𑁧𑁯. 𑀓𑀼𑀝𑀚𑀧𑀼𑀧𑁆𑀨𑀺𑀬𑀯𑀕𑁆𑀕𑁄

𑁧. 𑀓𑀼𑀝𑀚𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧. ‘‘𑀲𑀼𑀯𑀡𑁆𑀡𑀯𑀡𑁆𑀡𑀁 𑀲𑀫𑁆𑀩𑀼𑀤𑁆𑀥𑀁, 𑀲𑀢𑀭𑀁𑀲𑀺𑀁𑀯 𑀉𑀕𑁆𑀕𑀢𑀁;

𑀤𑀺𑀲𑀁 𑀅𑀦𑀼𑀯𑀺𑀮𑁄𑀓𑁂𑀦𑁆𑀢𑀁, 𑀕𑀘𑁆𑀙𑀦𑁆𑀢𑀁 𑀅𑀦𑀺𑀮𑀜𑁆𑀚𑀲𑁂.

𑁨. ‘‘𑀓𑀼𑀝𑀚𑀁 𑀧𑀼𑀧𑁆𑀨𑀺𑀢𑀁 𑀤𑀺𑀲𑁆𑀯𑀸, 𑀲𑀁𑀯𑀺𑀢𑁆𑀣𑀢𑀲𑀫𑁄𑀢𑁆𑀣𑀢𑀁;

𑀭𑀼𑀓𑁆𑀔𑀢𑁄 𑀑𑀘𑀺𑀦𑀺𑀢𑁆𑀯𑀸𑀦, 𑀨𑀼𑀲𑁆𑀲𑀲𑁆𑀲 𑀅𑀪𑀺𑀭𑁄𑀧𑀬𑀺𑀁.

𑁩. ‘‘𑀤𑁆𑀯𑁂𑀦𑀯𑀼𑀢𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀭𑁄𑀧𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁪. ‘‘𑀇𑀢𑁄 𑀲𑀢𑁆𑀢𑀭𑀲𑁂 𑀓𑀧𑁆𑀧𑁂, 𑀢𑀬𑁄 𑀆𑀲𑀼𑀁 𑀲𑀼𑀧𑀼𑀧𑁆𑀨𑀺𑀢𑀸;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑀸, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁫. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀓𑀼𑀝𑀚𑀧𑀼𑀧𑁆𑀨𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀓𑀼𑀝𑀚𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀞𑀫𑀁.

𑁨. 𑀩𑀦𑁆𑀥𑀼𑀚𑀻𑀯𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁬. ‘‘𑀲𑀺𑀤𑁆𑀥𑀢𑁆𑀣𑁄 𑀦𑀸𑀫 𑀲𑀫𑁆𑀩𑀼𑀤𑁆𑀥𑁄, 𑀲𑀬𑀫𑁆𑀪𑀽 𑀲𑀩𑁆𑀪𑀺 𑀯𑀡𑁆𑀡𑀺𑀢𑁄;

𑀲𑀫𑀸𑀥𑀺𑀁 𑀲𑁄 𑀲𑀫𑀸𑀧𑀦𑁆𑀦𑁄, 𑀦𑀺𑀲𑀻𑀤𑀺 𑀧𑀩𑁆𑀩𑀢𑀦𑁆𑀢𑀭𑁂.

𑁭. ‘‘𑀚𑀸𑀢𑀲𑁆𑀲𑀭𑁂 𑀕𑀯𑁂𑀲𑀦𑁆𑀢𑁄, 𑀤𑀓𑀚𑀁 𑀧𑀼𑀧𑁆𑀨𑀫𑀼𑀢𑁆𑀢𑀫𑀁;

𑀩𑀦𑁆𑀥𑀼𑀚𑀻𑀯𑀓𑀧𑀼𑀧𑁆𑀨𑀸𑀦𑀺, 𑀅𑀤𑁆𑀤𑀲𑀁 𑀲𑀫𑀦𑀦𑁆𑀢𑀭𑀁.

𑁮. ‘‘𑀉𑀪𑁄 𑀳𑀢𑁆𑀣𑁂𑀳𑀺 𑀧𑀕𑁆𑀕𑀬𑁆𑀳, 𑀉𑀧𑀸𑀕𑀘𑁆𑀙𑀺𑀁 𑀫𑀳𑀸𑀫𑀼𑀦𑀺𑀁;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀲𑀺𑀤𑁆𑀥𑀢𑁆𑀣𑀲𑁆𑀲𑀸𑀪𑀺𑀭𑁄𑀧𑀬𑀺𑀁.

