𑁩𑁦. 𑀘𑀺𑀢𑀓𑀧𑀽𑀚𑀓𑀯𑀕𑁆𑀕𑁄

𑁧. 𑀘𑀺𑀢𑀓𑀧𑀽𑀚𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧. ‘‘𑀅𑀚𑀺𑀢𑁄 𑀦𑀸𑀫 𑀦𑀸𑀫𑁂𑀦, 𑀅𑀳𑁄𑀲𑀺𑀁 𑀩𑁆𑀭𑀸𑀳𑁆𑀫𑀡𑁄 𑀢𑀤𑀸;

𑀆𑀳𑀼𑀢𑀺𑀁 𑀬𑀺𑀝𑁆𑀞𑀼𑀓𑀸𑀫𑁄𑀳𑀁, 𑀦𑀸𑀦𑀸𑀧𑀼𑀧𑁆𑀨𑀁 𑀲𑀫𑀸𑀦𑀬𑀺𑀁.

𑁨. ‘‘𑀚𑀮𑀦𑁆𑀢𑀁 𑀘𑀺𑀢𑀓𑀁 𑀤𑀺𑀲𑁆𑀯𑀸, 𑀲𑀺𑀔𑀺𑀦𑁄 𑀮𑁄𑀓𑀩𑀦𑁆𑀥𑀼𑀦𑁄;

𑀢𑀜𑁆𑀘 𑀧𑀼𑀧𑁆𑀨𑀁 𑀲𑀫𑀸𑀦𑁂𑀢𑁆𑀯𑀸, 𑀘𑀺𑀢𑀓𑁂 𑀑𑀓𑀺𑀭𑀺𑀁 𑀅𑀳𑀁.

𑁩. ‘‘𑀏𑀓𑀢𑁆𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀧𑀽𑀚𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁪. ‘‘𑀲𑀢𑁆𑀢𑀯𑀻𑀲𑁂 [𑀲𑀢𑁆𑀢𑀢𑀺𑀁𑀲𑁂 (𑀓.)] 𑀇𑀢𑁄 𑀓𑀧𑁆𑀧𑁂, 𑀲𑀢𑁆𑀢𑀸𑀲𑀼𑀁 𑀫𑀦𑀼𑀚𑀸𑀥𑀺𑀧𑀸;

𑀲𑀼𑀧𑀚𑁆𑀚𑀮𑀺𑀢𑀦𑀸𑀫𑀸 𑀢𑁂, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁫. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀘𑀺𑀢𑀓𑀧𑀽𑀚𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀘𑀺𑀢𑀓𑀧𑀽𑀚𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀞𑀫𑀁.

𑁨. 𑀧𑀼𑀧𑁆𑀨𑀥𑀸𑀭𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁬. ‘‘𑀯𑀸𑀓𑀘𑀻𑀭𑀥𑀭𑁄 𑀆𑀲𑀺𑀁, 𑀅𑀚𑀺𑀦𑀼𑀢𑁆𑀢𑀭𑀯𑀸𑀲𑀦𑁄;

𑀅𑀪𑀺𑀜𑁆𑀜𑀸 𑀧𑀜𑁆𑀘 𑀦𑀺𑀩𑁆𑀩𑀢𑁆𑀢𑀸, 𑀘𑀦𑁆𑀤𑀲𑁆𑀲 𑀧𑀭𑀺𑀫𑀚𑁆𑀚𑀓𑁄.

𑁭. ‘‘𑀯𑀺𑀧𑀲𑁆𑀲𑀺𑀁 𑀮𑁄𑀓𑀧𑀚𑁆𑀚𑁄𑀢𑀁, 𑀤𑀺𑀲𑁆𑀯𑀸 𑀅𑀪𑀺𑀕𑀢𑀁 𑀫𑀫𑀁;

𑀧𑀸𑀭𑀺𑀘𑁆𑀙𑀢𑁆𑀢𑀓𑀧𑀼𑀧𑁆𑀨𑀸𑀦𑀺, 𑀥𑀸𑀭𑁂𑀲𑀺𑀁 𑀲𑀢𑁆𑀣𑀼𑀦𑁄 𑀅𑀳𑀁.

𑁮. ‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀧𑀽𑀚𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀥𑀸𑀭𑀡𑀸𑀬 𑀇𑀤𑀁 𑀨𑀮𑀁.

