𑁮. 𑀲𑀺𑀗𑁆𑀕𑀸𑀮𑀲𑀼𑀢𑁆𑀢𑀁

𑁨𑁪𑁨. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀺𑀗𑁆𑀕𑀸𑀮𑀓𑁄 [𑀲𑀺𑀕𑀸𑀮𑀓𑁄 (𑀲𑀻.)] 𑀕𑀳𑀧𑀢𑀺𑀧𑀼𑀢𑁆𑀢𑁄 𑀓𑀸𑀮𑀲𑁆𑀲𑁂𑀯 𑀉𑀝𑁆𑀞𑀸𑀬 𑀭𑀸𑀚𑀕𑀳𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀮𑁆𑀮𑀯𑀢𑁆𑀣𑁄 𑀅𑀮𑁆𑀮𑀓𑁂𑀲𑁄 𑀧𑀜𑁆𑀚𑀮𑀺𑀓𑁄 𑀧𑀼𑀣𑀼𑀤𑀺𑀲𑀸 [𑀧𑀼𑀣𑀼𑀤𑁆𑀤𑀺𑀲𑀸 (𑀲𑀻. 𑀲𑁆𑀬𑀸. 𑀧𑀻.)] 𑀦𑀫𑀲𑁆𑀲𑀢𑀺 𑁋 𑀧𑀼𑀭𑀢𑁆𑀣𑀺𑀫𑀁 𑀤𑀺𑀲𑀁 𑀤𑀓𑁆𑀔𑀺𑀡𑀁 𑀤𑀺𑀲𑀁 𑀧𑀘𑁆𑀙𑀺𑀫𑀁 𑀤𑀺𑀲𑀁 𑀉𑀢𑁆𑀢𑀭𑀁 𑀤𑀺𑀲𑀁 𑀳𑁂𑀝𑁆𑀞𑀺𑀫𑀁 𑀤𑀺𑀲𑀁 𑀉𑀧𑀭𑀺𑀫𑀁 𑀤𑀺𑀲𑀁.

