𑁧𑁪. 𑀲𑁄𑀪𑀺𑀢𑀯𑀕𑁆𑀕𑁄

𑁧. 𑀲𑁄𑀪𑀺𑀢𑀢𑁆𑀣𑁂𑀭𑀅𑀧𑀤𑀸𑀦𑀁

𑁧. ‘‘𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄, 𑀮𑁄𑀓𑀚𑁂𑀝𑁆𑀞𑁄 𑀦𑀭𑀸𑀲𑀪𑁄;

𑀫𑀳𑀢𑁄 𑀚𑀦𑀓𑀸𑀬𑀲𑁆𑀲, 𑀤𑁂𑀲𑁂𑀢𑀺 𑀅𑀫𑀢𑀁 𑀧𑀤𑀁.

𑁨. ‘‘𑀢𑀲𑁆𑀲𑀸𑀳𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀯𑀸𑀘𑀸𑀲𑀪𑀺𑀫𑀼𑀤𑀻𑀭𑀺𑀢𑀁 [𑀯𑀸𑀘𑀸𑀲𑀪𑀺𑀫𑀼𑀤𑀻𑀭𑀬𑀺𑀁 (?)];

𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸𑀦, 𑀏𑀓𑀕𑁆𑀕𑁄 𑀆𑀲𑀳𑀁 𑀢𑀤𑀸.

𑁩. ‘‘𑀬𑀣𑀸 𑀲𑀫𑀼𑀤𑁆𑀤𑁄 𑀉𑀤𑀥𑀻𑀦𑀫𑀕𑁆𑀕𑁄, 𑀦𑁂𑀭𑀽 𑀦𑀕𑀸𑀦𑀁 𑀧𑀯𑀭𑁄 𑀲𑀺𑀮𑀼𑀘𑁆𑀘𑀬𑁄;

𑀢𑀣𑁂𑀯 𑀬𑁂 𑀘𑀺𑀢𑁆𑀢𑀯𑀲𑁂𑀦 𑀯𑀢𑁆𑀢𑀭𑁂, 𑀦 𑀩𑀼𑀤𑁆𑀥𑀜𑀸𑀡𑀲𑁆𑀲 𑀓𑀮𑀁 𑀉𑀧𑁂𑀦𑁆𑀢𑀺 𑀢𑁂.

𑁪. ‘‘𑀥𑀫𑁆𑀫𑀯𑀺𑀥𑀺𑀁 [𑀥𑀫𑁆𑀫𑁂 𑀯𑀺𑀥𑀺𑀁 (𑀲𑀻.)] 𑀞𑀧𑁂𑀢𑁆𑀯𑀸𑀦, 𑀩𑀼𑀤𑁆𑀥𑁄 𑀓𑀸𑀭𑀼𑀡𑀺𑀓𑁄 𑀇𑀲𑀺;

𑀪𑀺𑀓𑁆𑀔𑀼𑀲𑀗𑁆𑀖𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

𑁫. ‘‘‘𑀬𑁄 𑀲𑁄 𑀜𑀸𑀡𑀁 𑀧𑀓𑀺𑀢𑁆𑀢𑁂𑀲𑀺, 𑀩𑀼𑀤𑁆𑀥𑀫𑁆𑀳𑀺 𑀮𑁄𑀓𑀦𑀸𑀬𑀓𑁂;

𑀓𑀧𑁆𑀧𑀸𑀦𑀁 𑀲𑀢𑀲𑀳𑀲𑁆𑀲𑀁, 𑀤𑀼𑀕𑁆𑀕𑀢𑀺𑀁 𑀦 𑀕𑀫𑀺𑀲𑁆𑀲𑀢𑀺.

𑁬. ‘‘‘𑀓𑀺𑀮𑁂𑀲𑁂 𑀛𑀸𑀧𑀬𑀺𑀢𑁆𑀯𑀸𑀦, 𑀏𑀓𑀕𑁆𑀕𑁄 𑀲𑀼𑀲𑀫𑀸𑀳𑀺𑀢𑁄;

𑀲𑁄𑀪𑀺𑀢𑁄 𑀦𑀸𑀫 𑀦𑀸𑀫𑁂𑀦, 𑀳𑁂𑀲𑁆𑀲𑀢𑀺 𑀲𑀢𑁆𑀣𑀼 𑀲𑀸𑀯𑀓𑁄’.

𑁭. ‘‘𑀧𑀜𑁆𑀜𑀸𑀲𑁂 𑀓𑀧𑁆𑀧𑀲𑀳𑀲𑁆𑀲𑁂, 𑀲𑀢𑁆𑀢𑁂𑀯𑀸𑀲𑀼𑀁 𑀬𑀲𑀼𑀕𑁆𑀕𑀢𑀸 [𑀲𑀫𑀼𑀕𑁆𑀕𑀢𑀸 (𑀲𑁆𑀬𑀸.)];

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑀸, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁮. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁯. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑁄𑀪𑀺𑀢𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑁄𑀪𑀺𑀢𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀞𑀫𑀁.

