𑁧𑁦. 𑀲𑀧𑀭𑀺𑀯𑀸𑀭𑀙𑀢𑁆𑀢𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁮𑁨. ‘‘𑀧𑀤𑀼𑀫𑀼𑀢𑁆𑀢𑀭𑁄 𑀮𑁄𑀓𑀯𑀺𑀤𑀽, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄;

𑀆𑀓𑀸𑀲𑁂 𑀚𑀮𑀯𑀼𑀝𑁆𑀞𑀻𑀯 𑀯𑀲𑁆𑀲𑀢𑁂 [𑀯𑀲𑁆𑀲𑀢𑀺 (𑀲𑀻. 𑀲𑁆𑀬𑀸.), 𑀯𑀲𑁆𑀲𑁂𑀢𑀺 (?)] 𑀥𑀫𑁆𑀫𑀯𑀼𑀝𑁆𑀞𑀺𑀬𑀸.

𑁮𑁩. ‘‘𑀢𑀫𑀤𑁆𑀤𑀲𑀸𑀲𑀺𑀁 𑀲𑀫𑁆𑀩𑀼𑀤𑁆𑀥𑀁, 𑀤𑁂𑀲𑁂𑀦𑁆𑀢𑀁 𑀅𑀫𑀢𑀁 𑀧𑀤𑀁;

𑀲𑀓𑀁 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀅𑀕𑀫𑀸𑀲𑀺𑀁 𑀲𑀓𑀁 𑀖𑀭𑀁.

𑁮𑁪. ‘‘𑀙𑀢𑁆𑀢𑀁 𑀅𑀮𑀗𑁆𑀓𑀢𑀁 𑀕𑀬𑁆𑀳, 𑀉𑀧𑀕𑀘𑁆𑀙𑀺𑀁 𑀦𑀭𑀼𑀢𑁆𑀢𑀫𑀁;

𑀳𑀝𑁆𑀞𑁄 𑀳𑀝𑁆𑀞𑁂𑀦 𑀘𑀺𑀢𑁆𑀢𑁂𑀦, 𑀆𑀓𑀸𑀲𑁂 𑀉𑀓𑁆𑀔𑀺𑀧𑀺𑀁 𑀅𑀳𑀁.

𑁮𑁫. ‘‘𑀲𑀼𑀲𑀗𑁆𑀕𑀳𑀺𑀢𑀬𑀸𑀦𑀁𑀯, 𑀤𑀦𑁆𑀢𑁄𑀯 𑀲𑀸𑀯𑀓𑀼𑀢𑁆𑀢𑀫𑁄;

𑀉𑀧𑀕𑀦𑁆𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑀁, 𑀫𑀢𑁆𑀣𑀓𑁂 𑀲𑀫𑁆𑀧𑀢𑀺𑀝𑁆𑀞𑀳𑀺.

𑁮𑁬. ‘‘𑀅𑀦𑀼𑀓𑀫𑁆𑀧𑀓𑁄 𑀓𑀸𑀭𑀼𑀡𑀺𑀓𑁄, 𑀩𑀼𑀤𑁆𑀥𑁄 𑀮𑁄𑀓𑀕𑁆𑀕𑀦𑀸𑀬𑀓𑁄;

𑀪𑀺𑀓𑁆𑀔𑀼𑀲𑀗𑁆𑀖𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

𑁮𑁭. ‘‘‘𑀬𑁂𑀦 𑀙𑀢𑁆𑀢𑀫𑀺𑀤𑀁 𑀤𑀺𑀦𑁆𑀦𑀁, 𑀅𑀮𑀗𑁆𑀓𑀢𑀁 𑀫𑀦𑁄𑀭𑀫𑀁;

𑀢𑁂𑀦 𑀘𑀺𑀢𑁆𑀢𑀧𑁆𑀧𑀲𑀸𑀤𑁂𑀦, 𑀤𑀼𑀕𑁆𑀕𑀢𑀺𑀁 𑀲𑁄 𑀦 𑀕𑀘𑁆𑀙𑀢𑀺.

𑁮𑁮. ‘‘‘𑀲𑀢𑁆𑀢𑀓𑁆𑀔𑀢𑁆𑀢𑀼𑀜𑁆𑀘 𑀤𑁂𑀯𑁂𑀲𑀼, 𑀤𑁂𑀯𑀭𑀚𑁆𑀚𑀁 𑀓𑀭𑀺𑀲𑁆𑀲𑀢𑀺;

𑀩𑀸𑀢𑁆𑀢𑀺𑀁𑀲𑀓𑁆𑀔𑀢𑁆𑀢𑀼𑀜𑁆𑀘 𑀭𑀸𑀚𑀸, 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺.

