𑁧𑁬. 𑀩𑀦𑁆𑀥𑀼𑀚𑀻𑀯𑀓𑀯𑀕𑁆𑀕𑁄

𑁧. 𑀩𑀦𑁆𑀥𑀼𑀚𑀻𑀯𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧. ‘‘𑀘𑀦𑁆𑀤𑀁𑀯 𑀯𑀺𑀫𑀮𑀁 𑀲𑀼𑀤𑁆𑀥𑀁, 𑀯𑀺𑀧𑁆𑀧𑀲𑀦𑁆𑀦𑀫𑀦𑀸𑀯𑀺𑀮𑀁;

𑀦𑀦𑁆𑀤𑀻𑀪𑀯𑀧𑀭𑀺𑀓𑁆𑀔𑀻𑀡𑀁, 𑀢𑀺𑀡𑁆𑀡𑀁 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀁.

𑁨. ‘‘𑀦𑀺𑀩𑁆𑀩𑀸𑀧𑀬𑀦𑁆𑀢𑀁 𑀚𑀦𑀢𑀁, 𑀢𑀺𑀡𑁆𑀡𑀁 [𑀤𑀺𑀲𑁆𑀯𑀸 (?)] 𑀢𑀸𑀭𑀬𑀢𑀁 𑀯𑀭𑀁 [𑀢𑀸𑀭𑀬𑀢𑀁 𑀫𑀼𑀦𑀺𑀁 (𑀲𑁆𑀬𑀸.)];

𑀫𑀼𑀦𑀺𑀁 𑀯𑀦𑀫𑁆𑀳𑀺 𑀛𑀸𑀬𑀦𑁆𑀢𑀁 [𑀯𑀦𑀲𑁆𑀫𑀺𑀁 𑀛𑀸𑀬𑀫𑀸𑀦𑀁 𑀢𑀁 (𑀲𑀻. 𑀲𑁆𑀬𑀸.)], 𑀏𑀓𑀕𑁆𑀕𑀁 𑀲𑀼𑀲𑀫𑀸𑀳𑀺𑀢𑀁.

𑁩. ‘‘𑀩𑀦𑁆𑀥𑀼𑀚𑀻𑀯𑀓𑀧𑀼𑀧𑁆𑀨𑀸𑀦𑀺, 𑀮𑀕𑁂𑀢𑁆𑀯𑀸 𑀲𑀼𑀢𑁆𑀢𑀓𑁂𑀦𑀳𑀁;

𑀩𑀼𑀤𑁆𑀥𑀲𑁆𑀲 𑀅𑀪𑀺𑀭𑁄𑀧𑀬𑀺𑀁, 𑀲𑀺𑀔𑀺𑀦𑁄 𑀮𑁄𑀓𑀩𑀦𑁆𑀥𑀼𑀦𑁄.

𑁪. ‘‘𑀏𑀓𑀢𑁆𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀓𑀫𑁆𑀫𑀫𑀓𑀭𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁫. ‘‘𑀇𑀢𑁄 𑀲𑀢𑁆𑀢𑀫𑀓𑁂 𑀓𑀧𑁆𑀧𑁂, 𑀫𑀦𑀼𑀚𑀺𑀦𑁆𑀤𑁄 𑀫𑀳𑀸𑀬𑀲𑁄;

𑀲𑀫𑀦𑁆𑀢𑀘𑀓𑁆𑀔𑀼 𑀦𑀸𑀫𑀸𑀲𑀺, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁬. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀩𑀦𑁆𑀥𑀼𑀚𑀻𑀯𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀩𑀦𑁆𑀥𑀼𑀚𑀻𑀯𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀞𑀫𑀁.

𑁨. 𑀢𑀫𑁆𑀩𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁭. ‘‘𑀧𑀭𑀓𑀫𑁆𑀫𑀸𑀬𑀦𑁂 𑀬𑀼𑀢𑁆𑀢𑁄, 𑀅𑀧𑀭𑀸𑀥𑀁 𑀅𑀓𑀸𑀲𑀳𑀁;

𑀯𑀦𑀦𑁆𑀢𑀁 𑀅𑀪𑀺𑀥𑀸𑀯𑀺𑀲𑁆𑀲𑀁, 𑀪𑀬𑀯𑁂𑀭𑀲𑀫𑀧𑁆𑀧𑀺𑀢𑁄.

