(𑁩𑁧-𑁩𑁨) 𑀲𑀫𑀤𑀦𑁆𑀢𑀲𑀼𑀲𑀼𑀓𑁆𑀓𑀤𑀸𑀞𑀸𑀮𑀓𑁆𑀔𑀡𑀸𑀦𑀺

𑁨𑁪𑁦. ‘‘𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀧𑀼𑀭𑀺𑀫𑀁 𑀚𑀸𑀢𑀺𑀁 𑀧𑀼𑀭𑀺𑀫𑀁 𑀪𑀯𑀁 𑀧𑀼𑀭𑀺𑀫𑀁 𑀦𑀺𑀓𑁂𑀢𑀁 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑁄 𑀲𑀫𑀸𑀦𑁄 𑀫𑀺𑀘𑁆𑀙𑀸𑀚𑀻𑀯𑀁 𑀧𑀳𑀸𑀬 𑀲𑀫𑁆𑀫𑀸𑀆𑀚𑀻𑀯𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑀺, 𑀢𑀼𑀮𑀸𑀓𑀽𑀝 𑀓𑀁𑀲𑀓𑀽𑀝 𑀫𑀸𑀦𑀓𑀽𑀝 𑀉𑀓𑁆𑀓𑁄𑀝𑀦 𑀯𑀜𑁆𑀘𑀦 𑀦𑀺𑀓𑀢𑀺 𑀲𑀸𑀘𑀺𑀬𑁄𑀕 𑀙𑁂𑀤𑀦 𑀯𑀥 𑀩𑀦𑁆𑀥𑀦 𑀯𑀺𑀧𑀭𑀸𑀫𑁄𑀲 𑀆𑀮𑁄𑀧 𑀲𑀳𑀲𑀸𑀓𑀸𑀭𑀸 [𑀲𑀸𑀳𑀲𑀸𑀓𑀸𑀭𑀸 (𑀲𑀻. 𑀲𑁆𑀬𑀸. 𑀧𑀻.)] 𑀧𑀝𑀺𑀯𑀺𑀭𑀢𑁄 𑀅𑀳𑁄𑀲𑀺. 𑀲𑁄 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀓𑀝𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸 𑀉𑀲𑁆𑀲𑀦𑁆𑀦𑀢𑁆𑀢𑀸 𑀯𑀺𑀧𑀼𑀮𑀢𑁆𑀢𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺. 𑀲𑁄 𑀢𑀢𑁆𑀣 𑀅𑀜𑁆𑀜𑁂 𑀤𑁂𑀯𑁂 𑀤𑀲𑀳𑀺 𑀞𑀸𑀦𑁂𑀳𑀺 𑀅𑀥𑀺𑀕𑀡𑁆𑀳𑀸𑀢𑀺 𑀤𑀺𑀩𑁆𑀩𑁂𑀦 𑀆𑀬𑀼𑀦𑀸 𑀤𑀺𑀩𑁆𑀩𑁂𑀦 𑀯𑀡𑁆𑀡𑁂𑀦 𑀤𑀺𑀩𑁆𑀩𑁂𑀦 𑀲𑀼𑀔𑁂𑀦 𑀤𑀺𑀩𑁆𑀩𑁂𑀦 𑀬𑀲𑁂𑀦 𑀤𑀺𑀩𑁆𑀩𑁂𑀦 𑀆𑀥𑀺𑀧𑀢𑁂𑀬𑁆𑀬𑁂𑀦 𑀤𑀺𑀩𑁆𑀩𑁂𑀳𑀺 𑀭𑀽𑀧𑁂𑀳𑀺 𑀤𑀺𑀩𑁆𑀩𑁂𑀳𑀺 𑀲𑀤𑁆𑀤𑁂𑀳𑀺 𑀤𑀺𑀩𑁆𑀩𑁂𑀳𑀺 𑀕𑀦𑁆𑀥𑁂𑀳𑀺 𑀤𑀺𑀩𑁆𑀩𑁂𑀳𑀺 𑀭𑀲𑁂𑀳𑀺 𑀤𑀺𑀩𑁆𑀩𑁂𑀳𑀺 𑀨𑁄𑀝𑁆𑀞𑀩𑁆𑀩𑁂𑀳𑀺. 𑀲𑁄 𑀢𑀢𑁄 𑀘𑀼𑀢𑁄 𑀇𑀢𑁆𑀣𑀢𑁆𑀢𑀁 𑀆𑀕𑀢𑁄 𑀲𑀫𑀸𑀦𑁄 𑀇𑀫𑀸𑀦𑀺 𑀤𑁆𑀯𑁂 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀺 𑀧𑀝𑀺𑀮𑀪𑀢𑀺, 𑀲𑀫𑀤𑀦𑁆𑀢𑁄 𑀘 𑀳𑁄𑀢𑀺 𑀲𑀼𑀲𑀼𑀓𑁆𑀓𑀤𑀸𑀞𑁄 𑀘.

