𑁩𑁨. 𑀆𑀭𑀓𑁆𑀔𑀤𑀸𑀬𑀓𑀯𑀕𑁆𑀕𑁄

𑁧. 𑀆𑀭𑀓𑁆𑀔𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧. ‘‘𑀥𑀫𑁆𑀫𑀤𑀲𑁆𑀲𑀺𑀲𑁆𑀲 𑀫𑀼𑀦𑀺𑀦𑁄, 𑀯𑀢𑀺 𑀓𑀸𑀭𑀸𑀧𑀺𑀢𑀸 𑀫𑀬𑀸;

𑀆𑀭𑀓𑁆𑀔𑁄 𑀘 𑀫𑀬𑀸 𑀤𑀺𑀦𑁆𑀦𑁄, 𑀤𑁆𑀯𑀺𑀧𑀤𑀺𑀦𑁆𑀤𑀲𑁆𑀲 𑀢𑀸𑀤𑀺𑀦𑁄.

𑁨. ‘‘𑀅𑀝𑁆𑀞𑀸𑀭𑀲𑁂 𑀓𑀧𑁆𑀧𑀲𑀢𑁂, 𑀬𑀁 𑀓𑀫𑁆𑀫𑀫𑀓𑀭𑀺𑀁 𑀢𑀤𑀸;

𑀢𑁂𑀦 𑀓𑀫𑁆𑀫𑀯𑀺𑀲𑁂𑀲𑁂𑀦, 𑀧𑀢𑁆𑀢𑁄 𑀫𑁂 𑀆𑀲𑀯𑀓𑁆𑀔𑀬𑁄.

𑁩. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀆𑀭𑀓𑁆𑀔𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀆𑀭𑀓𑁆𑀔𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀞𑀫𑀁.

𑁨. 𑀪𑁄𑀚𑀦𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁪. ‘‘𑀲𑀼𑀚𑀸𑀢𑁄 𑀲𑀸𑀮𑀮𑀝𑁆𑀞𑀻𑀯, 𑀲𑁄𑀪𑀜𑁆𑀚𑀦𑀫𑀺𑀯𑀼𑀕𑁆𑀕𑀢𑁄;

𑀇𑀦𑁆𑀤𑀮𑀝𑁆𑀞𑀺𑀭𑀺𑀯𑀸𑀓𑀸𑀲𑁂, 𑀯𑀺𑀭𑁄𑀘𑀢𑀺 𑀲𑀤𑀸 𑀚𑀺𑀦𑁄.

𑁫. ‘‘𑀢𑀲𑁆𑀲 𑀤𑁂𑀯𑀸𑀢𑀺𑀤𑁂𑀯𑀲𑁆𑀲, 𑀯𑁂𑀲𑁆𑀲𑀪𑀼𑀲𑁆𑀲 𑀫𑀳𑁂𑀲𑀺𑀦𑁄;

𑀅𑀤𑀸𑀲𑀺 𑀪𑁄𑀚𑀦𑀫𑀳𑀁, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸.

𑁬. ‘‘𑀢𑀁 𑀫𑁂 𑀩𑀼𑀤𑁆𑀥𑁄 𑀅𑀦𑀼𑀫𑁄𑀤𑀺, 𑀲𑀬𑀫𑁆𑀪𑀽 𑀅𑀧𑀭𑀸𑀚𑀺𑀢𑁄;

𑀪𑀯𑁂 𑀦𑀺𑀩𑁆𑀩𑀢𑁆𑀢𑀫𑀸𑀦𑀫𑁆𑀳𑀺, 𑀨𑀮𑀁 𑀦𑀺𑀩𑁆𑀩𑀢𑁆𑀢𑀢𑀽 𑀢𑀯.

𑁭. ‘‘𑀏𑀓𑀢𑁆𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀤𑀸𑀦𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀪𑁄𑀚𑀦𑀲𑁆𑀲 𑀇𑀤𑀁 𑀨𑀮𑀁.

