𑁧𑁮. 𑀓𑀼𑀫𑀼𑀤𑀯𑀕𑁆𑀕𑁄

𑁧. 𑀓𑀼𑀫𑀼𑀤𑀫𑀸𑀮𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧. ‘‘𑀧𑀩𑁆𑀩𑀢𑁂 𑀳𑀺𑀫𑀯𑀦𑁆𑀢𑀫𑁆𑀳𑀺, 𑀫𑀳𑀸𑀚𑀸𑀢𑀲𑁆𑀲𑀭𑁄 𑀅𑀳𑀼;

𑀢𑀢𑁆𑀣𑀚𑁄 𑀭𑀓𑁆𑀔𑀲𑁄 𑀆𑀲𑀺𑀁, 𑀖𑁄𑀭𑀭𑀽𑀧𑁄 𑀫𑀳𑀩𑁆𑀩𑀮𑁄.

𑁨. ‘‘𑀓𑀼𑀫𑀼𑀤𑀁 𑀧𑀼𑀧𑁆𑀨𑀢𑁂 𑀢𑀢𑁆𑀣, 𑀘𑀓𑁆𑀓𑀫𑀢𑁆𑀢𑀸𑀦𑀺 𑀚𑀸𑀬𑀭𑁂;

𑀑𑀘𑀺𑀦𑀸𑀫𑀺 𑀘 𑀢𑀁 𑀧𑀼𑀧𑁆𑀨𑀁, 𑀩𑀮𑀺𑀦𑁄 𑀲𑀫𑀺𑀢𑀺𑀁 𑀢𑀤𑀸.

𑁩. ‘‘𑀅𑀢𑁆𑀣𑀤𑀲𑁆𑀲𑀻 𑀢𑀼 𑀪𑀕𑀯𑀸, 𑀤𑁆𑀯𑀺𑀧𑀤𑀺𑀦𑁆𑀤𑁄 𑀦𑀭𑀸𑀲𑀪𑁄;

𑀧𑀼𑀧𑁆𑀨𑀲𑀗𑁆𑀓𑁄𑀘𑀺𑀢𑀁 [𑀧𑀼𑀧𑁆𑀨𑀁 𑀲𑀗𑁆𑀓𑁄𑀘𑀺𑀢𑀁 (𑀲𑀻. 𑀲𑁆𑀬𑀸.), 𑀧𑀼𑀧𑁆𑀨𑀁 𑀲𑀫𑁄𑀘𑀺𑀢𑀁 (?)] 𑀤𑀺𑀲𑁆𑀯𑀸, 𑀆𑀕𑀘𑁆𑀙𑀺 𑀫𑀫 𑀲𑀦𑁆𑀢𑀺𑀓𑀁.

𑁪. ‘‘𑀉𑀧𑀸𑀕𑀢𑀜𑁆𑀘 𑀲𑀫𑁆𑀩𑀼𑀤𑁆𑀥𑀁, 𑀤𑁂𑀯𑀤𑁂𑀯𑀁 𑀦𑀭𑀸𑀲𑀪𑀁;

𑀲𑀩𑁆𑀩𑀜𑁆𑀘 𑀧𑀼𑀧𑁆𑀨𑀁 𑀧𑀕𑁆𑀕𑀬𑁆𑀳, 𑀩𑀼𑀤𑁆𑀥𑀲𑁆𑀲 𑀅𑀪𑀺𑀭𑁄𑀧𑀬𑀺𑀁.

𑁫. ‘‘𑀬𑀸𑀯𑀢𑀸 𑀳𑀺𑀫𑀯𑀦𑁆𑀢𑀦𑁆𑀢𑀸, 𑀧𑀭𑀺𑀲𑀸 𑀲𑀸 [𑀳𑀺𑀫𑀯𑀦𑁆𑀢𑀲𑁆𑀫𑀺𑀁, 𑀬𑀸𑀯 𑀫𑀸𑀮𑀸 (𑀲𑁆𑀬𑀸.)] 𑀢𑀤𑀸 𑀅𑀳𑀼;

𑀢𑀸𑀯𑀘𑁆𑀙𑀤𑀦𑀲𑀫𑁆𑀧𑀦𑁆𑀦𑁄, 𑀅𑀕𑀫𑀸𑀲𑀺 𑀢𑀣𑀸𑀕𑀢𑁄.

