𑁩𑁮. 𑀩𑁄𑀥𑀺𑀯𑀦𑁆𑀤𑀦𑀯𑀕𑁆𑀕𑁄

𑁧. 𑀩𑁄𑀥𑀺𑀯𑀦𑁆𑀤𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧. ‘‘𑀧𑀸𑀝𑀮𑀺𑀁 𑀳𑀭𑀺𑀢𑀁 𑀤𑀺𑀲𑁆𑀯𑀸, 𑀧𑀸𑀤𑀧𑀁 𑀥𑀭𑀡𑀻𑀭𑀼𑀳𑀁;

𑀏𑀓𑀁𑀲𑀁 𑀅𑀜𑁆𑀚𑀮𑀺𑀁 𑀓𑀢𑁆𑀯𑀸, 𑀅𑀯𑀦𑁆𑀤𑀺𑀁 𑀧𑀸𑀝𑀮𑀺𑀁 𑀅𑀳𑀁.

𑁨. ‘‘𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸𑀦, 𑀕𑀭𑀼𑀁 𑀓𑀢𑁆𑀯𑀸𑀦 𑀫𑀸𑀦𑀲𑀁;

𑀅𑀦𑁆𑀢𑁄𑀲𑀼𑀤𑁆𑀥𑀁 𑀩𑀳𑀺𑀲𑀼𑀤𑁆𑀥𑀁, 𑀲𑀼𑀯𑀺𑀫𑀼𑀢𑁆𑀢𑀫𑀦𑀸𑀲𑀯𑀁.

𑁩. ‘‘𑀯𑀺𑀧𑀲𑁆𑀲𑀺𑀁 𑀮𑁄𑀓𑀫𑀳𑀺𑀢𑀁, 𑀓𑀭𑀼𑀡𑀸𑀜𑀸𑀡𑀲𑀸𑀕𑀭𑀁;

𑀲𑀫𑁆𑀫𑀼𑀔𑀸 𑀯𑀺𑀬 𑀲𑀫𑁆𑀩𑀼𑀤𑁆𑀥𑀁, 𑀅𑀯𑀦𑁆𑀤𑀺𑀁 𑀧𑀸𑀝𑀮𑀺𑀁 𑀅𑀳𑀁.

𑁪. ‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀩𑁄𑀥𑀺𑀫𑀪𑀺𑀯𑀦𑁆𑀤𑀳𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀯𑀦𑁆𑀤𑀦𑀸𑀬 𑀇𑀤𑀁 𑀨𑀮𑀁.

𑁫. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀩𑁄𑀥𑀺𑀯𑀦𑁆𑀤𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀩𑁄𑀥𑀺𑀯𑀦𑁆𑀤𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀞𑀫𑀁.

𑁨. 𑀧𑀸𑀝𑀮𑀺𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁬. ‘‘𑀯𑀺𑀧𑀲𑁆𑀲𑀻 𑀦𑀸𑀫 𑀪𑀕𑀯𑀸, 𑀲𑀬𑀫𑁆𑀪𑀽 𑀅𑀕𑁆𑀕𑀧𑀼𑀕𑁆𑀕𑀮𑁄;

𑀧𑀼𑀭𑀓𑁆𑀔𑀢𑁄 𑀲𑀲𑀺𑀲𑁆𑀲𑁂𑀳𑀺, 𑀧𑀸𑀯𑀺𑀲𑀺 𑀩𑀦𑁆𑀥𑀼𑀫𑀁 𑀚𑀺𑀦𑁄.

𑁭. ‘‘𑀢𑀻𑀡𑀺 𑀧𑀸𑀝𑀮𑀺𑀧𑀼𑀧𑁆𑀨𑀸𑀦𑀺, 𑀉𑀘𑁆𑀙𑀗𑁆𑀕𑁂 𑀞𑀧𑀺𑀢𑀸𑀦𑀺 𑀫𑁂;

𑀲𑀻𑀲𑀁 𑀦𑁆𑀳𑀸𑀬𑀺𑀢𑀼𑀓𑀸𑀫𑁄𑀯, 𑀦𑀤𑀻𑀢𑀺𑀢𑁆𑀣𑀁 𑀅𑀕𑀘𑁆𑀙𑀳𑀁.