𑁯. ‘‘𑀲𑀢𑁆𑀢𑀸𑀲𑀻𑀢𑀺𑀫𑁆𑀳𑀺𑀢𑁄 𑀓𑀧𑁆𑀧𑁂, 𑀏𑀓𑁄 𑀆𑀲𑀺𑀁 𑀫𑀳𑀻𑀧𑀢𑀺;

𑀲𑀫𑀦𑁆𑀢𑀥𑀸𑀭𑀡𑁄 𑀦𑀸𑀫, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁧𑁦. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀼𑀧𑁆𑀨𑀥𑀸𑀭𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀼𑀧𑁆𑀨𑀥𑀸𑀭𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀼𑀢𑀺𑀬𑀁.

𑁩. 𑀙𑀢𑁆𑀢𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁧. ‘‘𑀧𑀼𑀢𑁆𑀢𑁄 𑀫𑀫 𑀧𑀩𑁆𑀩𑀚𑀺𑀢𑁄, 𑀓𑀸𑀲𑀸𑀬𑀯𑀲𑀦𑁄 𑀢𑀤𑀸;

𑀲𑁄 𑀘 𑀩𑀼𑀤𑁆𑀥𑀢𑁆𑀢𑀁 𑀲𑀫𑁆𑀧𑀢𑁆𑀢𑁄, 𑀦𑀺𑀩𑁆𑀩𑀼𑀢𑁄 𑀮𑁄𑀓𑀧𑀽𑀚𑀺𑀢𑁄.

𑁧𑁨. ‘‘𑀯𑀺𑀘𑀺𑀦𑀦𑁆𑀢𑁄 𑀲𑀓𑀁 𑀧𑀼𑀢𑁆𑀢𑀁, 𑀅𑀕𑀫𑀁 𑀧𑀘𑁆𑀙𑀢𑁄 𑀅𑀳𑀁;

𑀦𑀺𑀩𑁆𑀩𑀼𑀢𑀲𑁆𑀲 𑀫𑀳𑀦𑁆𑀢𑀲𑁆𑀲, 𑀘𑀺𑀢𑀓𑀁 𑀅𑀕𑀫𑀸𑀲𑀳𑀁.

𑁧𑁩. ‘‘𑀧𑀕𑁆𑀕𑀬𑁆𑀳 𑀅𑀜𑁆𑀚𑀮𑀺𑀁 𑀢𑀢𑁆𑀣, 𑀯𑀦𑁆𑀤𑀺𑀢𑁆𑀯𑀸 𑀘𑀺𑀢𑀓𑀁 𑀅𑀳𑀁;

𑀲𑁂𑀢𑀘𑁆𑀙𑀢𑁆𑀢𑀜𑁆𑀘 𑀧𑀕𑁆𑀕𑀬𑁆𑀳, 𑀆𑀭𑁄𑀧𑁂𑀲𑀺𑀁 𑀅𑀳𑀁 𑀢𑀤𑀸.

𑁧𑁪. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀙𑀢𑁆𑀢𑀫𑀪𑀺𑀭𑁄𑀧𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀙𑀢𑁆𑀢𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁧𑁫. ‘‘𑀧𑀜𑁆𑀘𑀯𑀻𑀲𑁂 𑀇𑀢𑁄 𑀓𑀧𑁆𑀧𑁂, 𑀲𑀢𑁆𑀢 𑀆𑀲𑀼𑀁 𑀚𑀦𑀸𑀥𑀺𑀧𑀸;

𑀫𑀳𑀸𑀭𑀳𑀲𑀦𑀸𑀫𑀸 𑀢𑁂, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁧𑁬. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀙𑀢𑁆𑀢𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀙𑀢𑁆𑀢𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀢𑀢𑀺𑀬𑀁.

𑁪. 𑀲𑀤𑁆𑀤𑀲𑀜𑁆𑀜𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁭. ‘‘𑀅𑀦𑀼𑀕𑁆𑀕𑀢𑀫𑁆𑀳𑀺 𑀆𑀤𑀺𑀘𑁆𑀘𑁂, 𑀧𑀦𑀸𑀤𑁄 [𑀧𑀲𑀸𑀤𑁄 (𑀲𑁆𑀬𑀸. 𑀅𑀝𑁆𑀞.)] 𑀯𑀺𑀧𑀼𑀮𑁄 𑀅𑀳𑀼;

𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 𑀮𑁄𑀓𑀫𑁆𑀳𑀺, 𑀧𑀸𑀢𑀼𑀪𑀸𑀯𑁄 𑀫𑀳𑁂𑀲𑀺𑀦𑁄.