𑁯. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀭𑁄𑀧𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁧𑁦. ‘‘𑀇𑀢𑁄 𑀘𑀸𑀢𑀼𑀤𑁆𑀤𑀲𑁂 𑀓𑀧𑁆𑀧𑁂, 𑀏𑀓𑁄 𑀆𑀲𑀺𑀁 𑀚𑀦𑀸𑀥𑀺𑀧𑁄;

𑀲𑀫𑀼𑀤𑁆𑀤𑀓𑀧𑁆𑀧𑁄 𑀦𑀸𑀫𑁂𑀦, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁧𑁧. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀩𑀦𑁆𑀥𑀼𑀚𑀻𑀯𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀩𑀦𑁆𑀥𑀼𑀚𑀻𑀯𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀼𑀢𑀺𑀬𑀁.

𑁩. 𑀓𑁄𑀝𑀼𑀫𑁆𑀩𑀭𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁨. ‘‘𑀓𑀡𑀺𑀓𑀸𑀭𑀁𑀯 𑀚𑁄𑀢𑀦𑁆𑀢𑀁, 𑀦𑀺𑀲𑀺𑀦𑁆𑀦𑀁 𑀧𑀩𑁆𑀩𑀢𑀦𑁆𑀢𑀭𑁂;

𑀅𑀧𑁆𑀧𑀫𑁂𑀬𑁆𑀬𑀁𑀯 𑀉𑀤𑀥𑀺𑀁, 𑀯𑀺𑀢𑁆𑀣𑀢𑀁 𑀥𑀭𑀡𑀺𑀁 𑀬𑀣𑀸.

𑁧𑁩. ‘‘𑀧𑀽𑀚𑀺𑀢𑀁 [𑀧𑀭𑁂𑀢𑀁 (𑀲𑀻.)] 𑀤𑁂𑀯𑀲𑀗𑁆𑀖𑁂𑀦, 𑀦𑀺𑀲𑀪𑀸𑀚𑀸𑀦𑀺𑀬𑀁 𑀬𑀣𑀸;

𑀳𑀝𑁆𑀞𑁄 𑀳𑀝𑁆𑀞𑁂𑀦 𑀘𑀺𑀢𑁆𑀢𑁂𑀦, 𑀉𑀧𑀸𑀕𑀘𑁆𑀙𑀺𑀁 𑀦𑀭𑀼𑀢𑁆𑀢𑀫𑀁.

𑁧𑁪. ‘‘𑀲𑀢𑁆𑀢𑀧𑀼𑀧𑁆𑀨𑀸𑀦𑀺 𑀧𑀕𑁆𑀕𑀬𑁆𑀳, 𑀓𑁄𑀝𑀼𑀫𑁆𑀩𑀭𑀲𑀫𑀸𑀓𑀼𑀮𑀁;

𑀩𑀼𑀤𑁆𑀥𑀲𑁆𑀲 𑀅𑀪𑀺𑀭𑁄𑀧𑁂𑀲𑀺𑀁, 𑀲𑀺𑀔𑀺𑀦𑁄 𑀮𑁄𑀓𑀩𑀦𑁆𑀥𑀼𑀦𑁄.

𑁧𑁫. ‘‘𑀏𑀓𑀢𑁆𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀭𑁄𑀧𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁧𑁬. ‘‘𑀇𑀢𑁄 𑀯𑀻𑀲𑀢𑀺𑀓𑀧𑁆𑀧𑀫𑁆𑀳𑀺, 𑀫𑀳𑀸𑀦𑁂𑀮𑀲𑀦𑀸𑀫𑀓𑁄;

𑀏𑀓𑁄 𑀆𑀲𑀺 𑀫𑀳𑀸𑀢𑁂𑀚𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁧𑁭. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀓𑁄𑀝𑀼𑀫𑁆𑀩𑀭𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀓𑁄𑀝𑀼𑀫𑁆𑀩𑀭𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀢𑀢𑀺𑀬𑀁.

𑁪. 𑀧𑀜𑁆𑀘𑀳𑀢𑁆𑀣𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁮. ‘‘𑀢𑀺𑀲𑁆𑀲𑁄 𑀦𑀸𑀫𑀸𑀲𑀺 𑀪𑀕𑀯𑀸, 𑀮𑁄𑀓𑀚𑁂𑀝𑁆𑀞𑁄 𑀦𑀭𑀸𑀲𑀪𑁄;

𑀧𑀼𑀭𑀓𑁆𑀔𑀢𑁄 𑀲𑀸𑀯𑀓𑁂𑀳𑀺, 𑀭𑀣𑀺𑀬𑀁 𑀧𑀝𑀺𑀧𑀚𑁆𑀚𑀣.