𑁨. 𑀲𑀼𑀤𑀲𑁆𑀲𑀦𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁦. ‘‘𑀯𑀺𑀦𑀢𑀸 𑀦𑀤𑀺𑀬𑀸 [𑀯𑀺𑀢𑁆𑀣𑀢𑀸𑀬 𑀦𑀤𑀺𑀬𑀸 (𑀲𑁆𑀬𑀸.)] 𑀢𑀻𑀭𑁂, 𑀧𑀺𑀮𑀓𑁆𑀔𑀼 [𑀧𑀺𑀮𑀓𑁆𑀔𑁄 (𑀲𑀻. 𑀣𑁂𑀭𑀕𑀸𑀣𑀸 𑀅𑀝𑁆𑀞.)] 𑀨𑀮𑀺𑀢𑁄 𑀅𑀳𑀼;

𑀢𑀸𑀳𑀁 𑀭𑀼𑀓𑁆𑀔𑀁 𑀕𑀯𑁂𑀲𑀦𑁆𑀢𑁄, 𑀅𑀤𑁆𑀤𑀲𑀁 𑀮𑁄𑀓𑀦𑀸𑀬𑀓𑀁.

𑁧𑁧. ‘‘𑀓𑁂𑀢𑀓𑀁 𑀧𑀼𑀧𑁆𑀨𑀺𑀢𑀁 𑀤𑀺𑀲𑁆𑀯𑀸, 𑀯𑀡𑁆𑀝𑁂 𑀙𑁂𑀢𑁆𑀯𑀸𑀦𑀳𑀁 𑀢𑀤𑀸;

𑀩𑀼𑀤𑁆𑀥𑀲𑁆𑀲 𑀅𑀪𑀺𑀭𑁄𑀧𑁂𑀲𑀺𑀁, 𑀲𑀺𑀔𑀺𑀦𑁄 𑀮𑁄𑀓𑀩𑀦𑁆𑀥𑀼𑀦𑁄.

𑁧𑁨. ‘‘𑀬𑁂𑀦 𑀜𑀸𑀡𑁂𑀦 𑀧𑀢𑁆𑀢𑁄𑀲𑀺, 𑀅𑀘𑁆𑀘𑀼𑀢𑀁 𑀅𑀫𑀢𑀁 𑀧𑀤𑀁;

𑀢𑀁 𑀜𑀸𑀡𑀁 𑀅𑀪𑀺𑀧𑀽𑀚𑁂𑀫𑀺, 𑀩𑀼𑀤𑁆𑀥𑀲𑁂𑀝𑁆𑀞 𑀫𑀳𑀸𑀫𑀼𑀦𑀺.

𑁧𑁩. ‘‘𑀜𑀸𑀡𑀫𑁆𑀳𑀺 𑀧𑀽𑀚𑀁 𑀓𑀢𑁆𑀯𑀸𑀦, 𑀧𑀺𑀮𑀓𑁆𑀔𑀼𑀫𑀤𑁆𑀤𑀲𑀁 𑀅𑀳𑀁;

𑀧𑀝𑀺𑀮𑀤𑁆𑀥𑁄𑀫𑁆𑀳𑀺 𑀢𑀁 𑀧𑀜𑁆𑀜𑀁 [𑀢𑀁 𑀲𑀜𑁆𑀜𑀁 (𑀲𑁆𑀬𑀸.), 𑀢𑀁 𑀧𑀼𑀜𑁆𑀜𑀁 (𑀓.)], 𑀜𑀸𑀡𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁧𑁪. ‘‘𑀏𑀓𑀢𑁆𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀭𑁄𑀧𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀜𑀸𑀡𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁧𑁫. ‘‘𑀇𑀢𑁄 𑀢𑁂𑀭𑀲𑀓𑀧𑁆𑀧𑀫𑁆𑀳𑀺, 𑀤𑁆𑀯𑀸𑀤𑀲𑀸𑀲𑀼𑀁 𑀨𑀮𑀼𑀕𑁆𑀕𑀢𑀸;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑀸, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀧𑁆𑀨𑀮𑀸.

𑁧𑁬. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀼𑀤𑀲𑁆𑀲𑀦𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀼𑀤𑀲𑁆𑀲𑀦𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀼𑀢𑀺𑀬𑀁.