𑁬. ‘‘𑀅𑀝𑁆𑀞𑀸𑀭𑀲𑁂 𑀓𑀧𑁆𑀧𑀲𑀢𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀭𑁄𑀧𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁭. ‘‘𑀇𑀢𑁄 𑀧𑀦𑁆𑀦𑀭𑀲𑁂 𑀓𑀧𑁆𑀧𑁂, 𑀲𑀢𑁆𑀢𑀸𑀳𑁂𑀲𑀼𑀁 𑀚𑀦𑀸𑀥𑀺𑀧𑀸;

𑀲𑀳𑀲𑁆𑀲𑀭𑀣𑀦𑀸𑀫𑀸 𑀢𑁂, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁮. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀓𑀼𑀫𑀼𑀤𑀫𑀸𑀮𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀓𑀼𑀫𑀼𑀤𑀫𑀸𑀮𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀞𑀫𑀁.

𑁨. 𑀦𑀺𑀲𑁆𑀲𑁂𑀡𑀺𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁯. ‘‘𑀓𑁄𑀡𑁆𑀟𑀜𑁆𑀜𑀲𑁆𑀲 𑀪𑀕𑀯𑀢𑁄, 𑀮𑁄𑀓𑀚𑁂𑀝𑁆𑀞𑀲𑁆𑀲 𑀢𑀸𑀤𑀺𑀦𑁄;

𑀆𑀭𑁄𑀳𑀢𑁆𑀣𑀸𑀬 𑀧𑀸𑀲𑀸𑀤𑀁, 𑀦𑀺𑀲𑁆𑀲𑁂𑀡𑀻 𑀓𑀸𑀭𑀺𑀢𑀸 𑀫𑀬𑀸.

𑁧𑁦. ‘‘𑀢𑁂𑀦 𑀘𑀺𑀢𑁆𑀢𑀧𑁆𑀧𑀲𑀸𑀤𑁂𑀦, 𑀅𑀦𑀼𑀪𑁄𑀢𑁆𑀯𑀸𑀦 𑀲𑀫𑁆𑀧𑀤𑀸;

𑀥𑀸𑀭𑁂𑀫𑀺 𑀅𑀦𑁆𑀢𑀺𑀫𑀁 𑀤𑁂𑀳𑀁, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀲𑀦𑁂.

𑁧𑁧. ‘‘𑀏𑀓𑀢𑁆𑀢𑀺𑀁𑀲𑀫𑁆𑀳𑀺 𑀓𑀧𑁆𑀧𑀸𑀦𑀁, 𑀲𑀳𑀲𑁆𑀲𑀫𑁆𑀳𑀺 𑀢𑀬𑁄 𑀅𑀳𑀼𑀁 [𑀫𑀳𑀸 (𑀲𑀻. 𑀲𑁆𑀬𑀸.)];

𑀲𑀫𑁆𑀩𑀳𑀼𑀮𑀸 𑀦𑀸𑀫 𑀭𑀸𑀚𑀸𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁧𑁨. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀦𑀺𑀲𑁆𑀲𑁂𑀡𑀺𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀦𑀺𑀲𑁆𑀲𑁂𑀡𑀺𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀼𑀢𑀺𑀬𑀁.

𑁩. 𑀭𑀢𑁆𑀢𑀺𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁩. ‘‘𑀫𑀺𑀕𑀮𑀼𑀤𑁆𑀤𑁄 𑀧𑀼𑀭𑁂 𑀆𑀲𑀺𑀁, 𑀅𑀭𑀜𑁆𑀜𑁂 𑀓𑀸𑀦𑀦𑁂 𑀅𑀳𑀁;

𑀯𑀺𑀧𑀲𑁆𑀲𑀺𑀁 𑀅𑀤𑁆𑀤𑀲𑀁 𑀩𑀼𑀤𑁆𑀥𑀁, 𑀤𑁂𑀯𑀤𑁂𑀯𑀁 𑀦𑀭𑀸𑀲𑀪𑀁.

