𑁧𑁫. 𑀙𑀢𑁆𑀢𑀯𑀕𑁆𑀕𑁄

𑁧. 𑀅𑀢𑀺𑀙𑀢𑁆𑀢𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧. ‘‘𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺, 𑀅𑀢𑁆𑀣𑀤𑀲𑁆𑀲𑀻𑀦𑀭𑀼𑀢𑁆𑀢𑀫𑁂;

𑀙𑀢𑁆𑀢𑀸𑀢𑀺𑀙𑀢𑁆𑀢𑀁 [𑀙𑀢𑁆𑀢𑀸𑀥𑀺𑀙𑀢𑁆𑀢𑀁 (𑀲𑀻.)] 𑀓𑀸𑀭𑁂𑀢𑁆𑀯𑀸, 𑀣𑀽𑀧𑀫𑁆𑀳𑀺 𑀅𑀪𑀺𑀭𑁄𑀧𑀬𑀺𑀁.

𑁨. ‘‘𑀓𑀸𑀮𑁂𑀦 𑀓𑀸𑀮𑀫𑀸𑀕𑀦𑁆𑀢𑁆𑀯𑀸, 𑀦𑀫𑀲𑁆𑀲𑀺𑀁 𑀮𑁄𑀓𑀦𑀸𑀬𑀓𑀁 [𑀲𑀢𑁆𑀣𑀼 𑀘𑁂𑀢𑀺𑀬𑀁 (𑀲𑀻.)];

𑀧𑀼𑀧𑁆𑀨𑀘𑁆𑀙𑀤𑀦𑀁 𑀓𑀢𑁆𑀯𑀸𑀦, 𑀙𑀢𑁆𑀢𑀫𑁆𑀳𑀺 𑀅𑀪𑀺𑀭𑁄𑀧𑀬𑀺𑀁.

𑁩. ‘‘𑀲𑀢𑁆𑀢𑀭𑀲𑁂 𑀓𑀧𑁆𑀧𑀲𑀢𑁂, 𑀤𑁂𑀯𑀭𑀚𑁆𑀚𑀫𑀓𑀸𑀭𑀬𑀺𑀁;

𑀫𑀦𑀼𑀲𑁆𑀲𑀢𑁆𑀢𑀁 𑀦 𑀕𑀘𑁆𑀙𑀸𑀫𑀺, 𑀣𑀽𑀧𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁪. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀅𑀢𑀺𑀙𑀢𑁆𑀢𑀺𑀬𑁄 [𑀅𑀥𑀺𑀙𑀢𑁆𑀢𑀺𑀬𑁄 (𑀲𑀻. 𑀲𑁆𑀬𑀸.)] 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀅𑀢𑀺𑀙𑀢𑁆𑀢𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀞𑀫𑀁.

𑁨. 𑀣𑀫𑁆𑀪𑀸𑀭𑁄𑀧𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁫. ‘‘𑀦𑀺𑀩𑁆𑀩𑀼𑀢𑁂 𑀮𑁄𑀓𑀦𑀸𑀣𑀫𑁆𑀳𑀺, 𑀥𑀫𑁆𑀫𑀤𑀲𑁆𑀲𑀻𑀦𑀭𑀸𑀲𑀪𑁂;

𑀆𑀭𑁄𑀧𑁂𑀲𑀺𑀁 𑀥𑀚𑀢𑁆𑀣𑀫𑁆𑀪𑀁, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 𑀘𑁂𑀢𑀺𑀬𑁂.

𑁬. ‘‘𑀦𑀺𑀲𑁆𑀲𑁂𑀡𑀺𑀁 𑀫𑀸𑀧𑀬𑀺𑀢𑁆𑀯𑀸𑀦, 𑀣𑀽𑀧𑀲𑁂𑀝𑁆𑀞𑀁 𑀲𑀫𑀸𑀭𑀼𑀳𑀺𑀁;

𑀚𑀸𑀢𑀺𑀧𑀼𑀧𑁆𑀨𑀁 𑀕𑀳𑁂𑀢𑁆𑀯𑀸𑀦, 𑀣𑀽𑀧𑀫𑁆𑀳𑀺 𑀅𑀪𑀺𑀭𑁄𑀧𑀬𑀺𑀁.

