𑁧𑁭. 𑀲𑀼𑀧𑀸𑀭𑀺𑀘𑀭𑀺𑀬𑀯𑀕𑁆𑀕𑁄

𑁧. 𑀲𑀼𑀧𑀸𑀭𑀺𑀘𑀭𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧. ‘‘𑀧𑀤𑀼𑀫𑁄 𑀦𑀸𑀫 𑀦𑀸𑀫𑁂𑀦, 𑀤𑁆𑀯𑀺𑀧𑀤𑀺𑀦𑁆𑀤𑁄 𑀦𑀭𑀸𑀲𑀪𑁄;

𑀧𑀯𑀦𑀸 𑀅𑀪𑀺𑀦𑀺𑀓𑁆𑀔𑀫𑁆𑀫, 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀘𑀓𑁆𑀔𑀼𑀫𑀸.

𑁨. ‘‘𑀬𑀓𑁆𑀔𑀸𑀦𑀁 𑀲𑀫𑀬𑁄 𑀆𑀲𑀺, 𑀅𑀯𑀺𑀤𑀽𑀭𑁂 𑀫𑀳𑁂𑀲𑀺𑀦𑁄;

𑀬𑁂𑀦 𑀓𑀺𑀘𑁆𑀘𑁂𑀦 𑀲𑀫𑁆𑀧𑀢𑁆𑀢𑀸, 𑀅𑀚𑁆𑀛𑀸𑀧𑁂𑀓𑁆𑀔𑀺𑀁𑀲𑀼 𑀢𑀸𑀯𑀤𑁂.

𑁩. ‘‘𑀩𑀼𑀤𑁆𑀥𑀲𑁆𑀲 𑀕𑀺𑀭𑀫𑀜𑁆𑀜𑀸𑀬, 𑀅𑀫𑀢𑀲𑁆𑀲 𑀘 𑀤𑁂𑀲𑀦𑀁;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀅𑀧𑁆𑀨𑁄𑀝𑁂𑀢𑁆𑀯𑀸 𑀉𑀧𑀝𑁆𑀞𑀳𑀺𑀁.

𑁪. ‘‘𑀲𑀼𑀘𑀺𑀡𑁆𑀡𑀲𑁆𑀲 𑀨𑀮𑀁 𑀧𑀲𑁆𑀲, 𑀉𑀧𑀝𑁆𑀞𑀸𑀦𑀲𑁆𑀲 𑀲𑀢𑁆𑀣𑀼𑀦𑁄;

𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑁂𑀲𑀼, 𑀤𑀼𑀕𑁆𑀕𑀢𑀺𑀁 𑀦𑀼𑀧𑀧𑀚𑁆𑀚𑀳𑀁.

𑁫. ‘‘𑀊𑀦𑀢𑀺𑀁𑀲𑁂 𑀓𑀧𑁆𑀧𑀲𑀢𑁂, 𑀲𑀫𑀮𑀗𑁆𑀓𑀢𑀦𑀸𑀫𑀓𑁄;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁬. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀼𑀧𑀸𑀭𑀺𑀘𑀭𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀼𑀧𑀸𑀭𑀺𑀘𑀭𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀞𑀫𑀁.

𑁨. 𑀓𑀡𑀯𑁂𑀭𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁭. ‘‘𑀲𑀺𑀤𑁆𑀥𑀢𑁆𑀣𑁄 𑀦𑀸𑀫 𑀪𑀕𑀯𑀸, 𑀮𑁄𑀓𑀚𑁂𑀝𑁆𑀞𑁄 𑀦𑀭𑀸𑀲𑀪𑁄;

𑀧𑀼𑀭𑀓𑁆𑀔𑀢𑁄 𑀲𑀸𑀯𑀓𑁂𑀳𑀺, 𑀦𑀕𑀭𑀁 𑀧𑀝𑀺𑀧𑀚𑁆𑀚𑀣.