𑁮𑁯. ‘‘‘𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑁆𑀳𑀺, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

𑁯𑁦. ‘‘‘𑀢𑀲𑁆𑀲 𑀥𑀫𑁆𑀫𑁂𑀲𑀼 𑀤𑀸𑀬𑀸𑀤𑁄, 𑀑𑀭𑀲𑁄 𑀥𑀫𑁆𑀫𑀦𑀺𑀫𑁆𑀫𑀺𑀢𑁄;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺𑀦𑀸𑀲𑀯𑁄’.

𑁯𑁧. ‘‘𑀩𑀼𑀤𑁆𑀥𑀲𑁆𑀲 𑀕𑀺𑀭𑀫𑀜𑁆𑀜𑀸𑀬, 𑀯𑀸𑀘𑀸𑀲𑀪𑀺𑀫𑀼𑀤𑀻𑀭𑀺𑀢𑀁;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀪𑀺𑀬𑁆𑀬𑁄 𑀳𑀸𑀲𑀁 𑀚𑀦𑁂𑀲𑀳𑀁.

𑁯𑁨. ‘‘𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀬𑁄𑀦𑀺𑀁, 𑀤𑀺𑀩𑁆𑀩𑀁 𑀬𑁄𑀦𑀺𑀁 [𑀤𑁂𑀯𑀬𑁄𑀦𑀺𑀁 (𑀲𑀻.), 𑀤𑀺𑀩𑁆𑀩𑀬𑁄𑀦𑀺𑀁 (𑀲𑁆𑀬𑀸.)] 𑀫𑀚𑁆𑀛𑀕𑀁;

𑀯𑀺𑀫𑀸𑀦𑀫𑀼𑀢𑁆𑀢𑀫𑀁 𑀫𑀬𑁆𑀳𑀁, 𑀅𑀩𑁆𑀪𑀼𑀕𑁆𑀕𑀢𑀁 𑀫𑀦𑁄𑀭𑀫𑀁.

𑁯𑁩. ‘‘𑀯𑀺𑀫𑀸𑀦𑀸 𑀦𑀺𑀓𑁆𑀔𑀫𑀦𑁆𑀢𑀲𑁆𑀲, 𑀲𑁂𑀢𑀘𑁆𑀙𑀢𑁆𑀢𑀁 𑀥𑀭𑀻𑀬𑀢𑀺;

𑀢𑀤𑀸 𑀲𑀜𑁆𑀜𑀁 𑀧𑀝𑀺𑀮𑀪𑀺𑀁, 𑀧𑀼𑀩𑁆𑀩𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁.

𑁯𑁪. ‘‘𑀤𑁂𑀯𑀮𑁄𑀓𑀸 𑀘𑀯𑀺𑀢𑁆𑀯𑀸𑀦, 𑀫𑀦𑀼𑀲𑁆𑀲𑀢𑁆𑀢𑀜𑁆𑀘 𑀆𑀕𑀫𑀺𑀁;

𑀙𑀢𑁆𑀢𑀺𑀁𑀲𑀓𑁆𑀔𑀢𑁆𑀢𑀼𑀁 𑀘𑀓𑁆𑀓𑀯𑀢𑁆𑀢𑀻, 𑀲𑀢𑁆𑀢𑀓𑀧𑁆𑀧𑀲𑀢𑀫𑁆𑀳𑀺𑀢𑁄.

𑁯𑁫. ‘‘𑀢𑀫𑁆𑀳𑀸 𑀓𑀸𑀬𑀸 𑀘𑀯𑀺𑀢𑁆𑀯𑀸𑀦, 𑀆𑀕𑀘𑁆𑀙𑀺𑀁 [𑀅𑀕𑀜𑁆𑀙𑀺𑀁 (?)] 𑀢𑀺𑀤𑀲𑀁 𑀧𑀼𑀭𑀁;

𑀲𑀁𑀲𑀭𑀺𑀢𑁆𑀯𑀸𑀦𑀼𑀧𑀼𑀩𑁆𑀩𑁂𑀦, 𑀫𑀸𑀦𑀼𑀲𑀁 𑀧𑀼𑀦𑀭𑀸𑀕𑀫𑀺𑀁.

𑁯𑁬. ‘‘𑀑𑀓𑁆𑀓𑀦𑁆𑀢𑀁 𑀫𑀸𑀢𑀼𑀓𑀼𑀘𑁆𑀙𑀺𑀁 𑀫𑀁, 𑀲𑁂𑀢𑁆𑀢𑀘𑁆𑀙𑀢𑁆𑀢𑀁 𑀅𑀥𑀸𑀭𑀬𑀼𑀁;

𑀚𑀸𑀢𑀺𑀬𑀸 𑀲𑀢𑁆𑀢𑀯𑀲𑁆𑀲𑁄𑀳𑀁, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁.