𑁨𑁪𑁩. 𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀭𑀸𑀚𑀕𑀳𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀲𑀺𑀗𑁆𑀕𑀸𑀮𑀓𑀁 𑀕𑀳𑀧𑀢𑀺𑀧𑀼𑀢𑁆𑀢𑀁 𑀓𑀸𑀮𑀲𑁆𑀲𑁂𑀯 𑀯𑀼𑀝𑁆𑀞𑀸𑀬 𑀭𑀸𑀚𑀕𑀳𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀮𑁆𑀮𑀯𑀢𑁆𑀣𑀁 𑀅𑀮𑁆𑀮𑀓𑁂𑀲𑀁 𑀧𑀜𑁆𑀚𑀮𑀺𑀓𑀁 𑀧𑀼𑀣𑀼𑀤𑀺𑀲𑀸 𑀦𑀫𑀲𑁆𑀲𑀦𑁆𑀢𑀁 𑁋 𑀧𑀼𑀭𑀢𑁆𑀣𑀺𑀫𑀁 𑀤𑀺𑀲𑀁 𑀤𑀓𑁆𑀔𑀺𑀡𑀁 𑀤𑀺𑀲𑀁 𑀧𑀘𑁆𑀙𑀺𑀫𑀁 𑀤𑀺𑀲𑀁 𑀉𑀢𑁆𑀢𑀭𑀁 𑀤𑀺𑀲𑀁 𑀳𑁂𑀝𑁆𑀞𑀺𑀫𑀁 𑀤𑀺𑀲𑀁 𑀉𑀧𑀭𑀺𑀫𑀁 𑀤𑀺𑀲𑀁. 𑀤𑀺𑀲𑁆𑀯𑀸 𑀲𑀺𑀗𑁆𑀕𑀸𑀮𑀓𑀁 𑀕𑀳𑀧𑀢𑀺𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀁 𑀦𑀼 𑀔𑁄 𑀢𑁆𑀯𑀁, 𑀕𑀳𑀧𑀢𑀺𑀧𑀼𑀢𑁆𑀢, 𑀓𑀸𑀮𑀲𑁆𑀲𑁂𑀯 𑀉𑀝𑁆𑀞𑀸𑀬 𑀭𑀸𑀚𑀕𑀳𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀮𑁆𑀮𑀯𑀢𑁆𑀣𑁄 𑀅𑀮𑁆𑀮𑀓𑁂𑀲𑁄 𑀧𑀜𑁆𑀚𑀮𑀺𑀓𑁄 𑀧𑀼𑀣𑀼𑀤𑀺𑀲𑀸 𑀦𑀫𑀲𑁆𑀲𑀲𑀺 𑁋 𑀧𑀼𑀭𑀢𑁆𑀣𑀺𑀫𑀁 𑀤𑀺𑀲𑀁 𑀤𑀓𑁆𑀔𑀺𑀡𑀁 𑀤𑀺𑀲𑀁 𑀧𑀘𑁆𑀙𑀺𑀫𑀁 𑀤𑀺𑀲𑀁 𑀉𑀢𑁆𑀢𑀭𑀁 𑀤𑀺𑀲𑀁 𑀳𑁂𑀝𑁆𑀞𑀺𑀫𑀁 𑀤𑀺𑀲𑀁 𑀉𑀧𑀭𑀺𑀫𑀁 𑀤𑀺𑀲’’𑀦𑁆𑀢𑀺? ‘‘𑀧𑀺𑀢𑀸 𑀫𑀁, 𑀪𑀦𑁆𑀢𑁂, 𑀓𑀸𑀮𑀁 𑀓𑀭𑁄𑀦𑁆𑀢𑁄 𑀏𑀯𑀁 𑀅𑀯𑀘 𑁋 ‘𑀤𑀺𑀲𑀸, 𑀢𑀸𑀢, 𑀦𑀫𑀲𑁆𑀲𑁂𑀬𑁆𑀬𑀸𑀲𑀻’𑀢𑀺. 𑀲𑁄 𑀔𑁄 𑀅𑀳𑀁, 𑀪𑀦𑁆𑀢𑁂, 𑀧𑀺𑀢𑀼𑀯𑀘𑀦𑀁 𑀲𑀓𑁆𑀓𑀭𑁄𑀦𑁆𑀢𑁄 𑀕𑀭𑀼𑀁 𑀓𑀭𑁄𑀦𑁆𑀢𑁄 𑀫𑀸𑀦𑁂𑀦𑁆𑀢𑁄 𑀧𑀽𑀚𑁂𑀦𑁆𑀢𑁄 𑀓𑀸𑀮𑀲𑁆𑀲𑁂𑀯 𑀉𑀝𑁆𑀞𑀸𑀬 𑀭𑀸𑀚𑀕𑀳𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀮𑁆𑀮𑀯𑀢𑁆𑀣𑁄 𑀅𑀮𑁆𑀮𑀓𑁂𑀲𑁄 𑀧𑀜𑁆𑀚𑀮𑀺𑀓𑁄 𑀧𑀼𑀣𑀼𑀤𑀺𑀲𑀸 𑀦𑀫𑀲𑁆𑀲𑀸𑀫𑀺 𑁋 𑀧𑀼𑀭𑀢𑁆𑀣𑀺𑀫𑀁 𑀤𑀺𑀲𑀁 𑀤𑀓𑁆𑀔𑀺𑀡𑀁 𑀤𑀺𑀲𑀁 𑀧𑀘𑁆𑀙𑀺𑀫𑀁 𑀤𑀺𑀲𑀁 𑀉𑀢𑁆𑀢𑀭𑀁 𑀤𑀺𑀲𑀁 𑀳𑁂𑀝𑁆𑀞𑀺𑀫𑀁 𑀤𑀺𑀲𑀁 𑀉𑀧𑀭𑀺𑀫𑀁 𑀤𑀺𑀲’’𑀦𑁆𑀢𑀺.

𑀙 𑀤𑀺𑀲𑀸

𑁨𑁪𑁪. ‘‘𑀦 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀏𑀯𑀁 𑀙 𑀤𑀺𑀲𑀸 [𑀙𑀤𑁆𑀤𑀺𑀲𑀸 (𑀲𑀻. 𑀧𑀻.)] 𑀦𑀫𑀲𑁆𑀲𑀺𑀢𑀩𑁆𑀩𑀸’’𑀢𑀺. ‘‘𑀬𑀣𑀸 𑀓𑀣𑀁 𑀧𑀦, 𑀪𑀦𑁆𑀢𑁂, 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀙 𑀤𑀺𑀲𑀸 [𑀙𑀤𑁆𑀤𑀺𑀲𑀸 (𑀲𑀻. 𑀧𑀻.)] 𑀦𑀫𑀲𑁆𑀲𑀺𑀢𑀩𑁆𑀩𑀸? 𑀲𑀸𑀥𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀢𑀣𑀸 𑀥𑀫𑁆𑀫𑀁 𑀤𑁂𑀲𑁂𑀢𑀼, 𑀬𑀣𑀸 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀙 𑀤𑀺𑀲𑀸 [𑀙𑀤𑁆𑀤𑀺𑀲𑀸 (𑀲𑀻. 𑀧𑀻.)] 𑀦𑀫𑀲𑁆𑀲𑀺𑀢𑀩𑁆𑀩𑀸’’𑀢𑀺.

