𑁨𑁯. 𑀧𑀡𑁆𑀡𑀤𑀸𑀬𑀓𑀯𑀕𑁆𑀕𑁄

𑁧. 𑀧𑀡𑁆𑀡𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧. ‘‘𑀧𑀡𑁆𑀡𑀲𑀸𑀮𑁂 𑀦𑀺𑀲𑀺𑀦𑁆𑀦𑁄𑀫𑁆𑀳𑀺, 𑀧𑀡𑁆𑀡𑀪𑁄𑀚𑀦𑀪𑁄𑀚𑀦𑁄;

𑀉𑀧𑀯𑀺𑀝𑁆𑀞𑀜𑁆𑀘 𑀫𑀁 𑀲𑀦𑁆𑀢𑀁, 𑀉𑀧𑀸𑀕𑀘𑁆𑀙𑀺 𑀫𑀳𑀸𑀇𑀲𑀺 [𑀫𑀳𑀸𑀫𑀼𑀦𑀺 (𑀲𑀻.)].

𑁨. ‘‘𑀲𑀺𑀤𑁆𑀥𑀢𑁆𑀣𑁄 𑀮𑁄𑀓𑀧𑀚𑁆𑀚𑁄𑀢𑁄, 𑀲𑀩𑁆𑀩𑀮𑁄𑀓𑀢𑀺𑀓𑀺𑀘𑁆𑀙𑀓𑁄;

𑀢𑀲𑁆𑀲 𑀧𑀡𑁆𑀡𑀁 𑀫𑀬𑀸 𑀤𑀺𑀦𑁆𑀦𑀁, 𑀦𑀺𑀲𑀺𑀦𑁆𑀦𑀁 [𑀦𑀺𑀲𑀺𑀦𑁆𑀦𑀲𑁆𑀲 (𑀲𑁆𑀬𑀸. 𑀅𑀝𑁆𑀞.)] 𑀧𑀡𑁆𑀡𑀲𑀦𑁆𑀣𑀭𑁂.

𑁩. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀧𑀡𑁆𑀡𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀧𑀡𑁆𑀡𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁪. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀡𑁆𑀡𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀡𑁆𑀡𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀞𑀫𑀁.

𑁨. 𑀨𑀮𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁫. ‘‘𑀲𑀺𑀦𑁂𑀭𑀼𑀲𑀫𑀲𑀦𑁆𑀢𑁄𑀲𑁄, 𑀥𑀭𑀡𑀻𑀲𑀫 [𑀥𑀭𑀡𑀻𑀥𑀭 (𑀲𑀻. 𑀲𑁆𑀬𑀸.)] 𑀲𑀸𑀤𑀺𑀲𑁄;

𑀯𑀼𑀝𑁆𑀞𑀳𑀺𑀢𑁆𑀯𑀸 𑀲𑀫𑀸𑀥𑀺𑀫𑁆𑀳𑀸, 𑀪𑀺𑀓𑁆𑀔𑀸𑀬 𑀫𑀫𑀼𑀧𑀝𑁆𑀞𑀺𑀢𑁄.

𑁬. ‘‘𑀳𑀭𑀻𑀢𑀓𑀁 [𑀳𑀭𑀻𑀢𑀓𑀺𑀁 (𑀲𑁆𑀬𑀸.)] 𑀆𑀫𑀮𑀓𑀁, 𑀅𑀫𑁆𑀩𑀚𑀫𑁆𑀩𑀼𑀯𑀺𑀪𑀻𑀢𑀓𑀁;

𑀓𑁄𑀮𑀁 𑀪𑀮𑁆𑀮𑀸𑀢𑀓𑀁 𑀩𑀺𑀮𑁆𑀮𑀁, 𑀨𑀸𑀭𑀼𑀲𑀓𑀨𑀮𑀸𑀦𑀺 𑀘.

𑁭. ‘‘𑀲𑀺𑀤𑁆𑀥𑀢𑁆𑀣𑀲𑁆𑀲 𑀫𑀳𑁂𑀲𑀺𑀲𑁆𑀲, 𑀲𑀩𑁆𑀩𑀮𑁄𑀓𑀸𑀦𑀼𑀓𑀫𑁆𑀧𑀺𑀦𑁄;

𑀢𑀜𑁆𑀘 𑀲𑀩𑁆𑀩𑀁 𑀫𑀬𑀸 𑀤𑀺𑀦𑁆𑀦𑀁, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸.