𑁩. 𑀘𑀦𑁆𑀤𑀦𑀧𑀽𑀚𑀦𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁭. ‘‘𑀘𑀦𑁆𑀤𑀪𑀸𑀕𑀸𑀦𑀤𑀻𑀢𑀻𑀭𑁂, 𑀅𑀳𑁄𑀲𑀺𑀁 𑀓𑀺𑀦𑁆𑀦𑀭𑁄 𑀢𑀤𑀸;

𑀧𑀼𑀧𑁆𑀨𑀪𑀓𑁆𑀔𑁄 𑀘𑀳𑀁 𑀆𑀲𑀺𑀁, 𑀧𑀼𑀧𑁆𑀨𑀸𑀦𑀺𑀯𑀲𑀦𑁄 𑀢𑀣𑀸 [𑀧𑀼𑀧𑁆𑀨𑀸𑀦𑀁 𑀯𑀲𑀦𑁄 𑀅𑀳𑀁 (𑀲𑁆𑀬𑀸.)].

𑁧𑁮. ‘‘𑀅𑀢𑁆𑀣𑀤𑀲𑁆𑀲𑀻 𑀢𑀼 𑀪𑀕𑀯𑀸, 𑀮𑁄𑀓𑀚𑁂𑀝𑁆𑀞𑁄 𑀦𑀭𑀸𑀲𑀪𑁄;

𑀯𑀺𑀧𑀺𑀦𑀕𑁆𑀕𑁂𑀦 𑀦𑀺𑀬𑁆𑀬𑀸𑀲𑀺, 𑀳𑀁𑀲𑀭𑀸𑀚𑀸𑀯 𑀅𑀫𑁆𑀩𑀭𑁂.

𑁧𑁯. ‘‘𑀦𑀫𑁄 𑀢𑁂 𑀧𑀼𑀭𑀺𑀲𑀸𑀚𑀜𑁆𑀜, 𑀘𑀺𑀢𑁆𑀢𑀁 𑀢𑁂 𑀲𑀼𑀯𑀺𑀲𑁄𑀥𑀺𑀢𑀁;

𑀧𑀲𑀦𑁆𑀦𑀫𑀼𑀔𑀯𑀡𑁆𑀡𑁄𑀲𑀺, 𑀯𑀺𑀧𑁆𑀧𑀲𑀦𑁆𑀦𑀫𑀼𑀔𑀺𑀦𑁆𑀤𑁆𑀭𑀺𑀬𑁄.

𑁨𑁦. ‘‘𑀑𑀭𑁄𑀳𑀺𑀢𑁆𑀯𑀸𑀦 𑀆𑀓𑀸𑀲𑀸, 𑀪𑀽𑀭𑀺𑀧𑀜𑁆𑀜𑁄 𑀲𑀼𑀫𑁂𑀥𑀲𑁄;

𑀲𑀗𑁆𑀖𑀸𑀝𑀺𑀁 𑀧𑀢𑁆𑀣𑀭𑀺𑀢𑁆𑀯𑀸𑀦, 𑀧𑀮𑁆𑀮𑀗𑁆𑀓𑁂𑀦 𑀉𑀧𑀸𑀯𑀺𑀲𑀺.

𑁨𑁧. ‘‘𑀯𑀺𑀮𑀻𑀦𑀁 𑀘𑀦𑁆𑀤𑀦𑀸𑀤𑀸𑀬, 𑀅𑀕𑀫𑀸𑀲𑀺𑀁 𑀚𑀺𑀦𑀦𑁆𑀢𑀺𑀓𑀁;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀩𑀼𑀤𑁆𑀥𑀲𑁆𑀲 𑀅𑀪𑀺𑀭𑁄𑀧𑀬𑀺𑀁.

𑁨𑁨. ‘‘𑀅𑀪𑀺𑀯𑀸𑀤𑁂𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑀁, 𑀮𑁄𑀓𑀚𑁂𑀝𑁆𑀞𑀁 𑀦𑀭𑀸𑀲𑀪𑀁;

𑀧𑀸𑀫𑁄𑀚𑁆𑀚𑀁 𑀚𑀦𑀬𑀺𑀢𑁆𑀯𑀸𑀦, 𑀧𑀓𑁆𑀓𑀸𑀫𑀺𑀁 𑀉𑀢𑁆𑀢𑀭𑀸𑀫𑀼𑀔𑁄.

𑁨𑁩. ‘‘𑀅𑀝𑁆𑀞𑀸𑀭𑀲𑁂 𑀓𑀧𑁆𑀧𑀲𑀢𑁂, 𑀘𑀦𑁆𑀤𑀦𑀁 𑀬𑀁 𑀅𑀧𑀽𑀚𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁨𑁪. ‘‘𑀘𑀢𑀼𑀤𑁆𑀤𑀲𑁂 𑀓𑀧𑁆𑀧𑀲𑀢𑁂, 𑀇𑀢𑁄 𑀆𑀲𑀺𑀁𑀲𑀼 𑀢𑁂 𑀢𑀬𑁄;

𑀭𑁄𑀳𑀡𑀻 𑀦𑀸𑀫 [𑀭𑁄𑀳𑀺𑀢𑀸 𑀦𑀸𑀫 (𑀲𑀻.), 𑀭𑁄𑀳𑀺𑀡𑀻 𑀦𑀸𑀫 (𑀲𑁆𑀬𑀸.)] 𑀦𑀸𑀫𑁂𑀦, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁨𑁫. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀘𑀦𑁆𑀤𑀦𑀧𑀽𑀚𑀦𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺;

𑀘𑀦𑁆𑀤𑀦𑀧𑀽𑀚𑀦𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀢𑀢𑀺𑀬𑀁.