𑁧𑁮. ‘‘𑀖𑁄𑀲 [𑀲𑀤𑁆𑀤 (𑀲𑀻. 𑀲𑁆𑀬𑀸.)] 𑀫𑀲𑁆𑀲𑁄𑀲𑀳𑀁 𑀢𑀢𑁆𑀣, 𑀦 𑀘 𑀧𑀲𑁆𑀲𑀸𑀫𑀺 𑀢𑀁 𑀚𑀺𑀦𑀁;

𑀫𑀭𑀡𑀜𑁆𑀘 𑀅𑀦𑀼𑀧𑁆𑀧𑀢𑁆𑀢𑁄, 𑀩𑀼𑀤𑁆𑀥𑀲𑀜𑁆𑀜𑀫𑀦𑀼𑀲𑁆𑀲𑀭𑀺𑀁.

𑁧𑁯. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀲𑀜𑁆𑀜𑀫𑀮𑀪𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁨𑁦. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀤𑁆𑀤𑀲𑀜𑁆𑀜𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀤𑁆𑀤𑀲𑀜𑁆𑀜𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀘𑀢𑀼𑀢𑁆𑀣𑀁.

𑁫. 𑀕𑁄𑀲𑀻𑀲𑀦𑀺𑀓𑁆𑀔𑁂𑀧𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁧. ‘‘𑀆𑀭𑀸𑀫𑀤𑁆𑀯𑀸𑀭𑀸 𑀦𑀺𑀓𑁆𑀔𑀫𑁆𑀫, 𑀕𑁄𑀲𑀻𑀲𑀁 𑀲𑀦𑁆𑀣𑀢𑀁 𑀫𑀬𑀸;

𑀅𑀦𑀼𑀪𑁄𑀫𑀺 𑀲𑀓𑀁 𑀓𑀫𑁆𑀫𑀁, 𑀧𑀼𑀩𑁆𑀩𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁.

𑁨𑁨. ‘‘𑀆𑀚𑀸𑀦𑀺𑀬𑀸 𑀯𑀸𑀢𑀚𑀯𑀸, 𑀲𑀺𑀦𑁆𑀥𑀯𑀸 𑀲𑀻𑀖𑀯𑀸𑀳𑀦𑀸;

𑀅𑀦𑀼𑀪𑁄𑀫𑀺 𑀲𑀩𑁆𑀩𑀫𑁂𑀢𑀁, 𑀕𑁄𑀲𑀻𑀲𑀲𑁆𑀲 𑀇𑀤𑀁 𑀨𑀮𑀁.

𑁨𑁩. ‘‘𑀅𑀳𑁄 𑀓𑀸𑀭𑀁 𑀧𑀭𑀫𑀓𑀸𑀭𑀁, 𑀲𑀼𑀔𑀢𑁆𑀢𑁂 𑀲𑀼𑀓𑀢𑀁 𑀫𑀬𑀸;

𑀲𑀗𑁆𑀖𑁂 𑀓𑀢𑀲𑁆𑀲 𑀓𑀸𑀭𑀲𑁆𑀲, 𑀦 𑀅𑀜𑁆𑀜𑀁 𑀓𑀮𑀫𑀕𑁆𑀖𑀢𑀺.

𑁨𑁪. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀲𑀻𑀲𑀁 𑀲𑀦𑁆𑀣𑀭𑀺𑀁 𑀅𑀳𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀲𑀦𑁆𑀣𑀭𑀲𑁆𑀲 𑀇𑀤𑀁 𑀨𑀮𑀁.

𑁨𑁫. ‘‘𑀧𑀜𑁆𑀘𑀲𑀢𑁆𑀢𑀢𑀺𑀓𑀧𑁆𑀧𑀫𑁆𑀳𑀺, 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀦𑀸𑀫𑀓𑁄;

𑀏𑀓𑁄 𑀆𑀲𑀺𑀁 𑀫𑀳𑀸𑀢𑁂𑀚𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁨𑁬. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀕𑁄𑀲𑀻𑀲𑀦𑀺𑀓𑁆𑀔𑁂𑀧𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀕𑁄𑀲𑀻𑀲𑀦𑀺𑀓𑁆𑀔𑁂𑀧𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀜𑁆𑀘𑀫𑀁.