𑁭. ‘‘𑀅𑀳𑁄 𑀩𑀼𑀤𑁆𑀥𑁄 𑀅𑀳𑁄 𑀥𑀫𑁆𑀫𑁄, 𑀅𑀳𑁄 𑀦𑁄 𑀲𑀢𑁆𑀣𑀼 𑀲𑀫𑁆𑀧𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀣𑀽𑀧𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁮. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀣𑀽𑀧𑀲𑀻𑀔𑀲𑀦𑀸𑀫𑀓𑀸;

𑀲𑁄𑀴𑀲𑀸𑀲𑀺𑀁𑀲𑀼 𑀭𑀸𑀚𑀸𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁯. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀣𑀫𑁆𑀪𑀸𑀭𑁄𑀧𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀣𑀫𑁆𑀪𑀸𑀭𑁄𑀧𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀼𑀢𑀺𑀬𑀁.

𑁩. 𑀯𑁂𑀤𑀺𑀓𑀸𑀭𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁦. ‘‘𑀦𑀺𑀩𑁆𑀩𑀼𑀢𑁂 𑀮𑁄𑀓𑀦𑀸𑀣𑀫𑁆𑀳𑀺, 𑀧𑀺𑀬𑀤𑀲𑁆𑀲𑀻𑀦𑀭𑀼𑀢𑁆𑀢𑀫𑁂;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀫𑀼𑀢𑁆𑀢𑀸𑀯𑁂𑀤𑀺𑀫𑀓𑀸𑀲𑀳𑀁.

𑁧𑁧. ‘‘𑀫𑀡𑀻𑀳𑀺 𑀧𑀭𑀺𑀯𑀸𑀭𑁂𑀢𑁆𑀯𑀸, 𑀅𑀓𑀸𑀲𑀺𑀁 𑀯𑁂𑀤𑀺𑀫𑀼𑀢𑁆𑀢𑀫𑀁;

𑀯𑁂𑀤𑀺𑀓𑀸𑀬 𑀫𑀳𑀁 𑀓𑀢𑁆𑀯𑀸, 𑀢𑀢𑁆𑀣 𑀓𑀸𑀮𑀗𑁆𑀓𑀢𑁄 𑀅𑀳𑀁.

𑁧𑁨. ‘‘𑀬𑀁 𑀬𑀁 𑀬𑁄𑀦𑀼𑀧𑀧𑀚𑁆𑀚𑀸𑀫𑀺, 𑀤𑁂𑀯𑀢𑁆𑀢𑀁 𑀅𑀣 𑀫𑀸𑀦𑀼𑀲𑀁;

𑀫𑀡𑀻 𑀥𑀸𑀭𑁂𑀦𑁆𑀢𑀺 𑀆𑀓𑀸𑀲𑁂, 𑀧𑀼𑀜𑁆𑀜𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁.

𑁧𑁩. ‘‘𑀲𑁄𑀴𑀲𑀺𑀢𑁄 𑀓𑀧𑁆𑀧𑀲𑀢𑁂, 𑀫𑀡𑀺𑀧𑁆𑀧𑀪𑀸𑀲𑀦𑀸𑀫𑀓𑀸;

𑀙𑀢𑁆𑀢𑀺𑀁𑀲𑀸𑀲𑀺𑀁𑀲𑀼 [𑀩𑀸𑀢𑁆𑀢𑀺𑀁𑀲𑀸𑀲𑀺𑀁𑀲𑀼 (𑀲𑀻. 𑀲𑁆𑀬𑀸.)] 𑀭𑀸𑀚𑀸𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁧𑁪. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀯𑁂𑀤𑀺𑀓𑀸𑀭𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀯𑁂𑀤𑀺𑀓𑀸𑀭𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀢𑀢𑀺𑀬𑀁.

