𑁨𑁧. 𑀓𑀡𑀺𑀓𑀸𑀭𑀧𑀼𑀧𑁆𑀨𑀺𑀬𑀯𑀕𑁆𑀕𑁄

𑁧. 𑀓𑀡𑀺𑀓𑀸𑀭𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧. ‘‘𑀓𑀡𑀺𑀓𑀸𑀭𑀁 𑀧𑀼𑀧𑁆𑀨𑀺𑀢𑀁 𑀤𑀺𑀲𑁆𑀯𑀸, 𑀑𑀘𑀺𑀦𑀺𑀢𑁆𑀯𑀸𑀦𑀳𑀁 𑀢𑀤𑀸;

𑀢𑀺𑀲𑁆𑀲𑀲𑁆𑀲 𑀅𑀪𑀺𑀭𑁄𑀧𑁂𑀲𑀺𑀁, 𑀑𑀖𑀢𑀺𑀡𑁆𑀡𑀲𑁆𑀲 𑀢𑀸𑀤𑀺𑀦𑁄.

𑁨. ‘‘𑀤𑁆𑀯𑁂𑀦𑀯𑀼𑀢𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀭𑁄𑀧𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁩. ‘‘𑀧𑀜𑁆𑀘𑀢𑁆𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀅𑀭𑀼𑀡𑀧𑀸𑀡𑀻𑀢𑀺 𑀯𑀺𑀲𑁆𑀲𑀼𑀢𑁄;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁪. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀓𑀡𑀺𑀓𑀸𑀭𑀧𑀼𑀧𑁆𑀨𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀓𑀡𑀺𑀓𑀸𑀭𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀞𑀫𑀁.

𑁨. 𑀫𑀺𑀦𑁂𑀮𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁫. ‘‘𑀲𑀼𑀯𑀡𑁆𑀡𑀯𑀡𑁆𑀡𑁄 𑀪𑀕𑀯𑀸, 𑀲𑀢𑀭𑀁𑀲𑀻 𑀧𑀢𑀸𑀧𑀯𑀸;

𑀘𑀗𑁆𑀓𑀫𑀦𑀁 𑀲𑀫𑀸𑀭𑀽𑀴𑁆𑀳𑁄, 𑀫𑁂𑀢𑁆𑀢𑀘𑀺𑀢𑁆𑀢𑁄 𑀲𑀺𑀔𑀻𑀲𑀪𑁄.

𑁬. ‘‘𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀯𑀦𑁆𑀤𑀺𑀢𑁆𑀯𑀸 [𑀣𑁄𑀫𑁂𑀢𑁆𑀯𑀸 (𑀲𑁆𑀬𑀸.)] 𑀜𑀸𑀡𑀫𑀼𑀢𑁆𑀢𑀫𑀁;

𑀫𑀺𑀦𑁂𑀮𑀧𑀼𑀧𑁆𑀨𑀁 𑀧𑀕𑁆𑀕𑀬𑁆𑀳, 𑀩𑀼𑀤𑁆𑀥𑀲𑁆𑀲 𑀅𑀪𑀺𑀭𑁄𑀧𑀬𑀺𑀁.

𑁭. ‘‘𑀏𑀓𑀢𑁆𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀧𑀽𑀚𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁮. ‘‘𑀏𑀓𑀽𑀦𑀢𑀺𑀁𑀲𑀓𑀧𑁆𑀧𑀫𑁆𑀳𑀺, 𑀲𑀼𑀫𑁂𑀖𑀖𑀦𑀦𑀸𑀫𑀓𑁄;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁯. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀫𑀺𑀦𑁂𑀮𑀧𑀼𑀧𑁆𑀨𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀫𑀺𑀦𑁂𑀮𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀼𑀢𑀺𑀬𑀁.