𑁬. 𑀧𑀸𑀤𑀧𑀽𑀚𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁭. ‘‘𑀧𑀩𑁆𑀩𑀢𑁂 𑀳𑀺𑀫𑀯𑀦𑁆𑀢𑀫𑁆𑀳𑀺, 𑀅𑀳𑁄𑀲𑀺𑀁 𑀓𑀺𑀦𑁆𑀦𑀭𑁄 𑀢𑀤𑀸;

𑀅𑀤𑁆𑀤𑀲𑀁 𑀯𑀺𑀭𑀚𑀁 𑀩𑀼𑀤𑁆𑀥𑀁, 𑀧𑀻𑀢𑀭𑀁𑀲𑀺𑀁𑀯 𑀪𑀸𑀡𑀼𑀫𑀁.

𑁨𑁮. ‘‘𑀉𑀧𑁂𑀢𑀁 𑀢𑀫𑀳𑀁 [𑀉𑀧𑁂𑀢𑁄𑀧𑀺 𑀢𑀤𑀸 (𑀲𑁆𑀬𑀸.), 𑀉𑀧𑁂𑀲𑀺𑀁 𑀢𑀫𑀳𑀁 (?)] 𑀩𑀼𑀤𑁆𑀥𑀁, 𑀯𑀺𑀧𑀲𑁆𑀲𑀺𑀁 𑀮𑁄𑀓𑀦𑀸𑀬𑀓𑀁;

𑀘𑀦𑁆𑀤𑀦𑀁 𑀢𑀕𑀭𑀜𑁆𑀘𑀸𑀧𑀺, 𑀧𑀸𑀤𑁂 𑀑𑀲𑀺𑀜𑁆𑀘𑀳𑀁 𑀢𑀤𑀸.

𑁨𑁯. ‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀧𑀸𑀤𑀁 𑀅𑀪𑀺𑀧𑀽𑀚𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀧𑀸𑀤𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁩𑁦. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀸𑀤𑀧𑀽𑀚𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀸𑀤𑀧𑀽𑀚𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀙𑀝𑁆𑀞𑀁.

𑁭. 𑀤𑁂𑀲𑀓𑀺𑀢𑁆𑀢𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁧. ‘‘𑀉𑀧𑀲𑀸𑀮𑀓𑀦𑀸𑀫𑁄𑀳𑀁, 𑀅𑀳𑁄𑀲𑀺𑀁 𑀩𑁆𑀭𑀸𑀳𑁆𑀫𑀡𑁄 𑀢𑀤𑀸;

𑀓𑀸𑀦𑀦𑀁 𑀯𑀦𑀫𑁄𑀕𑀸𑀴𑁆𑀳𑀁, 𑀮𑁄𑀓𑀚𑁂𑀝𑁆𑀞𑀁 𑀦𑀭𑀸𑀲𑀪𑀁.

𑁩𑁨. ‘‘𑀤𑀺𑀲𑁆𑀯𑀸𑀦 𑀯𑀦𑁆𑀤𑀺𑀁 𑀧𑀸𑀤𑁂𑀲𑀼, 𑀮𑁄𑀓𑀸𑀳𑀼𑀢𑀺𑀧𑀝𑀺𑀕𑁆𑀕𑀳𑀁;

𑀧𑀲𑀦𑁆𑀦𑀘𑀺𑀢𑁆𑀢𑀁 𑀫𑀁 𑀜𑀢𑁆𑀯𑀸, 𑀩𑀼𑀤𑁆𑀥𑁄 𑀅𑀦𑁆𑀢𑀭𑀥𑀸𑀬𑀣.

𑁩𑁩. ‘‘𑀓𑀸𑀦𑀦𑀸 𑀅𑀪𑀺𑀦𑀺𑀓𑁆𑀔𑀫𑁆𑀫, 𑀩𑀼𑀤𑁆𑀥𑀲𑁂𑀝𑁆𑀞𑀫𑀦𑀼𑀲𑁆𑀲𑀭𑀺𑀁;

𑀢𑀁 𑀤𑁂𑀲𑀁 𑀓𑀺𑀢𑁆𑀢𑀬𑀺𑀢𑁆𑀯𑀸𑀦, 𑀓𑀧𑁆𑀧𑀁 𑀲𑀕𑁆𑀕𑀫𑁆𑀳𑀺 𑀫𑁄𑀤𑀳𑀁.

𑁩𑁪. ‘‘𑀤𑁆𑀯𑁂𑀦𑀯𑀼𑀢𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀤𑁂𑀲𑀫𑀪𑀺𑀓𑀺𑀢𑁆𑀢𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀓𑀺𑀢𑁆𑀢𑀦𑀸𑀬 𑀇𑀤𑀁 𑀨𑀮𑀁.

