𑁨. 𑀲𑀻𑀳𑀸𑀲𑀦𑀺𑀬𑀯𑀕𑁆𑀕𑁄

𑁧. 𑀲𑀻𑀳𑀸𑀲𑀦𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧. ‘‘𑀦𑀺𑀩𑁆𑀩𑀼𑀢𑁂 𑀮𑁄𑀓𑀦𑀸𑀣𑀫𑁆𑀳𑀺, 𑀲𑀺𑀤𑁆𑀥𑀢𑁆𑀣𑁂 𑀤𑁆𑀯𑀺𑀧𑀤𑀼𑀢𑁆𑀢𑀫𑁂 [𑀤𑀺𑀧𑀤𑀼𑀢𑁆𑀢𑀫𑁂 (𑀲𑀻. 𑀲𑁆𑀬𑀸.)];

𑀯𑀺𑀢𑁆𑀣𑀸𑀭𑀺𑀓𑁂 𑀧𑀸𑀯𑀘𑀦𑁂, 𑀩𑀸𑀳𑀼𑀚𑀜𑁆𑀜𑀫𑁆𑀳𑀺 𑀲𑀸𑀲𑀦𑁂.

𑁨. ‘‘𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀲𑀻𑀳𑀸𑀲𑀦𑀫𑀓𑀸𑀲𑀳𑀁;

𑀲𑀻𑀳𑀸𑀲𑀦𑀁 𑀓𑀭𑀺𑀢𑁆𑀯𑀸𑀦, 𑀧𑀸𑀤𑀧𑀻𑀞𑀫𑀓𑀸𑀲𑀳𑀁.

𑁩. ‘‘𑀲𑀻𑀳𑀸𑀲𑀦𑁂 𑀘 𑀯𑀲𑁆𑀲𑀦𑁆𑀢𑁂, 𑀖𑀭𑀁 𑀢𑀢𑁆𑀣 𑀅𑀓𑀸𑀲𑀳𑀁;

𑀢𑁂𑀦 𑀘𑀺𑀢𑁆𑀢𑀧𑁆𑀧𑀲𑀸𑀤𑁂𑀦, 𑀢𑀼𑀲𑀺𑀢𑀁 𑀉𑀧𑀧𑀚𑁆𑀚𑀳𑀁.

𑁪. ‘‘𑀆𑀬𑀸𑀫𑁂𑀦 𑀘𑀢𑀼𑀩𑁆𑀩𑀻𑀲, 𑀬𑁄𑀚𑀦𑀁 𑀆𑀲𑀺 [𑀬𑁄𑀚𑀦𑀸𑀲𑀺𑀁𑀲𑀼 (𑀲𑁆𑀬𑀸. 𑀓.)] 𑀢𑀸𑀯𑀤𑁂;

𑀯𑀺𑀫𑀸𑀦𑀁 𑀲𑀼𑀓𑀢𑀁 𑀫𑀬𑁆𑀳𑀁, 𑀯𑀺𑀢𑁆𑀣𑀸𑀭𑁂𑀦 𑀘𑀢𑀼𑀤𑁆𑀤𑀲.

𑁫. ‘‘𑀲𑀢𑀁 [𑀲𑀢𑁆𑀢 (𑀲𑁆𑀬𑀸.)] 𑀓𑀜𑁆𑀜𑀸𑀲𑀳𑀲𑁆𑀲𑀸𑀦𑀺, 𑀧𑀭𑀺𑀯𑀸𑀭𑁂𑀦𑁆𑀢𑀺 𑀫𑀁 𑀲𑀤𑀸;

𑀲𑁄𑀡𑁆𑀡𑀫𑀬𑀜𑁆𑀘 𑀧𑀮𑁆𑀮𑀗𑁆𑀓𑀁, 𑀩𑁆𑀬𑀫𑁆𑀳𑁂 𑀆𑀲𑀺 𑀲𑀼𑀦𑀺𑀫𑁆𑀫𑀺𑀢𑀁.

𑁬. ‘‘𑀳𑀢𑁆𑀣𑀺𑀬𑀸𑀦𑀁 𑀅𑀲𑁆𑀲𑀬𑀸𑀦𑀁, 𑀤𑀺𑀩𑁆𑀩𑀬𑀸𑀦𑀁 𑀉𑀧𑀝𑁆𑀞𑀺𑀢𑀁;

𑀧𑀸𑀲𑀸𑀤𑀸 𑀲𑀺𑀯𑀺𑀓𑀸 𑀘𑁂𑀯, 𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀬𑀤𑀺𑀘𑁆𑀙𑀓𑀁.

𑁭. ‘‘𑀫𑀡𑀺𑀫𑀬𑀸 𑀘 𑀧𑀮𑁆𑀮𑀗𑁆𑀓𑀸, 𑀅𑀜𑁆𑀜𑁂 𑀲𑀸𑀭𑀫𑀬𑀸 𑀩𑀳𑀽;

𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀫𑀫𑀁 𑀲𑀩𑁆𑀩𑁂, 𑀲𑀻𑀳𑀸𑀲𑀦𑀲𑁆𑀲𑀺𑀤𑀁 𑀨𑀮𑀁.