𑁮. ‘‘𑀧𑀜𑁆𑀘𑀯𑀻𑀲𑁂 𑀇𑀢𑁄 𑀓𑀧𑁆𑀧𑁂, 𑀏𑀓𑁄 𑀆𑀲𑀺𑀁 𑀅𑀫𑀺𑀢𑁆𑀢𑀓𑁄;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁯. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀪𑁄𑀚𑀦𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀪𑁄𑀚𑀦𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀼𑀢𑀺𑀬𑀁.

𑁩. 𑀕𑀢𑀲𑀜𑁆𑀜𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁦. ‘‘𑀆𑀓𑀸𑀲𑁂𑀯 𑀧𑀤𑀁 𑀦𑀢𑁆𑀣𑀺, 𑀅𑀫𑁆𑀩𑀭𑁂 𑀅𑀦𑀺𑀮𑀜𑁆𑀚𑀲𑁂;

𑀲𑀺𑀤𑁆𑀥𑀢𑁆𑀣𑀁 𑀚𑀺𑀦𑀫𑀤𑁆𑀤𑀓𑁆𑀔𑀺𑀁, 𑀕𑀘𑁆𑀙𑀦𑁆𑀢𑀁 𑀢𑀺𑀤𑀺𑀯𑀗𑁆𑀕𑀡𑁂 [𑀢𑀺𑀤𑀺𑀯𑀗𑁆𑀕𑀡𑀁 (𑀲𑁆𑀬𑀸. 𑀓.)].

𑁧𑁧. ‘‘𑀅𑀦𑀺𑀮𑁂𑀦𑁂𑀭𑀺𑀢𑀁 𑀤𑀺𑀲𑁆𑀯𑀸, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀘𑀻𑀯𑀭𑀁;

𑀯𑀺𑀢𑁆𑀢𑀺 𑀫𑀫𑀸𑀳𑀼 𑀢𑀸𑀯𑀤𑁂 [𑀯𑀺𑀢𑁆𑀢𑀺 𑀫𑁂 𑀧𑀸𑀳𑀼𑀡𑀸 𑀢𑀸𑀯 (𑀲𑁆𑀬𑀸.), 𑀯𑀺𑀢𑁆𑀢𑀺 𑀫𑁂 𑀢𑀸𑀯𑀤𑁂 𑀚𑀸𑀢𑀸 (𑀲𑀻.)], 𑀤𑀺𑀲𑁆𑀯𑀸𑀦 𑀕𑀫𑀦𑀁 𑀫𑀼𑀦𑀺𑀁 [𑀫𑀼𑀦𑁂 (𑀲𑀻.)].

𑁧𑁨. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀲𑀜𑁆𑀜𑀫𑀮𑀪𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀲𑀜𑁆𑀜𑀸𑀬𑀺𑀤𑀁 𑀨𑀮𑀁.

𑁧𑁩. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀕𑀢𑀲𑀜𑁆𑀜𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀕𑀢𑀲𑀜𑁆𑀜𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀢𑀢𑀺𑀬𑀁.

𑁪. 𑀲𑀢𑁆𑀢𑀧𑀤𑀼𑀫𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁪. ‘‘𑀦𑀤𑀻𑀓𑀽𑀮𑁂 𑀯𑀲𑀸𑀫𑀳𑀁, 𑀦𑁂𑀲𑀸𑀤𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄;

𑀲𑀢𑀧𑀢𑁆𑀢𑁂𑀳𑀺 𑀧𑀼𑀧𑁆𑀨𑁂𑀳𑀺, 𑀲𑀫𑁆𑀫𑀚𑁆𑀚𑀺𑀢𑁆𑀯𑀸𑀦 𑀅𑀲𑁆𑀲𑀫𑀁.