𑁩𑁫. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀤𑁂𑀲𑀓𑀺𑀢𑁆𑀢𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀤𑁂𑀲𑀓𑀺𑀢𑁆𑀢𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀲𑀢𑁆𑀢𑀫𑀁.

𑁮. 𑀲𑀭𑀡𑀕𑀫𑀦𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁬. ‘‘𑀧𑀩𑁆𑀩𑀢𑁂 𑀳𑀺𑀫𑀯𑀦𑁆𑀢𑀫𑁆𑀳𑀺, 𑀅𑀳𑁄𑀲𑀺𑀁 𑀮𑀼𑀤𑁆𑀤𑀓𑁄 𑀢𑀤𑀸;

𑀯𑀺𑀧𑀲𑁆𑀲𑀺𑀁 𑀅𑀤𑁆𑀤𑀲𑀁 𑀩𑀼𑀤𑁆𑀥𑀁, 𑀮𑁄𑀓𑀚𑁂𑀝𑁆𑀞𑀁 𑀦𑀭𑀸𑀲𑀪𑀁.

𑁩𑁭. ‘‘𑀉𑀧𑀸𑀲𑀺𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑀁, 𑀯𑁂𑀬𑁆𑀬𑀸𑀯𑀘𑁆𑀘𑀫𑀓𑀸𑀲𑀳𑀁;

𑀲𑀭𑀡𑀜𑁆𑀘 𑀉𑀧𑀸𑀕𑀘𑁆𑀙𑀺𑀁, 𑀤𑁆𑀯𑀺𑀧𑀤𑀺𑀦𑁆𑀤𑀲𑁆𑀲 𑀢𑀸𑀤𑀺𑀦𑁄.

𑁩𑁮. ‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀲𑀭𑀡𑀁 𑀉𑀧𑀕𑀘𑁆𑀙𑀳𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀲𑀭𑀡𑀸𑀕𑀫𑀦𑀧𑁆𑀨𑀮𑀁.

𑁩𑁯. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀭𑀡𑀕𑀫𑀦𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀭𑀡𑀕𑀫𑀦𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀅𑀝𑁆𑀞𑀫𑀁.

𑁯. 𑀅𑀫𑁆𑀩𑀧𑀺𑀡𑁆𑀟𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁪𑁦. ‘‘𑀭𑁄𑀫𑀲𑁄 𑀦𑀸𑀫 𑀦𑀸𑀫𑁂𑀦, 𑀤𑀸𑀦𑀯𑁄 𑀇𑀢𑀺 𑀯𑀺𑀲𑁆𑀲𑀼𑀢𑁄;

𑀅𑀫𑁆𑀩𑀧𑀺𑀡𑁆𑀟𑀻 𑀫𑀬𑀸 𑀤𑀺𑀦𑁆𑀦𑀸 [𑀅𑀫𑁆𑀩𑀧𑀺𑀡𑁆𑀟𑁄 𑀫𑀬𑀸 𑀤𑀺𑀦𑁆𑀦𑁄 (𑀲𑁆𑀬𑀸.)], 𑀯𑀺𑀧𑀲𑁆𑀲𑀺𑀲𑁆𑀲 𑀫𑀳𑁂𑀲𑀺𑀦𑁄.

𑁪𑁧. ‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀫𑀫𑁆𑀩𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀅𑀫𑁆𑀩𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁪𑁨. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀅𑀫𑁆𑀩𑀧𑀺𑀡𑁆𑀟𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀅𑀫𑁆𑀩𑀧𑀺𑀡𑁆𑀟𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀦𑀯𑀫𑀁.

𑁧𑁦. 𑀅𑀦𑀼𑀲𑀁𑀲𑀸𑀯𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁪𑁩. ‘‘𑀧𑀺𑀡𑁆𑀟𑀸𑀬 𑀘𑀭𑀫𑀸𑀦𑀸𑀳𑀁, 𑀯𑀺𑀧𑀲𑁆𑀲𑀺𑀫𑀤𑁆𑀤𑀲𑀁 𑀚𑀺𑀦𑀁;

𑀉𑀴𑀼𑀗𑁆𑀕𑀪𑀺𑀓𑁆𑀔𑀁 𑀧𑀸𑀤𑀸𑀲𑀺𑀁, 𑀤𑁆𑀯𑀺𑀧𑀤𑀺𑀦𑁆𑀤𑀲𑁆𑀲 𑀢𑀸𑀤𑀺𑀦𑁄.