𑁧𑁯. ‘‘𑀧𑀜𑁆𑀘 𑀉𑀧𑁆𑀧𑀮𑀳𑀢𑁆𑀣𑀸 𑀘, 𑀘𑀸𑀢𑀼𑀭𑀸 𑀞𑀧𑀺𑀢𑀸 𑀫𑀬𑀸;

𑀆𑀳𑀼𑀢𑀺𑀁 𑀤𑀸𑀢𑀼𑀓𑀸𑀫𑁄𑀳𑀁, 𑀧𑀕𑁆𑀕𑀡𑁆𑀳𑀺𑀁 𑀯𑀢𑀲𑀺𑀤𑁆𑀥𑀺𑀬𑀸 [𑀧𑀼𑀢𑁆𑀢𑁄𑀫𑁆𑀳𑀺 𑀳𑀺𑀢𑀲𑀺𑀤𑁆𑀥𑀺𑀬𑀸 (𑀲𑁆𑀬𑀸.)].

𑁨𑁦. ‘‘𑀲𑀼𑀯𑀡𑁆𑀡𑀯𑀡𑁆𑀡𑀁 𑀲𑀫𑁆𑀩𑀼𑀤𑁆𑀥𑀁, 𑀕𑀘𑁆𑀙𑀦𑁆𑀢𑀁 𑀅𑀦𑁆𑀢𑀭𑀸𑀧𑀡𑁂;

𑀩𑀼𑀤𑁆𑀥𑀭𑀁𑀲𑀻𑀳𑀺 𑀨𑀼𑀝𑁆𑀞𑁄𑀲𑁆𑀫𑀺 [𑀩𑀼𑀤𑁆𑀥𑀭𑀁𑀲𑁆𑀬𑀸𑀪𑀺𑀨𑀼𑀝𑁆𑀞𑁄𑀫𑁆𑀳𑀺 (𑀲𑀻.), 𑀩𑀼𑀤𑁆𑀥𑀭𑀁𑀲𑀸𑀪𑀺𑀖𑀼𑀝𑁆𑀞𑁄𑀲𑁆𑀫𑀺 (𑀓.)], 𑀧𑀽𑀚𑁂𑀲𑀺𑀁 𑀤𑁆𑀯𑀺𑀧𑀤𑀼𑀢𑁆𑀢𑀫𑀁.

𑁨𑁧. ‘‘𑀤𑁆𑀯𑁂𑀦𑀯𑀼𑀢𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀧𑀽𑀚𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁨𑁨. ‘‘𑀇𑀢𑁄 𑀢𑁂𑀭𑀲𑀓𑀧𑁆𑀧𑀫𑁆𑀳𑀺, 𑀧𑀜𑁆𑀘 𑀲𑀼𑀲𑀪𑀲𑀫𑁆𑀫𑀢𑀸;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑀸, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁨𑁩. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀜𑁆𑀘𑀳𑀢𑁆𑀣𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀜𑁆𑀘𑀳𑀢𑁆𑀣𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀘𑀢𑀼𑀢𑁆𑀣𑀁.

𑁫. 𑀇𑀲𑀺𑀫𑀼𑀕𑁆𑀕𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁪. ‘‘𑀉𑀤𑁂𑀦𑁆𑀢𑀁 𑀲𑀢𑀭𑀁𑀲𑀺𑀁𑀯, 𑀧𑀻𑀢𑀭𑀁𑀲𑀺𑀁𑀯 [𑀲𑀺𑀢𑀭𑀁𑀲𑀺𑀁𑀯 (𑀲𑀻.)] 𑀪𑀸𑀡𑀼𑀫𑀁;

𑀓𑀓𑀼𑀥𑀁 𑀯𑀺𑀮𑀲𑀦𑁆𑀢𑀁𑀯, 𑀧𑀤𑀼𑀫𑀼𑀢𑁆𑀢𑀭𑀦𑀸𑀬𑀓𑀁.

𑁨𑁫. ‘‘𑀇𑀲𑀺𑀫𑀼𑀕𑁆𑀕𑀸𑀦𑀺 𑀧𑀺𑀲𑀺𑀢𑁆𑀯𑀸 [𑀇𑀲𑀺𑀲𑀼𑀕𑁆𑀕𑀸𑀦𑀺 𑀧𑀺𑀁𑀲𑁂𑀢𑁆𑀯𑀸 (𑀲𑀻.), 𑀇𑀲𑀺𑀫𑀼𑀕𑁆𑀕𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 (𑀲𑁆𑀬𑀸.)], 𑀫𑀥𑀼𑀔𑀼𑀤𑁆𑀤𑁂 𑀅𑀦𑀻𑀴𑀓𑁂;

𑀧𑀸𑀲𑀸𑀤𑁂𑀯 𑀞𑀺𑀢𑁄 𑀲𑀦𑁆𑀢𑁄, 𑀅𑀤𑀸𑀲𑀺𑀁 𑀮𑁄𑀓𑀩𑀦𑁆𑀥𑀼𑀦𑁄.