𑁧𑁫. ‘‘𑀲𑀼𑀯𑀡𑁆𑀡𑀯𑀡𑁆𑀡𑀁 𑀲𑀫𑁆𑀩𑀼𑀤𑁆𑀥𑀁, 𑀲𑀺𑀤𑁆𑀥𑀢𑁆𑀣𑀁 𑀮𑁄𑀓𑀦𑀸𑀬𑀓𑀁;

𑀤𑀺𑀲𑁆𑀯𑀸 𑀦𑀪𑁂𑀦 [𑀯𑀦𑁂𑀦 (𑀲𑁆𑀬𑀸. 𑀓.)] 𑀕𑀘𑁆𑀙𑀦𑁆𑀢𑀁, 𑀳𑀸𑀲𑁄 𑀫𑁂 𑀉𑀤𑀧𑀚𑁆𑀚𑀣.

𑁧𑁬. ‘‘𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑀁, 𑀮𑁄𑀓𑀚𑁂𑀝𑁆𑀞𑀁 𑀦𑀭𑀸𑀲𑀪𑀁;

𑀅𑀲𑁆𑀲𑀫𑀁 𑀅𑀢𑀺𑀦𑀸𑀫𑁂𑀢𑁆𑀯𑀸, 𑀚𑀮𑀚𑀕𑁆𑀕𑁂𑀳𑀺 𑀑𑀓𑀺𑀭𑀺𑀁.

𑁧𑁭. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀭𑁄𑀧𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁧𑁮. ‘‘𑀇𑀢𑁄 𑀢𑁂 𑀲𑀢𑁆𑀢𑀫𑁂 𑀓𑀧𑁆𑀧𑁂, 𑀘𑀢𑀼𑀭𑁄 𑀧𑀸𑀤𑀧𑀸𑀯𑀭𑀸;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑀸, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁧𑁯. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀢𑁆𑀢𑀧𑀤𑀼𑀫𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀢𑁆𑀢𑀧𑀤𑀼𑀫𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀘𑀢𑀼𑀢𑁆𑀣𑀁.

𑁫. 𑀧𑀼𑀧𑁆𑀨𑀸𑀲𑀦𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁦. ‘‘𑀲𑀼𑀯𑀡𑁆𑀡𑀯𑀡𑁆𑀡𑀁 𑀲𑀫𑁆𑀩𑀼𑀤𑁆𑀥𑀁, 𑀧𑀻𑀢𑀭𑀁𑀲𑀺𑀁𑀯 [𑀲𑀢𑀭𑀁𑀲𑀺𑀁𑀯 (𑀲𑀻. 𑀲𑁆𑀬𑀸.)] 𑀪𑀸𑀡𑀼𑀫𑀁;

𑀅𑀯𑀺𑀤𑀽𑀭𑁂𑀦 𑀕𑀘𑁆𑀙𑀦𑁆𑀢𑀁, 𑀲𑀺𑀤𑁆𑀥𑀢𑁆𑀣𑀁 𑀅𑀧𑀭𑀸𑀚𑀺𑀢𑀁.

𑁨𑁧. ‘‘𑀢𑀲𑁆𑀲 𑀧𑀘𑁆𑀘𑀼𑀕𑁆𑀕𑀫𑀺𑀢𑁆𑀯𑀸𑀦, 𑀧𑀯𑁂𑀲𑁂𑀢𑁆𑀯𑀸𑀦 𑀅𑀲𑁆𑀲𑀫𑀁;

𑀧𑀼𑀧𑁆𑀨𑀸𑀲𑀦𑀁 𑀫𑀬𑀸 𑀤𑀺𑀦𑁆𑀦𑀁, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸.

𑁨𑁨. ‘‘𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸𑀦, 𑀯𑁂𑀤𑀚𑀸𑀢𑁄 𑀢𑀤𑀸 𑀅𑀳𑀁;

𑀩𑀼𑀤𑁆𑀥𑁂 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀢𑀁 𑀓𑀫𑁆𑀫𑀁 𑀧𑀭𑀺𑀡𑀸𑀫𑀬𑀺𑀁.