𑁪. 𑀲𑀧𑀭𑀺𑀯𑀸𑀭𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁫. ‘‘𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄, 𑀮𑁄𑀓𑀚𑁂𑀝𑁆𑀞𑁄 𑀦𑀭𑀸𑀲𑀪𑁄;

𑀚𑀮𑀺𑀢𑁆𑀯𑀸 𑀅𑀕𑁆𑀕𑀺𑀓𑁆𑀔𑀦𑁆𑀥𑁄𑀯, 𑀲𑀫𑁆𑀩𑀼𑀤𑁆𑀥𑁄 𑀧𑀭𑀺𑀦𑀺𑀩𑁆𑀩𑀼𑀢𑁄.

𑁧𑁬. ‘‘𑀦𑀺𑀩𑁆𑀩𑀼𑀢𑁂 𑀘 𑀫𑀳𑀸𑀯𑀻𑀭𑁂, 𑀣𑀽𑀧𑁄 𑀯𑀺𑀢𑁆𑀣𑀸𑀭𑀺𑀓𑁄 𑀅𑀳𑀼;

𑀤𑀽𑀭𑀢𑁄𑀯 [𑀅𑀳𑁄𑀭𑀢𑁆𑀢𑀁 (𑀲𑀻.), 𑀣𑀽𑀧𑀤𑀢𑁆𑀢𑀁 (𑀲𑁆𑀬𑀸.)] 𑀉𑀧𑀝𑁆𑀞𑁂𑀦𑁆𑀢𑀺, 𑀥𑀸𑀢𑀼𑀕𑁂𑀳𑀯𑀭𑀼𑀢𑁆𑀢𑀫𑁂.

𑁧𑁭. ‘‘𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀅𑀓𑀁 𑀘𑀦𑁆𑀤𑀦𑀯𑁂𑀤𑀺𑀓𑀁;

𑀤𑀺𑀲𑁆𑀲𑀢𑀺 𑀣𑀽𑀧𑀔𑀦𑁆𑀥𑁄 𑀘 [𑀤𑀻𑀬𑀢𑀺 𑀥𑀽𑀫𑀓𑁆𑀔𑀦𑁆𑀥𑁄 𑀘 (𑀲𑀻.), 𑀤𑀻𑀬𑀢𑀺 𑀥𑀽𑀧𑀕𑀦𑁆𑀥𑁄 𑀘 (𑀲𑁆𑀬𑀸.)], 𑀣𑀽𑀧𑀸𑀦𑀼𑀘𑁆𑀙𑀯𑀺𑀓𑁄 𑀢𑀤𑀸.

𑁧𑁮. ‘‘𑀪𑀯𑁂 𑀦𑀺𑀩𑁆𑀩𑀢𑁆𑀢𑀫𑀸𑀦𑀫𑁆𑀳𑀺, 𑀤𑁂𑀯𑀢𑁆𑀢𑁂 𑀅𑀣 𑀫𑀸𑀦𑀼𑀲𑁂;

𑀑𑀫𑀢𑁆𑀢𑀁 𑀫𑁂 𑀦 𑀧𑀲𑁆𑀲𑀸𑀫𑀺, 𑀧𑀼𑀩𑁆𑀩𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁.

𑁧𑁯. ‘‘𑀧𑀜𑁆𑀘𑀤𑀲𑀓𑀧𑁆𑀧𑀲𑀢𑁂, 𑀇𑀢𑁄 𑀅𑀝𑁆𑀞 𑀚𑀦𑀸 𑀅𑀳𑀼𑀁;

𑀲𑀩𑁆𑀩𑁂 𑀲𑀫𑀢𑁆𑀢𑀦𑀸𑀫𑀸 𑀢𑁂, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁨𑁦. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀧𑀭𑀺𑀯𑀸𑀭𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀧𑀭𑀺𑀯𑀸𑀭𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀘𑀢𑀼𑀢𑁆𑀣𑀁.

