𑁩𑁩. 𑀉𑀫𑀸𑀧𑀼𑀧𑁆𑀨𑀺𑀬𑀯𑀕𑁆𑀕𑁄

𑁧. 𑀉𑀫𑀸𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧. ‘‘𑀲𑀫𑀸𑀳𑀺𑀢𑀁 𑀲𑀫𑀸𑀧𑀦𑁆𑀦𑀁, 𑀲𑀺𑀤𑁆𑀥𑀢𑁆𑀣𑀫𑀧𑀭𑀸𑀚𑀺𑀢𑀁;

𑀲𑀫𑀸𑀥𑀺𑀦𑀸 𑀉𑀧𑀯𑀺𑀝𑁆𑀞𑀁, 𑀅𑀤𑁆𑀤𑀲𑀸𑀳𑀁 𑀦𑀭𑀼𑀢𑁆𑀢𑀫𑀁.

𑁨. ‘‘𑀉𑀫𑀸𑀧𑀼𑀧𑁆𑀨𑀁 𑀕𑀳𑁂𑀢𑁆𑀯𑀸𑀦, 𑀩𑀼𑀤𑁆𑀥𑀲𑁆𑀲 𑀅𑀪𑀺𑀭𑁄𑀧𑀬𑀺𑀁;

𑀲𑀩𑁆𑀩𑀧𑀼𑀧𑁆𑀨𑀸 𑀏𑀓𑀲𑀻𑀲𑀸, 𑀉𑀤𑁆𑀥𑀁𑀯𑀡𑁆𑀝𑀸 𑀅𑀥𑁄𑀫𑀼𑀔𑀸.

𑁩. ‘‘𑀲𑀼𑀘𑀺𑀢𑁆𑀢𑀸 𑀯𑀺𑀬 𑀢𑀺𑀝𑁆𑀞𑀦𑁆𑀢𑁂, 𑀆𑀓𑀸𑀲𑁂 𑀧𑀼𑀧𑁆𑀨𑀲𑀦𑁆𑀣𑀭𑀸;

𑀢𑁂𑀦 𑀘𑀺𑀢𑁆𑀢𑀧𑁆𑀧𑀲𑀸𑀤𑁂𑀦, 𑀢𑀼𑀲𑀺𑀢𑀁 𑀉𑀧𑀧𑀚𑁆𑀚𑀳𑀁.

𑁪. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀧𑀽𑀚𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁫. ‘‘𑀧𑀜𑁆𑀘𑀧𑀜𑁆𑀜𑀸𑀲𑀺𑀢𑁄 𑀓𑀧𑁆𑀧𑁂, 𑀏𑀓𑁄 𑀆𑀲𑀺𑀁 𑀫𑀳𑀻𑀧𑀢𑀺;

𑀲𑀫𑀦𑁆𑀢𑀙𑀤𑀦𑁄 𑀦𑀸𑀫, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁬. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀉𑀫𑀸𑀧𑀼𑀧𑁆𑀨𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀉𑀫𑀸𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀞𑀫𑀁.

𑁨. 𑀧𑀼𑀮𑀺𑀦𑀧𑀽𑀚𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁭. ‘‘𑀓𑀓𑀼𑀥𑀁 𑀯𑀺𑀮𑀲𑀦𑁆𑀢𑀁𑀯, 𑀦𑀺𑀲𑀪𑀸𑀚𑀸𑀦𑀺𑀬𑀁 𑀬𑀣𑀸;

𑀑𑀲𑀥𑀺𑀁𑀯 𑀯𑀺𑀭𑁄𑀘𑀦𑁆𑀢𑀁, 𑀑𑀪𑀸𑀲𑀦𑁆𑀢𑀁 𑀦𑀭𑀸𑀲𑀪𑀁.

𑁮. ‘‘𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸𑀦, 𑀅𑀯𑀦𑁆𑀤𑀺𑀁 𑀲𑀢𑁆𑀣𑀼𑀦𑁄 𑀅𑀳𑀁;

𑀲𑀢𑁆𑀣𑀸𑀭𑀁 𑀧𑀭𑀺𑀯𑀡𑁆𑀡𑁂𑀲𑀺𑀁, 𑀲𑀓𑀓𑀫𑁆𑀫𑁂𑀦 𑀢𑁄𑀲𑀬𑀺𑀁 [𑀢𑁄𑀲𑀺𑀢𑁄 (𑀲𑀻.)].

𑁯. ‘‘𑀲𑀼𑀲𑀼𑀤𑁆𑀥𑀁 𑀧𑀼𑀮𑀺𑀦𑀁 𑀕𑀬𑁆𑀳, 𑀕𑀢𑀫𑀕𑁆𑀕𑁂 𑀲𑀫𑁄𑀓𑀺𑀭𑀺𑀁;

𑀉𑀘𑁆𑀙𑀗𑁆𑀕𑁂𑀦 𑀕𑀳𑁂𑀢𑁆𑀯𑀸𑀦, 𑀯𑀺𑀧𑀲𑁆𑀲𑀺𑀲𑁆𑀲 𑀫𑀳𑁂𑀲𑀺𑀦𑁄.

