𑁨𑁦. 𑀢𑀫𑀸𑀮𑀧𑀼𑀧𑁆𑀨𑀺𑀬𑀯𑀕𑁆𑀕𑁄

𑁧. 𑀢𑀫𑀸𑀮𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧. ‘‘𑀘𑀼𑀮𑁆𑀮𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀺, 𑀣𑀫𑁆𑀪𑀸 𑀲𑁄𑀯𑀡𑁆𑀡𑀬𑀸 𑀅𑀳𑀽;

𑀤𑁂𑀯𑀮𑀝𑁆𑀞𑀺𑀧𑀝𑀺𑀪𑀸𑀕𑀁, 𑀯𑀺𑀫𑀸𑀦𑀁 𑀫𑁂 𑀲𑀼𑀦𑀺𑀫𑁆𑀫𑀺𑀢𑀁.

𑁨. ‘‘𑀢𑀫𑀸𑀮𑀧𑀼𑀧𑁆𑀨𑀁 𑀧𑀕𑁆𑀕𑀬𑁆𑀳, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸;

𑀩𑀼𑀤𑁆𑀥𑀲𑁆𑀲 𑀅𑀪𑀺𑀭𑁄𑀧𑀬𑀺𑀁, 𑀲𑀺𑀔𑀺𑀦𑁄 𑀮𑁄𑀓𑀩𑀦𑁆𑀥𑀼𑀦𑁄.

𑁩. ‘‘𑀏𑀓𑀢𑁆𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀓𑀫𑁆𑀫𑀫𑀓𑀭𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁪. ‘‘𑀇𑀢𑁄 𑀯𑀻𑀲𑀢𑀺𑀫𑁂 𑀓𑀧𑁆𑀧𑁂, 𑀘𑀦𑁆𑀤𑀢𑀺𑀢𑁆𑀢𑁄𑀢𑀺 𑀏𑀓𑀓𑁄;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁫. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀢𑀫𑀸𑀮𑀧𑀼𑀧𑁆𑀨𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀢𑀫𑀸𑀮𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀞𑀫𑀁.

𑁨. 𑀢𑀺𑀡𑀲𑀦𑁆𑀣𑀸𑀭𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁬. ‘‘𑀬𑀤𑀸 𑀯𑀦𑀯𑀸𑀲𑀻 [𑀬𑀁 𑀤𑀸𑀬𑀯𑀸𑀲𑀺𑀓𑁄 (𑀲𑀻.)] 𑀇𑀲𑀺, 𑀢𑀺𑀡𑀁 𑀮𑀸𑀬𑀢𑀺 𑀲𑀢𑁆𑀣𑀼𑀦𑁄;

𑀲𑀩𑁆𑀩𑁂 𑀧𑀤𑀓𑁆𑀔𑀺𑀡𑀸𑀯𑀝𑁆𑀝𑀸 [𑀧𑀤𑀓𑁆𑀔𑀺𑀡𑀸𑀯𑀢𑁆𑀢𑀸 (𑀲𑀻. 𑀲𑁆𑀬𑀸.)], 𑀧𑀣𑀩𑁆𑀬𑀸 [𑀧𑀼𑀣𑀯𑁆𑀬𑀸 (𑀲𑀻.)] 𑀦𑀺𑀧𑀢𑀺𑀁𑀲𑀼 𑀢𑁂.

𑁭. ‘‘𑀢𑀫𑀳𑀁 𑀢𑀺𑀡𑀫𑀸𑀤𑀸𑀬, 𑀲𑀦𑁆𑀣𑀭𑀺𑀁 𑀥𑀭𑀡𑀼𑀢𑁆𑀢𑀫𑁂;

𑀢𑀻𑀡𑁂𑀯 𑀢𑀸𑀮𑀧𑀢𑁆𑀢𑀸𑀦𑀺, 𑀆𑀳𑀭𑀺𑀢𑁆𑀯𑀸𑀦𑀳𑀁 𑀢𑀤𑀸.