𑁨𑁬. ‘‘𑀅𑀝𑁆𑀞𑀲𑀢𑀲𑀳𑀲𑁆𑀲𑀸𑀦𑀺, 𑀅𑀳𑁂𑀲𑀼𑀁 𑀩𑀼𑀤𑁆𑀥𑀲𑀸𑀯𑀓𑀸;

𑀲𑀩𑁆𑀩𑁂𑀲𑀁 𑀧𑀢𑁆𑀢𑀧𑀽𑀭𑁂𑀦𑁆𑀢𑀁 [𑀧𑀢𑁆𑀢𑀧𑀽𑀭𑀁 𑀢𑀁 (𑀲𑀻.)], 𑀢𑀢𑁄 𑀘𑀸𑀧𑀺 𑀩𑀳𑀼𑀢𑁆𑀢𑀭𑀁.

𑁨𑁭. ‘‘𑀢𑁂𑀦 𑀘𑀺𑀢𑁆𑀢𑀧𑁆𑀧𑀲𑀸𑀤𑁂𑀦, 𑀲𑀼𑀓𑁆𑀓𑀫𑀽𑀮𑁂𑀦 𑀘𑁄𑀤𑀺𑀢𑁄;

𑀓𑀧𑁆𑀧𑀸𑀦𑀁 𑀲𑀢𑀲𑀳𑀲𑁆𑀲𑀁, 𑀤𑀼𑀕𑁆𑀕𑀢𑀺𑀁 𑀦𑀼𑀧𑀧𑀚𑁆𑀚𑀳𑀁.

𑁨𑁮. ‘‘𑀘𑀢𑁆𑀢𑀸𑀮𑀻𑀲𑀫𑁆𑀳𑀺 𑀲𑀳𑀲𑁆𑀲𑁂, 𑀓𑀧𑁆𑀧𑀸𑀦𑀁 𑀅𑀝𑁆𑀞𑀢𑀺𑀁𑀲 𑀢𑁂;

𑀇𑀲𑀺𑀫𑀼𑀕𑁆𑀕𑀲𑀦𑀸𑀫𑀸 [𑀫𑀳𑀺𑀲𑀫𑀦𑁆𑀢𑀦𑀸𑀫𑀸 (𑀲𑁆𑀬𑀸.)] 𑀢𑁂, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁨𑁯. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀇𑀲𑀺𑀫𑀼𑀕𑁆𑀕𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀇𑀲𑀺𑀫𑀼𑀕𑁆𑀕𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀜𑁆𑀘𑀫𑀁.

𑁬. 𑀩𑁄𑀥𑀺𑀉𑀧𑀝𑁆𑀞𑀸𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁦. ‘‘𑀦𑀕𑀭𑁂 𑀭𑀫𑁆𑀫𑀯𑀢𑀺𑀬𑀸, 𑀆𑀲𑀺𑀁 𑀫𑀼𑀭𑀚𑀯𑀸𑀤𑀓𑁄;

𑀦𑀺𑀘𑁆𑀘𑀼𑀧𑀝𑁆𑀞𑀸𑀦𑀬𑀼𑀢𑁆𑀢𑁄𑀫𑁆𑀳𑀺, 𑀕𑀢𑁄𑀳𑀁 𑀩𑁄𑀥𑀺𑀫𑀼𑀢𑁆𑀢𑀫𑀁.

𑁩𑁧. ‘‘𑀲𑀸𑀬𑀁 𑀧𑀸𑀢𑀁 𑀉𑀧𑀝𑁆𑀞𑀺𑀢𑁆𑀯𑀸, 𑀲𑀼𑀓𑁆𑀓𑀫𑀽𑀮𑁂𑀦 𑀘𑁄𑀤𑀺𑀢𑁄;

𑀅𑀝𑁆𑀞𑀸𑀭𑀲𑀓𑀧𑁆𑀧𑀲𑀢𑁂, 𑀤𑀼𑀕𑁆𑀕𑀢𑀺𑀁 𑀦𑀼𑀧𑀧𑀚𑁆𑀚𑀳𑀁.

𑁩𑁨. ‘‘𑀧𑀦𑁆𑀦𑀭𑀲𑁂 𑀓𑀧𑁆𑀧𑀲𑀢𑁂, 𑀇𑀢𑁄 𑀆𑀲𑀺𑀁 𑀚𑀦𑀸𑀥𑀺𑀧𑁄;

𑀫𑀼𑀭𑀚𑁄 [𑀤𑀫𑀣𑁄 (𑀲𑁆𑀬𑀸.)] 𑀦𑀸𑀫 𑀦𑀸𑀫𑁂𑀦, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁩𑁩. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀩𑁄𑀥𑀺𑀉𑀧𑀝𑁆𑀞𑀸𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀩𑁄𑀥𑀺𑀉𑀧𑀝𑁆𑀞𑀸𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀙𑀝𑁆𑀞𑀁.

