄𑀘𑀭𑀁; 𑀧𑀺𑀯𑀦𑁆𑀢𑀺𑀁 𑀉𑀤𑀓𑀁 𑀆𑀯𑀺𑀮𑀁, 𑀕𑀸𑀯𑀺𑀁 𑀤𑀺𑀲𑁆𑀯𑀸 𑀦𑀺𑀯𑀸𑀭𑀬𑀺𑀁; 𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀇𑀥 𑀧𑀘𑁆𑀙𑀺𑀫𑀓𑁂 𑀪𑀯𑁂; 𑀯𑀺𑀧𑀸𑀲𑀺𑀢𑁄 𑀬𑀤𑀺𑀘𑁆𑀙𑀓𑀁, 𑀦 𑀳𑀺 𑀧𑀸𑀢𑀼𑀁 𑀮𑀪𑀸𑀫𑀳𑀁 (𑀲𑁆𑀬𑀸.)] ‘‘𑀲𑀼𑀡𑀸𑀣 𑀪𑀺𑀓𑁆𑀔𑀯𑁄 𑀫𑀬𑁆𑀳𑀁, 𑀬𑀁 𑀓𑀫𑁆𑀫𑀁 𑀧𑀓𑀢𑀁 𑀫𑀬𑀸;

𑀧𑀺𑀮𑁄𑀢𑀺𑀓𑀲𑁆𑀲 𑀓𑀫𑁆𑀫𑀲𑁆𑀲, 𑀩𑀼𑀤𑁆𑀥𑀢𑁆𑀢𑁂𑀧𑀺 𑀯𑀺𑀧𑀘𑁆𑀘𑀢𑀺 [𑀲𑀼𑀡𑀸𑀣 𑀪𑀺𑀓𑁆𑀔𑀯𑁂 𑀫𑀬𑁆𑀳𑀁, 𑀬𑀁 𑀓𑀫𑁆𑀫𑀁 𑀧𑀓𑀢𑀁 𑀫𑀬𑀸; 𑀏𑀓𑀁 𑀅𑀭𑀜𑁆𑀜𑀺𑀓𑀁 𑀪𑀺𑀓𑁆𑀔𑀼𑀁, 𑀤𑀺𑀲𑁆𑀯𑀸 𑀤𑀺𑀦𑁆𑀦𑀁 𑀧𑀺𑀮𑁄𑀢𑀺𑀓𑀁; 𑀧𑀢𑁆𑀣𑀺𑀢𑀁 𑀧𑀞𑀫𑀁 𑀩𑀼𑀤𑁆𑀥𑀁, 𑀩𑀼𑀤𑁆𑀥𑀢𑁆𑀢𑀸𑀬 𑀫𑀬𑀸 𑀢𑀤𑀸; 𑀧𑀺𑀮𑁄𑀢𑀺𑀬𑀲𑁆𑀲 𑀓𑀫𑁆𑀫𑀲𑁆𑀲, 𑀩𑀼𑀤𑁆𑀥𑀢𑁆𑀢𑁂𑀧𑀺 𑀯𑀺𑀧𑀘𑁆𑀘𑀢𑀺; 𑀕𑁄𑀧𑀸𑀮𑀓𑁄 𑀧𑀼𑀭𑁂 𑀆𑀲𑀺𑀁, 𑀕𑀸𑀯𑀺𑀁 𑀧𑀸𑀚𑁂𑀢𑀺 𑀕𑁄𑀘𑀭𑀁; 𑀧𑀺𑀯𑀦𑁆𑀢𑀺𑀁 𑀉𑀤𑀓𑀁 𑀆𑀯𑀺𑀮𑀁, 𑀕𑀸𑀯𑀺𑀁 𑀤𑀺𑀲𑁆𑀯𑀸 𑀦𑀺𑀯𑀸𑀭𑀬𑀺𑀁; 𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀇𑀥 𑀧𑀘𑁆𑀙𑀺𑀫𑀓𑁂 𑀪𑀯𑁂; 𑀯𑀺𑀧𑀸𑀲𑀺𑀢𑁄 𑀬𑀤𑀺𑀘𑁆𑀙𑀓𑀁, 𑀦 𑀳𑀺 𑀧𑀸𑀢𑀼𑀁 𑀮𑀪𑀸𑀫𑀳𑀁 (𑀲𑁆𑀬𑀸.)].