𑁮. ‘‘𑀲𑁄𑀡𑁆𑀡𑀫𑀬𑀸 𑀭𑀽𑀧𑀺𑀫𑀬𑀸, 𑀨𑀮𑀺𑀓𑀸𑀯𑁂𑀴𑀼𑀭𑀺𑀬𑀸𑀫𑀬𑀸;

𑀧𑀸𑀤𑀼𑀓𑀸 𑀅𑀪𑀺𑀭𑀽𑀳𑀸𑀫𑀺, 𑀧𑀸𑀤𑀧𑀻𑀞𑀲𑁆𑀲𑀺𑀤𑀁 𑀨𑀮𑀁.

𑁯. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 [𑀘𑀢𑀼𑀦𑀯𑀼𑀢𑁂 𑀇𑀢𑁄 (𑀲𑀻. 𑀲𑁆𑀬𑀸.)] 𑀓𑀧𑁆𑀧𑁂, 𑀬𑀁 𑀓𑀫𑁆𑀫𑀫𑀓𑀭𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀧𑀼𑀜𑁆𑀜𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁.

𑁧𑁦. ‘‘𑀢𑁂𑀲𑀢𑁆𑀢𑀢𑀺𑀫𑁆𑀳𑀺𑀢𑁄 𑀓𑀧𑁆𑀧𑁂, 𑀇𑀦𑁆𑀤𑀦𑀸𑀫𑀸 𑀢𑀬𑁄 𑀚𑀦𑀸;

𑀤𑁆𑀯𑁂𑀲𑀢𑁆𑀢𑀢𑀺𑀫𑁆𑀳𑀺𑀢𑁄 𑀓𑀧𑁆𑀧𑁂, 𑀢𑀬𑁄 𑀲𑀼𑀫𑀦𑀦𑀸𑀫𑀓𑀸.

𑁧𑁧. ‘‘𑀲𑀫𑀲𑀢𑁆𑀢𑀢𑀺𑀢𑁄 𑀓𑀧𑁆𑀧𑁂, 𑀢𑀬𑁄 𑀯𑀭𑀼𑀡𑀦𑀸𑀫𑀓𑀸;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑀸, 𑀘𑀢𑀼𑀤𑀻𑀧𑀫𑁆𑀳𑀺 𑀇𑀲𑁆𑀲𑀭𑀸.

𑁧𑁨. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀻𑀳𑀸𑀲𑀦𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀻𑀳𑀸𑀲𑀦𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀞𑀫𑀁.

𑁨. 𑀏𑀓𑀢𑁆𑀣𑀫𑁆𑀪𑀺𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁩. ‘‘𑀲𑀺𑀤𑁆𑀥𑀢𑁆𑀣𑀲𑁆𑀲 𑀪𑀕𑀯𑀢𑁄, 𑀫𑀳𑀸𑀧𑀽𑀕𑀕𑀡𑁄 𑀅𑀳𑀼;

𑀲𑀭𑀡𑀁 𑀕𑀢𑀸 𑀘 𑀢𑁂 𑀩𑀼𑀤𑁆𑀥𑀁, 𑀲𑀤𑁆𑀤𑀳𑀦𑁆𑀢𑀺 𑀢𑀣𑀸𑀕𑀢𑀁.

𑁧𑁪. ‘‘𑀲𑀩𑁆𑀩𑁂 𑀲𑀗𑁆𑀕𑀫𑁆𑀫 𑀫𑀦𑁆𑀢𑁂𑀢𑁆𑀯𑀸, 𑀫𑀸𑀴𑀁 𑀓𑀼𑀩𑁆𑀩𑀦𑁆𑀢𑀺 𑀲𑀢𑁆𑀣𑀼𑀦𑁄;

𑀏𑀓𑀢𑁆𑀣𑀫𑁆𑀪𑀁 𑀅𑀮𑀪𑀦𑁆𑀢𑀸, 𑀯𑀺𑀘𑀺𑀦𑀦𑁆𑀢𑀺 𑀩𑁆𑀭𑀳𑀸𑀯𑀦𑁂.

𑁧𑁫. ‘‘𑀢𑁂𑀳𑀁 𑀅𑀭𑀜𑁆𑀜𑁂 𑀤𑀺𑀲𑁆𑀯𑀸𑀦, 𑀉𑀧𑀕𑀫𑁆𑀫 𑀕𑀡𑀁 𑀢𑀤𑀸;

𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸𑀦, 𑀧𑀭𑀺𑀧𑀼𑀘𑁆𑀙𑀺𑀁 𑀕𑀡𑀁 𑀅𑀳𑀁.

𑁧𑁬. ‘‘𑀢𑁂 𑀫𑁂 𑀧𑀼𑀝𑁆𑀞𑀸 𑀯𑀺𑀬𑀸𑀓𑀁𑀲𑀼, 𑀲𑀻𑀮𑀯𑀦𑁆𑀢𑁄 𑀉𑀧𑀸𑀲𑀓𑀸;

𑀫𑀸𑀴𑀁 𑀫𑀬𑀁 𑀓𑀢𑁆𑀢𑀼𑀓𑀸𑀫𑀸, 𑀏𑀓𑀢𑁆𑀣𑀫𑁆𑀪𑁄 𑀦 𑀮𑀩𑁆𑀪𑀢𑀺.