𑁫. 𑀉𑀫𑀸𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁧. ‘‘𑀦𑀺𑀩𑁆𑀩𑀼𑀢𑁂 𑀮𑁄𑀓𑀫𑀳𑀺𑀢𑁂 [𑀮𑁄𑀓𑀦𑀸𑀣𑀫𑁆𑀳𑀺 (𑀲𑀻.)], 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁂;

𑀲𑀺𑀤𑁆𑀥𑀢𑁆𑀣𑀫𑁆𑀳𑀺 𑀪𑀕𑀯𑀢𑀺, 𑀫𑀳𑀸𑀣𑀽𑀧𑀫𑀳𑁄 𑀅𑀳𑀼.

𑁨𑁨. ‘‘𑀫𑀳𑁂 𑀧𑀯𑀢𑁆𑀢𑀫𑀸𑀦𑀫𑁆𑀳𑀺, 𑀲𑀺𑀤𑁆𑀥𑀢𑁆𑀣𑀲𑁆𑀲 𑀫𑀳𑁂𑀲𑀺𑀦𑁄;

𑀉𑀫𑀸𑀧𑀼𑀧𑁆𑀨𑀁 [𑀉𑀫𑁆𑀫𑀸𑀧𑀼𑀧𑁆𑀨𑀁 (𑀲𑀩𑁆𑀩𑀢𑁆𑀣)] 𑀕𑀳𑁂𑀢𑁆𑀯𑀸𑀦, 𑀣𑀽𑀧𑀫𑁆𑀳𑀺 𑀅𑀪𑀺𑀭𑁄𑀧𑀬𑀺𑀁.

𑁨𑁩. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀭𑁄𑀧𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀣𑀽𑀧𑀧𑀽𑀚𑀸𑀬𑀺𑀤𑀁 [𑀧𑀼𑀧𑁆𑀨𑀧𑀽𑀚𑀸𑀬𑀺𑀤𑀁 (𑀲𑁆𑀬𑀸.), 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 (𑀓.)] 𑀨𑀮𑀁.

𑁨𑁪. ‘‘𑀇𑀢𑁄 𑀘 𑀦𑀯𑀫𑁂 𑀓𑀧𑁆𑀧𑁂, 𑀲𑁄𑀫𑀤𑁂𑀯𑀲𑀦𑀸𑀫𑀓𑀸;

𑀧𑀜𑁆𑀘𑀸𑀲𑀻𑀢𑀺𑀲𑀼 𑀭𑀸𑀚𑀸𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁨𑁫. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀉𑀫𑀸𑀧𑀼𑀧𑁆𑀨𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀉𑀫𑀸𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀜𑁆𑀘𑀫𑀁.

𑁬. 𑀅𑀦𑀼𑀮𑁂𑀧𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁬. ‘‘𑀅𑀦𑁄𑀫𑀤𑀲𑁆𑀲𑀻𑀫𑀼𑀦𑀺𑀦𑁄, 𑀩𑁄𑀥𑀺𑀯𑁂𑀤𑀺𑀫𑀓𑀸𑀲𑀳𑀁;

𑀲𑀼𑀥𑀸𑀬 𑀧𑀺𑀡𑁆𑀟𑀁 𑀤𑀢𑁆𑀯𑀸𑀦, 𑀧𑀸𑀡𑀺𑀓𑀫𑁆𑀫𑀁 𑀅𑀓𑀸𑀲𑀳𑀁.

𑁨𑁭. ‘‘𑀤𑀺𑀲𑁆𑀯𑀸 𑀢𑀁 𑀲𑀼𑀓𑀢𑀁 𑀓𑀫𑁆𑀫𑀁, 𑀅𑀦𑁄𑀫𑀤𑀲𑁆𑀲𑀻 𑀦𑀭𑀼𑀢𑁆𑀢𑀫𑁄;

𑀪𑀺𑀓𑁆𑀔𑀼𑀲𑀗𑁆𑀖𑁂 𑀞𑀺𑀢𑁄 𑀲𑀢𑁆𑀣𑀸, 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀣.

