𑁧. 𑀩𑁄𑀥𑀺𑀯𑀦𑁆𑀤𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧. ‘‘𑀧𑀸𑀝𑀮𑀺𑀁 𑀳𑀭𑀺𑀢𑀁 𑀤𑀺𑀲𑁆𑀯𑀸, 𑀧𑀸𑀤𑀧𑀁 𑀥𑀭𑀡𑀻𑀭𑀼𑀳𑀁;

𑀏𑀓𑀁𑀲𑀁 𑀅𑀜𑁆𑀚𑀮𑀺𑀁 𑀓𑀢𑁆𑀯𑀸, 𑀅𑀯𑀦𑁆𑀤𑀺𑀁 𑀧𑀸𑀝𑀮𑀺𑀁 𑀅𑀳𑀁.

𑁨. ‘‘𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸𑀦, 𑀕𑀭𑀼𑀁 𑀓𑀢𑁆𑀯𑀸𑀦 𑀫𑀸𑀦𑀲𑀁;

𑀅𑀦𑁆𑀢𑁄𑀲𑀼𑀤𑁆𑀥𑀁 𑀩𑀳𑀺𑀲𑀼𑀤𑁆𑀥𑀁, 𑀲𑀼𑀯𑀺𑀫𑀼𑀢𑁆𑀢𑀫𑀦𑀸𑀲𑀯𑀁.

𑁩. ‘‘𑀯𑀺𑀧𑀲𑁆𑀲𑀺𑀁 𑀮𑁄𑀓𑀫𑀳𑀺𑀢𑀁, 𑀓𑀭𑀼𑀡𑀸𑀜𑀸𑀡𑀲𑀸𑀕𑀭𑀁;

𑀲𑀫𑁆𑀫𑀼𑀔𑀸 𑀯𑀺𑀬 𑀲𑀫𑁆𑀩𑀼𑀤𑁆𑀥𑀁, 𑀅𑀯𑀦𑁆𑀤𑀺𑀁 𑀧𑀸𑀝𑀮𑀺𑀁 𑀅𑀳𑀁.

𑁪. ‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀩𑁄𑀥𑀺𑀫𑀪𑀺𑀯𑀦𑁆𑀤𑀳𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀯𑀦𑁆𑀤𑀦𑀸𑀬 𑀇𑀤𑀁 𑀨𑀮𑀁.

𑁫. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀩𑁄𑀥𑀺𑀯𑀦𑁆𑀤𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀩𑁄𑀥𑀺𑀯𑀦𑁆𑀤𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀞𑀫𑀁.