𑁩. 𑀓𑀺𑀗𑁆𑀓𑀡𑀺𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁦. ‘‘𑀓𑀜𑁆𑀘𑀦𑀕𑁆𑀖𑀺𑀬𑀲𑀗𑁆𑀓𑀸𑀲𑁄, 𑀲𑀩𑁆𑀩𑀜𑁆𑀜𑀽 𑀮𑁄𑀓𑀦𑀸𑀬𑀓𑁄;

𑀑𑀤𑀓𑀁 𑀤𑀳𑀫𑁄𑀕𑁆𑀕𑀬𑁆𑀳, 𑀲𑀺𑀦𑀸𑀬𑀺 𑀮𑁄𑀓𑀦𑀸𑀬𑀓𑁄.

𑁧𑁧. ‘‘𑀧𑀕𑁆𑀕𑀬𑁆𑀳 𑀓𑀺𑀗𑁆𑀓𑀡𑀺𑀁 [𑀓𑀺𑀗𑁆𑀓𑀺𑀡𑀺𑀁 (𑀲𑀻.)] 𑀧𑀼𑀧𑁆𑀨𑀁, 𑀯𑀺𑀧𑀲𑁆𑀲𑀺𑀲𑁆𑀲𑀸𑀪𑀺𑀭𑁄𑀧𑀬𑀺𑀁;

𑀉𑀤𑀕𑁆𑀕𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀤𑁆𑀯𑀺𑀧𑀤𑀺𑀦𑁆𑀤𑀲𑁆𑀲 𑀢𑀸𑀤𑀺𑀦𑁄.

𑁧𑁨. ‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀭𑁄𑀧𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁧𑁩. ‘‘𑀲𑀢𑁆𑀢𑀯𑀻𑀲𑀢𑀺𑀓𑀧𑁆𑀧𑀫𑁆𑀳𑀺, 𑀭𑀸𑀚𑀸 𑀪𑀻𑀫𑀭𑀣𑁄 𑀅𑀳𑀼;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁧𑁪. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀓𑀺𑀗𑁆𑀓𑀡𑀺𑀧𑀼𑀧𑁆𑀨𑀺𑀬𑁄 [𑀓𑀺𑀗𑁆𑀓𑀺𑀡𑀺𑀓𑀧𑀼𑀧𑁆𑀨𑀺𑀬𑁄 (𑀲𑀻.)] 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀓𑀺𑀗𑁆𑀓𑀡𑀺𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀢𑀢𑀺𑀬𑀁.

𑁪. 𑀢𑀭𑀡𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁫. ‘‘𑀅𑀢𑁆𑀣𑀤𑀲𑁆𑀲𑀻 𑀢𑀼 𑀪𑀕𑀯𑀸, 𑀤𑁆𑀯𑀺𑀧𑀤𑀺𑀦𑁆𑀤𑁄 𑀦𑀭𑀸𑀲𑀪𑁄;

𑀧𑀼𑀭𑀓𑁆𑀔𑀢𑁄 𑀲𑀸𑀯𑀓𑁂𑀳𑀺, 𑀕𑀗𑁆𑀕𑀸𑀢𑀻𑀭𑀫𑀼𑀧𑀸𑀕𑀫𑀺.

𑁧𑁬. ‘‘𑀲𑀫𑀢𑀺𑀢𑁆𑀢𑀺 𑀓𑀸𑀓𑀧𑁂𑀬𑁆𑀬𑀸, 𑀕𑀗𑁆𑀕𑀸 𑀆𑀲𑀺 𑀤𑀼𑀭𑀼𑀢𑁆𑀢𑀭𑀸;

𑀉𑀢𑁆𑀢𑀸𑀭𑀬𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑀁, 𑀩𑀼𑀤𑁆𑀥𑀜𑁆𑀘 𑀤𑁆𑀯𑀺𑀧𑀤𑀼𑀢𑁆𑀢𑀫𑀁.