𑁭. 𑀏𑀓𑀘𑀺𑀦𑁆𑀢𑀺𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁪. ‘‘𑀬𑀤𑀸 𑀤𑁂𑀯𑁄 [𑀤𑁂𑀯𑀸 (𑀓.)] 𑀤𑁂𑀯𑀓𑀸𑀬𑀸, 𑀘𑀯𑀢𑁂 [𑀘𑀯𑀦𑁆𑀢𑀺 (𑀓.)] 𑀆𑀬𑀼𑀲𑀗𑁆𑀔𑀬𑀸;

𑀢𑀬𑁄 𑀲𑀤𑁆𑀤𑀸 𑀦𑀺𑀘𑁆𑀙𑀭𑀦𑁆𑀢𑀺, 𑀤𑁂𑀯𑀸𑀦𑀁 𑀅𑀦𑀼𑀫𑁄𑀤𑀢𑀁.

𑁩𑁫. ‘𑀇𑀢𑁄 𑀪𑁄 𑀲𑀼𑀕𑀢𑀺𑀁 𑀕𑀘𑁆𑀙, 𑀫𑀦𑀼𑀲𑁆𑀲𑀸𑀦𑀁 𑀲𑀳𑀩𑁆𑀬𑀢𑀁;

𑀫𑀦𑀼𑀲𑁆𑀲𑀪𑀽𑀢𑁄 𑀲𑀤𑁆𑀥𑀫𑁆𑀫𑁂, 𑀮𑀪 𑀲𑀤𑁆𑀥𑀁 𑀅𑀦𑀼𑀢𑁆𑀢𑀭𑀁.

𑁩𑁬. ‘‘‘𑀲𑀸 𑀢𑁂 𑀲𑀤𑁆𑀥𑀸 𑀦𑀺𑀯𑀺𑀝𑁆𑀞𑀸𑀲𑁆𑀲, 𑀫𑀽𑀮𑀚𑀸𑀢𑀸 𑀧𑀢𑀺𑀝𑁆𑀞𑀺𑀢𑀸;

𑀬𑀸𑀯𑀚𑀻𑀯𑀁 𑀅𑀲𑀁𑀳𑀻𑀭𑀸, 𑀲𑀤𑁆𑀥𑀫𑁆𑀫𑁂 𑀲𑀼𑀧𑁆𑀧𑀯𑁂𑀤𑀺𑀢𑁂.

𑁩𑁭. ‘‘‘𑀓𑀸𑀬𑁂𑀦 𑀓𑀼𑀲𑀮𑀁 𑀓𑀢𑁆𑀯𑀸, 𑀯𑀸𑀘𑀸𑀬 𑀓𑀼𑀲𑀮𑀁 𑀩𑀳𑀼𑀁;

𑀫𑀦𑀲𑀸 𑀓𑀼𑀲𑀮𑀁 𑀓𑀢𑁆𑀯𑀸, 𑀅𑀩𑁆𑀬𑀸𑀧𑀚𑁆𑀚𑀁 [𑀅𑀩𑁆𑀬𑀸𑀧𑀚𑁆𑀛𑀁 (𑀲𑁆𑀬𑀸.), 𑀅𑀧𑁆𑀧𑀫𑀸𑀡𑀁 (𑀇𑀢𑀺𑀯𑀼𑀢𑁆𑀢𑀓𑁂 𑁮𑁩)] 𑀦𑀺𑀭𑀽𑀧𑀥𑀺𑀁.

𑁩𑁮. ‘‘‘𑀢𑀢𑁄 𑀑𑀧𑀥𑀺𑀓𑀁 𑀧𑀼𑀜𑁆𑀜𑀁, 𑀓𑀢𑁆𑀯𑀸 𑀤𑀸𑀦𑁂𑀦 𑀢𑀁 𑀩𑀳𑀼𑀁;

𑀅𑀜𑁆𑀜𑁂𑀧𑀺 𑀫𑀘𑁆𑀘𑁂 𑀲𑀤𑁆𑀥𑀫𑁆𑀫𑁂, 𑀩𑁆𑀭𑀳𑁆𑀫𑀘𑀭𑀺𑀬𑁂 𑀦𑀺𑀯𑁂𑀲𑀬’.

𑁩𑁯. ‘‘𑀇𑀫𑀸𑀬 𑀅𑀦𑀼𑀓𑀫𑁆𑀧𑀸𑀬, 𑀤𑁂𑀯𑀸 𑀤𑁂𑀯𑀁 𑀬𑀤𑀸 𑀯𑀺𑀤𑀽;

𑀘𑀯𑀦𑁆𑀢𑀁 𑀅𑀦𑀼𑀫𑁄𑀤𑀦𑁆𑀢𑀺, 𑀏𑀳𑀺 𑀤𑁂𑀯 𑀧𑀼𑀦𑀧𑁆𑀧𑀼𑀦𑀁 [𑀤𑁂𑀯𑀧𑀼𑀭𑀁 𑀧𑀼𑀦 (𑀲𑁆𑀬𑀸.)].

