𑁬. 𑀆𑀲𑀦𑀲𑀦𑁆𑀣𑀯𑀺𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁬. ‘‘𑀘𑁂𑀢𑀺𑀬𑀁 𑀉𑀢𑁆𑀢𑀫𑀁 𑀦𑀸𑀫, 𑀲𑀺𑀔𑀺𑀦𑁄 𑀮𑁄𑀓𑀩𑀦𑁆𑀥𑀼𑀦𑁄;

𑀅𑀭𑀜𑁆𑀜𑁂 𑀇𑀭𑀻𑀡𑁂 𑀯𑀦𑁂, 𑀅𑀦𑁆𑀥𑀸𑀳𑀺𑀡𑁆𑀟𑀸𑀫𑀳𑀁 𑀢𑀤𑀸.

𑁨𑁭. ‘‘𑀧𑀯𑀦𑀸 𑀦𑀺𑀓𑁆𑀔𑀫𑀦𑁆𑀢𑁂𑀦, 𑀤𑀺𑀝𑁆𑀞𑀁 𑀲𑀻𑀳𑀸𑀲𑀦𑀁 𑀫𑀬𑀸;

𑀏𑀓𑀁𑀲𑀁 𑀅𑀜𑁆𑀚𑀮𑀺𑀁 𑀓𑀢𑁆𑀯𑀸, 𑀲𑀦𑁆𑀣𑀯𑀺𑀁 [𑀣𑀯𑀺𑀲𑁆𑀲𑀁 (𑀲𑀻.)] 𑀮𑁄𑀓𑀦𑀸𑀬𑀓𑀁.

𑁨𑁮. ‘‘𑀤𑀺𑀯𑀲𑀪𑀸𑀕𑀁 𑀣𑀯𑀺𑀢𑁆𑀯𑀸𑀦, 𑀩𑀼𑀤𑁆𑀥𑀁 𑀮𑁄𑀓𑀕𑁆𑀕𑀦𑀸𑀬𑀓𑀁;

𑀳𑀝𑁆𑀞𑁄 𑀳𑀝𑁆𑀞𑁂𑀦 𑀘𑀺𑀢𑁆𑀢𑁂𑀦, 𑀇𑀫𑀁 𑀯𑀸𑀘𑀁 𑀉𑀤𑀻𑀭𑀬𑀺𑀁.

𑁨𑁯. ‘‘‘𑀦𑀫𑁄 𑀢𑁂 𑀧𑀼𑀭𑀺𑀲𑀸𑀚𑀜𑁆𑀜, 𑀦𑀫𑁄 𑀢𑁂 𑀧𑀼𑀭𑀺𑀲𑀼𑀢𑁆𑀢𑀫;

𑀲𑀩𑁆𑀩𑀜𑁆𑀜𑀽𑀲𑀺 𑀫𑀳𑀸𑀯𑀻𑀭, 𑀮𑁄𑀓𑀚𑁂𑀝𑁆𑀞 𑀦𑀭𑀸𑀲𑀪’.

𑁩𑁦. ‘‘𑀅𑀪𑀺𑀢𑁆𑀣𑀯𑀺𑀢𑁆𑀯𑀸 𑀲𑀺𑀔𑀺𑀦𑀁, 𑀦𑀺𑀫𑀺𑀢𑁆𑀢𑀓𑀭𑀡𑁂𑀦𑀳𑀁;

𑀆𑀲𑀦𑀁 𑀅𑀪𑀺𑀯𑀸𑀤𑁂𑀢𑁆𑀯𑀸, 𑀧𑀓𑁆𑀓𑀸𑀫𑀺𑀁 𑀉𑀢𑁆𑀢𑀭𑀸𑀫𑀼𑀔𑁄.

𑁩𑁧. ‘‘𑀏𑀓𑀢𑁆𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀣𑀯𑀺𑀁 𑀯𑀤𑀢𑀁 𑀯𑀭𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀣𑁄𑀫𑀦𑀸𑀬 𑀇𑀤𑀁 𑀨𑀮𑀁.

𑁩𑁨. ‘‘𑀲𑀢𑁆𑀢𑀯𑀻𑀲𑁂 𑀇𑀢𑁄 𑀓𑀧𑁆𑀧𑁂, 𑀅𑀢𑀼𑀮𑀸 𑀲𑀢𑁆𑀢 𑀆𑀲𑀼 𑀢𑁂;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑀸, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁩𑁩. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀆𑀲𑀦𑀲𑀦𑁆𑀣𑀯𑀺𑀓𑁄 [𑀆𑀲𑀦𑀲𑀦𑁆𑀣𑀯𑀓𑁄 (?), 𑀆𑀲𑀦𑀣𑀯𑀺𑀓𑁄 (𑀓.), 𑀆𑀲𑀦𑀢𑁆𑀣𑀯𑀺𑀓𑁄 (𑀲𑀻. 𑀲𑁆𑀬𑀸.)] 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀆𑀲𑀦𑀲𑀦𑁆𑀣𑀯𑀺𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀙𑀝𑁆𑀞𑀁.