𑁧𑁭. ‘‘𑀅𑀝𑁆𑀞𑀸𑀭𑀲𑁂 𑀓𑀧𑁆𑀧𑀲𑀢𑁂, 𑀬𑀁 𑀓𑀫𑁆𑀫𑀫𑀓𑀭𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀢𑀭𑀡𑀸𑀬 𑀇𑀤𑀁 𑀨𑀮𑀁.

𑁧𑁮. ‘‘𑀢𑁂𑀭𑀲𑁂𑀢𑁄 𑀓𑀧𑁆𑀧𑀲𑀢𑁂, 𑀧𑀜𑁆𑀘 𑀲𑀩𑁆𑀩𑁄𑀪𑀯𑀸 [𑀲𑀩𑁆𑀪𑁄𑀕𑀯𑀸 (𑀲𑀻.)] 𑀅𑀳𑀼𑀁;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑀸, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁧𑁯. ‘‘𑀧𑀘𑁆𑀙𑀺𑀫𑁂 𑀘 𑀪𑀯𑁂 𑀅𑀲𑁆𑀫𑀺𑀁, 𑀚𑀸𑀢𑁄𑀳𑀁 𑀩𑁆𑀭𑀸𑀳𑁆𑀫𑀡𑁂 𑀓𑀼𑀮𑁂;

𑀲𑀤𑁆𑀥𑀺𑀁 𑀢𑀻𑀳𑀺 𑀲𑀳𑀸𑀬𑁂𑀳𑀺, 𑀧𑀩𑁆𑀩𑀚𑀺𑀁 𑀲𑀢𑁆𑀣𑀼 𑀲𑀸𑀲𑀦𑁂.

𑁨𑁦. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀢𑀭𑀡𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺;

𑀢𑀭𑀡𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀘𑀢𑀼𑀢𑁆𑀣𑀁.

𑁫. 𑀦𑀺𑀕𑁆𑀕𑀼𑀡𑁆𑀟𑀺𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁧. ‘‘𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄, 𑀆𑀲𑀺𑀫𑀸𑀭𑀸𑀫𑀺𑀓𑁄 𑀅𑀳𑀁;

𑀦𑀺𑀕𑁆𑀕𑀼𑀡𑁆𑀟𑀺𑀧𑀼𑀧𑁆𑀨𑀁 𑀧𑀕𑁆𑀕𑀬𑁆𑀳, 𑀩𑀼𑀤𑁆𑀥𑀲𑁆𑀲 𑀅𑀪𑀺𑀭𑁄𑀧𑀬𑀺𑀁.

𑁨𑁨. ‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀧𑀽𑀚𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁨𑁩. ‘‘𑀧𑀜𑁆𑀘𑀯𑀻𑀲𑁂 [𑀧𑀜𑁆𑀘𑀢𑀺𑀁𑀲𑁂 (𑀲𑀻. 𑀲𑁆𑀬𑀸.)] 𑀇𑀢𑁄 𑀓𑀧𑁆𑀧𑁂, 𑀏𑀓𑁄 𑀆𑀲𑀺𑀁 𑀚𑀦𑀸𑀥𑀺𑀧𑁄;

𑀫𑀳𑀸𑀧𑀢𑀸𑀧𑀦𑀸𑀫𑁂𑀦, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁨𑁪. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀦𑀺𑀕𑁆𑀕𑀼𑀡𑁆𑀟𑀺𑀧𑀼𑀧𑁆𑀨𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀦𑀺𑀕𑁆𑀕𑀼𑀡𑁆𑀟𑀺𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀜𑁆𑀘𑀫𑀁.

𑁬. 𑀉𑀤𑀓𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁫. ‘‘𑀪𑀼𑀜𑁆𑀚𑀦𑁆𑀢𑀁 𑀲𑀫𑀡𑀁 𑀤𑀺𑀲𑁆𑀯𑀸, 𑀯𑀺𑀧𑁆𑀧𑀲𑀦𑁆𑀦𑀫𑀦𑀸𑀯𑀺𑀮𑀁;

𑀖𑀝𑁂𑀦𑁄𑀤𑀓𑀫𑀸𑀤𑀸𑀬, 𑀲𑀺𑀤𑁆𑀥𑀢𑁆𑀣𑀲𑁆𑀲 𑀅𑀤𑀸𑀲𑀳𑀁.