𑁧𑁦. ‘‘𑀢𑀢𑁄 𑀉𑀧𑀟𑁆𑀠𑀧𑀼𑀮𑀺𑀦𑀁, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸;

𑀤𑀺𑀯𑀸𑀯𑀺𑀳𑀸𑀭𑁂 𑀑𑀲𑀺𑀜𑁆𑀘𑀺𑀁, 𑀤𑁆𑀯𑀺𑀧𑀤𑀺𑀦𑁆𑀤𑀲𑁆𑀲 𑀢𑀸𑀤𑀺𑀦𑁄.

𑁧𑁧. ‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀧𑀼𑀮𑀺𑀦𑀁 𑀬𑀫𑀲𑀺𑀜𑁆𑀘𑀳𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀧𑀼𑀮𑀺𑀦𑀲𑁆𑀲 𑀇𑀤𑀁 𑀨𑀮𑀁.

𑁧𑁨. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀼𑀮𑀺𑀦𑀧𑀽𑀚𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀼𑀮𑀺𑀦𑀧𑀽𑀚𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀼𑀢𑀺𑀬𑀁.

𑁩. 𑀳𑀸𑀲𑀚𑀦𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁩. ‘‘𑀤𑀼𑀫𑀕𑁆𑀕𑁂 𑀧𑀁𑀲𑀼𑀓𑀽𑀮𑀓𑀁 [𑀧𑀁𑀲𑀼𑀓𑀽𑀮𑀺𑀓𑀁 (𑀲𑁆𑀬𑀸. 𑀓.)], 𑀮𑀕𑁆𑀕𑀁 𑀤𑀺𑀲𑁆𑀯𑀸𑀦 𑀲𑀢𑁆𑀣𑀼𑀦𑁄;

𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸𑀦, 𑀪𑀺𑀬𑁆𑀬𑁄 𑀉𑀘𑁆𑀘𑀸𑀭𑀺𑀢𑀁 𑀫𑀬𑀸.

𑁧𑁪. ‘‘𑀤𑀽𑀭𑀢𑁄 𑀧𑀦 𑀤𑀺𑀲𑁆𑀯𑀸𑀦 [𑀧𑀢𑀺𑀤𑀺𑀲𑁆𑀯𑀸𑀦 (𑀲𑀻. 𑀲𑁆𑀬𑀸.)], 𑀳𑀸𑀲𑁄 𑀫𑁂 𑀉𑀤𑀧𑀚𑁆𑀚𑀣;

𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸𑀦, 𑀪𑀺𑀬𑁆𑀬𑁄 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁.

𑁧𑁫. ‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀲𑀜𑁆𑀜𑀫𑀮𑀪𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀲𑀜𑁆𑀜𑀸𑀬𑀺𑀤𑀁 𑀨𑀮𑀁.

𑁧𑁬. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀳𑀸𑀲𑀚𑀦𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀳𑀸𑀲𑀚𑀦𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀢𑀢𑀺𑀬𑀁.

𑁪. 𑀬𑀜𑁆𑀜𑀲𑀸𑀫𑀺𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁭. ‘‘𑀚𑀸𑀢𑀺𑀬𑀸 𑀲𑀢𑁆𑀢𑀯𑀲𑁆𑀲𑁄𑀳𑀁, 𑀅𑀳𑁄𑀲𑀺𑀁 𑀫𑀦𑁆𑀢𑀧𑀸𑀭𑀕𑀽;

𑀓𑀼𑀮𑀯𑀢𑁆𑀢𑀁 [𑀓𑀼𑀮𑀯𑀁𑀲𑀁 (𑀲𑀻. 𑀲𑁆𑀬𑀸.)] 𑀅𑀥𑀸𑀭𑁂𑀲𑀺𑀁, 𑀬𑀜𑁆𑀜𑁄 𑀉𑀲𑁆𑀲𑀸𑀳𑀺𑀢𑁄 𑀫𑀬𑀸.

𑁧𑁮. ‘‘𑀘𑀼𑀮𑁆𑀮𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀺, 𑀧𑀲𑀽 𑀳𑀜𑁆𑀜𑀦𑁆𑀢𑀺 𑀫𑁂 𑀢𑀤𑀸;

𑀲𑀸𑀭𑀣𑀫𑁆𑀪𑀼𑀧𑀦𑀻𑀢𑀸𑀦𑀺 [𑀢𑀸𑀭𑀲𑁆𑀫𑀻𑀳𑀺 𑀉𑀧𑀦𑀻𑀢𑀸𑀦𑀺 (𑀓.), 𑀲𑀸𑀭𑀲𑁆𑀫𑀺𑀁𑀳𑀺 𑀉𑀧𑀦𑀻𑀢𑀸𑀦𑀺 (𑀲𑁆𑀬𑀸.)], 𑀬𑀜𑁆𑀜𑀢𑁆𑀣𑀸𑀬 𑀉𑀧𑀝𑁆𑀞𑀺𑀢𑀸.