𑁮. ‘‘𑀭𑀜𑁆𑀜𑁄 𑀅𑀦𑁆𑀢𑁂𑀧𑀼𑀭𑁂 𑀆𑀲𑀺𑀁, 𑀕𑁄𑀧𑀓𑁄 𑀅𑀪𑀺𑀲𑀫𑁆𑀫𑀢𑁄;

𑀧𑀸𑀲𑀸𑀤𑁂 𑀉𑀧𑀯𑀺𑀝𑁆𑀞𑁄𑀳𑀁, 𑀅𑀤𑁆𑀤𑀲𑀁 𑀮𑁄𑀓𑀦𑀸𑀬𑀓𑀁.

𑁯. ‘‘𑀓𑀡𑀯𑁂𑀭𑀁 [𑀓𑀭𑀯𑀻𑀭𑀁 (𑀲𑀓𑁆𑀓𑀢𑀸𑀦𑀼𑀮𑁄𑀫𑀁), 𑀓𑀡𑀯𑀻𑀭𑀁 (𑀧𑀸𑀓𑀢)] 𑀕𑀳𑁂𑀢𑁆𑀯𑀸𑀦, 𑀪𑀺𑀓𑁆𑀔𑀼𑀲𑀗𑁆𑀖𑁂 𑀲𑀫𑁄𑀓𑀺𑀭𑀺𑀁;

𑀩𑀼𑀤𑁆𑀥𑀲𑁆𑀲 𑀯𑀺𑀲𑀼𑀁 𑀓𑀢𑁆𑀯𑀸𑀦, 𑀢𑀢𑁄 𑀪𑀺𑀬𑁆𑀬𑁄 𑀲𑀫𑁄𑀓𑀺𑀭𑀺𑀁.

𑁧𑁦. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀧𑀽𑀚𑀬𑀺𑀁 [𑀭𑁄𑀧𑀬𑀺𑀁 (𑀲𑁆𑀬𑀸.)];

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁧𑁧. ‘‘𑀲𑀢𑁆𑀢𑀸𑀲𑀻𑀢𑀺𑀫𑁆𑀳𑀺𑀢𑁄 𑀓𑀧𑁆𑀧𑁂, 𑀘𑀢𑀼𑀭𑀸𑀲𑀼𑀁 𑀫𑀳𑀺𑀤𑁆𑀥𑀺𑀓𑀸;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑀸, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁧𑁨. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀓𑀡𑀯𑁂𑀭𑀧𑀼𑀧𑁆𑀨𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀓𑀡𑀯𑁂𑀭𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀼𑀢𑀺𑀬𑀁.

𑁩. 𑀔𑀚𑁆𑀚𑀓𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁩. ‘‘𑀢𑀺𑀲𑁆𑀲𑀲𑁆𑀲 𑀔𑁄 𑀪𑀕𑀯𑀢𑁄, 𑀧𑀼𑀩𑁆𑀩𑁂 𑀨𑀮𑀫𑀤𑀸𑀲𑀳𑀁;

𑀦𑀸𑀴𑀺𑀓𑁂𑀭𑀜𑁆𑀘 𑀧𑀸𑀤𑀸𑀲𑀺𑀁, 𑀔𑀚𑁆𑀚𑀓𑀁 𑀅𑀪𑀺𑀲𑀫𑁆𑀫𑀢𑀁.