𑁧𑁭. ‘‘𑀏𑀓𑀢𑁆𑀣𑀫𑁆𑀪𑀁 𑀫𑀫𑀁 𑀤𑁂𑀣, 𑀅𑀳𑀁 𑀤𑀲𑁆𑀲𑀸𑀫𑀺 𑀲𑀢𑁆𑀣𑀼𑀦𑁄;

𑀆𑀳𑀭𑀺𑀲𑁆𑀲𑀸𑀫𑀳𑀁 𑀣𑀫𑁆𑀪𑀁, 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀸 𑀪𑀯𑀦𑁆𑀢𑀼 𑀢𑁂 [𑀪𑀯𑀦𑁆𑀢𑀼 𑀯𑁄 (𑀲𑀻.), 𑀪𑀯𑀸𑀣 𑀯𑁄 (?)].

𑁧𑁮. ‘‘𑀢𑁂 𑀫𑁂 𑀣𑀫𑁆𑀪𑀁 𑀧𑀯𑁂𑀘𑁆𑀙𑀺𑀁𑀲𑀼, 𑀧𑀲𑀦𑁆𑀦𑀸 𑀢𑀼𑀝𑁆𑀞𑀫𑀸𑀦𑀲𑀸;

𑀢𑀢𑁄 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸, 𑀅𑀕𑀫𑀁𑀲𑀼 𑀲𑀓𑀁 𑀖𑀭𑀁.

𑁧𑁯. ‘‘𑀅𑀘𑀺𑀭𑀁 𑀕𑀢𑁂 𑀧𑀽𑀕𑀕𑀡𑁂, 𑀣𑀫𑁆𑀪𑀁 𑀅𑀳𑀸𑀲𑀳𑀁 𑀢𑀤𑀸;

𑀳𑀝𑁆𑀞𑁄 𑀳𑀝𑁆𑀞𑁂𑀦 𑀘𑀺𑀢𑁆𑀢𑁂𑀦, 𑀧𑀞𑀫𑀁 𑀉𑀲𑁆𑀲𑀧𑁂𑀲𑀳𑀁.

𑁨𑁦. ‘‘𑀢𑁂𑀦 𑀘𑀺𑀢𑁆𑀢𑀧𑁆𑀧𑀲𑀸𑀤𑁂𑀦, 𑀯𑀺𑀫𑀸𑀦𑀁 𑀉𑀧𑀧𑀚𑁆𑀚𑀳𑀁;

𑀉𑀩𑁆𑀩𑀺𑀤𑁆𑀥𑀁 𑀪𑀯𑀦𑀁 𑀫𑀬𑁆𑀳𑀁, 𑀲𑀢𑁆𑀢𑀪𑀽𑀫𑀁 [𑀲𑀢𑀪𑀽𑀫𑀁 (𑀲𑀻. 𑀓.)] 𑀲𑀫𑀼𑀕𑁆𑀕𑀢𑀁.

𑁨𑁧. ‘‘𑀯𑀚𑁆𑀚𑀫𑀸𑀦𑀸𑀲𑀼 𑀪𑁂𑀭𑀻𑀲𑀼, 𑀧𑀭𑀺𑀘𑀸𑀭𑁂𑀫𑀳𑀁 𑀲𑀤𑀸;

𑀧𑀜𑁆𑀘𑀧𑀜𑁆𑀜𑀸𑀲𑀓𑀧𑁆𑀧𑀫𑁆𑀳𑀺, 𑀭𑀸𑀚𑀸 𑀆𑀲𑀺𑀁 𑀬𑀲𑁄𑀥𑀭𑁄.

𑁨𑁨. ‘‘𑀢𑀢𑁆𑀣𑀸𑀧𑀺 𑀪𑀯𑀦𑀁 𑀫𑀬𑁆𑀳𑀁, 𑀲𑀢𑁆𑀢𑀪𑀽𑀫𑀁 𑀲𑀫𑀼𑀕𑁆𑀕𑀢𑀁;

𑀓𑀽𑀝𑀸𑀕𑀸𑀭𑀯𑀭𑀽𑀧𑁂𑀢𑀁, 𑀏𑀓𑀢𑁆𑀣𑀫𑁆𑀪𑀁 𑀫𑀦𑁄𑀭𑀫𑀁.

𑁨𑁩. ‘‘𑀏𑀓𑀯𑀻𑀲𑀢𑀺𑀓𑀧𑁆𑀧𑀫𑁆𑀳𑀺, 𑀉𑀤𑁂𑀦𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀢𑀢𑁆𑀭𑀸𑀧𑀺 𑀪𑀯𑀦𑀁 𑀫𑀬𑁆𑀳𑀁, 𑀲𑀢𑁆𑀢𑀪𑀽𑀫𑀁 𑀲𑀫𑀼𑀕𑁆𑀕𑀢𑀁.

𑁨𑁪. ‘‘𑀬𑀁 𑀬𑀁 𑀬𑁄𑀦𑀼𑀧𑀧𑀚𑁆𑀚𑀸𑀫𑀺, 𑀤𑁂𑀯𑀢𑁆𑀢𑀁 𑀅𑀣 𑀫𑀸𑀦𑀼𑀲𑀁;

𑀅𑀦𑀼𑀪𑁄𑀫𑀺 𑀲𑀼𑀔𑀁 𑀲𑀩𑁆𑀩𑀁 [𑀲𑀩𑁆𑀩𑀫𑁂𑀢𑀁 (𑀲𑁆𑀬𑀸.)], 𑀏𑀓𑀢𑁆𑀣𑀫𑁆𑀪𑀲𑁆𑀲𑀺𑀤𑀁 𑀨𑀮𑀁.

