𑁧𑁦. 𑀲𑀼𑀫𑀗𑁆𑀕𑀮𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁨𑁪. ‘‘𑀆𑀳𑀼𑀢𑀺𑀁 𑀬𑀺𑀝𑁆𑀞𑀼𑀓𑀸𑀫𑁄𑀳𑀁, 𑀧𑀝𑀺𑀬𑀸𑀤𑁂𑀢𑁆𑀯𑀸𑀦 𑀪𑁄𑀚𑀦𑀁;

𑀩𑁆𑀭𑀸𑀳𑁆𑀫𑀡𑁂 𑀧𑀝𑀺𑀫𑀸𑀦𑁂𑀦𑁆𑀢𑁄, 𑀯𑀺𑀲𑀸𑀮𑁂 𑀫𑀸𑀴𑀓𑁂 𑀞𑀺𑀢𑁄.

𑁧𑁨𑁫. ‘‘𑀅𑀣𑀤𑁆𑀤𑀲𑀸𑀲𑀺𑀁 𑀲𑀫𑁆𑀩𑀼𑀤𑁆𑀥𑀁, 𑀧𑀺𑀬𑀤𑀲𑁆𑀲𑀺𑀁 𑀫𑀳𑀸𑀬𑀲𑀁;

𑀲𑀩𑁆𑀩𑀮𑁄𑀓𑀯𑀺𑀦𑁂𑀢𑀸𑀭𑀁, 𑀲𑀬𑀫𑁆𑀪𑀼𑀁 𑀅𑀕𑁆𑀕𑀧𑀼𑀕𑁆𑀕𑀮𑀁.

𑁧𑁨𑁬. ‘‘𑀪𑀕𑀯𑀦𑁆𑀢𑀁 𑀚𑀼𑀢𑀺𑀫𑀦𑁆𑀢𑀁, 𑀲𑀸𑀯𑀓𑁂𑀳𑀺 𑀧𑀼𑀭𑀓𑁆𑀔𑀢𑀁;

𑀆𑀤𑀺𑀘𑁆𑀘𑀫𑀺𑀯 𑀭𑁄𑀘𑀦𑁆𑀢𑀁, 𑀭𑀣𑀺𑀬𑀁 𑀧𑀝𑀺𑀧𑀦𑁆𑀦𑀓𑀁.

𑁧𑁨𑁭. ‘‘𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸𑀦, 𑀲𑀓𑀁 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁;

𑀫𑀦𑀲𑀸𑀯 𑀦𑀺𑀫𑀦𑁆𑀢𑁂𑀲𑀺𑀁, ‘𑀆𑀕𑀘𑁆𑀙𑀢𑀼 𑀫𑀳𑀸𑀫𑀼𑀦𑀺’.

𑁧𑁨𑁮. ‘‘𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀲𑀢𑁆𑀣𑀸 𑀮𑁄𑀓𑁂 𑀅𑀦𑀼𑀢𑁆𑀢𑀭𑁄;

𑀔𑀻𑀡𑀸𑀲𑀯𑀲𑀳𑀲𑁆𑀲𑁂𑀳𑀺, 𑀫𑀫 𑀤𑁆𑀯𑀸𑀭𑀁 𑀉𑀧𑀸𑀕𑀫𑀺.

𑁧𑁨𑁯. ‘‘𑀦𑀫𑁄 𑀢𑁂 𑀧𑀼𑀭𑀺𑀲𑀸𑀚𑀜𑁆𑀜, 𑀦𑀫𑁄 𑀢𑁂 𑀧𑀼𑀭𑀺𑀲𑀼𑀢𑁆𑀢𑀫;

𑀧𑀸𑀲𑀸𑀤𑀁 𑀅𑀪𑀺𑀭𑀽𑀳𑀺𑀢𑁆𑀯𑀸, 𑀲𑀻𑀳𑀸𑀲𑀦𑁂 𑀦𑀺𑀲𑀻𑀤𑀢𑀁 [𑀦𑀺𑀲𑀻𑀤 𑀢𑁆𑀯𑀁 (𑀲𑀻.)].