𑁮. ‘‘𑀧𑀼𑀧𑁆𑀨𑀺𑀢𑀁 𑀧𑀸𑀤𑀧𑀁 𑀤𑀺𑀲𑁆𑀯𑀸, 𑀧𑀺𑀡𑁆𑀟𑀺𑀩𑀦𑁆𑀥𑀁 𑀲𑀼𑀦𑀺𑀫𑁆𑀫𑀺𑀢𑀁;

𑀢𑀫𑁆𑀩𑀧𑀼𑀧𑁆𑀨𑀁 𑀕𑀳𑁂𑀢𑁆𑀯𑀸𑀦, 𑀩𑁄𑀥𑀺𑀬𑀁 𑀑𑀓𑀺𑀭𑀺𑀁 𑀅𑀳𑀁.

𑁯. ‘‘𑀲𑀫𑁆𑀫𑀚𑁆𑀚𑀺𑀢𑁆𑀯𑀸𑀦 𑀢𑀁 𑀩𑁄𑀥𑀺𑀁, 𑀧𑀸𑀝𑀮𑀺𑀁 𑀧𑀸𑀤𑀧𑀼𑀢𑁆𑀢𑀫𑀁;

𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸𑀦, 𑀩𑁄𑀥𑀺𑀫𑀽𑀮𑁂 𑀉𑀧𑀸𑀯𑀺𑀲𑀺𑀁.

𑁧𑁦. ‘‘𑀕𑀢𑀫𑀕𑁆𑀕𑀁 𑀕𑀯𑁂𑀲𑀦𑁆𑀢𑀸, 𑀆𑀕𑀘𑁆𑀙𑀼𑀁 𑀫𑀫 𑀲𑀦𑁆𑀢𑀺𑀓𑀁;

𑀢𑁂 𑀘 𑀤𑀺𑀲𑁆𑀯𑀸𑀦𑀳𑀁 𑀢𑀢𑁆𑀣, 𑀆𑀯𑀚𑁆𑀚𑀺𑀁 𑀩𑁄𑀥𑀺𑀫𑀼𑀢𑁆𑀢𑀫𑀁.

𑁧𑁧. ‘‘𑀯𑀦𑁆𑀤𑀺𑀢𑁆𑀯𑀸𑀦 𑀅𑀳𑀁 𑀩𑁄𑀥𑀺𑀁, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸;

𑀅𑀦𑁂𑀓𑀢𑀸𑀮𑁂 𑀧𑀧𑀢𑀺𑀁, 𑀕𑀺𑀭𑀺𑀤𑀼𑀕𑁆𑀕𑁂 𑀪𑀬𑀸𑀦𑀓𑁂.

𑁧𑁨. ‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀭𑁄𑀧𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑁄𑀥𑀺𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁧𑁩. ‘‘𑀇𑀢𑁄 𑀘 𑀢𑀢𑀺𑀬𑁂 𑀓𑀧𑁆𑀧𑁂, 𑀭𑀸𑀚𑀸 𑀲𑀼𑀲𑀜𑁆𑀜𑀢𑁄 𑀅𑀳𑀁 [𑀲𑀁𑀣𑀼𑀲𑀺𑀢𑁄 𑀅𑀳𑀼𑀁 (𑀲𑀻.)];

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁧𑁪. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀢𑀫𑁆𑀩𑀧𑀼𑀧𑁆𑀨𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀢𑀫𑁆𑀩𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀼𑀢𑀺𑀬𑀁.

𑁩. 𑀯𑀻𑀣𑀺𑀲𑀫𑁆𑀫𑀚𑁆𑀚𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁫. ‘‘𑀉𑀤𑁂𑀦𑁆𑀢𑀁 𑀲𑀢𑀭𑀁𑀲𑀺𑀁𑀯, 𑀧𑀻𑀢𑀭𑀁𑀲𑀺𑀁𑀯 [𑀲𑀺𑀢𑀭𑀁𑀲𑀺𑀁𑀯 (𑀲𑀻. 𑀲𑁆𑀬𑀸.)] 𑀪𑀸𑀡𑀼𑀫𑀁;

𑀧𑀦𑁆𑀦𑀭𑀲𑁂 𑀬𑀣𑀸 𑀘𑀦𑁆𑀤𑀁, 𑀦𑀺𑀬𑁆𑀬𑀦𑁆𑀢𑀁 𑀮𑁄𑀓𑀦𑀸𑀬𑀓𑀁.