𑁨𑁮. ‘‘‘𑀇𑀫𑀺𑀦𑀸 𑀲𑀼𑀥𑀓𑀫𑁆𑀫𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑁄𑀢𑁆𑀯𑀸𑀦, 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀢𑀺’.

𑁨𑁯. ‘‘𑀧𑀲𑀦𑁆𑀦𑀫𑀼𑀔𑀯𑀡𑁆𑀡𑁄𑀫𑁆𑀳𑀺, 𑀏𑀓𑀕𑁆𑀕𑁄 𑀲𑀼𑀲𑀫𑀸𑀳𑀺𑀢𑁄;

𑀥𑀸𑀭𑁂𑀫𑀺 𑀅𑀦𑁆𑀢𑀺𑀫𑀁 𑀤𑁂𑀳𑀁, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀲𑀦𑁂.

𑁩𑁦. ‘‘𑀇𑀢𑁄 𑀓𑀧𑁆𑀧𑀲𑀢𑁂 𑀆𑀲𑀺𑀁, 𑀧𑀭𑀺𑀧𑀼𑀡𑁆𑀡𑁂 𑀅𑀦𑀽𑀦𑀓𑁂 [𑀧𑀭𑀺𑀧𑀼𑀡𑁆𑀡𑁄 𑀅𑀦𑀽𑀦𑀓𑁄 (𑀲𑁆𑀬𑀸.)];

𑀭𑀸𑀚𑀸 𑀲𑀩𑁆𑀩𑀖𑀦𑁄 𑀦𑀸𑀫, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁩𑁧. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀅𑀦𑀼𑀮𑁂𑀧𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀅𑀦𑀼𑀮𑁂𑀧𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀙𑀝𑁆𑀞𑀁.

𑁭. 𑀫𑀕𑁆𑀕𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁨. ‘‘𑀉𑀢𑁆𑀢𑀭𑀺𑀢𑁆𑀯𑀸𑀦 𑀦𑀤𑀺𑀓𑀁, 𑀯𑀦𑀁 𑀕𑀘𑁆𑀙𑀢𑀺 𑀘𑀓𑁆𑀔𑀼𑀫𑀸;

𑀢𑀫𑀤𑁆𑀤𑀲𑀸𑀲𑀺𑀁 𑀲𑀫𑁆𑀩𑀼𑀤𑁆𑀥𑀁, 𑀲𑀺𑀤𑁆𑀥𑀢𑁆𑀣𑀁 𑀯𑀭𑀮𑀓𑁆𑀔𑀡𑀁.

𑁩𑁩. ‘‘𑀓𑀼𑀤𑀸𑀮 [𑀓𑀼𑀤𑁆𑀤𑀸𑀮 (𑀲𑀻. 𑀲𑁆𑀬𑀸.)] 𑀧𑀺𑀝𑀓𑀫𑀸𑀤𑀸𑀬, 𑀲𑀫𑀁 𑀓𑀢𑁆𑀯𑀸𑀦 𑀢𑀁 𑀧𑀣𑀁;

𑀲𑀢𑁆𑀣𑀸𑀭𑀁 𑀅𑀪𑀺𑀯𑀸𑀤𑁂𑀢𑁆𑀯𑀸, 𑀲𑀓𑀁 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁.

𑁩𑁪. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀓𑀫𑁆𑀫𑀫𑀓𑀭𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀫𑀕𑁆𑀕𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁩𑁫. ‘‘𑀲𑀢𑁆𑀢𑀧𑀜𑁆𑀜𑀸𑀲𑀓𑀧𑁆𑀧𑀫𑁆𑀳𑀺, 𑀏𑀓𑁄 𑀆𑀲𑀺𑀁 𑀚𑀦𑀸𑀥𑀺𑀧𑁄;

𑀦𑀸𑀫𑁂𑀦 𑀲𑀼𑀧𑁆𑀧𑀩𑀼𑀤𑁆𑀥𑁄𑀢𑀺, 𑀦𑀸𑀬𑀓𑁄 𑀲𑁄 𑀦𑀭𑀺𑀲𑁆𑀲𑀭𑁄.

