𑁩𑁪. 𑀕𑀦𑁆𑀥𑁄𑀤𑀓𑀯𑀕𑁆𑀕𑁄

𑁧. 𑀕𑀦𑁆𑀥𑀥𑀽𑀧𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧. ‘‘𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄, 𑀕𑀦𑁆𑀥𑀥𑀽𑀧𑀁 𑀅𑀤𑀸𑀲𑀳𑀁;

𑀲𑀼𑀫𑀦𑁂𑀳𑀺 𑀧𑀝𑀺𑀘𑁆𑀙𑀦𑁆𑀦𑀁, 𑀩𑀼𑀤𑁆𑀥𑀸𑀦𑀼𑀘𑁆𑀙𑀯𑀺𑀓𑀜𑁆𑀘 𑀢𑀁.

𑁨. ‘‘𑀓𑀜𑁆𑀘𑀦𑀕𑁆𑀖𑀺𑀬𑀲𑀗𑁆𑀓𑀸𑀲𑀁, 𑀩𑀼𑀤𑁆𑀥𑀁 𑀮𑁄𑀓𑀕𑁆𑀕𑀦𑀸𑀬𑀓𑀁;

𑀇𑀦𑁆𑀤𑀻𑀯𑀭𑀁𑀯 𑀚𑀮𑀺𑀢𑀁, 𑀆𑀤𑀺𑀢𑁆𑀢𑀁𑀯 𑀳𑀼𑀢𑀸𑀲𑀦𑀁.

𑁩. ‘‘𑀩𑁆𑀬𑀕𑁆𑀖𑀼𑀲𑀪𑀁𑀯 𑀧𑀯𑀭𑀁, 𑀅𑀪𑀺𑀚𑀸𑀢𑀁𑀯 𑀓𑁂𑀲𑀭𑀺𑀁;

𑀦𑀺𑀲𑀺𑀦𑁆𑀦𑀁 𑀲𑀫𑀡𑀸𑀦𑀕𑁆𑀕𑀁, 𑀪𑀺𑀓𑁆𑀔𑀼𑀲𑀗𑁆𑀖𑀧𑀼𑀭𑀓𑁆𑀔𑀢𑀁.

𑁪. ‘‘𑀤𑀺𑀲𑁆𑀯𑀸 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀧𑀕𑁆𑀕𑀳𑁂𑀢𑁆𑀯𑀸𑀦 𑀅𑀜𑁆𑀚𑀮𑀺𑀁;

𑀯𑀦𑁆𑀤𑀺𑀢𑁆𑀯𑀸 𑀲𑀢𑁆𑀣𑀼𑀦𑁄 𑀧𑀸𑀤𑁂, 𑀧𑀓𑁆𑀓𑀸𑀫𑀺𑀁 𑀉𑀢𑁆𑀢𑀭𑀸𑀫𑀼𑀔𑁄.

𑁫. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀕𑀦𑁆𑀥𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀕𑀦𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁬. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀕𑀦𑁆𑀥𑀥𑀽𑀧𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀕𑀦𑁆𑀥𑀥𑀽𑀧𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀞𑀫𑀁.

𑁨. 𑀉𑀤𑀓𑀧𑀽𑀚𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁭. ‘‘𑀲𑀼𑀯𑀡𑁆𑀡𑀯𑀡𑁆𑀡𑀁 𑀲𑀫𑁆𑀩𑀼𑀤𑁆𑀥𑀁, 𑀕𑀘𑁆𑀙𑀦𑁆𑀢𑀁 𑀅𑀦𑀺𑀮𑀜𑁆𑀚𑀲𑁂;

𑀖𑀢𑀸𑀲𑀦𑀁𑀯 𑀚𑀮𑀺𑀢𑀁, 𑀆𑀤𑀺𑀢𑁆𑀢𑀁𑀯 𑀳𑀼𑀢𑀸𑀲𑀦𑀁.

𑁮. ‘‘𑀧𑀸𑀡𑀺𑀦𑀸 𑀉𑀤𑀓𑀁 𑀕𑀬𑁆𑀳, 𑀆𑀓𑀸𑀲𑁂 𑀉𑀓𑁆𑀔𑀺𑀧𑀺𑀁 𑀅𑀳𑀁;

𑀲𑀫𑁆𑀧𑀝𑀺𑀘𑁆𑀙𑀺 𑀫𑀳𑀸𑀯𑀻𑀭𑁄, 𑀩𑀼𑀤𑁆𑀥𑁄 𑀓𑀸𑀭𑀼𑀡𑀺𑀓𑁄 𑀇𑀲𑀺.

𑁯. ‘‘𑀅𑀦𑁆𑀢𑀮𑀺𑀓𑁆𑀔𑁂 𑀞𑀺𑀢𑁄 𑀲𑀢𑁆𑀣𑀸, 𑀧𑀤𑀼𑀫𑀼𑀢𑁆𑀢𑀭𑀦𑀸𑀫𑀓𑁄;

𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀇𑀫𑀁 𑀕𑀸𑀣𑀫𑀪𑀸𑀲𑀣.

𑁧𑁦. ‘‘‘𑀇𑀫𑀺𑀦𑀸 𑀤𑀓𑀤𑀸𑀦𑁂𑀦, 𑀧𑀻𑀢𑀺𑀉𑀧𑁆𑀧𑀸𑀤𑀦𑁂𑀦 𑀘;

𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑁆𑀧𑀺, 𑀤𑀼𑀕𑁆𑀕𑀢𑀺𑀁 𑀦𑀼𑀧𑀧𑀚𑁆𑀚𑀲𑀺’.

