𑁭. 𑀮𑀓𑁆𑀔𑀡𑀲𑀼𑀢𑁆𑀢𑀁

𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀺

𑁧𑁯𑁮. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀓𑁆𑀔𑀯𑁄’’𑀢𑀺. ‘‘𑀪𑀤𑁆𑀤𑀦𑁆𑀢𑁂’’𑀢𑀺 [𑀪𑀤𑀦𑁆𑀢𑁂𑀢𑀺 (𑀲𑀻. 𑀲𑁆𑀬𑀸. 𑀧𑀻.)] 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

𑁧𑁯𑁯. ‘‘𑀤𑁆𑀯𑀢𑁆𑀢𑀺𑀁𑀲𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀫𑀳𑀸𑀧𑀼𑀭𑀺𑀲𑀲𑁆𑀲 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀺, 𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀫𑀳𑀸𑀧𑀼𑀭𑀺𑀲𑀲𑁆𑀲 𑀤𑁆𑀯𑁂𑀯 𑀕𑀢𑀺𑀬𑁄 𑀪𑀯𑀦𑁆𑀢𑀺 𑀅𑀦𑀜𑁆𑀜𑀸. 𑀲𑀘𑁂 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺, 𑀭𑀸𑀚𑀸 𑀳𑁄𑀢𑀺 𑀘𑀓𑁆𑀓𑀯𑀢𑁆𑀢𑀻 𑀥𑀫𑁆𑀫𑀺𑀓𑁄 𑀥𑀫𑁆𑀫𑀭𑀸𑀚𑀸 𑀘𑀸𑀢𑀼𑀭𑀦𑁆𑀢𑁄 𑀯𑀺𑀚𑀺𑀢𑀸𑀯𑀻 𑀚𑀦𑀧𑀤𑀢𑁆𑀣𑀸𑀯𑀭𑀺𑀬𑀧𑁆𑀧𑀢𑁆𑀢𑁄 𑀲𑀢𑁆𑀢𑀭𑀢𑀦𑀲𑀫𑀦𑁆𑀦𑀸𑀕𑀢𑁄. 𑀢𑀲𑁆𑀲𑀺𑀫𑀸𑀦𑀺 𑀲𑀢𑁆𑀢 𑀭𑀢𑀦𑀸𑀦𑀺 𑀪𑀯𑀦𑁆𑀢𑀺; 𑀲𑁂𑀬𑁆𑀬𑀣𑀺𑀤𑀁, 𑀘𑀓𑁆𑀓𑀭𑀢𑀦𑀁 𑀳𑀢𑁆𑀣𑀺𑀭𑀢𑀦𑀁 𑀅𑀲𑁆𑀲𑀭𑀢𑀦𑀁 𑀫𑀡𑀺𑀭𑀢𑀦𑀁 𑀇𑀢𑁆𑀣𑀺𑀭𑀢𑀦𑀁 𑀕𑀳𑀧𑀢𑀺𑀭𑀢𑀦𑀁 𑀧𑀭𑀺𑀡𑀸𑀬𑀓𑀭𑀢𑀦𑀫𑁂𑀯 𑀲𑀢𑁆𑀢𑀫𑀁. 𑀧𑀭𑁄𑀲𑀳𑀲𑁆𑀲𑀁 𑀔𑁄 𑀧𑀦𑀲𑁆𑀲 𑀧𑀼𑀢𑁆𑀢𑀸 𑀪𑀯𑀦𑁆𑀢𑀺 𑀲𑀽𑀭𑀸 𑀯𑀻𑀭𑀗𑁆𑀕𑀭𑀽𑀧𑀸 𑀧𑀭𑀲𑁂𑀦𑀧𑁆𑀧𑀫𑀤𑁆𑀤𑀦𑀸. 𑀲𑁄 𑀇𑀫𑀁 𑀧𑀣𑀯𑀺𑀁 𑀲𑀸𑀕𑀭𑀧𑀭𑀺𑀬𑀦𑁆𑀢𑀁 𑀅𑀤𑀡𑁆𑀟𑁂𑀦 𑀅𑀲𑀢𑁆𑀣𑁂𑀦 𑀥𑀫𑁆𑀫𑁂𑀦 𑀅𑀪𑀺𑀯𑀺𑀚𑀺𑀬 𑀅𑀚𑁆𑀛𑀸𑀯𑀲𑀢𑀺. 𑀲𑀘𑁂 𑀔𑁄 𑀧𑀦 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀢𑀺, 𑀅𑀭𑀳𑀁 𑀳𑁄𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀮𑁄𑀓𑁂 𑀯𑀺𑀯𑀝𑁆𑀝𑀘𑁆𑀙𑀤𑁄 [𑀯𑀺𑀯𑀝𑀘𑁆𑀙𑀤𑁄 (𑀲𑁆𑀬𑀸. 𑀓.), 𑀯𑀺𑀯𑀢𑁆𑀢𑀘𑁆𑀙𑀤𑁄 (𑀲𑀻. 𑀧𑀻.)].

𑁨𑁦𑁦. ‘‘𑀓𑀢𑀫𑀸𑀦𑀺 𑀘 𑀢𑀸𑀦𑀺, 𑀪𑀺𑀓𑁆𑀔𑀯𑁂, 𑀤𑁆𑀯𑀢𑁆𑀢𑀺𑀁𑀲 𑀫𑀳𑀸𑀧𑀼𑀭𑀺𑀲𑀲𑁆𑀲 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀺, 𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀫𑀳𑀸𑀧𑀼𑀭𑀺𑀲𑀲𑁆𑀲 𑀤𑁆𑀯𑁂𑀯 𑀕𑀢𑀺𑀬𑁄 𑀪𑀯𑀦𑁆𑀢𑀺 𑀅𑀦𑀜𑁆𑀜𑀸? 𑀲𑀘𑁂 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺, 𑀭𑀸𑀚𑀸 𑀳𑁄𑀢𑀺 𑀘𑀓𑁆𑀓𑀯𑀢𑁆𑀢𑀻…𑀧𑁂… 𑀲𑀘𑁂 𑀔𑁄 𑀧𑀦 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀢𑀺, 𑀅𑀭𑀳𑀁 𑀳𑁄𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀮𑁄𑀓𑁂 𑀯𑀺𑀯𑀝𑁆𑀝𑀘𑁆𑀙𑀤𑁄.

