𑁯. 𑀥𑀫𑁆𑀫𑀲𑀯𑀦𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁧𑁧. ‘‘𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄, 𑀲𑀩𑁆𑀩𑀥𑀫𑁆𑀫𑀸𑀦 𑀧𑀸𑀭𑀕𑀽;

𑀘𑀢𑀼𑀲𑀘𑁆𑀘𑀁 𑀧𑀓𑀸𑀲𑁂𑀦𑁆𑀢𑁄, 𑀲𑀦𑁆𑀢𑀸𑀭𑁂𑀲𑀺 𑀩𑀳𑀼𑀁 𑀚𑀦𑀁.

𑁧𑁧𑁨. ‘‘𑀅𑀳𑀁 𑀢𑁂𑀦 𑀲𑀫𑀬𑁂𑀦, 𑀚𑀝𑀺𑀮𑁄 𑀉𑀕𑁆𑀕𑀢𑀸𑀧𑀦𑁄;

𑀥𑀼𑀦𑀦𑁆𑀢𑁄 𑀯𑀸𑀓𑀘𑀻𑀭𑀸𑀦𑀺, 𑀕𑀘𑁆𑀙𑀸𑀫𑀺 𑀅𑀫𑁆𑀩𑀭𑁂 𑀢𑀤𑀸.

𑁧𑁧𑁩. ‘‘𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 𑀉𑀧𑀭𑀺, 𑀕𑀦𑁆𑀢𑀼𑀁 𑀦 𑀯𑀺𑀲𑀳𑀸𑀫𑀳𑀁;

𑀧𑀓𑁆𑀔𑀻𑀯 𑀲𑁂𑀮𑀫𑀸𑀲𑀚𑁆𑀚 [𑀲𑁂𑀮𑀫𑀸𑀧𑀚𑁆𑀚 (𑀲𑁆𑀬𑀸.)], 𑀕𑀫𑀦𑀁 𑀦 𑀮𑀪𑀸𑀫𑀳𑀁.

𑁧𑁧𑁪. ‘‘𑀦 𑀫𑁂 𑀇𑀤𑀁 𑀪𑀽𑀢𑀧𑀼𑀩𑁆𑀩𑀁, 𑀇𑀭𑀺𑀬𑀲𑁆𑀲 𑀯𑀺𑀓𑁄𑀧𑀦𑀁;

𑀤𑀓𑁂 𑀬𑀣𑀸 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸, 𑀏𑀯𑀁 𑀕𑀘𑁆𑀙𑀸𑀫𑀺 𑀅𑀫𑁆𑀩𑀭𑁂.

𑁧𑁧𑁫. ‘‘𑀉𑀴𑀸𑀭𑀪𑀽𑀢𑁄 𑀫𑀦𑀼𑀚𑁄, 𑀳𑁂𑀝𑁆𑀞𑀸𑀲𑀻𑀦𑁄 [𑀳𑁂𑀝𑁆𑀞𑀸𑀧𑀺 𑀦𑁄 (𑀓.)] 𑀪𑀯𑀺𑀲𑁆𑀲𑀢𑀺;

𑀳𑀦𑁆𑀤 𑀫𑁂𑀦𑀁 𑀕𑀯𑁂𑀲𑀺𑀲𑁆𑀲𑀁, 𑀅𑀧𑀺 𑀅𑀢𑁆𑀣𑀁 𑀮𑀪𑁂𑀬𑁆𑀬𑀳𑀁.

𑁧𑁧𑁬. ‘‘𑀑𑀭𑁄𑀳𑀦𑁆𑀢𑁄 𑀅𑀦𑁆𑀢𑀮𑀺𑀓𑁆𑀔𑀸, 𑀲𑀤𑁆𑀤𑀫𑀲𑁆𑀲𑁄𑀲𑀺 𑀲𑀢𑁆𑀣𑀼𑀦𑁄;

𑀅𑀦𑀺𑀘𑁆𑀘𑀢𑀁 𑀓𑀣𑁂𑀦𑁆𑀢𑀲𑁆𑀲, 𑀢𑀫𑀳𑀁 𑀉𑀕𑁆𑀕𑀳𑀺𑀁 𑀢𑀤𑀸.

𑁧𑁧𑁭. ‘‘𑀅𑀦𑀺𑀘𑁆𑀘𑀲𑀜𑁆𑀜𑀫𑀼𑀕𑁆𑀕𑀬𑁆𑀳, 𑀅𑀕𑀫𑀸𑀲𑀺𑀁 𑀫𑀫𑀲𑁆𑀲𑀫𑀁;

𑀬𑀸𑀯𑀢𑀸𑀬𑀼𑀁 𑀯𑀲𑀺𑀢𑁆𑀯𑀸𑀦, 𑀢𑀢𑁆𑀣 𑀓𑀸𑀮𑀗𑁆𑀓𑀢𑁄 𑀅𑀳𑀁.

𑁧𑁧𑁮. ‘‘𑀘𑀭𑀺𑀫𑁂 𑀯𑀢𑁆𑀢𑀫𑀸𑀦𑀫𑁆𑀳𑀺, 𑀢𑀁 𑀥𑀫𑁆𑀫𑀲𑀯𑀦𑀁 [𑀥𑀫𑁆𑀫𑀲𑀯𑀡𑀁 (𑀲𑀻.)] 𑀲𑀭𑀺𑀁;

𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

𑁧𑁧𑁯. ‘‘𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑀸𑀦𑀺, 𑀤𑁂𑀯𑀮𑁄𑀓𑁂 𑀭𑀫𑀺𑀁 𑀅𑀳𑀁;

𑀏𑀓𑀧𑀜𑁆𑀜𑀸𑀲𑀓𑁆𑀔𑀢𑁆𑀢𑀼𑀜𑁆𑀘, 𑀤𑁂𑀯𑀭𑀚𑁆𑀚𑀫𑀓𑀸𑀭𑀬𑀺𑀁.