‘‘𑀢𑁂𑀦 𑀳𑀺, 𑀕𑀳𑀧𑀢𑀺𑀧𑀼𑀢𑁆𑀢 𑀲𑀼𑀡𑁄𑀳𑀺 𑀲𑀸𑀥𑀼𑀓𑀁 𑀫𑀦𑀲𑀺𑀓𑀭𑁄𑀳𑀺 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀲𑀺𑀗𑁆𑀕𑀸𑀮𑀓𑁄 𑀕𑀳𑀧𑀢𑀺𑀧𑀼𑀢𑁆𑀢𑁄 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀺. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀬𑀢𑁄 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀅𑀭𑀺𑀬𑀲𑀸𑀯𑀓𑀲𑁆𑀲 𑀘𑀢𑁆𑀢𑀸𑀭𑁄 𑀓𑀫𑁆𑀫𑀓𑀺𑀮𑁂𑀲𑀸 𑀧𑀳𑀻𑀦𑀸 𑀳𑁄𑀦𑁆𑀢𑀺, 𑀘𑀢𑀽𑀳𑀺 𑀘 𑀞𑀸𑀦𑁂𑀳𑀺 𑀧𑀸𑀧𑀓𑀫𑁆𑀫𑀁 𑀦 𑀓𑀭𑁄𑀢𑀺, 𑀙 𑀘 𑀪𑁄𑀕𑀸𑀦𑀁 𑀅𑀧𑀸𑀬𑀫𑀼𑀔𑀸𑀦𑀺 𑀦 𑀲𑁂𑀯𑀢𑀺, 𑀲𑁄 𑀏𑀯𑀁 𑀘𑀼𑀤𑁆𑀤𑀲 𑀧𑀸𑀧𑀓𑀸𑀧𑀕𑀢𑁄 𑀙𑀤𑁆𑀤𑀺𑀲𑀸𑀧𑀝𑀺𑀘𑁆𑀙𑀸𑀤𑀻 [𑀧𑀝𑀺𑀘𑁆𑀙𑀸𑀤𑀻 𑀳𑁄𑀢𑀺 (𑀲𑁆𑀬𑀸.)] 𑀉𑀪𑁄𑀮𑁄𑀓𑀯𑀺𑀚𑀬𑀸𑀬 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺. 𑀢𑀲𑁆𑀲 𑀅𑀬𑀜𑁆𑀘𑁂𑀯 𑀮𑁄𑀓𑁄 𑀆𑀭𑀤𑁆𑀥𑁄 𑀳𑁄𑀢𑀺 𑀧𑀭𑁄 𑀘 𑀮𑁄𑀓𑁄. 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺.

𑀘𑀢𑁆𑀢𑀸𑀭𑁄𑀓𑀫𑁆𑀫𑀓𑀺𑀮𑁂𑀲𑀸

𑁨𑁪𑁫. ‘‘𑀓𑀢𑀫𑀲𑁆𑀲 𑀘𑀢𑁆𑀢𑀸𑀭𑁄 𑀓𑀫𑁆𑀫𑀓𑀺𑀮𑁂𑀲𑀸 𑀧𑀳𑀻𑀦𑀸 𑀳𑁄𑀦𑁆𑀢𑀺? 𑀧𑀸𑀡𑀸𑀢𑀺𑀧𑀸𑀢𑁄 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀓𑀫𑁆𑀫𑀓𑀺𑀮𑁂𑀲𑁄, 𑀅𑀤𑀺𑀦𑁆𑀦𑀸𑀤𑀸𑀦𑀁 𑀓𑀫𑁆𑀫𑀓𑀺𑀮𑁂𑀲𑁄, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑁄 𑀓𑀫𑁆𑀫𑀓𑀺𑀮𑁂𑀲𑁄, 𑀫𑀼𑀲𑀸𑀯𑀸𑀤𑁄 𑀓𑀫𑁆𑀫𑀓𑀺𑀮𑁂𑀲𑁄. 𑀇𑀫𑀲𑁆𑀲 𑀘𑀢𑁆𑀢𑀸𑀭𑁄 𑀓𑀫𑁆𑀫𑀓𑀺𑀮𑁂𑀲𑀸 𑀧𑀳𑀻𑀦𑀸 𑀳𑁄𑀦𑁆𑀢𑀻’’𑀢𑀺. 𑀇𑀤𑀫𑀯𑁄𑀘 𑀪𑀕𑀯𑀸, 𑀇𑀤𑀁 𑀯𑀢𑁆𑀯𑀸𑀦 [𑀇𑀤𑀁 𑀯𑀢𑁆𑀯𑀸 (𑀲𑀻. 𑀧𑀻.) 𑀏𑀯𑀫𑀻𑀤𑀺𑀲𑁂𑀲𑀼 𑀞𑀸𑀦𑁂𑀲𑀼] 𑀲𑀼𑀕𑀢𑁄 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑀲𑀢𑁆𑀣𑀸 𑁋