‘‘𑀇𑀥, 𑀪𑀺𑀓𑁆𑀔𑀯𑁂, 𑀫𑀳𑀸𑀧𑀼𑀭𑀺𑀲𑁄 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀧𑀸𑀤𑁄 𑀳𑁄𑀢𑀺. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀫𑀳𑀸𑀧𑀼𑀭𑀺𑀲𑁄 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀧𑀸𑀤𑁄 𑀳𑁄𑀢𑀺, 𑀇𑀤𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀫𑀳𑀸𑀧𑀼𑀭𑀺𑀲𑀲𑁆𑀲 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀁 𑀪𑀯𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀫𑀳𑀸𑀧𑀼𑀭𑀺𑀲𑀲𑁆𑀲 𑀳𑁂𑀝𑁆𑀞𑀸𑀧𑀸𑀤𑀢𑀮𑁂𑀲𑀼 𑀘𑀓𑁆𑀓𑀸𑀦𑀺 𑀚𑀸𑀢𑀸𑀦𑀺 𑀳𑁄𑀦𑁆𑀢𑀺 𑀲𑀳𑀲𑁆𑀲𑀸𑀭𑀸𑀦𑀺 𑀲𑀦𑁂𑀫𑀺𑀓𑀸𑀦𑀺 𑀲𑀦𑀸𑀪𑀺𑀓𑀸𑀦𑀺 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑀸𑀦𑀺 [𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑀸𑀦𑀺 𑀲𑀼𑀯𑀺𑀪𑀢𑁆𑀢𑀦𑁆𑀢𑀭𑀸𑀦𑀺 (𑀲𑀻. 𑀧𑀻.)]. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀫𑀳𑀸𑀧𑀼𑀭𑀺𑀲𑀲𑁆𑀲 𑀳𑁂𑀝𑁆𑀞𑀸𑀧𑀸𑀤𑀢𑀮𑁂𑀲𑀼 𑀘𑀓𑁆𑀓𑀸𑀦𑀺 𑀚𑀸𑀢𑀸𑀦𑀺 𑀳𑁄𑀦𑁆𑀢𑀺 𑀲𑀳𑀲𑁆𑀲𑀸𑀭𑀸𑀦𑀺 𑀲𑀦𑁂𑀫𑀺𑀓𑀸𑀦𑀺 𑀲𑀦𑀸𑀪𑀺𑀓𑀸𑀦𑀺 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑀸𑀦𑀺, 𑀇𑀤𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀫𑀳𑀸𑀧𑀼𑀭𑀺𑀲𑀲𑁆𑀲 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀁 𑀪𑀯𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀫𑀳𑀸𑀧𑀼𑀭𑀺𑀲𑁄 𑀆𑀬𑀢𑀧𑀡𑁆𑀳𑀺 𑀳𑁄𑀢𑀺…𑀧𑁂… 𑀤𑀻𑀖𑀗𑁆𑀕𑀼𑀮𑀺 𑀳𑁄𑀢𑀺… 𑀫𑀼𑀤𑀼𑀢𑀮𑀼𑀦𑀳𑀢𑁆𑀣𑀧𑀸𑀤𑁄 𑀳𑁄𑀢𑀺… 𑀚𑀸𑀮𑀳𑀢𑁆𑀣𑀧𑀸𑀤𑁄 𑀳𑁄𑀢𑀺… 𑀉𑀲𑁆𑀲𑀗𑁆𑀔𑀧𑀸𑀤𑁄 𑀳𑁄𑀢𑀺… 𑀏𑀡𑀺𑀚𑀗𑁆𑀖𑁄 𑀳𑁄𑀢𑀺… 𑀞𑀺𑀢𑀓𑁄𑀯 𑀅𑀦𑁄𑀦𑀫𑀦𑁆𑀢𑁄 𑀉𑀪𑁄𑀳𑀺 𑀧𑀸𑀡𑀺𑀢𑀮𑁂𑀳𑀺 𑀚𑀡𑁆𑀡𑀼𑀓𑀸𑀦𑀺 𑀧𑀭𑀺𑀫𑀲𑀢𑀺 𑀧𑀭𑀺𑀫𑀚𑁆𑀚𑀢𑀺… 𑀓𑁄𑀲𑁄𑀳𑀺𑀢𑀯𑀢𑁆𑀣𑀕𑀼𑀬𑁆𑀳𑁄 𑀳𑁄𑀢𑀺… 𑀲𑀼𑀯𑀡𑁆𑀡𑀯𑀡𑁆𑀡𑁄 𑀳𑁄𑀢𑀺 𑀓𑀜𑁆𑀘𑀦𑀲𑀦𑁆𑀦𑀺𑀪𑀢𑁆𑀢𑀘𑁄… 𑀲𑀼𑀔𑀼𑀫𑀘𑁆𑀙𑀯𑀺 𑀳𑁄𑀢𑀺, 𑀲𑀼𑀔𑀼𑀫𑀢𑁆𑀢𑀸 𑀙𑀯𑀺𑀬𑀸 𑀭𑀚𑁄𑀚𑀮𑁆𑀮𑀁 𑀓𑀸𑀬𑁂 𑀦 𑀉𑀧𑀮𑀺𑀫𑁆𑀧𑀢𑀺… 𑀏𑀓𑁂𑀓𑀮𑁄𑀫𑁄 𑀳𑁄𑀢𑀺, 𑀏𑀓𑁂𑀓𑀸𑀦𑀺 𑀮𑁄𑀫𑀸𑀦𑀺 𑀮𑁄𑀫𑀓𑀽𑀧𑁂𑀲𑀼 𑀚𑀸𑀢𑀸𑀦𑀺… 𑀉𑀤𑁆𑀥𑀕𑁆𑀕𑀮𑁄𑀫𑁄 𑀳𑁄𑀢𑀺, 𑀉𑀤𑁆𑀥𑀕𑁆𑀕𑀸𑀦𑀺 𑀮𑁄𑀫𑀸𑀦𑀺 𑀚𑀸𑀢𑀸𑀦𑀺 𑀦𑀻𑀮𑀸𑀦𑀺 𑀅𑀜𑁆𑀚𑀦𑀯𑀡𑁆𑀡𑀸𑀦𑀺 𑀓𑀼𑀡𑁆𑀟𑀮𑀸𑀯𑀝𑁆𑀝𑀸𑀦𑀺 [𑀓𑀼𑀡𑁆𑀟𑀮𑀸𑀯𑀢𑁆𑀢𑀸𑀦𑀺 (𑀩𑀳𑀽𑀲𑀼)] 𑀤𑀓𑁆𑀔𑀺𑀡𑀸𑀯𑀝𑁆𑀝𑀓𑀚𑀸𑀢𑀸𑀦𑀺 [𑀤𑀓𑁆𑀔𑀺𑀡𑀸𑀯𑀢𑁆𑀢𑀓𑀚𑀸𑀢𑀸𑀦𑀺 (𑀲𑀻. 𑀲𑁆𑀬𑀸. 𑀧𑀻.)] … 𑀩𑁆𑀭𑀳𑁆𑀫𑀼𑀚𑀼𑀕𑀢𑁆𑀢𑁄 𑀳𑁄𑀢𑀺… 𑀲𑀢𑁆𑀢𑀼𑀲𑁆𑀲𑀤𑁄 𑀳𑁄𑀢𑀺… 𑀲𑀻𑀳𑀧𑀼𑀩𑁆𑀩𑀤𑁆𑀥𑀓𑀸𑀬𑁄 𑀳𑁄𑀢𑀺… 𑀘𑀺𑀢𑀦𑁆𑀢𑀭𑀁𑀲𑁄 [𑀧𑀺𑀢𑀦𑁆𑀢𑀭𑀁𑀲𑁄 (𑀲𑁆𑀬𑀸.)] 𑀳𑁄𑀢𑀺… 𑀦𑀺𑀕𑁆𑀭𑁄𑀥𑀧𑀭𑀺𑀫𑀡𑁆𑀟𑀮𑁄 𑀳𑁄𑀢𑀺, 𑀬𑀸𑀯𑀢𑀓𑁆𑀯𑀲𑁆𑀲 𑀓𑀸𑀬𑁄 𑀢𑀸𑀯𑀢𑀓𑁆𑀯𑀲𑁆𑀲 𑀩𑁆𑀬𑀸𑀫𑁄 𑀬𑀸𑀯𑀢𑀓𑁆𑀯𑀲𑁆𑀲 𑀩𑁆𑀬𑀸𑀫𑁄 𑀢𑀸𑀯𑀢𑀓𑁆𑀯𑀲𑁆𑀲 𑀓𑀸𑀬𑁄… 𑀲𑀫𑀯𑀝𑁆𑀝𑀓𑁆𑀔𑀦𑁆𑀥𑁄 𑀳𑁄𑀢𑀺… 𑀭𑀲𑀕𑁆𑀕𑀲𑀕𑁆𑀕𑀻 𑀳𑁄𑀢𑀺… 𑀲𑀻𑀳𑀳𑀦𑀼 𑀳𑁄𑀢𑀺… 𑀘𑀢𑁆𑀢𑀸𑀮𑀻𑀲𑀤𑀦𑁆𑀢𑁄 𑀳𑁄𑀢𑀺 … 𑀲𑀫𑀤𑀦𑁆𑀢𑁄 𑀳𑁄𑀢𑀺… 𑀅𑀯𑀺𑀭𑀴𑀤𑀦𑁆𑀢𑁄 𑀳𑁄𑀢𑀺… 𑀲𑀼𑀲𑀼𑀓𑁆𑀓𑀤𑀸𑀞𑁄 𑀳𑁄𑀢𑀺… 𑀧𑀳𑀽𑀢𑀚𑀺𑀯𑁆𑀳𑁄 𑀳𑁄𑀢𑀺… 𑀩𑁆𑀭𑀳𑁆𑀫𑀲𑁆𑀲𑀭𑁄 𑀳𑁄𑀢𑀺 𑀓𑀭𑀯𑀻𑀓𑀪𑀸𑀡𑀻… 𑀅𑀪𑀺𑀦𑀻𑀮𑀦𑁂𑀢𑁆𑀢𑁄 𑀳𑁄𑀢𑀺… 𑀕𑁄𑀧𑀔𑀼𑀫𑁄 𑀳𑁄𑀢𑀺… 𑀉𑀡𑁆𑀡𑀸 𑀪𑀫𑀼𑀓𑀦𑁆𑀢𑀭𑁂 𑀚𑀸𑀢𑀸 𑀳𑁄𑀢𑀺, 𑀑𑀤𑀸𑀢𑀸 𑀫𑀼𑀤𑀼𑀢𑀽𑀮𑀲𑀦𑁆𑀦𑀺𑀪𑀸. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀫𑀳𑀸𑀧𑀼𑀭𑀺𑀲𑀲𑁆𑀲 𑀉𑀡𑁆𑀡𑀸 𑀪𑀫𑀼𑀓𑀦𑁆𑀢𑀭𑁂 𑀚𑀸𑀢𑀸 𑀳𑁄𑀢𑀺, 𑀑𑀤𑀸𑀢𑀸 𑀫𑀼𑀤𑀼𑀢𑀽𑀮𑀲𑀦𑁆𑀦𑀺𑀪𑀸, 𑀇𑀤𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀫𑀳𑀸𑀧𑀼𑀭𑀺𑀲𑀲𑁆𑀲 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀁 𑀪𑀯𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀫𑀳𑀸𑀧𑀼𑀭𑀺𑀲𑁄 𑀉𑀡𑁆𑀳𑀻𑀲𑀲𑀻𑀲𑁄 𑀳𑁄𑀢𑀺. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀫𑀳𑀸𑀧𑀼𑀭𑀺𑀲𑁄 𑀉𑀡𑁆𑀳𑀻𑀲𑀲𑀻𑀲𑁄 𑀳𑁄𑀢𑀺, 𑀇𑀤𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀫𑀳𑀸𑀧𑀼𑀭𑀺𑀲𑀲𑁆𑀲 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀁 𑀪𑀯𑀢𑀺.

‘‘𑀇𑀫𑀸𑀦𑀺 𑀔𑁄 𑀢𑀸𑀦𑀺, 𑀪𑀺𑀓𑁆𑀔𑀯𑁂, 𑀤𑁆𑀯𑀢𑁆𑀢𑀺𑀁𑀲 𑀫𑀳𑀸𑀧𑀼𑀭𑀺𑀲𑀲𑁆𑀲 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀺, 𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀫𑀳𑀸𑀧𑀼𑀭𑀺𑀲𑀲𑁆𑀲 𑀤𑁆𑀯𑁂𑀯 𑀕𑀢𑀺𑀬𑁄 𑀪𑀯𑀦𑁆𑀢𑀺 𑀅𑀦𑀜𑁆𑀜𑀸. 𑀲𑀘𑁂 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺, 𑀭𑀸𑀚𑀸 𑀳𑁄𑀢𑀺 𑀘𑀓𑁆𑀓𑀯𑀢𑁆𑀢𑀻…𑀧𑁂… 𑀲𑀘𑁂 𑀔𑁄 𑀧𑀦 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀢𑀺, 𑀅𑀭𑀳𑀁 𑀳𑁄𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀮𑁄𑀓𑁂 𑀯𑀺𑀯𑀝𑁆𑀝𑀘𑁆𑀙𑀤𑁄.

‘‘𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑀢𑁆𑀢𑀺𑀁𑀲 𑀫𑀳𑀸𑀧𑀼𑀭𑀺𑀲𑀲𑁆𑀲 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀺 𑀩𑀸𑀳𑀺𑀭𑀓𑀸𑀧𑀺 𑀇𑀲𑀬𑁄 𑀥𑀸𑀭𑁂𑀦𑁆𑀢𑀺, 𑀦𑁄 𑀘 𑀔𑁄 𑀢𑁂 𑀚𑀸𑀦𑀦𑁆𑀢𑀺 𑁋 ‘𑀇𑀫𑀲𑁆𑀲 𑀓𑀫𑁆𑀫𑀲𑁆𑀲 𑀓𑀝𑀢𑁆𑀢𑀸 𑀇𑀤𑀁 𑀮𑀓𑁆𑀔𑀡𑀁 𑀧𑀝𑀺𑀮𑀪𑀢𑀻’𑀢𑀺.

(𑁧) 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀧𑀸𑀤𑀢𑀸𑀮𑀓𑁆𑀔𑀡𑀁

𑁨𑁦𑁧. ‘‘𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀧𑀼𑀭𑀺𑀫𑀁 𑀚𑀸𑀢𑀺𑀁 𑀧𑀼𑀭𑀺𑀫𑀁 𑀪𑀯𑀁 𑀧𑀼𑀭𑀺𑀫𑀁 𑀦𑀺𑀓𑁂𑀢𑀁 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑁄 𑀲𑀫𑀸𑀦𑁄 𑀤𑀴𑁆𑀳𑀲𑀫𑀸𑀤𑀸𑀦𑁄 𑀅𑀳𑁄𑀲𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀅𑀯𑀢𑁆𑀣𑀺𑀢𑀲𑀫𑀸𑀤𑀸𑀦𑁄 𑀓𑀸𑀬𑀲𑀼𑀘𑀭𑀺𑀢𑁂 𑀯𑀘𑀻𑀲𑀼𑀘𑀭𑀺𑀢𑁂 𑀫𑀦𑁄𑀲𑀼𑀘𑀭𑀺𑀢𑁂 𑀤𑀸𑀦𑀲𑀁𑀯𑀺𑀪𑀸𑀕𑁂 𑀲𑀻𑀮𑀲𑀫𑀸𑀤𑀸𑀦𑁂 𑀉𑀧𑁄𑀲𑀣𑀼𑀧𑀯𑀸𑀲𑁂 𑀫𑀢𑁆𑀢𑁂𑀬𑁆𑀬𑀢𑀸𑀬 𑀧𑁂𑀢𑁆𑀢𑁂𑀬𑁆𑀬𑀢𑀸𑀬 𑀲𑀸𑀫𑀜𑁆𑀜𑀢𑀸𑀬 𑀩𑁆𑀭𑀳𑁆𑀫𑀜𑁆𑀜𑀢𑀸𑀬 𑀓𑀼𑀮𑁂 𑀚𑁂𑀝𑁆𑀞𑀸𑀧𑀘𑀸𑀬𑀺𑀢𑀸𑀬 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀲𑀼 𑀘 𑀅𑀥𑀺𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼. 𑀲𑁄 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀓𑀝𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸 𑀉𑀲𑁆𑀲𑀦𑁆𑀦𑀢𑁆𑀢𑀸 𑀯𑀺𑀧𑀼𑀮𑀢𑁆𑀢𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺. 𑀲𑁄 𑀢𑀢𑁆𑀣 𑀅𑀜𑁆𑀜𑁂 𑀤𑁂𑀯𑁂 𑀤𑀲𑀳𑀺 𑀞𑀸𑀦𑁂𑀳𑀺 𑀅𑀥𑀺𑀕𑁆𑀕𑀡𑁆𑀳𑀸𑀢𑀺 𑀤𑀺𑀩𑁆𑀩𑁂𑀦 𑀆𑀬𑀼𑀦𑀸 𑀤𑀺𑀩𑁆𑀩𑁂𑀦 𑀯𑀡𑁆𑀡𑁂𑀦 𑀤𑀺𑀩𑁆𑀩𑁂𑀦 𑀲𑀼𑀔𑁂𑀦 𑀤𑀺𑀩𑁆𑀩𑁂𑀦 𑀬𑀲𑁂𑀦 𑀤𑀺𑀩𑁆𑀩𑁂𑀦 𑀆𑀥𑀺𑀧𑀢𑁂𑀬𑁆𑀬𑁂𑀦 𑀤𑀺𑀩𑁆𑀩𑁂𑀳𑀺 𑀭𑀽𑀧𑁂𑀳𑀺 𑀤𑀺𑀩𑁆𑀩𑁂𑀳𑀺 𑀲𑀤𑁆𑀤𑁂𑀳𑀺 𑀤𑀺𑀩𑁆𑀩𑁂𑀳𑀺 𑀕𑀦𑁆𑀥𑁂𑀳𑀺 𑀤𑀺𑀩𑁆𑀩𑁂𑀳𑀺 𑀭𑀲𑁂𑀳𑀺 𑀤𑀺𑀩𑁆𑀩𑁂𑀳𑀺 𑀨𑁄𑀝𑁆𑀞𑀩𑁆𑀩𑁂𑀳𑀺. 𑀲𑁄 𑀢𑀢𑁄 𑀘𑀼𑀢𑁄 𑀇𑀢𑁆𑀣𑀢𑁆𑀢𑀁 𑀆𑀕𑀢𑁄 𑀲𑀫𑀸𑀦𑁄 𑀇𑀫𑀁 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀁 𑀧𑀝𑀺𑀮𑀪𑀢𑀺. 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀧𑀸𑀤𑁄 𑀳𑁄𑀢𑀺. 𑀲𑀫𑀁 𑀧𑀸𑀤𑀁 𑀪𑀽𑀫𑀺𑀬𑀁 𑀦𑀺𑀓𑁆𑀔𑀺𑀧𑀢𑀺, 𑀲𑀫𑀁 𑀉𑀤𑁆𑀥𑀭𑀢𑀺, 𑀲𑀫𑀁 𑀲𑀩𑁆𑀩𑀸𑀯𑀦𑁆𑀢𑁂𑀳𑀺 𑀧𑀸𑀤𑀢𑀮𑁂𑀳𑀺 𑀪𑀽𑀫𑀺𑀁 𑀨𑀼𑀲𑀢𑀺.