‘‘𑀲𑁄 𑀢𑁂𑀳𑀺 𑀮𑀓𑁆𑀔𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀲𑀘𑁂 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺, 𑀭𑀸𑀚𑀸 𑀳𑁄𑀢𑀺 𑀘𑀓𑁆𑀓𑀯𑀢𑁆𑀢𑀻 𑀥𑀫𑁆𑀫𑀺𑀓𑁄 𑀥𑀫𑁆𑀫𑀭𑀸𑀚𑀸 𑀘𑀸𑀢𑀼𑀭𑀦𑁆𑀢𑁄 𑀯𑀺𑀚𑀺𑀢𑀸𑀯𑀻 𑀚𑀦𑀧𑀤𑀢𑁆𑀣𑀸𑀯𑀭𑀺𑀬𑀧𑁆𑀧𑀢𑁆𑀢𑁄 𑀲𑀢𑁆𑀢𑀭𑀢𑀦𑀲𑀫𑀦𑁆𑀦𑀸𑀕𑀢𑁄. 𑀢𑀲𑁆𑀲𑀺𑀫𑀸𑀦𑀺 𑀲𑀢𑁆𑀢 𑀭𑀢𑀦𑀸𑀦𑀺 𑀪𑀯𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀘𑀓𑁆𑀓𑀭𑀢𑀦𑀁 𑀳𑀢𑁆𑀣𑀺𑀭𑀢𑀦𑀁 𑀅𑀲𑁆𑀲𑀭𑀢𑀦𑀁 𑀫𑀡𑀺𑀭𑀢𑀦𑀁 𑀇𑀢𑁆𑀣𑀺𑀭𑀢𑀦𑀁 𑀕𑀳𑀧𑀢𑀺𑀭𑀢𑀦𑀁 𑀧𑀭𑀺𑀡𑀸𑀬𑀓𑀭𑀢𑀦𑀫𑁂𑀯 𑀲𑀢𑁆𑀢𑀫𑀁. 𑀧𑀭𑁄𑀲𑀳𑀲𑁆𑀲𑀁 𑀔𑁄 𑀧𑀦𑀲𑁆𑀲 𑀧𑀼𑀢𑁆𑀢𑀸 𑀪𑀯𑀦𑁆𑀢𑀺 𑀲𑀽𑀭𑀸 𑀯𑀻𑀭𑀗𑁆𑀕𑀭𑀽𑀧𑀸 𑀧𑀭𑀲𑁂𑀦𑀧𑁆𑀧𑀫𑀤𑁆𑀤𑀦𑀸. 𑀲𑁄 𑀇𑀫𑀁 𑀧𑀣𑀯𑀺𑀁 𑀲𑀸𑀕𑀭𑀧𑀭𑀺𑀬𑀦𑁆𑀢𑀁 𑀅𑀔𑀺𑀮𑀫𑀦𑀺𑀫𑀺𑀢𑁆𑀢𑀫𑀓𑀡𑁆𑀝𑀓𑀁 𑀇𑀤𑁆𑀥𑀁 𑀨𑀻𑀢𑀁 𑀔𑁂𑀫𑀁 𑀲𑀺𑀯𑀁 𑀦𑀺𑀭𑀩𑁆𑀩𑀼𑀤𑀁 𑀅𑀤𑀡𑁆𑀟𑁂𑀦 𑀅𑀲𑀢𑁆𑀣𑁂𑀦 𑀥𑀫𑁆𑀫𑁂𑀦 𑀅𑀪𑀺𑀯𑀺𑀚𑀺𑀬 𑀅𑀚𑁆𑀛𑀸𑀯𑀲𑀢𑀺. 𑀭𑀸𑀚𑀸 𑀲𑀫𑀸𑀦𑁄 𑀓𑀺𑀁 𑀮𑀪𑀢𑀺? 𑀲𑀼𑀘𑀺𑀧𑀭𑀺𑀯𑀸𑀭𑁄 𑀳𑁄𑀢𑀺 𑀲𑀼𑀘𑀺𑀲𑁆𑀲 𑀳𑁄𑀦𑁆𑀢𑀺 𑀧𑀭𑀺𑀯𑀸𑀭𑀸 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀦𑁂𑀕𑀫𑀚𑀸𑀦𑀧𑀤𑀸 𑀕𑀡𑀓𑀫𑀳𑀸𑀫𑀢𑁆𑀢𑀸 𑀅𑀦𑀻𑀓𑀝𑁆𑀞𑀸 𑀤𑁄𑀯𑀸𑀭𑀺𑀓𑀸 𑀅𑀫𑀘𑁆𑀘𑀸 𑀧𑀸𑀭𑀺𑀲𑀚𑁆𑀚𑀸 𑀭𑀸𑀚𑀸𑀦𑁄 𑀪𑁄𑀕𑀺𑀬𑀸 𑀓𑀼𑀫𑀸𑀭𑀸. 𑀭𑀸𑀚𑀸 𑀲𑀫𑀸𑀦𑁄 𑀇𑀤𑀁 𑀮𑀪𑀢𑀺.