𑁨𑁩. ‘‘𑀬𑀁 𑀫𑁂 𑀅𑀢𑁆𑀣𑀺 𑀓𑀢𑀁 𑀧𑀼𑀜𑁆𑀜𑀁, 𑀲𑀬𑀫𑁆𑀪𑀼𑀫𑁆𑀳𑀧𑀭𑀸𑀚𑀺𑀢𑁂;

𑀲𑀩𑁆𑀩𑁂𑀦 𑀢𑁂𑀦 𑀓𑀼𑀲𑀮𑁂𑀦, 𑀯𑀺𑀫𑀮𑁄 𑀳𑁄𑀫𑀺 𑀲𑀸𑀲𑀦𑁂.

𑁨𑁪. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀧𑀼𑀧𑁆𑀨𑀸𑀲𑀦𑀫𑀤𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀧𑀼𑀧𑁆𑀨𑀸𑀲𑀦𑀲𑁆𑀲𑀺𑀤𑀁 𑀨𑀮𑀁.

𑁨𑁫. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀼𑀧𑁆𑀨𑀸𑀲𑀦𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀼𑀧𑁆𑀨𑀸𑀲𑀦𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀜𑁆𑀘𑀫𑀁.

𑁬. 𑀆𑀲𑀦𑀲𑀦𑁆𑀣𑀯𑀺𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁬. ‘‘𑀘𑁂𑀢𑀺𑀬𑀁 𑀉𑀢𑁆𑀢𑀫𑀁 𑀦𑀸𑀫, 𑀲𑀺𑀔𑀺𑀦𑁄 𑀮𑁄𑀓𑀩𑀦𑁆𑀥𑀼𑀦𑁄;

𑀅𑀭𑀜𑁆𑀜𑁂 𑀇𑀭𑀻𑀡𑁂 𑀯𑀦𑁂, 𑀅𑀦𑁆𑀥𑀸𑀳𑀺𑀡𑁆𑀟𑀸𑀫𑀳𑀁 𑀢𑀤𑀸.

𑁨𑁭. ‘‘𑀧𑀯𑀦𑀸 𑀦𑀺𑀓𑁆𑀔𑀫𑀦𑁆𑀢𑁂𑀦, 𑀤𑀺𑀝𑁆𑀞𑀁 𑀲𑀻𑀳𑀸𑀲𑀦𑀁 𑀫𑀬𑀸;

𑀏𑀓𑀁𑀲𑀁 𑀅𑀜𑁆𑀚𑀮𑀺𑀁 𑀓𑀢𑁆𑀯𑀸, 𑀲𑀦𑁆𑀣𑀯𑀺𑀁 [𑀣𑀯𑀺𑀲𑁆𑀲𑀁 (𑀲𑀻.)] 𑀮𑁄𑀓𑀦𑀸𑀬𑀓𑀁.

𑁨𑁮. ‘‘𑀤𑀺𑀯𑀲𑀪𑀸𑀕𑀁 𑀣𑀯𑀺𑀢𑁆𑀯𑀸𑀦, 𑀩𑀼𑀤𑁆𑀥𑀁 𑀮𑁄𑀓𑀕𑁆𑀕𑀦𑀸𑀬𑀓𑀁;

𑀳𑀝𑁆𑀞𑁄 𑀳𑀝𑁆𑀞𑁂𑀦 𑀘𑀺𑀢𑁆𑀢𑁂𑀦, 𑀇𑀫𑀁 𑀯𑀸𑀘𑀁 𑀉𑀤𑀻𑀭𑀬𑀺𑀁.

𑁨𑁯. ‘‘‘𑀦𑀫𑁄 𑀢𑁂 𑀧𑀼𑀭𑀺𑀲𑀸𑀚𑀜𑁆𑀜, 𑀦𑀫𑁄 𑀢𑁂 𑀧𑀼𑀭𑀺𑀲𑀼𑀢𑁆𑀢𑀫;

𑀲𑀩𑁆𑀩𑀜𑁆𑀜𑀽𑀲𑀺 𑀫𑀳𑀸𑀯𑀻𑀭, 𑀮𑁄𑀓𑀚𑁂𑀝𑁆𑀞 𑀦𑀭𑀸𑀲𑀪’.