‘‘𑀧𑀸𑀡𑀸𑀢𑀺𑀧𑀸𑀢𑁄 𑀅𑀤𑀺𑀦𑁆𑀦𑀸𑀤𑀸𑀦𑀁, 𑀫𑀼𑀲𑀸𑀯𑀸𑀤𑁄 𑀘 𑀯𑀼𑀘𑁆𑀘𑀢𑀺;

𑀧𑀭𑀤𑀸𑀭𑀕𑀫𑀦𑀜𑁆𑀘𑁂𑀯, 𑀦𑀧𑁆𑀧𑀲𑀁𑀲𑀦𑁆𑀢𑀺 𑀧𑀡𑁆𑀟𑀺𑀢𑀸’’𑀢𑀺.

𑀘𑀢𑀼𑀝𑁆𑀞𑀸𑀦𑀁

𑁨𑁪𑁬. ‘‘𑀓𑀢𑀫𑁂𑀳𑀺 𑀘𑀢𑀽𑀳𑀺 𑀞𑀸𑀦𑁂𑀳𑀺 𑀧𑀸𑀧𑀓𑀫𑁆𑀫𑀁 𑀦 𑀓𑀭𑁄𑀢𑀺? 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀦𑁆𑀢𑁄 𑀧𑀸𑀧𑀓𑀫𑁆𑀫𑀁 𑀓𑀭𑁄𑀢𑀺, 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀦𑁆𑀢𑁄 𑀧𑀸𑀧𑀓𑀫𑁆𑀫𑀁 𑀓𑀭𑁄𑀢𑀺, 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀦𑁆𑀢𑁄 𑀧𑀸𑀧𑀓𑀫𑁆𑀫𑀁 𑀓𑀭𑁄𑀢𑀺, 𑀪𑀬𑀸𑀕𑀢𑀺𑀁 𑀕𑀘𑁆𑀙𑀦𑁆𑀢𑁄 𑀧𑀸𑀧𑀓𑀫𑁆𑀫𑀁 𑀓𑀭𑁄𑀢𑀺. 𑀬𑀢𑁄 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀅𑀭𑀺𑀬𑀲𑀸𑀯𑀓𑁄 𑀦𑁂𑀯 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺; 𑀇𑀫𑁂𑀳𑀺 𑀘𑀢𑀽𑀳𑀺 𑀞𑀸𑀦𑁂𑀳𑀺 𑀧𑀸𑀧𑀓𑀫𑁆𑀫𑀁 𑀦 𑀓𑀭𑁄𑀢𑀻’’𑀢𑀺. 𑀇𑀤𑀫𑀯𑁄𑀘 𑀪𑀕𑀯𑀸, 𑀇𑀤𑀁 𑀯𑀢𑁆𑀯𑀸𑀦 𑀲𑀼𑀕𑀢𑁄 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑀲𑀢𑁆𑀣𑀸 𑁋

‘‘𑀙𑀦𑁆𑀤𑀸 𑀤𑁄𑀲𑀸 𑀪𑀬𑀸 𑀫𑁄𑀳𑀸, 𑀬𑁄 𑀥𑀫𑁆𑀫𑀁 𑀅𑀢𑀺𑀯𑀢𑁆𑀢𑀢𑀺;

𑀦𑀺𑀳𑀻𑀬𑀢𑀺 𑀬𑀲𑁄 𑀢𑀲𑁆𑀲 [𑀢𑀲𑁆𑀲 𑀬𑁂𑀲𑁄 (𑀩𑀳𑀽𑀲𑀼, 𑀯𑀺𑀦𑀬𑁂𑀧𑀺)], 𑀓𑀸𑀴𑀧𑀓𑁆𑀔𑁂𑀯 𑀘𑀦𑁆𑀤𑀺𑀫𑀸.