‘‘𑀲𑀘𑁂 𑀔𑁄 𑀧𑀦 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀢𑀺, 𑀅𑀭𑀳𑀁 𑀳𑁄𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀮𑁄𑀓𑁂 𑀯𑀺𑀯𑀝𑁆𑀝𑀘𑁆𑀙𑀤𑁄. 𑀩𑀼𑀤𑁆𑀥𑁄 𑀲𑀫𑀸𑀦𑁄 𑀓𑀺𑀁 𑀮𑀪𑀢𑀺? 𑀲𑀼𑀘𑀺𑀧𑀭𑀺𑀯𑀸𑀭𑁄 𑀳𑁄𑀢𑀺, 𑀲𑀼𑀘𑀺𑀲𑁆𑀲 𑀳𑁄𑀦𑁆𑀢𑀺 𑀧𑀭𑀺𑀯𑀸𑀭𑀸, 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀦𑀺𑀬𑁄 𑀉𑀧𑀸𑀲𑀓𑀸 𑀉𑀧𑀸𑀲𑀺𑀓𑀸𑀬𑁄 𑀤𑁂𑀯𑀸 𑀫𑀦𑀼𑀲𑁆𑀲𑀸 𑀅𑀲𑀼𑀭𑀸 𑀦𑀸𑀕𑀸 𑀕𑀦𑁆𑀥𑀩𑁆𑀩𑀸. 𑀩𑀼𑀤𑁆𑀥𑁄 𑀲𑀫𑀸𑀦𑁄 𑀇𑀤𑀁 𑀮𑀪𑀢𑀺’’. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘.

𑁨𑁪𑁧. 𑀢𑀢𑁆𑀣𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀫𑀺𑀘𑁆𑀙𑀸𑀚𑀻𑀯𑀜𑁆𑀘 𑀅𑀯𑀲𑁆𑀲𑀚𑀺 𑀲𑀫𑁂𑀦 𑀯𑀼𑀢𑁆𑀢𑀺𑀁,

𑀲𑀼𑀘𑀺𑀦𑀸 𑀲𑁄 𑀚𑀦𑀬𑀺𑀢𑁆𑀣 𑀥𑀫𑁆𑀫𑀺𑀓𑁂𑀦;

𑀅𑀳𑀺𑀢𑀫𑀧𑀺 𑀘 𑀅𑀧𑀦𑀼𑀤𑀺,

𑀳𑀺𑀢𑀫𑀧𑀺 𑀘 𑀩𑀳𑀼𑀚𑀦𑀲𑀼𑀔𑀜𑁆𑀘 𑀅𑀘𑀭𑀺.