𑁨𑁬. ‘‘𑀦𑀺𑀫𑁆𑀫𑀮𑁄 𑀳𑁄𑀫𑀳𑀁 𑀅𑀚𑁆𑀚, 𑀯𑀺𑀫𑀮𑁄 𑀔𑀻𑀡𑀲𑀁𑀲𑀬𑁄;

𑀪𑀯𑁂 𑀦𑀺𑀩𑁆𑀩𑀢𑁆𑀢𑀫𑀸𑀦𑀫𑁆𑀳𑀺, 𑀨𑀮𑀁 𑀦𑀺𑀩𑁆𑀩𑀢𑁆𑀢𑀢𑁂 𑀫𑀫 [𑀲𑀼𑀪𑀁 (𑀲𑀻.)].

𑁨𑁭. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀉𑀤𑀓𑀁 𑀬𑀫𑀤𑀸𑀲𑀳𑀁 [𑀬𑀁 𑀢𑀤𑀸 𑀅𑀤𑀁 (𑀲𑀻.), 𑀅𑀤𑀤𑀺𑀁 𑀢𑀤𑀸 (𑀲𑁆𑀬𑀸.)];

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀤𑀓𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁨𑁮. ‘‘𑀏𑀓𑀲𑀝𑁆𑀞𑀺𑀫𑁆𑀳𑀺𑀢𑁄 𑀓𑀧𑁆𑀧𑁂, 𑀏𑀓𑁄𑀯 𑀯𑀺𑀫𑀮𑁄 𑀅𑀳𑀼;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁨𑁯. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀉𑀤𑀓𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀉𑀤𑀓𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀙𑀝𑁆𑀞𑀁.

𑁭. 𑀲𑀮𑀮𑀫𑀸𑀮𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁦. ‘‘𑀓𑀡𑀺𑀓𑀸𑀭𑀁𑀯 𑀚𑁄𑀢𑀦𑁆𑀢𑀁, 𑀦𑀺𑀲𑀺𑀦𑁆𑀦𑀁 𑀧𑀩𑁆𑀩𑀢𑀦𑁆𑀢𑀭𑁂;

𑀑𑀪𑀸𑀲𑁂𑀦𑁆𑀢𑀁 𑀤𑀺𑀲𑀸 𑀲𑀩𑁆𑀩𑀸, 𑀲𑀺𑀤𑁆𑀥𑀢𑁆𑀣𑀁 𑀦𑀭𑀲𑀸𑀭𑀣𑀺𑀁.

𑁩𑁧. ‘‘𑀥𑀦𑀼𑀁 𑀅𑀤𑁆𑀯𑁂𑀚𑁆𑀛𑀁 𑀓𑀢𑁆𑀯𑀸𑀦, 𑀉𑀲𑀼𑀁 𑀲𑀦𑁆𑀦𑀬𑁆𑀳𑀳𑀁 𑀢𑀤𑀸;

𑀧𑀼𑀧𑁆𑀨𑀁 𑀲𑀯𑀡𑁆𑀝𑀁 𑀙𑁂𑀢𑁆𑀯𑀸𑀦, 𑀩𑀼𑀤𑁆𑀥𑀲𑁆𑀲 𑀅𑀪𑀺𑀭𑁄𑀧𑀬𑀺𑀁.

