𑁧𑁦. 𑀬𑀽𑀣𑀺𑀓𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁫𑁩. ‘‘𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄;

𑀧𑀯𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸𑀦, 𑀯𑀺𑀳𑀸𑀭𑀁 𑀬𑀸𑀢𑀺 𑀘𑀓𑁆𑀔𑀼𑀫𑀸.

𑁫𑁪. ‘‘𑀉𑀪𑁄 𑀳𑀢𑁆𑀣𑁂𑀳𑀺 𑀧𑀕𑁆𑀕𑀬𑁆𑀳, 𑀬𑀽𑀣𑀺𑀓𑀁 𑀧𑀼𑀧𑁆𑀨𑀫𑀼𑀢𑁆𑀢𑀫𑀁;

𑀩𑀼𑀤𑁆𑀥𑀲𑁆𑀲 𑀅𑀪𑀺𑀭𑁄𑀧𑀬𑀺𑀁, 𑀫𑁂𑀢𑁆𑀢𑀘𑀺𑀢𑁆𑀢𑀲𑁆𑀲 𑀢𑀸𑀤𑀺𑀦𑁄.

𑁫𑁫. ‘‘𑀢𑁂𑀦 𑀘𑀺𑀢𑁆𑀢𑀧𑁆𑀧𑀲𑀸𑀤𑁂𑀦, 𑀅𑀦𑀼𑀪𑁄𑀢𑁆𑀯𑀸𑀦 𑀲𑀫𑁆𑀧𑀤𑀸;

𑀓𑀧𑁆𑀧𑀸𑀦𑀁 𑀲𑀢𑀲𑀳𑀲𑁆𑀲𑀁, 𑀤𑀼𑀕𑁆𑀕𑀢𑀺𑀁 𑀦𑀼𑀧𑀧𑀚𑁆𑀚𑀳𑀁.

𑁫𑁬. ‘‘𑀇𑀢𑁄 𑀧𑀜𑁆𑀜𑀸𑀲𑀓𑀧𑁆𑀧𑁂𑀲𑀼, 𑀏𑀓𑁄 𑀆𑀲𑀺𑀁 𑀚𑀦𑀸𑀥𑀺𑀧𑁄;

𑀲𑀫𑀺𑀢𑁆𑀢𑀦𑀦𑁆𑀤𑀦𑁄 𑀦𑀸𑀫, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁫𑁭. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀬𑀽𑀣𑀺𑀓𑀧𑀼𑀧𑁆𑀨𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺;

𑀬𑀽𑀣𑀺𑀓𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀲𑀫𑀁.

𑀢𑀫𑀸𑀮𑀧𑀼𑀧𑁆𑀨𑀺𑀬𑀯𑀕𑁆𑀕𑁄 𑀯𑀻𑀲𑀢𑀺𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀢𑀫𑀸𑀮𑀢𑀺𑀡𑀲𑀦𑁆𑀣𑀸𑀭𑁄, 𑀔𑀡𑁆𑀟𑀨𑀼𑀮𑁆𑀮𑀺 𑀅𑀲𑁄𑀓𑀺𑀬𑁄;

𑀅𑀗𑁆𑀓𑁄𑀮𑀓𑀻 𑀓𑀺𑀲𑀮𑀬𑁄, 𑀢𑀺𑀦𑁆𑀤𑀼𑀓𑁄 𑀦𑁂𑀮𑀧𑀼𑀧𑁆𑀨𑀺𑀬𑁄;

𑀓𑀺𑀁𑀓𑀡𑀺𑀓𑁄 𑀬𑀽𑀣𑀺𑀓𑁄 𑀘, 𑀕𑀸𑀣𑀸 𑀧𑀜𑁆𑀜𑀸𑀲 𑀅𑀝𑁆𑀞 𑀘𑀸𑀢𑀺.

𑀅𑀣 𑀯𑀕𑁆𑀕𑀼𑀤𑁆𑀤𑀸𑀦𑀁 𑁋

𑀪𑀺𑀓𑁆𑀔𑀸𑀤𑀸𑀬𑀻 𑀧𑀭𑀺𑀯𑀸𑀭𑁄, 𑀲𑁂𑀭𑁂𑀬𑁆𑀬𑁄 𑀲𑁄𑀪𑀺𑀢𑁄 𑀢𑀣𑀸;

𑀙𑀢𑁆𑀢𑀜𑁆𑀘 𑀩𑀦𑁆𑀥𑀼𑀚𑀻𑀯𑀻 𑀘, 𑀲𑀼𑀧𑀸𑀭𑀺𑀘𑀭𑀺𑀬𑁄𑀧𑀺 𑀘.

𑀓𑀼𑀫𑀼𑀤𑁄 𑀓𑀼𑀝𑀚𑁄 𑀘𑁂𑀯, 𑀢𑀫𑀸𑀮𑀺 𑀤𑀲𑀫𑁄 𑀓𑀢𑁄;

𑀙𑀲𑀢𑀸𑀦𑀺 𑀘 𑀕𑀸𑀣𑀸𑀦𑀺, 𑀙𑀲𑀝𑁆𑀞𑀺 𑀘 𑀢𑀢𑀼𑀢𑁆𑀢𑀭𑀺.

𑀪𑀺𑀓𑁆𑀔𑀸𑀯𑀕𑁆𑀕𑀤𑀲𑀓𑀁.