𑁧𑁯. ‘‘𑀉𑀓𑁆𑀓𑀸𑀫𑀼𑀔𑀧𑀳𑀝𑁆𑀞𑁄𑀯, 𑀔𑀤𑀺𑀭𑀗𑁆𑀕𑀸𑀭𑀲𑀦𑁆𑀦𑀺𑀪𑁄;

𑀉𑀤𑀬𑀦𑁆𑀢𑁄𑀯 𑀲𑀽𑀭𑀺𑀬𑁄, 𑀧𑀼𑀡𑁆𑀡𑀫𑀸𑀬𑁂𑀯 [𑀧𑀼𑀡𑁆𑀡𑀫𑀸𑀲𑁂𑀯 (𑀲𑀻.)] 𑀘𑀦𑁆𑀤𑀺𑀫𑀸.

𑁨𑁦. ‘‘𑀲𑀺𑀤𑁆𑀥𑀢𑁆𑀣𑁄 𑀲𑀩𑁆𑀩𑀲𑀺𑀤𑁆𑀥𑀢𑁆𑀣𑁄, 𑀢𑀺𑀮𑁄𑀓𑀫𑀳𑀺𑀢𑁄 𑀳𑀺𑀢𑁄;

𑀉𑀧𑀕𑀦𑁆𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑁄, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺.

𑁨𑁧. ‘‘‘𑀅𑀳𑀺𑀁𑀲𑀸 𑀲𑀩𑁆𑀩𑀧𑀸𑀡𑀻𑀦𑀁, 𑀓𑀼𑀫𑀸𑀭 𑀫𑀫 𑀭𑀼𑀘𑁆𑀘𑀢𑀺;

𑀣𑁂𑀬𑁆𑀬𑀸 𑀘 𑀅𑀢𑀺𑀘𑀸𑀭𑀸 𑀘, 𑀫𑀚𑁆𑀚𑀧𑀸𑀦𑀸 𑀘 𑀆𑀭𑀢𑀺.

𑁨𑁨. ‘‘‘𑀭𑀢𑀺 𑀘 𑀲𑀫𑀘𑀭𑀺𑀬𑀸𑀬, 𑀩𑀸𑀳𑀼𑀲𑀘𑁆𑀘𑀁 𑀓𑀢𑀜𑁆𑀜𑀼𑀢𑀸;

𑀤𑀺𑀝𑁆𑀞𑁂 𑀥𑀫𑁆𑀫𑁂 𑀧𑀭𑀢𑁆𑀣 𑀘, 𑀥𑀫𑁆𑀫𑀸 𑀏𑀢𑁂 𑀧𑀲𑀁𑀲𑀺𑀬𑀸.

𑁨𑁩. ‘‘‘𑀏𑀢𑁂 𑀥𑀫𑁆𑀫𑁂 𑀪𑀸𑀯𑀬𑀺𑀢𑁆𑀯𑀸, 𑀲𑀩𑁆𑀩𑀲𑀢𑁆𑀢𑀳𑀺𑀢𑁂 𑀭𑀢𑁄 [𑀳𑀺𑀢𑁂𑀲𑀺𑀢𑁄 (𑀓.)];

𑀩𑀼𑀤𑁆𑀥𑁂 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀪𑀸𑀯𑁂𑀳𑀺 𑀫𑀕𑁆𑀕𑀫𑀼𑀢𑁆𑀢𑀫𑀁’.

𑁨𑁪. ‘‘𑀇𑀤𑀁 𑀯𑀢𑁆𑀯𑀸𑀦 𑀲𑀩𑁆𑀩𑀜𑁆𑀜𑀽, 𑀮𑁄𑀓𑀚𑁂𑀝𑁆𑀞𑁄 𑀦𑀭𑀸𑀲𑀪𑁄;

𑀫𑀫𑁂𑀯𑀁 𑀅𑀦𑀼𑀲𑀸𑀲𑀺𑀢𑁆𑀯𑀸, 𑀯𑁂𑀳𑀸𑀲𑀁 𑀉𑀕𑁆𑀕𑀢𑁄 𑀕𑀢𑁄.

𑁨𑁫. ‘‘𑀧𑀼𑀩𑁆𑀩𑁂 𑀘𑀺𑀢𑁆𑀢𑀁 𑀯𑀺𑀲𑁄𑀥𑁂𑀢𑁆𑀯𑀸, 𑀧𑀘𑁆𑀙𑀸 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁;

𑀢𑁂𑀦 𑀘𑀺𑀢𑁆𑀢𑀧𑁆𑀧𑀲𑀸𑀤𑁂𑀦, 𑀢𑀼𑀲𑀺𑀢𑀁 𑀉𑀧𑀧𑀚𑁆𑀚𑀳𑀁.

𑁨𑁬. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀤𑀸 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀲𑀜𑁆𑀜𑀸𑀬𑀺𑀤𑀁 𑀨𑀮𑀁.

𑁨𑁭. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀬𑀜𑁆𑀜𑀲𑀸𑀫𑀺𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀬𑀜𑁆𑀜𑀲𑀸𑀫𑀺𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀘𑀢𑀼𑀢𑁆𑀣𑀁.