𑁨𑁦𑁨. ‘‘𑀲𑁄 𑀢𑁂𑀦 𑀮𑀓𑁆𑀔𑀡𑁂𑀦 𑀲𑀫𑀦𑁆𑀦𑀸𑀕𑀢𑁄 𑀲𑀘𑁂 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺, 𑀭𑀸𑀚𑀸 𑀳𑁄𑀢𑀺 𑀘𑀓𑁆𑀓𑀯𑀢𑁆𑀢𑀻 𑀥𑀫𑁆𑀫𑀺𑀓𑁄 𑀥𑀫𑁆𑀫𑀭𑀸𑀚𑀸 𑀘𑀸𑀢𑀼𑀭𑀦𑁆𑀢𑁄 𑀯𑀺𑀚𑀺𑀢𑀸𑀯𑀻 𑀚𑀦𑀧𑀤𑀢𑁆𑀣𑀸𑀯𑀭𑀺𑀬𑀧𑁆𑀧𑀢𑁆𑀢𑁄 𑀲𑀢𑁆𑀢𑀭𑀢𑀦𑀲𑀫𑀦𑁆𑀦𑀸𑀕𑀢𑁄. 𑀢𑀲𑁆𑀲𑀺𑀫𑀸𑀦𑀺 𑀲𑀢𑁆𑀢 𑀭𑀢𑀦𑀸𑀦𑀺 𑀪𑀯𑀦𑁆𑀢𑀺; 𑀲𑁂𑀬𑁆𑀬𑀣𑀺𑀤𑀁, 𑀘𑀓𑁆𑀓𑀭𑀢𑀦𑀁 𑀳𑀢𑁆𑀣𑀺𑀭𑀢𑀦𑀁 𑀅𑀲𑁆𑀲𑀭𑀢𑀦𑀁 𑀫𑀡𑀺𑀭𑀢𑀦𑀁 𑀇𑀢𑁆𑀣𑀺𑀭𑀢𑀦𑀁 𑀕𑀳𑀧𑀢𑀺𑀭𑀢𑀦𑀁 𑀧𑀭𑀺𑀡𑀸𑀬𑀓𑀭𑀢𑀦𑀫𑁂𑀯 𑀲𑀢𑁆𑀢𑀫𑀁. 𑀧𑀭𑁄𑀲𑀳𑀲𑁆𑀲𑀁 𑀔𑁄 𑀧𑀦𑀲𑁆𑀲 𑀧𑀼𑀢𑁆𑀢𑀸 𑀪𑀯𑀦𑁆𑀢𑀺 𑀲𑀽𑀭𑀸 𑀯𑀻𑀭𑀗𑁆𑀕𑀭𑀽𑀧𑀸 𑀧𑀭𑀲𑁂𑀦𑀧𑁆𑀧𑀫𑀤𑁆𑀤𑀦𑀸. 𑀲𑁄 𑀇𑀫𑀁 𑀧𑀣𑀯𑀺𑀁 𑀲𑀸𑀕𑀭𑀧𑀭𑀺𑀬𑀦𑁆𑀢𑀁 𑀅𑀔𑀺𑀮𑀫𑀦𑀺𑀫𑀺𑀢𑁆𑀢𑀫𑀓𑀡𑁆𑀝𑀓𑀁 𑀇𑀤𑁆𑀥𑀁 𑀨𑀻𑀢𑀁 𑀔𑁂𑀫𑀁 𑀲𑀺𑀯𑀁 𑀦𑀺𑀭𑀩𑁆𑀩𑀼𑀤𑀁 𑀅𑀤𑀡𑁆𑀟𑁂𑀦 𑀅𑀲𑀢𑁆𑀣𑁂𑀦 𑀥𑀫𑁆𑀫𑁂𑀦 𑀅𑀪𑀺𑀯𑀺𑀚𑀺𑀬 𑀅𑀚𑁆𑀛𑀸𑀯𑀲𑀢𑀺. 𑀭𑀸𑀚𑀸 𑀲𑀫𑀸𑀦𑁄 𑀓𑀺𑀁 𑀮𑀪𑀢𑀺? 𑀅𑀓𑁆𑀔𑀫𑁆𑀪𑀺𑀬𑁄 [𑀅𑀯𑀺𑀓𑁆𑀔𑀫𑁆𑀪𑀺𑀬𑁄 (𑀲𑀻. 𑀧𑀻.)] 𑀳𑁄𑀢𑀺 𑀓𑁂𑀦𑀘𑀺 𑀫𑀦𑀼𑀲𑁆𑀲𑀪𑀽𑀢𑁂𑀦 𑀧𑀘𑁆𑀘𑀢𑁆𑀣𑀺𑀓𑁂𑀦 𑀧𑀘𑁆𑀘𑀸𑀫𑀺𑀢𑁆𑀢𑁂𑀦. 𑀭𑀸𑀚𑀸 𑀲𑀫𑀸𑀦𑁄 𑀇𑀤𑀁 𑀮𑀪𑀢𑀺. ‘‘𑀲𑀘𑁂 𑀔𑁄 𑀧𑀦 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀢𑀺, 𑀅𑀭𑀳𑀁 𑀳𑁄𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀮𑁄𑀓𑁂 𑀯𑀺𑀯𑀝𑁆𑀝𑀘𑁆𑀙𑀤𑁄. 𑀩𑀼𑀤𑁆𑀥𑁄 𑀲𑀫𑀸𑀦𑁄 𑀓𑀺𑀁 𑀮𑀪𑀢𑀺? 𑀅𑀓𑁆𑀔𑀫𑁆𑀪𑀺𑀬𑁄 𑀳𑁄𑀢𑀺 𑀅𑀩𑁆𑀪𑀦𑁆𑀢𑀭𑁂𑀳𑀺 𑀯𑀸 𑀩𑀸𑀳𑀺𑀭𑁂𑀳𑀺 𑀯𑀸 𑀧𑀘𑁆𑀘𑀢𑁆𑀣𑀺𑀓𑁂𑀳𑀺 𑀧𑀘𑁆𑀘𑀸𑀫𑀺𑀢𑁆𑀢𑁂𑀳𑀺 𑀭𑀸𑀕𑁂𑀦 𑀯𑀸 𑀤𑁄𑀲𑁂𑀦 𑀯𑀸 𑀫𑁄𑀳𑁂𑀦 𑀯𑀸 𑀲𑀫𑀡𑁂𑀦 𑀯𑀸 𑀩𑁆𑀭𑀸𑀳𑁆𑀫𑀡𑁂𑀦 𑀯𑀸 𑀤𑁂𑀯𑁂𑀦 𑀯𑀸 𑀫𑀸𑀭𑁂𑀦 𑀯𑀸 𑀩𑁆𑀭𑀳𑁆𑀫𑀼𑀦𑀸 𑀯𑀸 𑀓𑁂𑀦𑀘𑀺 𑀯𑀸 𑀮𑁄𑀓𑀲𑁆𑀫𑀺𑀁. 𑀩𑀼𑀤𑁆𑀥𑁄 𑀲𑀫𑀸𑀦𑁄 𑀇𑀤𑀁 𑀮𑀪𑀢𑀺’’. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘.

𑁨𑁦𑁩. 𑀢𑀢𑁆𑀣𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀲𑀘𑁆𑀘𑁂 𑀘 𑀥𑀫𑁆𑀫𑁂 𑀘 𑀤𑀫𑁂 𑀘 𑀲𑀁𑀬𑀫𑁂,

𑀲𑁄𑀘𑁂𑀬𑁆𑀬𑀲𑀻𑀮𑀸𑀮𑀬𑀼𑀧𑁄𑀲𑀣𑁂𑀲𑀼 𑀘;

𑀤𑀸𑀦𑁂 𑀅𑀳𑀺𑀁𑀲𑀸𑀬 𑀅𑀲𑀸𑀳𑀲𑁂 𑀭𑀢𑁄,

𑀤𑀴𑁆𑀳𑀁 𑀲𑀫𑀸𑀤𑀸𑀬 𑀲𑀫𑀢𑁆𑀢𑀫𑀸𑀘𑀭𑀺 [𑀲𑀫𑀦𑁆𑀢𑀫𑀸𑀘𑀭𑀺 (𑀲𑁆𑀬𑀸. 𑀓.)].

‘‘𑀲𑁄 𑀢𑁂𑀦 𑀓𑀫𑁆𑀫𑁂𑀦 𑀤𑀺𑀯𑀁 𑀲𑀫𑀓𑁆𑀓𑀫𑀺 [𑀅𑀧𑀓𑁆𑀓𑀫𑀺 (𑀲𑁆𑀬𑀸. 𑀓.)],

𑀲𑀼𑀔𑀜𑁆𑀘 𑀔𑀺𑀟𑁆𑀟𑀸𑀭𑀢𑀺𑀬𑁄 𑀘 𑀅𑀦𑁆𑀯𑀪𑀺 [𑀅𑀁𑀦𑁆𑀯𑀪𑀺 (𑀝𑀻𑀓𑀸)];

𑀢𑀢𑁄 𑀘𑀯𑀺𑀢𑁆𑀯𑀸 𑀧𑀼𑀦𑀭𑀸𑀕𑀢𑁄 𑀇𑀥,

𑀲𑀫𑁂𑀳𑀺 𑀧𑀸𑀤𑁂𑀳𑀺 𑀨𑀼𑀲𑀻 𑀯𑀲𑀼𑀦𑁆𑀥𑀭𑀁.

‘‘𑀩𑁆𑀬𑀸𑀓𑀁𑀲𑀼 𑀯𑁂𑀬𑁆𑀬𑀜𑁆𑀚𑀦𑀺𑀓𑀸 𑀲𑀫𑀸𑀕𑀢𑀸,

𑀲𑀫𑀧𑁆𑀧𑀢𑀺𑀝𑁆𑀞𑀲𑁆𑀲 𑀦 𑀳𑁄𑀢𑀺 𑀔𑀫𑁆𑀪𑀦𑀸;

𑀕𑀺𑀳𑀺𑀲𑁆𑀲 𑀯𑀸 𑀧𑀩𑁆𑀩𑀚𑀺𑀢𑀲𑁆𑀲 𑀯𑀸 𑀧𑀼𑀦 [𑀧𑀦 (𑀲𑁆𑀬𑀸.)],

𑀢𑀁 𑀮𑀓𑁆𑀔𑀡𑀁 𑀪𑀯𑀢𑀺 𑀢𑀤𑀢𑁆𑀣𑀚𑁄𑀢𑀓𑀁.