𑁧𑁪. ‘‘𑀩𑀼𑀤𑁆𑀥𑀲𑁆𑀲 𑀢𑀫𑀳𑀁 𑀤𑀢𑁆𑀯𑀸, 𑀢𑀺𑀲𑁆𑀲𑀲𑁆𑀲 𑀢𑀼 𑀫𑀳𑁂𑀲𑀺𑀦𑁄;

𑀫𑁄𑀤𑀸𑀫𑀳𑀁 𑀓𑀸𑀫𑀓𑀸𑀫𑀻, 𑀉𑀧𑀧𑀚𑁆𑀚𑀺𑀁 [𑀓𑀸𑀫𑀓𑀸𑀭𑀻, 𑀉𑀧𑀧𑀚𑁆𑀚𑀁 (𑀲𑀻.)] 𑀬𑀫𑀺𑀘𑁆𑀙𑀓𑀁 [𑀲𑀩𑁆𑀩𑀢𑁆𑀣𑀧𑀺 𑀏𑀯𑀫𑁂𑀯 𑀤𑀺𑀲𑁆𑀲𑀢𑀺].

𑁧𑁫. ‘‘𑀤𑁆𑀯𑁂𑀦𑀯𑀼𑀢𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀤𑀸𑀦𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀨𑀮𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁧𑁬. ‘‘𑀇𑀢𑁄 𑀢𑁂𑀭𑀲𑀓𑀧𑁆𑀧𑀫𑁆𑀳𑀺, 𑀭𑀸𑀚𑀸 𑀇𑀦𑁆𑀤𑀲𑀫𑁄 𑀅𑀳𑀼;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁧𑁭. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀔𑀚𑁆𑀚𑀓𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀔𑀚𑁆𑀚𑀓𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀢𑀢𑀺𑀬𑀁.

𑁪. 𑀤𑁂𑀲𑀧𑀽𑀚𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁮. ‘‘𑀅𑀢𑁆𑀣𑀤𑀲𑁆𑀲𑀻 𑀢𑀼 𑀪𑀕𑀯𑀸, 𑀮𑁄𑀓𑀚𑁂𑀝𑁆𑀞𑁄 𑀦𑀭𑀸𑀲𑀪𑁄;

𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸𑀦 𑀯𑁂𑀳𑀸𑀲𑀁, 𑀕𑀘𑁆𑀙𑀢𑁂 𑀅𑀦𑀺𑀮𑀜𑁆𑀚𑀲𑁂.

𑁧𑁯. ‘‘𑀬𑀫𑁆𑀳𑀺 𑀤𑁂𑀲𑁂 𑀞𑀺𑀢𑁄 𑀲𑀢𑁆𑀣𑀸, 𑀅𑀩𑁆𑀪𑀼𑀕𑁆𑀕𑀘𑁆𑀙𑀺 𑀫𑀳𑀸𑀫𑀼𑀦𑀺;

𑀢𑀸𑀳𑀁 𑀤𑁂𑀲𑀁 𑀅𑀧𑀽𑀚𑁂𑀲𑀺𑀁, 𑀧𑀲𑀦𑁆𑀦𑁄 𑀲𑁂𑀳𑀺 𑀧𑀸𑀡𑀺𑀪𑀺.

𑁨𑁦. ‘‘𑀅𑀝𑁆𑀞𑀸𑀭𑀲𑁂 𑀓𑀧𑁆𑀧𑀲𑀢𑁂, 𑀅𑀤𑁆𑀤𑀲𑀁 𑀬𑀁 𑀫𑀳𑀸𑀫𑀼𑀦𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀤𑁂𑀲𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁨𑁧. ‘‘𑀏𑀓𑀸𑀤𑀲𑁂 𑀓𑀧𑁆𑀧𑀲𑀢𑁂, 𑀕𑁄𑀲𑀼𑀚𑀸𑀢𑀲𑀦𑀸𑀫𑀓𑁄;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁨𑁨. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀤𑁂𑀲𑀧𑀽𑀚𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀤𑁂𑀲𑀧𑀽𑀚𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀘𑀢𑀼𑀢𑁆𑀣𑀁.