𑁧𑁧. ‘‘𑀢𑁂𑀦 𑀓𑀫𑁆𑀫𑁂𑀦 𑀤𑁆𑀯𑀺𑀧𑀤𑀺𑀦𑁆𑀤, 𑀮𑁄𑀓𑀚𑁂𑀝𑁆𑀞 𑀦𑀭𑀸𑀲𑀪;

𑀧𑀢𑁆𑀢𑁄𑀫𑁆𑀳𑀺 𑀅𑀘𑀮𑀁 𑀞𑀸𑀦𑀁, 𑀳𑀺𑀢𑁆𑀯𑀸 𑀚𑀬𑀧𑀭𑀸𑀚𑀬𑀁.

𑁧𑁨. ‘‘𑀲𑀳𑀲𑁆𑀲𑀭𑀸𑀚𑀦𑀸𑀫𑁂𑀦, 𑀢𑀬𑁄 𑀘 𑀘𑀓𑁆𑀓𑀯𑀢𑁆𑀢𑀺𑀦𑁄;

𑀧𑀜𑁆𑀘𑀲𑀝𑁆𑀞𑀺𑀓𑀧𑁆𑀧𑀲𑀢𑁂, 𑀘𑀸𑀢𑀼𑀭𑀦𑁆𑀢𑀸 𑀚𑀦𑀸𑀥𑀺𑀧𑀸.

𑁧𑁩. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀉𑀤𑀓𑀧𑀽𑀚𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀉𑀤𑀓𑀧𑀽𑀚𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀼𑀢𑀺𑀬𑀁.

𑁩. 𑀧𑀼𑀦𑁆𑀦𑀸𑀕𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁪. ‘‘𑀓𑀸𑀦𑀦𑀁 𑀯𑀦𑀫𑁄𑀕𑀬𑁆𑀳, 𑀯𑀲𑀸𑀫𑀺 𑀮𑀼𑀤𑁆𑀤𑀓𑁄 𑀅𑀳𑀁;

𑀧𑀼𑀦𑁆𑀦𑀸𑀕𑀁 𑀧𑀼𑀧𑁆𑀨𑀺𑀢𑀁 𑀤𑀺𑀲𑁆𑀯𑀸, 𑀩𑀼𑀤𑁆𑀥𑀲𑁂𑀝𑁆𑀞𑀁 𑀅𑀦𑀼𑀲𑁆𑀲𑀭𑀺𑀁.

𑁧𑁫. ‘‘𑀢𑀁 𑀧𑀼𑀧𑁆𑀨𑀁 𑀑𑀘𑀺𑀦𑀺𑀢𑁆𑀯𑀸𑀦, 𑀲𑀼𑀕𑀦𑁆𑀥𑀁 𑀕𑀦𑁆𑀥𑀺𑀢𑀁 𑀲𑀼𑀪𑀁;

𑀣𑀽𑀧𑀁 𑀓𑀢𑁆𑀯𑀸𑀦 𑀧𑀼𑀮𑀺𑀦𑁂, 𑀩𑀼𑀤𑁆𑀥𑀲𑁆𑀲 𑀅𑀪𑀺𑀭𑁄𑀧𑀬𑀺𑀁.

𑁧𑁬. ‘‘𑀤𑁆𑀯𑁂𑀦𑀯𑀼𑀢𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀧𑀽𑀚𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁧𑁭. ‘‘𑀏𑀓𑀫𑁆𑀳𑀺 𑀦𑀯𑀼𑀢𑁂 𑀓𑀧𑁆𑀧𑁂, 𑀏𑀓𑁄 𑀆𑀲𑀺𑀁 𑀢𑀫𑁄𑀦𑀼𑀤𑁄;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁧𑁮. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀼𑀦𑁆𑀦𑀸𑀕𑀧𑀼𑀧𑁆𑀨𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀼𑀦𑁆𑀦𑀸𑀕𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀢𑀢𑀺𑀬𑀁.

𑁪. 𑀏𑀓𑀤𑀼𑀲𑁆𑀲𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁯. ‘‘𑀦𑀕𑀭𑁂 𑀳𑀁𑀲𑀯𑀢𑀺𑀬𑀸, 𑀅𑀳𑁄𑀲𑀺𑀁 𑀢𑀺𑀡𑀳𑀸𑀭𑀓𑁄;

𑀢𑀺𑀡𑀳𑀸𑀭𑁂𑀦 𑀚𑀻𑀯𑀸𑀫𑀺, 𑀢𑁂𑀦 𑀧𑁄𑀲𑁂𑀫𑀺 𑀤𑀸𑀭𑀓𑁂.

𑁨𑁦. ‘‘𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄, 𑀲𑀩𑁆𑀩𑀥𑀫𑁆𑀫𑀸𑀦 𑀧𑀸𑀭𑀕𑀽;

𑀢𑀫𑀦𑁆𑀥𑀓𑀸𑀭𑀁 𑀦𑀸𑀲𑁂𑀢𑁆𑀯𑀸, 𑀉𑀧𑁆𑀧𑀚𑁆𑀚𑀺 𑀮𑁄𑀓𑀦𑀸𑀬𑀓𑁄.