‘‘𑀅𑀓𑁆𑀔𑀫𑁆𑀪𑀺𑀬𑁄 𑀳𑁄𑀢𑀺 𑀅𑀕𑀸𑀭𑀫𑀸𑀯𑀲𑀁,

𑀧𑀭𑀸𑀪𑀺𑀪𑀽 𑀲𑀢𑁆𑀢𑀼𑀪𑀺 𑀦𑀧𑁆𑀧𑀫𑀤𑁆𑀤𑀦𑁄;

𑀫𑀦𑀼𑀲𑁆𑀲𑀪𑀽𑀢𑁂𑀦𑀺𑀥 𑀳𑁄𑀢𑀺 𑀓𑁂𑀦𑀘𑀺,

𑀅𑀓𑁆𑀔𑀫𑁆𑀪𑀺𑀬𑁄 𑀢𑀲𑁆𑀲 𑀨𑀮𑁂𑀦 𑀓𑀫𑁆𑀫𑀼𑀦𑁄.

‘‘𑀲𑀘𑁂 𑀘 𑀧𑀩𑁆𑀩𑀚𑁆𑀚𑀫𑀼𑀧𑁂𑀢𑀺 𑀢𑀸𑀤𑀺𑀲𑁄,

𑀦𑁂𑀓𑁆𑀔𑀫𑁆𑀫𑀙𑀦𑁆𑀤𑀸𑀪𑀺𑀭𑀢𑁄 𑀯𑀺𑀘𑀓𑁆𑀔𑀡𑁄;

𑀅𑀕𑁆𑀕𑁄 𑀦 𑀲𑁄 𑀕𑀘𑁆𑀙𑀢𑀺 𑀚𑀸𑀢𑀼 𑀔𑀫𑁆𑀪𑀦𑀁,

𑀦𑀭𑀼𑀢𑁆𑀢𑀫𑁄 𑀏𑀲 𑀳𑀺 𑀢𑀲𑁆𑀲 𑀥𑀫𑁆𑀫𑀢𑀸’’𑀢𑀺.

(𑁨) 𑀧𑀸𑀤𑀢𑀮𑀘𑀓𑁆𑀓𑀮𑀓𑁆𑀔𑀡𑀁

𑁨𑁦𑁪. ‘‘𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀧𑀼𑀭𑀺𑀫𑀁 𑀚𑀸𑀢𑀺𑀁 𑀧𑀼𑀭𑀺𑀫𑀁 𑀪𑀯𑀁 𑀧𑀼𑀭𑀺𑀫𑀁 𑀦𑀺𑀓𑁂𑀢𑀁 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑁄 𑀲𑀫𑀸𑀦𑁄 𑀩𑀳𑀼𑀚𑀦𑀲𑁆𑀲 𑀲𑀼𑀔𑀸𑀯𑀳𑁄 𑀅𑀳𑁄𑀲𑀺, 𑀉𑀩𑁆𑀩𑁂𑀕𑀉𑀢𑁆𑀢𑀸𑀲𑀪𑀬𑀁 𑀅𑀧𑀦𑀼𑀤𑀺𑀢𑀸, 𑀥𑀫𑁆𑀫𑀺𑀓𑀜𑁆𑀘 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺𑀁 𑀲𑀁𑀯𑀺𑀥𑀸𑀢𑀸, 𑀲𑀧𑀭𑀺𑀯𑀸𑀭𑀜𑁆𑀘 𑀤𑀸𑀦𑀁 𑀅𑀤𑀸𑀲𑀺. 𑀲𑁄 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀓𑀝𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸 𑀉𑀲𑁆𑀲𑀦𑁆𑀦𑀢𑁆𑀢𑀸 𑀯𑀺𑀧𑀼𑀮𑀢𑁆𑀢𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺…𑀧𑁂… 𑀲𑁄 𑀢𑀢𑁄 𑀘𑀼𑀢𑁄 𑀇𑀢𑁆𑀣𑀢𑁆𑀢𑀁 𑀆𑀕𑀢𑁄 𑀲𑀫𑀸𑀦𑁄 𑀇𑀫𑀁 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀁 𑀧𑀝𑀺𑀮𑀪𑀢𑀺. 𑀳𑁂𑀝𑁆𑀞𑀸𑀧𑀸𑀤𑀢𑀮𑁂𑀲𑀼 𑀘𑀓𑁆𑀓𑀸𑀦𑀺 𑀚𑀸𑀢𑀸𑀦𑀺 𑀳𑁄𑀦𑁆𑀢𑀺 𑀲𑀳𑀲𑁆𑀲𑀸𑀭𑀸𑀦𑀺 𑀲𑀦𑁂𑀫𑀺𑀓𑀸𑀦𑀺 𑀲𑀦𑀸𑀪𑀺𑀓𑀸𑀦𑀺 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑀸𑀦𑀺 𑀲𑀼𑀯𑀺𑀪𑀢𑁆𑀢𑀦𑁆𑀢𑀭𑀸𑀦𑀺.

‘‘𑀲𑁄 𑀢𑁂𑀦 𑀮𑀓𑁆𑀔𑀡𑁂𑀦 𑀲𑀫𑀦𑁆𑀦𑀸𑀕𑀢𑁄 𑀲𑀘𑁂 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺, 𑀭𑀸𑀚𑀸 𑀳𑁄𑀢𑀺 𑀘𑀓𑁆𑀓𑀯𑀢𑁆𑀢𑀻…𑀧𑁂… 𑀭𑀸𑀚𑀸 𑀲𑀫𑀸𑀦𑁄 𑀓𑀺𑀁 𑀮𑀪𑀢𑀺? 𑀫𑀳𑀸𑀧𑀭𑀺𑀯𑀸𑀭𑁄 𑀳𑁄𑀢𑀺; 𑀫𑀳𑀸𑀲𑁆𑀲 𑀳𑁄𑀦𑁆𑀢𑀺 𑀧𑀭𑀺𑀯𑀸𑀭𑀸 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀦𑁂𑀕𑀫𑀚𑀸𑀦𑀧𑀤𑀸 𑀕𑀡𑀓𑀫𑀳𑀸𑀫𑀢𑁆𑀢𑀸 𑀅𑀦𑀻𑀓𑀝𑁆𑀞𑀸 𑀤𑁄𑀯𑀸𑀭𑀺𑀓𑀸 𑀅𑀫𑀘𑁆𑀘𑀸 𑀧𑀸𑀭𑀺𑀲𑀚𑁆𑀚𑀸 𑀭𑀸𑀚𑀸𑀦𑁄 𑀪𑁄𑀕𑀺𑀬𑀸 𑀓𑀼𑀫𑀸𑀭𑀸. 𑀭𑀸𑀚𑀸 𑀲𑀫𑀸𑀦𑁄 𑀇𑀤𑀁 𑀮𑀪𑀢𑀺. 𑀲𑀘𑁂 𑀔𑁄 𑀧𑀦 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀢𑀺, 𑀅𑀭𑀳𑀁 𑀳𑁄𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀮𑁄𑀓𑁂 𑀯𑀺𑀯𑀝𑁆𑀝𑀘𑁆𑀙𑀤𑁄. 𑀩𑀼𑀤𑁆𑀥𑁄 𑀲𑀫𑀸𑀦𑁄 𑀓𑀺𑀁 𑀮𑀪𑀢𑀺? 𑀫𑀳𑀸𑀧𑀭𑀺𑀯𑀸𑀭𑁄 𑀳𑁄𑀢𑀺; 𑀫𑀳𑀸𑀲𑁆𑀲 𑀳𑁄𑀦𑁆𑀢𑀺 𑀧𑀭𑀺𑀯𑀸𑀭𑀸 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀦𑀺𑀬𑁄 𑀉𑀧𑀸𑀲𑀓𑀸 𑀉𑀧𑀸𑀲𑀺𑀓𑀸𑀬𑁄 𑀤𑁂𑀯𑀸 𑀫𑀦𑀼𑀲𑁆𑀲𑀸 𑀅𑀲𑀼𑀭𑀸 𑀦𑀸𑀕𑀸 𑀕𑀦𑁆𑀥𑀩𑁆𑀩𑀸. 𑀩𑀼𑀤𑁆𑀥𑁄 𑀲𑀫𑀸𑀦𑁄 𑀇𑀤𑀁 𑀮𑀪𑀢𑀺’’. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘.

𑁨𑁦𑁫. 𑀢𑀢𑁆𑀣𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀧𑀼𑀭𑁂 𑀧𑀼𑀭𑀢𑁆𑀣𑀸 𑀧𑀼𑀭𑀺𑀫𑀸𑀲𑀼 𑀚𑀸𑀢𑀺𑀲𑀼,

𑀫𑀦𑀼𑀲𑁆𑀲𑀪𑀽𑀢𑁄 𑀩𑀳𑀼𑀦𑀁 𑀲𑀼𑀔𑀸𑀯𑀳𑁄;

𑀉𑀩𑁆𑀪𑁂𑀕𑀉𑀢𑁆𑀢𑀸𑀲𑀪𑀬𑀸𑀧𑀦𑀽𑀤𑀦𑁄,

𑀕𑀼𑀢𑁆𑀢𑀻𑀲𑀼 𑀭𑀓𑁆𑀔𑀸𑀯𑀭𑀡𑁂𑀲𑀼 𑀉𑀲𑁆𑀲𑀼𑀓𑁄.

‘‘𑀲𑁄 𑀢𑁂𑀦 𑀓𑀫𑁆𑀫𑁂𑀦 𑀤𑀺𑀯𑀁 𑀲𑀫𑀓𑁆𑀓𑀫𑀺,

𑀲𑀼𑀔𑀜𑁆𑀘 𑀔𑀺𑀟𑁆𑀟𑀸𑀭𑀢𑀺𑀬𑁄 𑀘 𑀅𑀦𑁆𑀯𑀪𑀺;

𑀢𑀢𑁄 𑀘𑀯𑀺𑀢𑁆𑀯𑀸 𑀧𑀼𑀦𑀭𑀸𑀕𑀢𑁄 𑀇𑀥,

𑀘𑀓𑁆𑀓𑀸𑀦𑀺 𑀧𑀸𑀤𑁂𑀲𑀼 𑀤𑀼𑀯𑁂𑀲𑀼 𑀯𑀺𑀦𑁆𑀤𑀢𑀺.

‘‘𑀲𑀫𑀦𑁆𑀢𑀦𑁂𑀫𑀻𑀦𑀺 𑀲𑀳𑀲𑁆𑀲𑀭𑀸𑀦𑀺 𑀘,

𑀩𑁆𑀬𑀸𑀓𑀁𑀲𑀼 𑀯𑁂𑀬𑁆𑀬𑀜𑁆𑀚𑀦𑀺𑀓𑀸 𑀲𑀫𑀸𑀕𑀢𑀸;

𑀤𑀺𑀲𑁆𑀯𑀸 𑀓𑀼𑀫𑀸𑀭𑀁 𑀲𑀢𑀧𑀼𑀜𑁆𑀜𑀮𑀓𑁆𑀔𑀡𑀁,

𑀧𑀭𑀺𑀯𑀸𑀭𑀯𑀸 𑀳𑁂𑀲𑁆𑀲𑀢𑀺 𑀲𑀢𑁆𑀢𑀼𑀫𑀤𑁆𑀤𑀦𑁄.