𑁮. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀨𑀮𑀁 𑀅𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀨𑀮𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁯. ‘‘𑀲𑀢𑁆𑀢𑀧𑀜𑁆𑀜𑀸𑀲𑀺𑀢𑁄 𑀓𑀧𑁆𑀧𑁂, 𑀏𑀓𑀚𑁆𑀛𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁧𑁦. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀨𑀮𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀨𑀮𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀼𑀢𑀺𑀬𑀁.

𑁩. 𑀧𑀘𑁆𑀘𑀼𑀕𑁆𑀕𑀫𑀦𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁧. ‘‘𑀲𑀻𑀳𑀁 𑀬𑀣𑀸 𑀯𑀦𑀘𑀭𑀁, 𑀦𑀺𑀲𑀪𑀸𑀚𑀸𑀦𑀺𑀬𑀁 𑀬𑀣𑀸;

𑀓𑀓𑀼𑀥𑀁 𑀯𑀺𑀮𑀲𑀦𑁆𑀢𑀁𑀯, 𑀆𑀕𑀘𑁆𑀙𑀦𑁆𑀢𑀁 𑀦𑀭𑀸𑀲𑀪𑀁.

𑁧𑁨. ‘‘𑀲𑀺𑀤𑁆𑀥𑀢𑁆𑀣𑀁 𑀮𑁄𑀓𑀧𑀚𑁆𑀚𑁄𑀢𑀁, 𑀲𑀩𑁆𑀩𑀮𑁄𑀓𑀢𑀺𑀓𑀺𑀘𑁆𑀙𑀓𑀁;

𑀅𑀓𑀸𑀲𑀺𑀁 𑀧𑀘𑁆𑀘𑀼𑀕𑁆𑀕𑀫𑀦𑀁, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸.

𑁧𑁩. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀧𑀘𑁆𑀘𑀼𑀕𑁆𑀕𑀘𑁆𑀙𑀺𑀁 𑀦𑀭𑀸𑀲𑀪𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀧𑀘𑁆𑀘𑀼𑀕𑁆𑀕𑀫𑀦𑁂 𑀇𑀤𑀁 𑀨𑀮𑀁.

𑁧𑁪. ‘‘𑀲𑀢𑁆𑀢𑀢𑀺𑀁𑀲𑁂 [𑀲𑀢𑁆𑀢𑀯𑀻𑀲𑁂 (𑀲𑀻. 𑀲𑁆𑀬𑀸.)] 𑀇𑀢𑁄 𑀓𑀧𑁆𑀧𑁂, 𑀏𑀓𑁄 𑀆𑀲𑀺𑀁 𑀚𑀦𑀸𑀥𑀺𑀧𑁄;

𑀲𑀧𑀭𑀺𑀯𑀸𑀭𑁄𑀢𑀺 𑀦𑀸𑀫𑁂𑀦, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁧𑁫. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀘𑁆𑀘𑀼𑀕𑁆𑀕𑀫𑀦𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀘𑁆𑀘𑀼𑀕𑁆𑀕𑀫𑀦𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀢𑀢𑀺𑀬𑀁.

𑁪. 𑀏𑀓𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁬. ‘‘𑀤𑀓𑁆𑀔𑀺𑀡𑀫𑁆𑀳𑀺 𑀤𑀼𑀯𑀸𑀭𑀫𑁆𑀳𑀺, 𑀧𑀺𑀲𑀸𑀘𑁄 𑀆𑀲𑀳𑀁 𑀢𑀤𑀸;

𑀅𑀤𑁆𑀤𑀲𑀁 𑀯𑀺𑀭𑀚𑀁 𑀩𑀼𑀤𑁆𑀥𑀁, 𑀧𑀻𑀢𑀭𑀁𑀲𑀺𑀁𑀯 𑀪𑀸𑀡𑀼𑀫𑀁.