𑁨𑁧. ‘‘𑀲𑀓𑁂 𑀖𑀭𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀏𑀯𑀁 𑀘𑀺𑀦𑁆𑀢𑁂𑀲𑀳𑀁 𑀢𑀤𑀸;

‘𑀩𑀼𑀤𑁆𑀥𑁄 𑀮𑁄𑀓𑁂 𑀲𑀫𑀼𑀧𑁆𑀧𑀦𑁆𑀦𑁄, 𑀤𑁂𑀬𑁆𑀬𑀥𑀫𑁆𑀫𑁄 𑀘 𑀦𑀢𑁆𑀣𑀺 𑀫𑁂.

𑁨𑁨. ‘‘‘𑀇𑀤𑀁 𑀫𑁂 𑀲𑀸𑀝𑀓𑀁 𑀏𑀓𑀁, 𑀦𑀢𑁆𑀣𑀺 𑀫𑁂 𑀓𑁄𑀘𑀺 𑀤𑀸𑀬𑀓𑁄;

𑀤𑀼𑀓𑁆𑀔𑁄 𑀦𑀺𑀭𑀬𑀲𑀫𑁆𑀨𑀲𑁆𑀲𑁄, 𑀭𑁄𑀧𑀬𑀺𑀲𑁆𑀲𑀸𑀫𑀺 𑀤𑀓𑁆𑀔𑀺𑀡𑀁’.

𑁨𑁩. ‘‘𑀏𑀯𑀸𑀳𑀁 𑀘𑀺𑀦𑁆𑀢𑀬𑀺𑀢𑁆𑀯𑀸𑀦, 𑀲𑀓𑀁 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁;

𑀏𑀓𑀁 𑀤𑀼𑀲𑁆𑀲𑀁 𑀕𑀳𑁂𑀢𑁆𑀯𑀸𑀦, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲𑀤𑀸𑀲𑀳𑀁.

𑁨𑁪. ‘‘𑀏𑀓𑀁 𑀤𑀼𑀲𑁆𑀲𑀁 𑀤𑀤𑀺𑀢𑁆𑀯𑀸𑀦, 𑀉𑀓𑁆𑀓𑀼𑀝𑁆𑀞𑀺𑀁 𑀲𑀫𑁆𑀧𑀯𑀢𑁆𑀢𑀬𑀺𑀁;

𑀬𑀤𑀺 𑀩𑀼𑀤𑁆𑀥𑁄 𑀢𑀼𑀯𑀁 𑀯𑀻𑀭, 𑀢𑀸𑀭𑁂𑀳𑀺 𑀫𑀁 𑀫𑀳𑀸𑀫𑀼𑀦𑀺.

𑁨𑁫. ‘‘𑀧𑀤𑀼𑀫𑀼𑀢𑁆𑀢𑀭𑁄 𑀮𑁄𑀓𑀯𑀺𑀤𑀽, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄;

𑀫𑀫 𑀤𑀸𑀦𑀁 𑀧𑀓𑀺𑀢𑁆𑀢𑁂𑀦𑁆𑀢𑁄, 𑀅𑀓𑀸 𑀫𑁂 𑀅𑀦𑀼𑀫𑁄𑀤𑀦𑀁.

𑁨𑁬. ‘‘‘𑀇𑀫𑀺𑀦𑀸 𑀏𑀓𑀤𑀼𑀲𑁆𑀲𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀦𑀺, 𑀯𑀺𑀦𑀺𑀧𑀸𑀢𑀁 𑀦 𑀕𑀘𑁆𑀙𑀢𑀺.

𑁨𑁭. ‘‘‘𑀙𑀢𑁆𑀢𑀺𑀁𑀲𑀓𑁆𑀔𑀢𑁆𑀢𑀼𑀁 𑀤𑁂𑀯𑀺𑀦𑁆𑀤𑁄, 𑀤𑁂𑀯𑀭𑀚𑁆𑀚𑀁 𑀓𑀭𑀺𑀲𑁆𑀲𑀢𑀺;

𑀢𑁂𑀢𑁆𑀢𑀺𑀁𑀲𑀓𑁆𑀔𑀢𑁆𑀢𑀼𑀁 𑀭𑀸𑀚𑀸 𑀘, 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺;

𑀧𑀤𑁂𑀲𑀭𑀚𑁆𑀚𑀁 𑀯𑀺𑀧𑀼𑀮𑀁, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀁.

𑁨𑁮. ‘‘‘𑀤𑁂𑀯𑀮𑁄𑀓𑁂 𑀫𑀦𑀼𑀲𑁆𑀲𑁂 𑀯𑀸, 𑀲𑀁𑀲𑀭𑀦𑁆𑀢𑁄 𑀢𑀼𑀯𑀁 𑀪𑀯𑁂;

𑀭𑀽𑀧𑀯𑀸 𑀕𑀼𑀡𑀲𑀫𑁆𑀧𑀦𑁆𑀦𑁄, 𑀅𑀦𑀯𑀓𑁆𑀓𑀦𑁆𑀢𑀤𑁂𑀳𑀯𑀸;

𑀅𑀓𑁆𑀔𑁄𑀪𑀁 𑀅𑀫𑀺𑀢𑀁 𑀤𑀼𑀲𑁆𑀲𑀁, 𑀮𑀪𑀺𑀲𑁆𑀲𑀲𑀺 𑀬𑀤𑀺𑀘𑁆𑀙𑀓𑀁’.