𑁮. ‘‘𑀢𑀺𑀡𑁂𑀦 𑀙𑀤𑀦𑀁 𑀓𑀢𑁆𑀯𑀸, 𑀲𑀺𑀤𑁆𑀥𑀢𑁆𑀣𑀲𑁆𑀲 𑀅𑀤𑀸𑀲𑀳𑀁;

𑀲𑀢𑁆𑀢𑀸𑀳𑀁 𑀥𑀸𑀭𑀬𑀼𑀁 𑀢𑀲𑁆𑀲 [𑀢𑀢𑁆𑀣 (𑀲𑁆𑀬𑀸.)], 𑀤𑁂𑀯𑀫𑀸𑀦𑀼𑀲𑀲𑀢𑁆𑀣𑀼𑀦𑁄.

𑁯. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀢𑀺𑀡𑀁 𑀅𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀢𑀺𑀡𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁧𑁦. ‘‘𑀧𑀜𑁆𑀘𑀲𑀝𑁆𑀞𑀺𑀫𑁆𑀳𑀺𑀢𑁄 𑀓𑀧𑁆𑀧𑁂, 𑀘𑀢𑁆𑀢𑀸𑀭𑁄𑀲𑀼𑀁 𑀫𑀳𑀤𑁆𑀥𑀦𑀸;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑀸, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁧𑁧. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀢𑀺𑀡𑀲𑀦𑁆𑀣𑀸𑀭𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀢𑀺𑀡𑀲𑀦𑁆𑀣𑀸𑀭𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀼𑀢𑀺𑀬𑀁.

𑁩. 𑀔𑀡𑁆𑀟𑀧𑀼𑀮𑁆𑀮𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁨. ‘‘𑀨𑀼𑀲𑁆𑀲𑀲𑁆𑀲 𑀔𑁄 𑀪𑀕𑀯𑀢𑁄, 𑀣𑀽𑀧𑁄 𑀆𑀲𑀺 𑀫𑀳𑀸𑀯𑀦𑁂;

𑀓𑀼𑀜𑁆𑀚𑀭𑁂𑀳𑀺 𑀢𑀤𑀸 𑀪𑀺𑀦𑁆𑀦𑁄, 𑀧𑀭𑀽𑀴𑁆𑀳𑁄 𑀧𑀸𑀤𑀧𑁄 [𑀧𑀭𑀽𑀴𑁆𑀳𑀧𑀸𑀤𑀧𑁄 (𑀲𑀻.), 𑀲𑀁𑀭𑀽𑀴𑁆𑀳𑁄 𑀧𑀸𑀤𑀧𑁄 (𑀲𑁆𑀬𑀸.)] 𑀢𑀳𑀺𑀁.

𑁧𑁩. ‘‘𑀯𑀺𑀲𑀫𑀜𑁆𑀘 𑀲𑀫𑀁 𑀓𑀢𑁆𑀯𑀸, 𑀲𑀼𑀥𑀸𑀧𑀺𑀡𑁆𑀟𑀁 𑀅𑀤𑀸𑀲𑀳𑀁;

𑀢𑀺𑀮𑁄𑀓𑀕𑀭𑀼𑀦𑁄 𑀢𑀲𑁆𑀲, 𑀕𑀼𑀡𑁂𑀳𑀺 𑀧𑀭𑀺𑀢𑁄𑀲𑀺𑀢𑁄 [𑀧𑀭𑀺𑀢𑁄 𑀲𑀼𑀢𑁄 (𑀓.)].

𑁧𑁪. ‘‘𑀤𑁆𑀯𑁂𑀦𑀯𑀼𑀢𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀓𑀫𑁆𑀫𑀫𑀓𑀭𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀲𑀼𑀥𑀸𑀧𑀺𑀡𑁆𑀟𑀲𑁆𑀲𑀺𑀤𑀁 𑀨𑀮𑀁.