𑁨𑁫. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀣𑀫𑁆𑀪𑀫𑀤𑀤𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀏𑀓𑀢𑁆𑀣𑀫𑁆𑀪𑀲𑁆𑀲𑀺𑀤𑀁 𑀨𑀮𑀁.

𑁨𑁬. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀏𑀓𑀢𑁆𑀣𑀫𑁆𑀪𑀺𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀏𑀓𑀢𑁆𑀣𑀫𑁆𑀪𑀺𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀼𑀢𑀺𑀬𑀁.

𑁩. 𑀦𑀦𑁆𑀤𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁭. ‘‘𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄, 𑀮𑁄𑀓𑀚𑁂𑀝𑁆𑀞𑀲𑁆𑀲 𑀢𑀸𑀤𑀺𑀦𑁄;

𑀯𑀢𑁆𑀣𑀁 𑀔𑁄𑀫𑀁 𑀫𑀬𑀸 𑀤𑀺𑀦𑁆𑀦𑀁, 𑀲𑀬𑀫𑁆𑀪𑀼𑀲𑁆𑀲 𑀫𑀳𑁂𑀲𑀺𑀦𑁄.

𑁨𑁮. ‘‘𑀢𑀁 𑀫𑁂 𑀩𑀼𑀤𑁆𑀥𑁄 𑀯𑀺𑀬𑀸𑀓𑀸𑀲𑀺, 𑀚𑀮𑀚𑀼𑀢𑁆𑀢𑀭𑀦𑀸𑀫𑀓𑁄;

‘𑀇𑀫𑀺𑀦𑀸 𑀯𑀢𑁆𑀣𑀤𑀸𑀦𑁂𑀦, 𑀳𑁂𑀫𑀯𑀡𑁆𑀡𑁄 𑀪𑀯𑀺𑀲𑁆𑀲𑀲𑀺.

𑁨𑁯. ‘‘‘𑀤𑁆𑀯𑁂 𑀲𑀫𑁆𑀧𑀢𑁆𑀢𑀻 𑀅𑀦𑀼𑀪𑁄𑀢𑁆𑀯𑀸, 𑀓𑀼𑀲𑀮𑀫𑀽𑀮𑁂𑀳𑀺 𑀘𑁄𑀤𑀺𑀢𑁄;

𑀕𑁄𑀢𑀫𑀲𑁆𑀲 𑀪𑀕𑀯𑀢𑁄, 𑀓𑀦𑀺𑀝𑁆𑀞𑁄 𑀢𑁆𑀯𑀁 𑀪𑀯𑀺𑀲𑁆𑀲𑀲𑀺.

𑁩𑁦. ‘‘‘𑀭𑀸𑀕𑀭𑀢𑁆𑀢𑁄 𑀲𑀼𑀔𑀲𑀻𑀮𑁄, 𑀓𑀸𑀫𑁂𑀲𑀼 𑀕𑁂𑀥𑀫𑀸𑀬𑀼𑀢𑁄;

𑀩𑀼𑀤𑁆𑀥𑁂𑀦 𑀘𑁄𑀤𑀺𑀢𑁄 𑀲𑀦𑁆𑀢𑁄, 𑀢𑀤𑀸 [𑀢𑀢𑁄 (𑀲𑁆𑀬𑀸.)] 𑀢𑁆𑀯𑀁 𑀧𑀩𑁆𑀩𑀚𑀺𑀲𑁆𑀲𑀲𑀺.

𑁩𑁧. ‘‘‘𑀧𑀩𑁆𑀩𑀚𑀺𑀢𑁆𑀯𑀸𑀦 𑀢𑁆𑀯𑀁 𑀢𑀢𑁆𑀣, 𑀓𑀼𑀲𑀮𑀫𑀽𑀮𑁂𑀦 𑀘𑁄𑀤𑀺𑀢𑁄;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀦𑀺𑀩𑁆𑀩𑀸𑀬𑀺𑀲𑁆𑀲𑀲𑀺𑀦𑀸𑀲𑀯𑁄’.

𑁩𑁨. ‘‘𑀲𑀢𑁆𑀢 [𑀲𑀢 (𑀲𑁆𑀬𑀸.)] 𑀓𑀧𑁆𑀧𑀲𑀳𑀲𑁆𑀲𑀫𑁆𑀳𑀺, 𑀘𑀢𑀼𑀭𑁄 𑀘𑁂𑀴𑀦𑀸𑀫𑀓𑀸;

𑀲𑀝𑁆𑀞𑀺 𑀓𑀧𑁆𑀧𑀲𑀳𑀲𑁆𑀲𑀫𑁆𑀳𑀺, 𑀉𑀧𑀘𑁂𑀮𑀸 𑀘𑀢𑀼𑀚𑁆𑀚𑀦𑀸.

𑁩𑁩. ‘‘𑀧𑀜𑁆𑀘 𑀓𑀧𑁆𑀧𑀲𑀳𑀲𑁆𑀲𑀫𑁆𑀳𑀺, 𑀘𑁂𑀴𑀸𑀯 𑀘𑀢𑀼𑀭𑁄 𑀚𑀦𑀸;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑀸, 𑀘𑀢𑀼𑀤𑀻𑀧𑀫𑁆𑀳𑀺 𑀇𑀲𑁆𑀲𑀭𑀸.