𑁨𑁯. ‘‘𑀇𑀤𑀁 𑀯𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑁄, 𑀚𑀮𑀚𑀼𑀢𑁆𑀢𑀫𑀦𑀸𑀫𑀓𑁄;

𑀦𑀪𑀁 𑀅𑀩𑁆𑀪𑀼𑀕𑁆𑀕𑀫𑀻 𑀥𑀻𑀭𑁄, 𑀳𑀁𑀲𑀭𑀸𑀚𑀸𑀯 𑀅𑀫𑁆𑀩𑀭𑁂.

𑁩𑁦. ‘‘𑀬𑀁 𑀬𑀁 𑀬𑁄𑀦𑀼𑀧𑀧𑀚𑁆𑀚𑀸𑀫𑀺, 𑀤𑁂𑀯𑀢𑁆𑀢𑀁 𑀅𑀣 𑀫𑀸𑀦𑀼𑀲𑀁;

𑀪𑁄𑀕𑁂 𑀫𑁂 𑀊𑀦𑀢𑀸 𑀦𑀢𑁆𑀣𑀺, 𑀏𑀓𑀤𑀼𑀲𑁆𑀲𑀲𑁆𑀲𑀺𑀤𑀁 𑀨𑀮𑀁.

𑁩𑁧. ‘‘𑀧𑀤𑀼𑀤𑁆𑀥𑀸𑀭𑁂 𑀧𑀤𑀼𑀤𑁆𑀥𑀸𑀭𑁂, 𑀤𑀼𑀲𑁆𑀲𑀁 𑀦𑀺𑀩𑁆𑀩𑀢𑁆𑀢𑀢𑁂 𑀫𑀫𑀁;

𑀳𑁂𑀝𑁆𑀞𑀸 𑀤𑀼𑀲𑁆𑀲𑀫𑁆𑀳𑀺 𑀢𑀺𑀝𑁆𑀞𑀸𑀫𑀺, 𑀉𑀧𑀭𑀺 𑀙𑀤𑀦𑀁 𑀫𑀫.

𑁩𑁨. ‘‘𑀘𑀓𑁆𑀓𑀯𑀸𑀴𑀫𑀼𑀧𑀸𑀤𑀸𑀬, 𑀲𑀓𑀸𑀦𑀦𑀁 𑀲𑀧𑀩𑁆𑀩𑀢𑀁;

𑀇𑀘𑁆𑀙𑀫𑀸𑀦𑁄 𑀘𑀳𑀁 𑀅𑀚𑁆𑀚, 𑀤𑀼𑀲𑁆𑀲𑁂𑀳𑀺 𑀙𑀸𑀤𑀬𑁂𑀬𑁆𑀬𑀳𑀁.

𑁩𑁩. ‘‘𑀢𑁂𑀦𑁂𑀯 𑀏𑀓𑀤𑀼𑀲𑁆𑀲𑁂𑀦, 𑀲𑀁𑀲𑀭𑀦𑁆𑀢𑁄 𑀪𑀯𑀸𑀪𑀯𑁂;

𑀲𑀼𑀯𑀡𑁆𑀡𑀯𑀡𑁆𑀡𑁄 𑀳𑀼𑀢𑁆𑀯𑀸𑀦, 𑀲𑀁𑀲𑀭𑀸𑀫𑀺 𑀪𑀯𑀸𑀪𑀯𑁂.

𑁩𑁪. ‘‘𑀯𑀺𑀧𑀸𑀓𑀁 𑀏𑀓𑀤𑀼𑀲𑁆𑀲𑀲𑁆𑀲, 𑀦𑀚𑁆𑀛𑀕𑀁 𑀓𑀢𑁆𑀣𑀘𑀺𑀓𑁆𑀔𑀬𑀁;

𑀅𑀬𑀁 𑀫𑁂 𑀅𑀦𑁆𑀢𑀺𑀫𑀸 𑀚𑀸𑀢𑀺, 𑀯𑀺𑀧𑀘𑁆𑀘𑀢𑀺 𑀇𑀥𑀸𑀧𑀺 𑀫𑁂.

𑁩𑁫. ‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀬𑀁 𑀤𑀼𑀲𑁆𑀲𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀏𑀓𑀤𑀼𑀲𑁆𑀲𑀲𑁆𑀲𑀺𑀤𑀁 𑀨𑀮𑀁.

𑁩𑁬. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸;

𑀦𑀸𑀕𑁄𑀯 𑀩𑀦𑁆𑀥𑀦𑀁 𑀙𑁂𑀢𑁆𑀯𑀸, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁩𑁭. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀏𑀓𑀤𑀼𑀲𑁆𑀲𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀏𑀓𑀤𑀼𑀲𑁆𑀲𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀘𑀢𑀼𑀢𑁆𑀣𑀁.

𑁫. 𑀨𑀼𑀲𑀺𑀢𑀓𑀫𑁆𑀧𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁮. ‘‘𑀯𑀺𑀧𑀲𑁆𑀲𑀻 𑀦𑀸𑀫 [𑀲𑀩𑁆𑀩𑀢𑁆𑀣𑀧𑀺 𑀏𑀯𑀫𑁂𑀯 𑀤𑀺𑀲𑁆𑀲𑀢𑀺]

𑀲𑀫𑁆𑀩𑀼𑀤𑁆𑀥𑁄, 𑀮𑁄𑀓𑀚𑁂𑀝𑁆𑀞𑁄 𑀦𑀭𑀸𑀲𑀪𑁄.