𑁧𑁫. ‘‘𑀲𑀢𑁆𑀢𑀲𑀢𑁆𑀢𑀢𑀺𑀓𑀧𑁆𑀧𑀫𑁆𑀳𑀺, 𑀚𑀺𑀢𑀲𑁂𑀦𑀸𑀲𑀼𑀁 𑀲𑁄𑀴𑀲;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑀸, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁧𑁬. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀔𑀡𑁆𑀟𑀨𑀼𑀮𑁆𑀮𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀔𑀡𑁆𑀟𑀧𑀼𑀮𑁆𑀮𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀢𑀢𑀺𑀬𑀁.

𑁪. 𑀅𑀲𑁄𑀓𑀧𑀽𑀚𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁭. ‘‘𑀢𑀺𑀯𑀭𑀸𑀬𑀁 [𑀢𑀺𑀧𑀼𑀭𑀸𑀬𑀁 (𑀲𑁆𑀬𑀸.)] 𑀧𑀼𑀭𑁂 𑀭𑀫𑁆𑀫𑁂, 𑀭𑀸𑀚𑀼𑀬𑁆𑀬𑀸𑀦𑀁 𑀅𑀳𑀼 𑀢𑀤𑀸;

𑀉𑀬𑁆𑀬𑀸𑀦𑀧𑀸𑀮𑁄 𑀢𑀢𑁆𑀣𑀸𑀲𑀺𑀁, 𑀭𑀜𑁆𑀜𑁄 𑀩𑀤𑁆𑀥𑀘𑀭𑁄 𑀅𑀳𑀁.

𑁧𑁮. ‘‘𑀧𑀤𑀼𑀫𑁄 𑀦𑀸𑀫 𑀦𑀸𑀫𑁂𑀦, 𑀲𑀬𑀫𑁆𑀪𑀽 𑀲𑀧𑁆𑀧𑀪𑁄 𑀅𑀳𑀼;

𑀦𑀺𑀲𑀺𑀦𑁆𑀦𑀁 [𑀦𑀺𑀲𑀺𑀦𑁆𑀦𑁄 (𑀓.)] 𑀧𑀼𑀡𑁆𑀟𑀭𑀻𑀓𑀫𑁆𑀳𑀺, 𑀙𑀸𑀬𑀸 𑀦 𑀚𑀳𑀺 𑀢𑀁 𑀫𑀼𑀦𑀺𑀁.

𑁧𑁯. ‘‘𑀅𑀲𑁄𑀓𑀁 𑀧𑀼𑀧𑁆𑀨𑀺𑀢𑀁 𑀤𑀺𑀲𑁆𑀯𑀸, 𑀧𑀺𑀡𑁆𑀟𑀺𑀪𑀸𑀭𑀁 𑀲𑀼𑀤𑀲𑁆𑀲𑀦𑀁;

𑀩𑀼𑀤𑁆𑀥𑀲𑁆𑀲 𑀅𑀪𑀺𑀭𑁄𑀧𑁂𑀲𑀺𑀁, 𑀚𑀮𑀚𑀼𑀢𑁆𑀢𑀫𑀦𑀸𑀫𑀺𑀦𑁄.

𑁨𑁦. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀭𑁄𑀧𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁨𑁧. ‘‘𑀲𑀢𑁆𑀢𑀢𑀺𑀁𑀲𑀫𑁆𑀳𑀺𑀢𑁄 𑀓𑀧𑁆𑀧𑁂, 𑀲𑁄𑀴𑀲 𑀅𑀭𑀡𑀜𑁆𑀚𑀳𑀸 [𑀅𑀭𑀼𑀡𑀜𑁆𑀚𑀳𑀸 (𑀲𑀻.)];

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑀸, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁨𑁨. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀅𑀲𑁄𑀓𑀧𑀽𑀚𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀅𑀲𑁄𑀓𑀧𑀽𑀚𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀘𑀢𑀼𑀢𑁆𑀣𑀁.