𑀅𑀝𑁆𑀞𑀫𑀪𑀸𑀡𑀯𑀸𑀭𑀁.

𑁪. 𑀧𑀼𑀧𑁆𑀨𑀘𑁆𑀙𑀤𑀦𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁬. ‘‘𑀲𑀼𑀦𑀦𑁆𑀤𑁄 𑀦𑀸𑀫 𑀦𑀸𑀫𑁂𑀦, 𑀩𑁆𑀭𑀸𑀳𑁆𑀫𑀡𑁄 𑀫𑀦𑁆𑀢𑀧𑀸𑀭𑀕𑀽;

𑀅𑀚𑁆𑀛𑀸𑀬𑀓𑁄 𑀬𑀸𑀘𑀬𑁄𑀕𑁄, 𑀯𑀸𑀚𑀧𑁂𑀬𑁆𑀬𑀁 𑀅𑀬𑀸𑀚𑀬𑀺.

𑁨𑁭. ‘‘𑀧𑀤𑀼𑀫𑀼𑀢𑁆𑀢𑀭𑁄 𑀮𑁄𑀓𑀯𑀺𑀤𑀽, 𑀅𑀕𑁆𑀕𑁄 𑀓𑀸𑀭𑀼𑀡𑀺𑀓𑁄 𑀇𑀲𑀺;

𑀚𑀦𑀢𑀁 𑀅𑀦𑀼𑀓𑀫𑁆𑀧𑀦𑁆𑀢𑁄, 𑀅𑀫𑁆𑀩𑀭𑁂 𑀘𑀗𑁆𑀓𑀫𑀻 𑀢𑀤𑀸.

𑁨𑁮. ‘‘𑀘𑀗𑁆𑀓𑀫𑀺𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑁄, 𑀲𑀩𑁆𑀩𑀜𑁆𑀜𑀽 𑀮𑁄𑀓𑀦𑀸𑀬𑀓𑁄;

𑀫𑁂𑀢𑁆𑀢𑀸𑀬 𑀅𑀨𑀭𑀺 𑀲𑀢𑁆𑀢𑁂, 𑀅𑀧𑁆𑀧𑀫𑀸𑀡𑁂 [𑀅𑀧𑁆𑀧𑀫𑀸𑀡𑀁 (𑀲𑀻. 𑀲𑁆𑀬𑀸.)] 𑀦𑀺𑀭𑀽𑀧𑀥𑀺.

𑁨𑁯. ‘‘𑀯𑀡𑁆𑀝𑁂 𑀙𑁂𑀢𑁆𑀯𑀸𑀦 𑀧𑀼𑀧𑁆𑀨𑀸𑀦𑀺, 𑀩𑁆𑀭𑀸𑀳𑁆𑀫𑀡𑁄 𑀫𑀦𑁆𑀢𑀧𑀸𑀭𑀕𑀽;

𑀲𑀩𑁆𑀩𑁂 𑀲𑀺𑀲𑁆𑀲𑁂 𑀲𑀫𑀸𑀦𑁂𑀢𑁆𑀯𑀸, 𑀆𑀓𑀸𑀲𑁂 𑀉𑀓𑁆𑀔𑀺𑀧𑀸𑀧𑀬𑀺.

𑁩𑁦. ‘‘𑀬𑀸𑀯𑀢𑀸 𑀦𑀕𑀭𑀁 𑀆𑀲𑀺, 𑀧𑀼𑀧𑁆𑀨𑀸𑀦𑀁 𑀙𑀤𑀦𑀁 𑀢𑀤𑀸;

𑀩𑀼𑀤𑁆𑀥𑀲𑁆𑀲 𑀆𑀦𑀼𑀪𑀸𑀯𑁂𑀦, 𑀲𑀢𑁆𑀢𑀸𑀳𑀁 𑀦 𑀯𑀺𑀕𑀘𑁆𑀙𑀣.

𑁩𑁧. ‘‘𑀢𑁂𑀦𑁂𑀯 𑀲𑀼𑀓𑁆𑀓𑀫𑀽𑀮𑁂𑀦, 𑀅𑀦𑀼𑀪𑁄𑀢𑁆𑀯𑀸𑀦 𑀲𑀫𑁆𑀧𑀤𑀸;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀢𑀺𑀡𑁆𑀡𑁄 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀁.