𑁧𑁭. ‘‘𑀯𑀺𑀧𑀲𑁆𑀲𑀺𑀲𑁆𑀲 𑀦𑀭𑀕𑁆𑀕𑀲𑁆𑀲, 𑀲𑀩𑁆𑀩𑀮𑁄𑀓𑀳𑀺𑀢𑁂𑀲𑀺𑀦𑁄;

𑀏𑀓𑀧𑀼𑀧𑁆𑀨𑀁 𑀫𑀬𑀸 𑀤𑀺𑀦𑁆𑀦𑀁, 𑀤𑁆𑀯𑀺𑀧𑀤𑀺𑀦𑁆𑀤𑀲𑁆𑀲 𑀢𑀸𑀤𑀺𑀦𑁄.

𑁧𑁮. ‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁧𑁯. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀏𑀓𑀧𑀼𑀧𑁆𑀨𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀏𑀓𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀘𑀢𑀼𑀢𑁆𑀣𑀁.

𑁫. 𑀫𑀖𑀯𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁦. ‘‘𑀦𑀫𑁆𑀫𑀤𑀸𑀦𑀤𑀺𑀬𑀸 𑀢𑀻𑀭𑁂, 𑀲𑀬𑀫𑁆𑀪𑀽 𑀅𑀧𑀭𑀸𑀚𑀺𑀢𑁄;

𑀲𑀫𑀸𑀥𑀺𑀁 𑀲𑁄 𑀲𑀫𑀸𑀧𑀦𑁆𑀦𑁄, 𑀯𑀺𑀧𑁆𑀧𑀲𑀦𑁆𑀦𑁄 𑀅𑀦𑀸𑀯𑀺𑀮𑁄.

𑁨𑁧. ‘‘𑀤𑀺𑀲𑁆𑀯𑀸 𑀧𑀲𑀦𑁆𑀦𑀲𑀼𑀫𑀦𑁄, 𑀲𑀫𑁆𑀩𑀼𑀤𑁆𑀥𑀁 𑀅𑀧𑀭𑀸𑀚𑀺𑀢𑀁;

𑀢𑀸𑀳𑀁 𑀫𑀖𑀯𑀧𑀼𑀧𑁆𑀨𑁂𑀦, 𑀲𑀬𑀫𑁆𑀪𑀼𑀁 𑀧𑀽𑀚𑀬𑀺𑀁 𑀢𑀤𑀸.

𑁨𑁨. ‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀧𑀽𑀚𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁨𑁩. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀫𑀖𑀯𑀧𑀼𑀧𑁆𑀨𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀫𑀖𑀯𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀜𑁆𑀘𑀫𑀁.

𑁬. 𑀉𑀧𑀝𑁆𑀞𑀸𑀓𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁪. ‘‘𑀭𑀣𑀺𑀬𑀁 𑀧𑀝𑀺𑀧𑀚𑁆𑀚𑀦𑁆𑀢𑀁, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑀁;

𑀤𑁆𑀯𑀺𑀧𑀤𑀺𑀦𑁆𑀤𑀁 𑀫𑀳𑀸𑀦𑀸𑀕𑀁, 𑀮𑁄𑀓𑀚𑁂𑀝𑁆𑀞𑀁 𑀦𑀭𑀸𑀲𑀪𑀁.

𑁨𑁫. ‘‘𑀧𑀓𑁆𑀓𑁄𑀲𑀸𑀧𑀺𑀬 𑀢𑀲𑁆𑀲𑀸𑀳𑀁, 𑀲𑀩𑁆𑀩𑀮𑁄𑀓𑀳𑀺𑀢𑁂𑀲𑀺𑀦𑁄;

𑀉𑀧𑀝𑁆𑀞𑀸𑀓𑁄 𑀫𑀬𑀸 𑀤𑀺𑀦𑁆𑀦𑁄, 𑀲𑀺𑀤𑁆𑀥𑀢𑁆𑀣𑀲𑁆𑀲 𑀫𑀳𑁂𑀲𑀺𑀦𑁄.