𑁩𑁦. ‘‘𑀅𑀪𑀺𑀢𑁆𑀣𑀯𑀺𑀢𑁆𑀯𑀸 𑀲𑀺𑀔𑀺𑀦𑀁, 𑀦𑀺𑀫𑀺𑀢𑁆𑀢𑀓𑀭𑀡𑁂𑀦𑀳𑀁;

𑀆𑀲𑀦𑀁 𑀅𑀪𑀺𑀯𑀸𑀤𑁂𑀢𑁆𑀯𑀸, 𑀧𑀓𑁆𑀓𑀸𑀫𑀺𑀁 𑀉𑀢𑁆𑀢𑀭𑀸𑀫𑀼𑀔𑁄.

𑁩𑁧. ‘‘𑀏𑀓𑀢𑁆𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀣𑀯𑀺𑀁 𑀯𑀤𑀢𑀁 𑀯𑀭𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀣𑁄𑀫𑀦𑀸𑀬 𑀇𑀤𑀁 𑀨𑀮𑀁.

𑁩𑁨. ‘‘𑀲𑀢𑁆𑀢𑀯𑀻𑀲𑁂 𑀇𑀢𑁄 𑀓𑀧𑁆𑀧𑁂, 𑀅𑀢𑀼𑀮𑀸 𑀲𑀢𑁆𑀢 𑀆𑀲𑀼 𑀢𑁂;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑀸, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁩𑁩. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀆𑀲𑀦𑀲𑀦𑁆𑀣𑀯𑀺𑀓𑁄 [𑀆𑀲𑀦𑀲𑀦𑁆𑀣𑀯𑀓𑁄 (?), 𑀆𑀲𑀦𑀣𑀯𑀺𑀓𑁄 (𑀓.), 𑀆𑀲𑀦𑀢𑁆𑀣𑀯𑀺𑀓𑁄 (𑀲𑀻. 𑀲𑁆𑀬𑀸.)] 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀆𑀲𑀦𑀲𑀦𑁆𑀣𑀯𑀺𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀙𑀝𑁆𑀞𑀁.

𑁭. 𑀲𑀤𑁆𑀤𑀲𑀜𑁆𑀜𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁪. ‘‘𑀲𑀼𑀤𑀲𑁆𑀲𑀦𑁄 𑀫𑀳𑀸𑀯𑀻𑀭𑁄, 𑀤𑁂𑀲𑁂𑀢𑀺 𑀅𑀫𑀢𑀁 𑀧𑀤𑀁;

𑀧𑀭𑀺𑀯𑀼𑀢𑁄 𑀲𑀸𑀯𑀓𑁂𑀳𑀺, 𑀯𑀲𑀢𑀺 𑀖𑀭𑀫𑀼𑀢𑁆𑀢𑀫𑁂.

𑁩𑁫. ‘‘𑀢𑀸𑀬 𑀯𑀸𑀘𑀸𑀬 𑀫𑀥𑀼𑀭𑀸𑀬, 𑀲𑀗𑁆𑀕𑀡𑁆𑀳𑀸𑀢𑀺 [𑀲𑀗𑁆𑀕𑀡𑁆𑀳𑀦𑁆𑀢𑁂 (𑀲𑀻.)] 𑀫𑀳𑀸𑀚𑀦𑀁;

𑀖𑁄𑀲𑁄 𑀘 𑀯𑀺𑀧𑀼𑀮𑁄 𑀆𑀲𑀺, 𑀆𑀲𑀻𑀲𑁄 [𑀆𑀲𑀁𑀲𑁄 (𑀲𑀻.)] 𑀤𑁂𑀯𑀫𑀸𑀦𑀼𑀲𑁂.