[𑁧]

𑁬𑁭. ‘‘𑀫𑀼𑀦𑀸𑀴𑀺 𑀦𑀸𑀫𑀳𑀁 𑀥𑀼𑀢𑁆𑀢𑁄, 𑀧𑀼𑀩𑁆𑀩𑁂 𑀅𑀜𑁆𑀜𑀸𑀲𑀼 𑀚𑀸𑀢𑀺𑀲𑀼 [𑀅𑀜𑁆𑀜𑀸𑀬 𑀚𑀸𑀢𑀺𑀬𑀸 (𑀉𑀤𑀸𑀦 𑀅𑀝𑁆𑀞.)];

𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀲𑀼𑀭𑀪𑀺𑀁 [𑀲𑀭𑀪𑀼𑀁 (𑀲𑀻.)], 𑀅𑀩𑁆𑀪𑀸𑀘𑀺𑀓𑁆𑀔𑀺𑀁 𑀅𑀤𑀽𑀲𑀓𑀁.

𑁬𑁮. ‘‘𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀦𑀺𑀭𑀬𑁂 𑀲𑀁𑀲𑀭𑀺𑀁 𑀘𑀺𑀭𑀁;

𑀩𑀳𑀽𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀤𑀼𑀓𑁆𑀔𑀁 𑀯𑁂𑀤𑁂𑀲𑀺 𑀯𑁂𑀤𑀦𑀁.

𑁬𑁯. ‘‘𑀢𑁂𑀦 𑀓𑀫𑁆𑀫𑀸𑀯𑀲𑁂𑀲𑁂𑀦, 𑀇𑀥 𑀧𑀘𑁆𑀙𑀺𑀫𑀓𑁂 𑀪𑀯𑁂;

𑀅𑀩𑁆𑀪𑀓𑁆𑀔𑀸𑀦𑀁 𑀫𑀬𑀸 𑀮𑀤𑁆𑀥𑀁, 𑀲𑀼𑀦𑁆𑀤𑀭𑀺𑀓𑀸𑀬 𑀓𑀸𑀭𑀡𑀸.

[𑁨]

𑁭𑁦. ‘‘𑀲𑀩𑁆𑀩𑀸𑀪𑀺𑀪𑀼𑀲𑁆𑀲 𑀩𑀼𑀤𑁆𑀥𑀲𑁆𑀲, 𑀦𑀦𑁆𑀤𑁄 𑀦𑀸𑀫𑀸𑀲𑀺 𑀲𑀸𑀯𑀓𑁄;

𑀢𑀁 𑀅𑀩𑁆𑀪𑀓𑁆𑀔𑀸𑀬 𑀦𑀺𑀭𑀬𑁂, 𑀘𑀺𑀭𑀁 𑀲𑀁𑀲𑀭𑀺𑀢𑀁 𑀫𑀬𑀸.

𑁭𑁧. ‘‘𑀤𑀲𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀦𑀺𑀭𑀬𑁂 𑀲𑀁𑀲𑀭𑀺𑀁 𑀘𑀺𑀭𑀁;

𑀫𑀦𑀼𑀲𑁆𑀲𑀪𑀸𑀯𑀁 𑀮𑀤𑁆𑀥𑀸𑀳𑀁, 𑀅𑀩𑁆𑀪𑀓𑁆𑀔𑀸𑀦𑀁 𑀩𑀳𑀼𑀁 𑀮𑀪𑀺𑀁.

𑁭𑁨. ‘‘𑀢𑁂𑀦 𑀓𑀫𑁆𑀫𑀸𑀯𑀲𑁂𑀲𑁂𑀦, 𑀘𑀺𑀜𑁆𑀘𑀫𑀸𑀦𑀯𑀺𑀓𑀸 𑀫𑀫𑀁;