𑁩𑁪. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀦𑀦𑁆𑀤𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀦𑀦𑁆𑀤𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀢𑀢𑀺𑀬𑀁.

𑁪. 𑀘𑀽𑀴𑀧𑀦𑁆𑀣𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁫. ‘‘𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄;

𑀕𑀡𑀫𑁆𑀳𑀸 𑀯𑀽𑀧𑀓𑀝𑁆𑀞𑁄 𑀲𑁄, 𑀳𑀺𑀫𑀯𑀦𑁆𑀢𑁂 𑀯𑀲𑀻 𑀢𑀤𑀸.

𑁩𑁬. ‘‘𑀅𑀳𑀫𑁆𑀧𑀺 𑀳𑀺𑀫𑀯𑀦𑁆𑀢𑀫𑁆𑀳𑀺, 𑀯𑀲𑀸𑀫𑀺 𑀅𑀲𑁆𑀲𑀫𑁂 𑀢𑀤𑀸;

𑀅𑀘𑀺𑀭𑀸𑀕𑀢𑀁 𑀫𑀳𑀸𑀯𑀻𑀭𑀁, 𑀉𑀧𑁂𑀲𑀺𑀁 𑀮𑁄𑀓𑀦𑀸𑀬𑀓𑀁.

𑁩𑁭. ‘‘𑀧𑀼𑀧𑁆𑀨𑀘𑁆𑀙𑀢𑁆𑀢𑀁 𑀕𑀳𑁂𑀢𑁆𑀯𑀸𑀦, 𑀉𑀧𑀕𑀘𑁆𑀙𑀺𑀁 𑀦𑀭𑀸𑀲𑀪𑀁;

𑀲𑀫𑀸𑀥𑀺𑀁 𑀲𑀫𑀸𑀧𑀚𑁆𑀚𑀦𑁆𑀢𑀁, 𑀅𑀦𑁆𑀢𑀭𑀸𑀬𑀫𑀓𑀸𑀲𑀳𑀁.

𑁩𑁮. ‘‘𑀉𑀪𑁄 𑀳𑀢𑁆𑀣𑁂𑀳𑀺 𑀧𑀕𑁆𑀕𑀬𑁆𑀳, 𑀧𑀼𑀧𑁆𑀨𑀘𑁆𑀙𑀢𑁆𑀢𑀁 𑀅𑀤𑀸𑀲𑀳𑀁;

𑀧𑀝𑀺𑀕𑁆𑀕𑀳𑁂𑀲𑀺 𑀪𑀕𑀯𑀸, 𑀧𑀤𑀼𑀫𑀼𑀢𑁆𑀢𑀭𑁄 𑀫𑀳𑀸𑀫𑀼𑀦𑀺.

𑁩𑁯. ‘‘𑀲𑀩𑁆𑀩𑁂 𑀤𑁂𑀯𑀸 𑀅𑀢𑁆𑀢𑀫𑀦𑀸, 𑀳𑀺𑀫𑀯𑀦𑁆𑀢𑀁 𑀉𑀧𑁂𑀦𑁆𑀢𑀺 𑀢𑁂;

𑀲𑀸𑀥𑀼𑀓𑀸𑀭𑀁 𑀧𑀯𑀢𑁆𑀢𑁂𑀲𑀼𑀁, 𑀅𑀦𑀼𑀫𑁄𑀤𑀺𑀲𑁆𑀲𑀢𑀺 𑀘𑀓𑁆𑀔𑀼𑀫𑀸.

𑁪𑁦. ‘‘𑀇𑀤𑀁 𑀯𑀢𑁆𑀯𑀸𑀦 𑀢𑁂 𑀤𑁂𑀯𑀸, 𑀉𑀧𑀕𑀘𑁆𑀙𑀼𑀁 𑀦𑀭𑀼𑀢𑁆𑀢𑀫𑀁;

𑀆𑀓𑀸𑀲𑁂 𑀥𑀸𑀭𑀬𑀦𑁆𑀢𑀲𑁆𑀲 [𑀥𑀸𑀭𑀬𑀦𑁆𑀢𑀁 𑀫𑁂 (𑀓), 𑀥𑀸𑀭𑀬𑀢𑁄 𑀫𑁂 (?)], 𑀧𑀤𑀼𑀫𑀘𑁆𑀙𑀢𑁆𑀢𑀫𑀼𑀢𑁆𑀢𑀫𑀁.

𑁪𑁧. ‘‘𑀲𑀢𑀧𑀢𑁆𑀢𑀙𑀢𑁆𑀢𑀁 𑀧𑀕𑁆𑀕𑀬𑁆𑀳, 𑀅𑀤𑀸𑀲𑀺 𑀢𑀸𑀧𑀲𑁄 𑀫𑀫;

‘𑀢𑀫𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀲𑀼𑀡𑀸𑀣 𑀫𑀫 𑀪𑀸𑀲𑀢𑁄.

𑁪𑁨. ‘‘‘𑀧𑀜𑁆𑀘𑀯𑀻𑀲𑀢𑀺𑀓𑀧𑁆𑀧𑀸𑀦𑀺, 𑀤𑁂𑀯𑀭𑀚𑁆𑀚𑀁 𑀓𑀭𑀺𑀲𑁆𑀲𑀢𑀺;

𑀘𑀢𑀼𑀢𑁆𑀢𑀺𑀁𑀲𑀢𑀺𑀓𑁆𑀔𑀢𑁆𑀢𑀼𑀜𑁆𑀘, 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺.