𑀢𑀣𑀸 𑀳𑀻 𑀘𑀓𑁆𑀓𑀸𑀦𑀺 𑀲𑀫𑀦𑁆𑀢𑀦𑁂𑀫𑀺𑀦𑀺,

𑀲𑀘𑁂 𑀦 𑀧𑀩𑁆𑀩𑀚𑁆𑀚𑀫𑀼𑀧𑁂𑀢𑀺 𑀢𑀸𑀤𑀺𑀲𑁄;

𑀯𑀢𑁆𑀢𑁂𑀢𑀺 𑀘𑀓𑁆𑀓𑀁 𑀧𑀣𑀯𑀺𑀁 𑀧𑀲𑀸𑀲𑀢𑀺,

𑀢𑀲𑁆𑀲𑀸𑀦𑀼𑀬𑀦𑁆𑀢𑀸𑀥 [𑀢𑀲𑁆𑀲𑀸𑀦𑀼𑀬𑀼𑀢𑁆𑀢𑀸 𑀇𑀥 (𑀲𑀻. 𑀧𑀻.), 𑀢𑀲𑁆𑀲𑀸𑀦𑀼𑀬𑀦𑁆𑀢𑀸 𑀇𑀥 (𑀲𑁆𑀬𑀸. 𑀓.)] 𑀪𑀯𑀦𑁆𑀢𑀺 𑀔𑀢𑁆𑀢𑀺𑀬𑀸.

‘‘𑀫𑀳𑀸𑀬𑀲𑀁 𑀲𑀁𑀧𑀭𑀺𑀯𑀸𑀭𑀬𑀦𑁆𑀢𑀺 𑀦𑀁,

𑀲𑀘𑁂 𑀘 𑀧𑀩𑁆𑀩𑀚𑁆𑀚𑀫𑀼𑀧𑁂𑀢𑀺 𑀢𑀸𑀤𑀺𑀲𑁄;

𑀦𑁂𑀓𑁆𑀔𑀫𑁆𑀫𑀙𑀦𑁆𑀤𑀸𑀪𑀺𑀭𑀢𑁄 𑀯𑀺𑀘𑀓𑁆𑀔𑀡𑁄,

𑀤𑁂𑀯𑀸𑀫𑀦𑀼𑀲𑁆𑀲𑀸𑀲𑀼𑀭𑀲𑀓𑁆𑀓𑀭𑀓𑁆𑀔𑀲𑀸 [𑀲𑀢𑁆𑀢𑀭𑀓𑁆𑀔𑀲𑀸 (𑀓.) 𑀲𑀻. 𑀲𑁆𑀬𑀸𑀅𑀝𑁆𑀞𑀓𑀣𑀸 𑀑𑀮𑁄𑀓𑁂𑀢𑀩𑁆𑀩𑀸].

‘‘𑀕𑀦𑁆𑀥𑀩𑁆𑀩𑀦𑀸𑀕𑀸 𑀯𑀺𑀳𑀕𑀸 𑀘𑀢𑀼𑀧𑁆𑀧𑀤𑀸,

𑀅𑀦𑀼𑀢𑁆𑀢𑀭𑀁 𑀤𑁂𑀯𑀫𑀦𑀼𑀲𑁆𑀲𑀧𑀽𑀚𑀺𑀢𑀁;

𑀫𑀳𑀸𑀬𑀲𑀁 𑀲𑀁𑀧𑀭𑀺𑀯𑀸𑀭𑀬𑀦𑁆𑀢𑀺 𑀦’’𑀦𑁆𑀢𑀺.

(𑁩-𑁫) 𑀆𑀬𑀢𑀧𑀡𑁆𑀳𑀺𑀢𑀸𑀤𑀺𑀢𑀺𑀮𑀓𑁆𑀔𑀡𑀁

𑁨𑁦𑁬. ‘‘𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀧𑀼𑀭𑀺𑀫𑀁 𑀚𑀸𑀢𑀺𑀁 𑀧𑀼𑀭𑀺𑀫𑀁 𑀪𑀯𑀁 𑀧𑀼𑀭𑀺𑀫𑀁 𑀦𑀺𑀓𑁂𑀢𑀁 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑁄 𑀲𑀫𑀸𑀦𑁄 𑀧𑀸𑀡𑀸𑀢𑀺𑀧𑀸𑀢𑀁 𑀧𑀳𑀸𑀬 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀅𑀳𑁄𑀲𑀺 𑀦𑀺𑀳𑀺𑀢𑀤𑀡𑁆𑀟𑁄 𑀦𑀺𑀳𑀺𑀢𑀲𑀢𑁆𑀣𑁄 𑀮𑀚𑁆𑀚𑀻 𑀤𑀬𑀸𑀧𑀦𑁆𑀦𑁄, 𑀲𑀩𑁆𑀩𑀧𑀸𑀡𑀪𑀽𑀢𑀳𑀺𑀢𑀸𑀦𑀼𑀓𑀫𑁆𑀧𑀻 𑀯𑀺𑀳𑀸𑀲𑀺. 𑀲𑁄 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀓𑀝𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸 𑀉𑀲𑁆𑀲𑀦𑁆𑀦𑀢𑁆𑀢𑀸 𑀯𑀺𑀧𑀼𑀮𑀢𑁆𑀢𑀸…𑀧𑁂… 𑀲𑁄 𑀢𑀢𑁄 𑀘𑀼𑀢𑁄 𑀇𑀢𑁆𑀣𑀢𑁆𑀢𑀁 𑀆𑀕𑀢𑁄 𑀲𑀫𑀸𑀦𑁄 𑀇𑀫𑀸𑀦𑀺 𑀢𑀻𑀡𑀺 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀺 𑀧𑀝𑀺𑀮𑀪𑀢𑀺. 𑀆𑀬𑀢𑀧𑀡𑁆𑀳𑀺 𑀘 𑀳𑁄𑀢𑀺, 𑀤𑀻𑀖𑀗𑁆𑀕𑀼𑀮𑀺 𑀘 𑀩𑁆𑀭𑀳𑁆𑀫𑀼𑀚𑀼𑀕𑀢𑁆𑀢𑁄 𑀘.

‘‘𑀲𑁄 𑀢𑁂𑀳𑀺 𑀮𑀓𑁆𑀔𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀲𑀘𑁂 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺, 𑀭𑀸𑀚𑀸 𑀳𑁄𑀢𑀺 𑀘𑀓𑁆𑀓𑀯𑀢𑁆𑀢𑀻…𑀧𑁂… 𑀭𑀸𑀚𑀸 𑀲𑀫𑀸𑀦𑁄 𑀓𑀺𑀁 𑀮𑀪𑀢𑀺? 𑀤𑀻𑀖𑀸𑀬𑀼𑀓𑁄 𑀳𑁄𑀢𑀺 𑀘𑀺𑀭𑀝𑁆𑀞𑀺𑀢𑀺𑀓𑁄, 𑀤𑀻𑀖𑀫𑀸𑀬𑀼𑀁 𑀧𑀸𑀮𑁂𑀢𑀺, 𑀦 𑀲𑀓𑁆𑀓𑀸 𑀳𑁄𑀢𑀺 𑀅𑀦𑁆𑀢𑀭𑀸 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀼𑀁 𑀓𑁂𑀦𑀘𑀺 𑀫𑀦𑀼𑀲𑁆𑀲𑀪𑀽𑀢𑁂𑀦 𑀧𑀘𑁆𑀘𑀢𑁆𑀣𑀺𑀓𑁂𑀦 𑀧𑀘𑁆𑀘𑀸𑀫𑀺𑀢𑁆𑀢𑁂𑀦. 𑀭𑀸𑀚𑀸 𑀲𑀫𑀸𑀦𑁄 𑀇𑀤𑀁 𑀮𑀪𑀢𑀺… 𑀩𑀼𑀤𑁆𑀥𑁄 𑀲𑀫𑀸𑀦𑁄 𑀓𑀺𑀁 𑀮𑀪𑀢𑀺? 𑀤𑀻𑀖𑀸𑀬𑀼𑀓𑁄 𑀳𑁄𑀢𑀺 𑀘𑀺𑀭𑀝𑁆𑀞𑀺𑀢𑀺𑀓𑁄, 𑀤𑀻𑀖𑀫𑀸𑀬𑀼𑀁 𑀧𑀸𑀮𑁂𑀢𑀺, 𑀦 𑀲𑀓𑁆𑀓𑀸 𑀳𑁄𑀢𑀺 𑀅𑀦𑁆𑀢𑀭𑀸 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀼𑀁 𑀧𑀘𑁆𑀘𑀢𑁆𑀣𑀺𑀓𑁂𑀳𑀺 𑀧𑀘𑁆𑀘𑀸𑀫𑀺𑀢𑁆𑀢𑁂𑀳𑀺 𑀲𑀫𑀡𑁂𑀦 𑀯𑀸 𑀩𑁆𑀭𑀸𑀳𑁆𑀫𑀡𑁂𑀦 𑀯𑀸 𑀤𑁂𑀯𑁂𑀦 𑀯𑀸 𑀫𑀸𑀭𑁂𑀦 𑀯𑀸 𑀩𑁆𑀭𑀳𑁆𑀫𑀼𑀦𑀸 𑀯𑀸 𑀓𑁂𑀦𑀘𑀺 𑀯𑀸 𑀮𑁄𑀓𑀲𑁆𑀫𑀺𑀁. 𑀩𑀼𑀤𑁆𑀥𑁄 𑀲𑀫𑀸𑀦𑁄 𑀇𑀤𑀁 𑀮𑀪𑀢𑀺’’. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘.

𑁨𑁦𑁭. 𑀢𑀢𑁆𑀣𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀫𑀸𑀭𑀡𑀯𑀥𑀪𑀬𑀢𑁆𑀢𑀦𑁄 [𑀫𑀭𑀡𑀯𑀥𑀪𑀬𑀢𑁆𑀢𑀦𑁄 (𑀲𑀻. 𑀧𑀻. 𑀓.), 𑀫𑀭𑀡𑀯𑀥𑀪𑀬𑀫𑀢𑁆𑀢𑀦𑁄 (𑀲𑁆𑀬𑀸.)] 𑀯𑀺𑀤𑀺𑀢𑁆𑀯𑀸,

𑀧𑀝𑀺𑀯𑀺𑀭𑀢𑁄 𑀧𑀭𑀁 𑀫𑀸𑀭𑀡𑀸𑀬𑀳𑁄𑀲𑀺;

𑀢𑁂𑀦 𑀲𑀼𑀘𑀭𑀺𑀢𑁂𑀦 𑀲𑀕𑁆𑀕𑀫𑀕𑀫𑀸 [𑀢𑁂𑀦 𑀲𑁄 𑀲𑀼𑀘𑀭𑀺𑀢𑁂𑀦 𑀲𑀕𑁆𑀕𑀫𑀕𑀫𑀸𑀲𑀺 (𑀲𑁆𑀬𑀸.)],

𑀲𑀼𑀓𑀢𑀨𑀮𑀯𑀺𑀧𑀸𑀓𑀫𑀦𑀼𑀪𑁄𑀲𑀺.

‘‘𑀘𑀯𑀺𑀬 𑀧𑀼𑀦𑀭𑀺𑀥𑀸𑀕𑀢𑁄 𑀲𑀫𑀸𑀦𑁄,

𑀧𑀝𑀺𑀮𑀪𑀢𑀺 𑀇𑀥 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺;

𑀪𑀯𑀢𑀺 𑀯𑀺𑀧𑀼𑀮𑀤𑀻𑀖𑀧𑀸𑀲𑀡𑁆𑀳𑀺𑀓𑁄,

𑀩𑁆𑀭𑀳𑁆𑀫𑀸𑀯 𑀲𑀼𑀚𑀼 𑀲𑀼𑀪𑁄 𑀲𑀼𑀚𑀸𑀢𑀕𑀢𑁆𑀢𑁄.

‘‘𑀲𑀼𑀪𑀼𑀚𑁄 𑀲𑀼𑀲𑀼 𑀲𑀼𑀲𑀡𑁆𑀞𑀺𑀢𑁄 𑀲𑀼𑀚𑀸𑀢𑁄,

𑀫𑀼𑀤𑀼𑀢𑀮𑀼𑀦𑀗𑁆𑀕𑀼𑀮𑀺𑀬𑀲𑁆𑀲 𑀳𑁄𑀦𑁆𑀢𑀺;

𑀤𑀻𑀖𑀸 𑀢𑀻𑀪𑀺 𑀧𑀼𑀭𑀺𑀲𑀯𑀭𑀕𑁆𑀕𑀮𑀓𑁆𑀔𑀡𑁂𑀳𑀺,

𑀘𑀺𑀭𑀬𑀧𑀦𑀸𑀬 [𑀘𑀺𑀭𑀬𑀸𑀧𑀦𑀸𑀬 (𑀲𑁆𑀬𑀸.)] 𑀓𑀼𑀫𑀸𑀭𑀫𑀸𑀤𑀺𑀲𑀦𑁆𑀢𑀺.