𑁮. ‘‘𑀦𑀺𑀓𑁆𑀔𑀫𑁆𑀫 𑀩𑀦𑁆𑀥𑀼𑀫𑀢𑀺𑀬𑀸, 𑀅𑀤𑁆𑀤𑀲𑀁 𑀮𑁄𑀓𑀦𑀸𑀬𑀓𑀁;

𑀇𑀦𑁆𑀤𑀻𑀯𑀭𑀁𑀯 𑀚𑀮𑀺𑀢𑀁, 𑀆𑀤𑀺𑀢𑁆𑀢𑀁𑀯 𑀳𑀼𑀢𑀸𑀲𑀦𑀁.

𑁯. ‘‘𑀩𑁆𑀬𑀕𑁆𑀖𑀽𑀲𑀪𑀁𑀯 𑀧𑀯𑀭𑀁, 𑀅𑀪𑀺𑀚𑀸𑀢𑀁𑀯 𑀓𑁂𑀲𑀭𑀺𑀁;

𑀕𑀘𑁆𑀙𑀦𑁆𑀢𑀁 𑀲𑀫𑀡𑀸𑀦𑀕𑁆𑀕𑀁, 𑀪𑀺𑀓𑁆𑀔𑀼𑀲𑀗𑁆𑀖𑀧𑀼𑀭𑀓𑁆𑀔𑀢𑀁.

𑁧𑁦. ‘‘𑀢𑀲𑁆𑀫𑀺𑀁 𑀧𑀲𑀦𑁆𑀦𑁄 [𑀲𑀫𑀡𑁂 (𑀓.)] 𑀲𑀼𑀕𑀢𑁂, 𑀓𑀺𑀮𑁂𑀲𑀫𑀮𑀥𑁄𑀯𑀦𑁂;

𑀕𑀳𑁂𑀢𑁆𑀯𑀸 𑀢𑀻𑀡𑀺 𑀧𑀼𑀧𑁆𑀨𑀸𑀦𑀺, 𑀩𑀼𑀤𑁆𑀥𑀲𑁂𑀝𑁆𑀞𑀁 𑀅𑀧𑀽𑀚𑀬𑀺𑀁.

𑁧𑁧. ‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀧𑀽𑀚𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁧𑁨. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀸𑀝𑀮𑀺𑀧𑀼𑀧𑁆𑀨𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀸𑀝𑀮𑀺𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀼𑀢𑀺𑀬𑀁.

𑁩. 𑀢𑀻𑀡𑀼𑀧𑁆𑀧𑀮𑀫𑀸𑀮𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁩. ‘‘𑀘𑀦𑁆𑀤𑀪𑀸𑀕𑀸𑀦𑀤𑀻𑀢𑀻𑀭𑁂, 𑀅𑀳𑁄𑀲𑀺𑀁 𑀯𑀸𑀦𑀭𑁄 𑀢𑀤𑀸;

𑀅𑀤𑁆𑀤𑀲𑀁 𑀯𑀺𑀭𑀚𑀁 𑀩𑀼𑀤𑁆𑀥𑀁, 𑀦𑀺𑀲𑀺𑀦𑁆𑀦𑀁 𑀧𑀩𑁆𑀩𑀢𑀦𑁆𑀢𑀭𑁂.

𑁧𑁪. ‘‘𑀑𑀪𑀸𑀲𑁂𑀦𑁆𑀢𑀁 𑀤𑀺𑀲𑀸 𑀲𑀩𑁆𑀩𑀸, 𑀲𑀸𑀮𑀭𑀸𑀚𑀁𑀯 𑀨𑀼𑀮𑁆𑀮𑀺𑀢𑀁;

𑀮𑀓𑁆𑀔𑀡𑀩𑁆𑀬𑀜𑁆𑀚𑀦𑀽𑀧𑁂𑀢𑀁, 𑀤𑀺𑀲𑁆𑀯𑀸𑀦𑀢𑁆𑀢𑀫𑀦𑁄 𑀅𑀳𑀁.

𑁧𑁫. ‘‘𑀉𑀤𑀕𑁆𑀕𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀧𑀻𑀢𑀺𑀬𑀸 𑀳𑀝𑁆𑀞𑀫𑀸𑀦𑀲𑁄;

𑀢𑀻𑀡𑀺 𑀉𑀧𑁆𑀧𑀮𑀧𑀼𑀧𑁆𑀨𑀸𑀦𑀺, 𑀫𑀢𑁆𑀣𑀓𑁂 𑀅𑀪𑀺𑀭𑁄𑀧𑀬𑀺𑀁.