𑁧𑁬. ‘‘𑀅𑀝𑁆𑀞𑀲𑀝𑁆𑀞𑀺𑀲𑀳𑀲𑁆𑀲𑀸𑀦𑀺, 𑀲𑀩𑁆𑀩𑁂 𑀔𑀻𑀡𑀸𑀲𑀯𑀸 𑀅𑀳𑀼𑀁;

𑀧𑀭𑀺𑀯𑀸𑀭𑀺𑀁𑀲𑀼 𑀲𑀫𑁆𑀩𑀼𑀤𑁆𑀥𑀁, 𑀤𑁆𑀯𑀺𑀧𑀤𑀺𑀦𑁆𑀤𑀁 𑀦𑀭𑀸𑀲𑀪𑀁.

𑁧𑁭. ‘‘𑀲𑀫𑁆𑀫𑀚𑁆𑀚𑀺𑀢𑁆𑀯𑀸𑀦 𑀢𑀁 𑀯𑀻𑀣𑀺𑀁, 𑀦𑀺𑀬𑁆𑀬𑀦𑁆𑀢𑁂 𑀮𑁄𑀓𑀦𑀸𑀬𑀓𑁂;

𑀉𑀲𑁆𑀲𑀸𑀧𑁂𑀲𑀺𑀁 𑀥𑀚𑀁 𑀢𑀢𑁆𑀣, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸.

𑁧𑁮. ‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀥𑀚𑀁 𑀅𑀪𑀺𑀭𑁄𑀧𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀥𑀚𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁧𑁯. ‘‘𑀇𑀢𑁄 𑀘𑀢𑀼𑀢𑁆𑀣𑀓𑁂 𑀓𑀧𑁆𑀧𑁂, 𑀭𑀸𑀚𑀸𑀳𑁄𑀲𑀺𑀁 𑀫𑀳𑀩𑁆𑀩𑀮𑁄;

𑀲𑀩𑁆𑀩𑀸𑀓𑀸𑀭𑁂𑀦 𑀲𑀫𑁆𑀧𑀦𑁆𑀦𑁄, 𑀲𑀼𑀥𑀚𑁄 𑀇𑀢𑀺 𑀯𑀺𑀲𑁆𑀲𑀼𑀢𑁄.

𑁨𑁦. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀯𑀻𑀣𑀺𑀲𑀫𑁆𑀫𑀚𑁆𑀚𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀯𑀻𑀣𑀺𑀲𑀫𑁆𑀫𑀚𑁆𑀚𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀢𑀢𑀺𑀬𑀁.

𑁪. 𑀓𑀓𑁆𑀓𑀸𑀭𑀼𑀧𑀼𑀧𑁆𑀨𑀧𑀽𑀚𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁧. ‘‘𑀤𑁂𑀯𑀧𑀼𑀢𑁆𑀢𑁄 𑀅𑀳𑀁 𑀲𑀦𑁆𑀢𑁄, 𑀧𑀽𑀚𑀬𑀺𑀁 𑀲𑀺𑀔𑀺𑀦𑀸𑀬𑀓𑀁;

𑀓𑀓𑁆𑀓𑀸𑀭𑀼𑀧𑀼𑀧𑁆𑀨𑀁 𑀧𑀕𑁆𑀕𑀬𑁆𑀳, 𑀩𑀼𑀤𑁆𑀥𑀲𑁆𑀲 𑀅𑀪𑀺𑀭𑁄𑀧𑀬𑀺𑀁.

𑁨𑁨. ‘‘𑀏𑀓𑀢𑁆𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀭𑁄𑀧𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁨𑁩. ‘‘𑀇𑀢𑁄 𑀘 𑀦𑀯𑀫𑁂 𑀓𑀧𑁆𑀧𑁂, 𑀭𑀸𑀚𑀸 𑀲𑀢𑁆𑀢𑀼𑀢𑁆𑀢𑀫𑁄 𑀅𑀳𑀼𑀁;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁨𑁪. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀓𑀓𑁆𑀓𑀸𑀭𑀼𑀧𑀼𑀧𑁆𑀨𑀧𑀽𑀚𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀓𑀓𑁆𑀓𑀸𑀭𑀼𑀧𑀼𑀧𑁆𑀨𑀧𑀽𑀚𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀘𑀢𑀼𑀢𑁆𑀣𑀁.