‘‘𑀪𑀯𑀢𑀺 𑀬𑀤𑀺 𑀕𑀺𑀳𑀻 𑀘𑀺𑀭𑀁 𑀬𑀧𑁂𑀢𑀺,

𑀘𑀺𑀭𑀢𑀭𑀁 𑀧𑀩𑁆𑀩𑀚𑀢𑀺 𑀬𑀤𑀺 𑀢𑀢𑁄 𑀳𑀺;

𑀬𑀸𑀧𑀬𑀢𑀺 𑀘 𑀯𑀲𑀺𑀤𑁆𑀥𑀺𑀪𑀸𑀯𑀦𑀸𑀬,

𑀇𑀢𑀺 𑀤𑀻𑀖𑀸𑀬𑀼𑀓𑀢𑀸𑀬 𑀢𑀁 𑀦𑀺𑀫𑀺𑀢𑁆𑀢’’𑀦𑁆𑀢𑀺.

(𑁬) 𑀲𑀢𑁆𑀢𑀼𑀲𑁆𑀲𑀤𑀢𑀸𑀮𑀓𑁆𑀔𑀡𑀁

𑁨𑁦𑁮. ‘‘𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀧𑀼𑀭𑀺𑀫𑀁 𑀚𑀸𑀢𑀺𑀁 𑀧𑀼𑀭𑀺𑀫𑀁 𑀪𑀯𑀁 𑀧𑀼𑀭𑀺𑀫𑀁 𑀦𑀺𑀓𑁂𑀢𑀁 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑁄 𑀲𑀫𑀸𑀦𑁄 𑀤𑀸𑀢𑀸 𑀅𑀳𑁄𑀲𑀺 𑀧𑀡𑀻𑀢𑀸𑀦𑀁 𑀭𑀲𑀺𑀢𑀸𑀦𑀁 𑀔𑀸𑀤𑀦𑀻𑀬𑀸𑀦𑀁 𑀪𑁄𑀚𑀦𑀻𑀬𑀸𑀦𑀁 𑀲𑀸𑀬𑀦𑀻𑀬𑀸𑀦𑀁 𑀮𑁂𑀳𑀦𑀻𑀬𑀸𑀦𑀁 𑀧𑀸𑀦𑀸𑀦𑀁. 𑀲𑁄 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀓𑀝𑀢𑁆𑀢𑀸…𑀧𑁂… 𑀲𑁄 𑀢𑀢𑁄 𑀘𑀼𑀢𑁄 𑀇𑀢𑁆𑀣𑀢𑁆𑀢𑀁 𑀆𑀕𑀢𑁄 𑀲𑀫𑀸𑀦𑁄 𑀇𑀫𑀁 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀁 𑀧𑀝𑀺𑀮𑀪𑀢𑀺, 𑀲𑀢𑁆𑀢𑀼𑀲𑁆𑀲𑀤𑁄 𑀳𑁄𑀢𑀺, 𑀲𑀢𑁆𑀢𑀲𑁆𑀲 𑀉𑀲𑁆𑀲𑀤𑀸 𑀳𑁄𑀦𑁆𑀢𑀺; 𑀉𑀪𑁄𑀲𑀼 𑀳𑀢𑁆𑀣𑁂𑀲𑀼 𑀉𑀲𑁆𑀲𑀤𑀸 𑀳𑁄𑀦𑁆𑀢𑀺, 𑀉𑀪𑁄𑀲𑀼 𑀧𑀸𑀤𑁂𑀲𑀼 𑀉𑀲𑁆𑀲𑀤𑀸 𑀳𑁄𑀦𑁆𑀢𑀺, 𑀉𑀪𑁄𑀲𑀼 𑀅𑀁𑀲𑀓𑀽𑀝𑁂𑀲𑀼 𑀉𑀲𑁆𑀲𑀤𑀸 𑀳𑁄𑀦𑁆𑀢𑀺, 𑀔𑀦𑁆𑀥𑁂 𑀉𑀲𑁆𑀲𑀤𑁄 𑀳𑁄𑀢𑀺.

‘‘𑀲𑁄 𑀢𑁂𑀦 𑀮𑀓𑁆𑀔𑀡𑁂𑀦 𑀲𑀫𑀦𑁆𑀦𑀸𑀕𑀢𑁄 𑀲𑀘𑁂 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺, 𑀭𑀸𑀚𑀸 𑀳𑁄𑀢𑀺 𑀘𑀓𑁆𑀓𑀯𑀢𑁆𑀢𑀻…𑀧𑁂… 𑀭𑀸𑀚𑀸 𑀲𑀫𑀸𑀦𑁄 𑀓𑀺𑀁 𑀮𑀪𑀢𑀺? 𑀮𑀸𑀪𑀻 𑀳𑁄𑀢𑀺 𑀧𑀡𑀻𑀢𑀸𑀦𑀁 𑀭𑀲𑀺𑀢𑀸𑀦𑀁 𑀔𑀸𑀤𑀦𑀻𑀬𑀸𑀦𑀁 𑀪𑁄𑀚𑀦𑀻𑀬𑀸𑀦𑀁 𑀲𑀸𑀬𑀦𑀻𑀬𑀸𑀦𑀁 𑀮𑁂𑀳𑀦𑀻𑀬𑀸𑀦𑀁 𑀧𑀸𑀦𑀸𑀦𑀁. 𑀭𑀸𑀚𑀸 𑀲𑀫𑀸𑀦𑁄 𑀇𑀤𑀁 𑀮𑀪𑀢𑀺… 𑀩𑀼𑀤𑁆𑀥𑁄 𑀲𑀫𑀸𑀦𑁄 𑀓𑀺𑀁 𑀮𑀪𑀢𑀺? 𑀮𑀸𑀪𑀻 𑀳𑁄𑀢𑀺 𑀧𑀡𑀻𑀢𑀸𑀦𑀁 𑀭𑀲𑀺𑀢𑀸𑀦𑀁 𑀔𑀸𑀤𑀦𑀻𑀬𑀸𑀦𑀁 𑀪𑁄𑀚𑀦𑀻𑀬𑀸𑀦𑀁 𑀲𑀸𑀬𑀦𑀻𑀬𑀸𑀦𑀁 𑀮𑁂𑀳𑀦𑀻𑀬𑀸𑀦𑀁 𑀧𑀸𑀦𑀸𑀦𑀁. 𑀩𑀼𑀤𑁆𑀥𑁄 𑀲𑀫𑀸𑀦𑁄 𑀇𑀤𑀁 𑀮𑀪𑀢𑀺’’. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘.

𑁨𑁦𑁯. 𑀢𑀢𑁆𑀣𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀔𑀚𑁆𑀚𑀪𑁄𑀚𑁆𑀚𑀫𑀣 𑀮𑁂𑀬𑁆𑀬 𑀲𑀸𑀬𑀺𑀬𑀁,

𑀉𑀢𑁆𑀢𑀫𑀕𑁆𑀕𑀭𑀲𑀤𑀸𑀬𑀓𑁄 𑀅𑀳𑀼;

𑀢𑁂𑀦 𑀲𑁄 𑀲𑀼𑀘𑀭𑀺𑀢𑁂𑀦 𑀓𑀫𑁆𑀫𑀼𑀦𑀸,

𑀦𑀦𑁆𑀤𑀦𑁂 𑀘𑀺𑀭𑀫𑀪𑀺𑀧𑁆𑀧𑀫𑁄𑀤𑀢𑀺.

‘‘𑀲𑀢𑁆𑀢 𑀘𑀼𑀲𑁆𑀲𑀤𑁂 𑀇𑀥𑀸𑀥𑀺𑀕𑀘𑁆𑀙𑀢𑀺,

𑀳𑀢𑁆𑀣𑀧𑀸𑀤𑀫𑀼𑀤𑀼𑀢𑀜𑁆𑀘 𑀯𑀺𑀦𑁆𑀤𑀢𑀺;

𑀆𑀳𑀼 𑀩𑁆𑀬𑀜𑁆𑀚𑀦𑀦𑀺𑀫𑀺𑀢𑁆𑀢𑀓𑁄𑀯𑀺𑀤𑀸,

𑀔𑀚𑁆𑀚𑀪𑁄𑀚𑁆𑀚𑀭𑀲𑀮𑀸𑀪𑀺𑀢𑀸𑀬 𑀦𑀁.

‘‘𑀬𑀁 𑀕𑀺𑀳𑀺𑀲𑁆𑀲𑀧𑀺 [𑀦 𑀢𑀁 𑀕𑀺𑀳𑀺𑀲𑁆𑀲𑀸𑀧𑀺 (𑀲𑁆𑀬𑀸.)] 𑀢𑀤𑀢𑁆𑀣𑀚𑁄𑀢𑀓𑀁,

𑀧𑀩𑁆𑀩𑀚𑁆𑀚𑀫𑁆𑀧𑀺 𑀘 𑀢𑀤𑀸𑀥𑀺𑀕𑀘𑁆𑀙𑀢𑀺;

𑀔𑀚𑁆𑀚𑀪𑁄𑀚𑁆𑀚𑀭𑀲𑀮𑀸𑀪𑀺𑀭𑀼𑀢𑁆𑀢𑀫𑀁,

𑀆𑀳𑀼 𑀲𑀩𑁆𑀩𑀕𑀺𑀳𑀺𑀩𑀦𑁆𑀥𑀦𑀘𑁆𑀙𑀺𑀤’’𑀦𑁆𑀢𑀺.

(𑁭-𑁮) 𑀓𑀭𑀘𑀭𑀡𑀫𑀼𑀤𑀼𑀚𑀸𑀮𑀢𑀸𑀮𑀓𑁆𑀔𑀡𑀸𑀦𑀺

𑁨𑁧𑁦. ‘‘𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀧𑀼𑀭𑀺𑀫𑀁 𑀚𑀸𑀢𑀺𑀁 𑀧𑀼𑀭𑀺𑀫𑀁 𑀪𑀯𑀁 𑀧𑀼𑀭𑀺𑀫𑀁 𑀦𑀺𑀓𑁂𑀢𑀁 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑁄 𑀲𑀫𑀸𑀦𑁄 𑀘𑀢𑀽𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 𑀚𑀦𑀁 𑀲𑀗𑁆𑀕𑀸𑀳𑀓𑁄 𑀅𑀳𑁄𑀲𑀺 𑁋 𑀤𑀸𑀦𑁂𑀦 𑀧𑁂𑀬𑁆𑀬𑀯𑀚𑁆𑀚𑁂𑀦 [𑀧𑀺𑀬𑀯𑀸𑀘𑁂𑀦 (𑀲𑁆𑀬𑀸. 𑀓.)] 𑀅𑀢𑁆𑀣𑀘𑀭𑀺𑀬𑀸𑀬 𑀲𑀫𑀸𑀦𑀢𑁆𑀢𑀢𑀸𑀬. 𑀲𑁄 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀓𑀝𑀢𑁆𑀢𑀸…𑀧𑁂… 𑀲𑁄 𑀢𑀢𑁄 𑀘𑀼𑀢𑁄 𑀇𑀢𑁆𑀣𑀢𑁆𑀢𑀁 𑀆𑀕𑀢𑁄 𑀲𑀫𑀸𑀦𑁄 𑀇𑀫𑀸𑀦𑀺 𑀤𑁆𑀯𑁂 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀺 𑀧𑀝𑀺𑀮𑀪𑀢𑀺. 𑀫𑀼𑀤𑀼𑀢𑀮𑀼𑀦𑀳𑀢𑁆𑀣𑀧𑀸𑀤𑁄 𑀘 𑀳𑁄𑀢𑀺 𑀚𑀸𑀮𑀳𑀢𑁆𑀣𑀧𑀸𑀤𑁄 𑀘.

