𑁨. 𑀧𑀸𑀝𑀮𑀺𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁬. ‘‘𑀯𑀺𑀧𑀲𑁆𑀲𑀻 𑀦𑀸𑀫 𑀪𑀕𑀯𑀸, 𑀲𑀬𑀫𑁆𑀪𑀽 𑀅𑀕𑁆𑀕𑀧𑀼𑀕𑁆𑀕𑀮𑁄;

𑀧𑀼𑀭𑀓𑁆𑀔𑀢𑁄 𑀲𑀲𑀺𑀲𑁆𑀲𑁂𑀳𑀺, 𑀧𑀸𑀯𑀺𑀲𑀺 𑀩𑀦𑁆𑀥𑀼𑀫𑀁 𑀚𑀺𑀦𑁄.

𑁭. ‘‘𑀢𑀻𑀡𑀺 𑀧𑀸𑀝𑀮𑀺𑀧𑀼𑀧𑁆𑀨𑀸𑀦𑀺, 𑀉𑀘𑁆𑀙𑀗𑁆𑀕𑁂 𑀞𑀧𑀺𑀢𑀸𑀦𑀺 𑀫𑁂;

𑀲𑀻𑀲𑀁 𑀦𑁆𑀳𑀸𑀬𑀺𑀢𑀼𑀓𑀸𑀫𑁄𑀯, 𑀦𑀤𑀻𑀢𑀺𑀢𑁆𑀣𑀁 𑀅𑀕𑀘𑁆𑀙𑀳𑀁.

𑁮. ‘‘𑀦𑀺𑀓𑁆𑀔𑀫𑁆𑀫 𑀩𑀦𑁆𑀥𑀼𑀫𑀢𑀺𑀬𑀸, 𑀅𑀤𑁆𑀤𑀲𑀁 𑀮𑁄𑀓𑀦𑀸𑀬𑀓𑀁;

𑀇𑀦𑁆𑀤𑀻𑀯𑀭𑀁𑀯 𑀚𑀮𑀺𑀢𑀁, 𑀆𑀤𑀺𑀢𑁆𑀢𑀁𑀯 𑀳𑀼𑀢𑀸𑀲𑀦𑀁.

𑁯. ‘‘𑀩𑁆𑀬𑀕𑁆𑀖𑀽𑀲𑀪𑀁𑀯 𑀧𑀯𑀭𑀁, 𑀅𑀪𑀺𑀚𑀸𑀢𑀁𑀯 𑀓𑁂𑀲𑀭𑀺𑀁;

𑀕𑀘𑁆𑀙𑀦𑁆𑀢𑀁 𑀲𑀫𑀡𑀸𑀦𑀕𑁆𑀕𑀁, 𑀪𑀺𑀓𑁆𑀔𑀼𑀲𑀗𑁆𑀖𑀧𑀼𑀭𑀓𑁆𑀔𑀢𑀁.

𑁧𑁦. ‘‘𑀢𑀲𑁆𑀫𑀺𑀁 𑀧𑀲𑀦𑁆𑀦𑁄 [𑀲𑀫𑀡𑁂 (𑀓.)] 𑀲𑀼𑀕𑀢𑁂, 𑀓𑀺𑀮𑁂𑀲𑀫𑀮𑀥𑁄𑀯𑀦𑁂;

𑀕𑀳𑁂𑀢𑁆𑀯𑀸 𑀢𑀻𑀡𑀺 𑀧𑀼𑀧𑁆𑀨𑀸𑀦𑀺, 𑀩𑀼𑀤𑁆𑀥𑀲𑁂𑀝𑁆𑀞𑀁 𑀅𑀧𑀽𑀚𑀬𑀺𑀁.

𑁧𑁧. ‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀧𑀽𑀚𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁧𑁨. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀸𑀝𑀮𑀺𑀧𑀼𑀧𑁆𑀨𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀸𑀝𑀮𑀺𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀼𑀢𑀺𑀬𑀁.