𑁫. 𑀓𑀡𑀺𑀓𑀸𑀭𑀙𑀢𑁆𑀢𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁩. ‘‘𑀯𑁂𑀲𑁆𑀲𑀪𑀽 𑀦𑀸𑀫 𑀲𑀫𑁆𑀩𑀼𑀤𑁆𑀥𑁄, 𑀮𑁄𑀓𑀚𑁂𑀝𑁆𑀞𑁄 𑀦𑀭𑀸𑀲𑀪𑁄;

𑀤𑀺𑀯𑀸𑀯𑀺𑀳𑀸𑀭𑀸𑀬 𑀫𑀼𑀦𑀺, 𑀑𑀕𑀸𑀳𑀬𑀺 𑀫𑀳𑀸𑀯𑀦𑀁.

𑁨𑁪. ‘‘𑀓𑀡𑀺𑀓𑀸𑀭𑀁 𑀑𑀘𑀺𑀦𑀺𑀢𑁆𑀯𑀸, 𑀙𑀢𑁆𑀢𑀁 𑀓𑀢𑁆𑀯𑀸𑀦𑀳𑀁 𑀢𑀤𑀸;

𑀧𑀼𑀧𑁆𑀨𑀘𑁆𑀙𑀤𑀦𑀁 𑀓𑀢𑁆𑀯𑀸𑀦, 𑀩𑀼𑀤𑁆𑀥𑀲𑁆𑀲 𑀅𑀪𑀺𑀭𑁄𑀧𑀬𑀺𑀁.

𑁨𑁫. ‘‘𑀏𑀓𑀢𑁆𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀭𑁄𑀧𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁨𑁬. ‘‘𑀇𑀢𑁄 𑀯𑀻𑀲𑀢𑀺𑀓𑀧𑁆𑀧𑀫𑁆𑀳𑀺, 𑀲𑁄𑀡𑁆𑀡𑀸𑀪𑀸 𑀅𑀝𑁆𑀞 𑀔𑀢𑁆𑀢𑀺𑀬𑀸;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑀸, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁨𑁭. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀓𑀡𑀺𑀓𑀸𑀭𑀙𑀢𑁆𑀢𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀓𑀡𑀺𑀓𑀸𑀭𑀙𑀢𑁆𑀢𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀜𑁆𑀘𑀫𑀁.

𑁬. 𑀲𑀧𑁆𑀧𑀺𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁮. ‘‘𑀨𑀼𑀲𑁆𑀲𑁄 𑀦𑀸𑀫𑀸𑀲𑀺 [𑀦𑀸𑀫𑀸𑀣 (𑀲𑀻.)] 𑀪𑀕𑀯𑀸, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄;

𑀕𑀘𑁆𑀙𑀢𑁂 𑀯𑀻𑀣𑀺𑀬𑀁 𑀯𑀻𑀭𑁄, 𑀦𑀺𑀩𑁆𑀩𑀸𑀧𑁂𑀦𑁆𑀢𑁄 𑀫𑀳𑀸𑀚𑀦𑀁.

𑁨𑁯. ‘‘𑀅𑀦𑀼𑀧𑀼𑀩𑁆𑀩𑁂𑀦 𑀪𑀕𑀯𑀸, 𑀆𑀕𑀘𑁆𑀙𑀺 𑀫𑀫 𑀲𑀦𑁆𑀢𑀺𑀓𑀁;

𑀢𑀢𑁄 𑀢𑀁 [𑀢𑀢𑁄𑀳𑀁 (𑀲𑀻. 𑀲𑁆𑀬𑀸.)] 𑀧𑀢𑁆𑀢𑀁 𑀧𑀕𑁆𑀕𑀬𑁆𑀳, 𑀲𑀧𑁆𑀧𑀺𑀢𑁂𑀮𑀫𑀤𑀸𑀲𑀳𑀁.

𑁩𑁦. ‘‘𑀤𑁆𑀯𑁂𑀦𑀯𑀼𑀢𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀲𑀧𑁆𑀧𑀺𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀲𑀧𑁆𑀧𑀺𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁩𑁧. ‘‘𑀙𑀧𑁆𑀧𑀜𑁆𑀜𑀸𑀲𑁂 𑀇𑀢𑁄 𑀓𑀧𑁆𑀧𑁂, 𑀏𑀓𑁄 𑀆𑀲𑀺 𑀲𑀫𑁄𑀤𑀓𑁄;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁩𑁨. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀧𑁆𑀧𑀺𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀧𑁆𑀧𑀺𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀙𑀝𑁆𑀞𑀁.