𑁩𑁨. ‘‘𑀏𑀓𑀸𑀭𑀲𑁂 𑀓𑀧𑁆𑀧𑀲𑀢𑁂, 𑀧𑀜𑁆𑀘𑀢𑀺𑀁𑀲𑀸𑀲𑀼 𑀔𑀢𑁆𑀢𑀺𑀬𑀸;

𑀅𑀫𑁆𑀩𑀭𑀁𑀲𑀲𑀦𑀸𑀫𑀸 𑀢𑁂, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁩𑁩. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀼𑀧𑁆𑀨𑀘𑁆𑀙𑀤𑀦𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀼𑀧𑁆𑀨𑀘𑁆𑀙𑀤𑀦𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀘𑀢𑀼𑀢𑁆𑀣𑀁.

𑁫. 𑀭𑀳𑁄𑀲𑀜𑁆𑀜𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁪. ‘‘𑀳𑀺𑀫𑀯𑀦𑁆𑀢𑀲𑁆𑀲𑀸𑀯𑀺𑀤𑀽𑀭𑁂, 𑀯𑀲𑀪𑁄 𑀦𑀸𑀫 𑀧𑀩𑁆𑀩𑀢𑁄;

𑀢𑀲𑁆𑀫𑀺𑀁 𑀧𑀩𑁆𑀩𑀢𑀧𑀸𑀤𑀫𑁆𑀳𑀺, 𑀅𑀲𑁆𑀲𑀫𑁄 𑀆𑀲𑀺 𑀫𑀸𑀧𑀺𑀢𑁄.

𑁩𑁫. ‘‘𑀢𑀻𑀡𑀺 𑀲𑀺𑀲𑁆𑀲𑀲𑀳𑀲𑁆𑀲𑀸𑀦𑀺, 𑀯𑀸𑀘𑁂𑀲𑀺𑀁 𑀩𑁆𑀭𑀸𑀳𑁆𑀫𑀡𑁄 [𑀩𑁆𑀭𑀸𑀳𑁆𑀫𑀡𑁂 (𑀲𑀻.)] 𑀢𑀤𑀸;

𑀲𑀁𑀳𑀭𑀺𑀢𑁆𑀯𑀸𑀦 [𑀲𑀁𑀲𑀸𑀯𑀺𑀢𑁆𑀯𑀸𑀦 (𑀲𑁆𑀬𑀸.)] 𑀢𑁂 𑀲𑀺𑀲𑁆𑀲𑁂, 𑀏𑀓𑀫𑀦𑁆𑀢𑀁 𑀉𑀧𑀸𑀯𑀺𑀲𑀺𑀁.

𑁩𑁬. ‘‘𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀢𑁆𑀯𑀸, 𑀩𑁆𑀭𑀸𑀳𑁆𑀫𑀡𑁄 𑀫𑀦𑁆𑀢𑀧𑀸𑀭𑀕𑀽;

𑀩𑀼𑀤𑁆𑀥𑀯𑁂𑀤𑀁 𑀕𑀯𑁂𑀲𑀦𑁆𑀢𑁄 [𑀧𑀯𑁂𑀲𑀦𑁆𑀢𑁄 (𑀓.)], 𑀜𑀸𑀡𑁂 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁.

𑁩𑁭. ‘‘𑀢𑀢𑁆𑀣 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀦𑀺𑀲𑀻𑀤𑀺𑀁 𑀧𑀡𑁆𑀡𑀲𑀦𑁆𑀣𑀭𑁂;

𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸𑀦, 𑀢𑀢𑁆𑀣 𑀓𑀸𑀮𑀗𑁆𑀓𑀢𑁄 𑀅𑀳𑀁.

𑁩𑁮. ‘‘𑀏𑀓𑀢𑁆𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀲𑀜𑁆𑀜𑀫𑀮𑀪𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀜𑀸𑀡𑀲𑀜𑁆𑀜𑀸𑀬𑀺𑀤𑀁 𑀨𑀮𑀁.

𑁩𑁯. ‘‘𑀲𑀢𑁆𑀢𑀯𑀻𑀲𑀢𑀺𑀓𑀧𑁆𑀧𑀫𑁆𑀳𑀺, 𑀭𑀸𑀚𑀸 𑀲𑀺𑀭𑀺𑀥𑀭𑁄 𑀅𑀳𑀼;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁪𑁦. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀭𑀳𑁄𑀲𑀜𑁆𑀜𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀭𑀳𑁄𑀲𑀜𑁆𑀜𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀜𑁆𑀘𑀫𑀁.

𑁬. 𑀘𑀫𑁆𑀧𑀓𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁪𑁧. ‘‘𑀓𑀡𑀺𑀓𑀸𑀭𑀁𑀯 𑀚𑁄𑀢𑀦𑁆𑀢𑀁, 𑀦𑀺𑀲𑀺𑀦𑁆𑀦𑀁 𑀧𑀩𑁆𑀩𑀢𑀦𑁆𑀢𑀭𑁂;

𑀑𑀪𑀸𑀲𑁂𑀦𑁆𑀢𑀁 𑀤𑀺𑀲𑀸 𑀲𑀩𑁆𑀩𑀸, 𑀑𑀲𑀥𑀺𑀁 𑀯𑀺𑀬 𑀢𑀸𑀭𑀓𑀁 [𑀑𑀲𑀥𑀻 𑀯𑀺𑀬 𑀢𑀸𑀭𑀓𑀸 (𑀓.)].

