𑁧𑁦. 𑀧𑀺𑀬𑀸𑀮𑀨𑀮𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁬𑁬. ‘‘𑀧𑀸𑀭𑀸𑀯𑀢𑁄 [𑀧𑀭𑁄𑀥𑀓𑁄 (𑀲𑁆𑀬𑀸.)] 𑀢𑀤𑀸 𑀆𑀲𑀺𑀁, 𑀧𑀭𑀁 𑀅𑀦𑀼𑀧𑀭𑁄𑀥𑀓𑁄;

𑀧𑀩𑁆𑀪𑀸𑀭𑁂 𑀲𑁂𑀬𑁆𑀬𑀁 𑀓𑀧𑁆𑀧𑁂𑀫𑀺, 𑀅𑀯𑀺𑀤𑀽𑀭𑁂 𑀲𑀺𑀔𑀺𑀲𑀢𑁆𑀣𑀼𑀦𑁄.

𑁬𑁭. ‘‘𑀲𑀸𑀬𑀁 𑀧𑀸𑀢𑀜𑁆𑀘 𑀧𑀲𑁆𑀲𑀸𑀫𑀺, 𑀩𑀼𑀤𑁆𑀥𑀁 𑀮𑁄𑀓𑀕𑁆𑀕𑀦𑀸𑀬𑀓𑀁;

𑀤𑁂𑀬𑁆𑀬𑀥𑀫𑁆𑀫𑁄 𑀘 𑀫𑁂 𑀦𑀢𑁆𑀣𑀺, 𑀤𑁆𑀯𑀺𑀧𑀤𑀺𑀦𑁆𑀤𑀲𑁆𑀲 𑀢𑀸𑀤𑀺𑀦𑁄.

𑁬𑁮. ‘‘𑀧𑀺𑀬𑀸𑀮𑀨𑀮𑀫𑀸𑀤𑀸𑀬, 𑀅𑀕𑀫𑀁 𑀩𑀼𑀤𑁆𑀥𑀲𑀦𑁆𑀢𑀺𑀓𑀁;

𑀧𑀝𑀺𑀕𑁆𑀕𑀳𑁂𑀲𑀺 𑀪𑀕𑀯𑀸, 𑀮𑁄𑀓𑀚𑁂𑀝𑁆𑀞𑁄 𑀦𑀭𑀸𑀲𑀪𑁄.

𑁬𑁯. ‘‘𑀢𑀢𑁄 𑀧𑀭𑀁 𑀉𑀧𑀸𑀤𑀸𑀬, 𑀧𑀭𑀺𑀘𑀸𑀭𑀺𑀁 𑀯𑀺𑀦𑀸𑀬𑀓𑀁;

𑀢𑁂𑀦 𑀘𑀺𑀢𑁆𑀢𑀧𑁆𑀧𑀲𑀸𑀤𑁂𑀦, 𑀢𑀢𑁆𑀣 𑀓𑀸𑀮𑀗𑁆𑀓𑀢𑁄 𑀅𑀳𑀁.

𑁭𑁦. ‘‘𑀏𑀓𑀢𑁆𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀨𑀮𑀁 𑀅𑀤𑀤𑀺𑀁 𑀅𑀳𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀨𑀮𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁭𑁧. ‘‘𑀇𑀢𑁄 𑀧𑀦𑁆𑀦𑀭𑀲𑁂 𑀓𑀧𑁆𑀧𑁂, 𑀢𑀬𑁄 𑀆𑀲𑀼𑀁 𑀧𑀺𑀬𑀸𑀮𑀺𑀦𑁄;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑀸, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁭𑁨. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀺𑀬𑀸𑀮𑀨𑀮𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀺𑀬𑀸𑀮𑀨𑀮𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀲𑀫𑀁.

𑀲𑁄𑀪𑀺𑀢𑀯𑀕𑁆𑀕𑁄 𑀘𑀼𑀤𑁆𑀤𑀲𑀫𑁄.