𑁨𑁨. 𑀳𑀢𑁆𑀣𑀺𑀯𑀕𑁆𑀕𑁄

𑁧. 𑀳𑀢𑁆𑀣𑀺𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧. ‘‘𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄, 𑀤𑁆𑀯𑀺𑀧𑀤𑀺𑀦𑁆𑀤𑀲𑁆𑀲 𑀢𑀸𑀤𑀺𑀦𑁄;

𑀦𑀸𑀕𑀲𑁂𑀝𑁆𑀞𑁄 𑀫𑀬𑀸 𑀤𑀺𑀦𑁆𑀦𑁄, 𑀈𑀲𑀸𑀤𑀦𑁆𑀢𑁄 𑀉𑀭𑀽𑀴𑁆𑀳𑀯𑀸.

𑁨. ‘‘𑀉𑀢𑁆𑀢𑀫𑀢𑁆𑀣𑀁 𑀅𑀦𑀼𑀪𑁄𑀫𑀺, 𑀲𑀦𑁆𑀢𑀺𑀧𑀤𑀫𑀦𑀼𑀢𑁆𑀢𑀭𑀁;

𑀦𑀸𑀕𑀤𑀸𑀦𑀁 [𑀅𑀕𑁆𑀕𑀤𑀸𑀦𑀁 (𑀲𑀻. 𑀓.)] 𑀫𑀬𑀸 𑀤𑀺𑀦𑁆𑀦𑀁, 𑀲𑀩𑁆𑀩𑀮𑁄𑀓𑀳𑀺𑀢𑁂𑀲𑀺𑀦𑁄.

𑁩. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀦𑀸𑀕 [𑀤𑀸𑀦 (𑀲𑀻. 𑀓.)] 𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀦𑀸𑀕𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁪. ‘‘𑀅𑀝𑁆𑀞𑀲𑀢𑁆𑀢𑀢𑀺𑀓𑀧𑁆𑀧𑀫𑁆𑀳𑀺, 𑀲𑁄𑀴𑀲𑀸𑀲𑀺𑀁𑀲𑀼 𑀔𑀢𑁆𑀢𑀺𑀬𑀸;

𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸 𑀦𑀸𑀫, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁫. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀳𑀢𑁆𑀣𑀺𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀳𑀢𑁆𑀣𑀺𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀞𑀫𑀁.

𑁨. 𑀧𑀸𑀦𑀥𑀺𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁬. ‘‘𑀆𑀭𑀜𑁆𑀜𑀺𑀓𑀲𑁆𑀲 𑀇𑀲𑀺𑀦𑁄, 𑀘𑀺𑀭𑀭𑀢𑁆𑀢𑀢𑀧𑀲𑁆𑀲𑀺𑀦𑁄 [𑀛𑀸𑀬𑀺𑀦𑁄, 𑀫𑁂𑀢𑁆𑀢𑀘𑀺𑀢𑁆𑀢𑀢𑀧𑀲𑁆𑀲𑀺𑀦𑁄 (𑀲𑁆𑀬𑀸.)];

𑀩𑀼𑀤𑁆𑀥𑀲𑁆𑀲 [𑀥𑀫𑁆𑀫𑀲𑁆𑀲 (𑀲𑁆𑀬𑀸. 𑀓.)] 𑀪𑀸𑀯𑀺𑀢𑀢𑁆𑀢𑀲𑁆𑀲, 𑀅𑀤𑀸𑀲𑀺𑀁 𑀧𑀸𑀦𑀥𑀺𑀁 𑀅𑀳𑀁.

𑁭. ‘‘𑀢𑁂𑀦 𑀓𑀫𑁆𑀫𑁂𑀦 𑀤𑁆𑀯𑀺𑀧𑀤𑀺𑀦𑁆𑀤, 𑀮𑁄𑀓𑀚𑁂𑀝𑁆𑀞 𑀦𑀭𑀸𑀲𑀪;

𑀤𑀺𑀩𑁆𑀩𑀬𑀸𑀦𑀁 [𑀲𑀩𑁆𑀩𑀁 𑀬𑀸𑀦𑀁 (𑀲𑀻.)] 𑀅𑀦𑀼𑀪𑁄𑀫𑀺, 𑀧𑀼𑀩𑁆𑀩𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁.