‘‘𑀲𑀕𑁆𑀕𑁂 𑀯𑁂𑀤𑀬𑀢𑀺 𑀦𑀭𑁄 𑀲𑀼𑀔𑀧𑁆𑀨𑀮𑀸𑀦𑀺,

𑀓𑀭𑀺𑀢𑁆𑀯𑀸 𑀦𑀺𑀧𑀼𑀡𑁂𑀪𑀺 𑀯𑀺𑀤𑀽𑀳𑀺 𑀲𑀩𑁆𑀪𑀺;

𑀯𑀡𑁆𑀡𑀺𑀢𑀸𑀦𑀺 𑀢𑀺𑀤𑀺𑀯𑀧𑀼𑀭𑀯𑀭𑀲𑀫𑁄,

𑀅𑀪𑀺𑀭𑀫𑀢𑀺 𑀭𑀢𑀺𑀔𑀺𑀟𑁆𑀟𑀸𑀲𑀫𑀗𑁆𑀕𑀻.

‘‘𑀮𑀤𑁆𑀥𑀸𑀦𑀁 𑀫𑀸𑀦𑀼𑀲𑀓𑀁 𑀪𑀯𑀁 𑀢𑀢𑁄,

𑀘𑀯𑀺𑀢𑁆𑀯𑀸𑀦 𑀲𑀼𑀓𑀢𑀨𑀮𑀯𑀺𑀧𑀸𑀓𑀁;

𑀲𑁂𑀲𑀓𑁂𑀦 𑀧𑀝𑀺𑀮𑀪𑀢𑀺 𑀮𑀧𑀦𑀚𑀁,

𑀲𑀫𑀫𑀧𑀺 𑀲𑀼𑀘𑀺𑀲𑀼𑀲𑀼𑀓𑁆𑀓𑀁 [𑀮𑀤𑁆𑀥𑀸𑀦 𑀫𑀦𑀼𑀲𑁆𑀲𑀓𑀁 𑀪𑀯𑀁 𑀢𑀢𑁄 𑀘𑀯𑀺𑀬, 𑀧𑀼𑀦 𑀲𑀼𑀓𑀢𑀨𑀮𑀯𑀺𑀧𑀸𑀓𑀲𑁂𑀲𑀓𑁂𑀦; 𑀧𑀝𑀺𑀮𑀪𑀢𑀺 𑀮𑀧𑀦𑀚𑀁 𑀲𑀫𑀫𑀧𑀺, 𑀲𑀼𑀘𑀺 𑀘 𑀲𑀼𑀯𑀺𑀲𑀼𑀤𑁆𑀥𑀲𑀼𑀲𑀼𑀓𑁆𑀓𑀁 (𑀲𑁆𑀬𑀸.)].

‘‘𑀢𑀁 𑀯𑁂𑀬𑁆𑀬𑀜𑁆𑀚𑀦𑀺𑀓𑀸 𑀲𑀫𑀸𑀕𑀢𑀸 𑀩𑀳𑀯𑁄,

𑀩𑁆𑀬𑀸𑀓𑀁𑀲𑀼 𑀦𑀺𑀧𑀼𑀡𑀲𑀫𑁆𑀫𑀢𑀸 𑀫𑀦𑀼𑀚𑀸;

𑀲𑀼𑀘𑀺𑀚𑀦𑀧𑀭𑀺𑀯𑀸𑀭𑀕𑀡𑁄 𑀪𑀯𑀢𑀺,

𑀤𑀺𑀚𑀲𑀫𑀲𑀼𑀓𑁆𑀓𑀲𑀼𑀘𑀺𑀲𑁄𑀪𑀦𑀤𑀦𑁆𑀢𑁄.

