𑁮. 𑀉𑀢𑁆𑀢𑀭𑁂𑀬𑁆𑀬𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁯𑁦. ‘‘𑀦𑀕𑀭𑁂 𑀳𑀁𑀲𑀯𑀢𑀺𑀬𑀸, 𑀅𑀳𑁄𑀲𑀺𑀁 𑀩𑁆𑀭𑀸𑀳𑁆𑀫𑀡𑁄 𑀢𑀤𑀸;

𑀅𑀚𑁆𑀛𑀸𑀬𑀓𑁄 𑀫𑀦𑁆𑀢𑀥𑀭𑁄, 𑀢𑀺𑀡𑁆𑀡𑀁 𑀯𑁂𑀤𑀸𑀦 𑀧𑀸𑀭𑀕𑀽.

𑁯𑁧. ‘‘𑀧𑀼𑀭𑀓𑁆𑀔𑀢𑁄 𑀲𑀲𑀺𑀲𑁆𑀲𑁂𑀳𑀺, 𑀚𑀸𑀢𑀺𑀫𑀸 𑀘 𑀲𑀼𑀲𑀺𑀓𑁆𑀔𑀺𑀢𑁄;

𑀢𑁄𑀬𑀸𑀪𑀺𑀲𑁂𑀘𑀦𑀢𑁆𑀣𑀸𑀬, 𑀦𑀕𑀭𑀸 𑀦𑀺𑀓𑁆𑀔𑀫𑀺𑀁 𑀢𑀤𑀸.

𑁯𑁨. ‘‘𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄, 𑀲𑀩𑁆𑀩𑀥𑀫𑁆𑀫𑀸𑀦 𑀧𑀸𑀭𑀕𑀽;

𑀔𑀻𑀡𑀸𑀲𑀯𑀲𑀳𑀲𑁆𑀲𑁂𑀳𑀺, 𑀧𑀸𑀯𑀺𑀲𑀻 𑀦𑀕𑀭𑀁 𑀚𑀺𑀦𑁄.

𑁯𑁩. ‘‘𑀲𑀼𑀘𑀸𑀭𑀼𑀭𑀽𑀧𑀁 𑀤𑀺𑀲𑁆𑀯𑀸𑀦, 𑀆𑀦𑁂𑀜𑁆𑀚𑀓𑀸𑀭𑀺𑀢𑀁 𑀯𑀺𑀬;

𑀧𑀭𑀺𑀯𑀼𑀢𑀁 𑀅𑀭𑀳𑀦𑁆𑀢𑁂𑀳𑀺, 𑀤𑀺𑀲𑁆𑀯𑀸 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁.

𑁯𑁪. ‘‘𑀲𑀺𑀭𑀲𑁆𑀫𑀺𑀁 𑀅𑀜𑁆𑀚𑀮𑀺𑀁 𑀓𑀢𑁆𑀯𑀸, 𑀦𑀫𑀲𑁆𑀲𑀺𑀢𑁆𑀯𑀸𑀦 𑀲𑀼𑀩𑁆𑀩𑀢𑀁;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀉𑀢𑁆𑀢𑀭𑀻𑀬𑀫𑀤𑀸𑀲𑀳𑀁.

𑁯𑁫. ‘‘𑀉𑀪𑁄 𑀳𑀢𑁆𑀣𑁂𑀳𑀺 𑀧𑀕𑁆𑀕𑀬𑁆𑀳, 𑀲𑀸𑀝𑀓𑀁 𑀉𑀓𑁆𑀔𑀺𑀧𑀺𑀁 𑀅𑀳𑀁;

𑀬𑀸𑀯𑀢𑀸 𑀩𑀼𑀤𑁆𑀥𑀧𑀭𑀺𑀲𑀸, 𑀢𑀸𑀯 𑀙𑀸𑀤𑁂𑀲𑀺 𑀲𑀸𑀝𑀓𑁄.

𑁯𑁬. ‘‘𑀧𑀺𑀡𑁆𑀟𑀘𑀸𑀭𑀁 𑀘𑀭𑀦𑁆𑀢𑀲𑁆𑀲, 𑀫𑀳𑀸𑀪𑀺𑀓𑁆𑀔𑀼𑀕𑀡𑀸𑀤𑀺𑀦𑁄;

𑀙𑀤𑀁 𑀓𑀭𑁄𑀦𑁆𑀢𑁄 𑀅𑀝𑁆𑀞𑀸𑀲𑀺, 𑀳𑀸𑀲𑀬𑀦𑁆𑀢𑁄 𑀫𑀫𑀁 𑀢𑀤𑀸.