𑁧𑁩𑁦. ‘‘𑀤𑀦𑁆𑀢𑁄 𑀤𑀦𑁆𑀢𑀧𑀭𑀺𑀯𑀸𑀭𑁄, 𑀢𑀺𑀡𑁆𑀡𑁄 𑀢𑀸𑀭𑀬𑀢𑀁 𑀯𑀭𑁄;

𑀧𑀸𑀲𑀸𑀤𑀁 𑀅𑀪𑀺𑀭𑀽𑀳𑀺𑀢𑁆𑀯𑀸, 𑀦𑀺𑀲𑀻𑀤𑀺 𑀧𑀯𑀭𑀸𑀲𑀦𑁂.

𑁧𑁩𑁧. ‘‘𑀬𑀁 𑀫𑁂 𑀅𑀢𑁆𑀣𑀺 𑀲𑀓𑁂 𑀕𑁂𑀳𑁂, 𑀆𑀫𑀺𑀲𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁;

𑀢𑀸𑀳𑀁 𑀩𑀼𑀤𑁆𑀥𑀲𑁆𑀲 𑀧𑀸𑀤𑀸𑀲𑀺𑀁, 𑀧𑀲𑀦𑁆𑀦𑁄 𑀲𑁂𑀳𑀺 𑀧𑀸𑀡𑀺𑀪𑀺.

𑁧𑁩𑁨. ‘‘𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀯𑁂𑀤𑀚𑀸𑀢𑁄 𑀓𑀢𑀜𑁆𑀚𑀮𑀻;

𑀩𑀼𑀤𑁆𑀥𑀲𑁂𑀝𑁆𑀞𑀁 𑀦𑀫𑀲𑁆𑀲𑀸𑀫𑀺, 𑀅𑀳𑁄 𑀩𑀼𑀤𑁆𑀥𑀲𑁆𑀲𑀼𑀴𑀸𑀭𑀢𑀸.

𑁧𑁩𑁩. ‘‘𑀅𑀝𑁆𑀞𑀦𑁆𑀦𑀁 𑀧𑀬𑀺𑀭𑀽𑀧𑀸𑀲𑀢𑀁, 𑀪𑀼𑀜𑁆𑀚𑀁 𑀔𑀻𑀡𑀸𑀲𑀯𑀸 𑀩𑀳𑀽;

𑀢𑀼𑀬𑁆𑀳𑁂𑀯𑁂𑀲𑁄 𑀆𑀦𑀼𑀪𑀸𑀯𑁄, 𑀲𑀭𑀡𑀁 𑀢𑀁 𑀉𑀧𑁂𑀫𑀳𑀁.

𑁧𑁩𑁪. ‘‘𑀧𑀺𑀬𑀤𑀲𑁆𑀲𑀻 𑀘 𑀪𑀕𑀯𑀸, 𑀮𑁄𑀓𑀚𑁂𑀝𑁆𑀞𑁄 𑀦𑀭𑀸𑀲𑀪𑁄;

𑀪𑀺𑀓𑁆𑀔𑀼𑀲𑀗𑁆𑀖𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

𑁧𑁩𑁫. ‘‘‘𑀬𑁄 𑀲𑁄 𑀲𑀗𑁆𑀖𑀁 𑀅𑀪𑁄𑀚𑁂𑀲𑀺, 𑀉𑀚𑀼𑀪𑀽𑀢𑀁 𑀲𑀫𑀸𑀳𑀺𑀢𑀁;

𑀢𑀣𑀸𑀕𑀢𑀜𑁆𑀘 𑀲𑀫𑁆𑀩𑀼𑀤𑁆𑀥𑀁, 𑀲𑀼𑀡𑀸𑀣 𑀫𑀫 𑀪𑀸𑀲𑀢𑁄.