𑁮. ‘‘𑀘𑀢𑀼𑀦𑁆𑀦𑀯𑀼𑀢𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀓𑀫𑁆𑀫𑀫𑀓𑀭𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀧𑀸𑀦𑀥𑀺𑀲𑁆𑀲 𑀇𑀤𑀁 𑀨𑀮𑀁.

𑁯. ‘‘𑀲𑀢𑁆𑀢𑀲𑀢𑁆𑀢𑀢𑀺𑀢𑁄 𑀓𑀧𑁆𑀧𑁂, 𑀅𑀝𑁆𑀞 𑀆𑀲𑀺𑀁𑀲𑀼 𑀔𑀢𑁆𑀢𑀺𑀬𑀸;

𑀲𑀼𑀬𑀸𑀦𑀸 𑀦𑀸𑀫 𑀦𑀸𑀫𑁂𑀦, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁧𑁦. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀸𑀦𑀥𑀺𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀸𑀦𑀥𑀺𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀼𑀢𑀺𑀬𑀁.

𑁩. 𑀲𑀘𑁆𑀘𑀲𑀜𑁆𑀜𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁧. ‘‘𑀯𑁂𑀲𑁆𑀲𑀪𑀽 𑀢𑀫𑁆𑀳𑀺 𑀲𑀫𑀬𑁂, 𑀪𑀺𑀓𑁆𑀔𑀼𑀲𑀗𑁆𑀖𑀧𑀼𑀭𑀓𑁆𑀔𑀢𑁄;

𑀤𑁂𑀲𑁂𑀢𑀺 𑀅𑀭𑀺𑀬𑀲𑀘𑁆𑀘𑀸𑀦𑀺, 𑀦𑀺𑀩𑁆𑀩𑀸𑀧𑁂𑀦𑁆𑀢𑁄 𑀫𑀳𑀸𑀚𑀦𑀁.

𑁧𑁨. ‘‘𑀧𑀭𑀫𑀓𑀸𑀭𑀼𑀜𑁆𑀜𑀧𑀢𑁆𑀢𑁄𑀫𑁆𑀳𑀺, 𑀲𑀫𑀺𑀢𑀺𑀁 𑀅𑀕𑀫𑀸𑀲𑀳𑀁;

𑀲𑁄𑀳𑀁 𑀦𑀺𑀲𑀺𑀦𑁆𑀦𑀓𑁄 𑀲𑀦𑁆𑀢𑁄, 𑀥𑀫𑁆𑀫𑀫𑀲𑁆𑀲𑁄𑀲𑀺 𑀲𑀢𑁆𑀣𑀼𑀦𑁄.

𑁧𑁩. ‘‘𑀢𑀲𑁆𑀲𑀸𑀳𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸𑀦, 𑀤𑁂𑀯𑀮𑁄𑀓𑀁 𑀅𑀕𑀘𑁆𑀙𑀳𑀁;

𑀢𑀺𑀁𑀲𑀓𑀧𑁆𑀧𑀸𑀦𑀺 𑀤𑁂𑀯𑁂𑀲𑀼, 𑀅𑀯𑀲𑀺𑀁 𑀢𑀢𑁆𑀣𑀳𑀁 𑀧𑀼𑀭𑁂.

𑁧𑁪. ‘‘𑀏𑀓𑀢𑁆𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀲𑀜𑁆𑀜𑀫𑀮𑀪𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀲𑀘𑁆𑀘𑀲𑀜𑁆𑀜𑀸𑀬𑀺𑀤𑀁 𑀨𑀮𑀁.

𑁧𑁫. ‘‘𑀙𑀩𑁆𑀩𑀻𑀲𑀫𑁆𑀳𑀺 𑀇𑀢𑁄 𑀓𑀧𑁆𑀧𑁂, 𑀏𑀓𑁄 𑀆𑀲𑀺𑀁 𑀚𑀦𑀸𑀥𑀺𑀧𑁄;

𑀏𑀓𑀨𑀼𑀲𑀺𑀢𑀦𑀸𑀫𑁂𑀦, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁧𑁬. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀘𑁆𑀘𑀲𑀜𑁆𑀜𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀘𑁆𑀘𑀲𑀜𑁆𑀜𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀢𑀢𑀺𑀬𑀁.