𑁪𑁩. ‘‘‘𑀬𑀁 𑀬𑀁 𑀬𑁄𑀦𑀺𑀁 𑀲𑀁𑀲𑀭𑀢𑀺, 𑀤𑁂𑀯𑀢𑁆𑀢𑀁 𑀅𑀣 𑀫𑀸𑀦𑀼𑀲𑀁;

𑀅𑀩𑁆𑀪𑁄𑀓𑀸𑀲𑁂 𑀧𑀢𑀺𑀝𑁆𑀞𑀦𑁆𑀢𑀁, 𑀧𑀤𑀼𑀫𑀁 𑀥𑀸𑀭𑀬𑀺𑀲𑁆𑀲𑀢𑀺’.

𑁪𑁪. ‘‘𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑁆𑀳𑀺, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦 [𑀦𑀸𑀫𑁂𑀦 (𑀲𑀻. 𑀓.)], 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

𑁪𑁫. ‘‘‘𑀧𑀓𑀸𑀲𑀺𑀢𑁂 𑀧𑀸𑀯𑀘𑀦𑁂, 𑀫𑀦𑀼𑀲𑁆𑀲𑀢𑁆𑀢𑀁 𑀮𑀪𑀺𑀲𑁆𑀲𑀢𑀺;

𑀫𑀦𑁄𑀫𑀬𑀫𑁆𑀳𑀺 𑀓𑀸𑀬𑀫𑁆𑀳𑀺, 𑀉𑀢𑁆𑀢𑀫𑁄 𑀲𑁄 𑀪𑀯𑀺𑀲𑁆𑀲𑀢𑀺.

𑁪𑁬. ‘‘‘𑀤𑁆𑀯𑁂 𑀪𑀸𑀢𑀭𑁄 𑀪𑀯𑀺𑀲𑁆𑀲𑀦𑁆𑀢𑀺, 𑀉𑀪𑁄𑀧𑀺 𑀧𑀦𑁆𑀣𑀓𑀯𑁆𑀳𑀬𑀸;

𑀅𑀦𑀼𑀪𑁄𑀢𑁆𑀯𑀸 𑀉𑀢𑁆𑀢𑀫𑀢𑁆𑀣𑀁, 𑀚𑁄𑀢𑀬𑀺𑀲𑁆𑀲𑀦𑁆𑀢𑀺 𑀲𑀸𑀲𑀦𑀁’.

𑁪𑁭. ‘‘𑀲𑁄𑀳𑀁 𑀅𑀝𑁆𑀞𑀸𑀭𑀲𑀯𑀲𑁆𑀲𑁄 [𑀲𑁄 𑀅𑀝𑁆𑀞𑀸𑀭𑀲𑀯𑀲𑁆𑀲𑁄𑀳𑀁 (𑀲𑁆𑀬𑀸.)], 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁;

𑀯𑀺𑀲𑁂𑀲𑀸𑀳𑀁 𑀦 𑀯𑀺𑀦𑁆𑀤𑀸𑀫𑀺, 𑀲𑀓𑁆𑀬𑀧𑀼𑀢𑁆𑀢𑀲𑁆𑀲 𑀲𑀸𑀲𑀦𑁂.

𑁪𑁮. ‘‘𑀤𑀦𑁆𑀥𑀸 𑀫𑀬𑁆𑀳𑀁 𑀕𑀢𑀻 𑀆𑀲𑀺, 𑀧𑀭𑀺𑀪𑀽𑀢𑁄 𑀧𑀼𑀭𑁂 𑀅𑀳𑀼𑀁 [𑀅𑀳𑀁 (𑀲𑁆𑀬𑀸.)];

𑀪𑀸𑀢𑀸 𑀘 𑀫𑀁 𑀧𑀡𑀸𑀫𑁂𑀲𑀺, 𑀕𑀘𑁆𑀙 𑀤𑀸𑀦𑀺 𑀲𑀓𑀁 𑀖𑀭𑀁.

𑁪𑁯. ‘‘𑀲𑁄𑀳𑀁 𑀧𑀡𑀸𑀫𑀺𑀢𑁄 𑀲𑀦𑁆𑀢𑁄, 𑀲𑀗𑁆𑀖𑀸𑀭𑀸𑀫𑀲𑁆𑀲 𑀓𑁄𑀝𑁆𑀞𑀓𑁂;

𑀤𑀼𑀫𑁆𑀫𑀦𑁄 𑀢𑀢𑁆𑀣 𑀅𑀝𑁆𑀞𑀸𑀲𑀺𑀁, 𑀲𑀸𑀫𑀜𑁆𑀜𑀲𑁆𑀫𑀺𑀁 𑀅𑀧𑁂𑀓𑁆𑀔𑀯𑀸.

𑁫𑁦. ‘‘𑀪𑀕𑀯𑀸 𑀢𑀢𑁆𑀣 [𑀅𑀣𑁂𑀢𑁆𑀣 𑀲𑀢𑁆𑀣𑀸 (𑀲𑀻. 𑀲𑁆𑀬𑀸.)] 𑀆𑀕𑀘𑁆𑀙𑀺, 𑀲𑀻𑀲𑀁 𑀫𑀬𑁆𑀳𑀁 𑀧𑀭𑀸𑀫𑀲𑀺;

𑀩𑀸𑀳𑀸𑀬 𑀫𑀁 𑀕𑀳𑁂𑀢𑁆𑀯𑀸𑀦, 𑀲𑀗𑁆𑀖𑀸𑀭𑀸𑀫𑀁 𑀧𑀯𑁂𑀲𑀬𑀺.