𑀔𑀻𑀡𑀸𑀲𑀯𑁂𑀳𑀺 𑀲𑀳𑀺𑀢𑁄, 𑀲𑀗𑁆𑀖𑀸𑀭𑀸𑀫𑁂 𑀯𑀲𑀻 𑀢𑀤𑀸.

𑁩𑁯. ‘‘𑀆𑀭𑀸𑀫𑀤𑁆𑀯𑀸𑀭𑀸 𑀦𑀺𑀓𑁆𑀔𑀫𑁆𑀫, 𑀯𑀺𑀧𑀲𑁆𑀲𑀻 [𑀲𑀩𑁆𑀩𑀢𑁆𑀣𑀧𑀺 𑀏𑀯𑀫𑁂𑀯 𑀤𑀺𑀲𑁆𑀲𑀢𑀺] 𑀮𑁄𑀓𑀦𑀸𑀬𑀓𑁄;

𑀲𑀳 𑀲𑀢𑀲𑀳𑀲𑁆𑀲𑁂𑀳𑀺, 𑀅𑀝𑁆𑀞 [𑀲𑀳𑀲𑁆𑀲𑀲𑀢𑀲𑀺𑀲𑁆𑀲𑁂𑀳𑀺, 𑀅𑀝𑁆𑀞 (𑀓.), 𑀅𑀝𑁆𑀞 𑀲𑀢𑀲𑀳𑀲𑁆𑀲𑁂𑀳𑀺, 𑀲𑀳 (?)] 𑀔𑀻𑀡𑀸𑀲𑀯𑁂𑀳𑀺 𑀲𑁄.

𑁪𑁦. ‘‘𑀅𑀚𑀺𑀦𑁂𑀦 𑀦𑀺𑀯𑀢𑁆𑀣𑁄𑀳𑀁, 𑀯𑀸𑀓𑀘𑀻𑀭𑀥𑀭𑁄𑀧𑀺 𑀘;

𑀓𑀼𑀲𑀼𑀫𑁄𑀤𑀓𑀫𑀸𑀤𑀸𑀬 [𑀓𑀼𑀲𑀼𑀫𑁆𑀪𑁄𑀤𑀓… (𑀲𑀻. 𑀲𑁆𑀬𑀸.)], 𑀲𑀫𑁆𑀩𑀼𑀤𑁆𑀥𑀁 𑀉𑀧𑀲𑀗𑁆𑀓𑀫𑀺𑀁.

𑁪𑁧. ‘‘𑀲𑀓𑀁 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀯𑁂𑀤𑀚𑀸𑀢𑁄 𑀓𑀢𑀜𑁆𑀚𑀮𑀻;

𑀓𑀼𑀲𑀼𑀫𑁄𑀤𑀓𑀫𑀸𑀤𑀸𑀬, 𑀩𑀼𑀤𑁆𑀥𑀫𑀩𑁆𑀪𑀼𑀓𑁆𑀓𑀺𑀭𑀺𑀁 𑀅𑀳𑀁.

𑁪𑁨. ‘‘𑀢𑁂𑀦 𑀓𑀫𑁆𑀫𑁂𑀦 𑀲𑀫𑁆𑀩𑀼𑀤𑁆𑀥𑁄, 𑀚𑀮𑀚𑀼𑀢𑁆𑀢𑀫𑀦𑀸𑀫𑀓𑁄 [𑀲𑀩𑁆𑀩𑀢𑁆𑀣𑀧𑀺 𑀏𑀯𑀫𑁂𑀯 𑀤𑀺𑀲𑁆𑀲𑀢𑀺];

𑀫𑀫 𑀓𑀫𑁆𑀫𑀁 𑀧𑀓𑀺𑀢𑁆𑀢𑁂𑀢𑁆𑀯𑀸, 𑀅𑀕𑀫𑀸 𑀬𑁂𑀦 𑀧𑀢𑁆𑀣𑀺𑀢𑀁.

𑁪𑁩. ‘‘𑀨𑀼𑀲𑀺𑀢𑀸 𑀧𑀜𑁆𑀘𑀲𑀳𑀲𑁆𑀲𑀸, 𑀬𑁂𑀳𑀺 𑀧𑀽𑀚𑁂𑀲𑀳𑀁 𑀚𑀺𑀦𑀁;

𑀅𑀟𑁆𑀠𑀢𑁂𑀬𑁆𑀬𑀲𑀳𑀲𑁆𑀲𑁂𑀳𑀺, 𑀤𑁂𑀯𑀭𑀚𑁆𑀚𑀁 𑀅𑀓𑀸𑀭𑀬𑀺𑀁.

𑁪𑁪. ‘‘𑀅𑀟𑁆𑀠𑀢𑁂𑀬𑁆𑀬𑀲𑀳𑀲𑁆𑀲𑁂𑀳𑀺, 𑀘𑀓𑁆𑀓𑀯𑀢𑁆𑀢𑀻 𑀅𑀳𑁄𑀲𑀳𑀁;

𑀅𑀯𑀲𑁂𑀲𑁂𑀦 𑀓𑀫𑁆𑀫𑁂𑀦, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁.