𑁩𑁨. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀭𑁄𑀧𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁩𑁩. ‘‘𑀏𑀓𑀧𑀜𑁆𑀜𑀸𑀲𑀺𑀢𑁄 𑀓𑀧𑁆𑀧𑁂, 𑀏𑀓𑁄 𑀆𑀲𑀺𑀁 𑀚𑀼𑀢𑀺𑀦𑁆𑀥𑀭𑁄;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁩𑁪. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀮𑀮𑀫𑀸𑀮𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀮𑀮𑀫𑀸𑀮𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀲𑀢𑁆𑀢𑀫𑀁.

𑁮. 𑀓𑁄𑀭𑀡𑁆𑀟𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁫. ‘‘𑀅𑀓𑁆𑀓𑀦𑁆𑀢𑀜𑁆𑀘 𑀧𑀤𑀁 𑀤𑀺𑀲𑁆𑀯𑀸, 𑀘𑀓𑁆𑀓𑀸𑀮𑀗𑁆𑀓𑀸𑀭𑀪𑀽𑀲𑀺𑀢𑀁;

𑀧𑀤𑁂𑀦𑀸𑀦𑀼𑀧𑀤𑀁 𑀬𑀦𑁆𑀢𑁄, 𑀯𑀺𑀧𑀲𑁆𑀲𑀺𑀲𑁆𑀲 𑀫𑀳𑁂𑀲𑀺𑀦𑁄.

𑁩𑁬. ‘‘𑀓𑁄𑀭𑀡𑁆𑀟𑀁 𑀧𑀼𑀧𑁆𑀨𑀺𑀢𑀁 𑀤𑀺𑀲𑁆𑀯𑀸, 𑀲𑀫𑀽𑀮𑀁 𑀧𑀽𑀚𑀺𑀢𑀁 𑀫𑀬𑀸;

𑀳𑀝𑁆𑀞𑁄 𑀳𑀝𑁆𑀞𑁂𑀦 𑀘𑀺𑀢𑁆𑀢𑁂𑀦, 𑀅𑀯𑀦𑁆𑀤𑀺𑀁 𑀧𑀤𑀫𑀼𑀢𑁆𑀢𑀫𑀁.

𑁩𑁭. ‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀧𑀽𑀚𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁩𑁮. ‘‘𑀲𑀢𑁆𑀢𑀧𑀜𑁆𑀜𑀸𑀲𑀓𑀧𑁆𑀧𑀫𑁆𑀳𑀺, 𑀏𑀓𑁄 𑀯𑀻𑀢𑀫𑀮𑁄 𑀅𑀳𑀼𑀁;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁩𑁯. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀓𑁄𑀭𑀡𑁆𑀟𑀧𑀼𑀧𑁆𑀨𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀓𑁄𑀭𑀡𑁆𑀟𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀅𑀝𑁆𑀞𑀫𑀁.

𑁯. 𑀆𑀥𑀸𑀭𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁪𑁦. ‘‘𑀆𑀥𑀸𑀭𑀓𑀁 𑀫𑀬𑀸 𑀤𑀺𑀦𑁆𑀦𑀁, 𑀲𑀺𑀔𑀺𑀦𑁄 𑀮𑁄𑀓𑀩𑀦𑁆𑀥𑀼𑀦𑁄;

𑀥𑀸𑀭𑁂𑀫𑀺 𑀧𑀣𑀯𑀺𑀁 𑀲𑀩𑁆𑀩𑀁, 𑀓𑁂𑀯𑀮𑀁 𑀯𑀲𑀼𑀥𑀁 𑀇𑀫𑀁.

𑁪𑁧. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸;

𑀥𑀸𑀭𑁂𑀫𑀺 𑀅𑀦𑁆𑀢𑀺𑀫𑀁 𑀤𑁂𑀳𑀁, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀲𑀦𑁂.