𑁪𑁨. ‘‘𑀢𑀬𑁄 𑀫𑀸𑀡𑀯𑀓𑀸 𑀆𑀲𑀼𑀁, 𑀲𑀓𑁂 𑀲𑀺𑀧𑁆𑀧𑁂 𑀲𑀼𑀲𑀺𑀓𑁆𑀔𑀺𑀢𑀸;

𑀔𑀸𑀭𑀺𑀪𑀸𑀭𑀁 𑀕𑀳𑁂𑀢𑁆𑀯𑀸𑀦, 𑀅𑀦𑁆𑀯𑁂𑀦𑁆𑀢𑀺 𑀫𑀫 𑀧𑀘𑁆𑀙𑀢𑁄.

𑁪𑁩. ‘‘𑀧𑀼𑀝𑀓𑁂 𑀲𑀢𑁆𑀢 𑀧𑀼𑀧𑁆𑀨𑀸𑀦𑀺, 𑀦𑀺𑀓𑁆𑀔𑀺𑀢𑁆𑀢𑀸𑀦𑀺 𑀢𑀧𑀲𑁆𑀲𑀺𑀦𑀸;

𑀕𑀳𑁂𑀢𑁆𑀯𑀸 𑀢𑀸𑀦𑀺 𑀜𑀸𑀡𑀫𑁆𑀳𑀺, 𑀯𑁂𑀲𑁆𑀲𑀪𑀼𑀲𑁆𑀲𑀸𑀪𑀺𑀭𑁄𑀧𑀬𑀺𑀁.

𑁪𑁪. ‘‘𑀏𑀓𑀢𑁆𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀭𑁄𑀧𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀜𑀸𑀡𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁪𑁫. ‘‘𑀏𑀓𑀽𑀦𑀢𑀺𑀁𑀲𑀓𑀧𑁆𑀧𑀫𑁆𑀳𑀺, 𑀯𑀺𑀧𑀼𑀮𑀸𑀪 [𑀯𑀺𑀳𑀢𑀸𑀪𑀸 (𑀲𑁆𑀬𑀸.)] 𑀲𑀦𑀸𑀫𑀓𑁄;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀓𑁆𑀓𑀯𑀢𑁆𑀢𑀻 [𑀭𑀸𑀚𑀸 𑀳𑁄𑀲𑀺 (𑀓.)] 𑀫𑀳𑀩𑁆𑀩𑀮𑁄.

𑁪𑁬. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀘𑀫𑁆𑀧𑀓𑀧𑀼𑀧𑁆𑀨𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺;

𑀘𑀫𑁆𑀧𑀓𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀙𑀝𑁆𑀞𑀁.

𑁭. 𑀅𑀢𑁆𑀣𑀲𑀦𑁆𑀤𑀲𑁆𑀲𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁪𑁭. ‘‘𑀯𑀺𑀲𑀸𑀮𑀫𑀸𑀴𑁂 𑀆𑀲𑀻𑀦𑁄, 𑀅𑀤𑁆𑀤𑀲𑀁 𑀮𑁄𑀓𑀦𑀸𑀬𑀓𑀁;

𑀔𑀻𑀡𑀸𑀲𑀯𑀁 𑀩𑀮𑀧𑁆𑀧𑀢𑁆𑀢𑀁, 𑀪𑀺𑀓𑁆𑀔𑀼𑀲𑀗𑁆𑀖𑀧𑀼𑀭𑀓𑁆𑀔𑀢𑀁.

𑁪𑁮. ‘‘𑀲𑀢𑀲𑀳𑀲𑁆𑀲𑀸 𑀢𑁂𑀯𑀺𑀚𑁆𑀚𑀸, 𑀙𑀴𑀪𑀺𑀜𑁆𑀜𑀸 𑀫𑀳𑀺𑀤𑁆𑀥𑀺𑀓𑀸;

𑀧𑀭𑀺𑀯𑀸𑀭𑁂𑀦𑁆𑀢𑀺 𑀲𑀫𑁆𑀩𑀼𑀤𑁆𑀥𑀁, 𑀓𑁄 𑀤𑀺𑀲𑁆𑀯𑀸 𑀦𑀧𑁆𑀧𑀲𑀻𑀤𑀢𑀺.