𑁫. 𑀫𑀦𑁆𑀤𑀸𑀭𑀯𑀧𑀼𑀧𑁆𑀨𑀧𑀽𑀚𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁫. ‘‘𑀤𑁂𑀯𑀧𑀼𑀢𑁆𑀢𑁄 𑀅𑀳𑀁 𑀲𑀦𑁆𑀢𑁄, 𑀧𑀽𑀚𑀬𑀺𑀁 𑀲𑀺𑀔𑀺𑀦𑀸𑀬𑀓𑀁;

𑀫𑀦𑁆𑀤𑀸𑀭𑀯𑁂𑀦 𑀧𑀼𑀧𑁆𑀨𑁂𑀦, 𑀩𑀼𑀤𑁆𑀥𑀲𑁆𑀲 𑀅𑀪𑀺𑀭𑁄𑀧𑀬𑀺𑀁.

𑁨𑁬. ‘‘𑀲𑀢𑁆𑀢𑀸𑀳𑀁 𑀙𑀤𑀦𑀁 𑀆𑀲𑀺, 𑀤𑀺𑀩𑁆𑀩𑀁 𑀫𑀸𑀮𑀁 𑀢𑀣𑀸𑀕𑀢𑁂;

𑀲𑀩𑁆𑀩𑁂 𑀚𑀦𑀸 𑀲𑀫𑀸𑀕𑀦𑁆𑀢𑁆𑀯𑀸, 𑀦𑀫𑀲𑁆𑀲𑀺𑀁𑀲𑀼 𑀢𑀣𑀸𑀕𑀢𑀁.

𑁨𑁭. ‘‘𑀏𑀓𑀢𑁆𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀧𑀽𑀚𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁨𑁮. ‘‘𑀇𑀢𑁄 𑀘 𑀤𑀲𑀫𑁂 𑀓𑀧𑁆𑀧𑁂, 𑀭𑀸𑀚𑀸𑀳𑁄𑀲𑀺𑀁 𑀚𑀼𑀢𑀺𑀦𑁆𑀥𑀭𑁄;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁨𑁯. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀫𑀦𑁆𑀤𑀸𑀭𑀯𑀧𑀼𑀧𑁆𑀨𑀧𑀽𑀚𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀫𑀦𑁆𑀤𑀸𑀭𑀯𑀧𑀼𑀧𑁆𑀨𑀧𑀽𑀚𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀜𑁆𑀘𑀫𑀁.

𑁬. 𑀓𑀤𑀫𑁆𑀩𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁦. ‘‘𑀳𑀺𑀫𑀯𑀦𑁆𑀢𑀲𑁆𑀲𑀸𑀯𑀺𑀤𑀽𑀭𑁂, 𑀓𑀼𑀓𑁆𑀓𑀼𑀝𑁄 𑀦𑀸𑀫 𑀧𑀩𑁆𑀩𑀢𑁄;

𑀢𑀫𑁆𑀳𑀺 𑀧𑀩𑁆𑀩𑀢𑀧𑀸𑀤𑀫𑁆𑀳𑀺, 𑀲𑀢𑁆𑀢 𑀩𑀼𑀤𑁆𑀥𑀸 𑀯𑀲𑀦𑁆𑀢𑀺 𑀢𑁂.

𑁩𑁧. ‘‘𑀓𑀤𑀫𑁆𑀩𑀁 𑀧𑀼𑀧𑁆𑀨𑀺𑀢𑀁 𑀤𑀺𑀲𑁆𑀯𑀸, 𑀤𑀻𑀧𑀭𑀸𑀚𑀁𑀯 𑀉𑀕𑁆𑀕𑀢𑀁;

𑀉𑀪𑁄 𑀳𑀢𑁆𑀣𑁂𑀳𑀺 𑀧𑀕𑁆𑀕𑀬𑁆𑀳, 𑀲𑀢𑁆𑀢 𑀩𑀼𑀤𑁆𑀥𑁂 𑀲𑀫𑁄𑀓𑀺𑀭𑀺𑀁.

