𑁯. 𑀩𑀼𑀤𑁆𑀥𑀼𑀧𑀝𑁆𑀞𑀸𑀬𑀺𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁮. ‘‘𑀯𑁂𑀝𑀫𑁆𑀪𑀺𑀦𑀻𑀢𑀺 [𑀯𑁂𑀝𑀫𑁆𑀩𑀭𑀻𑀢𑀺 (𑀲𑀻.), 𑀯𑁂𑀥𑀫𑁆𑀪𑀺𑀦𑀻𑀢𑀺 (𑀲𑁆𑀬𑀸.)] 𑀫𑁂 𑀦𑀸𑀫𑀁, 𑀧𑀺𑀢𑀼𑀲𑀦𑁆𑀢𑀁 [𑀧𑀺𑀢𑀸’𑀲𑀦𑁆𑀢𑀁 (?)] 𑀫𑀫𑀁 𑀢𑀤𑀸;

𑀫𑀫 𑀳𑀢𑁆𑀣𑀁 𑀕𑀳𑁂𑀢𑁆𑀯𑀸𑀦, 𑀉𑀧𑀸𑀦𑀬𑀺 𑀫𑀳𑀸𑀫𑀼𑀦𑀺𑀁.

𑁩𑁯. ‘‘𑀇𑀫𑁂𑀫𑀁 𑀉𑀤𑁆𑀤𑀺𑀲𑀺𑀲𑁆𑀲𑀦𑁆𑀢𑀺, 𑀩𑀼𑀤𑁆𑀥𑀸 𑀮𑁄𑀓𑀕𑁆𑀕𑀦𑀸𑀬𑀓𑀸;

𑀢𑁂𑀳𑀁 𑀉𑀧𑀝𑁆𑀞𑀺𑀁 𑀲𑀓𑁆𑀓𑀘𑁆𑀘𑀁, 𑀧𑀲𑀦𑁆𑀦𑁄 𑀲𑁂𑀳𑀺 𑀧𑀸𑀡𑀺𑀪𑀺.

𑁪𑁦. ‘‘𑀏𑀓𑀢𑁆𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀩𑀼𑀤𑁆𑀥𑁂 𑀉𑀧𑀝𑁆𑀞𑀳𑀺𑀁 [𑀧𑀭𑀺𑀘𑀭𑀺𑀁 (𑀲𑀻. 𑀲𑁆𑀬𑀸.)] 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀉𑀧𑀝𑁆𑀞𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁪𑁧. ‘‘𑀢𑁂𑀯𑀻𑀲𑀫𑁆𑀳𑀺 𑀇𑀢𑁄 𑀓𑀧𑁆𑀧𑁂, 𑀘𑀢𑀼𑀭𑁄 𑀆𑀲𑀼 𑀔𑀢𑁆𑀢𑀺𑀬𑀸;

𑀲𑀫𑀡𑀼𑀧𑀝𑁆𑀞𑀸𑀓𑀸 𑀦𑀸𑀫, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁪𑁨. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀩𑀼𑀤𑁆𑀥𑀼𑀧𑀝𑁆𑀞𑀸𑀬𑀺𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀩𑀼𑀤𑁆𑀥𑀼𑀧𑀝𑁆𑀞𑀸𑀬𑀺𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀦𑀯𑀫𑀁.