𑁨𑁬. ‘‘𑀧𑀝𑀺𑀕𑁆𑀕𑀳𑁂𑀢𑁆𑀯𑀸 [𑀧𑀝𑀺𑀕𑁆𑀕𑀳𑁂𑀲𑀺 (𑀓.)] 𑀲𑀫𑁆𑀩𑀼𑀤𑁆𑀥𑁄, 𑀦𑀺𑀬𑁆𑀬𑀸𑀤𑁂𑀲𑀺 𑀫𑀳𑀸𑀫𑀼𑀦𑀺 [𑀫𑀳𑀸𑀇𑀲𑀺 (𑀓.)];

𑀉𑀝𑁆𑀞𑀸𑀬 𑀆𑀲𑀦𑀸 𑀢𑀫𑁆𑀳𑀸, 𑀧𑀓𑁆𑀓𑀸𑀫𑀺 𑀧𑀸𑀘𑀺𑀦𑀸𑀫𑀼𑀔𑁄.

𑁨𑁭. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀉𑀧𑀝𑁆𑀞𑀸𑀓𑀫𑀤𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀉𑀧𑀝𑁆𑀞𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁨𑁮. ‘‘𑀲𑀢𑁆𑀢𑀧𑀜𑁆𑀜𑀸𑀲𑀺𑀢𑁄 𑀓𑀧𑁆𑀧𑁂, 𑀩𑀮𑀲𑁂𑀦𑀲𑀦𑀸𑀫𑀓𑁄;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁨𑁯. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀉𑀧𑀝𑁆𑀞𑀸𑀓𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀉𑀧𑀝𑁆𑀞𑀸𑀓𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀙𑀝𑁆𑀞𑀁.

𑁭. 𑀅𑀧𑀤𑀸𑀦𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁦. ‘‘𑀅𑀧𑀤𑀸𑀦𑀁 𑀲𑀼𑀕𑀢𑀸𑀦𑀁, 𑀓𑀺𑀢𑁆𑀢𑀬𑀺𑀁𑀳𑀁 𑀫𑀳𑁂𑀲𑀺𑀦𑀁;

𑀧𑀸𑀤𑁂 𑀘 𑀲𑀺𑀭𑀲𑀸 𑀯𑀦𑁆𑀤𑀺𑀁, 𑀧𑀲𑀦𑁆𑀦𑁄 𑀲𑁂𑀳𑀺 𑀧𑀸𑀡𑀺𑀪𑀺.

𑁩𑁧. ‘‘𑀤𑁆𑀯𑁂𑀦𑀯𑀼𑀢𑁂 𑀇𑀢𑁄 𑀓𑀧𑁆𑀧𑁂, 𑀅𑀧𑀤𑀸𑀦𑀁 𑀧𑀓𑀺𑀢𑁆𑀢𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀓𑀺𑀢𑁆𑀢𑀦𑀸𑀬 𑀇𑀤𑀁 𑀨𑀮𑀁.

𑁩𑁨. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀅𑀧𑀤𑀸𑀦𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀅𑀧𑀤𑀸𑀦𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀲𑀢𑁆𑀢𑀫𑀁.

𑁮. 𑀲𑀢𑁆𑀢𑀸𑀳𑀧𑀩𑁆𑀩𑀚𑀺𑀢𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁩. ‘‘𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄, 𑀲𑀗𑁆𑀖𑁄 𑀲𑀓𑁆𑀓𑀢𑀫𑀸𑀦𑀺𑀢𑁄;

𑀩𑁆𑀬𑀲𑀦𑀁 𑀫𑁂 𑀅𑀦𑀼𑀧𑁆𑀧𑀢𑁆𑀢𑀁, 𑀜𑀸𑀢𑀺𑀪𑁂𑀤𑁄 𑀧𑀼𑀭𑁂 𑀅𑀳𑀼.

𑁩𑁪. ‘‘𑀧𑀩𑁆𑀩𑀚𑁆𑀚𑀁 𑀉𑀧𑀕𑀦𑁆𑀢𑁆𑀯𑀸𑀦, 𑀩𑁆𑀬𑀲𑀦𑀼𑀧𑀲𑀫𑀸𑀬𑀳𑀁;

𑀲𑀢𑁆𑀢𑀸𑀳𑀸𑀪𑀺𑀭𑀢𑁄 𑀢𑀢𑁆𑀣, 𑀲𑀢𑁆𑀣𑀼𑀲𑀸𑀲𑀦𑀓𑀫𑁆𑀬𑀢𑀸.