𑁩𑁨. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀭𑁄𑀧𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁩𑁩. ‘‘𑀤𑁆𑀯𑁂𑀦𑀯𑀼𑀢𑁂 𑀇𑀢𑁄 𑀓𑀧𑁆𑀧𑁂, 𑀲𑀢𑁆𑀢𑀸𑀲𑀼𑀁 𑀧𑀼𑀧𑁆𑀨𑀦𑀸𑀫𑀓𑀸;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑀸, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁩𑁪. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀓𑀤𑀫𑁆𑀩𑀧𑀼𑀧𑁆𑀨𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺;

𑀓𑀤𑀫𑁆𑀩𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀙𑀝𑁆𑀞𑀁.

𑁭. 𑀢𑀺𑀡𑀲𑀽𑀮𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁫. ‘‘𑀳𑀺𑀫𑀯𑀦𑁆𑀢𑀲𑁆𑀲𑀸𑀯𑀺𑀤𑀽𑀭𑁂, 𑀪𑀽𑀢𑀕𑀡𑁄 𑀦𑀸𑀫 𑀧𑀩𑁆𑀩𑀢𑁄;

𑀯𑀲𑀢𑁂𑀓𑁄 𑀚𑀺𑀦𑁄 𑀢𑀢𑁆𑀣, 𑀲𑀬𑀫𑁆𑀪𑀽 𑀮𑁄𑀓𑀦𑀺𑀲𑁆𑀲𑀝𑁄.

𑁩𑁬. ‘‘𑀢𑀺𑀡𑀲𑀽𑀮𑀁 𑀕𑀳𑁂𑀢𑁆𑀯𑀸𑀦, 𑀩𑀼𑀤𑁆𑀥𑀲𑁆𑀲 𑀅𑀪𑀺𑀭𑁄𑀧𑀬𑀺𑀁;

𑀏𑀓𑀽𑀦𑀲𑀢𑀲𑀳𑀲𑁆𑀲𑀁, 𑀓𑀧𑁆𑀧𑀁 𑀦 𑀯𑀺𑀦𑀺𑀧𑀸𑀢𑀺𑀓𑁄.

𑁩𑁭. ‘‘𑀇𑀢𑁄 𑀏𑀓𑀸𑀤𑀲𑁂 𑀓𑀧𑁆𑀧𑁂, 𑀏𑀓𑁄𑀲𑀺𑀁 𑀥𑀭𑀡𑀻𑀭𑀼𑀳𑁄;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁩𑁮. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀢𑀺𑀡𑀲𑀽𑀮𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀢𑀺𑀡𑀲𑀽𑀮𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀲𑀢𑁆𑀢𑀫𑀁.

𑁮. 𑀦𑀸𑀕𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁯. ‘‘𑀲𑀼𑀯𑀘𑁆𑀙𑁄 𑀦𑀸𑀫 𑀦𑀸𑀫𑁂𑀦, 𑀩𑁆𑀭𑀸𑀳𑁆𑀫𑀡𑁄 𑀫𑀦𑁆𑀢𑀧𑀸𑀭𑀕𑀽;

𑀧𑀼𑀭𑀓𑁆𑀔𑀢𑁄 𑀲𑀲𑀺𑀲𑁆𑀲𑁂𑀳𑀺, 𑀯𑀲𑀢𑁂 𑀧𑀩𑁆𑀩𑀢𑀦𑁆𑀢𑀭𑁂.

𑁪𑁦. ‘‘𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄;

𑀫𑀫𑀼𑀤𑁆𑀥𑀭𑀺𑀢𑀼𑀓𑀸𑀫𑁄 𑀲𑁄, 𑀆𑀕𑀘𑁆𑀙𑀺 𑀫𑀫 𑀲𑀦𑁆𑀢𑀺𑀓𑀁.

𑁪𑁧. ‘‘𑀯𑁂𑀳𑀸𑀲𑀫𑁆𑀳𑀺 𑀘𑀗𑁆𑀓𑀫𑀢𑀺, 𑀥𑀽𑀧𑀸𑀬𑀢𑀺 𑀚𑀮𑀢𑁂 𑀢𑀣𑀸;

𑀳𑀸𑀲𑀁 𑀫𑀫𑀁 𑀯𑀺𑀤𑀺𑀢𑁆𑀯𑀸𑀦, 𑀧𑀓𑁆𑀓𑀸𑀫𑀺 𑀧𑀸𑀘𑀺𑀦𑀸𑀫𑀼𑀔𑁄.