𑁧𑁬. ‘‘𑀧𑀽𑀚𑀬𑀺𑀢𑁆𑀯𑀸𑀦 𑀧𑀼𑀧𑁆𑀨𑀸𑀦𑀺, 𑀨𑀼𑀲𑁆𑀲𑀲𑁆𑀲𑀸𑀳𑀁 𑀫𑀳𑁂𑀲𑀺𑀦𑁄;

𑀲𑀕𑀸𑀭𑀯𑁄 𑀪𑀯𑀺𑀢𑁆𑀯𑀸𑀦, 𑀧𑀓𑁆𑀓𑀸𑀫𑀺𑀁 𑀉𑀢𑁆𑀢𑀭𑀸𑀫𑀼𑀔𑁄.

𑁧𑁭. ‘‘𑀕𑀘𑁆𑀙𑀦𑁆𑀢𑁄 𑀧𑀝𑀺𑀓𑀼𑀝𑀺𑀓𑁄, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸;

𑀲𑁂𑀮𑀦𑁆𑀢𑀭𑁂 𑀧𑀢𑀺𑀢𑁆𑀯𑀸𑀦, 𑀧𑀸𑀧𑀼𑀡𑀺𑀁 𑀚𑀻𑀯𑀺𑀢𑀓𑁆𑀔𑀬𑀁.

𑁧𑁮. ‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀧𑀼𑀭𑀺𑀫𑀁 𑀚𑀸𑀢𑀺𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

𑁧𑁯. ‘‘𑀲𑀢𑀸𑀦𑀁 𑀢𑀻𑀡𑀺𑀓𑁆𑀔𑀢𑁆𑀢𑀼𑀜𑁆𑀘, 𑀤𑁂𑀯𑀭𑀚𑁆𑀚𑀫𑀓𑀸𑀭𑀬𑀺𑀁;

𑀲𑀢𑀸𑀦𑀁 𑀧𑀜𑁆𑀘𑀓𑁆𑀔𑀢𑁆𑀢𑀼𑀜𑁆𑀘, 𑀘𑀓𑁆𑀓𑀯𑀢𑁆𑀢𑀻 𑀅𑀳𑁄𑀲𑀳𑀁.

𑁨𑁦. ‘‘𑀤𑁆𑀯𑁂𑀦𑀯𑀼𑀢𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀧𑀽𑀚𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁨𑁧. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀢𑀻𑀡𑀼𑀧𑁆𑀧𑀮𑀫𑀸𑀮𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀢𑀻𑀡𑀼𑀧𑁆𑀧𑀮𑀫𑀸𑀮𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀢𑀢𑀺𑀬𑀁.

𑁪. 𑀧𑀝𑁆𑀝𑀺𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁨. ‘‘𑀬𑀤𑀸 𑀦𑀺𑀩𑁆𑀩𑀸𑀬𑀺 𑀲𑀫𑁆𑀩𑀼𑀤𑁆𑀥𑁄, 𑀫𑀳𑁂𑀲𑀻 𑀧𑀤𑀼𑀫𑀼𑀢𑁆𑀢𑀭𑁄;

𑀲𑀫𑀸𑀕𑀫𑁆𑀫 𑀚𑀦𑀸 𑀲𑀩𑁆𑀩𑁂, 𑀲𑀭𑀻𑀭𑀁 𑀦𑀻𑀳𑀭𑀦𑁆𑀢𑀺 𑀢𑁂.

𑁨𑁩. ‘‘𑀦𑀻𑀳𑀭𑀦𑁆𑀢𑁂 𑀲𑀭𑀻𑀭𑀫𑁆𑀳𑀺, 𑀯𑀚𑁆𑀚𑀫𑀸𑀦𑀸𑀲𑀼 𑀪𑁂𑀭𑀺𑀲𑀼;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀧𑀝𑁆𑀝𑀺𑀧𑀼𑀧𑁆𑀨𑀁 𑀅𑀧𑀽𑀚𑀬𑀺𑀁.

𑁨𑁪. ‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀧𑀽𑀚𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀲𑀭𑀻𑀭𑀧𑀽𑀚𑀺𑀢𑁂 𑀨𑀮𑀁.