𑁧𑁨𑁦. ‘‘𑀏𑀓𑀲𑀢𑁆𑀢𑀢𑀺𑀓𑁆𑀔𑀢𑁆𑀢𑀼𑀜𑁆𑀘, 𑀘𑀓𑁆𑀓𑀯𑀢𑁆𑀢𑀻 𑀅𑀳𑁄𑀲𑀳𑀁;

𑀧𑀤𑁂𑀲𑀭𑀚𑁆𑀚𑀁 𑀯𑀺𑀧𑀼𑀮𑀁, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀁.

𑁧𑁨𑁧. ‘‘𑀧𑀺𑀢𑀼𑀕𑁂𑀳𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀲𑀫𑀡𑁄 𑀪𑀸𑀯𑀺𑀢𑀺𑀦𑁆𑀤𑁆𑀭𑀺𑀬𑁄;

𑀕𑀸𑀣𑀸𑀬 𑀧𑀭𑀺𑀤𑀻𑀧𑁂𑀦𑁆𑀢𑁄, 𑀅𑀦𑀺𑀘𑁆𑀘𑀢𑀫𑀼𑀤𑀸𑀳𑀭𑀺 [𑀅𑀦𑀺𑀘𑁆𑀘𑀯𑀢𑁆𑀣𑀼𑀤𑀸𑀳𑀭𑀺 (𑀲𑁆𑀬𑀸. 𑀓.)].

𑁧𑁨𑁨. ‘‘𑀅𑀦𑀼𑀲𑁆𑀲𑀭𑀸𑀫𑀺 𑀢𑀁 𑀲𑀜𑁆𑀜𑀁, 𑀲𑀁𑀲𑀭𑀦𑁆𑀢𑁄 𑀪𑀯𑀸𑀪𑀯𑁂;

𑀦 𑀓𑁄𑀝𑀺𑀁 𑀧𑀝𑀺𑀯𑀺𑀚𑁆𑀛𑀸𑀫𑀺 [𑀦 𑀓𑁄𑀘𑀺 𑀧𑀝𑀺𑀯𑀚𑁆𑀚𑀸𑀫𑀺 (𑀓.)], 𑀦𑀺𑀩𑁆𑀩𑀸𑀦𑀁 𑀅𑀘𑁆𑀘𑀼𑀢𑀁 𑀧𑀤𑀁 [𑀅𑀬𑀁 𑀕𑀸𑀣𑀸 𑀉𑀧𑀭𑀺 𑁪𑁩 𑀯𑀕𑁆𑀕𑁂 𑀲𑀢𑁆𑀢𑀫𑀸𑀧𑀤𑀸𑀦𑁂 𑀧𑀼𑀭𑀺𑀫𑀕𑀸𑀣𑀸𑀬 𑀧𑀼𑀭𑁂𑀢𑀭𑀁 𑀤𑀺𑀲𑁆𑀲𑀢𑀺].

𑁧𑁨𑁩. ‘‘𑀅𑀦𑀺𑀘𑁆𑀘𑀸 𑀯𑀢 𑀲𑀗𑁆𑀔𑀸𑀭𑀸, 𑀉𑀧𑁆𑀧𑀸𑀤𑀯𑀬𑀥𑀫𑁆𑀫𑀺𑀦𑁄;

𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀢𑁂𑀲𑀁 𑀯𑀽𑀧𑀲𑀫𑁄 𑀲𑀼𑀔𑁄.

𑁧𑁨𑁪. ‘‘𑀲𑀳 𑀕𑀸𑀣𑀁 𑀲𑀼𑀡𑀺𑀢𑁆𑀯𑀸𑀦, 𑀧𑀼𑀩𑁆𑀩𑀓𑀫𑁆𑀫𑀁 𑀅𑀦𑀼𑀲𑁆𑀲𑀭𑀺𑀁;

𑀏𑀓𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁.

𑁧𑁨𑁫. ‘‘𑀚𑀸𑀢𑀺𑀬𑀸 𑀲𑀢𑁆𑀢𑀯𑀲𑁆𑀲𑁄𑀳𑀁, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁;

𑀉𑀧𑀲𑀫𑁆𑀧𑀸𑀤𑀬𑀺 𑀩𑀼𑀤𑁆𑀥𑁄, 𑀕𑀼𑀡𑀫𑀜𑁆𑀜𑀸𑀬 𑀘𑀓𑁆𑀔𑀼𑀫𑀸.

𑁧𑁨𑁬. ‘‘𑀤𑀸𑀭𑀓𑁄𑀯 𑀅𑀳𑀁 𑀲𑀦𑁆𑀢𑁄, 𑀓𑀭𑀡𑀻𑀬𑀁 𑀲𑀫𑀸𑀧𑀬𑀺𑀁;

𑀓𑀺𑀁 𑀫𑁂 𑀓𑀭𑀡𑀻𑀬𑀁 𑀅𑀚𑁆𑀚, 𑀲𑀓𑁆𑀬𑀧𑀼𑀢𑁆𑀢𑀲𑁆𑀲 𑀲𑀸𑀲𑀦𑁂.

𑁧𑁨𑁭. ‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀬𑀁 𑀓𑀫𑁆𑀫𑀫𑀓𑀭𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀲𑀤𑁆𑀥𑀫𑁆𑀫𑀲𑀯𑀦𑁂 𑀨𑀮𑀁.

𑁧𑁨𑁮. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀥𑀫𑁆𑀫𑀲𑀯𑀦𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀥𑀫𑁆𑀫𑀲𑀯𑀦𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀦𑀯𑀫𑀁.