‘‘𑀲𑁄 𑀢𑁂𑀳𑀺 𑀮𑀓𑁆𑀔𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀲𑀘𑁂 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺, 𑀭𑀸𑀚𑀸 𑀳𑁄𑀢𑀺 𑀘𑀓𑁆𑀓𑀯𑀢𑁆𑀢𑀻…𑀧𑁂… 𑀭𑀸𑀚𑀸 𑀲𑀫𑀸𑀦𑁄 𑀓𑀺𑀁 𑀮𑀪𑀢𑀺? 𑀲𑀼𑀲𑀗𑁆𑀕𑀳𑀺𑀢𑀧𑀭𑀺𑀚𑀦𑁄 𑀳𑁄𑀢𑀺, 𑀲𑀼𑀲𑀗𑁆𑀕𑀳𑀺𑀢𑀸𑀲𑁆𑀲 𑀳𑁄𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀦𑁂𑀕𑀫𑀚𑀸𑀦𑀧𑀤𑀸 𑀕𑀡𑀓𑀫𑀳𑀸𑀫𑀢𑁆𑀢𑀸 𑀅𑀦𑀻𑀓𑀝𑁆𑀞𑀸 𑀤𑁄𑀯𑀸𑀭𑀺𑀓𑀸 𑀅𑀫𑀘𑁆𑀘𑀸 𑀧𑀸𑀭𑀺𑀲𑀚𑁆𑀚𑀸 𑀭𑀸𑀚𑀸𑀦𑁄 𑀪𑁄𑀕𑀺𑀬𑀸 𑀓𑀼𑀫𑀸𑀭𑀸. 𑀭𑀸𑀚𑀸 𑀲𑀫𑀸𑀦𑁄 𑀇𑀤𑀁 𑀮𑀪𑀢𑀺… 𑀩𑀼𑀤𑁆𑀥𑁄 𑀲𑀫𑀸𑀦𑁄 𑀓𑀺𑀁 𑀮𑀪𑀢𑀺? 𑀲𑀼𑀲𑀗𑁆𑀕𑀳𑀺𑀢𑀧𑀭𑀺𑀚𑀦𑁄 𑀳𑁄𑀢𑀺, 𑀲𑀼𑀲𑀗𑁆𑀕𑀳𑀺𑀢𑀸𑀲𑁆𑀲 𑀳𑁄𑀦𑁆𑀢𑀺 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀦𑀺𑀬𑁄 𑀉𑀧𑀸𑀲𑀓𑀸 𑀉𑀧𑀸𑀲𑀺𑀓𑀸𑀬𑁄 𑀤𑁂𑀯𑀸 𑀫𑀦𑀼𑀲𑁆𑀲𑀸 𑀅𑀲𑀼𑀭𑀸 𑀦𑀸𑀕𑀸 𑀕𑀦𑁆𑀥𑀩𑁆𑀩𑀸. 𑀩𑀼𑀤𑁆𑀥𑁄 𑀲𑀫𑀸𑀦𑁄 𑀇𑀤𑀁 𑀮𑀪𑀢𑀺’’. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘.

𑁨𑁧𑁧. 𑀢𑀢𑁆𑀣𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀤𑀸𑀦𑀫𑁆𑀧𑀺 𑀘𑀢𑁆𑀣𑀘𑀭𑀺𑀬𑀢𑀜𑁆𑀘 [𑀤𑀸𑀦𑀫𑁆𑀧𑀺 𑀘 𑀅𑀢𑁆𑀣𑀘𑀭𑀺𑀬𑀢𑀫𑁆𑀧𑀺 𑀘 (𑀲𑀻. 𑀧𑀻.)],

𑀧𑀺𑀬𑀯𑀸𑀤𑀺𑀢𑀜𑁆𑀘 𑀲𑀫𑀸𑀦𑀢𑁆𑀢𑀢𑀜𑁆𑀘 [𑀧𑀺𑀬𑀯𑀤𑀢𑀜𑁆𑀘 𑀲𑀫𑀸𑀦𑀙𑀦𑁆𑀤𑀢𑀜𑁆𑀘 (𑀲𑀻. 𑀧𑀻.)];

𑀓𑀭𑀺𑀬𑀘𑀭𑀺𑀬𑀲𑀼𑀲𑀗𑁆𑀕𑀳𑀁 𑀩𑀳𑀽𑀦𑀁,

𑀅𑀦𑀯𑀫𑀢𑁂𑀦 𑀕𑀼𑀡𑁂𑀦 𑀬𑀸𑀢𑀺 𑀲𑀕𑁆𑀕𑀁.

‘‘𑀘𑀯𑀺𑀬 𑀧𑀼𑀦𑀭𑀺𑀥𑀸𑀕𑀢𑁄 𑀲𑀫𑀸𑀦𑁄,

𑀓𑀭𑀘𑀭𑀡𑀫𑀼𑀤𑀼𑀢𑀜𑁆𑀘 𑀚𑀸𑀮𑀺𑀦𑁄 𑀘;

𑀅𑀢𑀺𑀭𑀼𑀘𑀺𑀭𑀲𑀼𑀯𑀕𑁆𑀕𑀼𑀤𑀲𑁆𑀲𑀦𑁂𑀬𑁆𑀬𑀁,

𑀧𑀝𑀺𑀮𑀪𑀢𑀺 𑀤𑀳𑀭𑁄 𑀲𑀼𑀲𑀼 𑀓𑀼𑀫𑀸𑀭𑁄.

‘‘𑀪𑀯𑀢𑀺 𑀧𑀭𑀺𑀚𑀦𑀲𑁆𑀲𑀯𑁄 𑀯𑀺𑀥𑁂𑀬𑁆𑀬𑁄,

𑀫𑀳𑀺𑀫𑀁 𑀆𑀯𑀲𑀺𑀢𑁄 𑀲𑀼𑀲𑀗𑁆𑀕𑀳𑀺𑀢𑁄;

𑀧𑀺𑀬𑀯𑀤𑀽 𑀳𑀺𑀢𑀲𑀼𑀔𑀢𑀁 𑀚𑀺𑀕𑀻𑀲𑀫𑀸𑀦𑁄 [𑀚𑀺𑀕𑀺𑀁 𑀲𑀫𑀸𑀦𑁄 (𑀲𑀻. 𑀲𑁆𑀬𑀸. 𑀧𑀻.)],

𑀅𑀪𑀺𑀭𑀼𑀘𑀺𑀢𑀸𑀦𑀺 𑀕𑀼𑀡𑀸𑀦𑀺 𑀆𑀘𑀭𑀢𑀺.

‘‘𑀬𑀤𑀺 𑀘 𑀚𑀳𑀢𑀺 𑀲𑀩𑁆𑀩𑀓𑀸𑀫𑀪𑁄𑀕𑀁,

𑀓𑀣𑀬𑀢𑀺 𑀥𑀫𑁆𑀫𑀓𑀣𑀁 𑀚𑀺𑀦𑁄 𑀚𑀦𑀲𑁆𑀲;

𑀯𑀘𑀦𑀧𑀝𑀺𑀓𑀭𑀲𑁆𑀲𑀸𑀪𑀺𑀧𑁆𑀧𑀲𑀦𑁆𑀦𑀸,

𑀲𑀼𑀢𑁆𑀯𑀸𑀦 𑀥𑀫𑁆𑀫𑀸𑀦𑀼𑀥𑀫𑁆𑀫𑀫𑀸𑀘𑀭𑀦𑁆𑀢𑀻’’𑀢𑀺.

(𑁯-𑁧𑁦) 𑀉𑀲𑁆𑀲𑀗𑁆𑀔𑀧𑀸𑀤𑀉𑀤𑁆𑀥𑀕𑁆𑀕𑀮𑁄𑀫𑀢𑀸𑀮𑀓𑁆𑀔𑀡𑀸𑀦𑀺

𑁨𑁧𑁨. ‘‘𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀧𑀼𑀭𑀺𑀫𑀁 𑀚𑀸𑀢𑀺𑀁 𑀧𑀼𑀭𑀺𑀫𑀁 𑀪𑀯𑀁 𑀧𑀼𑀭𑀺𑀫𑀁 𑀦𑀺𑀓𑁂𑀢𑀁 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑁄 𑀲𑀫𑀸𑀦𑁄 [𑀲𑀫𑀸𑀦𑁄 𑀩𑀳𑀼𑀦𑁄 𑀚𑀦𑀲𑁆𑀲 (𑀲𑀻. 𑀧𑀻.)] 𑀅𑀢𑁆𑀣𑀽𑀧𑀲𑀁𑀳𑀺𑀢𑀁 𑀥𑀫𑁆𑀫𑀽𑀧𑀲𑀁𑀳𑀺𑀢𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀅𑀳𑁄𑀲𑀺, 𑀩𑀳𑀼𑀚𑀦𑀁 𑀦𑀺𑀤𑀁𑀲𑁂𑀲𑀺, 𑀧𑀸𑀡𑀻𑀦𑀁 𑀳𑀺𑀢𑀲𑀼𑀔𑀸𑀯𑀳𑁄 𑀥𑀫𑁆𑀫𑀬𑀸𑀕𑀻. 𑀲𑁄 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀓𑀝𑀢𑁆𑀢𑀸…𑀧𑁂… 𑀲𑁄 𑀢𑀢𑁄 𑀘𑀼𑀢𑁄 𑀇𑀢𑁆𑀣𑀢𑁆𑀢𑀁 𑀆𑀕𑀢𑁄 𑀲𑀫𑀸𑀦𑁄 𑀇𑀫𑀸𑀦𑀺 𑀤𑁆𑀯𑁂 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀺 𑀧𑀝𑀺𑀮𑀪𑀢𑀺. 𑀉𑀲𑁆𑀲𑀗𑁆𑀔𑀧𑀸𑀤𑁄 𑀘 𑀳𑁄𑀢𑀺, 𑀉𑀤𑁆𑀥𑀕𑁆𑀕𑀮𑁄𑀫𑁄 𑀘.

‘‘𑀲𑁄 𑀢𑁂𑀳𑀺 𑀮𑀓𑁆𑀔𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄, 𑀲𑀘𑁂 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺, 𑀭𑀸𑀚𑀸 𑀳𑁄𑀢𑀺 𑀘𑀓𑁆𑀓𑀯𑀢𑁆𑀢𑀻…𑀧𑁂… 𑀭𑀸𑀚𑀸 𑀲𑀫𑀸𑀦𑁄 𑀓𑀺𑀁 𑀮𑀪𑀢𑀺? 𑀅𑀕𑁆𑀕𑁄 𑀘 𑀳𑁄𑀢𑀺 𑀲𑁂𑀝𑁆𑀞𑁄 𑀘 𑀧𑀸𑀫𑁄𑀓𑁆𑀔𑁄 𑀘 𑀉𑀢𑁆𑀢𑀫𑁄 𑀘 𑀧𑀯𑀭𑁄 𑀘 𑀓𑀸𑀫𑀪𑁄𑀕𑀻𑀦𑀁. 𑀭𑀸𑀚𑀸 𑀲𑀫𑀸𑀦𑁄 𑀇𑀤𑀁 𑀮𑀪𑀢𑀺… 𑀩𑀼𑀤𑁆𑀥𑁄 𑀲𑀫𑀸𑀦𑁄 𑀓𑀺𑀁 𑀮𑀪𑀢𑀺? 𑀅𑀕𑁆𑀕𑁄 𑀘 𑀳𑁄𑀢𑀺 𑀲𑁂𑀝𑁆𑀞𑁄 𑀘 𑀧𑀸𑀫𑁄𑀓𑁆𑀔𑁄 𑀘 𑀉𑀢𑁆𑀢𑀫𑁄 𑀘 𑀧𑀯𑀭𑁄 𑀘 𑀲𑀩𑁆𑀩𑀲𑀢𑁆𑀢𑀸𑀦𑀁. 𑀩𑀼𑀤𑁆𑀥𑁄 𑀲𑀫𑀸𑀦𑁄 𑀇𑀤𑀁 𑀮𑀪𑀢𑀺’’. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘.