𑁩𑁬. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀫𑀕𑁆𑀕𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀫𑀕𑁆𑀕𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀲𑀢𑁆𑀢𑀫𑀁.

𑁮. 𑀨𑀮𑀓𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁭. ‘‘𑀬𑀸𑀦𑀓𑀸𑀭𑁄 𑀧𑀼𑀭𑁂 𑀆𑀲𑀺𑀁, 𑀤𑀸𑀭𑀼𑀓𑀫𑁆𑀫𑁂 𑀲𑀼𑀲𑀺𑀓𑁆𑀔𑀺𑀢𑁄;

𑀘𑀦𑁆𑀤𑀦𑀁 𑀨𑀮𑀓𑀁 𑀓𑀢𑁆𑀯𑀸, 𑀅𑀤𑀸𑀲𑀺𑀁 𑀮𑁄𑀓𑀩𑀦𑁆𑀥𑀼𑀦𑁄.

𑁩𑁮. ‘‘𑀧𑀪𑀸𑀲𑀢𑀺 𑀇𑀤𑀁 𑀩𑁆𑀬𑀫𑁆𑀳𑀁, 𑀲𑀼𑀯𑀡𑁆𑀡𑀲𑁆𑀲 𑀲𑀼𑀦𑀺𑀫𑁆𑀫𑀺𑀢𑀁;

𑀳𑀢𑁆𑀣𑀺𑀬𑀸𑀦𑀁 𑀅𑀲𑁆𑀲𑀬𑀸𑀦𑀁, 𑀤𑀺𑀩𑁆𑀩𑀬𑀸𑀦𑀁 𑀉𑀧𑀝𑁆𑀞𑀺𑀢𑀁.

𑁩𑁯. ‘‘𑀧𑀸𑀲𑀸𑀤𑀸 𑀲𑀺𑀯𑀺𑀓𑀸 𑀘𑁂𑀯, 𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀬𑀤𑀺𑀘𑁆𑀙𑀓𑀁;

𑀅𑀓𑁆𑀔𑀼𑀩𑁆𑀪𑀁 [𑀅𑀓𑁆𑀔𑁄𑀪𑀁 (𑀲𑀻.)] 𑀭𑀢𑀦𑀁 𑀫𑀬𑁆𑀳𑀁, 𑀨𑀮𑀓𑀲𑁆𑀲 𑀇𑀤𑀁 𑀨𑀮𑀁.

𑁪𑁦. ‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀨𑀮𑀓𑀁 𑀬𑀫𑀳𑀁 𑀤𑀤𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀨𑀮𑀓𑀲𑁆𑀲 𑀇𑀤𑀁 𑀨𑀮𑀁.

𑁪𑁧. ‘‘𑀲𑀢𑁆𑀢𑀧𑀜𑁆𑀜𑀸𑀲𑀓𑀧𑁆𑀧𑀫𑁆𑀳𑀺, 𑀘𑀢𑀼𑀭𑁄 𑀦𑀺𑀫𑁆𑀫𑀺𑀢𑀸𑀯𑁆𑀳𑀬𑀸;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑀸, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁪𑁨. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀨𑀮𑀓𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀨𑀮𑀓𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀅𑀝𑁆𑀞𑀫𑀁.

𑁯. 𑀯𑀝𑀁𑀲𑀓𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁪𑁩. ‘‘𑀲𑀼𑀫𑁂𑀥𑁄 𑀦𑀸𑀫 𑀦𑀸𑀫𑁂𑀦, 𑀲𑀬𑀫𑁆𑀪𑀽 𑀅𑀧𑀭𑀸𑀚𑀺𑀢𑁄;

𑀯𑀺𑀯𑁂𑀓𑀫𑀦𑀼𑀩𑁆𑀭𑀽𑀳𑀦𑁆𑀢𑁄, 𑀅𑀚𑁆𑀛𑁄𑀕𑀳𑀺 𑀫𑀳𑀸𑀯𑀦𑀁.