𑁩𑁬. ‘‘𑀦𑀺𑀕𑁆𑀖𑁄𑀲𑀲𑀤𑁆𑀤𑀁 𑀲𑀼𑀢𑁆𑀯𑀸𑀦, 𑀲𑀺𑀤𑁆𑀥𑀢𑁆𑀣𑀲𑁆𑀲 𑀫𑀳𑁂𑀲𑀺𑀦𑁄;

𑀲𑀤𑁆𑀤𑁂 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀅𑀯𑀦𑁆𑀤𑀺𑀁 𑀮𑁄𑀓𑀦𑀸𑀬𑀓𑀁.

𑁩𑁭. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀲𑀜𑁆𑀜𑀫𑀮𑀪𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀲𑀜𑁆𑀜𑀸𑀬𑀺𑀤𑀁 𑀨𑀮𑀁.

𑁩𑁮. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀤𑁆𑀤𑀲𑀜𑁆𑀜𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀤𑁆𑀤𑀲𑀜𑁆𑀜𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀲𑀢𑁆𑀢𑀫𑀁.

𑁮. 𑀢𑀺𑀭𑀁𑀲𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁯. ‘‘𑀓𑁂𑀲𑀭𑀺𑀁 𑀅𑀪𑀺𑀚𑀸𑀢𑀁𑀯, 𑀅𑀕𑁆𑀕𑀺𑀓𑁆𑀔𑀦𑁆𑀥𑀁𑀯 𑀧𑀩𑁆𑀩𑀢𑁂;

𑀑𑀪𑀸𑀲𑁂𑀦𑁆𑀢𑀁 𑀤𑀺𑀲𑀸 𑀲𑀩𑁆𑀩𑀸 [𑀦𑀺𑀯𑀸𑀲𑁂𑀦𑁆𑀢𑀁 (𑀓.), 𑀤𑀺𑀲𑀸𑀲𑀺𑀦𑁆𑀦𑀁 (𑀲𑁆𑀬𑀸.)], 𑀲𑀺𑀤𑁆𑀥𑀢𑁆𑀣𑀁 𑀧𑀩𑁆𑀩𑀢𑀦𑁆𑀢𑀭𑁂.

𑁪𑁦. ‘‘𑀲𑀽𑀭𑀺𑀬𑀲𑁆𑀲 𑀘 𑀆𑀮𑁄𑀓𑀁, 𑀘𑀦𑁆𑀤𑀸𑀮𑁄𑀓𑀁 𑀢𑀣𑁂𑀯 𑀘;

𑀩𑀼𑀤𑁆𑀥𑀸𑀮𑁄𑀓𑀜𑁆𑀘 𑀤𑀺𑀲𑁆𑀯𑀸𑀦, 𑀯𑀺𑀢𑁆𑀢𑀺 𑀫𑁂 𑀉𑀤𑀧𑀚𑁆𑀚𑀣.

𑁪𑁧. ‘‘𑀢𑀬𑁄 𑀆𑀮𑁄𑀓𑁂 𑀤𑀺𑀲𑁆𑀯𑀸𑀦, 𑀲𑀫𑁆𑀩𑀼𑀤𑁆𑀥𑀁 [𑀩𑀼𑀤𑁆𑀥𑀜𑁆𑀘 (𑀲𑀻.)] 𑀲𑀸𑀯𑀓𑀼𑀢𑁆𑀢𑀫𑀁;

𑀏𑀓𑀁𑀲𑀁 𑀅𑀚𑀺𑀦𑀁 𑀓𑀢𑁆𑀯𑀸, 𑀲𑀦𑁆𑀣𑀯𑀺𑀁 𑀮𑁄𑀓𑀦𑀸𑀬𑀓𑀁.

