𑁭. 𑀢𑀺𑀡𑀓𑀼𑀝𑀺𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁭𑁪. ‘‘𑀦𑀕𑀭𑁂 𑀩𑀦𑁆𑀥𑀼𑀫𑀢𑀺𑀬𑀸, 𑀅𑀳𑁄𑀲𑀺𑀁 𑀧𑀭𑀓𑀫𑁆𑀫𑀺𑀓𑁄;

𑀧𑀭𑀓𑀫𑁆𑀫𑀸𑀬𑀦𑁂 𑀬𑀼𑀢𑁆𑀢𑁄, 𑀧𑀭𑀪𑀢𑁆𑀢𑀁 𑀅𑀧𑀲𑁆𑀲𑀺𑀢𑁄.

𑁭𑁫. ‘‘𑀭𑀳𑁄𑀕𑀢𑁄 𑀦𑀺𑀲𑀻𑀤𑀺𑀢𑁆𑀯𑀸, 𑀏𑀯𑀁 𑀘𑀺𑀦𑁆𑀢𑁂𑀲𑀳𑀁 𑀢𑀤𑀸;

𑀩𑀼𑀤𑁆𑀥𑁄 𑀮𑁄𑀓𑁂 𑀲𑀫𑀼𑀧𑁆𑀧𑀦𑁆𑀦𑁄, 𑀅𑀥𑀺𑀓𑀸𑀭𑁄 𑀘 𑀦𑀢𑁆𑀣𑀺 𑀫𑁂.

𑁭𑁬. ‘‘𑀓𑀸𑀮𑁄 𑀫𑁂 𑀕𑀢𑀺𑀁 [𑀓𑀸𑀮𑁄 𑀕𑀢𑀺𑀁 𑀫𑁂 (𑀲𑀻. 𑀲𑁆𑀬𑀸.)] 𑀲𑁄𑀥𑁂𑀢𑀼𑀁, 𑀔𑀡𑁄 𑀫𑁂 𑀧𑀝𑀺𑀧𑀸𑀤𑀺𑀢𑁄;

𑀤𑀼𑀓𑁆𑀔𑁄 𑀦𑀺𑀭𑀬𑀲𑀫𑁆𑀨𑀲𑁆𑀲𑁄, 𑀅𑀧𑀼𑀜𑁆𑀜𑀸𑀦𑀜𑁆𑀳𑀺 𑀧𑀸𑀡𑀺𑀦𑀁.

𑁭𑁭. ‘‘𑀏𑀯𑀸𑀳𑀁 𑀘𑀺𑀦𑁆𑀢𑀬𑀺𑀢𑁆𑀯𑀸𑀦, 𑀓𑀫𑁆𑀫𑀲𑀸𑀫𑀺𑀁 𑀉𑀧𑀸𑀕𑀫𑀺𑀁;

𑀏𑀓𑀸𑀳𑀁 𑀓𑀫𑁆𑀫𑀁 𑀬𑀸𑀘𑀺𑀢𑁆𑀯𑀸, 𑀯𑀺𑀧𑀺𑀦𑀁 𑀧𑀸𑀯𑀺𑀲𑀺𑀁 𑀅𑀳𑀁.

𑁭𑁮. ‘‘𑀢𑀺𑀡𑀓𑀝𑁆𑀞𑀜𑁆𑀘 𑀯𑀮𑁆𑀮𑀺𑀜𑁆𑀘, 𑀆𑀳𑀭𑀺𑀢𑁆𑀯𑀸𑀦𑀳𑀁 𑀢𑀤𑀸;

𑀢𑀺𑀤𑀡𑁆𑀟𑀓𑁂 𑀞𑀧𑁂𑀢𑁆𑀯𑀸𑀦, 𑀅𑀓𑀁 𑀢𑀺𑀡𑀓𑀼𑀝𑀺𑀁 𑀅𑀳𑀁.

𑁭𑁯. ‘‘𑀲𑀗𑁆𑀖𑀲𑁆𑀲𑀢𑁆𑀣𑀸𑀬 𑀓𑀼𑀝𑀺𑀓𑀁, 𑀦𑀺𑀬𑁆𑀬𑀸𑀤𑁂𑀢𑁆𑀯𑀸𑀦 [𑀦𑀺𑀬𑁆𑀬𑀸𑀢𑁂𑀢𑁆𑀯𑀸𑀦 (𑀲𑀻.)] 𑀢𑀁 𑀅𑀳𑀁;

𑀢𑀤𑀳𑁂𑀬𑁂𑀯 𑀆𑀕𑀦𑁆𑀢𑁆𑀯𑀸, 𑀓𑀫𑁆𑀫𑀲𑀸𑀫𑀺𑀁 𑀉𑀧𑀸𑀕𑀫𑀺𑀁.

𑁮𑁦. ‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁;

𑀢𑀢𑁆𑀣 𑀫𑁂 𑀲𑀼𑀓𑀢𑀁 𑀩𑁆𑀬𑀫𑁆𑀳𑀁, 𑀓𑀼𑀝𑀺𑀓𑀸𑀬 𑀲𑀼𑀦𑀺𑀫𑁆𑀫𑀺𑀢𑀁 [𑀢𑀺𑀡𑀓𑀼𑀝𑀺𑀓𑀸𑀬 𑀦𑀺𑀫𑁆𑀫𑀺𑀢𑀁 (𑀲𑀻.)].

