𑁯. 𑀧𑀼𑀧𑁆𑀨𑀘𑁆𑀙𑀢𑁆𑀢𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁭𑁩. ‘‘𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄, 𑀮𑁄𑀓𑀚𑁂𑀝𑁆𑀞𑀲𑁆𑀲 𑀢𑀸𑀤𑀺𑀦𑁄;

𑀲𑀘𑁆𑀘𑀁 𑀧𑀓𑀸𑀲𑀬𑀦𑁆𑀢𑀲𑁆𑀲, 𑀦𑀺𑀩𑁆𑀩𑀸𑀧𑁂𑀦𑁆𑀢𑀲𑁆𑀲 𑀧𑀸𑀡𑀺𑀦𑁄.

𑁭𑁪. ‘‘𑀚𑀮𑀚𑀁 𑀆𑀳𑀭𑀺𑀢𑁆𑀯𑀸𑀦, 𑀲𑀢𑀧𑀢𑁆𑀢𑀁 𑀫𑀦𑁄𑀭𑀫𑀁;

𑀧𑀼𑀧𑁆𑀨𑀲𑁆𑀲 𑀙𑀢𑁆𑀢𑀁 𑀓𑀢𑁆𑀯𑀸𑀦, 𑀩𑀼𑀤𑁆𑀥𑀲𑁆𑀲 𑀅𑀪𑀺𑀭𑁄𑀧𑀬𑀺𑀁.

𑁭𑁫. ‘‘𑀲𑀺𑀤𑁆𑀥𑀢𑁆𑀣𑁄 𑀘 𑀮𑁄𑀓𑀯𑀺𑀤𑀽, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄;

𑀪𑀺𑀓𑁆𑀔𑀼𑀲𑀗𑁆𑀖𑁂 𑀞𑀺𑀢𑁄 𑀲𑀢𑁆𑀣𑀸, 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀣.

𑁭𑁬. ‘‘‘𑀬𑁄 𑀫𑁂 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀧𑀼𑀧𑁆𑀨𑀘𑁆𑀙𑀢𑁆𑀢𑀁 𑀅𑀥𑀸𑀭𑀬𑀺𑀁;

𑀢𑁂𑀦 𑀘𑀺𑀢𑁆𑀢𑀧𑁆𑀧𑀲𑀸𑀤𑁂𑀦, 𑀤𑀼𑀕𑁆𑀕𑀢𑀺𑀁 𑀲𑁄 𑀦 𑀕𑀘𑁆𑀙𑀢𑀺’.

𑁭𑁭. ‘‘𑀇𑀤𑀁 𑀯𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑁄, 𑀲𑀺𑀤𑁆𑀥𑀢𑁆𑀣𑁄 𑀮𑁄𑀓𑀦𑀸𑀬𑀓𑁄;

𑀉𑀬𑁆𑀬𑁄𑀚𑁂𑀢𑁆𑀯𑀸𑀦 𑀧𑀭𑀺𑀲𑀁, 𑀯𑁂𑀳𑀸𑀲𑀁 𑀦𑀪𑀫𑀼𑀕𑁆𑀕𑀫𑀺.

𑁭𑁮. ‘‘𑀯𑀼𑀝𑁆𑀞𑀺𑀢𑁂 𑀦𑀭𑀤𑁂𑀯𑀫𑁆𑀳𑀺, 𑀲𑁂𑀢𑀘𑁆𑀙𑀢𑁆𑀢𑀫𑁆𑀧𑀺 𑀯𑀼𑀝𑁆𑀞𑀳𑀺;

𑀧𑀼𑀭𑀢𑁄 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲, 𑀕𑀘𑁆𑀙𑀢𑀺 𑀙𑀢𑁆𑀢𑀫𑀼𑀢𑁆𑀢𑀫𑀁.

𑁭𑁯. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀙𑀢𑁆𑀢𑀁 𑀅𑀪𑀺𑀭𑁄𑀧𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀧𑀼𑀧𑁆𑀨𑀘𑁆𑀙𑀢𑁆𑀢𑀲𑁆𑀲𑀺𑀤𑀁 𑀨𑀮𑀁.

𑁮𑁦. ‘‘𑀘𑀢𑀼𑀲𑀢𑁆𑀢𑀢𑀺𑀓𑀧𑁆𑀧𑀫𑁆𑀳𑀺, 𑀅𑀝𑁆𑀞 𑀚𑀮𑀲𑀺𑀔𑀸 𑀅𑀳𑀽;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑀸, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁮𑁧. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀼𑀧𑁆𑀨𑀘𑁆𑀙𑀢𑁆𑀢𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀼𑀧𑁆𑀨𑀘𑁆𑀙𑀢𑁆𑀢𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀦𑀯𑀫𑀁.