‘‘𑀙𑀦𑁆𑀤𑀸 𑀤𑁄𑀲𑀸 𑀪𑀬𑀸 𑀫𑁄𑀳𑀸, 𑀬𑁄 𑀥𑀫𑁆𑀫𑀁 𑀦𑀸𑀢𑀺𑀯𑀢𑁆𑀢𑀢𑀺;

𑀆𑀧𑀽𑀭𑀢𑀺 𑀬𑀲𑁄 𑀢𑀲𑁆𑀲 [𑀢𑀲𑁆𑀲 𑀬𑁂𑀲𑁄 (𑀩𑀳𑀽𑀲𑀼, 𑀯𑀺𑀦𑀬𑁂𑀧𑀺)], 𑀲𑀼𑀓𑁆𑀓𑀧𑀓𑁆𑀔𑁂𑀯 [𑀚𑀼𑀡𑁆𑀳𑀧𑀓𑁆𑀔𑁂𑀯 (𑀓.)] 𑀘𑀦𑁆𑀤𑀺𑀫𑀸’’𑀢𑀺.

𑀙 𑀅𑀧𑀸𑀬𑀫𑀼𑀔𑀸𑀦𑀺

𑁨𑁪𑁭. ‘‘𑀓𑀢𑀫𑀸𑀦𑀺 𑀙 𑀪𑁄𑀕𑀸𑀦𑀁 𑀅𑀧𑀸𑀬𑀫𑀼𑀔𑀸𑀦𑀺 𑀦 𑀲𑁂𑀯𑀢𑀺? 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑁆𑀧𑀫𑀸𑀤𑀝𑁆𑀞𑀸𑀦𑀸𑀦𑀼𑀬𑁄𑀕𑁄 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀪𑁄𑀕𑀸𑀦𑀁 𑀅𑀧𑀸𑀬𑀫𑀼𑀔𑀁, 𑀯𑀺𑀓𑀸𑀮𑀯𑀺𑀲𑀺𑀔𑀸𑀘𑀭𑀺𑀬𑀸𑀦𑀼𑀬𑁄𑀕𑁄 𑀪𑁄𑀕𑀸𑀦𑀁 𑀅𑀧𑀸𑀬𑀫𑀼𑀔𑀁, 𑀲𑀫𑀚𑁆𑀚𑀸𑀪𑀺𑀘𑀭𑀡𑀁 𑀪𑁄𑀕𑀸𑀦𑀁 𑀅𑀧𑀸𑀬𑀫𑀼𑀔𑀁, 𑀚𑀽𑀢𑀧𑁆𑀧𑀫𑀸𑀤𑀝𑁆𑀞𑀸𑀦𑀸𑀦𑀼𑀬𑁄𑀕𑁄 𑀪𑁄𑀕𑀸𑀦𑀁 𑀅𑀧𑀸𑀬𑀫𑀼𑀔𑀁, 𑀧𑀸𑀧𑀫𑀺𑀢𑁆𑀢𑀸𑀦𑀼𑀬𑁄𑀕𑁄 𑀪𑁄𑀕𑀸𑀦𑀁 𑀅𑀧𑀸𑀬𑀫𑀼𑀔𑀁, 𑀆𑀮𑀲𑁆𑀬𑀸𑀦𑀼𑀬𑁄𑀕𑁄 [𑀆𑀮𑀲𑀸𑀦𑀼𑀬𑁄𑀕𑁄 (𑀲𑀻. 𑀲𑁆𑀬𑀸. 𑀧𑀻.)] 𑀪𑁄𑀕𑀸𑀦𑀁 𑀅𑀧𑀸𑀬𑀫𑀼𑀔𑀁.