𑁪𑁪. ‘‘𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀅𑀪𑀺𑀯𑀸𑀤𑁂𑀲𑀳𑀁 𑀢𑀤𑀸;

𑀅𑀦𑀼𑀲𑀁𑀲𑀸𑀯𑀬𑀺𑀁 𑀩𑀼𑀤𑁆𑀥𑀁, 𑀉𑀢𑁆𑀢𑀫𑀢𑁆𑀣𑀲𑁆𑀲 𑀧𑀢𑁆𑀢𑀺𑀬𑀸.

𑁪𑁫. ‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀅𑀦𑀼𑀲𑀁𑀲𑀸𑀯𑀬𑀺𑀁 𑀅𑀳𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀅𑀦𑀼𑀲𑀁𑀲𑀸𑀯𑀦𑀸 𑀨𑀮𑀁.

𑁪𑁬. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀅𑀦𑀼𑀲𑀁𑀲𑀸𑀯𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀅𑀦𑀼𑀲𑀁𑀲𑀸𑀯𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀲𑀫𑀁.

𑀘𑀺𑀢𑀓𑀧𑀽𑀚𑀓𑀯𑀕𑁆𑀕𑁄 𑀢𑀺𑀁𑀲𑀢𑀺𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀘𑀺𑀢𑀓𑀁 𑀧𑀸𑀭𑀺𑀙𑀢𑁆𑀢𑁄 𑀘, 𑀲𑀤𑁆𑀤𑀕𑁄𑀲𑀻𑀲𑀲𑀦𑁆𑀣𑀭𑀁;

𑀧𑀸𑀤𑁄 𑀧𑀤𑁂𑀲𑀁 𑀲𑀭𑀡𑀁, 𑀅𑀫𑁆𑀩𑁄 𑀲𑀁𑀲𑀸𑀯𑀓𑁄𑀧𑀺 𑀘;

𑀅𑀝𑁆𑀞𑀢𑀸𑀮𑀻𑀲 𑀕𑀸𑀣𑀸𑀬𑁄, 𑀕𑀡𑀺𑀢𑀸𑀬𑁄 𑀯𑀺𑀪𑀸𑀯𑀺𑀪𑀺.

𑀅𑀣 𑀯𑀕𑁆𑀕𑀼𑀤𑁆𑀤𑀸𑀦𑀁 𑁋

𑀓𑀡𑀺𑀓𑀸𑀭𑁄 𑀳𑀢𑁆𑀣𑀺𑀤𑀤𑁄, 𑀆𑀮𑀫𑁆𑀩𑀡𑀼𑀤𑀓𑀸𑀲𑀦𑀁;

𑀢𑀼𑀯𑀭𑀁 𑀣𑁄𑀫𑀓𑁄 𑀘𑁂𑀯, 𑀉𑀓𑁆𑀔𑁂𑀧𑀁 𑀲𑀻𑀲𑀼𑀧𑀥𑀸𑀦𑀁.

𑀧𑀡𑁆𑀡𑀤𑁄 𑀘𑀺𑀢𑀧𑀽𑀚𑀻 𑀘, 𑀕𑀸𑀣𑀸𑀬𑁄 𑀘𑁂𑀯 𑀲𑀩𑁆𑀩𑀲𑁄;

𑀘𑀢𑁆𑀢𑀸𑀭𑀺 𑀘 𑀲𑀢𑀸𑀦𑀻𑀳, 𑀏𑀓𑀧𑀜𑁆𑀜𑀸𑀲𑀫𑁂𑀯 𑀘.

𑀧𑀜𑁆𑀘𑀯𑀻𑀲𑀲𑀢𑀸 𑀲𑀩𑁆𑀩𑀸, 𑀤𑁆𑀯𑀸𑀲𑀢𑁆𑀢𑀢𑀺 𑀢𑀤𑀼𑀢𑁆𑀢𑀭𑀺;

𑀢𑀺𑀲𑀢𑀁 𑀅𑀧𑀤𑀸𑀦𑀸𑀦𑀁, 𑀕𑀡𑀺𑀢𑀸 𑀅𑀢𑁆𑀣𑀤𑀲𑁆𑀲𑀺𑀪𑀺.

𑀓𑀡𑀺𑀓𑀸𑀭𑀯𑀕𑁆𑀕𑀤𑀲𑀓𑀁.