𑁨𑁫. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸;

𑀦𑀸𑀕𑁄𑀯 𑀩𑀦𑁆𑀥𑀦𑀁 𑀙𑁂𑀢𑁆𑀯𑀸, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁨𑁬. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺, 𑀫𑀫 𑀩𑀼𑀤𑁆𑀥𑀲𑁆𑀲 [𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 (𑀲𑀻.)] 𑀲𑀦𑁆𑀢𑀺𑀓𑁂;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁨𑁭. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀝𑁆𑀝𑀺𑀧𑀼𑀧𑁆𑀨𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀝𑁆𑀝𑀺𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀘𑀢𑀼𑀢𑁆𑀣𑀁.

𑁫. 𑀲𑀢𑁆𑀢𑀧𑀡𑁆𑀡𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁮. ‘‘𑀲𑀼𑀫𑀦𑁄 𑀦𑀸𑀫 𑀲𑀫𑁆𑀩𑀼𑀤𑁆𑀥𑁄, 𑀉𑀧𑁆𑀧𑀚𑁆𑀚𑀺 𑀮𑁄𑀓𑀦𑀸𑀬𑀓𑁄;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀲𑀢𑁆𑀢𑀧𑀡𑁆𑀡𑀺𑀫𑀧𑀽𑀚𑀬𑀺𑀁.

𑁨𑁯. ‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀲𑀢𑁆𑀢𑀧𑀡𑁆𑀡𑀺𑀫𑀧𑀽𑀚𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀲𑀢𑁆𑀢𑀧𑀡𑁆𑀡𑀺𑀧𑀽𑀚𑀸𑀬𑀺𑀤𑀁 [𑀲𑀢𑁆𑀢𑀧𑀡𑁆𑀡𑀺𑀲𑁆𑀲𑀺𑀤𑀁 (𑀲𑀻.)] 𑀨𑀮𑀁.

𑁩𑁦. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁩𑁧. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁩𑁨. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀢𑁆𑀢𑀧𑀡𑁆𑀡𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀢𑁆𑀢𑀧𑀡𑁆𑀡𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀜𑁆𑀘𑀫𑀁.

𑁬. 𑀕𑀦𑁆𑀥𑀫𑀼𑀝𑁆𑀞𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁩. [𑀇𑀥 𑀕𑀸𑀣𑀸𑀤𑁆𑀥𑀁 𑀊𑀦𑀁 𑀯𑀺𑀬 𑀤𑀺𑀲𑁆𑀲𑀢𑀺] ‘‘𑀘𑀺𑀢𑀓𑁂 𑀓𑀭𑀻𑀬𑀫𑀸𑀦𑁂, 𑀦𑀸𑀦𑀸𑀕𑀦𑁆𑀥𑁂 𑀲𑀫𑀸𑀳𑀢𑁂;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀕𑀦𑁆𑀥𑀫𑀼𑀝𑁆𑀞𑀺𑀫𑀧𑀽𑀚𑀬𑀺𑀁.

𑁩𑁪. ‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀘𑀺𑀢𑀓𑀁 𑀬𑀁 𑀅𑀧𑀽𑀚𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀘𑀺𑀢𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁩𑁫. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁩𑁬. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁩𑁭. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀕𑀦𑁆𑀥𑀫𑀼𑀝𑁆𑀞𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀕𑀦𑁆𑀥𑀫𑀼𑀝𑁆𑀞𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀙𑀝𑁆𑀞𑀁.

𑁭. 𑀘𑀺𑀢𑀓𑀧𑀽𑀚𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁮. ‘‘𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺, 𑀚𑀮𑀚𑀼𑀢𑁆𑀢𑀫𑀦𑀸𑀫𑀓𑁂;

𑀆𑀭𑁄𑀧𑀺𑀢𑀫𑁆𑀳𑀺 𑀘𑀺𑀢𑀓𑁂, 𑀲𑀸𑀮𑀧𑀼𑀧𑁆𑀨𑀫𑀧𑀽𑀚𑀬𑀺𑀁.

𑁩𑁯. ‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀧𑀽𑀚𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀘𑀺𑀢𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁪𑁦. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁪𑁧. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁪𑁨. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀘𑀺𑀢𑀓𑀧𑀽𑀚𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀘𑀺𑀢𑀓𑀧𑀽𑀚𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀲𑀢𑁆𑀢𑀫𑀁.