𑀲𑀼𑀭𑀸𑀫𑁂𑀭𑀬𑀲𑁆𑀲 𑀙 𑀆𑀤𑀻𑀦𑀯𑀸

𑁨𑁪𑁮. ‘‘𑀙 𑀔𑁄𑀫𑁂, 𑀕𑀳𑀧𑀢𑀺𑀧𑀼𑀢𑁆𑀢, 𑀆𑀤𑀻𑀦𑀯𑀸 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑁆𑀧𑀫𑀸𑀤𑀝𑁆𑀞𑀸𑀦𑀸𑀦𑀼𑀬𑁄𑀕𑁂. 𑀲𑀦𑁆𑀤𑀺𑀝𑁆𑀞𑀺𑀓𑀸 𑀥𑀦𑀚𑀸𑀦𑀺 [𑀥𑀦𑀜𑁆𑀚𑀸𑀦𑀺 (𑀲𑀻. 𑀧𑀻.)], 𑀓𑀮𑀳𑀧𑁆𑀧𑀯𑀟𑁆𑀠𑀦𑀻, 𑀭𑁄𑀕𑀸𑀦𑀁 𑀆𑀬𑀢𑀦𑀁, 𑀅𑀓𑀺𑀢𑁆𑀢𑀺𑀲𑀜𑁆𑀚𑀦𑀦𑀻, 𑀓𑁄𑀧𑀻𑀦𑀦𑀺𑀤𑀁𑀲𑀦𑀻, 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀺𑀓𑀭𑀡𑀻𑀢𑁆𑀯𑁂𑀯 𑀙𑀝𑁆𑀞𑀁 𑀧𑀤𑀁 𑀪𑀯𑀢𑀺. 𑀇𑀫𑁂 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀙 𑀆𑀤𑀻𑀦𑀯𑀸 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑁆𑀧𑀫𑀸𑀤𑀝𑁆𑀞𑀸𑀦𑀸𑀦𑀼𑀬𑁄𑀕𑁂.

𑀯𑀺𑀓𑀸𑀮𑀘𑀭𑀺𑀬𑀸𑀬 𑀙 𑀆𑀤𑀻𑀦𑀯𑀸

𑁨𑁪𑁯. ‘‘𑀙 𑀔𑁄𑀫𑁂, 𑀕𑀳𑀧𑀢𑀺𑀧𑀼𑀢𑁆𑀢, 𑀆𑀤𑀻𑀦𑀯𑀸 𑀯𑀺𑀓𑀸𑀮𑀯𑀺𑀲𑀺𑀔𑀸𑀘𑀭𑀺𑀬𑀸𑀦𑀼𑀬𑁄𑀕𑁂. 𑀅𑀢𑁆𑀢𑀸𑀧𑀺𑀲𑁆𑀲 𑀅𑀕𑀼𑀢𑁆𑀢𑁄 𑀅𑀭𑀓𑁆𑀔𑀺𑀢𑁄 𑀳𑁄𑀢𑀺, 𑀧𑀼𑀢𑁆𑀢𑀤𑀸𑀭𑁄𑀧𑀺𑀲𑁆𑀲 𑀅𑀕𑀼𑀢𑁆𑀢𑁄 𑀅𑀭𑀓𑁆𑀔𑀺𑀢𑁄 𑀳𑁄𑀢𑀺, 𑀲𑀸𑀧𑀢𑁂𑀬𑁆𑀬𑀁𑀧𑀺𑀲𑁆𑀲 𑀅𑀕𑀼𑀢𑁆𑀢𑀁 𑀅𑀭𑀓𑁆𑀔𑀺𑀢𑀁 𑀳𑁄𑀢𑀺, 𑀲𑀗𑁆𑀓𑀺𑀬𑁄 𑀘 𑀳𑁄𑀢𑀺 𑀧𑀸𑀧𑀓𑁂𑀲𑀼 𑀞𑀸𑀦𑁂𑀲𑀼 [𑀢𑁂𑀲𑀼 𑀢𑁂𑀲𑀼 𑀞𑀸𑀦𑁂𑀲𑀼 (𑀲𑁆𑀬𑀸.)], 𑀅𑀪𑀽𑀢𑀯𑀘𑀦𑀜𑁆𑀘 𑀢𑀲𑁆𑀫𑀺𑀁 𑀭𑀽𑀳𑀢𑀺, 𑀩𑀳𑀽𑀦𑀜𑁆𑀘 𑀤𑀼𑀓𑁆𑀔𑀥𑀫𑁆𑀫𑀸𑀦𑀁 𑀧𑀼𑀭𑀓𑁆𑀔𑀢𑁄 𑀳𑁄𑀢𑀺. 𑀇𑀫𑁂 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀙 𑀆𑀤𑀻𑀦𑀯𑀸 𑀯𑀺𑀓𑀸𑀮𑀯𑀺𑀲𑀺𑀔𑀸𑀘𑀭𑀺𑀬𑀸𑀦𑀼𑀬𑁄𑀕𑁂.