𑁫. 𑀦𑀺𑀫𑀺𑀢𑁆𑀢𑀲𑀜𑁆𑀜𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁮. ‘‘𑀘𑀦𑁆𑀤𑀪𑀸𑀕𑀸𑀦𑀤𑀻𑀢𑀻𑀭𑁂, 𑀯𑀲𑀸𑀫𑀺 𑀅𑀲𑁆𑀲𑀫𑁂 𑀅𑀳𑀁;

𑀲𑀼𑀯𑀡𑁆𑀡𑀫𑀺𑀕𑀫𑀤𑁆𑀤𑀓𑁆𑀔𑀺𑀁, 𑀘𑀭𑀦𑁆𑀢𑀁 𑀯𑀺𑀧𑀺𑀦𑁂 𑀅𑀳𑀁.

𑁨𑁯. ‘‘𑀫𑀺𑀕𑁂 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀮𑁄𑀓𑀚𑁂𑀝𑁆𑀞𑀁 𑀅𑀦𑀼𑀲𑁆𑀲𑀭𑀺𑀁;

𑀢𑁂𑀦 𑀘𑀺𑀢𑁆𑀢𑀧𑁆𑀧𑀲𑀸𑀤𑁂𑀦, 𑀅𑀜𑁆𑀜𑁂 𑀩𑀼𑀤𑁆𑀥𑁂 𑀅𑀦𑀼𑀲𑁆𑀲𑀭𑀺𑀁.

𑁩𑁦. ‘‘𑀅𑀩𑁆𑀪𑀢𑀻𑀢𑀸 𑀘 𑀬𑁂 𑀩𑀼𑀤𑁆𑀥𑀸, 𑀯𑀢𑁆𑀢𑀫𑀸𑀦𑀸 𑀅𑀦𑀸𑀕𑀢𑀸;

𑀏𑀯𑀫𑁂𑀯𑀁 𑀯𑀺𑀭𑁄𑀘𑀦𑁆𑀢𑀺, 𑀫𑀺𑀕𑀭𑀸𑀚𑀸𑀯 𑀢𑁂 𑀢𑀬𑁄.

𑁩𑁧. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀲𑀜𑁆𑀜𑀫𑀮𑀪𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀲𑀜𑁆𑀜𑀸𑀬𑀺𑀤𑀁 𑀨𑀮𑀁.

𑁩𑁨. ‘‘𑀲𑀢𑁆𑀢𑀯𑀻𑀲𑁂 𑀇𑀢𑁄 𑀓𑀧𑁆𑀧𑁂, 𑀏𑀓𑁄 𑀆𑀲𑀺𑀁 𑀫𑀳𑀻𑀧𑀢𑀺;

𑀅𑀭𑀜𑁆𑀜𑀲𑀢𑁆𑀣𑁄 𑀦𑀸𑀫𑁂𑀦, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁩𑁩. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀦𑀺𑀫𑀺𑀢𑁆𑀢𑀲𑀜𑁆𑀜𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀦𑀺𑀫𑀺𑀢𑁆𑀢𑀲𑀜𑁆𑀜𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀜𑁆𑀘𑀫𑀁.

𑁬. 𑀅𑀦𑁆𑀦𑀲𑀁𑀲𑀸𑀯𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁪. ‘‘𑀲𑀼𑀯𑀡𑁆𑀡𑀯𑀡𑁆𑀡𑀁 𑀲𑀫𑁆𑀩𑀼𑀤𑁆𑀥𑀁, 𑀕𑀘𑁆𑀙𑀦𑁆𑀢𑀁 𑀅𑀦𑁆𑀢𑀭𑀸𑀧𑀡𑁂;

𑀓𑀜𑁆𑀘𑀦𑀕𑁆𑀖𑀺𑀬𑀲𑀗𑁆𑀓𑀸𑀲𑀁, 𑀩𑀸𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑀁.

𑁩𑁫. ‘‘𑀲𑀺𑀤𑁆𑀥𑀢𑁆𑀣𑀁 𑀲𑀩𑁆𑀩𑀲𑀺𑀤𑁆𑀥𑀢𑁆𑀣𑀁, 𑀅𑀦𑁂𑀚𑀁 𑀅𑀧𑀭𑀸𑀚𑀺𑀢𑀁;

𑀲𑀫𑁆𑀩𑀼𑀤𑁆𑀥𑀁 𑀅𑀢𑀺𑀦𑀸𑀫𑁂𑀢𑁆𑀯𑀸, 𑀪𑁄𑀚𑀬𑀺𑀁 𑀢𑀁 𑀫𑀳𑀸𑀫𑀼𑀦𑀺𑀁.

𑁩𑁬. ‘‘𑀫𑀼𑀦𑀺 𑀓𑀸𑀭𑀼𑀡𑀺𑀓𑁄 𑀮𑁄𑀓𑁂, 𑀑𑀪𑀸𑀲𑀬𑀺 𑀫𑀫𑀁 𑀢𑀤𑀸;

𑀩𑀼𑀤𑁆𑀥𑁂 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀓𑀧𑁆𑀧𑀁 𑀲𑀕𑁆𑀕𑀫𑁆𑀳𑀺 𑀫𑁄𑀤𑀳𑀁.