𑁪𑁫. ‘‘𑀤𑁂𑀯𑀭𑀸𑀚𑀸 𑀬𑀤𑀸 𑀳𑁄𑀫𑀺 [𑀅𑀳𑁄𑀲𑀺𑀁 (𑀲𑁆𑀬𑀸. 𑀓.)], 𑀫𑀦𑀼𑀚𑀸𑀥𑀺𑀧𑀢𑀻 𑀬𑀤𑀸 [𑀢𑀤𑀸 (𑀲𑁆𑀬𑀸. 𑀓.)];

𑀢𑀫𑁂𑀯 𑀦𑀸𑀫𑀥𑁂𑀬𑁆𑀬𑀁 𑀫𑁂, 𑀨𑀼𑀲𑀺𑀢𑁄 𑀦𑀸𑀫 𑀳𑁄𑀫𑀳𑀁.

𑁪𑁬. ‘‘𑀤𑁂𑀯𑀪𑀽𑀢𑀲𑁆𑀲 𑀲𑀦𑁆𑀢𑀲𑁆𑀲, 𑀅𑀣𑀸𑀧𑀺 𑀫𑀸𑀦𑀼𑀲𑀲𑁆𑀲 𑀯𑀸;

𑀲𑀫𑀦𑁆𑀢𑀸 𑀩𑁆𑀬𑀸𑀫𑀢𑁄 𑀫𑀬𑁆𑀳𑀁, 𑀨𑀼𑀲𑀺𑀢𑀁𑀯 𑀧𑀯𑀲𑁆𑀲𑀢𑀺.

𑁪𑁭. ‘‘𑀪𑀯𑀸 𑀉𑀕𑁆𑀖𑀸𑀝𑀺𑀢𑀸 𑀫𑀬𑁆𑀳𑀁, 𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀫;

𑀲𑀩𑁆𑀩𑀸𑀲𑀯𑀧𑀭𑀺𑀓𑁆𑀔𑀻𑀡𑁄, 𑀨𑀼𑀲𑀺𑀢𑀲𑁆𑀲 𑀇𑀤𑀁 𑀨𑀮𑀁.

𑁪𑁮. ‘‘𑀘𑀦𑁆𑀤𑀦𑀲𑁆𑀲𑁂𑀯 𑀫𑁂 𑀓𑀸𑀬𑀸, 𑀢𑀣𑀸 𑀕𑀦𑁆𑀥𑁄 𑀧𑀯𑀸𑀬𑀢𑀺;

𑀲𑀭𑀻𑀭𑀢𑁄 𑀫𑀫 𑀕𑀦𑁆𑀥𑁄, 𑀅𑀟𑁆𑀠𑀓𑁄𑀲𑁂 𑀧𑀯𑀸𑀬𑀢𑀺.

𑁪𑁯. ‘‘𑀤𑀺𑀩𑁆𑀩𑀕𑀦𑁆𑀥𑀁 𑀲𑀫𑁆𑀧𑀯𑀦𑁆𑀢𑀁, 𑀧𑀼𑀜𑁆𑀜𑀓𑀫𑁆𑀫𑀲𑀫𑀗𑁆𑀕𑀺𑀦𑀁;

𑀕𑀦𑁆𑀥𑀁 𑀖𑀢𑁆𑀯𑀸𑀦 𑀚𑀸𑀦𑀦𑁆𑀢𑀺, 𑀨𑀼𑀲𑀺𑀢𑁄 𑀆𑀕𑀢𑁄 𑀇𑀥.

𑁫𑁦. ‘‘𑀲𑀸𑀔𑀸𑀧𑀮𑀸𑀲𑀓𑀝𑁆𑀞𑀸𑀦𑀺, 𑀢𑀺𑀡𑀸𑀦𑀺𑀧𑀺 𑀘 𑀲𑀩𑁆𑀩𑀲𑁄;

𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀕𑀦𑁆𑀥𑁄 𑀲𑀫𑁆𑀧𑀚𑁆𑀚𑀢𑁂 𑀔𑀡𑁂.

𑁫𑁧. ‘‘𑀲𑀢𑀲𑀳𑀲𑁆𑀲𑀺𑀢𑁄 [𑀲𑀩𑁆𑀩𑀢𑁆𑀣𑀧𑀺 𑀏𑀯𑀫𑁂𑀯 𑀤𑀺𑀲𑁆𑀲𑀢𑀺] 𑀓𑀧𑁆𑀧𑁂, 𑀘𑀦𑁆𑀤𑀦𑀁 𑀅𑀪𑀺𑀧𑀽𑀚𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀨𑀼𑀲𑀺𑀢𑀲𑁆𑀲 𑀇𑀤𑀁 𑀨𑀮𑀁.

𑁫𑁨. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀨𑀼𑀲𑀺𑀢𑀓𑀫𑁆𑀧𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀨𑀼𑀲𑀺𑀢𑀓𑀫𑁆𑀧𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀜𑁆𑀘𑀫𑀁.

𑁬. 𑀧𑀪𑀗𑁆𑀓𑀭𑀢𑁆𑀣𑁂𑀭𑀅𑀧𑀤𑀸𑀦𑀁

𑁫𑁩. ‘‘𑀧𑀤𑀼𑀫𑀼𑀢𑁆𑀢𑀭𑀪𑀕𑀯𑀢𑁄, 𑀮𑁄𑀓𑀚𑁂𑀝𑁆𑀞𑀲𑁆𑀲 𑀢𑀸𑀤𑀺𑀦𑁄;

𑀯𑀺𑀧𑀺𑀦𑁂 𑀘𑁂𑀢𑀺𑀬𑀁 𑀆𑀲𑀺, 𑀯𑀸𑀴𑀫𑀺𑀕𑀲𑀫𑀸𑀓𑀼𑀮𑁂.