𑁪𑁦. ‘‘𑀲𑀁𑀯𑁂𑀕𑁄 𑀫𑁂 [𑀲𑀁𑀯𑀺𑀕𑁆𑀕𑁄𑀳𑀁 (𑀲𑁆𑀬𑀸.)] 𑀢𑀤𑀸 𑀆𑀲𑀺, 𑀤𑁂𑀯𑀲𑀗𑁆𑀖𑁂 𑀲𑀫𑀸𑀕𑀢𑁂;

𑀓𑀁𑀲𑀼 𑀦𑀸𑀫 𑀅𑀳𑀁 𑀬𑁄𑀦𑀺𑀁, 𑀕𑀫𑀺𑀲𑁆𑀲𑀸𑀫𑀺 𑀇𑀢𑁄 𑀘𑀼𑀢𑁄.

𑁪𑁧. ‘‘𑀫𑀫 𑀲𑀁𑀯𑁂𑀕𑀫𑀜𑁆𑀜𑀸𑀬, 𑀲𑀫𑀡𑁄 𑀪𑀸𑀯𑀺𑀢𑀺𑀦𑁆𑀤𑁆𑀭𑀺𑀬𑁄;

𑀫𑀫𑀼𑀤𑁆𑀥𑀭𑀺𑀢𑀼𑀓𑀸𑀫𑁄 𑀲𑁄, 𑀆𑀕𑀘𑁆𑀙𑀺 𑀫𑀫 𑀲𑀦𑁆𑀢𑀺𑀓𑀁.

𑁪𑁨. ‘‘𑀲𑀼𑀫𑀦𑁄 𑀦𑀸𑀫 𑀦𑀸𑀫𑁂𑀦, 𑀧𑀤𑀼𑀫𑀼𑀢𑁆𑀢𑀭𑀲𑀸𑀯𑀓𑁄;

𑀅𑀢𑁆𑀣𑀥𑀫𑁆𑀫𑀸𑀦𑀼𑀲𑀸𑀲𑀺𑀢𑁆𑀯𑀸, 𑀲𑀁𑀯𑁂𑀚𑁂𑀲𑀺 𑀫𑀫𑀁 𑀢𑀤𑀸.

𑁪𑁩. ‘‘𑀢𑀲𑁆𑀲𑀸𑀳𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀩𑀼𑀤𑁆𑀥𑁂 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁;

𑀢𑀁 𑀥𑀻𑀭𑀁 𑀅𑀪𑀺𑀯𑀸𑀤𑁂𑀢𑁆𑀯𑀸, 𑀢𑀢𑁆𑀣 𑀓𑀸𑀮𑀁𑀓𑀢𑁄 𑀅𑀳𑀁.

𑁪𑁪. ‘‘𑀉𑀧𑀧𑀚𑁆𑀚𑀺𑀁 𑀲 [𑀉𑀧𑀧𑀚𑁆𑀚𑀺𑀲𑁆𑀲𑀁 (𑀲𑀻.)] 𑀢𑀢𑁆𑀣𑁂𑀯, 𑀲𑀼𑀓𑁆𑀓𑀫𑀽𑀮𑁂𑀦 𑀘𑁄𑀤𑀺𑀢𑁄;

𑀓𑀧𑁆𑀧𑀸𑀦𑀁 𑀲𑀢𑀲𑀳𑀲𑁆𑀲𑀁, 𑀤𑀼𑀕𑁆𑀕𑀢𑀺𑀁 𑀦𑀼𑀧𑀧𑀚𑁆𑀚𑀳𑀁.

𑁪𑁫. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀏𑀓𑀘𑀺𑀦𑁆𑀢𑀺𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀏𑀓𑀘𑀺𑀦𑁆𑀢𑀺𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀲𑀢𑁆𑀢𑀫𑀁.

𑁮. 𑀢𑀺𑀓𑀡𑁆𑀡𑀺𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁪𑁬. ‘‘𑀤𑁂𑀯𑀪𑀽𑀢𑁄 𑀅𑀳𑀁 𑀲𑀦𑁆𑀢𑁄, 𑀅𑀘𑁆𑀙𑀭𑀸𑀳𑀺 𑀧𑀼𑀭𑀓𑁆𑀔𑀢𑁄;

𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸𑀦, 𑀩𑀼𑀤𑁆𑀥𑀲𑁂𑀝𑁆𑀞𑀁 𑀅𑀦𑀼𑀲𑁆𑀲𑀭𑀺𑀁.