𑁧𑁪. ‘‘𑀭𑀢𑁆𑀢𑀺𑀓𑀁 𑀧𑀼𑀧𑁆𑀨𑀺𑀢𑀁 𑀤𑀺𑀲𑁆𑀯𑀸, 𑀓𑀼𑀝𑀚𑀁 𑀥𑀭𑀡𑀻𑀭𑀼𑀳𑀁;

𑀲𑀫𑀽𑀮𑀁 𑀧𑀕𑁆𑀕𑀳𑁂𑀢𑁆𑀯𑀸𑀦, 𑀉𑀧𑀦𑁂𑀲𑀺𑀁 𑀫𑀳𑁂𑀲𑀺𑀦𑁄.

𑁧𑁫. ‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀭𑁄𑀧𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀧𑀼𑀧𑁆𑀨𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁧𑁬. ‘‘𑀇𑀢𑁄 𑀘 𑀅𑀝𑁆𑀞𑀫𑁂 𑀓𑀧𑁆𑀧𑁂, 𑀲𑀼𑀧𑁆𑀧𑀲𑀦𑁆𑀦𑀲𑀦𑀸𑀫𑀓𑁄;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀭𑀸𑀚𑀸𑀳𑁄𑀲𑀺𑀁 𑀫𑀳𑀩𑁆𑀩𑀮𑁄.

𑁧𑁭. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀭𑀢𑁆𑀢𑀺𑀧𑀼𑀧𑁆𑀨𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀭𑀢𑁆𑀢𑀺𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀢𑀢𑀺𑀬𑀁.

𑁪. 𑀉𑀤𑀧𑀸𑀦𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁮. ‘‘𑀯𑀺𑀧𑀲𑁆𑀲𑀺𑀦𑁄 𑀪𑀕𑀯𑀢𑁄, 𑀉𑀤𑀧𑀸𑀦𑁄 𑀓𑀢𑁄 𑀫𑀬𑀸;

𑀧𑀺𑀡𑁆𑀟𑀧𑀸𑀢𑀜𑁆𑀘 𑀤𑀢𑁆𑀯𑀸𑀦 [𑀕𑀳𑁂𑀢𑁆𑀯𑀸𑀦 (𑀲𑁆𑀬𑀸.)], 𑀦𑀺𑀬𑁆𑀬𑀸𑀤𑁂𑀲𑀺𑀫𑀳𑀁 𑀢𑀤𑀸.

𑁧𑁯. ‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀓𑀫𑁆𑀫𑀫𑀓𑀭𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀉𑀤𑀧𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁨𑁦. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀉𑀤𑀧𑀸𑀦𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀉𑀤𑀧𑀸𑀦𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀘𑀢𑀼𑀢𑁆𑀣𑀁.

𑁫. 𑀲𑀻𑀳𑀸𑀲𑀦𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁧. ‘‘𑀦𑀺𑀩𑁆𑀩𑀼𑀢𑁂 𑀮𑁄𑀓𑀦𑀸𑀣𑀫𑁆𑀳𑀺, 𑀧𑀤𑀼𑀫𑀼𑀢𑁆𑀢𑀭𑀦𑀸𑀬𑀓𑁂;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀲𑀻𑀳𑀸𑀲𑀦𑀫𑀤𑀸𑀲𑀳𑀁.

𑁨𑁨. ‘‘𑀩𑀳𑀽𑀳𑀺 𑀕𑀦𑁆𑀥𑀫𑀸𑀮𑁂𑀳𑀺, 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀸𑀯𑀳𑁂;

𑀢𑀢𑁆𑀣 𑀧𑀽𑀚𑀜𑁆𑀘 𑀓𑀢𑁆𑀯𑀸𑀦, 𑀦𑀺𑀩𑁆𑀩𑀸𑀬𑀢𑀺 𑀩𑀳𑀼𑀚𑁆𑀚𑀦𑁄.