𑁮. 𑀲𑀼𑀫𑀦𑀢𑀸𑀮𑀯𑀡𑁆𑀝𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁪𑁩. ‘‘𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄, 𑀢𑀸𑀮𑀯𑀡𑁆𑀝𑀫𑀤𑀸𑀲𑀳𑀁;

𑀲𑀼𑀫𑀦𑁂𑀳𑀺 𑀧𑀝𑀺𑀘𑁆𑀙𑀦𑁆𑀦𑀁, 𑀥𑀸𑀭𑀬𑀸𑀫𑀺 𑀫𑀳𑀸𑀭𑀳𑀁.

𑁪𑁪. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀢𑀸𑀮𑀯𑀡𑁆𑀝𑀫𑀤𑀸𑀲𑀳𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀢𑀸𑀮𑀯𑀡𑁆𑀝𑀲𑁆𑀲𑀺𑀤𑀁 𑀨𑀮𑀁.

𑁪𑁫. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁪𑁬. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁪𑁭. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀼𑀫𑀦𑀢𑀸𑀮𑀯𑀡𑁆𑀝𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀼𑀫𑀦𑀢𑀸𑀮𑀯𑀡𑁆𑀝𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀅𑀝𑁆𑀞𑀫𑀁.

𑁯. 𑀲𑀼𑀫𑀦𑀤𑀸𑀫𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁪𑁮. ‘‘𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄, 𑀦𑁆𑀳𑀸𑀢𑀓𑀲𑁆𑀲 𑀢𑀧𑀲𑁆𑀲𑀺𑀦𑁄;

𑀓𑀢𑁆𑀯𑀸𑀦 𑀲𑀼𑀫𑀦𑀤𑀸𑀫𑀁, 𑀥𑀸𑀭𑀬𑀺𑀁 𑀧𑀼𑀭𑀢𑁄 𑀞𑀺𑀢𑁄.

𑁪𑁯. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀤𑀸𑀫𑀁 𑀥𑀸𑀭𑀬𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀲𑀼𑀫𑀦𑀥𑀸𑀭𑀡𑁂 𑀨𑀮𑀁.

𑁫𑁦. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁫𑁧. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁫𑁨. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀼𑀫𑀦𑀤𑀸𑀫𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀼𑀫𑀦𑀤𑀸𑀫𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀦𑀯𑀫𑀁.

𑁧𑁦. 𑀓𑀸𑀲𑀼𑀫𑀸𑀭𑀺𑀨𑀮𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁫𑁩. ‘‘𑀓𑀡𑀺𑀓𑀸𑀭𑀁𑀯 𑀚𑁄𑀢𑀦𑁆𑀢𑀁, 𑀦𑀺𑀲𑀺𑀦𑁆𑀦𑀁 𑀧𑀩𑁆𑀩𑀢𑀦𑁆𑀢𑀭𑁂;

𑀅𑀤𑁆𑀤𑀲𑀁 𑀯𑀺𑀭𑀚𑀁 𑀩𑀼𑀤𑁆𑀥𑀁, 𑀮𑁄𑀓𑀚𑁂𑀝𑁆𑀞𑀁 𑀦𑀭𑀸𑀲𑀪𑀁.

𑁫𑁪. ‘‘𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀲𑀺𑀭𑁂 𑀓𑀢𑁆𑀯𑀸𑀦 𑀅𑀜𑁆𑀚𑀮𑀺𑀁;

𑀓𑀸𑀲𑀼𑀫𑀸𑀭𑀺𑀨𑀮𑀁 𑀕𑀬𑁆𑀳, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲𑀤𑀸𑀲𑀳𑀁.

𑁫𑁫. ‘‘𑀏𑀓𑀢𑁆𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀨𑀮𑀫𑀤𑀤𑀺𑀁 𑀅𑀳𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀨𑀮𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁫𑁬. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁫𑁭. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁫𑁮. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀓𑀸𑀲𑀼𑀫𑀸𑀭𑀺𑀨𑀮𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀓𑀸𑀲𑀼𑀫𑀸𑀭𑀺𑀨𑀮𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀲𑀫𑀁.

𑀩𑁄𑀥𑀺𑀯𑀦𑁆𑀤𑀦𑀯𑀕𑁆𑀕𑁄 𑀅𑀝𑁆𑀞𑀢𑀺𑀁𑀲𑀢𑀺𑀫𑁄.