𑁪𑁭. ‘‘𑀢𑀺𑀓𑀡𑁆𑀡𑀺𑀧𑀼𑀧𑁆𑀨𑀁 [𑀓𑀺𑀁𑀓𑀡𑀺𑀧𑀼𑀧𑁆𑀨𑀁 (𑀓.)] 𑀧𑀕𑁆𑀕𑀬𑁆𑀳, 𑀲𑀓𑀁 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁;

𑀩𑀼𑀤𑁆𑀥𑀫𑁆𑀳𑀺 𑀅𑀪𑀺𑀭𑁄𑀧𑁂𑀲𑀺𑀁, 𑀯𑀺𑀧𑀲𑁆𑀲𑀺𑀫𑁆𑀳𑀺 𑀦𑀭𑀸𑀲𑀪𑁂.

𑁪𑁮. ‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀧𑀽𑀚𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁪𑁯. ‘‘𑀢𑁂𑀲𑀢𑁆𑀢𑀢𑀺𑀫𑁆𑀳𑀺𑀢𑁄 𑀓𑀧𑁆𑀧𑁂, 𑀘𑀢𑀼𑀭𑀸𑀲𑀼𑀁 𑀭𑀫𑀼𑀢𑁆𑀢𑀫𑀸;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑀸, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁫𑁦. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀢𑀺𑀓𑀡𑁆𑀡𑀺𑀧𑀼𑀧𑁆𑀨𑀺𑀬𑁄 [𑀓𑀺𑀁𑀓𑀡𑀺𑀓𑀧𑀼𑀧𑁆𑀨𑀺𑀬𑁄 (𑀓.)] 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀢𑀺𑀓𑀡𑁆𑀡𑀺𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀅𑀝𑁆𑀞𑀫𑀁.

𑁯. 𑀏𑀓𑀘𑀸𑀭𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁫𑁧. ‘‘𑀢𑀸𑀯𑀢𑀺𑀁𑀲𑁂𑀲𑀼 𑀤𑁂𑀯𑁂𑀲𑀼, 𑀫𑀳𑀸𑀖𑁄𑀲𑁄 𑀢𑀤𑀸 𑀅𑀳𑀼;

𑀩𑀼𑀤𑁆𑀥𑁄 𑀘 𑀮𑁄𑀓𑁂 𑀦𑀺𑀩𑁆𑀩𑀸𑀢𑀺, 𑀫𑀬𑀜𑁆𑀘𑀫𑁆𑀳 𑀲𑀭𑀸𑀕𑀺𑀦𑁄.

𑁫𑁨. ‘‘𑀢𑁂𑀲𑀁 𑀲𑀁𑀯𑁂𑀕𑀚𑀸𑀢𑀸𑀦𑀁, 𑀲𑁄𑀓𑀲𑀮𑁆𑀮𑀲𑀫𑀗𑁆𑀕𑀺𑀦𑀁;

𑀲𑀩𑀮𑁂𑀦 𑀉𑀧𑀢𑁆𑀣𑀤𑁆𑀥𑁄, 𑀅𑀕𑀫𑀁 𑀩𑀼𑀤𑁆𑀥𑀲𑀦𑁆𑀢𑀺𑀓𑀁.

𑁫𑁩. ‘‘𑀫𑀦𑁆𑀤𑀸𑀭𑀯𑀁 𑀕𑀳𑁂𑀢𑁆𑀯𑀸𑀦, 𑀲𑀗𑁆𑀕𑀻𑀢𑀺 [𑀲𑀡𑁆𑀳𑀺𑀢𑀁 (𑀲𑀻.), 𑀲𑀗𑁆𑀕𑀺𑀢𑀁 (𑀲𑁆𑀬𑀸.)] 𑀅𑀪𑀺𑀦𑀺𑀫𑁆𑀫𑀺𑀢𑀁;

𑀧𑀭𑀺𑀦𑀺𑀩𑁆𑀩𑀼𑀢𑀓𑀸𑀮𑀫𑁆𑀳𑀺, 𑀩𑀼𑀤𑁆𑀥𑀲𑁆𑀲 𑀅𑀪𑀺𑀭𑁄𑀧𑀬𑀺𑀁.

𑁫𑁪. ‘‘𑀲𑀩𑁆𑀩𑁂 𑀤𑁂𑀯𑀸𑀦𑀼𑀫𑁄𑀤𑀺𑀁𑀲𑀼, 𑀅𑀘𑁆𑀙𑀭𑀸𑀬𑁄 𑀘 𑀫𑁂 𑀢𑀤𑀸;

𑀓𑀧𑁆𑀧𑀸𑀦𑀁 𑀲𑀢𑀲𑀳𑀲𑁆𑀲𑀁, 𑀤𑀼𑀕𑁆𑀕𑀢𑀺𑀁 𑀦𑀼𑀧𑀧𑀚𑁆𑀚𑀳𑀁.