𑁫𑁪. ‘‘𑀦 𑀓𑁄𑀘𑀺 𑀯𑀺𑀲𑀳𑀺 𑀕𑀦𑁆𑀢𑀼𑀁, 𑀘𑁂𑀢𑀺𑀬𑀁 𑀅𑀪𑀺𑀯𑀦𑁆𑀤𑀺𑀢𑀼𑀁;

𑀢𑀺𑀡𑀓𑀝𑁆𑀞𑀮𑀢𑁄𑀦𑀤𑁆𑀥𑀁, 𑀧𑀮𑀼𑀕𑁆𑀕𑀁 𑀆𑀲𑀺 𑀘𑁂𑀢𑀺𑀬𑀁.

𑁫𑁫. ‘‘𑀯𑀦𑀓𑀫𑁆𑀫𑀺𑀓𑁄 𑀢𑀤𑀸 𑀆𑀲𑀺𑀁, 𑀧𑀺𑀢𑀼𑀫𑀸𑀢𑀼𑀫𑀢𑁂𑀦𑀳𑀁 [𑀧𑀺𑀢𑀼𑀧𑁂𑀢𑀸𑀫𑀳𑁂𑀦𑀳𑀁 (𑀲𑀻.), 𑀧𑀺𑀢𑀸𑀧𑁂𑀢𑀸𑀫𑀳𑁂𑀦𑀳𑀁 (𑀲𑁆𑀬𑀸.)];

𑀅𑀤𑁆𑀤𑀲𑀁 𑀯𑀺𑀧𑀺𑀦𑁂 𑀣𑀽𑀧𑀁, 𑀮𑀼𑀕𑁆𑀕𑀁 𑀢𑀺𑀡𑀮𑀢𑀸𑀓𑀼𑀮𑀁.

𑁫𑁬. ‘‘𑀤𑀺𑀲𑁆𑀯𑀸𑀦𑀸𑀳𑀁 𑀩𑀼𑀤𑁆𑀥𑀣𑀽𑀧𑀁, 𑀕𑀭𑀼𑀘𑀺𑀢𑁆𑀢𑀁 𑀉𑀧𑀝𑁆𑀞𑀳𑀺𑀁;

𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 𑀣𑀽𑀧𑁄𑀬𑀁, 𑀧𑀮𑀼𑀕𑁆𑀕𑁄 𑀅𑀘𑁆𑀙𑀢𑀻 𑀯𑀦𑁂.

𑁫𑁭. ‘‘𑀦𑀘𑁆𑀙𑀦𑁆𑀦𑀁 𑀦𑀧𑁆𑀧𑀢𑀺𑀭𑀽𑀧𑀁, 𑀚𑀸𑀦𑀦𑁆𑀢𑀲𑁆𑀲 𑀕𑀼𑀡𑀸𑀕𑀼𑀡𑀁;

𑀩𑀼𑀤𑁆𑀥𑀣𑀽𑀧𑀁 𑀅𑀲𑁄𑀥𑁂𑀢𑁆𑀯𑀸, 𑀅𑀜𑁆𑀜𑀁 𑀓𑀫𑁆𑀫𑀁 𑀧𑀬𑁄𑀚𑀬𑁂.

𑁫𑁮. ‘‘𑀢𑀺𑀡𑀓𑀝𑁆𑀞𑀜𑁆𑀘 𑀯𑀮𑁆𑀮𑀺𑀜𑁆𑀘, 𑀲𑁄𑀥𑀬𑀺𑀢𑁆𑀯𑀸𑀦 𑀘𑁂𑀢𑀺𑀬𑁂;

𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞 𑀯𑀸𑀭𑀸𑀦𑀺 [𑀅𑀝𑁆𑀞 𑀞𑀸𑀦𑀸𑀦𑀺 (𑀓.)], 𑀧𑀝𑀺𑀓𑀼𑀝𑀺𑀓𑁄 𑀅𑀕𑀘𑁆𑀙𑀳𑀁.

𑁫𑁯. ‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

𑁬𑁦. ‘‘𑀢𑀢𑁆𑀣 𑀫𑁂 𑀲𑀼𑀓𑀢𑀁 𑀩𑁆𑀬𑀫𑁆𑀳𑀁, 𑀲𑁄𑀯𑀡𑁆𑀡𑀁 𑀲𑀧𑀪𑀲𑁆𑀲𑀭𑀁;

𑀲𑀝𑁆𑀞𑀺𑀬𑁄𑀚𑀦𑀫𑀼𑀩𑁆𑀩𑀺𑀤𑁆𑀥𑀁, 𑀢𑀺𑀁𑀲𑀬𑁄𑀚𑀦𑀯𑀺𑀢𑁆𑀣𑀢𑀁.