𑁪. 𑀏𑀓𑀲𑀜𑁆𑀜𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁭. ‘‘𑀤𑀼𑀫𑀕𑁆𑀕𑁂 𑀧𑀁𑀲𑀼𑀓𑀽𑀮𑀺𑀓𑀁 [𑀧𑀁𑀲𑀼𑀓𑀽𑀮𑀓𑀁 (?)], 𑀮𑀕𑁆𑀕𑀁 𑀤𑀺𑀲𑁆𑀯𑀸𑀦 𑀲𑀢𑁆𑀣𑀼𑀦𑁄;

𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸𑀦, 𑀧𑀁𑀲𑀼𑀓𑀽𑀮𑀁 𑀅𑀯𑀦𑁆𑀤𑀳𑀁.

𑁧𑁮. ‘‘𑀏𑀓𑀢𑁆𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀲𑀜𑁆𑀜𑀫𑀮𑀪𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁧𑁯. ‘‘𑀧𑀜𑁆𑀘𑀯𑀻𑀲𑁂 𑀇𑀢𑁄 𑀓𑀧𑁆𑀧𑁂, 𑀏𑀓𑁄 𑀆𑀲𑀺𑀁 𑀚𑀦𑀸𑀥𑀺𑀧𑁄;

𑀅𑀫𑀺𑀢𑀸𑀪𑁄𑀢𑀺 𑀦𑀸𑀫𑁂𑀦, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁨𑁦. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀏𑀓𑀲𑀜𑁆𑀜𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀏𑀓𑀲𑀜𑁆𑀜𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀘𑀢𑀼𑀢𑁆𑀣𑀁.

𑁫. 𑀭𑀁𑀲𑀺𑀲𑀜𑁆𑀜𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁧. ‘‘𑀉𑀤𑁂𑀦𑁆𑀢𑀁 𑀲𑀢𑀭𑀁𑀲𑀺𑀁𑀯, 𑀧𑀻𑀢𑀭𑀁𑀲𑀺𑀁𑀯 [𑀲𑀺𑀢𑀭𑀁𑀲𑀺𑀁 𑀯 (𑀲𑀻. 𑀲𑁆𑀬𑀸.)] 𑀪𑀸𑀡𑀼𑀫𑀁;

𑀩𑁆𑀬𑀕𑁆𑀖𑀽𑀲𑀪𑀁𑀯 𑀧𑀯𑀭𑀁, 𑀲𑀼𑀚𑀸𑀢𑀁 𑀧𑀩𑁆𑀩𑀢𑀦𑁆𑀢𑀭𑁂.

𑁨𑁨. ‘‘𑀩𑀼𑀤𑁆𑀥𑀲𑁆𑀲 𑀆𑀦𑀼𑀪𑀸𑀯𑁄 𑀲𑁄, 𑀚𑀮𑀢𑁂 𑀧𑀩𑁆𑀩𑀢𑀦𑁆𑀢𑀭𑁂;

𑀭𑀁𑀲𑁂 [𑀭𑀁𑀲𑁆𑀬𑀸 (?)] 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀓𑀧𑁆𑀧𑀁 𑀲𑀕𑁆𑀕𑀫𑁆𑀳𑀺 𑀫𑁄𑀤𑀳𑀁.

𑁨𑁩. ‘‘𑀅𑀯𑀲𑁂𑀲𑁂𑀲𑀼 𑀓𑀧𑁆𑀧𑁂𑀲𑀼, 𑀓𑀼𑀲𑀮𑀁 𑀘𑀭𑀺𑀢𑀁 𑀫𑀬𑀸;

𑀢𑁂𑀦 𑀘𑀺𑀢𑁆𑀢𑀧𑁆𑀧𑀲𑀸𑀤𑁂𑀦, 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀬𑀸𑀧𑀺 𑀘.