𑁫. 𑀅𑀗𑁆𑀓𑁄𑀮𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁩. ‘‘𑀅𑀗𑁆𑀓𑁄𑀮𑀁 𑀧𑀼𑀧𑁆𑀨𑀺𑀢𑀁 𑀤𑀺𑀲𑁆𑀯𑀸, 𑀫𑀸𑀮𑀸𑀯𑀭𑀁 𑀲𑀓𑁄𑀲𑀓𑀁 [𑀲𑀫𑁄𑀕𑀥𑀁 (𑀲𑁆𑀬𑀸.)];

𑀑𑀘𑀺𑀦𑀺𑀢𑁆𑀯𑀸𑀦 𑀢𑀁 𑀧𑀼𑀧𑁆𑀨𑀁, 𑀅𑀕𑀫𑀁 𑀩𑀼𑀤𑁆𑀥𑀲𑀦𑁆𑀢𑀺𑀓𑀁.

𑁨𑁪. ‘‘𑀲𑀺𑀤𑁆𑀥𑀢𑁆𑀣𑁄 𑀢𑀫𑁆𑀳𑀺 𑀲𑀫𑀬𑁂, 𑀧𑀢𑀺𑀮𑀻𑀦𑁄 𑀫𑀳𑀸𑀫𑀼𑀦𑀺;

𑀫𑀼𑀳𑀼𑀢𑁆𑀢𑀁 𑀧𑀝𑀺𑀫𑀸𑀦𑁂𑀢𑁆𑀯𑀸, 𑀕𑀼𑀳𑀸𑀬𑀁 𑀧𑀼𑀧𑁆𑀨𑀫𑁄𑀓𑀺𑀭𑀺𑀁.

𑁨𑁫. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀧𑀽𑀚𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀧𑀼𑀧𑁆𑀨𑀤𑀸𑀦𑀲𑁆𑀲𑀺𑀤𑀁 [𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 (𑀲𑀻. 𑀲𑁆𑀬𑀸.)] 𑀨𑀮𑀁.

𑁨𑁬. ‘‘𑀙𑀢𑁆𑀢𑀺𑀁𑀲𑀫𑁆𑀳𑀺 𑀇𑀢𑁄 𑀓𑀧𑁆𑀧𑁂, 𑀆𑀲𑁂𑀓𑁄 𑀤𑁂𑀯𑀕𑀚𑁆𑀚𑀺𑀢𑁄;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁨𑁭. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀅𑀗𑁆𑀓𑁄𑀮𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀅𑀗𑁆𑀓𑁄𑀮𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀜𑁆𑀘𑀫𑀁.

𑁬. 𑀓𑀺𑀲𑀮𑀬𑀧𑀽𑀚𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁮. ‘‘𑀦𑀕𑀭𑁂 𑀤𑁆𑀯𑀸𑀭𑀯𑀢𑀺𑀬𑀸, 𑀫𑀸𑀮𑀸𑀯𑀘𑁆𑀙𑁄 𑀫𑀫𑀁 𑀅𑀳𑀼;

𑀉𑀤𑀧𑀸𑀦𑁄 𑀘 𑀢𑀢𑁆𑀣𑁂𑀯, 𑀧𑀸𑀤𑀧𑀸𑀦𑀁 𑀯𑀺𑀭𑁄𑀳𑀦𑁄.

𑁨𑁯. ‘‘𑀲𑀩𑀮𑁂𑀦 𑀉𑀧𑀢𑁆𑀣𑀤𑁆𑀥𑁄, 𑀲𑀺𑀤𑁆𑀥𑀢𑁆𑀣𑁄 𑀅𑀧𑀭𑀸𑀚𑀺𑀢𑁄;

𑀫𑀫𑀸𑀦𑀼𑀓𑀫𑁆𑀧𑀫𑀸𑀦𑁄 𑀲𑁄, 𑀕𑀘𑁆𑀙𑀢𑁂 𑀅𑀦𑀺𑀮𑀜𑁆𑀚𑀲𑁂.

𑁩𑁦. ‘‘𑀅𑀜𑁆𑀜𑀁 𑀓𑀺𑀜𑁆𑀘𑀺 𑀦 𑀧𑀲𑁆𑀲𑀸𑀫𑀺, 𑀧𑀽𑀚𑀸𑀬𑁄𑀕𑁆𑀕𑀁 𑀫𑀳𑁂𑀲𑀺𑀦𑁄;

𑀅𑀲𑁄𑀓𑀁 𑀧𑀮𑁆𑀮𑀯𑀁 𑀤𑀺𑀲𑁆𑀯𑀸, 𑀆𑀓𑀸𑀲𑁂 𑀉𑀓𑁆𑀔𑀺𑀧𑀺𑀁 𑀅𑀳𑀁.