𑁯𑁭. ‘‘𑀖𑀭𑀢𑁄 𑀦𑀺𑀓𑁆𑀔𑀫𑀦𑁆𑀢𑀲𑁆𑀲, 𑀲𑀬𑀫𑁆𑀪𑀽 𑀅𑀕𑁆𑀕𑀧𑀼𑀕𑁆𑀕𑀮𑁄;

𑀯𑀻𑀣𑀺𑀬𑀁𑀯 𑀞𑀺𑀢𑁄 𑀲𑀢𑁆𑀣𑀸, 𑀅𑀓𑀸 𑀫𑁂 [𑀅𑀓𑀸𑀲𑀺 (𑀲𑁆𑀬𑀸.)] 𑀅𑀦𑀼𑀫𑁄𑀤𑀦𑀁.

𑁯𑁮. ‘‘𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀬𑁄 𑀫𑁂 𑀅𑀤𑀸𑀲𑀺 𑀲𑀸𑀝𑀓𑀁;

𑀢𑀫𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀲𑀼𑀡𑁄𑀣 𑀫𑀫 𑀪𑀸𑀲𑀢𑁄.

𑁯𑁯. ‘‘‘𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑀸𑀦𑀺, 𑀤𑁂𑀯𑀮𑁄𑀓𑁂 𑀭𑀫𑀺𑀲𑁆𑀲𑀢𑀺;

𑀧𑀜𑁆𑀜𑀸𑀲𑀓𑁆𑀔𑀢𑁆𑀢𑀼𑀁 𑀤𑁂𑀯𑀺𑀦𑁆𑀤𑁄, 𑀤𑁂𑀯𑀭𑀚𑁆𑀚𑀁 𑀓𑀭𑀺𑀲𑁆𑀲𑀢𑀺.

𑁧𑁦𑁦. ‘‘‘𑀤𑁂𑀯𑀮𑁄𑀓𑁂 𑀯𑀲𑀦𑁆𑀢𑀲𑁆𑀲, 𑀧𑀼𑀜𑁆𑀜𑀓𑀫𑁆𑀫𑀲𑀫𑀗𑁆𑀕𑀺𑀦𑁄;

𑀲𑀫𑀦𑁆𑀢𑀸 𑀬𑁄𑀚𑀦𑀲𑀢𑀁, 𑀤𑀼𑀲𑁆𑀲𑀘𑁆𑀙𑀦𑁆𑀦𑀁 𑀪𑀯𑀺𑀲𑁆𑀲𑀢𑀺.

𑁧𑁦𑁧. ‘‘‘𑀙𑀢𑁆𑀢𑀺𑀁𑀲𑀓𑁆𑀔𑀢𑁆𑀢𑀼𑀁 𑀭𑀸𑀚𑀸 𑀘, 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺;

𑀧𑀤𑁂𑀲𑀭𑀚𑁆𑀚𑀁 𑀯𑀺𑀧𑀼𑀮𑀁, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀁.

𑁧𑁦𑁨. ‘‘‘𑀪𑀯𑁂 𑀲𑀁𑀲𑀭𑀫𑀸𑀦𑀲𑁆𑀲, 𑀧𑀼𑀜𑁆𑀜𑀓𑀫𑁆𑀫𑀲𑀫𑀗𑁆𑀕𑀺𑀦𑁄;

𑀫𑀦𑀲𑀸 𑀧𑀢𑁆𑀣𑀺𑀢𑀁 𑀲𑀩𑁆𑀩𑀁, 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺 𑀢𑀸𑀯𑀤𑁂.

𑁧𑁦𑁩. ‘‘‘𑀓𑁄𑀲𑁂𑀬𑁆𑀬𑀓𑀫𑁆𑀩𑀮𑀺𑀬𑀸𑀦𑀺 [𑀓𑁄𑀲𑁂𑀬𑁆𑀬𑀓𑀫𑁆𑀩𑀮𑀻𑀬𑀸𑀦𑀺 (𑀲𑀻.)], 𑀔𑁄𑀫𑀓𑀧𑁆𑀧𑀸𑀲𑀺𑀓𑀸𑀦𑀺 𑀘;

𑀫𑀳𑀕𑁆𑀖𑀸𑀦𑀺 𑀘 𑀤𑀼𑀲𑁆𑀲𑀸𑀦𑀺, 𑀧𑀝𑀺𑀮𑀘𑁆𑀙𑀢𑀺𑀬𑀁 𑀦𑀭𑁄.