𑁨𑁪. ‘‘𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑁂𑀢𑁄, 𑀬𑀁 𑀲𑀜𑁆𑀜𑀫𑀮𑀪𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀲𑀜𑁆𑀜𑀸𑀬𑀺𑀤𑀁 𑀨𑀮𑀁.

𑁨𑁫. ‘‘𑀲𑀢𑁆𑀢𑀧𑀜𑁆𑀜𑀸𑀲𑀓𑀧𑁆𑀧𑀫𑁆𑀳𑀺, 𑀏𑀓𑁄 𑀆𑀲𑀺𑀁 𑀚𑀦𑀸𑀥𑀺𑀧𑁄;

𑀲𑀼𑀚𑀸𑀢𑁄 𑀦𑀸𑀫 𑀦𑀸𑀫𑁂𑀦, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁨𑁬. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀭𑀁𑀲𑀺𑀲𑀜𑁆𑀜𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀭𑀁𑀲𑀺𑀲𑀜𑁆𑀜𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀜𑁆𑀘𑀫𑀁.

𑁬. 𑀲𑀦𑁆𑀥𑀺𑀢𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁭. ‘‘𑀅𑀲𑁆𑀲𑀢𑁆𑀣𑁂 𑀳𑀭𑀺𑀢𑁄𑀪𑀸𑀲𑁂, 𑀲𑀁𑀯𑀺𑀭𑀽𑀴𑁆𑀳𑀫𑁆𑀳𑀺 𑀧𑀸𑀤𑀧𑁂;

𑀏𑀓𑀁 𑀩𑀼𑀤𑁆𑀥𑀕𑀢𑀁 𑀲𑀜𑁆𑀜𑀁, 𑀅𑀮𑀪𑀺𑀁𑀳𑀁 [𑀅𑀮𑀪𑀺𑀲𑁆𑀲𑀁 (𑀲𑀻.)] 𑀧𑀢𑀺𑀲𑁆𑀲𑀢𑁄.

𑁨𑁮. ‘‘𑀏𑀓𑀢𑁆𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀲𑀜𑁆𑀜𑀫𑀮𑀪𑀺𑀁 𑀢𑀤𑀸;

𑀢𑀲𑁆𑀲𑀸 𑀲𑀜𑁆𑀜𑀸𑀬 𑀯𑀸𑀳𑀲𑀸, 𑀧𑀢𑁆𑀢𑁄 𑀫𑁂 𑀆𑀲𑀯𑀓𑁆𑀔𑀬𑁄.

𑁨𑁯. ‘‘𑀇𑀢𑁄 𑀢𑁂𑀭𑀲𑀓𑀧𑁆𑀧𑀫𑁆𑀳𑀺, 𑀥𑀦𑀺𑀝𑁆𑀞𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁩𑁦. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀦𑁆𑀥𑀺𑀢𑁄 [𑀲𑀡𑁆𑀞𑀺𑀢𑁄 (𑀲𑀻.)] 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀦𑁆𑀥𑀺𑀢𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀙𑀝𑁆𑀞𑀁.

𑁭. 𑀢𑀸𑀮𑀯𑀡𑁆𑀝𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁧. ‘‘𑀢𑀸𑀮𑀯𑀡𑁆𑀝𑀁 𑀫𑀬𑀸 𑀤𑀺𑀦𑁆𑀦𑀁, 𑀢𑀺𑀲𑁆𑀲𑀲𑁆𑀲𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑁄;

𑀕𑀺𑀫𑁆𑀳𑀦𑀺𑀩𑁆𑀩𑀸𑀧𑀦𑀢𑁆𑀣𑀸𑀬, 𑀧𑀭𑀺𑀴𑀸𑀳𑁄𑀧𑀲𑀦𑁆𑀢𑀺𑀬𑀸.

𑁩𑁨. ‘‘𑀲𑀦𑁆𑀦𑀺𑀩𑁆𑀩𑀸𑀧𑁂𑀫𑀺 𑀭𑀸𑀕𑀕𑁆𑀕𑀺𑀁, 𑀤𑁄𑀲𑀕𑁆𑀕𑀺𑀜𑁆𑀘 𑀢𑀤𑀼𑀢𑁆𑀢𑀭𑀺𑀁;

𑀦𑀺𑀩𑁆𑀩𑀸𑀧𑁂𑀫𑀺 𑀘 𑀫𑁄𑀳𑀕𑁆𑀕𑀺𑀁, 𑀢𑀸𑀮𑀯𑀡𑁆𑀝𑀲𑁆𑀲𑀺𑀤𑀁 𑀨𑀮𑀁.