𑁪𑁯. ‘‘𑀜𑀸𑀡𑁂 𑀉𑀧𑀦𑀺𑀥𑀸 𑀬𑀲𑁆𑀲, 𑀦 𑀯𑀺𑀚𑁆𑀚𑀢𑀺 𑀲𑀤𑁂𑀯𑀓𑁂;

𑀅𑀦𑀦𑁆𑀢𑀜𑀸𑀡𑀁 𑀲𑀫𑁆𑀩𑀼𑀤𑁆𑀥𑀁, 𑀓𑁄 𑀤𑀺𑀲𑁆𑀯𑀸 𑀦𑀧𑁆𑀧𑀲𑀻𑀤𑀢𑀺.

𑁫𑁦. ‘‘𑀥𑀫𑁆𑀫𑀓𑀸𑀬𑀜𑁆𑀘 𑀤𑀻𑀧𑁂𑀦𑁆𑀢𑀁, 𑀓𑁂𑀯𑀮𑀁 𑀭𑀢𑀦𑀸𑀓𑀭𑀁;

𑀯𑀺𑀓𑀧𑁆𑀧𑁂𑀢𑀼𑀁 [𑀯𑀺𑀓𑁄𑀧𑁂𑀢𑀼𑀁 (𑀲𑀻. 𑀲𑁆𑀬𑀸.)] 𑀦 𑀲𑀓𑁆𑀓𑁄𑀦𑁆𑀢𑀺, 𑀓𑁄 𑀤𑀺𑀲𑁆𑀯𑀸 𑀦𑀧𑁆𑀧𑀲𑀻𑀤𑀢𑀺.

𑁫𑁧. ‘‘𑀇𑀫𑀸𑀳𑀺 𑀢𑀻𑀳𑀺 𑀕𑀸𑀣𑀸𑀳𑀺, 𑀦𑀸𑀭𑀤𑁄𑀯𑁆𑀳𑀬𑀯𑀘𑁆𑀙𑀮𑁄 [𑀲𑀭𑀕𑀘𑁆𑀙𑀺𑀬𑁄 (𑀲𑀻.), 𑀧𑀼𑀭𑀕𑀘𑁆𑀙𑀺𑀬𑁄 (𑀲𑁆𑀬𑀸.)];

𑀧𑀤𑀼𑀫𑀼𑀢𑁆𑀢𑀭𑀁 𑀣𑀯𑀺𑀢𑁆𑀯𑀸𑀦, 𑀲𑀫𑁆𑀩𑀼𑀤𑁆𑀥𑀁 𑀅𑀧𑀭𑀸𑀚𑀺𑀢𑀁.

𑁫𑁨. ‘‘𑀢𑁂𑀦 𑀘𑀺𑀢𑁆𑀢𑀧𑁆𑀧𑀲𑀸𑀤𑁂𑀦, 𑀩𑀼𑀤𑁆𑀥𑀲𑀦𑁆𑀣𑀯𑀦𑁂𑀦 𑀘;

𑀓𑀧𑁆𑀧𑀸𑀦𑀁 𑀲𑀢𑀲𑀳𑀲𑁆𑀲𑀁, 𑀤𑀼𑀕𑁆𑀕𑀢𑀺𑀁, 𑀦𑀼𑀧𑀧𑀚𑁆𑀚𑀳𑀁.

𑁫𑁩. ‘‘𑀇𑀢𑁄 𑀢𑀺𑀁𑀲𑀓𑀧𑁆𑀧𑀲𑀢𑁂, 𑀲𑀼𑀫𑀺𑀢𑁆𑀢𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁫𑁪. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀅𑀢𑁆𑀣𑀲𑀦𑁆𑀤𑀲𑁆𑀲𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀅𑀢𑁆𑀣𑀲𑀦𑁆𑀤𑀲𑁆𑀲𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀲𑀢𑁆𑀢𑀫𑀁.

𑁮. 𑀏𑀓𑀧𑀲𑀸𑀤𑀦𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁫𑁫. ‘‘𑀦𑀸𑀭𑀤𑁄 𑀇𑀢𑀺 𑀫𑁂 𑀦𑀸𑀫𑀁 [𑀦𑀸𑀭𑀤𑁄 𑀇𑀢𑀺 𑀦𑀸𑀫𑁂𑀦 (𑀲𑁆𑀬𑀸. 𑀓.) 𑀉𑀧𑀭𑀺 𑀢𑁂𑀯𑀻𑀲𑀢𑀺𑀫𑀯𑀕𑁆𑀕𑁂 𑀧𑀦 𑀙𑀝𑁆𑀞𑀸𑀧𑀤𑀸𑀦𑁂 ‘‘𑀫𑁂 𑀦𑀸𑀫𑀁‘‘𑀇𑀘𑁆𑀘𑁂𑀯 𑀤𑀺𑀲𑁆𑀲𑀢𑀺], 𑀓𑁂𑀲𑀯𑁄 𑀇𑀢𑀺 𑀫𑀁 𑀯𑀺𑀤𑀽;

𑀓𑀼𑀲𑀮𑀸𑀓𑀼𑀲𑀮𑀁 𑀏𑀲𑀁, 𑀅𑀕𑀫𑀁 𑀩𑀼𑀤𑁆𑀥𑀲𑀦𑁆𑀢𑀺𑀓𑀁.