𑁪𑁨. ‘‘𑀲𑀢𑁆𑀢𑀯𑀻𑀲𑁂 𑀇𑀢𑁄 𑀓𑀧𑁆𑀧𑁂, 𑀅𑀳𑁂𑀲𑀼𑀁 𑀘𑀢𑀼𑀭𑁄 𑀚𑀦𑀸;

𑀲𑀫𑀦𑁆𑀢𑀯𑀭𑀡𑀸 𑀦𑀸𑀫, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁪𑁩. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀆𑀥𑀸𑀭𑀤𑀸𑀬𑀓𑁄 [𑀧𑀭𑀺𑀬𑀸𑀤𑀸𑀦𑀺𑀬𑁄 (𑀓.)] 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀆𑀥𑀸𑀭𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀦𑀯𑀫𑀁.

𑁧𑁦. 𑀧𑀸𑀧𑀦𑀺𑀯𑀸𑀭𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁪𑁪. ‘‘𑀢𑀺𑀲𑁆𑀲𑀲𑁆𑀲 𑀢𑀼 𑀪𑀕𑀯𑀢𑁄, 𑀤𑁂𑀯𑀤𑁂𑀯𑀲𑁆𑀲 𑀢𑀸𑀤𑀺𑀦𑁄;

𑀏𑀓𑀘𑁆𑀙𑀢𑁆𑀢𑀁 𑀫𑀬𑀸 𑀤𑀺𑀦𑁆𑀦𑀁, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸.

𑁪𑁫. ‘‘𑀦𑀺𑀯𑀼𑀢𑀁 𑀳𑁄𑀢𑀺 𑀫𑁂 𑀧𑀸𑀧𑀁, 𑀓𑀼𑀲𑀮𑀲𑁆𑀲𑀼𑀧𑀲𑀫𑁆𑀧𑀤𑀸;

𑀆𑀓𑀸𑀲𑁂 𑀙𑀢𑁆𑀢𑀁 𑀥𑀸𑀭𑁂𑀦𑁆𑀢𑀺, 𑀧𑀼𑀩𑁆𑀩𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁.

𑁪𑁬. ‘‘𑀘𑀭𑀺𑀫𑀁 𑀯𑀢𑁆𑀢𑀢𑁂 𑀫𑀬𑁆𑀳𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸;

𑀥𑀸𑀭𑁂𑀫𑀺 𑀅𑀦𑁆𑀢𑀺𑀫𑀁 𑀤𑁂𑀳𑀁, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀲𑀦𑁂.

𑁪𑁭. ‘‘𑀤𑁆𑀯𑁂𑀦𑀯𑀼𑀢𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀙𑀢𑁆𑀢𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀙𑀢𑁆𑀢𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁪𑁮. ‘‘𑀤𑁆𑀯𑁂𑀲𑀢𑁆𑀢𑀢𑀺𑀫𑁆𑀳𑀺𑀢𑁄 𑀓𑀧𑁆𑀧𑁂, 𑀅𑀝𑁆𑀞𑀸𑀲𑀺𑀁𑀲𑀼 𑀚𑀦𑀸𑀥𑀺𑀧𑀸;

𑀫𑀳𑀸𑀦𑀺𑀤𑀸𑀦𑀦𑀸𑀫𑁂𑀦, 𑀭𑀸𑀚𑀸𑀦𑁄 𑀘𑀓𑁆𑀓𑀯𑀢𑁆𑀢𑀺𑀦𑁄.

𑁪𑁯. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀸𑀧𑀦𑀺𑀯𑀸𑀭𑀺𑀬𑁄 [𑀯𑀸𑀢𑀸𑀢𑀧𑀦𑀺𑀯𑀸𑀭𑀺𑀬𑁄 (𑀲𑀻.)] 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺;

𑀧𑀸𑀧𑀦𑀺𑀯𑀸𑀭𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀲𑀫𑀁.

𑀓𑀡𑀺𑀓𑀸𑀭𑀧𑀼𑀧𑁆𑀨𑀺𑀬𑀯𑀕𑁆𑀕𑁄 𑀏𑀓𑀯𑀻𑀲𑀢𑀺𑀫𑁄.