𑁪𑁨. ‘‘𑀢𑀜𑁆𑀘 𑀅𑀘𑁆𑀙𑀭𑀺𑀬𑀁 𑀤𑀺𑀲𑁆𑀯𑀸, 𑀅𑀩𑁆𑀪𑀼𑀢𑀁 𑀮𑁄𑀫𑀳𑀁𑀲𑀦𑀁;

𑀦𑀸𑀕𑀧𑀼𑀧𑁆𑀨𑀁 𑀕𑀳𑁂𑀢𑁆𑀯𑀸𑀦, 𑀕𑀢𑀫𑀕𑁆𑀕𑀫𑁆𑀳𑀺 𑀑𑀓𑀺𑀭𑀺𑀁.

𑁪𑁩. ‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀁 𑀑𑀓𑀺𑀭𑀺𑀁 𑀅𑀳𑀁;

𑀢𑁂𑀦 𑀘𑀺𑀢𑁆𑀢𑀧𑁆𑀧𑀲𑀸𑀤𑁂𑀦, 𑀤𑀼𑀕𑁆𑀕𑀢𑀺𑀁 𑀦𑀼𑀧𑀧𑀚𑁆𑀚𑀳𑀁.

𑁪𑁪. ‘‘𑀏𑀓𑀢𑁆𑀢𑀺𑀁𑀲𑁂 𑀓𑀧𑁆𑀧𑀲𑀢𑁂 [𑀏𑀓𑀢𑀺𑀁𑀲𑁂 𑀇𑀢𑁄 𑀓𑀫𑁆𑀫𑁂 (𑀲𑁆𑀬𑀸.)], 𑀭𑀸𑀚𑀸 𑀆𑀲𑀺 𑀫𑀳𑀸𑀭𑀳𑁄;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁪𑁫. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀦𑀸𑀕𑀧𑀼𑀧𑁆𑀨𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀦𑀸𑀕𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀅𑀝𑁆𑀞𑀫𑀁.

𑁯. 𑀧𑀼𑀦𑁆𑀦𑀸𑀕𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁪𑁬. ‘‘𑀓𑀸𑀦𑀦𑀁 𑀯𑀦𑀫𑁄𑀕𑀬𑁆𑀳, 𑀯𑀲𑀸𑀫𑀺 𑀮𑀼𑀤𑁆𑀤𑀓𑁄 𑀅𑀳𑀁;

𑀧𑀼𑀦𑁆𑀦𑀸𑀕𑀁 𑀧𑀼𑀧𑁆𑀨𑀺𑀢𑀁 𑀤𑀺𑀲𑁆𑀯𑀸, 𑀩𑀼𑀤𑁆𑀥𑀲𑁂𑀝𑁆𑀞𑀁 𑀅𑀦𑀼𑀲𑁆𑀲𑀭𑀺𑀁.

𑁪𑁭. ‘‘𑀢𑀁 𑀧𑀼𑀧𑁆𑀨𑀁 𑀑𑀘𑀺𑀦𑀺𑀢𑁆𑀯𑀸𑀦, 𑀲𑀼𑀕𑀦𑁆𑀥𑀁 𑀕𑀦𑁆𑀥𑀺𑀢𑀁 𑀲𑀼𑀪𑀁;

𑀣𑀽𑀧𑀁 𑀓𑀭𑀺𑀢𑁆𑀯𑀸 𑀧𑀼𑀮𑀺𑀦𑁂, 𑀩𑀼𑀤𑁆𑀥𑀲𑁆𑀲 𑀅𑀪𑀺𑀭𑁄𑀧𑀬𑀺𑀁.

𑁪𑁮. ‘‘𑀤𑁆𑀯𑁂𑀦𑀯𑀼𑀢𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀧𑀽𑀚𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁪𑁯. ‘‘𑀏𑀓𑀫𑁆𑀳𑀺 𑀦𑀯𑀼𑀢𑁂 𑀓𑀧𑁆𑀧𑁂, 𑀏𑀓𑁄 𑀆𑀲𑀺𑀁 𑀢𑀫𑁄𑀦𑀼𑀤𑁄;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁫𑁦. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀼𑀦𑁆𑀦𑀸𑀕𑀧𑀼𑀧𑁆𑀨𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀼𑀦𑁆𑀦𑀸𑀕𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀦𑀯𑀫𑀁.