𑁫𑁬. ‘‘𑀫𑁂𑀢𑁆𑀢𑀘𑀺𑀢𑁆𑀢𑁄 𑀓𑀸𑀭𑀼𑀡𑀺𑀓𑁄, 𑀅𑀢𑁆𑀣𑀤𑀲𑁆𑀲𑀻 𑀫𑀳𑀸𑀫𑀼𑀦𑀺;

𑀅𑀲𑁆𑀲𑀸𑀲𑀬𑀦𑁆𑀢𑁄 𑀲𑀢𑁆𑀢𑁂 𑀲𑁄, 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀘𑀓𑁆𑀔𑀼𑀫𑀸.

𑁫𑁭. ‘‘𑀲𑀓𑀁 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀲𑀺𑀭𑁂 𑀓𑀢𑁆𑀯𑀸𑀦 𑀅𑀜𑁆𑀚𑀮𑀺𑀁;

𑀲𑀢𑁆𑀣𑀸𑀭𑀁 𑀅𑀪𑀺𑀯𑀸𑀤𑁂𑀢𑁆𑀯𑀸, 𑀧𑀓𑁆𑀓𑀸𑀫𑀺𑀁 𑀧𑀸𑀘𑀺𑀦𑀸𑀫𑀼𑀔𑁄.

𑁫𑁮. ‘‘𑀲𑀢𑁆𑀢𑀭𑀲𑁂 𑀓𑀧𑁆𑀧𑀲𑀢𑁂, 𑀭𑀸𑀚𑀸 𑀆𑀲𑀺 𑀫𑀳𑀻𑀧𑀢𑀺;

𑀅𑀫𑀺𑀢𑁆𑀢𑀢𑀸𑀧𑀦𑁄 𑀦𑀸𑀫, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁫𑁯. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀏𑀓𑀧𑀲𑀸𑀤𑀦𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀏𑀓𑀧𑀲𑀸𑀤𑀦𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀅𑀝𑁆𑀞𑀫𑀁.

𑁯. 𑀲𑀸𑀮𑀧𑀼𑀧𑁆𑀨𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁬𑁦. ‘‘𑀫𑀺𑀕𑀭𑀸𑀚𑀸 𑀢𑀤𑀸 𑀆𑀲𑀺𑀁, 𑀅𑀪𑀺𑀚𑀸𑀢𑁄 𑀲𑀼𑀓𑁂𑀲𑀭𑀻;

𑀕𑀺𑀭𑀺𑀤𑀼𑀕𑁆𑀕𑀁 𑀕𑀯𑁂𑀲𑀦𑁆𑀢𑁄, 𑀅𑀤𑁆𑀤𑀲𑀁 𑀮𑁄𑀓𑀦𑀸𑀬𑀓𑀁.

𑁬𑁧. ‘‘𑀅𑀬𑀁 𑀦𑀼 𑀔𑁄 𑀫𑀳𑀸𑀯𑀻𑀭𑁄, 𑀦𑀺𑀩𑁆𑀩𑀸𑀧𑁂𑀢𑀺 𑀫𑀳𑀸𑀚𑀦𑀁;

𑀬𑀁𑀦𑀽𑀦𑀸𑀳𑀁 𑀉𑀧𑀸𑀲𑁂𑀬𑁆𑀬𑀁, 𑀤𑁂𑀯𑀤𑁂𑀯𑀁 𑀦𑀭𑀸𑀲𑀪𑀁.

𑁬𑁨. ‘‘𑀲𑀸𑀔𑀁 𑀲𑀸𑀮𑀲𑁆𑀲 𑀪𑀜𑁆𑀚𑀺𑀢𑁆𑀯𑀸, 𑀲𑀓𑁄𑀲𑀁 𑀧𑀼𑀧𑁆𑀨𑀫𑀸𑀳𑀭𑀺𑀁;

𑀉𑀧𑀕𑀦𑁆𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑀁, 𑀅𑀤𑀸𑀲𑀺𑀁 𑀧𑀼𑀧𑁆𑀨𑀫𑀼𑀢𑁆𑀢𑀫𑀁.

𑁬𑁩. ‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀭𑁄𑀧𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀧𑀼𑀧𑁆𑀨𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁬𑁪. ‘‘𑀇𑀢𑁄 𑀘 𑀦𑀯𑀫𑁂 𑀓𑀧𑁆𑀧𑁂, 𑀯𑀺𑀭𑁄𑀘𑀦𑀲𑀦𑀸𑀫𑀓𑀸;

𑀢𑀬𑁄 𑀆𑀲𑀺𑀁𑀲𑀼 𑀭𑀸𑀚𑀸𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁬𑁫. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀸𑀮𑀧𑀼𑀧𑁆𑀨𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.