𑁧𑁦. 𑀉𑀓𑁆𑀔𑀺𑀢𑁆𑀢𑀧𑀤𑀼𑀫𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁨𑁯. ‘‘𑀦𑀕𑀭𑁂 𑀳𑀁𑀲𑀯𑀢𑀺𑀬𑀸, 𑀅𑀳𑁄𑀲𑀺𑀁 𑀫𑀸𑀮𑀺𑀓𑁄 𑀢𑀤𑀸;

𑀑𑀕𑀸𑀳𑁂𑀢𑁆𑀯𑀸 𑀧𑀤𑀼𑀫𑀲𑀭𑀁, 𑀲𑀢𑀧𑀢𑁆𑀢𑀁 𑀑𑀘𑀺𑀦𑀸𑀫𑀳𑀁.

𑁧𑁩𑁦. ‘‘𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄, 𑀲𑀩𑁆𑀩𑀥𑀫𑁆𑀫𑀸𑀦 𑀧𑀸𑀭𑀕𑀽;

𑀲𑀳 𑀲𑀢𑀲𑀳𑀲𑁆𑀲𑁂𑀳𑀺 [𑀲𑀢𑀲𑀳𑀲𑁆𑀲𑀲𑀺𑀲𑁆𑀲𑁂𑀳𑀺 (𑀓.)], 𑀲𑀦𑁆𑀢𑀘𑀺𑀢𑁆𑀢𑁂𑀳𑀺 𑀢𑀸𑀤𑀺𑀪𑀺.

𑁧𑁩𑁧. ‘‘𑀔𑀻𑀡𑀸𑀲𑀯𑁂𑀳𑀺 𑀲𑀼𑀤𑁆𑀥𑁂𑀳𑀺, 𑀙𑀴𑀪𑀺𑀜𑁆𑀜𑁂𑀳𑀺 𑀛𑀸𑀬𑀺𑀪𑀺 [𑀲𑁄 𑀢𑀤𑀸 (𑀲𑀻.), 𑀲𑁄 𑀲𑀳 (𑀓.)];

𑀫𑀫 𑀯𑀼𑀤𑁆𑀥𑀺𑀁 𑀲𑀫𑀦𑁆𑀯𑁂𑀲𑀁, 𑀆𑀕𑀘𑁆𑀙𑀺 𑀫𑀫 𑀲𑀦𑁆𑀢𑀺𑀓𑀁 [𑀫𑀫 𑀲𑀦𑁆𑀢𑀺𑀓𑁂 (𑀲𑀻.), 𑀧𑀼𑀭𑀺𑀲𑀼𑀢𑁆𑀢𑀫𑁄 (𑀲𑁆𑀬𑀸. 𑀓.)].

𑁧𑁩𑁨. ‘‘𑀤𑀺𑀲𑁆𑀯𑀸𑀦𑀳𑀁 𑀤𑁂𑀯𑀤𑁂𑀯𑀁, 𑀲𑀬𑀫𑁆𑀪𑀼𑀁 𑀮𑁄𑀓𑀦𑀸𑀬𑀓𑀁;

𑀯𑀡𑁆𑀝𑁂 𑀙𑁂𑀢𑁆𑀯𑀸 𑀲𑀢𑀧𑀢𑁆𑀢𑀁, 𑀉𑀓𑁆𑀔𑀺𑀧𑀺𑀫𑀫𑁆𑀩𑀭𑁂 𑀢𑀤𑀸.

𑁧𑁩𑁩. ‘‘𑀬𑀤𑀺 𑀩𑀼𑀤𑁆𑀥𑁄 𑀢𑀼𑀯𑀁 𑀯𑀻𑀭, 𑀮𑁄𑀓𑀚𑁂𑀝𑁆𑀞𑁄 𑀦𑀭𑀸𑀲𑀪𑁄;

𑀲𑀬𑀁 𑀕𑀦𑁆𑀢𑁆𑀯𑀸 𑀲𑀢𑀧𑀢𑁆𑀢𑀸, 𑀫𑀢𑁆𑀣𑀓𑁂 𑀥𑀸𑀭𑀬𑀦𑁆𑀢𑀼 𑀢𑁂.

