𑁮. 𑀲𑀼𑀫𑀦𑀸𑀯𑁂𑀴𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁬𑁪. ‘‘𑀯𑁂𑀲𑁆𑀲𑀪𑀼𑀲𑁆𑀲 𑀪𑀕𑀯𑀢𑁄, 𑀮𑁄𑀓𑀚𑁂𑀝𑁆𑀞𑀲𑁆𑀲 𑀢𑀸𑀤𑀺𑀦𑁄;

𑀲𑀩𑁆𑀩𑁂 𑀚𑀦𑀸 𑀲𑀫𑀸𑀕𑀫𑁆𑀫, 𑀫𑀳𑀸𑀧𑀽𑀚𑀁 𑀓𑀭𑁄𑀦𑁆𑀢𑀺 𑀢𑁂.

𑁬𑁫. ‘‘𑀲𑀼𑀥𑀸𑀬 𑀧𑀺𑀡𑁆𑀟𑀁 𑀓𑀢𑁆𑀯𑀸𑀦, 𑀆𑀯𑁂𑀴𑀁 𑀲𑀼𑀫𑀦𑀸𑀬𑀳𑀁;

𑀲𑀻𑀳𑀸𑀲𑀦𑀲𑁆𑀲 𑀧𑀼𑀭𑀢𑁄, 𑀅𑀪𑀺𑀭𑁄𑀧𑁂𑀲𑀳𑀁 𑀢𑀤𑀸.

𑁬𑁬. ‘‘𑀲𑀩𑁆𑀩𑁂 𑀚𑀦𑀸 𑀲𑀫𑀸𑀕𑀫𑁆𑀫, 𑀧𑁂𑀓𑁆𑀔𑀦𑁆𑀢𑀺 𑀧𑀼𑀧𑁆𑀨𑀫𑀼𑀢𑁆𑀢𑀫𑀁;

𑀓𑁂𑀦𑀺𑀤𑀁 𑀧𑀽𑀚𑀺𑀢𑀁 𑀧𑀼𑀧𑁆𑀨𑀁, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 𑀢𑀸𑀤𑀺𑀦𑁄.

𑁬𑁭. ‘‘𑀢𑁂𑀦 𑀘𑀺𑀢𑁆𑀢𑀧𑁆𑀧𑀲𑀸𑀤𑁂𑀦, 𑀦𑀺𑀫𑁆𑀫𑀸𑀦𑀁 𑀉𑀧𑀧𑀚𑁆𑀚𑀳𑀁;

𑀅𑀦𑀼𑀪𑁄𑀫𑀺 [𑀅𑀦𑀼𑀪𑁄𑀲𑀺𑀁 (𑀲𑀻.)] 𑀲𑀓𑀁 𑀓𑀫𑁆𑀫𑀁, 𑀧𑀼𑀩𑁆𑀩𑁂 𑀲𑀼𑀓𑀢𑀫𑀢𑁆𑀢𑀦𑁄.

𑁬𑁮. ‘‘𑀬𑀁 𑀬𑀁 𑀬𑁄𑀦𑀼𑀧𑀧𑀚𑁆𑀚𑀸𑀫𑀺, 𑀤𑁂𑀯𑀢𑁆𑀢𑀁 𑀅𑀣 𑀫𑀸𑀦𑀼𑀲𑀁;

𑀲𑀩𑁆𑀩𑁂𑀲𑀸𑀦𑀁 𑀧𑀺𑀬𑁄 𑀳𑁄𑀫𑀺, 𑀧𑀼𑀧𑁆𑀨𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁬𑁯. ‘‘𑀦𑀸𑀪𑀺𑀚𑀸𑀦𑀸𑀫𑀺 𑀓𑀸𑀬𑁂𑀦, 𑀯𑀸𑀘𑀸𑀬 𑀉𑀤 𑀘𑁂𑀢𑀲𑀸;

𑀲𑀁𑀬𑀢𑀸𑀦𑀁 𑀢𑀧𑀲𑁆𑀲𑀻𑀦𑀁, 𑀓𑀢𑀁 𑀅𑀓𑁆𑀓𑁄𑀲𑀺𑀢𑀁 𑀫𑀬𑀸.

𑁭𑁦. ‘‘𑀢𑁂𑀦 𑀲𑀼𑀘𑀭𑀺𑀢𑁂𑀦𑀸𑀳𑀁, 𑀘𑀺𑀢𑁆𑀢𑀲𑁆𑀲 𑀧𑀡𑀺𑀥𑀻𑀳𑀺 𑀘;

𑀲𑀩𑁆𑀩𑁂𑀲𑀁 𑀧𑀽𑀚𑀺𑀢𑁄 𑀳𑁄𑀫𑀺, 𑀅𑀦𑀓𑁆𑀓𑁄𑀲𑀲𑁆𑀲𑀺𑀤𑀁 𑀨𑀮𑀁.

𑁭𑁧. ‘‘𑀇𑀢𑁄 𑀏𑀓𑀸𑀤𑀲𑁂 𑀓𑀧𑁆𑀧𑁂, 𑀲𑀳𑀲𑁆𑀲𑀸𑀭𑁄𑀲𑀺 𑀔𑀢𑁆𑀢𑀺𑀬𑁄;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁭𑁨. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀼𑀫𑀦𑀸𑀯𑁂𑀴𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀼𑀫𑀦𑀸𑀯𑁂𑀴𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀅𑀝𑁆𑀞𑀫𑀁.