𑁧. 𑀅𑀢𑀺𑀙𑀢𑁆𑀢𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧. ‘‘𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺, 𑀅𑀢𑁆𑀣𑀤𑀲𑁆𑀲𑀻𑀦𑀭𑀼𑀢𑁆𑀢𑀫𑁂;

𑀙𑀢𑁆𑀢𑀸𑀢𑀺𑀙𑀢𑁆𑀢𑀁 [𑀙𑀢𑁆𑀢𑀸𑀥𑀺𑀙𑀢𑁆𑀢𑀁 (𑀲𑀻.)] 𑀓𑀸𑀭𑁂𑀢𑁆𑀯𑀸, 𑀣𑀽𑀧𑀫𑁆𑀳𑀺 𑀅𑀪𑀺𑀭𑁄𑀧𑀬𑀺𑀁.

𑁨. ‘‘𑀓𑀸𑀮𑁂𑀦 𑀓𑀸𑀮𑀫𑀸𑀕𑀦𑁆𑀢𑁆𑀯𑀸, 𑀦𑀫𑀲𑁆𑀲𑀺𑀁 𑀮𑁄𑀓𑀦𑀸𑀬𑀓𑀁 [𑀲𑀢𑁆𑀣𑀼 𑀘𑁂𑀢𑀺𑀬𑀁 (𑀲𑀻.)];

𑀧𑀼𑀧𑁆𑀨𑀘𑁆𑀙𑀤𑀦𑀁 𑀓𑀢𑁆𑀯𑀸𑀦, 𑀙𑀢𑁆𑀢𑀫𑁆𑀳𑀺 𑀅𑀪𑀺𑀭𑁄𑀧𑀬𑀺𑀁.

𑁩. ‘‘𑀲𑀢𑁆𑀢𑀭𑀲𑁂 𑀓𑀧𑁆𑀧𑀲𑀢𑁂, 𑀤𑁂𑀯𑀭𑀚𑁆𑀚𑀫𑀓𑀸𑀭𑀬𑀺𑀁;

𑀫𑀦𑀼𑀲𑁆𑀲𑀢𑁆𑀢𑀁 𑀦 𑀕𑀘𑁆𑀙𑀸𑀫𑀺, 𑀣𑀽𑀧𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁪. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀅𑀢𑀺𑀙𑀢𑁆𑀢𑀺𑀬𑁄 [𑀅𑀥𑀺𑀙𑀢𑁆𑀢𑀺𑀬𑁄 (𑀲𑀻. 𑀲𑁆𑀬𑀸.)] 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀅𑀢𑀺𑀙𑀢𑁆𑀢𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀞𑀫𑀁.