𑁩𑁭. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀤𑀸𑀦𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀪𑀺𑀓𑁆𑀔𑀸𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁩𑁮. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀅𑀦𑁆𑀦𑀲𑀁𑀲𑀸𑀯𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺;

𑀅𑀦𑁆𑀦𑀲𑀁𑀲𑀸𑀯𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀙𑀝𑁆𑀞𑀁.

𑁭. 𑀦𑀺𑀕𑁆𑀕𑀼𑀡𑁆𑀟𑀺𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁯. ‘‘𑀬𑀤𑀸 𑀤𑁂𑀯𑁄 𑀤𑁂𑀯𑀓𑀸𑀬𑀸, 𑀘𑀯𑀢𑁂 𑀆𑀬𑀼𑀲𑀗𑁆𑀔𑀬𑀸;

𑀢𑀬𑁄 𑀲𑀤𑁆𑀤𑀸 𑀦𑀺𑀘𑁆𑀙𑀭𑀦𑁆𑀢𑀺, 𑀤𑁂𑀯𑀸𑀦𑀁 𑀅𑀦𑀼𑀫𑁄𑀤𑀢𑀁.

𑁪𑁦. ‘‘‘𑀇𑀢𑁄 𑀪𑁄 𑀲𑀼𑀕𑀢𑀺𑀁 𑀕𑀘𑁆𑀙, 𑀫𑀦𑀼𑀲𑁆𑀲𑀸𑀦𑀁 𑀲𑀳𑀩𑁆𑀬𑀢𑀁;

𑀫𑀦𑀼𑀲𑁆𑀲𑀪𑀽𑀢𑁄 𑀲𑀤𑁆𑀥𑀫𑁆𑀫𑁂, 𑀮𑀪 𑀲𑀤𑁆𑀥𑀁 𑀅𑀦𑀼𑀢𑁆𑀢𑀭𑀁.

𑁪𑁧. ‘‘‘𑀲𑀸 𑀢𑁂 𑀲𑀤𑁆𑀥𑀸 𑀦𑀺𑀯𑀺𑀝𑁆𑀞𑀸𑀲𑁆𑀲, 𑀫𑀽𑀮𑀚𑀸𑀢𑀸 𑀧𑀢𑀺𑀝𑁆𑀞𑀺𑀢𑀸;

𑀬𑀸𑀯𑀚𑀻𑀯𑀁 𑀅𑀲𑀁𑀳𑀻𑀭𑀸, 𑀲𑀤𑁆𑀥𑀫𑁆𑀫𑁂 𑀲𑀼𑀧𑁆𑀧𑀯𑁂𑀤𑀺𑀢𑁂.

𑁪𑁨. ‘‘‘𑀓𑀸𑀬𑁂𑀦 𑀓𑀼𑀲𑀮𑀁 𑀓𑀢𑁆𑀯𑀸, 𑀯𑀸𑀘𑀸𑀬 𑀓𑀼𑀲𑀮𑀁 𑀩𑀳𑀼𑀁;

𑀫𑀦𑀲𑀸 𑀓𑀼𑀲𑀮𑀁 𑀓𑀢𑁆𑀯𑀸, 𑀅𑀩𑁆𑀬𑀸𑀧𑀚𑁆𑀚𑀁 𑀦𑀺𑀭𑀽𑀧𑀥𑀺𑀁.

𑁪𑁩. ‘‘‘𑀢𑀢𑁄 𑀑𑀧𑀥𑀺𑀓𑀁 𑀧𑀼𑀜𑁆𑀜𑀁, 𑀓𑀢𑁆𑀯𑀸 𑀤𑀸𑀦𑁂𑀦 𑀢𑀁 𑀩𑀳𑀼𑀁;

𑀅𑀜𑁆𑀜𑁂𑀧𑀺 𑀫𑀘𑁆𑀘𑁂 𑀲𑀤𑁆𑀥𑀫𑁆𑀫𑁂, 𑀩𑁆𑀭𑀳𑁆𑀫𑀘𑀭𑀺𑀬𑁂 𑀦𑀺𑀯𑁂𑀲𑀬’.

𑁪𑁪. ‘‘𑀇𑀫𑀸𑀬 𑀅𑀦𑀼𑀓𑀫𑁆𑀧𑀸𑀬, 𑀤𑁂𑀯𑀸𑀤𑁂𑀯𑀁 𑀬𑀤𑀸 𑀯𑀺𑀤𑀽;

𑀘𑀯𑀦𑁆𑀢𑀁 𑀅𑀦𑀼𑀫𑁄𑀤𑀦𑁆𑀢𑀺, 𑀏𑀳𑀺 𑀤𑁂𑀯 𑀧𑀼𑀦𑀧𑁆𑀧𑀼𑀦𑀁 [𑀤𑁂𑀯𑀧𑀼𑀭𑀁 𑀧𑀼𑀦 (𑀲𑀻.)].