𑁨𑁩. ‘‘𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀯𑀦𑁆𑀤𑀺𑀢𑁆𑀯𑀸 𑀩𑁄𑀥𑀺𑀫𑀼𑀢𑁆𑀢𑀫𑀁;

𑀓𑀧𑁆𑀧𑀸𑀦𑀁 𑀲𑀢𑀲𑀳𑀲𑁆𑀲𑀁, 𑀤𑀼𑀕𑁆𑀕𑀢𑀺𑀁 𑀦𑀼𑀧𑀧𑀚𑁆𑀚𑀳𑀁.

𑁨𑁪. ‘‘𑀧𑀦𑁆𑀦𑀭𑀲𑀲𑀳𑀲𑁆𑀲𑀫𑁆𑀳𑀺, 𑀓𑀧𑁆𑀧𑀸𑀦𑀁 𑀅𑀝𑁆𑀞 𑀆𑀲𑀼 𑀢𑁂 [𑀅𑀝𑁆𑀞 𑀆𑀲𑀬𑀼𑀁 (𑀓.)];

𑀲𑀺𑀮𑀼𑀘𑁆𑀘𑀬𑀲𑀦𑀸𑀫𑀸 𑀘, 𑀭𑀸𑀚𑀸𑀦𑁄 𑀘𑀓𑁆𑀓𑀯𑀢𑁆𑀢𑀺𑀦𑁄.

𑁨𑁫. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀻𑀳𑀸𑀲𑀦𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺;

𑀲𑀻𑀳𑀸𑀲𑀦𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀜𑁆𑀘𑀫𑀁.

𑁬. 𑀫𑀕𑁆𑀕𑀤𑀢𑁆𑀢𑀺𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁬. ‘‘𑀅𑀦𑁄𑀫𑀤𑀲𑁆𑀲𑀻 𑀪𑀕𑀯𑀸, 𑀤𑁆𑀯𑀺𑀧𑀤𑀺𑀦𑁆𑀤𑁄 𑀦𑀭𑀸𑀲𑀪𑁄;

𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀢𑁆𑀣𑀸𑀬, 𑀅𑀩𑁆𑀪𑁄𑀓𑀸𑀲𑀫𑁆𑀳𑀺 𑀘𑀗𑁆𑀓𑀫𑀺.

𑁨𑁭. ‘‘𑀉𑀤𑁆𑀥𑀢𑁂 𑀧𑀸𑀤𑁂 𑀧𑀼𑀧𑁆𑀨𑀸𑀦𑀺, 𑀲𑁄𑀪𑀁 𑀫𑀼𑀤𑁆𑀥𑀦𑀺 𑀢𑀺𑀝𑁆𑀞𑀭𑁂;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀯𑀦𑁆𑀤𑀺𑀢𑁆𑀯𑀸 𑀧𑀼𑀧𑁆𑀨𑀫𑁄𑀓𑀺𑀭𑀺𑀁.

𑁨𑁮. ‘‘𑀯𑀻𑀲𑀓𑀧𑁆𑀧𑀲𑀳𑀲𑁆𑀲𑀫𑁆𑀳𑀺, 𑀇𑀢𑁄 𑀧𑀜𑁆𑀘 𑀚𑀦𑀸 𑀅𑀳𑀼𑀁;

𑀧𑀼𑀧𑁆𑀨𑀘𑁆𑀙𑀤𑀦𑀺𑀬𑀸 𑀦𑀸𑀫, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁨𑁯. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀫𑀕𑁆𑀕𑀤𑀢𑁆𑀢𑀺𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀫𑀕𑁆𑀕𑀤𑀢𑁆𑀢𑀺𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀙𑀝𑁆𑀞𑀁.