𑁩𑁧. ‘‘𑀩𑀼𑀤𑁆𑀥𑀲𑁆𑀲 𑀢𑁂 𑀓𑀺𑀲𑀮𑀬𑀸, 𑀕𑀘𑁆𑀙𑀢𑁄 𑀬𑀦𑁆𑀢𑀺 𑀧𑀘𑁆𑀙𑀢𑁄;

𑀢𑀸𑀳𑀁 𑀤𑀺𑀲𑁆𑀯𑀸𑀦 𑀲𑀁𑀯𑀺𑀚𑀺𑀁 [𑀲𑁄𑀳𑀁 𑀤𑀺𑀲𑁆𑀯𑀸𑀦 𑀢𑀁 𑀇𑀤𑁆𑀥𑀺𑀁 (𑀲𑀻. 𑀲𑁆𑀬𑀸.)], 𑀅𑀳𑁄 𑀩𑀼𑀤𑁆𑀥𑀲𑁆𑀲𑀼𑀴𑀸𑀭𑀢𑀸.

𑁩𑁨. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀧𑀮𑁆𑀮𑀯𑀁 𑀅𑀪𑀺𑀭𑁄𑀧𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁩𑁩. ‘‘𑀲𑀢𑁆𑀢𑀢𑀺𑀁𑀲𑁂 [𑀲𑀢𑁆𑀢𑀯𑀻𑀲𑁂 (𑀲𑀻. 𑀲𑁆𑀬𑀸.)] 𑀇𑀢𑁄 𑀓𑀧𑁆𑀧𑁂, 𑀏𑀓𑁄 𑀏𑀓𑀺𑀲𑁆𑀲𑀭𑁄 𑀅𑀳𑀼;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁩𑁪. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀓𑀺𑀲𑀮𑀬𑀧𑀽𑀚𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀓𑀺𑀲𑀮𑀬𑀧𑀽𑀚𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀙𑀝𑁆𑀞𑀁.

𑁭. 𑀢𑀺𑀦𑁆𑀤𑀼𑀓𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁫. ‘‘𑀕𑀺𑀭𑀺𑀤𑀼𑀕𑁆𑀕𑀘𑀭𑁄 𑀆𑀲𑀺𑀁, 𑀫𑀓𑁆𑀓𑀝𑁄 𑀣𑀸𑀫𑀯𑁂𑀕𑀺𑀓𑁄;

𑀨𑀮𑀺𑀦𑀁 𑀢𑀺𑀦𑁆𑀤𑀼𑀓𑀁 𑀤𑀺𑀲𑁆𑀯𑀸, 𑀩𑀼𑀤𑁆𑀥𑀲𑁂𑀝𑁆𑀞𑀁 𑀅𑀦𑀼𑀲𑁆𑀲𑀭𑀺𑀁.

𑁩𑁬. ‘‘𑀦𑀺𑀓𑁆𑀔𑀫𑀺𑀢𑁆𑀯𑀸 𑀓𑀢𑀺𑀧𑀸𑀳𑀁, 𑀯𑀺𑀘𑀺𑀦𑀺𑀁 𑀮𑁄𑀓𑀦𑀸𑀬𑀓𑀁;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀲𑀺𑀤𑁆𑀥𑀢𑁆𑀣𑀁 𑀢𑀺𑀪𑀯𑀦𑁆𑀢𑀕𑀼𑀁.

𑁩𑁭. ‘‘𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀲𑀢𑁆𑀣𑀸 𑀮𑁄𑀓𑁂 𑀅𑀦𑀼𑀢𑁆𑀢𑀭𑁄;

𑀔𑀻𑀡𑀸𑀲𑀯𑀲𑀳𑀲𑁆𑀲𑁂𑀳𑀺, 𑀆𑀕𑀘𑁆𑀙𑀺 𑀫𑀫 𑀲𑀦𑁆𑀢𑀺𑀓𑀁.