𑁩𑁩. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸;

𑀥𑀸𑀭𑁂𑀫𑀺 𑀅𑀦𑁆𑀢𑀺𑀫𑀁 𑀤𑁂𑀳𑀁, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀲𑀦𑁂.

𑁩𑁪. ‘‘𑀤𑁆𑀯𑁂𑀦𑀯𑀼𑀢𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀓𑀫𑁆𑀫𑀫𑀓𑀭𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀢𑀸𑀮𑀯𑀡𑁆𑀝𑀲𑁆𑀲𑀺𑀤𑀁 𑀨𑀮𑀁.

𑁩𑁫. ‘‘𑀢𑁂𑀲𑀝𑁆𑀞𑀺𑀫𑁆𑀳𑀺 𑀇𑀢𑁄 𑀓𑀧𑁆𑀧𑁂, 𑀫𑀳𑀸𑀦𑀸𑀫𑀲𑀦𑀸𑀫𑀓𑁄;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁩𑁬. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀢𑀸𑀮𑀯𑀡𑁆𑀝𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀢𑀸𑀮𑀯𑀡𑁆𑀝𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀲𑀢𑁆𑀢𑀫𑀁.

𑁮. 𑀅𑀓𑁆𑀓𑀦𑁆𑀢𑀲𑀜𑁆𑀜𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁭. ‘‘𑀓𑀼𑀲𑀸𑀝𑀓𑀁 𑀕𑀳𑁂𑀢𑁆𑀯𑀸𑀦, 𑀉𑀧𑀚𑁆𑀛𑀸𑀬𑀲𑁆𑀲𑀳𑀁 𑀧𑀼𑀭𑁂;

𑀫𑀦𑁆𑀢𑀜𑁆𑀘 𑀅𑀦𑀼𑀲𑀺𑀓𑁆𑀔𑀸𑀫𑀺, 𑀕𑀦𑁆𑀣𑀸𑀤𑁄𑀲𑀲𑁆𑀲 [𑀓𑀡𑁆𑀟𑀪𑁂𑀤𑀲𑁆𑀲 (𑀲𑀻.), 𑀕𑀡𑁆𑀟𑀪𑁂𑀤𑀲𑁆𑀲 (𑀲𑁆𑀬𑀸.)] 𑀧𑀢𑁆𑀢𑀺𑀬𑀸.

𑁩𑁮. ‘‘𑀅𑀤𑁆𑀤𑀲𑀁 𑀯𑀺𑀭𑀚𑀁 𑀩𑀼𑀤𑁆𑀥𑀁, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑀁;

𑀉𑀲𑀪𑀁 𑀧𑀯𑀭𑀁 𑀅𑀕𑁆𑀕𑀁, 𑀢𑀺𑀲𑁆𑀲𑀁 𑀩𑀼𑀤𑁆𑀥𑀁 𑀕𑀡𑀼𑀢𑁆𑀢𑀫𑀁 [𑀕𑀚𑀼𑀢𑁆𑀢𑀫𑀁 (𑀲𑁆𑀬𑀸.)].

𑁩𑁯. ‘‘𑀓𑀼𑀲𑀸𑀝𑀓𑀁 𑀧𑀢𑁆𑀣𑀭𑀺𑀢𑀁, 𑀅𑀓𑁆𑀓𑀫𑀦𑁆𑀢𑀁 𑀦𑀭𑀼𑀢𑁆𑀢𑀫𑀁;

𑀲𑀫𑀼𑀕𑁆𑀕𑀢𑀁 𑀫𑀳𑀸𑀯𑀻𑀭𑀁, 𑀮𑁄𑀓𑀚𑁂𑀝𑁆𑀞𑀁 𑀦𑀭𑀸𑀲𑀪𑀁.