𑁭. 𑀏𑀓𑀤𑀻𑀧𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁦. ‘‘𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀫𑀼𑀦𑀺𑀦𑁄, 𑀲𑀴𑀮𑁂 𑀩𑁄𑀥𑀺𑀫𑀼𑀢𑁆𑀢𑀫𑁂;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀏𑀓𑀤𑀻𑀧𑀁 𑀅𑀤𑀸𑀲𑀳𑀁.

𑁩𑁧. ‘‘𑀪𑀯𑁂 𑀦𑀺𑀩𑁆𑀩𑀢𑁆𑀢𑀫𑀸𑀦𑀫𑁆𑀳𑀺, 𑀦𑀺𑀩𑁆𑀩𑀢𑁆𑀢𑁂 𑀧𑀼𑀜𑁆𑀜𑀲𑀜𑁆𑀘𑀬𑁂;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀤𑀻𑀧𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁩𑁨. ‘‘𑀲𑁄𑀴𑀲𑁂 𑀓𑀧𑁆𑀧𑀲𑀳𑀲𑁆𑀲𑁂, 𑀇𑀢𑁄 𑀢𑁂 𑀘𑀢𑀼𑀭𑁄 𑀚𑀦𑀸;

𑀘𑀦𑁆𑀤𑀸𑀪𑀸 𑀦𑀸𑀫 𑀦𑀸𑀫𑁂𑀦, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁩𑁩. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀏𑀓𑀤𑀻𑀧𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀏𑀓𑀤𑀻𑀧𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀲𑀢𑁆𑀢𑀫𑀁.

𑀦𑀯𑀫𑀁 𑀪𑀸𑀡𑀯𑀸𑀭𑀁.

𑁮. 𑀫𑀡𑀺𑀧𑀽𑀚𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁪. ‘‘𑀑𑀭𑁂𑀦 𑀳𑀺𑀫𑀯𑀦𑁆𑀢𑀲𑁆𑀲, 𑀦𑀤𑀺𑀓𑀸 𑀲𑀫𑁆𑀧𑀯𑀢𑁆𑀢𑀣;

𑀢𑀲𑁆𑀲𑀸 𑀘𑀸𑀦𑀼𑀧𑀔𑁂𑀢𑁆𑀢𑀫𑁆𑀳𑀺, 𑀲𑀬𑀫𑁆𑀪𑀽 𑀯𑀲𑀢𑁂 𑀢𑀤𑀸.

𑁩𑁫. ‘‘𑀫𑀡𑀺𑀁 𑀧𑀕𑁆𑀕𑀬𑁆𑀳 𑀧𑀮𑁆𑀮𑀗𑁆𑀓𑀁, 𑀲𑀸𑀥𑀼𑀘𑀺𑀢𑁆𑀢𑀁 𑀫𑀦𑁄𑀭𑀫𑀁;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀩𑀼𑀤𑁆𑀥𑀲𑁆𑀲 𑀅𑀪𑀺𑀭𑁄𑀧𑀬𑀺𑀁.

𑁩𑁬. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀫𑀡𑀺𑀁 𑀅𑀪𑀺𑀭𑁄𑀧𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁩𑁭. ‘‘𑀇𑀢𑁄 𑀘 𑀤𑁆𑀯𑀸𑀤𑀲𑁂 𑀓𑀧𑁆𑀧𑁂, 𑀲𑀢𑀭𑀁𑀲𑀻𑀲𑀦𑀸𑀫𑀓𑀸;

𑀅𑀝𑁆𑀞 𑀢𑁂 𑀆𑀲𑀼𑀁 𑀭𑀸𑀚𑀸𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁩𑁮. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀫𑀡𑀺𑀧𑀽𑀚𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀫𑀡𑀺𑀧𑀽𑀚𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀅𑀝𑁆𑀞𑀫𑀁.

𑁯. 𑀢𑀺𑀓𑀺𑀘𑁆𑀙𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁯. ‘‘𑀦𑀕𑀭𑁂 𑀩𑀦𑁆𑀥𑀼𑀫𑀢𑀺𑀬𑀸, 𑀯𑁂𑀚𑁆𑀚𑁄 𑀆𑀲𑀺𑀁 𑀲𑀼𑀲𑀺𑀓𑁆𑀔𑀺𑀢𑁄;

𑀆𑀢𑀼𑀭𑀸𑀦𑀁 𑀲𑀤𑀼𑀓𑁆𑀔𑀸𑀦𑀁, 𑀫𑀳𑀸𑀚𑀦𑀲𑀼𑀔𑀸𑀯𑀳𑁄.