𑁩𑁫. ‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀫𑀳𑀁 𑀧𑀩𑁆𑀩𑀚𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀧𑀩𑁆𑀩𑀚𑁆𑀚𑀸𑀬 𑀇𑀤𑀁 𑀨𑀮𑀁.

𑁩𑁬. ‘‘𑀲𑀢𑁆𑀢𑀲𑀝𑁆𑀞𑀺𑀫𑁆𑀳𑀺𑀢𑁄 𑀓𑀧𑁆𑀧𑁂, 𑀲𑀢𑁆𑀢 𑀆𑀲𑀼𑀁 𑀫𑀳𑀻𑀧𑀢𑀻;

𑀲𑀼𑀦𑀺𑀓𑁆𑀔𑀫𑀸𑀢𑀺 𑀜𑀸𑀬𑀦𑁆𑀢𑀺, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁩𑁭. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀢𑁆𑀢𑀸𑀳𑀧𑀩𑁆𑀩𑀚𑀺𑀢𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀢𑁆𑀢𑀸𑀳𑀧𑀩𑁆𑀩𑀚𑀺𑀢𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀅𑀝𑁆𑀞𑀫𑀁.

𑁯. 𑀩𑀼𑀤𑁆𑀥𑀼𑀧𑀝𑁆𑀞𑀸𑀬𑀺𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁮. ‘‘𑀯𑁂𑀝𑀫𑁆𑀪𑀺𑀦𑀻𑀢𑀺 [𑀯𑁂𑀝𑀫𑁆𑀩𑀭𑀻𑀢𑀺 (𑀲𑀻.), 𑀯𑁂𑀥𑀫𑁆𑀪𑀺𑀦𑀻𑀢𑀺 (𑀲𑁆𑀬𑀸.)] 𑀫𑁂 𑀦𑀸𑀫𑀁, 𑀧𑀺𑀢𑀼𑀲𑀦𑁆𑀢𑀁 [𑀧𑀺𑀢𑀸’𑀲𑀦𑁆𑀢𑀁 (?)] 𑀫𑀫𑀁 𑀢𑀤𑀸;

𑀫𑀫 𑀳𑀢𑁆𑀣𑀁 𑀕𑀳𑁂𑀢𑁆𑀯𑀸𑀦, 𑀉𑀧𑀸𑀦𑀬𑀺 𑀫𑀳𑀸𑀫𑀼𑀦𑀺𑀁.

𑁩𑁯. ‘‘𑀇𑀫𑁂𑀫𑀁 𑀉𑀤𑁆𑀤𑀺𑀲𑀺𑀲𑁆𑀲𑀦𑁆𑀢𑀺, 𑀩𑀼𑀤𑁆𑀥𑀸 𑀮𑁄𑀓𑀕𑁆𑀕𑀦𑀸𑀬𑀓𑀸;

𑀢𑁂𑀳𑀁 𑀉𑀧𑀝𑁆𑀞𑀺𑀁 𑀲𑀓𑁆𑀓𑀘𑁆𑀘𑀁, 𑀧𑀲𑀦𑁆𑀦𑁄 𑀲𑁂𑀳𑀺 𑀧𑀸𑀡𑀺𑀪𑀺.

𑁪𑁦. ‘‘𑀏𑀓𑀢𑁆𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀩𑀼𑀤𑁆𑀥𑁂 𑀉𑀧𑀝𑁆𑀞𑀳𑀺𑀁 [𑀧𑀭𑀺𑀘𑀭𑀺𑀁 (𑀲𑀻. 𑀲𑁆𑀬𑀸.)] 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀉𑀧𑀝𑁆𑀞𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁪𑁧. ‘‘𑀢𑁂𑀯𑀻𑀲𑀫𑁆𑀳𑀺 𑀇𑀢𑁄 𑀓𑀧𑁆𑀧𑁂, 𑀘𑀢𑀼𑀭𑁄 𑀆𑀲𑀼 𑀔𑀢𑁆𑀢𑀺𑀬𑀸;

𑀲𑀫𑀡𑀼𑀧𑀝𑁆𑀞𑀸𑀓𑀸 𑀦𑀸𑀫, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁪𑁨. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀩𑀼𑀤𑁆𑀥𑀼𑀧𑀝𑁆𑀞𑀸𑀬𑀺𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀩𑀼𑀤𑁆𑀥𑀼𑀧𑀝𑁆𑀞𑀸𑀬𑀺𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀦𑀯𑀫𑀁.