𑁫𑁧. ‘‘𑀅𑀦𑀼𑀓𑀫𑁆𑀧𑀸𑀬 𑀫𑁂 𑀲𑀢𑁆𑀣𑀸, 𑀅𑀤𑀸𑀲𑀺 𑀧𑀸𑀤𑀧𑀼𑀜𑁆𑀙𑀦𑀺𑀁;

𑀏𑀯𑀁 𑀲𑀼𑀤𑁆𑀥𑀁 𑀅𑀥𑀺𑀝𑁆𑀞𑁂𑀳𑀺, 𑀏𑀓𑀫𑀦𑁆𑀢𑀫𑀥𑀺𑀝𑁆𑀞𑀳𑀁.

𑁫𑁨. ‘‘𑀳𑀢𑁆𑀣𑁂𑀳𑀺 𑀢𑀫𑀳𑀁 𑀕𑀬𑁆𑀳, 𑀲𑀭𑀺𑀁 𑀓𑁄𑀓𑀦𑀤𑀁 𑀅𑀳𑀁;

𑀢𑀢𑁆𑀣 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺 𑀫𑁂, 𑀅𑀭𑀳𑀢𑁆𑀢𑀁 𑀅𑀧𑀸𑀧𑀼𑀡𑀺𑀁.

𑁫𑁩. ‘‘𑀫𑀦𑁄𑀫𑀬𑁂𑀲𑀼 𑀓𑀸𑀬𑁂𑀲𑀼, 𑀲𑀩𑁆𑀩𑀢𑁆𑀣 𑀧𑀸𑀭𑀫𑀺𑀁 𑀕𑀢𑁄;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁫𑁪. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀘𑀽𑀴𑀧𑀦𑁆𑀣𑀓𑁄 [𑀘𑀼𑀮𑁆𑀮𑀧𑀦𑁆𑀣𑀓𑁄 (𑀲𑀻. 𑀲𑁆𑀬𑀸.)] 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀘𑀽𑀴𑀧𑀦𑁆𑀣𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀘𑀢𑀼𑀢𑁆𑀣𑀁.

𑁫. 𑀧𑀺𑀮𑀺𑀦𑁆𑀤𑀯𑀘𑁆𑀙𑀢𑁆𑀣𑁂𑀭𑀅𑀧𑀤𑀸𑀦𑀁

𑁫𑁫. ‘‘𑀦𑀺𑀩𑁆𑀩𑀼𑀢𑁂 𑀮𑁄𑀓𑀦𑀸𑀣𑀫𑁆𑀳𑀺, 𑀲𑀼𑀫𑁂𑀥𑁂 𑀅𑀕𑁆𑀕𑀧𑀼𑀕𑁆𑀕𑀮𑁂;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀣𑀽𑀧𑀧𑀽𑀚𑀁 𑀅𑀓𑀸𑀲𑀳𑀁.

𑁫𑁬. ‘‘𑀬𑁂 𑀘 𑀔𑀻𑀡𑀸𑀲𑀯𑀸 𑀢𑀢𑁆𑀣, 𑀙𑀴𑀪𑀺𑀜𑁆𑀜𑀸 𑀫𑀳𑀺𑀤𑁆𑀥𑀺𑀓𑀸;

𑀢𑁂𑀳𑀁 𑀢𑀢𑁆𑀣 𑀲𑀫𑀸𑀦𑁂𑀢𑁆𑀯𑀸, 𑀲𑀗𑁆𑀖𑀪𑀢𑁆𑀢𑀁 𑀅𑀓𑀸𑀲𑀳𑀁.

𑁫𑁭. ‘‘𑀲𑀼𑀫𑁂𑀥𑀲𑁆𑀲 𑀪𑀕𑀯𑀢𑁄, 𑀉𑀧𑀝𑁆𑀞𑀸𑀓𑁄 𑀢𑀤𑀸 𑀅𑀳𑀼;

𑀲𑀼𑀫𑁂𑀥𑁄 𑀦𑀸𑀫 𑀦𑀸𑀫𑁂𑀦, 𑀅𑀦𑀼𑀫𑁄𑀤𑀺𑀢𑁆𑀣 𑀲𑁄 𑀢𑀤𑀸.

𑁫𑁮. ‘‘𑀢𑁂𑀦 𑀘𑀺𑀢𑁆𑀢𑀧𑁆𑀧𑀲𑀸𑀤𑁂𑀦, 𑀯𑀺𑀫𑀸𑀦𑀁 𑀉𑀧𑀧𑀚𑁆𑀚𑀳𑀁;

𑀙𑀴𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀺, 𑀅𑀘𑁆𑀙𑀭𑀸𑀬𑁄 𑀭𑀫𑀺𑀁𑀲𑀼 𑀫𑁂.

