𑁩. 𑀤𑁆𑀯𑁂𑀭𑀢𑀦𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁨. ‘‘𑀫𑀺𑀕𑀮𑀼𑀤𑁆𑀤𑁄 𑀧𑀼𑀭𑁂 𑀆𑀲𑀺𑀁, 𑀅𑀭𑀜𑁆𑀜𑁂 𑀓𑀸𑀦𑀦𑁂 𑀅𑀳𑀁;

𑀅𑀤𑁆𑀤𑀲𑀁 𑀯𑀺𑀭𑀚𑀁 𑀩𑀼𑀤𑁆𑀥𑀁, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑀁.

𑁧𑁩. ‘‘𑀫𑀁𑀲𑀧𑁂𑀲𑀺 𑀫𑀬𑀸 𑀤𑀺𑀦𑁆𑀦𑀸, 𑀯𑀺𑀧𑀲𑁆𑀲𑀺𑀲𑁆𑀲 𑀫𑀳𑁂𑀲𑀺𑀦𑁄;

𑀲𑀤𑁂𑀯𑀓𑀲𑁆𑀫𑀺𑀁 𑀮𑁄𑀓𑀲𑁆𑀫𑀺𑀁, 𑀇𑀲𑁆𑀲𑀭𑀁 𑀓𑀸𑀭𑀬𑀸𑀫𑀳𑀁.

𑁧𑁪. ‘‘𑀇𑀫𑀺𑀦𑀸 𑀫𑀁𑀲𑀤𑀸𑀦𑁂𑀦, 𑀭𑀢𑀦𑀁 𑀦𑀺𑀩𑁆𑀩𑀢𑁆𑀢𑀢𑁂 𑀫𑀫;

𑀤𑀼𑀯𑁂𑀫𑁂 𑀭𑀢𑀦𑀸 𑀮𑁄𑀓𑁂, 𑀤𑀺𑀝𑁆𑀞𑀥𑀫𑁆𑀫𑀲𑁆𑀲 𑀧𑀢𑁆𑀢𑀺𑀬𑀸.

𑁧𑁫. ‘‘𑀢𑁂𑀳𑀁 𑀲𑀩𑁆𑀩𑁂 𑀅𑀦𑀼𑀪𑁄𑀫𑀺, 𑀫𑀁𑀲𑀤𑀸𑀦𑀲𑁆𑀲 𑀲𑀢𑁆𑀢𑀺𑀬𑀸;

𑀕𑀢𑁆𑀢𑀜𑁆𑀘 𑀫𑀼𑀤𑀼𑀓𑀁 𑀫𑀬𑁆𑀳𑀁, 𑀧𑀜𑁆𑀜𑀸 𑀦𑀺𑀧𑀼𑀡𑀯𑁂𑀤𑀦𑀻.

𑁧𑁬. ‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀫𑀁𑀲𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀫𑀁𑀲𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁧𑁭. ‘‘𑀇𑀢𑁄 𑀘𑀢𑀼𑀢𑁆𑀣𑀓𑁂 𑀓𑀧𑁆𑀧𑁂, 𑀏𑀓𑁄 𑀆𑀲𑀺𑀁 𑀚𑀦𑀸𑀥𑀺𑀧𑁄;

𑀫𑀳𑀸𑀭𑁄𑀳𑀺𑀢𑀦𑀸𑀫𑁄 𑀲𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁧𑁮. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀤𑁆𑀯𑁂𑀭𑀢𑀦𑀺𑀬𑁄 [𑀤𑁆𑀯𑀺𑀭𑀢𑀦𑀺𑀬𑁄 (𑀲𑀻.)] 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀤𑁆𑀯𑁂𑀭𑀢𑀦𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀢𑀢𑀺𑀬𑀁.

𑀤𑀲𑀫𑀁 𑀪𑀸𑀡𑀯𑀸𑀭𑀁.