𑁧𑁦. 𑀓𑀼𑀫𑀼𑀤𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁫𑁧. ‘‘𑀳𑀺𑀫𑀯𑀦𑁆𑀢𑀲𑁆𑀲𑀸𑀯𑀺𑀤𑀽𑀭𑁂, 𑀫𑀳𑀸𑀚𑀸𑀢𑀲𑁆𑀲𑀭𑁄 𑀅𑀳𑀼;

𑀧𑀤𑀼𑀫𑀼𑀧𑁆𑀧𑀮𑀲𑀜𑁆𑀙𑀦𑁆𑀦𑁄, 𑀧𑀼𑀡𑁆𑀟𑀭𑀻𑀓𑀲𑀫𑁄𑀢𑁆𑀣𑀝𑁄.

𑁫𑁨. ‘‘𑀓𑀼𑀓𑀼𑀢𑁆𑀣𑁄 𑀦𑀸𑀫 𑀦𑀸𑀫𑁂𑀦, 𑀢𑀢𑁆𑀣𑀸𑀲𑀺𑀁 𑀲𑀓𑀼𑀡𑁄 𑀢𑀤𑀸;

𑀲𑀻𑀮𑀯𑀸 𑀩𑀼𑀤𑁆𑀥𑀺𑀲𑀫𑁆𑀧𑀦𑁆𑀦𑁄, 𑀧𑀼𑀜𑁆𑀜𑀸𑀧𑀼𑀜𑁆𑀜𑁂𑀲𑀼 𑀓𑁄𑀯𑀺𑀤𑁄.

𑁫𑁩. ‘‘𑀧𑀤𑀼𑀫𑀼𑀢𑁆𑀢𑀭𑁄 𑀮𑁄𑀓𑀯𑀺𑀤𑀽, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄;

𑀚𑀸𑀢𑀲𑁆𑀲𑀭𑀲𑁆𑀲𑀸𑀯𑀺𑀤𑀽𑀭𑁂, 𑀲𑀜𑁆𑀘𑀭𑀺𑀢𑁆𑀣 𑀫𑀳𑀸𑀫𑀼𑀦𑀺.

𑁫𑁪. ‘‘𑀚𑀮𑀚𑀁 𑀓𑀼𑀫𑀼𑀤𑀁 𑀙𑁂𑀢𑁆𑀯𑀸, 𑀉𑀧𑀦𑁂𑀲𑀺𑀁 𑀫𑀳𑁂𑀲𑀺𑀦𑁄;

𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀧𑀝𑀺𑀕𑁆𑀕𑀳𑀺 𑀫𑀳𑀸𑀫𑀼𑀦𑀺.

𑁫𑁫. ‘‘𑀢𑀜𑁆𑀘 𑀤𑀸𑀦𑀁 𑀤𑀤𑀺𑀢𑁆𑀯𑀸𑀦, 𑀲𑀼𑀓𑁆𑀓𑀫𑀽𑀮𑁂𑀦 𑀘𑁄𑀤𑀺𑀢𑁄;

𑀓𑀧𑁆𑀧𑀸𑀦𑀁 𑀲𑀢𑀲𑀳𑀲𑁆𑀲𑀁, 𑀤𑀼𑀕𑁆𑀕𑀢𑀺𑀁 𑀦𑀼𑀧𑀧𑀚𑁆𑀚𑀳𑀁.

𑁫𑁬. ‘‘𑀲𑁄𑀴𑀲𑁂𑀢𑁄 𑀓𑀧𑁆𑀧𑀲𑀢𑁂, 𑀆𑀲𑀼𑀁 𑀯𑀭𑀼𑀡𑀦𑀸𑀫𑀓𑀸;

𑀅𑀝𑁆𑀞 𑀏𑀢𑁂 𑀚𑀦𑀸𑀥𑀺𑀧𑀸, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁫𑁭. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀓𑀼𑀫𑀼𑀤𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀓𑀼𑀫𑀼𑀤𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀲𑀫𑀁.

𑀩𑀦𑁆𑀥𑀼𑀚𑀻𑀯𑀓𑀯𑀕𑁆𑀕𑁄 𑀲𑁄𑀴𑀲𑀫𑁄.