𑁪𑁦. ‘‘𑀤𑀺𑀲𑁆𑀯𑀸 𑀢𑀁 𑀮𑁄𑀓𑀧𑀚𑁆𑀚𑁄𑀢𑀁, 𑀯𑀺𑀫𑀮𑀁 𑀘𑀦𑁆𑀤𑀲𑀦𑁆𑀦𑀺𑀪𑀁;

𑀅𑀯𑀦𑁆𑀤𑀺𑀁 𑀲𑀢𑁆𑀣𑀼𑀦𑁄 𑀧𑀸𑀤𑁂, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸.

𑁪𑁧. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀅𑀤𑀸𑀲𑀺𑀁 𑀓𑀼𑀲𑀸𑀝𑀓𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀓𑀼𑀲𑀸𑀝𑀓𑀲𑁆𑀲𑀺𑀤𑀁 𑀨𑀮𑀁.

𑁪𑁨. ‘‘𑀲𑀢𑁆𑀢𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀏𑀓𑁄 𑀆𑀲𑀺𑀁 𑀚𑀦𑀸𑀥𑀺𑀧𑁄;

𑀲𑀼𑀦𑀦𑁆𑀤𑁄 𑀦𑀸𑀫 𑀦𑀸𑀫𑁂𑀦, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁪𑁩. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀅𑀓𑁆𑀓𑀦𑁆𑀢𑀲𑀜𑁆𑀜𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺;

𑀅𑀓𑁆𑀓𑀦𑁆𑀢𑀲𑀜𑁆𑀜𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀅𑀝𑁆𑀞𑀫𑀁.

𑁯. 𑀲𑀧𑁆𑀧𑀺𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁪𑁪. ‘‘𑀦𑀺𑀲𑀺𑀦𑁆𑀦𑁄 𑀧𑀸𑀲𑀸𑀤𑀯𑀭𑁂, 𑀦𑀸𑀭𑀻𑀕𑀡𑀧𑀼𑀭𑀓𑁆𑀔𑀢𑁄;

𑀩𑁆𑀬𑀸𑀥𑀺𑀢𑀁 𑀲𑀫𑀡𑀁 𑀤𑀺𑀲𑁆𑀯𑀸, 𑀅𑀪𑀺𑀦𑀸𑀫𑁂𑀲𑀳𑀁 𑀖𑀭𑀁.

𑁪𑁫. ‘‘𑀉𑀧𑀯𑀺𑀝𑁆𑀞𑀁 𑀫𑀳𑀸𑀯𑀻𑀭𑀁, 𑀤𑁂𑀯𑀤𑁂𑀯𑀁 𑀦𑀭𑀸𑀲𑀪𑀁;

𑀲𑀧𑁆𑀧𑀺𑀢𑁂𑀮𑀁 𑀫𑀬𑀸 𑀤𑀺𑀦𑁆𑀦𑀁, 𑀲𑀺𑀤𑁆𑀥𑀢𑁆𑀣𑀲𑁆𑀲 𑀫𑀳𑁂𑀲𑀺𑀦𑁄.

𑁪𑁬. ‘‘𑀧𑀲𑁆𑀲𑀤𑁆𑀥𑀤𑀭𑀣𑀁 𑀤𑀺𑀲𑁆𑀯𑀸, 𑀯𑀺𑀧𑁆𑀧𑀲𑀦𑁆𑀦𑀫𑀼𑀔𑀺𑀦𑁆𑀤𑁆𑀭𑀺𑀬𑀁;

𑀯𑀦𑁆𑀤𑀺𑀢𑁆𑀯𑀸 𑀲𑀢𑁆𑀣𑀼𑀦𑁄 𑀧𑀸𑀤𑁂, 𑀅𑀦𑀼𑀲𑀁𑀲𑀸𑀯𑀬𑀺𑀁 𑀧𑀼𑀭𑁂.