𑁭. 𑀬𑀽𑀣𑀺𑀓𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁩. ‘‘𑀘𑀦𑁆𑀤𑀪𑀸𑀕𑀸𑀦𑀤𑀻𑀢𑀻𑀭𑁂, 𑀅𑀦𑀼𑀲𑁄𑀢𑀁 𑀯𑀚𑀸𑀫𑀳𑀁;

𑀲𑀬𑀫𑁆𑀪𑀼𑀁 𑀅𑀤𑁆𑀤𑀲𑀁 𑀢𑀢𑁆𑀣, 𑀲𑀸𑀮𑀭𑀸𑀚𑀁𑀯 𑀨𑀼𑀮𑁆𑀮𑀺𑀢𑀁.

𑁩𑁪. ‘‘𑀧𑀼𑀧𑁆𑀨𑀁 𑀬𑀽𑀣𑀺𑀓𑀫𑀸𑀤𑀸𑀬, 𑀉𑀧𑀕𑀘𑁆𑀙𑀺𑀁 𑀫𑀳𑀸𑀫𑀼𑀦𑀺𑀁;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀩𑀼𑀤𑁆𑀥𑀲𑁆𑀲 𑀅𑀪𑀺𑀭𑁄𑀧𑀬𑀺𑀁.

𑁩𑁫. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀭𑁄𑀧𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁩𑁬. ‘‘𑀲𑀢𑁆𑀢𑀲𑀝𑁆𑀞𑀺𑀫𑁆𑀳𑀺𑀢𑁄 𑀓𑀧𑁆𑀧𑁂, 𑀏𑀓𑁄 𑀲𑀸𑀫𑀼𑀤𑁆𑀥𑀭𑁄 𑀅𑀳𑀼;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁩𑁭. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀬𑀽𑀣𑀺𑀓𑀧𑀼𑀧𑁆𑀨𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀬𑀽𑀣𑀺𑀓𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀲𑀢𑁆𑀢𑀫𑀁.

𑁮. 𑀤𑀼𑀲𑁆𑀲𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁮. ‘‘𑀢𑀺𑀯𑀭𑀸𑀬𑀁 𑀧𑀼𑀭𑁂 𑀭𑀫𑁆𑀫𑁂, 𑀭𑀸𑀚𑀧𑀼𑀢𑁆𑀢𑁄𑀲𑀳𑀁 [𑀭𑀸𑀚𑀧𑀼𑀢𑁆𑀢𑁄 𑀅𑀳𑀁 (𑀲𑀻. 𑀲𑁆𑀬𑀸.)] 𑀢𑀤𑀸;

𑀧𑀡𑁆𑀡𑀸𑀓𑀸𑀭𑀁 𑀮𑀪𑀺𑀢𑁆𑀯𑀸𑀦, 𑀉𑀧𑀲𑀦𑁆𑀢𑀲𑁆𑀲𑀤𑀸𑀲𑀳𑀁.

𑁩𑁯. ‘‘𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸, 𑀯𑀢𑁆𑀣𑀁 [𑀦𑀯𑀁 (𑀓.)] 𑀳𑀢𑁆𑀣𑁂𑀦 𑀆𑀫𑀲𑀺;

𑀲𑀺𑀤𑁆𑀥𑀢𑁆𑀣𑁄 𑀅𑀥𑀺𑀯𑀸𑀲𑁂𑀢𑁆𑀯𑀸, 𑀯𑁂𑀳𑀸𑀲𑀁 𑀦𑀪𑀫𑀼𑀕𑁆𑀕𑀫𑀺.