𑁩𑁮. ‘‘𑀧𑀸𑀫𑁄𑀚𑁆𑀚𑀁 𑀚𑀦𑀬𑀺𑀢𑁆𑀯𑀸𑀦, 𑀨𑀮𑀳𑀢𑁆𑀣𑁄 𑀉𑀧𑀸𑀕𑀫𑀺𑀁;

𑀧𑀝𑀺𑀕𑁆𑀕𑀳𑁂𑀲𑀺 𑀪𑀕𑀯𑀸, 𑀲𑀩𑁆𑀩𑀜𑁆𑀜𑀽 𑀯𑀤𑀢𑀁 𑀯𑀭𑁄.

𑁩𑁯. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀨𑀮𑀁 𑀅𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀨𑀮𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁪𑁦. ‘‘𑀲𑀢𑁆𑀢𑀧𑀜𑁆𑀜𑀸𑀲𑀓𑀧𑁆𑀧𑀫𑁆𑀳𑀺, 𑀉𑀧𑀦𑀦𑁆𑀤𑀲𑀦𑀸𑀫𑀓𑁄;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁪𑁧. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀢𑀺𑀦𑁆𑀤𑀼𑀓𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀢𑀺𑀦𑁆𑀤𑀼𑀓𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀲𑀢𑁆𑀢𑀫𑀁.

𑁮. 𑀫𑀼𑀝𑁆𑀞𑀺𑀧𑀽𑀚𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁪𑁨. ‘‘𑀲𑀼𑀫𑁂𑀥𑁄 𑀦𑀸𑀫 𑀪𑀕𑀯𑀸, 𑀮𑁄𑀓𑀚𑁂𑀝𑁆𑀞𑁄 𑀦𑀭𑀸𑀲𑀪𑁄;

𑀧𑀘𑁆𑀙𑀺𑀫𑁂 𑀅𑀦𑀼𑀓𑀫𑁆𑀧𑀸𑀬, 𑀧𑀥𑀸𑀦𑀁 𑀧𑀤𑀳𑀻 𑀚𑀺𑀦𑁄.

𑁪𑁩. ‘‘𑀢𑀲𑁆𑀲 𑀘𑀗𑁆𑀓𑀫𑀫𑀸𑀦𑀲𑁆𑀲, 𑀤𑁆𑀯𑀺𑀧𑀤𑀺𑀦𑁆𑀤𑀲𑁆𑀲 𑀢𑀸𑀤𑀺𑀦𑁄;

𑀕𑀺𑀭𑀺𑀦𑁂𑀮𑀲𑁆𑀲 𑀧𑀼𑀧𑁆𑀨𑀸𑀦𑀁, 𑀫𑀼𑀝𑁆𑀞𑀺𑀁 𑀩𑀼𑀤𑁆𑀥𑀲𑁆𑀲 𑀭𑁄𑀧𑀬𑀺𑀁.

𑁪𑁪. ‘‘𑀢𑁂𑀦 𑀘𑀺𑀢𑁆𑀢𑀧𑁆𑀧𑀲𑀸𑀤𑁂𑀦, 𑀲𑀼𑀓𑁆𑀓𑀫𑀽𑀮𑁂𑀦 𑀘𑁄𑀤𑀺𑀢𑁄;

𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑀸𑀦𑀺, 𑀤𑀼𑀕𑁆𑀕𑀢𑀺𑀁 𑀦𑀼𑀧𑀧𑀚𑁆𑀚𑀳𑀁.

𑁪𑁫. ‘‘𑀢𑁂𑀯𑀻𑀲𑀢𑀺𑀓𑀧𑁆𑀧𑀲𑀢𑁂, 𑀲𑀼𑀦𑁂𑀮𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀏𑀓𑁄 𑀆𑀲𑀺𑀁 𑀫𑀳𑀩𑁆𑀩𑀮𑁄.

