𑁯. 𑀲𑀫𑀸𑀤𑀧𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁪𑁪. ‘‘𑀦𑀕𑀭𑁂 𑀩𑀦𑁆𑀥𑀼𑀫𑀢𑀺𑀬𑀸, 𑀫𑀳𑀸𑀧𑀽𑀕𑀕𑀡𑁄 𑀅𑀳𑀼;

𑀢𑁂𑀲𑀸𑀳𑀁 𑀧𑀯𑀭𑁄 𑀆𑀲𑀺𑀁, 𑀫𑀫 𑀩𑀤𑁆𑀥𑀘𑀭𑀸 [𑀧𑀝𑁆𑀞𑀘𑀭𑀸 (𑀲𑁆𑀬𑀸.)] 𑀘 𑀢𑁂.

𑁪𑁫. ‘‘𑀲𑀩𑁆𑀩𑁂 𑀢𑁂 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸, 𑀧𑀼𑀜𑁆𑀜𑀓𑀫𑁆𑀫𑁂 𑀲𑀫𑀸𑀤𑀬𑀺𑀁;

𑀫𑀸𑀴𑀁 𑀓𑀲𑁆𑀲𑀸𑀫 𑀲𑀗𑁆𑀖𑀲𑁆𑀲, 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀅𑀦𑀼𑀢𑁆𑀢𑀭𑀁.

𑁪𑁬. ‘‘𑀲𑀸𑀥𑀽𑀢𑀺 𑀢𑁂 𑀧𑀝𑀺𑀲𑁆𑀲𑀼𑀢𑁆𑀯𑀸, 𑀫𑀫 𑀙𑀦𑁆𑀤𑀯𑀲𑀸𑀦𑀼𑀕𑀸;

𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀘 𑀢𑀁 𑀫𑀸𑀴𑀁, 𑀯𑀺𑀧𑀲𑁆𑀲𑀺𑀲𑁆𑀲 𑀅𑀤𑀫𑁆𑀳𑀲𑁂.

𑁪𑁭. ‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀫𑀸𑀴𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀫𑀸𑀴𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁪𑁮. ‘‘𑀏𑀓𑀽𑀦𑀲𑀢𑁆𑀢𑀢𑀺𑀓𑀧𑁆𑀧𑁂 [𑀏𑀓𑀽𑀦𑀲𑀝𑁆𑀞𑀺𑀓𑀧𑁆𑀧𑀫𑁆𑀳𑀺 (𑀲𑀻. 𑀲𑁆𑀬𑀸.)],

𑀏𑀓𑁄 𑀆𑀲𑀺 𑀚𑀦𑀸𑀥𑀺𑀧𑁄.

𑀆𑀤𑁂𑀬𑁆𑀬𑁄 𑀦𑀸𑀫 𑀦𑀸𑀫𑁂𑀦, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁪𑁯. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀫𑀸𑀤𑀧𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀫𑀸𑀤𑀧𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀦𑀯𑀫𑀁.