𑁪𑁫. ‘‘𑀲𑀁𑀯𑁂𑀕𑁄 𑀫𑁂 [𑀲𑀁𑀯𑀺𑀕𑁆𑀕𑁄𑀳𑀁 (𑀲𑁆𑀬𑀸.)] 𑀢𑀤𑀸 𑀆𑀲𑀺, 𑀤𑁂𑀯𑀲𑀗𑁆𑀖𑁂 𑀲𑀫𑀸𑀕𑀢𑁂;

𑀓𑀁𑀲𑀼 𑀦𑀸𑀫 𑀅𑀳𑀁 𑀬𑁄𑀦𑀺𑀁, 𑀕𑀫𑀺𑀲𑁆𑀲𑀸𑀫𑀺 𑀇𑀢𑁄 𑀘𑀼𑀢𑁄.

𑁪𑁬. ‘‘𑀫𑀫 𑀲𑀁𑀯𑁂𑀕𑀫𑀜𑁆𑀜𑀸𑀬, 𑀲𑀫𑀡𑁄 𑀪𑀸𑀯𑀺𑀢𑀺𑀦𑁆𑀤𑁆𑀭𑀺𑀬𑁄;

𑀫𑀫𑀼𑀤𑁆𑀥𑀭𑀺𑀢𑀼𑀓𑀸𑀫𑁄 𑀲𑁄, 𑀆𑀕𑀘𑁆𑀙𑀺 𑀫𑀫 𑀲𑀦𑁆𑀢𑀺𑀓𑀁.

𑁪𑁭. ‘‘𑀲𑀼𑀫𑀦𑁄 𑀦𑀸𑀫 𑀦𑀸𑀫𑁂𑀦, 𑀧𑀤𑀼𑀫𑀼𑀢𑁆𑀢𑀭𑀲𑀸𑀯𑀓𑁄;

𑀅𑀢𑁆𑀣𑀥𑀫𑁆𑀫𑀸𑀦𑀼𑀲𑀸𑀲𑀺𑀢𑁆𑀯𑀸, 𑀲𑀁𑀯𑁂𑀚𑁂𑀲𑀺 𑀫𑀫𑀁 𑀢𑀤𑀸.

𑀤𑁆𑀯𑀸𑀤𑀲𑀫𑀁 𑀪𑀸𑀡𑀯𑀸𑀭𑀁.

𑁪𑁮. ‘‘𑀢𑀲𑁆𑀲𑀸𑀳𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀩𑀼𑀤𑁆𑀥𑁂 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁;

𑀢𑀁 𑀥𑀻𑀭𑀁 𑀅𑀪𑀺𑀯𑀸𑀤𑁂𑀢𑁆𑀯𑀸, 𑀢𑀢𑁆𑀣 𑀓𑀸𑀮𑀁𑀓𑀢𑁄 𑀅𑀳𑀁.

𑁪𑁯. ‘‘𑀉𑀧𑀧𑀚𑁆𑀚𑀺𑀁 𑀲 [𑀉𑀧𑀧𑀚𑁆𑀚𑀺𑀲𑁆𑀲𑀁 (𑀲𑀻.)] 𑀢𑀢𑁆𑀣𑁂𑀯, 𑀲𑀼𑀓𑁆𑀓𑀫𑀽𑀮𑁂𑀦 𑀘𑁄𑀤𑀺𑀢𑁄;

𑀯𑀲𑀦𑁆𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀫𑁆𑀳𑀺, 𑀧𑀼𑀦 𑀥𑀸𑀭𑁂𑀢𑀺 𑀫𑀸𑀢𑀼𑀬𑀸.

𑁫𑁦. ‘‘𑀢𑀫𑁆𑀳𑀸 𑀓𑀸𑀬𑀸 𑀘𑀯𑀺𑀢𑁆𑀯𑀸𑀦, 𑀢𑀺𑀤𑀲𑁂 𑀉𑀧𑀧𑀚𑁆𑀚𑀳𑀁;

𑀏𑀢𑁆𑀣𑀦𑁆𑀢𑀭𑁂 𑀦 𑀧𑀲𑁆𑀲𑀸𑀫𑀺, 𑀤𑁄𑀫𑀦𑀲𑁆𑀲𑀫𑀳𑀁 𑀢𑀤𑀸.

𑁫𑁧. ‘‘𑀢𑀸𑀯𑀢𑀺𑀁𑀲𑀸 𑀘𑀯𑀺𑀢𑁆𑀯𑀸𑀦, 𑀫𑀸𑀢𑀼𑀓𑀼𑀘𑁆𑀙𑀺𑀁 𑀲𑀫𑁄𑀓𑁆𑀓𑀫𑀺𑀁;

𑀦𑀺𑀓𑁆𑀔𑀫𑀺𑀢𑁆𑀯𑀸𑀦 𑀓𑀼𑀘𑁆𑀙𑀺𑀫𑁆𑀳𑀸, 𑀓𑀡𑁆𑀳𑀲𑀼𑀓𑁆𑀓𑀁 𑀅𑀚𑀸𑀦𑀳𑀁.