𑁪𑁬. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀫𑀼𑀝𑁆𑀞𑀺𑀧𑀽𑀚𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀫𑀼𑀝𑁆𑀞𑀺𑀧𑀽𑀚𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀅𑀝𑁆𑀞𑀫𑀁.

𑁯. 𑀓𑀺𑀁𑀓𑀡𑀺𑀓𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁪𑁭. ‘‘𑀲𑀼𑀫𑀗𑁆𑀕𑀮𑁄𑀢𑀺 𑀦𑀸𑀫𑁂𑀦, 𑀲𑀬𑀫𑁆𑀪𑀽 𑀅𑀧𑀭𑀸𑀚𑀺𑀢𑁄;

𑀧𑀯𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸𑀦, 𑀦𑀕𑀭𑀁 𑀧𑀸𑀯𑀺𑀲𑀻 𑀚𑀺𑀦𑁄.

𑁪𑁮. ‘‘𑀧𑀺𑀡𑁆𑀟𑀘𑀸𑀭𑀁 𑀘𑀭𑀺𑀢𑁆𑀯𑀸𑀦, 𑀦𑀺𑀓𑁆𑀔𑀫𑁆𑀫 𑀦𑀕𑀭𑀸 𑀫𑀼𑀦𑀺;

𑀓𑀢𑀓𑀺𑀘𑁆𑀘𑁄𑀯 𑀲𑀫𑁆𑀩𑀼𑀤𑁆𑀥𑁄, 𑀲𑁄 𑀯𑀲𑀻 𑀯𑀦𑀫𑀦𑁆𑀢𑀭𑁂.

𑁪𑁯. ‘‘𑀓𑀺𑀁𑀓𑀡𑀺𑀧𑀼𑀧𑁆𑀨𑀁 𑀧𑀕𑁆𑀕𑀬𑁆𑀳, 𑀩𑀼𑀤𑁆𑀥𑀲𑁆𑀲 𑀅𑀪𑀺𑀭𑁄𑀧𑀬𑀺𑀁;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀲𑀬𑀫𑁆𑀪𑀼𑀲𑁆𑀲 𑀫𑀳𑁂𑀲𑀺𑀦𑁄.

𑁫𑁦. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀭𑁄𑀧𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁫𑁧. ‘‘𑀙𑀴𑀸𑀲𑀻𑀢𑀺𑀫𑁆𑀳𑀺𑀢𑁄 𑀓𑀧𑁆𑀧𑁂, 𑀅𑀧𑀺𑀮𑀸𑀲𑀺𑀲𑀦𑀸𑀫𑀓𑁄;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁫𑁨. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀓𑀺𑀁𑀓𑀡𑀺𑀓𑀧𑀼𑀧𑁆𑀨𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀓𑀺𑀁𑀓𑀡𑀺𑀓𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀦𑀯𑀫𑀁.

𑁧𑁦. 𑀬𑀽𑀣𑀺𑀓𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁫𑁩. ‘‘𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄;

𑀧𑀯𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸𑀦, 𑀯𑀺𑀳𑀸𑀭𑀁 𑀬𑀸𑀢𑀺 𑀘𑀓𑁆𑀔𑀼𑀫𑀸.

𑁫𑁪. ‘‘𑀉𑀪𑁄 𑀳𑀢𑁆𑀣𑁂𑀳𑀺 𑀧𑀕𑁆𑀕𑀬𑁆𑀳, 𑀬𑀽𑀣𑀺𑀓𑀁 𑀧𑀼𑀧𑁆𑀨𑀫𑀼𑀢𑁆𑀢𑀫𑀁;

𑀩𑀼𑀤𑁆𑀥𑀲𑁆𑀲 𑀅𑀪𑀺𑀭𑁄𑀧𑀬𑀺𑀁, 𑀫𑁂𑀢𑁆𑀢𑀘𑀺𑀢𑁆𑀢𑀲𑁆𑀲 𑀢𑀸𑀤𑀺𑀦𑁄.