𑁪𑁦. ‘‘𑀩𑀼𑀤𑁆𑀥𑀲𑁆𑀲 𑀕𑀘𑁆𑀙𑀫𑀸𑀦𑀲𑁆𑀲, 𑀤𑀼𑀲𑁆𑀲𑀸 𑀥𑀸𑀯𑀦𑁆𑀢𑀺 𑀧𑀘𑁆𑀙𑀢𑁄;

𑀢𑀢𑁆𑀣 𑀘𑀺𑀢𑁆𑀢𑀁 𑀧𑀲𑀸𑀤𑁂𑀲𑀺𑀁, 𑀩𑀼𑀤𑁆𑀥𑁄 𑀦𑁄 𑀅𑀕𑁆𑀕𑀧𑀼𑀕𑁆𑀕𑀮𑁄.

𑁪𑁧. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀤𑀼𑀲𑁆𑀲𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀤𑀼𑀲𑁆𑀲𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁪𑁨. ‘‘𑀲𑀢𑁆𑀢𑀲𑀝𑁆𑀞𑀺𑀫𑁆𑀳𑀺𑀢𑁄 𑀓𑀧𑁆𑀧𑁂, 𑀘𑀓𑁆𑀓𑀯𑀢𑁆𑀢𑀻 𑀢𑀤𑀸 𑀅𑀳𑀼;

𑀧𑀭𑀺𑀲𑀼𑀤𑁆𑀥𑁄𑀢𑀺 𑀦𑀸𑀫𑁂𑀦, 𑀫𑀦𑀼𑀚𑀺𑀦𑁆𑀤𑁄 𑀫𑀳𑀩𑁆𑀩𑀮𑁄.

𑁪𑁩. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀤𑀼𑀲𑁆𑀲𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀤𑀼𑀲𑁆𑀲𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀅𑀝𑁆𑀞𑀫𑀁.

𑁯. 𑀲𑀫𑀸𑀤𑀧𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁪𑁪. ‘‘𑀦𑀕𑀭𑁂 𑀩𑀦𑁆𑀥𑀼𑀫𑀢𑀺𑀬𑀸, 𑀫𑀳𑀸𑀧𑀽𑀕𑀕𑀡𑁄 𑀅𑀳𑀼;

𑀢𑁂𑀲𑀸𑀳𑀁 𑀧𑀯𑀭𑁄 𑀆𑀲𑀺𑀁, 𑀫𑀫 𑀩𑀤𑁆𑀥𑀘𑀭𑀸 [𑀧𑀝𑁆𑀞𑀘𑀭𑀸 (𑀲𑁆𑀬𑀸.)] 𑀘 𑀢𑁂.

𑁪𑁫. ‘‘𑀲𑀩𑁆𑀩𑁂 𑀢𑁂 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸, 𑀧𑀼𑀜𑁆𑀜𑀓𑀫𑁆𑀫𑁂 𑀲𑀫𑀸𑀤𑀬𑀺𑀁;

𑀫𑀸𑀴𑀁 𑀓𑀲𑁆𑀲𑀸𑀫 𑀲𑀗𑁆𑀖𑀲𑁆𑀲, 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀅𑀦𑀼𑀢𑁆𑀢𑀭𑀁.

𑁪𑁬. ‘‘𑀲𑀸𑀥𑀽𑀢𑀺 𑀢𑁂 𑀧𑀝𑀺𑀲𑁆𑀲𑀼𑀢𑁆𑀯𑀸, 𑀫𑀫 𑀙𑀦𑁆𑀤𑀯𑀲𑀸𑀦𑀼𑀕𑀸;

𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀘 𑀢𑀁 𑀫𑀸𑀴𑀁, 𑀯𑀺𑀧𑀲𑁆𑀲𑀺𑀲𑁆𑀲 𑀅𑀤𑀫𑁆𑀳𑀲𑁂.