𑁫𑁨. ‘‘𑀚𑀸𑀢𑀺𑀬𑀸 𑀲𑀢𑁆𑀢𑀯𑀲𑁆𑀲𑁄𑀯 [𑀚𑀸𑀢𑀺𑀬𑀸 𑀲𑀢𑁆𑀢𑀯𑀲𑁆𑀲𑁂𑀦 (𑀲𑁆𑀬𑀸.)], 𑀆𑀭𑀸𑀫𑀁 𑀧𑀸𑀯𑀺𑀲𑀺𑀁 𑀅𑀳𑀁;

𑀕𑁄𑀢𑀫𑀲𑁆𑀲 𑀪𑀕𑀯𑀢𑁄, 𑀲𑀓𑁆𑀬𑀧𑀼𑀢𑁆𑀢𑀲𑁆𑀲 𑀢𑀸𑀤𑀺𑀦𑁄.

𑁫𑁩. ‘‘𑀯𑀺𑀢𑁆𑀣𑀸𑀭𑀺𑀓𑁂 [𑀯𑀺𑀢𑁆𑀣𑀸𑀭𑀺𑀢𑁂 (𑀲𑀻. 𑀓.)] 𑀧𑀸𑀯𑀘𑀦𑁂, 𑀩𑀸𑀳𑀼𑀚𑀜𑁆𑀜𑀫𑁆𑀳𑀺 𑀲𑀸𑀲𑀦𑁂;

𑀅𑀤𑁆𑀤𑀲𑀁 𑀲𑀸𑀲𑀦𑀓𑀭𑁂, 𑀪𑀺𑀓𑁆𑀔𑀯𑁄 𑀢𑀢𑁆𑀣 𑀲𑀢𑁆𑀣𑀼𑀦𑁄.

𑁫𑁪. ‘‘𑀲𑀸𑀯𑀢𑁆𑀣𑀺 𑀦𑀸𑀫 𑀦𑀕𑀭𑀁, 𑀭𑀸𑀚𑀸 𑀢𑀢𑁆𑀣𑀸𑀲𑀺 𑀓𑁄𑀲𑀮𑁄;

𑀭𑀣𑁂𑀦 𑀦𑀸𑀕𑀬𑀼𑀢𑁆𑀢𑁂𑀦, 𑀉𑀧𑁂𑀲𑀺 𑀩𑁄𑀥𑀺𑀫𑀼𑀢𑁆𑀢𑀫𑀁.

𑁫𑁫. ‘‘𑀢𑀲𑁆𑀲𑀸𑀳𑀁 𑀦𑀸𑀕𑀁 𑀤𑀺𑀲𑁆𑀯𑀸𑀦, 𑀧𑀼𑀩𑁆𑀩𑀓𑀫𑁆𑀫𑀁 𑀅𑀦𑀼𑀲𑁆𑀲𑀭𑀺𑀁;

𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸𑀦, 𑀲𑀫𑀬𑀁 𑀅𑀕𑀫𑀸𑀲𑀳𑀁.

𑁫𑁬. ‘‘𑀚𑀸𑀢𑀺𑀬𑀸 𑀲𑀢𑁆𑀢𑀯𑀲𑁆𑀲𑁄𑀯, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁;

𑀬𑁄 𑀲𑁄 𑀩𑀼𑀤𑁆𑀥𑀁 𑀉𑀧𑀝𑁆𑀞𑀸𑀲𑀺, 𑀆𑀦𑀦𑁆𑀤𑁄 𑀦𑀸𑀫 𑀲𑀸𑀯𑀓𑁄.

𑁫𑁭. ‘‘𑀕𑀢𑀺𑀫𑀸 𑀥𑀺𑀢𑀺𑀫𑀸 𑀘𑁂𑀯, 𑀲𑀢𑀺𑀫𑀸 𑀘 𑀩𑀳𑀼𑀲𑁆𑀲𑀼𑀢𑁄;

𑀭𑀜𑁆𑀜𑁄 𑀘𑀺𑀢𑁆𑀢𑀁 𑀧𑀲𑀸𑀤𑁂𑀦𑁆𑀢𑁄, 𑀦𑀺𑀬𑁆𑀬𑀸𑀤𑁂𑀲𑀺 𑀫𑀳𑀸𑀚𑀼𑀢𑀺.

𑁫𑁮. ‘‘𑀢𑀲𑁆𑀲𑀸𑀳𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸𑀦, 𑀧𑀼𑀩𑁆𑀩𑀓𑀫𑁆𑀫𑀁 𑀅𑀦𑀼𑀲𑁆𑀲𑀭𑀺𑀁;

𑀢𑀢𑁆𑀣𑁂𑀯 𑀞𑀺𑀢𑀓𑁄 𑀲𑀦𑁆𑀢𑁄, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁.

