𑁫. 𑀅𑀩𑁆𑀬𑀸𑀥𑀺𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁪. ‘‘𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄, 𑀅𑀕𑁆𑀕𑀺𑀲𑀸𑀮𑀁 𑀅𑀤𑀸𑀲𑀳𑀁;

𑀩𑁆𑀬𑀸𑀥𑀺𑀓𑀸𑀦𑀜𑁆𑀘 𑀆𑀯𑀸𑀲𑀁, 𑀉𑀡𑁆𑀳𑁄𑀤𑀓𑀧𑀝𑀺𑀕𑁆𑀕𑀳𑀁.

𑁨𑁫. ‘‘𑀢𑁂𑀦 𑀓𑀫𑁆𑀫𑁂𑀦𑀬𑀁 𑀫𑀬𑁆𑀳𑀁, 𑀅𑀢𑁆𑀢𑀪𑀸𑀯𑁄 𑀲𑀼𑀦𑀺𑀫𑁆𑀫𑀺𑀢𑁄;

𑀩𑁆𑀬𑀸𑀥𑀸𑀳𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀧𑀼𑀜𑁆𑀜𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁.

𑁨𑁬. ‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀲𑀸𑀮𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀅𑀕𑁆𑀕𑀺𑀲𑀸𑀮𑀸𑀬𑀺𑀤𑀁 𑀨𑀮𑀁.

𑁨𑁭. ‘‘𑀇𑀢𑁄 𑀘 𑀲𑀢𑁆𑀢𑀫𑁂 𑀓𑀧𑁆𑀧𑁂, 𑀏𑀓𑁄𑀲𑀺𑀁 𑀅𑀧𑀭𑀸𑀚𑀺𑀢𑁄 [𑀏𑀓𑁄 𑀆𑀲𑀺𑀁 𑀦𑀭𑀸𑀥𑀺𑀧𑁄 (𑀲𑁆𑀬𑀸.)];

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁨𑁮. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀅𑀩𑁆𑀬𑀸𑀥𑀺𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀅𑀩𑁆𑀬𑀸𑀥𑀺𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀜𑁆𑀘𑀫𑀁.