𑁧𑁩𑁬. ‘‘‘𑀲𑀢𑁆𑀢𑀯𑀻𑀲𑀢𑀺𑀓𑁆𑀔𑀢𑁆𑀢𑀼𑀁 𑀲𑁄, 𑀤𑁂𑀯𑀭𑀚𑁆𑀚𑀁 𑀓𑀭𑀺𑀲𑁆𑀲𑀢𑀺;

𑀲𑀓𑀓𑀫𑁆𑀫𑀸𑀪𑀺𑀭𑀤𑁆𑀥𑁄 𑀲𑁄, 𑀤𑁂𑀯𑀮𑁄𑀓𑁂 𑀭𑀫𑀺𑀲𑁆𑀲𑀢𑀺.

𑁧𑁩𑁭. ‘‘‘𑀤𑀲 𑀅𑀝𑁆𑀞 𑀘𑀓𑁆𑀔𑀢𑁆𑀢𑀼𑀁 [𑀤𑀲𑀜𑁆𑀘𑀝𑁆𑀞𑀓𑁆𑀔𑀢𑁆𑀣𑀼𑀁 (𑀲𑀻.), 𑀤𑀲 𑀘𑀝𑁆𑀞𑀓𑁆𑀔𑀢𑁆𑀢𑀼𑀁 (𑀲𑁆𑀬𑀸.)] 𑀲𑁄, 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺;

𑀧𑀣𑀩𑁆𑀬𑀸 𑀭𑀚𑁆𑀚𑀁 𑀧𑀜𑁆𑀘𑀲𑀢𑀁, 𑀯𑀲𑀼𑀥𑀁 𑀆𑀯𑀲𑀺𑀲𑁆𑀲𑀢𑀺’.

𑁧𑁩𑁮. ‘‘𑀅𑀭𑀜𑁆𑀜𑀯𑀦𑀫𑁄𑀕𑁆𑀕𑀬𑁆𑀳, 𑀓𑀸𑀦𑀦𑀁 𑀩𑁆𑀬𑀕𑁆𑀖𑀲𑁂𑀯𑀺𑀢𑀁;

𑀧𑀥𑀸𑀦𑀁 𑀧𑀤𑀳𑀺𑀢𑁆𑀯𑀸𑀦, 𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑀸.

𑁧𑁩𑁯. ‘‘𑀅𑀝𑁆𑀞𑀸𑀭𑀲𑁂 𑀓𑀧𑁆𑀧𑀲𑀢𑁂, 𑀬𑀁 𑀤𑀸𑀦𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀪𑀢𑁆𑀢𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁧𑁪𑁦. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀼𑀫𑀗𑁆𑀕𑀮𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀼𑀫𑀗𑁆𑀕𑀮𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀲𑀫𑀁.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀲𑀻𑀳𑀸𑀲𑀦𑀻 𑀏𑀓𑀣𑀫𑁆𑀪𑀻, 𑀦𑀦𑁆𑀤𑁄 𑀘 𑀘𑀽𑀴𑀧𑀦𑁆𑀣𑀓𑁄;

𑀧𑀺𑀮𑀺𑀦𑁆𑀤𑀭𑀸𑀳𑀼𑀮𑁄 𑀘𑁂𑀯, 𑀯𑀗𑁆𑀕𑀦𑁆𑀢𑁄 𑀭𑀝𑁆𑀞𑀧𑀸𑀮𑀓𑁄.

𑀲𑁄𑀧𑀸𑀓𑁄 𑀫𑀗𑁆𑀕𑀮𑁄 𑀘𑁂𑀯, 𑀤𑀲𑁂𑀯 𑀤𑀼𑀢𑀺𑀬𑁂 𑀯𑀕𑁆𑀕𑁂;

𑀲𑀢𑀜𑁆𑀘 𑀅𑀝𑁆𑀞𑀢𑀺𑀁𑀲 𑀘, 𑀕𑀸𑀣𑀸 𑀘𑁂𑀢𑁆𑀣 𑀧𑀓𑀸𑀲𑀺𑀢𑀸.

𑀲𑀻𑀳𑀸𑀲𑀦𑀺𑀬𑀯𑀕𑁆𑀕𑁄 𑀤𑀼𑀢𑀺𑀬𑁄.