𑁫𑁯. ‘‘𑀏𑀓𑀁𑀲𑀁 𑀘𑀻𑀯𑀭𑀁 𑀓𑀢𑁆𑀯𑀸, 𑀲𑀺𑀭𑁂 𑀓𑀢𑁆𑀯𑀸𑀦 𑀅𑀜𑁆𑀚𑀮𑀺𑀁;

𑀲𑀫𑁆𑀩𑀼𑀤𑁆𑀥𑀁 𑀅𑀪𑀺𑀯𑀸𑀤𑁂𑀢𑁆𑀯𑀸, 𑀇𑀫𑀁 𑀯𑀸𑀘𑀁 𑀉𑀤𑀻𑀭𑀬𑀺𑀁.

𑁬𑁦. ‘‘‘𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀲𑁆𑀲, 𑀤𑁆𑀯𑀺𑀧𑀤𑀺𑀦𑁆𑀤𑀲𑁆𑀲 𑀲𑀢𑁆𑀣𑀼𑀦𑁄;

𑀦𑀺𑀕𑁆𑀕𑀼𑀡𑁆𑀟𑀺𑀧𑀼𑀧𑁆𑀨𑀁 𑀧𑀕𑁆𑀕𑀬𑁆𑀳, 𑀲𑀻𑀳𑀸𑀲𑀦𑁂 𑀞𑀧𑁂𑀲𑀳𑀁.

𑁬𑁧. ‘‘‘𑀢𑁂𑀦 𑀓𑀫𑁆𑀫𑁂𑀦 𑀤𑁆𑀯𑀺𑀧𑀤𑀺𑀦𑁆𑀤, 𑀮𑁄𑀓𑀚𑁂𑀝𑁆𑀞 𑀦𑀭𑀸𑀲𑀪;

𑀧𑀢𑁆𑀢𑁄𑀫𑁆𑀳𑀺 𑀅𑀘𑀮𑀁 𑀞𑀸𑀦𑀁, 𑀳𑀺𑀢𑁆𑀯𑀸 𑀚𑀬𑀧𑀭𑀸𑀚𑀬𑀁’.

𑁬𑁨. ‘‘𑀧𑀜𑁆𑀘𑀯𑀻𑀲𑀲𑀳𑀲𑁆𑀲𑀫𑁆𑀳𑀺, 𑀓𑀧𑁆𑀧𑀸𑀦𑀁 𑀫𑀦𑀼𑀚𑀸𑀥𑀺𑀧𑀸;

𑀅𑀩𑁆𑀩𑀼𑀤𑀦𑀺𑀭𑀩𑁆𑀩𑀼𑀤𑀸𑀦𑀺, 𑀅𑀝𑁆𑀞𑀝𑁆𑀞𑀸𑀲𑀺𑀁𑀲𑀼 𑀔𑀢𑁆𑀢𑀺𑀬𑀸.

𑁬𑁩. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀦𑀺𑀕𑁆𑀕𑀼𑀡𑁆𑀟𑀺𑀧𑀼𑀧𑁆𑀨𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀦𑀺𑀕𑁆𑀕𑀼𑀡𑁆𑀟𑀺𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀲𑀢𑁆𑀢𑀫𑀁.

𑁮. 𑀲𑀼𑀫𑀦𑀸𑀯𑁂𑀴𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁬𑁪. ‘‘𑀯𑁂𑀲𑁆𑀲𑀪𑀼𑀲𑁆𑀲 𑀪𑀕𑀯𑀢𑁄, 𑀮𑁄𑀓𑀚𑁂𑀝𑁆𑀞𑀲𑁆𑀲 𑀢𑀸𑀤𑀺𑀦𑁄;

𑀲𑀩𑁆𑀩𑁂 𑀚𑀦𑀸 𑀲𑀫𑀸𑀕𑀫𑁆𑀫, 𑀫𑀳𑀸𑀧𑀽𑀚𑀁 𑀓𑀭𑁄𑀦𑁆𑀢𑀺 𑀢𑁂.

𑁬𑁫. ‘‘𑀲𑀼𑀥𑀸𑀬 𑀧𑀺𑀡𑁆𑀟𑀁 𑀓𑀢𑁆𑀯𑀸𑀦, 𑀆𑀯𑁂𑀴𑀁 𑀲𑀼𑀫𑀦𑀸𑀬𑀳𑀁;

𑀲𑀻𑀳𑀸𑀲𑀦𑀲𑁆𑀲 𑀧𑀼𑀭𑀢𑁄, 𑀅𑀪𑀺𑀭𑁄𑀧𑁂𑀲𑀳𑀁 𑀢𑀤𑀸.

𑁬𑁬. ‘‘𑀲𑀩𑁆𑀩𑁂 𑀚𑀦𑀸 𑀲𑀫𑀸𑀕𑀫𑁆𑀫, 𑀧𑁂𑀓𑁆𑀔𑀦𑁆𑀢𑀺 𑀧𑀼𑀧𑁆𑀨𑀫𑀼𑀢𑁆𑀢𑀫𑀁;

𑀓𑁂𑀦𑀺𑀤𑀁 𑀧𑀽𑀚𑀺𑀢𑀁 𑀧𑀼𑀧𑁆𑀨𑀁, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 𑀢𑀸𑀤𑀺𑀦𑁄.