𑁪𑁭. ‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀫𑀸𑀴𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀫𑀸𑀴𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁪𑁮. ‘‘𑀏𑀓𑀽𑀦𑀲𑀢𑁆𑀢𑀢𑀺𑀓𑀧𑁆𑀧𑁂 [𑀏𑀓𑀽𑀦𑀲𑀝𑁆𑀞𑀺𑀓𑀧𑁆𑀧𑀫𑁆𑀳𑀺 (𑀲𑀻. 𑀲𑁆𑀬𑀸.)],

𑀏𑀓𑁄 𑀆𑀲𑀺 𑀚𑀦𑀸𑀥𑀺𑀧𑁄.

𑀆𑀤𑁂𑀬𑁆𑀬𑁄 𑀦𑀸𑀫 𑀦𑀸𑀫𑁂𑀦, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁪𑁯. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀫𑀸𑀤𑀧𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀫𑀸𑀤𑀧𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀦𑀯𑀫𑀁.

𑁧𑁦. 𑀧𑀜𑁆𑀘𑀗𑁆𑀕𑀼𑀮𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁫𑁦. ‘‘𑀢𑀺𑀲𑁆𑀲𑁄 𑀦𑀸𑀫𑀸𑀲𑀺 𑀪𑀕𑀯𑀸, 𑀮𑁄𑀓𑀚𑁂𑀝𑁆𑀞𑁄 𑀦𑀭𑀸𑀲𑀪𑁄;

𑀧𑀯𑀺𑀲𑀢𑀺 𑀕𑀦𑁆𑀥𑀓𑀼𑀝𑀺𑀁, 𑀯𑀺𑀳𑀸𑀭𑀓𑀼𑀲𑀮𑁄 𑀫𑀼𑀦𑀺.

𑁫𑁧. ‘‘𑀲𑀼𑀕𑀦𑁆𑀥𑀫𑀸𑀮𑀫𑀸𑀤𑀸𑀬, 𑀅𑀕𑀫𑀸𑀲𑀺𑀁 𑀚𑀺𑀦𑀦𑁆𑀢𑀺𑀓𑀁;

𑀅𑀧𑀲𑀤𑁆𑀤𑁄 𑀘 𑀲𑀫𑁆𑀩𑀼𑀤𑁆𑀥𑁂, 𑀧𑀜𑁆𑀘𑀗𑁆𑀕𑀼𑀮𑀺𑀫𑀤𑀸𑀲𑀳𑀁.

𑁫𑁨. ‘‘𑀤𑁆𑀯𑁂𑀦𑀯𑀼𑀢𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀕𑀦𑁆𑀥𑀫𑀪𑀺𑀭𑁄𑀧𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀧𑀜𑁆𑀘𑀗𑁆𑀕𑀼𑀮𑀺𑀲𑁆𑀲𑀺𑀤𑀁 [𑀧𑀜𑁆𑀘𑀗𑁆𑀕𑀼𑀮𑀺𑀬𑀺𑀤𑀁 (𑀲𑀻.)] 𑀨𑀮𑀁.

𑁫𑁩. ‘‘𑀤𑁆𑀯𑁂𑀲𑀢𑁆𑀢𑀢𑀺𑀫𑁆𑀳𑀺𑀢𑁄 𑀓𑀧𑁆𑀧𑁂, 𑀭𑀸𑀚𑀸 𑀆𑀲𑀺𑀁 𑀲𑀬𑀫𑁆𑀧𑀪𑁄;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁫𑁪. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀜𑁆𑀘𑀗𑁆𑀕𑀼𑀮𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺;

𑀧𑀜𑁆𑀘𑀗𑁆𑀕𑀼𑀮𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀲𑀫𑀁.

𑀲𑀼𑀧𑀸𑀭𑀺𑀘𑀭𑀺𑀬𑀯𑀕𑁆𑀕𑁄 𑀲𑀢𑁆𑀢𑀭𑀲𑀫𑁄.