𑁧𑁩𑁪. ‘‘𑀅𑀥𑀺𑀝𑁆𑀞𑀳𑀺 𑀫𑀳𑀸𑀯𑀻𑀭𑁄, 𑀮𑁄𑀓𑀚𑁂𑀝𑁆𑀞𑁄 𑀦𑀭𑀸𑀲𑀪𑁄;

𑀩𑀼𑀤𑁆𑀥𑀲𑁆𑀲 𑀆𑀦𑀼𑀪𑀸𑀯𑁂𑀦, 𑀫𑀢𑁆𑀣𑀓𑁂 𑀥𑀸𑀭𑀬𑀺𑀁𑀲𑀼 𑀢𑁂.

𑁧𑁩𑁫. ‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

𑁧𑁩𑁬. ‘‘𑀢𑀢𑁆𑀣 𑀫𑁂 𑀲𑀼𑀓𑀢𑀁 𑀩𑁆𑀬𑀫𑁆𑀳𑀁, 𑀲𑀢𑀧𑀢𑁆𑀢𑀦𑁆𑀢𑀺 𑀯𑀼𑀘𑁆𑀘𑀢𑀺;

𑀲𑀝𑁆𑀞𑀺𑀬𑁄𑀚𑀦𑀫𑀼𑀩𑁆𑀩𑀺𑀤𑁆𑀥𑀁, 𑀢𑀺𑀁𑀲𑀬𑁄𑀚𑀦𑀯𑀺𑀢𑁆𑀣𑀢𑀁.

𑁧𑁩𑁭. ‘‘𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀁 𑀤𑁂𑀯𑀺𑀦𑁆𑀤𑁄, 𑀤𑁂𑀯𑀭𑀚𑁆𑀚𑀫𑀓𑀸𑀭𑀬𑀺𑀁;

𑀧𑀜𑁆𑀘𑀲𑀢𑁆𑀢𑀢𑀺𑀓𑁆𑀔𑀢𑁆𑀢𑀼𑀜𑁆𑀘, 𑀘𑀓𑁆𑀓𑀯𑀢𑁆𑀢𑀻 𑀅𑀳𑁄𑀲𑀳𑀁.

𑁧𑁩𑁮. ‘‘𑀧𑀤𑁂𑀲𑀭𑀚𑁆𑀚𑀁 𑀯𑀺𑀧𑀼𑀮𑀁, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀁;

𑀅𑀦𑀼𑀪𑁄𑀫𑀺 𑀲𑀓𑀁 𑀓𑀫𑁆𑀫𑀁, 𑀧𑀼𑀩𑁆𑀩𑁂 𑀲𑀼𑀓𑀢𑀫𑀢𑁆𑀢𑀦𑁄.

𑁧𑁩𑁯. ‘‘𑀢𑁂𑀦𑁂𑀯𑁂𑀓𑀧𑀤𑀼𑀫𑁂𑀦, 𑀅𑀦𑀼𑀪𑁄𑀢𑁆𑀯𑀸𑀦 𑀲𑀫𑁆𑀧𑀤𑀸;

𑀕𑁄𑀢𑀫𑀲𑁆𑀲 𑀪𑀕𑀯𑀢𑁄, 𑀥𑀫𑁆𑀫𑀁 𑀲𑀘𑁆𑀙𑀺𑀓𑀭𑀺𑀁 𑀅𑀳𑀁.

𑁧𑁪𑁦. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸;

𑀦𑀸𑀕𑁄𑀯 𑀩𑀦𑁆𑀥𑀦𑀁 𑀙𑁂𑀢𑁆𑀯𑀸, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁧𑁪𑁧. ‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀧𑀽𑀚𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀏𑀓𑀧𑀤𑀼𑀫𑀲𑁆𑀲𑀺𑀤𑀁 𑀨𑀮𑀁.

𑁧𑁪𑁨. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀉𑀓𑁆𑀔𑀺𑀢𑁆𑀢𑀧𑀤𑀼𑀫𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀉𑀓𑁆𑀔𑀺𑀢𑁆𑀢𑀧𑀤𑀼𑀫𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀲𑀫𑀁.

𑀕𑀦𑁆𑀥𑁄𑀤𑀓𑀯𑀕𑁆𑀕𑁄 𑀘𑀢𑀼𑀢𑀺𑀁𑀲𑀢𑀺𑀫𑁄.