𑁧. 𑀆𑀮𑀫𑁆𑀩𑀡𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧. ‘‘𑀅𑀢𑁆𑀣𑀤𑀲𑁆𑀲𑀺𑀲𑁆𑀲 𑀪𑀕𑀯𑀢𑁄, 𑀮𑁄𑀓𑀚𑁂𑀝𑁆𑀞𑀲𑁆𑀲 𑀢𑀸𑀤𑀺𑀦𑁄;

𑀆𑀮𑀫𑁆𑀩𑀡𑀁 𑀫𑀬𑀸 𑀤𑀺𑀦𑁆𑀦𑀁, 𑀤𑁆𑀯𑀺𑀧𑀤𑀺𑀦𑁆𑀤𑀲𑁆𑀲 𑀢𑀸𑀤𑀺𑀦𑁄.

𑁨. ‘‘𑀥𑀭𑀡𑀺𑀁 𑀧𑀝𑀺𑀧𑀚𑁆𑀚𑀸𑀫𑀺, 𑀯𑀺𑀧𑀼𑀮𑀁 𑀲𑀸𑀕𑀭𑀧𑁆𑀧𑀭𑀁;

𑀧𑀸𑀡𑁂𑀲𑀼 𑀘 𑀇𑀲𑁆𑀲𑀭𑀺𑀬𑀁, 𑀯𑀢𑁆𑀢𑁂𑀫𑀺 𑀯𑀲𑀼𑀥𑀸𑀬 𑀘.

𑁩. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁪. ‘‘𑀇𑀢𑁄 𑀤𑁆𑀯𑁂𑀲𑀝𑁆𑀞𑀺𑀓𑀧𑁆𑀧𑀫𑁆𑀳𑀺, 𑀢𑀬𑁄 𑀆𑀲𑀺𑀁𑀲𑀼 𑀔𑀢𑁆𑀢𑀺𑀬𑀸;

𑀏𑀓𑀸𑀧𑀲𑁆𑀲𑀺𑀢𑀦𑀸𑀫𑀸 𑀢𑁂, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁫. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀆𑀮𑀫𑁆𑀩𑀡𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀆𑀮𑀫𑁆𑀩𑀡𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀞𑀫𑀁.