𑁫𑁯. ‘‘𑀫𑀫𑁂𑀯 𑀅𑀦𑀼𑀯𑀢𑁆𑀢𑀦𑁆𑀢𑀺, 𑀲𑀩𑁆𑀩𑀓𑀸𑀫𑁂𑀳𑀺 𑀢𑀸 𑀲𑀤𑀸;

𑀅𑀜𑁆𑀜𑁂 𑀤𑁂𑀯𑁂 𑀅𑀪𑀺𑀪𑁄𑀫𑀺, 𑀧𑀼𑀜𑁆𑀜𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁.

𑁬𑁦. ‘‘𑀧𑀜𑁆𑀘𑀯𑀻𑀲𑀢𑀺𑀓𑀧𑁆𑀧𑀫𑁆𑀳𑀺, 𑀯𑀭𑀼𑀡𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀯𑀺𑀲𑀼𑀤𑁆𑀥𑀪𑁄𑀚𑀦𑁄 [𑀲𑀼𑀲𑀼𑀤𑁆𑀥𑀪𑁄𑀚𑀦𑁄 (𑀲𑀻.)] 𑀆𑀲𑀺𑀁, 𑀘𑀓𑁆𑀓𑀯𑀢𑁆𑀢𑀻 𑀅𑀳𑀁 𑀢𑀤𑀸.

𑁬𑁧. ‘‘𑀦 𑀢𑁂 𑀩𑀻𑀚𑀁 𑀧𑀯𑀧𑀦𑁆𑀢𑀺, 𑀦𑀧𑀺 𑀦𑀻𑀬𑀦𑁆𑀢𑀺 𑀦𑀗𑁆𑀕𑀮𑀸;

𑀅𑀓𑀝𑁆𑀞𑀧𑀸𑀓𑀺𑀫𑀁 𑀲𑀸𑀮𑀺𑀁, 𑀧𑀭𑀺𑀪𑀼𑀜𑁆𑀚𑀦𑁆𑀢𑀺 𑀫𑀸𑀦𑀼𑀲𑀸.

𑁬𑁨. ‘‘𑀢𑀢𑁆𑀣 𑀭𑀚𑁆𑀚𑀁 𑀓𑀭𑀺𑀢𑁆𑀯𑀸𑀦, 𑀤𑁂𑀯𑀢𑁆𑀢𑀁 𑀧𑀼𑀦 𑀕𑀘𑁆𑀙𑀳𑀁;

𑀢𑀤𑀸𑀧𑀺 𑀏𑀤𑀺𑀲𑀸 𑀫𑀬𑁆𑀳𑀁, 𑀦𑀺𑀩𑁆𑀩𑀢𑁆𑀢𑀸 𑀪𑁄𑀕𑀲𑀫𑁆𑀧𑀤𑀸.

𑁬𑁩. ‘‘𑀦 𑀫𑀁 𑀫𑀺𑀢𑁆𑀢𑀸 𑀅𑀫𑀺𑀢𑁆𑀢𑀸 𑀯𑀸, 𑀳𑀺𑀁𑀲𑀦𑁆𑀢𑀺 𑀲𑀩𑁆𑀩𑀧𑀸𑀡𑀺𑀦𑁄;

𑀲𑀩𑁆𑀩𑁂𑀲𑀫𑁆𑀧𑀺 𑀧𑀺𑀬𑁄 𑀳𑁄𑀫𑀺, 𑀧𑀼𑀜𑁆𑀜𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁.

𑁬𑁪. ‘‘𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑀫𑁆𑀳𑀺, 𑀬𑀁 𑀤𑀸𑀦𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀕𑀦𑁆𑀥𑀸𑀮𑁂𑀧𑀲𑁆𑀲𑀺𑀤𑀁 𑀨𑀮𑀁.

𑁬𑁫. ‘‘𑀇𑀫𑀲𑁆𑀫𑀺𑀁 𑀪𑀤𑁆𑀤𑀓𑁂 𑀓𑀧𑁆𑀧𑁂, 𑀏𑀓𑁄 𑀆𑀲𑀺𑀁 𑀚𑀦𑀸𑀥𑀺𑀧𑁄;

𑀫𑀳𑀸𑀦𑀼𑀪𑀸𑀯𑁄 𑀭𑀸𑀚𑀸𑀳𑀁 [𑀭𑀸𑀚𑀻𑀲𑀺 (𑀲𑁆𑀬𑀸. 𑀓.)], 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁬𑁬. ‘‘𑀲𑁄𑀳𑀁 𑀧𑀜𑁆𑀘𑀲𑀼 𑀲𑀻𑀮𑁂𑀲𑀼, 𑀞𑀧𑁂𑀢𑁆𑀯𑀸 𑀚𑀦𑀢𑀁 𑀩𑀳𑀼𑀁;

𑀧𑀸𑀧𑁂𑀢𑁆𑀯𑀸 𑀲𑀼𑀕𑀢𑀺𑀁𑀬𑁂𑀯, 𑀤𑁂𑀯𑀢𑀸𑀦𑀁 𑀧𑀺𑀬𑁄 𑀅𑀳𑀼𑀁.

𑁬𑁭. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀺𑀮𑀺𑀦𑁆𑀤𑀯𑀘𑁆𑀙𑁄 [𑀧𑀺𑀮𑀺𑀦𑁆𑀤𑀺𑀯𑀘𑁆𑀙𑁄 (𑀲𑀻.)] 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀺𑀮𑀺𑀦𑁆𑀤𑀯𑀘𑁆𑀙𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀜𑁆𑀘𑀫𑀁.