𑁧𑁦. 𑀧𑀼𑀩𑁆𑀩𑀗𑁆𑀕𑀫𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁪𑁩. ‘‘𑀘𑀼𑀮𑁆𑀮𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀺, 𑀧𑀩𑁆𑀩𑀚𑀺𑀫𑁆𑀳 𑀅𑀓𑀺𑀜𑁆𑀘𑀦𑀸;

𑀢𑁂𑀲𑀁 𑀧𑀼𑀩𑁆𑀩𑀗𑁆𑀕𑀫𑁄 𑀆𑀲𑀺𑀁, 𑀉𑀢𑁆𑀢𑀫𑀢𑁆𑀣𑀲𑁆𑀲 𑀧𑀢𑁆𑀢𑀺𑀬𑀸.

𑁪𑁪. ‘‘𑀲𑀭𑀸𑀕𑀸 𑀲𑀪𑀯𑀸 [𑀲𑀫𑁄𑀳𑀸 (𑀲𑁆𑀬𑀸.)] 𑀘𑁂𑀢𑁂, 𑀯𑀺𑀧𑁆𑀧𑀲𑀦𑁆𑀦𑀫𑀦𑀸𑀯𑀺𑀮𑀸;

𑀉𑀧𑀝𑁆𑀞𑀳𑀺𑀁𑀲𑀼 𑀲𑀓𑁆𑀓𑀘𑁆𑀘𑀁, 𑀧𑀲𑀦𑁆𑀦𑀸 𑀲𑁂𑀳𑀺 𑀧𑀸𑀡𑀺𑀪𑀺.

𑁪𑁫. ‘‘𑀔𑀻𑀡𑀸𑀲𑀯𑀸 𑀯𑀦𑁆𑀢𑀤𑁄𑀲𑀸, 𑀓𑀢𑀓𑀺𑀘𑁆𑀘𑀸 𑀅𑀦𑀸𑀲𑀯𑀸;

𑀨𑀭𑀺𑀁𑀲𑀼 𑀫𑁂𑀢𑁆𑀢𑀘𑀺𑀢𑁆𑀢𑁂𑀦, 𑀲𑀬𑀫𑁆𑀪𑀽 𑀅𑀧𑀭𑀸𑀚𑀺𑀢𑀸.

𑁪𑁬. ‘‘𑀢𑁂𑀲𑀁 𑀉𑀧𑀝𑁆𑀞𑀳𑀺𑀢𑁆𑀯𑀸𑀦, 𑀲𑀫𑁆𑀩𑀼𑀤𑁆𑀥𑀸𑀦𑀁 𑀧𑀢𑀺𑀲𑁆𑀲𑀢𑁄;

𑀫𑀭𑀡𑀜𑁆𑀘 𑀅𑀦𑀼𑀧𑁆𑀧𑀢𑁆𑀢𑁄, 𑀤𑁂𑀯𑀢𑁆𑀢𑀜𑁆𑀘 𑀅𑀕𑀫𑁆𑀳𑀲𑁂.

𑁪𑁭. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀲𑀻𑀮𑀫𑀦𑀼𑀧𑀸𑀮𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀲𑀜𑁆𑀜𑀫𑀲𑁆𑀲 𑀇𑀤𑀁 𑀨𑀮𑀁.

𑁪𑁮. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀼𑀩𑁆𑀩𑀗𑁆𑀕𑀫𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀼𑀩𑁆𑀩𑀗𑁆𑀕𑀫𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀲𑀫𑀁.

𑀧𑀡𑁆𑀡𑀤𑀸𑀬𑀓𑀯𑀕𑁆𑀕𑁄 𑀏𑀓𑀽𑀦𑀢𑀺𑀁𑀲𑀢𑀺𑀫𑁄.