𑁪𑁨. ‘‘𑀢𑀬𑁄 𑀳𑀺 𑀆𑀮𑁄𑀓𑀓𑀭𑀸, 𑀮𑁄𑀓𑁂 𑀮𑁄𑀓𑀢𑀫𑁄𑀦𑀼𑀤𑀸;

𑀘𑀦𑁆𑀤𑁄 𑀘 𑀲𑀽𑀭𑀺𑀬𑁄 𑀘𑀸𑀧𑀺, 𑀩𑀼𑀤𑁆𑀥𑁄 𑀘 𑀮𑁄𑀓𑀦𑀸𑀬𑀓𑁄.

𑁪𑁩. ‘‘𑀑𑀧𑀫𑁆𑀫𑀁 𑀉𑀧𑀤𑀲𑁆𑀲𑁂𑀢𑁆𑀯𑀸, 𑀓𑀺𑀢𑁆𑀢𑀺𑀢𑁄 𑀫𑁂 𑀫𑀳𑀸𑀫𑀼𑀦𑀺;

𑀩𑀼𑀤𑁆𑀥𑀲𑁆𑀲 𑀯𑀡𑁆𑀡𑀁 𑀓𑀺𑀢𑁆𑀢𑁂𑀢𑁆𑀯𑀸, 𑀓𑀧𑁆𑀧𑀁 𑀲𑀕𑁆𑀕𑀫𑁆𑀳𑀺 𑀫𑁄𑀤𑀳𑀁.

𑁪𑁪. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀩𑀼𑀤𑁆𑀥𑀫𑀪𑀺𑀓𑀺𑀢𑁆𑀢𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀓𑀺𑀢𑁆𑀢𑀦𑀸𑀬 𑀇𑀤𑀁 𑀨𑀮𑀁.

𑁪𑁫. ‘‘𑀏𑀓𑀲𑀝𑁆𑀞𑀺𑀫𑁆𑀳𑀺𑀢𑁄 𑀓𑀧𑁆𑀧𑁂, 𑀏𑀓𑁄 𑀜𑀸𑀡𑀥𑀭𑁄 𑀅𑀳𑀼;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁪𑁬. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀢𑀺𑀭𑀁𑀲𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀢𑀺𑀭𑀁𑀲𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀅𑀝𑁆𑀞𑀫𑀁.

𑁯. 𑀓𑀦𑁆𑀤𑀮𑀺𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁪𑁭. ‘‘𑀲𑀺𑀦𑁆𑀥𑀼𑀬𑀸 𑀦𑀤𑀺𑀬𑀸 𑀢𑀻𑀭𑁂, 𑀅𑀳𑁄𑀲𑀺𑀁 𑀓𑀲𑁆𑀲𑀓𑁄 𑀢𑀤𑀸;

𑀧𑀭𑀓𑀫𑁆𑀫𑀸𑀬𑀦𑁂 𑀬𑀼𑀢𑁆𑀢𑁄, 𑀧𑀭𑀪𑀢𑁆𑀢𑀁 𑀅𑀧𑀲𑁆𑀲𑀺𑀢𑁄.

𑁪𑁮. ‘‘𑀲𑀺𑀦𑁆𑀥𑀼𑀁 𑀅𑀦𑀼𑀘𑀭𑀦𑁆𑀢𑁄𑀳𑀁, 𑀲𑀺𑀤𑁆𑀥𑀢𑁆𑀣𑀁 𑀚𑀺𑀦𑀫𑀤𑁆𑀤𑀲𑀁;

𑀲𑀫𑀸𑀥𑀺𑀦𑀸 𑀦𑀺𑀲𑀺𑀦𑁆𑀦𑀁𑀯, 𑀲𑀢𑀧𑀢𑁆𑀢𑀁𑀯 𑀧𑀼𑀧𑁆𑀨𑀺𑀢𑀁.

𑁪𑁯. ‘‘𑀲𑀢𑁆𑀢 𑀓𑀦𑁆𑀤𑀮𑀺𑀧𑀼𑀧𑁆𑀨𑀸𑀦𑀺, 𑀯𑀡𑁆𑀝𑁂 𑀙𑁂𑀢𑁆𑀯𑀸𑀦𑀳𑀁 𑀢𑀤𑀸;

𑀫𑀢𑁆𑀣𑀓𑁂 𑀅𑀪𑀺𑀭𑁄𑀧𑁂𑀲𑀺𑀁, 𑀩𑀼𑀤𑁆𑀥𑀲𑁆𑀲𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑁄.