𑁧𑁦𑁪. ‘‘‘𑀫𑀦𑀲𑀸 𑀧𑀢𑁆𑀣𑀺𑀢𑀁 𑀲𑀩𑁆𑀩𑀁, 𑀧𑀝𑀺𑀮𑀘𑁆𑀙𑀢𑀺𑀬𑀁 𑀦𑀭𑁄;

𑀏𑀓𑀤𑀼𑀲𑁆𑀲𑀲𑁆𑀲 𑀯𑀺𑀧𑀸𑀓𑀁, 𑀅𑀦𑀼𑀪𑁄𑀲𑁆𑀲𑀢𑀺 𑀲𑀩𑁆𑀩𑀤𑀸.

𑁧𑁦𑁫. ‘‘‘𑀲𑁄 𑀧𑀘𑁆𑀙𑀸 𑀧𑀩𑁆𑀩𑀚𑀺𑀢𑁆𑀯𑀸𑀦, 𑀲𑀼𑀓𑁆𑀓𑀫𑀽𑀮𑁂𑀦 𑀘𑁄𑀤𑀺𑀢𑁄;

𑀕𑁄𑀢𑀫𑀲𑁆𑀲 𑀪𑀕𑀯𑀢𑁄, 𑀥𑀫𑁆𑀫𑀁 𑀲𑀘𑁆𑀙𑀺𑀓𑀭𑀺𑀲𑁆𑀲𑀢𑀺’.

𑁧𑁦𑁬. ‘‘𑀅𑀳𑁄 𑀫𑁂 𑀲𑀼𑀓𑀢𑀁 𑀓𑀫𑁆𑀫𑀁, 𑀲𑀩𑁆𑀩𑀜𑁆𑀜𑀼𑀲𑁆𑀲 𑀫𑀳𑁂𑀲𑀺𑀦𑁄;

𑀏𑀓𑀸𑀳𑀁 𑀲𑀸𑀝𑀓𑀁 𑀤𑀢𑁆𑀯𑀸, 𑀧𑀢𑁆𑀢𑁄𑀫𑁆𑀳𑀺 𑀅𑀫𑀢𑀁 𑀧𑀤𑀁.

𑁧𑁦𑁭. ‘‘𑀫𑀡𑁆𑀟𑀧𑁂 𑀭𑀼𑀓𑁆𑀔𑀫𑀽𑀮𑁂 𑀯𑀸, 𑀯𑀲𑀢𑁄 𑀲𑀼𑀜𑁆𑀜𑀓𑁂 𑀖𑀭𑁂;

𑀥𑀸𑀭𑁂𑀢𑀺 𑀤𑀼𑀲𑁆𑀲𑀙𑀤𑀦𑀁, 𑀲𑀫𑀦𑁆𑀢𑀸 𑀩𑁆𑀬𑀸𑀫𑀢𑁄 𑀫𑀫.

𑁧𑁦𑁮. ‘‘𑀅𑀯𑀺𑀜𑁆𑀜𑀢𑁆𑀢𑀁 𑀦𑀺𑀯𑀸𑀲𑁂𑀫𑀺 [𑀅𑀯𑀺𑀜𑁆𑀜𑀢𑁆𑀢𑀸𑀦𑀺 𑀲𑁂𑀯𑀸𑀫𑀺 (?)], 𑀘𑀻𑀯𑀭𑀁 𑀧𑀘𑁆𑀘𑀬𑀜𑁆𑀘𑀳𑀁;

𑀮𑀸𑀪𑀻 [𑀮𑀸𑀪𑀺𑀫𑁆𑀳𑀺 (𑀲𑁆𑀬𑀸.)] 𑀅𑀦𑁆𑀦𑀲𑁆𑀲 𑀧𑀸𑀦𑀲𑁆𑀲, 𑀉𑀢𑁆𑀢𑀭𑁂𑀬𑁆𑀬𑀲𑁆𑀲𑀺𑀤𑀁 𑀨𑀮𑀁.

𑁧𑁦𑁯. ‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀬𑀁 𑀓𑀫𑁆𑀫𑀫𑀓𑀭𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀯𑀢𑁆𑀣𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁧𑁧𑁦. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀉𑀢𑁆𑀢𑀭𑁂𑀬𑁆𑀬𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀉𑀢𑁆𑀢𑀭𑁂𑀬𑁆𑀬𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀅𑀝𑁆𑀞𑀫𑀁.