𑁨𑁧𑁩. 𑀢𑀢𑁆𑀣𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀅𑀢𑁆𑀣𑀥𑀫𑁆𑀫𑀲𑀳𑀺𑀢𑀁 [𑀅𑀢𑁆𑀣𑀥𑀫𑁆𑀫𑀲𑀁𑀳𑀺𑀢𑀁 (𑀓. 𑀲𑀻. 𑀧𑀻.), 𑀅𑀢𑁆𑀣𑀥𑀫𑁆𑀫𑀼𑀧𑀲𑀁𑀳𑀺𑀢𑀁 (𑀓.)] 𑀧𑀼𑀭𑁂 𑀕𑀺𑀭𑀁,

𑀏𑀭𑀬𑀁 𑀩𑀳𑀼𑀚𑀦𑀁 𑀦𑀺𑀤𑀁𑀲𑀬𑀺;

𑀧𑀸𑀡𑀺𑀦𑀁 𑀳𑀺𑀢𑀲𑀼𑀔𑀸𑀯𑀳𑁄 𑀅𑀳𑀼,

𑀥𑀫𑁆𑀫𑀬𑀸𑀕𑀫𑀬𑀚𑀻 [𑀥𑀫𑁆𑀫𑀬𑀸𑀕𑀁 𑀅𑀲𑁆𑀲𑀚𑀺 (𑀓.)] 𑀅𑀫𑀘𑁆𑀙𑀭𑀻.

‘‘𑀢𑁂𑀦 𑀲𑁄 𑀲𑀼𑀘𑀭𑀺𑀢𑁂𑀦 𑀓𑀫𑁆𑀫𑀼𑀦𑀸,

𑀲𑀼𑀕𑁆𑀕𑀢𑀺𑀁 𑀯𑀚𑀢𑀺 𑀢𑀢𑁆𑀣 𑀫𑁄𑀤𑀢𑀺;

𑀮𑀓𑁆𑀔𑀡𑀸𑀦𑀺 𑀘 𑀤𑀼𑀯𑁂 𑀇𑀥𑀸𑀕𑀢𑁄,

𑀉𑀢𑁆𑀢𑀫𑀧𑁆𑀧𑀫𑀼𑀔𑀢𑀸𑀬 [𑀉𑀢𑁆𑀢𑀫𑀲𑀼𑀔𑀢𑀸𑀬 (𑀲𑁆𑀬𑀸.), 𑀉𑀢𑁆𑀢𑀫𑀧𑀫𑀼𑀓𑁆𑀔𑀢𑀸𑀬 (𑀓.)] 𑀯𑀺𑀦𑁆𑀤𑀢𑀺.

‘‘𑀉𑀩𑁆𑀪𑀫𑀼𑀧𑁆𑀧𑀢𑀺𑀢𑀮𑁄𑀫𑀯𑀸 𑀲𑀲𑁄,

𑀧𑀸𑀤𑀕𑀡𑁆𑀞𑀺𑀭𑀳𑀼 𑀲𑀸𑀥𑀼𑀲𑀡𑁆𑀞𑀺𑀢𑀸;

𑀫𑀁𑀲𑀮𑁄𑀳𑀺𑀢𑀸𑀘𑀺𑀢𑀸 𑀢𑀘𑁄𑀢𑁆𑀣𑀢𑀸,

𑀉𑀧𑀭𑀺𑀘𑀭𑀡𑀲𑁄𑀪𑀦𑀸 [𑀉𑀧𑀭𑀺𑀚𑀸𑀦𑀼𑀲𑁄𑀪𑀦𑀸 (𑀲𑁆𑀬𑀸.), 𑀉𑀧𑀭𑀺 𑀘 𑀧𑀦 𑀲𑁄𑀪𑀦𑀸 (𑀲𑀻. 𑀧𑀻.)] 𑀅𑀳𑀼.

‘‘𑀕𑁂𑀳𑀫𑀸𑀯𑀲𑀢𑀺 𑀘𑁂 𑀢𑀣𑀸𑀯𑀺𑀥𑁄,

𑀅𑀕𑁆𑀕𑀢𑀁 𑀯𑀚𑀢𑀺 𑀓𑀸𑀫𑀪𑁄𑀕𑀺𑀦𑀁;

𑀢𑁂𑀦 𑀉𑀢𑁆𑀢𑀭𑀺𑀢𑀭𑁄 𑀦 𑀯𑀺𑀚𑁆𑀚𑀢𑀺,

𑀚𑀫𑁆𑀩𑀼𑀤𑀻𑀧𑀫𑀪𑀺𑀪𑀼𑀬𑁆𑀬 𑀇𑀭𑀺𑀬𑀢𑀺.

‘‘𑀧𑀩𑁆𑀩𑀚𑀫𑁆𑀧𑀺 𑀘 𑀅𑀦𑁄𑀫𑀦𑀺𑀓𑁆𑀓𑀫𑁄,

𑀅𑀕𑁆𑀕𑀢𑀁 𑀯𑀚𑀢𑀺 𑀲𑀩𑁆𑀩𑀧𑀸𑀡𑀺𑀦𑀁;

𑀢𑁂𑀦 𑀉𑀢𑁆𑀢𑀭𑀺𑀢𑀭𑁄 𑀦 𑀯𑀺𑀚𑁆𑀚𑀢𑀺,

𑀲𑀩𑁆𑀩𑀮𑁄𑀓𑀫𑀪𑀺𑀪𑀼𑀬𑁆𑀬 𑀯𑀺𑀳𑀭𑀢𑀻’’𑀢𑀺.

(𑁧𑁧) 𑀏𑀡𑀺𑀚𑀗𑁆𑀖𑀮𑀓𑁆𑀔𑀡𑀁

𑁨𑁧𑁪. ‘‘𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀧𑀼𑀭𑀺𑀫𑀁 𑀚𑀸𑀢𑀺𑀁 𑀧𑀼𑀭𑀺𑀫𑀁 𑀪𑀯𑀁 𑀧𑀼𑀭𑀺𑀫𑀁 𑀦𑀺𑀓𑁂𑀢𑀁 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑁄 𑀲𑀫𑀸𑀦𑁄 𑀲𑀓𑁆𑀓𑀘𑁆𑀘𑀁 𑀯𑀸𑀘𑁂𑀢𑀸 𑀅𑀳𑁄𑀲𑀺 𑀲𑀺𑀧𑁆𑀧𑀁 𑀯𑀸 𑀯𑀺𑀚𑁆𑀚𑀁 𑀯𑀸 𑀘𑀭𑀡𑀁 𑀯𑀸 𑀓𑀫𑁆𑀫𑀁 𑀯𑀸 𑁋 ‘𑀓𑀺𑀁 𑀢𑀺𑀫𑁂 𑀔𑀺𑀧𑁆𑀧𑀁 𑀯𑀺𑀚𑀸𑀦𑁂𑀬𑁆𑀬𑀼𑀁, 𑀔𑀺𑀧𑁆𑀧𑀁 𑀧𑀝𑀺𑀧𑀚𑁆𑀚𑁂𑀬𑁆𑀬𑀼𑀁, 𑀦 𑀘𑀺𑀭𑀁 𑀓𑀺𑀮𑀺𑀲𑁆𑀲𑁂𑀬𑁆𑀬𑀼’’𑀦𑁆𑀢𑀺. 𑀲𑁄 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀓𑀝𑀢𑁆𑀢𑀸…𑀧𑁂… 𑀲𑁄 𑀢𑀢𑁄 𑀘𑀼𑀢𑁄 𑀇𑀢𑁆𑀣𑀢𑁆𑀢𑀁 𑀆𑀕𑀢𑁄 𑀲𑀫𑀸𑀦𑁄 𑀇𑀫𑀁 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀁 𑀧𑀝𑀺𑀮𑀪𑀢𑀺. 𑀏𑀡𑀺𑀚𑀗𑁆𑀖𑁄 𑀳𑁄𑀢𑀺.

‘‘𑀲𑁄 𑀢𑁂𑀦 𑀮𑀓𑁆𑀔𑀡𑁂𑀦 𑀲𑀫𑀦𑁆𑀦𑀸𑀕𑀢𑁄 𑀲𑀘𑁂 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺, 𑀭𑀸𑀚𑀸 𑀳𑁄𑀢𑀺 𑀘𑀓𑁆𑀓𑀯𑀢𑁆𑀢𑀻…𑀧𑁂… 𑀭𑀸𑀚𑀸 𑀲𑀫𑀸𑀦𑁄 𑀓𑀺𑀁 𑀮𑀪𑀢𑀺? 𑀬𑀸𑀦𑀺 𑀢𑀸𑀦𑀺 𑀭𑀸𑀚𑀸𑀭𑀳𑀸𑀦𑀺 𑀭𑀸𑀚𑀗𑁆𑀕𑀸𑀦𑀺 𑀭𑀸𑀚𑀽𑀧𑀪𑁄𑀕𑀸𑀦𑀺 𑀭𑀸𑀚𑀸𑀦𑀼𑀘𑁆𑀙𑀯𑀺𑀓𑀸𑀦𑀺 𑀢𑀸𑀦𑀺 𑀔𑀺𑀧𑁆𑀧𑀁 𑀧𑀝𑀺𑀮𑀪𑀢𑀺. 𑀭𑀸𑀚𑀸 𑀲𑀫𑀸𑀦𑁄 𑀇𑀤𑀁 𑀮𑀪𑀢𑀺… 𑀩𑀼𑀤𑁆𑀥𑁄 𑀲𑀫𑀸𑀦𑁄 𑀓𑀺𑀁 𑀮𑀪𑀢𑀺? 𑀬𑀸𑀦𑀺 𑀢𑀸𑀦𑀺 𑀲𑀫𑀡𑀸𑀭𑀳𑀸𑀦𑀺 𑀲𑀫𑀡𑀗𑁆𑀕𑀸𑀦𑀺 𑀲𑀫𑀡𑀽𑀧𑀪𑁄𑀕𑀸𑀦𑀺 𑀲𑀫𑀡𑀸𑀦𑀼𑀘𑁆𑀙𑀯𑀺𑀓𑀸𑀦𑀺, 𑀢𑀸𑀦𑀺 𑀔𑀺𑀧𑁆𑀧𑀁 𑀧𑀝𑀺𑀮𑀪𑀢𑀺. 𑀩𑀼𑀤𑁆𑀥𑁄 𑀲𑀫𑀸𑀦𑁄 𑀇𑀤𑀁 𑀮𑀪𑀢𑀺’’. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘.

𑁨𑁧𑁫. 𑀢𑀢𑁆𑀣𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀲𑀺𑀧𑁆𑀧𑁂𑀲𑀼 𑀯𑀺𑀚𑁆𑀚𑀸𑀘𑀭𑀡𑁂𑀲𑀼 𑀓𑀫𑁆𑀫𑁂𑀲𑀼 [𑀓𑀫𑁆𑀫𑀲𑀼 (𑀲𑀻. 𑀧𑀻.)],

𑀓𑀣𑀁 𑀯𑀺𑀚𑀸𑀦𑁂𑀬𑁆𑀬𑀼𑀁 [𑀯𑀺𑀚𑀸𑀦𑁂𑀬𑁆𑀬 (𑀲𑀻. 𑀧𑀻.), 𑀯𑀺𑀚𑀸𑀦𑁂𑀬𑁆𑀬𑀼 (𑀲𑁆𑀬𑀸.)] 𑀮𑀳𑀼𑀦𑁆𑀢𑀺 𑀇𑀘𑁆𑀙𑀢𑀺;

𑀬𑀤𑀽𑀧𑀖𑀸𑀢𑀸𑀬 𑀦 𑀳𑁄𑀢𑀺 𑀓𑀲𑁆𑀲𑀘𑀺,

𑀯𑀸𑀘𑁂𑀢𑀺 𑀔𑀺𑀧𑁆𑀧𑀁 𑀦 𑀘𑀺𑀭𑀁 𑀓𑀺𑀮𑀺𑀲𑁆𑀲𑀢𑀺.