𑁫𑁦. ‘‘𑀲𑀼𑀯𑀡𑁆𑀡𑀯𑀡𑁆𑀡𑀁 𑀲𑀫𑁆𑀩𑀼𑀤𑁆𑀥𑀁, 𑀅𑀦𑀼𑀓𑀽𑀮𑁂 𑀲𑀫𑀸𑀳𑀺𑀢𑀁;

𑀢𑀺𑀥𑀸𑀧𑀪𑀺𑀦𑁆𑀦𑀫𑀸𑀢𑀗𑁆𑀕𑀁, 𑀓𑀼𑀜𑁆𑀚𑀭𑀁𑀯 𑀤𑀼𑀭𑀸𑀲𑀤𑀁.

𑁫𑁧. ‘‘𑀢𑀫𑀳𑀁 𑀉𑀧𑀕𑀦𑁆𑀢𑁆𑀯𑀸𑀦, 𑀦𑀺𑀧𑀓𑀁 𑀪𑀸𑀯𑀺𑀢𑀺𑀦𑁆𑀤𑁆𑀭𑀺𑀬𑀁;

𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸𑀦, 𑀅𑀯𑀦𑁆𑀤𑀺𑀁 𑀲𑀢𑁆𑀣𑀼𑀦𑁄 𑀅𑀳𑀁.

𑁫𑁨. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀭𑁄𑀧𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁫𑁩. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀓𑀦𑁆𑀤𑀮𑀺𑀧𑀼𑀧𑁆𑀨𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀓𑀦𑁆𑀤𑀮𑀺𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀦𑀯𑀫𑀁.

𑁧𑁦. 𑀓𑀼𑀫𑀼𑀤𑀫𑀸𑀮𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁫𑁪. ‘‘𑀉𑀲𑀪𑀁 𑀧𑀯𑀭𑀁 𑀯𑀻𑀭𑀁, 𑀫𑀳𑁂𑀲𑀺𑀁 𑀯𑀺𑀚𑀺𑀢𑀸𑀯𑀺𑀦𑀁;

𑀯𑀺𑀧𑀲𑁆𑀲𑀺𑀦𑀁 𑀫𑀳𑀸𑀯𑀻𑀭𑀁, 𑀅𑀪𑀺𑀚𑀸𑀢𑀁𑀯 𑀓𑁂𑀲𑀭𑀺𑀁.

𑁫𑁫. ‘‘𑀭𑀣𑀺𑀬𑀁 𑀧𑀝𑀺𑀧𑀚𑁆𑀚𑀦𑁆𑀢𑀁, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑀁;

𑀕𑀳𑁂𑀢𑁆𑀯𑀸 𑀓𑀼𑀫𑀼𑀤𑀁 𑀫𑀸𑀮𑀁, 𑀩𑀼𑀤𑁆𑀥𑀲𑁂𑀝𑁆𑀞𑀁 𑀲𑀫𑁄𑀓𑀺𑀭𑀺𑀁.

𑁫𑁬. ‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀧𑀽𑀚𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁫𑁭. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀓𑀼𑀫𑀼𑀤𑀫𑀸𑀮𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀓𑀼𑀫𑀼𑀤𑀫𑀸𑀮𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀲𑀫𑀁.

𑀆𑀭𑀓𑁆𑀔𑀤𑀸𑀬𑀓𑀯𑀕𑁆𑀕𑁄 𑀩𑀸𑀢𑁆𑀢𑀺𑀁𑀲𑀢𑀺𑀫𑁄 [𑀩𑀢𑁆𑀢𑀺𑀁𑀲𑀢𑀺𑀫𑁄 (𑀲𑀻. 𑀲𑁆𑀬𑀸.)].