𑀲𑀫𑀚𑁆𑀚𑀸𑀪𑀺𑀘𑀭𑀡𑀲𑁆𑀲 𑀙 𑀆𑀤𑀻𑀦𑀯𑀸

𑁨𑁫𑁦. ‘‘𑀙 𑀔𑁄𑀫𑁂, 𑀕𑀳𑀧𑀢𑀺𑀧𑀼𑀢𑁆𑀢, 𑀆𑀤𑀻𑀦𑀯𑀸 𑀲𑀫𑀚𑁆𑀚𑀸𑀪𑀺𑀘𑀭𑀡𑁂. 𑀓𑁆𑀯 [𑀓𑀼𑀯𑀁 (𑀓. 𑀲𑀻. 𑀧𑀻.)] 𑀦𑀘𑁆𑀘𑀁, 𑀓𑁆𑀯 𑀕𑀻𑀢𑀁, 𑀓𑁆𑀯 𑀯𑀸𑀤𑀺𑀢𑀁, 𑀓𑁆𑀯 𑀅𑀓𑁆𑀔𑀸𑀦𑀁, 𑀓𑁆𑀯 𑀧𑀸𑀡𑀺𑀲𑁆𑀲𑀭𑀁, 𑀓𑁆𑀯 𑀓𑀼𑀫𑁆𑀪𑀣𑀼𑀦𑀦𑁆𑀢𑀺. 𑀇𑀫𑁂 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀙 𑀆𑀤𑀻𑀦𑀯𑀸 𑀲𑀫𑀚𑁆𑀚𑀸𑀪𑀺𑀘𑀭𑀡𑁂.

𑀚𑀽𑀢𑀧𑁆𑀧𑀫𑀸𑀤𑀲𑁆𑀲 𑀙 𑀆𑀤𑀻𑀦𑀯𑀸

𑁨𑁫𑁧. ‘‘𑀙 𑀔𑁄𑀫𑁂, 𑀕𑀳𑀧𑀢𑀺𑀧𑀼𑀢𑁆𑀢, 𑀆𑀤𑀻𑀦𑀯𑀸 𑀚𑀽𑀢𑀧𑁆𑀧𑀫𑀸𑀤𑀝𑁆𑀞𑀸𑀦𑀸𑀦𑀼𑀬𑁄𑀕𑁂. 𑀚𑀬𑀁 𑀯𑁂𑀭𑀁 𑀧𑀲𑀯𑀢𑀺, 𑀚𑀺𑀦𑁄 𑀯𑀺𑀢𑁆𑀢𑀫𑀦𑀼𑀲𑁄𑀘𑀢𑀺, 𑀲𑀦𑁆𑀤𑀺𑀝𑁆𑀞𑀺𑀓𑀸 𑀥𑀦𑀚𑀸𑀦𑀺, 𑀲𑀪𑀸𑀕𑀢𑀲𑁆𑀲 [𑀲𑀪𑀸𑀬𑁂 𑀢𑀲𑁆𑀲 (𑀓.)] 𑀯𑀘𑀦𑀁 𑀦 𑀭𑀽𑀳𑀢𑀺, 𑀫𑀺𑀢𑁆𑀢𑀸𑀫𑀘𑁆𑀘𑀸𑀦𑀁 𑀧𑀭𑀺𑀪𑀽𑀢𑁄 𑀳𑁄𑀢𑀺, 𑀆𑀯𑀸𑀳𑀯𑀺𑀯𑀸𑀳𑀓𑀸𑀦𑀁 𑀅𑀧𑀢𑁆𑀣𑀺𑀢𑁄 𑀳𑁄𑀢𑀺 𑁋 ‘𑀅𑀓𑁆𑀔𑀥𑀼𑀢𑁆𑀢𑁄 𑀅𑀬𑀁 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀦𑀸𑀮𑀁 𑀤𑀸𑀭𑀪𑀭𑀡𑀸𑀬𑀸’𑀢𑀺. 𑀇𑀫𑁂 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀙 𑀆𑀤𑀻𑀦𑀯𑀸 𑀚𑀽𑀢𑀧𑁆𑀧𑀫𑀸𑀤𑀝𑁆𑀞𑀸𑀦𑀸𑀦𑀼𑀬𑁄𑀕𑁂.