𑁪𑁪. ‘‘𑀲𑀴𑀮𑀁 𑀧𑀼𑀧𑁆𑀨𑀺𑀢𑀁 𑀤𑀺𑀲𑁆𑀯𑀸, 𑀕𑀦𑁆𑀣𑀺𑀢𑁆𑀯𑀸𑀦 [𑀩𑀦𑁆𑀥𑀺𑀢𑁆𑀯𑀸𑀦 (𑀲𑀻.)] 𑀯𑀝𑀁𑀲𑀓𑀁;

𑀩𑀼𑀤𑁆𑀥𑀲𑁆𑀲 𑀅𑀪𑀺𑀭𑁄𑀧𑁂𑀲𑀺𑀁, 𑀲𑀫𑁆𑀫𑀼𑀔𑀸 𑀮𑁄𑀓𑀦𑀸𑀬𑀓𑀁.

𑁪𑁫. ‘‘𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑀫𑁆𑀳𑀺, 𑀬𑀁 𑀧𑀼𑀧𑁆𑀨𑀫𑀪𑀺𑀭𑁄𑀧𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁪𑁬. ‘‘𑀊𑀦𑀯𑀻𑀲𑁂 𑀓𑀧𑁆𑀧𑀲𑀢𑁂, 𑀲𑁄𑀴𑀲𑀸𑀲𑀼𑀁 𑀲𑀼𑀦𑀺𑀫𑁆𑀫𑀺𑀢𑀸;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑀸, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁪𑁭. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀯𑀝𑀁𑀲𑀓𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀯𑀝𑀁𑀲𑀓𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀦𑀯𑀫𑀁.

𑁧𑁦. 𑀧𑀮𑁆𑀮𑀗𑁆𑀓𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁪𑁮. ‘‘𑀲𑀼𑀫𑁂𑀥𑀲𑁆𑀲 𑀪𑀕𑀯𑀢𑁄, 𑀮𑁄𑀓𑀚𑁂𑀝𑁆𑀞𑀲𑁆𑀲 𑀢𑀸𑀤𑀺𑀦𑁄;

𑀧𑀮𑁆𑀮𑀗𑁆𑀓𑁄 𑀳𑀺 𑀫𑀬𑀸 𑀤𑀺𑀦𑁆𑀦𑁄, 𑀲𑀉𑀢𑁆𑀢𑀭𑀲𑀧𑀘𑁆𑀙𑀤𑁄.

𑁪𑁯. ‘‘𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀧𑀮𑁆𑀮𑀗𑁆𑀓𑁄 𑀆𑀲𑀺 𑀲𑁄 𑀢𑀤𑀸;

𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀦𑀺𑀩𑁆𑀩𑀢𑁆𑀢𑀢𑀺 𑀲𑀤𑀸 𑀫𑀫.

𑁫𑁦. ‘‘𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑀫𑁆𑀳𑀺, 𑀧𑀮𑁆𑀮𑀗𑁆𑀓𑀫𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀧𑀮𑁆𑀮𑀗𑁆𑀓𑀲𑁆𑀲 𑀇𑀤𑀁 𑀨𑀮𑀁.

𑁫𑁧. ‘‘𑀯𑀻𑀲𑀓𑀧𑁆𑀧𑀲𑀳𑀲𑁆𑀲𑀫𑁆𑀳𑀺, 𑀲𑀼𑀯𑀡𑁆𑀡𑀸𑀪𑀸 𑀢𑀬𑁄 𑀚𑀦𑀸;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑀸, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁫𑁨. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀮𑁆𑀮𑀗𑁆𑀓𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀮𑁆𑀮𑀗𑁆𑀓𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀲𑀫𑀁.

𑀙𑀢𑁆𑀢𑀯𑀕𑁆𑀕𑁄 𑀧𑀦𑁆𑀦𑀭𑀲𑀫𑁄.