‘‘𑀭𑀜𑁆𑀜𑁄 𑀳𑁄𑀢𑀺 𑀩𑀳𑀼𑀚𑀦𑁄,

𑀲𑀼𑀘𑀺𑀧𑀭𑀺𑀯𑀸𑀭𑁄 𑀫𑀳𑀢𑀺𑀁 𑀫𑀳𑀺𑀁 𑀅𑀦𑀼𑀲𑀸𑀲𑀢𑁄;

𑀧𑀲𑀬𑁆𑀳 𑀦 𑀘 𑀚𑀦𑀧𑀤𑀢𑀼𑀤𑀦𑀁,

𑀳𑀺𑀢𑀫𑀧𑀺 𑀘 𑀩𑀳𑀼𑀚𑀦𑀲𑀼𑀔𑀜𑁆𑀘 𑀘𑀭𑀦𑁆𑀢𑀺.

‘‘𑀅𑀣 𑀘𑁂 𑀧𑀩𑁆𑀩𑀚𑀢𑀺 𑀪𑀯𑀢𑀺 𑀯𑀺𑀧𑀸𑀧𑁄,

𑀲𑀫𑀡𑁄 𑀲𑀫𑀺𑀢𑀭𑀚𑁄 𑀯𑀺𑀯𑀝𑁆𑀝𑀘𑁆𑀙𑀤𑁄;

𑀯𑀺𑀕𑀢𑀤𑀭𑀣𑀓𑀺𑀮𑀫𑀣𑁄,

𑀇𑀫𑀫𑀧𑀺 𑀘 𑀧𑀭𑀫𑀧𑀺 𑀘 [𑀇𑀫𑀫𑁆𑀧𑀺 𑀘 𑀧𑀭𑀫𑁆𑀧𑀺 𑀘 (𑀧𑀻.), 𑀧𑀭𑀁𑀧𑀺 𑀧𑀭𑀫𑀁𑀧𑀺 𑀘 (𑀲𑁆𑀬𑀸.)] 𑀧𑀲𑁆𑀲𑀢𑀺 𑀮𑁄𑀓𑀁.

‘‘𑀢𑀲𑁆𑀲𑁄𑀯𑀸𑀤𑀓𑀭𑀸 𑀩𑀳𑀼𑀕𑀺𑀳𑀻 𑀘 𑀧𑀩𑁆𑀩𑀚𑀺𑀢𑀸 𑀘,

𑀅𑀲𑀼𑀘𑀺𑀁 𑀕𑀭𑀳𑀺𑀢𑀁 𑀥𑀼𑀦𑀦𑁆𑀢𑀺 𑀧𑀸𑀧𑀁;

𑀲 𑀳𑀺 𑀲𑀼𑀘𑀺𑀪𑀺 𑀧𑀭𑀺𑀯𑀼𑀢𑁄 𑀪𑀯𑀢𑀺,

𑀫𑀮𑀔𑀺𑀮𑀓𑀮𑀺𑀓𑀺𑀮𑁂𑀲𑁂 𑀧𑀦𑀼𑀤𑁂𑀳𑀻’’𑀢𑀺 [𑀢𑀲𑁆𑀲𑁄𑀯𑀸𑀤𑀓𑀭𑀸 𑀩𑀳𑀼𑀕𑀺𑀳𑀻 𑀘, 𑀧𑀩𑁆𑀩𑀚𑀺𑀢𑀸 𑀘 𑀅𑀲𑀼𑀘𑀺𑀯𑀺𑀕𑀭𑀳𑀺𑀢; 𑀧𑀦𑀼𑀤𑀺𑀧𑀸𑀧𑀲𑁆𑀲 𑀳𑀺 𑀲𑀼𑀘𑀺𑀪𑀺𑀧𑀭𑀺𑀯𑀼𑀢𑁄, 𑀪𑀯𑀢𑀺 𑀫𑀮𑀔𑀺𑀮𑀓𑀓𑀺𑀮𑁂𑀲𑁂 𑀧𑀦𑀼𑀤𑁂𑀢𑀺 (𑀲𑁆𑀬𑀸.)].

𑀇𑀤𑀫𑀯𑁄𑀘 𑀪𑀕𑀯𑀸. 𑀅𑀢𑁆𑀢𑀫𑀦𑀸 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀼𑀦𑁆𑀢𑀺.

𑀮𑀓𑁆𑀔𑀡𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀲𑀢𑁆𑀢𑀫𑀁.