𑁮𑁧. ‘‘𑀲𑀳𑀲𑁆𑀲𑀓𑀡𑁆𑀟𑀁 𑀲𑀢𑀪𑁂𑀡𑁆𑀟𑀼, 𑀥𑀚𑀸𑀮𑀼 𑀳𑀭𑀺𑀢𑀸𑀫𑀬𑀁;

𑀲𑀢𑀲𑀳𑀲𑁆𑀲𑀦𑀺𑀬𑁆𑀬𑀽𑀳𑀸, 𑀩𑁆𑀬𑀫𑁆𑀳𑁂 𑀧𑀸𑀢𑀼𑀪𑀯𑀺𑀁𑀲𑀼 𑀫𑁂.

𑁮𑁨. ‘‘𑀬𑀁 𑀬𑀁 𑀬𑁄𑀦𑀼𑀧𑀧𑀚𑁆𑀚𑀸𑀫𑀺, 𑀤𑁂𑀯𑀢𑁆𑀢𑀁 𑀅𑀣 𑀫𑀸𑀦𑀼𑀲𑀁;

𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀧𑀸𑀲𑀸𑀤𑁄 𑀉𑀧𑀢𑀺𑀝𑁆𑀞𑀢𑀺.

𑁮𑁩. ‘‘𑀪𑀬𑀁 𑀯𑀸 𑀙𑀫𑁆𑀪𑀺𑀢𑀢𑁆𑀢𑀁 𑀯𑀸, 𑀮𑁄𑀫𑀳𑀁𑀲𑁄 𑀦 𑀯𑀺𑀚𑁆𑀚𑀢𑀺;

𑀢𑀸𑀲𑀁 𑀫𑀫 𑀦 𑀚𑀸𑀦𑀸𑀫𑀺, 𑀢𑀺𑀡𑀓𑀼𑀝𑀺𑀓𑀸𑀬𑀺𑀤𑀁 [𑀢𑀺𑀡𑀓𑀼𑀝𑀺𑀬𑀺𑀤𑀁 (𑀓.)] 𑀨𑀮𑀁.

𑁮𑁪. ‘‘𑀲𑀻𑀳𑀩𑁆𑀬𑀕𑁆𑀖𑀸 𑀘 𑀤𑀻𑀧𑀻 𑀘, 𑀅𑀘𑁆𑀙𑀓𑁄𑀓𑀢𑀭𑀘𑁆𑀙𑀓𑀸 [𑀢𑀭𑀘𑁆𑀙𑀬𑁄 (𑀲𑁆𑀬𑀸. 𑀓.)];

𑀲𑀩𑁆𑀩𑁂 𑀫𑀁 𑀧𑀭𑀺𑀯𑀚𑁆𑀚𑁂𑀦𑁆𑀢𑀺, 𑀢𑀺𑀡𑀓𑀼𑀝𑀺𑀓𑀸𑀬𑀺𑀤𑀁 𑀨𑀮𑀁.

𑁮𑁫. ‘‘𑀲𑀭𑀻𑀲𑀧𑀸 [𑀲𑀺𑀭𑀺𑀁𑀲𑀧𑀸 (𑀲𑀻. 𑀲𑁆𑀬𑀸.), 𑀲𑀭𑀺𑀁𑀲𑀧𑀸 (𑀓.)] 𑀘 𑀪𑀽𑀢𑀸 𑀘, 𑀅𑀳𑀻 𑀓𑀼𑀫𑁆𑀪𑀡𑁆𑀟𑀭𑀓𑁆𑀔𑀲𑀸;

𑀢𑁂𑀧𑀺 𑀫𑀁 𑀧𑀭𑀺𑀯𑀚𑁆𑀚𑁂𑀦𑁆𑀢𑀺, 𑀢𑀺𑀡𑀓𑀼𑀝𑀺𑀓𑀸𑀬𑀺𑀤𑀁 𑀨𑀮𑀁.

𑁮𑁬. ‘‘𑀦 𑀧𑀸𑀧𑀲𑀼𑀧𑀺𑀦𑀲𑁆𑀲𑀸𑀧𑀺, 𑀲𑀭𑀸𑀫𑀺 𑀤𑀲𑁆𑀲𑀦𑀁 𑀫𑀫;

𑀉𑀧𑀝𑁆𑀞𑀺𑀢𑀸 𑀲𑀢𑀺 𑀫𑀬𑁆𑀳𑀁, 𑀢𑀺𑀡𑀓𑀼𑀝𑀺𑀓𑀸𑀬𑀺𑀤𑀁 𑀨𑀮𑀁.

𑁮𑁭. ‘‘𑀢𑀸𑀬𑁂𑀯 𑀢𑀺𑀡𑀓𑀼𑀝𑀺𑀓𑀸𑀬, 𑀅𑀦𑀼𑀪𑁄𑀢𑁆𑀯𑀸𑀦 𑀲𑀫𑁆𑀧𑀤𑀸;

𑀕𑁄𑀢𑀫𑀲𑁆𑀲 𑀪𑀕𑀯𑀢𑁄, 𑀥𑀫𑁆𑀫𑀁 𑀲𑀘𑁆𑀙𑀺𑀓𑀭𑀺𑀁 𑀅𑀳𑀁.

𑁮𑁮. ‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀓𑀫𑁆𑀫𑀫𑀓𑀭𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀢𑀺𑀡𑀓𑀼𑀝𑀺𑀓𑀸𑀬𑀺𑀤𑀁 𑀨𑀮𑀁.

𑁮𑁯. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀢𑀺𑀡𑀓𑀼𑀝𑀺𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀢𑀺𑀡𑀓𑀼𑀝𑀺𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀲𑀢𑁆𑀢𑀫𑀁.