𑁪𑁦. ‘‘𑀩𑁆𑀬𑀸𑀥𑀺𑀢𑀁 𑀲𑀫𑀡𑀁 𑀤𑀺𑀲𑁆𑀯𑀸, 𑀲𑀻𑀮𑀯𑀦𑁆𑀢𑀁 𑀫𑀳𑀸𑀚𑀼𑀢𑀺𑀁;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀪𑁂𑀲𑀚𑁆𑀚𑀫𑀤𑀤𑀺𑀁 𑀢𑀤𑀸.

𑁪𑁧. ‘‘𑀅𑀭𑁄𑀕𑁄 𑀆𑀲𑀺 𑀢𑁂𑀦𑁂𑀯, 𑀲𑀫𑀡𑁄 𑀲𑀁𑀯𑀼𑀢𑀺𑀦𑁆𑀤𑁆𑀭𑀺𑀬𑁄;

𑀅𑀲𑁄𑀓𑁄 𑀦𑀸𑀫 𑀦𑀸𑀫𑁂𑀦, 𑀉𑀧𑀝𑁆𑀞𑀸𑀓𑁄 𑀯𑀺𑀧𑀲𑁆𑀲𑀺𑀦𑁄.

𑁪𑁨. ‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀑𑀲𑀥𑀫𑀤𑀸𑀲𑀳𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀪𑁂𑀲𑀚𑁆𑀚𑀲𑁆𑀲 𑀇𑀤𑀁 𑀨𑀮𑀁.

𑁪𑁩. ‘‘𑀇𑀢𑁄 𑀘 𑀅𑀝𑁆𑀞𑀫𑁂 𑀓𑀧𑁆𑀧𑁂, 𑀲𑀩𑁆𑀩𑁄𑀲𑀥𑀲𑀦𑀸𑀫𑀓𑁄;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁪𑁪. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀢𑀺𑀓𑀺𑀘𑁆𑀙𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀢𑀺𑀓𑀺𑀘𑁆𑀙𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀦𑀯𑀫𑀁.

𑁧𑁦. 𑀲𑀗𑁆𑀖𑀼𑀧𑀝𑁆𑀞𑀸𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁪𑁫. ‘‘𑀯𑁂𑀲𑁆𑀲𑀪𑀼𑀫𑁆𑀳𑀺 𑀪𑀕𑀯𑀢𑀺, 𑀅𑀳𑁄𑀲𑀸𑀭𑀸𑀫𑀺𑀓𑁄 𑀅𑀳𑀁;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀉𑀧𑀝𑁆𑀞𑀺𑀁 𑀲𑀗𑁆𑀖𑀫𑀼𑀢𑁆𑀢𑀫𑀁.

𑁪𑁬. ‘‘𑀏𑀓𑀢𑁆𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀓𑀫𑁆𑀫𑀫𑀓𑀭𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀉𑀧𑀝𑁆𑀞𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁪𑁭. ‘‘𑀇𑀢𑁄 𑀢𑁂 𑀲𑀢𑁆𑀢𑀫𑁂 𑀓𑀧𑁆𑀧𑁂, 𑀲𑀢𑁆𑀢𑁂𑀯𑀸𑀲𑀼𑀁 𑀲𑀫𑁄𑀤𑀓𑀸;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑀸, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁪𑁮. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀗𑁆𑀖𑀼𑀧𑀝𑁆𑀞𑀸𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀗𑁆𑀖𑀼𑀧𑀝𑁆𑀞𑀸𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀲𑀫𑀁.

𑀓𑀼𑀫𑀼𑀤𑀯𑀕𑁆𑀕𑁄 𑀅𑀝𑁆𑀞𑀸𑀭𑀲𑀫𑁄.