𑁫𑁫. ‘‘𑀲𑀝𑁆𑀞𑀺𑀓𑀧𑁆𑀧𑀲𑀳𑀲𑁆𑀲𑀫𑁆𑀳𑀺, 𑀇𑀢𑁄 𑀲𑁄𑀴𑀲 𑀢𑁂 𑀚𑀦𑀸;

𑀫𑀳𑀸𑀫𑀮𑁆𑀮𑀚𑀦𑀸 𑀦𑀸𑀫, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁫𑁬. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀏𑀓𑀘𑀸𑀭𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀏𑀓𑀘𑀸𑀭𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀦𑀯𑀫𑀁.

𑁧𑁦. 𑀢𑀺𑀯𑀡𑁆𑀝𑀺𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁫𑁭. ‘‘𑀅𑀪𑀺𑀪𑀽𑀢𑀁 𑀧𑀦𑀺𑀚𑁆𑀛𑀦𑁆𑀢𑀺 [𑀅𑀪𑀺𑀪𑀽𑀢𑁄𑀧𑀦𑀺𑀚𑁆𑀛𑀦𑁆𑀢𑀺 (𑀲𑀻.)], 𑀲𑀩𑁆𑀩𑁂 𑀲𑀗𑁆𑀕𑀫𑁆𑀫 𑀢𑁂 𑀫𑀫𑀁 [𑀅𑀪𑀺𑀪𑀼𑀁 𑀣𑁂𑀭𑀁 𑀧𑀦𑀺𑀚𑁆𑀛𑀸𑀫, 𑀲𑀩𑁆𑀩𑁂 𑀲𑀗𑁆𑀕𑀫𑁆𑀫 𑀢𑁂 𑀫𑀬𑀁 (𑀲𑁆𑀬𑀸.)];

𑀢𑁂𑀲𑀁 𑀦𑀺𑀚𑁆𑀛𑀸𑀬𑀫𑀸𑀦𑀸𑀦𑀁, 𑀧𑀭𑀺𑀴𑀸𑀳𑁄 𑀅𑀚𑀸𑀬𑀣.

𑁫𑁮. ‘‘𑀲𑀼𑀦𑀦𑁆𑀤𑁄 𑀦𑀸𑀫 𑀦𑀸𑀫𑁂𑀦, 𑀩𑀼𑀤𑁆𑀥𑀲𑁆𑀲 𑀲𑀸𑀯𑀓𑁄 𑀢𑀤𑀸;

𑀥𑀫𑁆𑀫𑀤𑀲𑁆𑀲𑀺𑀲𑁆𑀲 𑀫𑀼𑀦𑀺𑀦𑁄, 𑀆𑀕𑀘𑁆𑀙𑀺 𑀫𑀫 𑀲𑀦𑁆𑀢𑀺𑀓𑀁.

𑁫𑁯. ‘‘𑀬𑁂 𑀫𑁂 𑀩𑀤𑁆𑀥𑀘𑀭𑀸 𑀆𑀲𑀼𑀁, 𑀢𑁂 𑀫𑁂 𑀧𑀼𑀧𑁆𑀨𑀁 𑀅𑀤𑀼𑀁 𑀢𑀤𑀸;

𑀢𑀸𑀳𑀁 𑀧𑀼𑀧𑁆𑀨𑀁 𑀕𑀳𑁂𑀢𑁆𑀯𑀸𑀦, 𑀲𑀸𑀯𑀓𑁂 𑀅𑀪𑀺𑀭𑁄𑀧𑀬𑀺𑀁.

𑁬𑁦. ‘‘𑀲𑁄𑀳𑀁 𑀓𑀸𑀮𑀁𑀓𑀢𑁄 𑀢𑀢𑁆𑀣, 𑀧𑀼𑀦𑀸𑀧𑀺 𑀉𑀧𑀧𑀚𑁆𑀚𑀳𑀁;

𑀅𑀝𑁆𑀞𑀸𑀭𑀲𑁂 𑀓𑀧𑁆𑀧𑀲𑀢𑁂, 𑀯𑀺𑀦𑀺𑀧𑀸𑀢𑀁 𑀦 𑀕𑀘𑁆𑀙𑀳𑀁.

𑁬𑁧. ‘‘𑀢𑁂𑀭𑀲𑁂𑀢𑁄 𑀓𑀧𑁆𑀧𑀲𑀢𑁂, 𑀅𑀝𑁆𑀞𑀸𑀲𑀼𑀁 𑀥𑀽𑀫𑀓𑁂𑀢𑀼𑀦𑁄;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑀸, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁬𑁨. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀢𑀺𑀯𑀡𑁆𑀝𑀺𑀧𑀼𑀧𑁆𑀨𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺;

𑀢𑀺𑀯𑀡𑁆𑀝𑀺𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀲𑀫𑀁.

𑀓𑀼𑀝𑀚𑀧𑀼𑀧𑁆𑀨𑀺𑀬𑀯𑀕𑁆𑀕𑁄 𑀏𑀓𑀽𑀦𑀯𑀻𑀲𑀢𑀺𑀫𑁄.