𑁪𑁭. ‘‘𑀤𑀺𑀲𑁆𑀯𑀸 𑀫𑀁 𑀲𑀼𑀧𑁆𑀧𑀲𑀦𑁆𑀦𑀢𑁆𑀢𑀁 [𑀲𑀼𑀧𑁆𑀧𑀲𑀦𑁆𑀦𑀦𑁆𑀢𑀁 (𑀲𑁆𑀬𑀸. 𑀓.) 𑀲𑀼𑀧𑁆𑀧𑀲𑀦𑁆𑀦𑀘𑀺𑀢𑁆𑀢𑀦𑁆𑀢𑀺 𑀅𑀢𑁆𑀣𑁄], 𑀇𑀤𑁆𑀥𑀺𑀬𑀸 𑀧𑀸𑀭𑀫𑀺𑀗𑁆𑀕𑀢𑁄;

𑀦𑀪𑀁 𑀅𑀩𑁆𑀪𑀼𑀕𑁆𑀕𑀫𑀻 𑀥𑀻𑀭𑁄, 𑀳𑀁𑀲𑀭𑀸𑀚𑀸𑀯 𑀅𑀫𑁆𑀩𑀭𑁂.

𑁪𑁮. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀤𑀸𑀦𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀲𑀧𑁆𑀧𑀺𑀢𑁂𑀮𑀲𑁆𑀲𑀺𑀤𑀁 𑀨𑀮𑀁.

𑁪𑁯. ‘‘𑀇𑀢𑁄 𑀲𑀢𑁆𑀢𑀭𑀲𑁂 𑀓𑀧𑁆𑀧𑁂, 𑀚𑀼𑀢𑀺𑀤𑁂𑀯 [𑀤𑀼𑀢𑀺𑀤𑁂𑀯 (𑀲𑁆𑀬𑀸.), 𑀢𑀼𑀢𑀺𑀤𑁂𑀯 (𑀓.)] 𑀲𑀦𑀸𑀫𑀓𑁄;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁫𑁦. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀧𑁆𑀧𑀺𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀧𑁆𑀧𑀺𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀦𑀯𑀫𑀁.

𑁧𑁦. 𑀧𑀸𑀧𑀦𑀺𑀯𑀸𑀭𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁫𑁧. ‘‘𑀧𑀺𑀬𑀤𑀲𑁆𑀲𑀺𑀲𑁆𑀲 𑀪𑀕𑀯𑀢𑁄, 𑀘𑀗𑁆𑀓𑀫𑀁 𑀲𑁄𑀥𑀺𑀢𑀁 𑀫𑀬𑀸;

𑀦𑀴𑀓𑁂𑀳𑀺 𑀧𑀝𑀺𑀘𑁆𑀙𑀦𑁆𑀦𑀁, 𑀯𑀸𑀢𑀸𑀢𑀧𑀦𑀺𑀯𑀸𑀭𑀡𑀁.

𑁫𑁨. ‘‘𑀧𑀸𑀧𑀁 𑀯𑀺𑀯𑀚𑁆𑀚𑀦𑀢𑁆𑀣𑀸𑀬, 𑀓𑀼𑀲𑀮𑀲𑁆𑀲𑀼𑀧𑀲𑀫𑁆𑀧𑀤𑀸;

𑀓𑀺𑀮𑁂𑀲𑀸𑀦𑀁 𑀧𑀳𑀸𑀦𑀸𑀬, 𑀧𑀤𑀳𑀺𑀁 𑀲𑀢𑁆𑀣𑀼 𑀲𑀸𑀲𑀦𑁂.

𑁫𑁩. ‘‘𑀇𑀢𑁄 𑀏𑀓𑀸𑀤𑀲𑁂 𑀓𑀧𑁆𑀧𑁂, 𑀅𑀕𑁆𑀕𑀺𑀤𑁂𑀯𑁄𑀢𑀺 𑀯𑀺𑀲𑁆𑀲𑀼𑀢𑁄;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁫𑁪. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀸𑀧𑀦𑀺𑀯𑀸𑀭𑀺𑀬𑁄 [𑀯𑀸𑀢𑀸𑀢𑀧𑀦𑀺𑀯𑀸𑀭𑀺𑀬𑁄 (?)] 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀸𑀧𑀦𑀺𑀯𑀸𑀭𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀲𑀫𑀁.

𑀳𑀢𑁆𑀣𑀺𑀯𑀕𑁆𑀕𑁄 𑀩𑀸𑀯𑀻𑀲𑀢𑀺𑀫𑁄.