𑁯𑁭. ‘‘𑀲𑀼𑀦𑀦𑁆𑀤𑁄 𑀦𑀸𑀫 𑀦𑀸𑀫𑁂𑀦, 𑀩𑁆𑀭𑀸𑀳𑁆𑀫𑀡𑁄 𑀫𑀦𑁆𑀢𑀧𑀸𑀭𑀕𑀽;

𑀨𑀮𑀺𑀓𑀁 𑀙𑀢𑁆𑀢𑀫𑀸𑀤𑀸𑀬, 𑀲𑀸𑀯𑀓𑀕𑁆𑀕𑀲𑁆𑀲 𑀲𑁄 𑀢𑀤𑀸.

𑁯𑁮. ‘‘𑀅𑀦𑀼𑀫𑁄𑀤𑀺 𑀫𑀳𑀸𑀯𑀻𑀭𑁄, 𑀲𑀸𑀭𑀺𑀧𑀼𑀢𑁆𑀢𑁄 𑀫𑀳𑀸𑀓𑀣𑀻;

𑀲𑀼𑀢𑁆𑀯𑀸𑀦𑀼𑀫𑁄𑀤𑀦𑀁 𑀢𑀲𑁆𑀲, 𑀧𑀼𑀩𑁆𑀩𑀓𑀫𑁆𑀫𑀫𑀦𑀼𑀲𑁆𑀲𑀭𑀺𑀁.

𑁯𑁯. ‘‘𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸𑀦, 𑀲𑀓𑀁 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁;

𑀲𑀭𑀺𑀢𑁆𑀯𑀸 𑀧𑀼𑀭𑀺𑀫𑀁 𑀓𑀫𑁆𑀫𑀁, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁.

𑁧𑁦𑁦. ‘‘𑀉𑀝𑁆𑀞𑀸𑀬 𑀆𑀲𑀦𑀸 𑀢𑀫𑁆𑀳𑀸, 𑀲𑀺𑀭𑁂 𑀓𑀢𑁆𑀯𑀸𑀦 𑀅𑀜𑁆𑀚𑀮𑀺𑀁;

𑀲𑀫𑁆𑀩𑀼𑀤𑁆𑀥𑀁 𑀅𑀪𑀺𑀯𑀸𑀤𑁂𑀢𑁆𑀯𑀸, 𑀇𑀫𑀁 𑀯𑀸𑀘𑀁 𑀉𑀤𑀻𑀭𑀺𑀬𑀺𑀁.

𑁧𑁦𑁧. ‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀩𑀼𑀤𑁆𑀥𑁄 𑀮𑁄𑀓𑁂 𑀅𑀦𑀼𑀢𑁆𑀢𑀭𑁄;

𑀧𑀤𑀼𑀫𑀼𑀢𑁆𑀢𑀭𑁄 𑀮𑁄𑀓𑀯𑀺𑀤𑀽, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄.

𑁧𑁦𑁨. ‘‘𑀢𑀲𑁆𑀲 𑀙𑀢𑁆𑀢𑀁 𑀫𑀬𑀸 𑀤𑀺𑀦𑁆𑀦𑀁, 𑀯𑀺𑀘𑀺𑀢𑁆𑀢𑀁 𑀲𑀫𑀮𑀗𑁆𑀓𑀢𑀁;

𑀉𑀪𑁄 𑀳𑀢𑁆𑀣𑁂𑀳𑀺 𑀧𑀕𑁆𑀕𑀡𑁆𑀳𑀺, 𑀲𑀬𑀫𑁆𑀪𑀽 𑀅𑀕𑁆𑀕𑀧𑀼𑀕𑁆𑀕𑀮𑁄.

𑁧𑁦𑁩. ‘‘𑀅𑀳𑁄 𑀩𑀼𑀤𑁆𑀥𑁄 𑀅𑀳𑁄 𑀥𑀫𑁆𑀫𑁄, 𑀅𑀳𑁄 𑀦𑁄 𑀲𑀢𑁆𑀣𑀼𑀲𑀫𑁆𑀧𑀤𑀸;

𑀏𑀓𑀘𑁆𑀙𑀢𑁆𑀢𑀲𑁆𑀲 𑀤𑀸𑀦𑁂𑀦, 𑀤𑀼𑀕𑁆𑀕𑀢𑀺𑀁 𑀦𑀼𑀧𑀧𑀚𑁆𑀚𑀳𑀁.

𑁧𑁦𑁪. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁧𑁦𑁫. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀧𑀭𑀺𑀯𑀸𑀭𑀙𑀢𑁆𑀢𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀧𑀭𑀺𑀯𑀸𑀭𑀙𑀢𑁆𑀢𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀲𑀫𑀁.

𑀉𑀫𑀸𑀧𑀼𑀧𑁆𑀨𑀺𑀬𑀯𑀕𑁆𑀕𑁄 𑀢𑁂𑀢𑁆𑀢𑀺𑀁𑀲𑀢𑀺𑀫𑁄.