𑁫𑁫. ‘‘𑀢𑁂𑀦 𑀘𑀺𑀢𑁆𑀢𑀧𑁆𑀧𑀲𑀸𑀤𑁂𑀦, 𑀅𑀦𑀼𑀪𑁄𑀢𑁆𑀯𑀸𑀦 𑀲𑀫𑁆𑀧𑀤𑀸;

𑀓𑀧𑁆𑀧𑀸𑀦𑀁 𑀲𑀢𑀲𑀳𑀲𑁆𑀲𑀁, 𑀤𑀼𑀕𑁆𑀕𑀢𑀺𑀁 𑀦𑀼𑀧𑀧𑀚𑁆𑀚𑀳𑀁.

𑁫𑁬. ‘‘𑀇𑀢𑁄 𑀧𑀜𑁆𑀜𑀸𑀲𑀓𑀧𑁆𑀧𑁂𑀲𑀼, 𑀏𑀓𑁄 𑀆𑀲𑀺𑀁 𑀚𑀦𑀸𑀥𑀺𑀧𑁄;

𑀲𑀫𑀺𑀢𑁆𑀢𑀦𑀦𑁆𑀤𑀦𑁄 𑀦𑀸𑀫, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁫𑁭. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀬𑀽𑀣𑀺𑀓𑀧𑀼𑀧𑁆𑀨𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺;

𑀬𑀽𑀣𑀺𑀓𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀲𑀫𑀁.

𑀢𑀫𑀸𑀮𑀧𑀼𑀧𑁆𑀨𑀺𑀬𑀯𑀕𑁆𑀕𑁄 𑀯𑀻𑀲𑀢𑀺𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀢𑀫𑀸𑀮𑀢𑀺𑀡𑀲𑀦𑁆𑀣𑀸𑀭𑁄, 𑀔𑀡𑁆𑀟𑀨𑀼𑀮𑁆𑀮𑀺 𑀅𑀲𑁄𑀓𑀺𑀬𑁄;

𑀅𑀗𑁆𑀓𑁄𑀮𑀓𑀻 𑀓𑀺𑀲𑀮𑀬𑁄, 𑀢𑀺𑀦𑁆𑀤𑀼𑀓𑁄 𑀦𑁂𑀮𑀧𑀼𑀧𑁆𑀨𑀺𑀬𑁄;

𑀓𑀺𑀁𑀓𑀡𑀺𑀓𑁄 𑀬𑀽𑀣𑀺𑀓𑁄 𑀘, 𑀕𑀸𑀣𑀸 𑀧𑀜𑁆𑀜𑀸𑀲 𑀅𑀝𑁆𑀞 𑀘𑀸𑀢𑀺.

𑀅𑀣 𑀯𑀕𑁆𑀕𑀼𑀤𑁆𑀤𑀸𑀦𑀁 𑁋

𑀪𑀺𑀓𑁆𑀔𑀸𑀤𑀸𑀬𑀻 𑀧𑀭𑀺𑀯𑀸𑀭𑁄, 𑀲𑁂𑀭𑁂𑀬𑁆𑀬𑁄 𑀲𑁄𑀪𑀺𑀢𑁄 𑀢𑀣𑀸;

𑀙𑀢𑁆𑀢𑀜𑁆𑀘 𑀩𑀦𑁆𑀥𑀼𑀚𑀻𑀯𑀻 𑀘, 𑀲𑀼𑀧𑀸𑀭𑀺𑀘𑀭𑀺𑀬𑁄𑀧𑀺 𑀘.

𑀓𑀼𑀫𑀼𑀤𑁄 𑀓𑀼𑀝𑀚𑁄 𑀘𑁂𑀯, 𑀢𑀫𑀸𑀮𑀺 𑀤𑀲𑀫𑁄 𑀓𑀢𑁄;

𑀙𑀲𑀢𑀸𑀦𑀺 𑀘 𑀕𑀸𑀣𑀸𑀦𑀺, 𑀙𑀲𑀝𑁆𑀞𑀺 𑀘 𑀢𑀢𑀼𑀢𑁆𑀢𑀭𑀺.

𑀪𑀺𑀓𑁆𑀔𑀸𑀯𑀕𑁆𑀕𑀤𑀲𑀓𑀁.