𑁬𑁧. ‘‘𑀢𑀺𑀲𑀢𑀸𑀦𑀺 𑀘 𑀯𑀸𑀭𑀸𑀦𑀺, 𑀤𑁂𑀯𑀭𑀚𑁆𑀚𑀫𑀓𑀸𑀭𑀬𑀺𑀁;

𑀧𑀜𑁆𑀘𑀯𑀻𑀲𑀢𑀺𑀓𑁆𑀔𑀢𑁆𑀢𑀼𑀜𑁆𑀘, 𑀘𑀓𑁆𑀓𑀯𑀢𑁆𑀢𑀻 𑀅𑀳𑁄𑀲𑀳𑀁.

𑁬𑁨. ‘‘𑀪𑀯𑀸𑀪𑀯𑁂 𑀲𑀁𑀲𑀭𑀦𑁆𑀢𑁄, 𑀫𑀳𑀸𑀪𑁄𑀕𑀁 𑀮𑀪𑀸𑀫𑀳𑀁;

𑀪𑁄𑀕𑁂 𑀫𑁂 𑀊𑀦𑀢𑀸 𑀦𑀢𑁆𑀣𑀺, 𑀲𑁄𑀥𑀦𑀸𑀬 𑀇𑀤𑀁 𑀨𑀮𑀁.

𑁬𑁩. ‘‘𑀲𑀺𑀯𑀺𑀓𑀸 𑀳𑀢𑁆𑀣𑀺𑀔𑀦𑁆𑀥𑁂𑀦, 𑀯𑀺𑀧𑀺𑀦𑁂 𑀕𑀘𑁆𑀙𑀢𑁄 𑀫𑀫;

𑀬𑀁 𑀬𑀁 𑀤𑀺𑀲𑀸𑀳𑀁 𑀕𑀘𑁆𑀙𑀸𑀫𑀺, 𑀲𑀭𑀡𑀁 𑀲𑀫𑁆𑀧𑀢𑁂 [𑀲𑀺𑀚𑁆𑀛𑀢𑁂 (𑀓.)] 𑀯𑀦𑀁.

𑁬𑁪. ‘‘𑀔𑀸𑀡𑀼𑀁 𑀯𑀸 𑀓𑀡𑁆𑀝𑀓𑀁 𑀯𑀸𑀧𑀺, 𑀦𑀸𑀳𑀁 𑀧𑀲𑁆𑀲𑀸𑀫𑀺 𑀘𑀓𑁆𑀔𑀼𑀦𑀸;

𑀧𑀼𑀜𑁆𑀜𑀓𑀫𑁆𑀫𑁂𑀦 𑀲𑀁𑀬𑀼𑀢𑁆𑀢𑁄, 𑀲𑀬𑀫𑁂𑀯𑀸𑀧𑀦𑀻𑀬𑀭𑁂.

𑁬𑁫. ‘‘𑀓𑀼𑀝𑁆𑀞𑀁 𑀕𑀡𑁆𑀟𑁄 𑀓𑀺𑀮𑀸𑀲𑁄 𑀘, 𑀅𑀧𑀫𑀸𑀭𑁄 𑀯𑀺𑀢𑀘𑁆𑀙𑀺𑀓𑀸;

𑀤𑀤𑁆𑀤𑀼 𑀓𑀘𑁆𑀙𑀼 [𑀓𑀡𑁆𑀟𑀼 (𑀲𑁆𑀬𑀸.)] 𑀘 𑀫𑁂 𑀦𑀢𑁆𑀣𑀺, 𑀲𑁄𑀥𑀦𑀸𑀬 𑀇𑀤𑀁 𑀨𑀮𑀁.

𑁬𑁬. ‘‘𑀅𑀜𑁆𑀜𑀫𑁆𑀧𑀺 𑀫𑁂 𑀅𑀘𑁆𑀙𑀭𑀺𑀬𑀁, 𑀩𑀼𑀤𑁆𑀥𑀣𑀽𑀧𑀲𑁆𑀲 𑀲𑁄𑀥𑀦𑁂 [𑀩𑀼𑀤𑁆𑀥𑀣𑀽𑀧𑀫𑁆𑀳𑀺 𑀲𑁄𑀥𑀺𑀢𑁂 (𑀲𑁆𑀬𑀸.)];

𑀦𑀸𑀪𑀺𑀚𑀸𑀦𑀸𑀫𑀺 𑀫𑁂 𑀓𑀸𑀬𑁂, 𑀚𑀸𑀢𑀁 𑀧𑀺𑀴𑀓𑀩𑀺𑀦𑁆𑀤𑀼𑀓𑀁.

𑁬𑁭. ‘‘𑀅𑀜𑁆𑀜𑀫𑁆𑀧𑀺 𑀫𑁂 𑀅𑀘𑁆𑀙𑀭𑀺𑀬𑀁, 𑀩𑀼𑀤𑁆𑀥𑀣𑀽𑀧𑀫𑁆𑀳𑀺 𑀲𑁄𑀥𑀺𑀢𑁂 [𑀲𑀩𑁆𑀩𑀢𑁆𑀣𑀧𑀺 𑀏𑀯𑀫𑁂𑀯 𑀤𑀺𑀲𑁆𑀲𑀢𑀺, 𑀢𑀣𑀸 𑀉𑀧𑀭𑀺𑀧𑀺];

𑀤𑀼𑀯𑁂 𑀪𑀯𑁂 𑀲𑀁𑀲𑀭𑀸𑀫𑀺, 𑀤𑁂𑀯𑀢𑁆𑀢𑁂 𑀅𑀣 𑀫𑀸𑀦𑀼𑀲𑁂.