𑀧𑀸𑀧𑀫𑀺𑀢𑁆𑀢𑀢𑀸𑀬 𑀙 𑀆𑀤𑀻𑀦𑀯𑀸

𑁨𑁫𑁨. ‘‘𑀙 𑀔𑁄𑀫𑁂, 𑀕𑀳𑀧𑀢𑀺𑀧𑀼𑀢𑁆𑀢, 𑀆𑀤𑀻𑀦𑀯𑀸 𑀧𑀸𑀧𑀫𑀺𑀢𑁆𑀢𑀸𑀦𑀼𑀬𑁄𑀕𑁂. 𑀬𑁂 𑀥𑀼𑀢𑁆𑀢𑀸, 𑀬𑁂 𑀲𑁄𑀡𑁆𑀟𑀸, 𑀬𑁂 𑀧𑀺𑀧𑀸𑀲𑀸, 𑀬𑁂 𑀦𑁂𑀓𑀢𑀺𑀓𑀸, 𑀬𑁂 𑀯𑀜𑁆𑀘𑀦𑀺𑀓𑀸, 𑀬𑁂 𑀲𑀸𑀳𑀲𑀺𑀓𑀸. 𑀢𑁆𑀬𑀸𑀲𑁆𑀲 𑀫𑀺𑀢𑁆𑀢𑀸 𑀳𑁄𑀦𑁆𑀢𑀺 𑀢𑁂 𑀲𑀳𑀸𑀬𑀸. 𑀇𑀫𑁂 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀙 𑀆𑀤𑀻𑀦𑀯𑀸 𑀧𑀸𑀧𑀫𑀺𑀢𑁆𑀢𑀸𑀦𑀼𑀬𑁄𑀕𑁂.

𑀆𑀮𑀲𑁆𑀬𑀲𑁆𑀲 𑀙 𑀆𑀤𑀻𑀦𑀯𑀸

𑁨𑁫𑁩. ‘‘𑀙 𑀔𑁄𑀫𑁂, 𑀕𑀳𑀧𑀢𑀺𑀧𑀼𑀢𑁆𑀢, 𑀆𑀤𑀻𑀦𑀯𑀸 𑀆𑀮𑀲𑁆𑀬𑀸𑀦𑀼𑀬𑁄𑀕𑁂. 𑀅𑀢𑀺𑀲𑀻𑀢𑀦𑁆𑀢𑀺 𑀓𑀫𑁆𑀫𑀁 𑀦 𑀓𑀭𑁄𑀢𑀺, 𑀅𑀢𑀺𑀉𑀡𑁆𑀳𑀦𑁆𑀢𑀺 𑀓𑀫𑁆𑀫𑀁 𑀦 𑀓𑀭𑁄𑀢𑀺, 𑀅𑀢𑀺𑀲𑀸𑀬𑀦𑁆𑀢𑀺 𑀓𑀫𑁆𑀫𑀁 𑀦 𑀓𑀭𑁄𑀢𑀺, 𑀅𑀢𑀺𑀧𑀸𑀢𑁄𑀢𑀺 𑀓𑀫𑁆𑀫𑀁 𑀦 𑀓𑀭𑁄𑀢𑀺, 𑀅𑀢𑀺𑀙𑀸𑀢𑁄𑀲𑁆𑀫𑀻𑀢𑀺 𑀓𑀫𑁆𑀫𑀁 𑀦 𑀓𑀭𑁄𑀢𑀺, 𑀅𑀢𑀺𑀥𑀸𑀢𑁄𑀲𑁆𑀫𑀻𑀢𑀺 𑀓𑀫𑁆𑀫𑀁 𑀦 𑀓𑀭𑁄𑀢𑀺. 𑀢𑀲𑁆𑀲 𑀏𑀯𑀁 𑀓𑀺𑀘𑁆𑀘𑀸𑀧𑀤𑁂𑀲𑀩𑀳𑀼𑀮𑀲𑁆𑀲 𑀯𑀺𑀳𑀭𑀢𑁄 𑀅𑀦𑀼𑀧𑁆𑀧𑀦𑁆𑀦𑀸 𑀘𑁂𑀯 𑀪𑁄𑀕𑀸 𑀦𑀼𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑁆𑀧𑀦𑁆𑀦𑀸 𑀘 𑀪𑁄𑀕𑀸 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀦𑁆𑀢𑀺. 𑀇𑀫𑁂 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀙 𑀆𑀤𑀻𑀦𑀯𑀸 𑀆𑀮𑀲𑁆𑀬𑀸𑀦𑀼𑀬𑁄𑀕𑁂’’𑀢𑀺. 𑀇𑀤𑀫𑀯𑁄𑀘 𑀪𑀕𑀯𑀸, 𑀇𑀤𑀁 𑀯𑀢𑁆𑀯𑀸𑀦 𑀲𑀼𑀕𑀢𑁄 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑀲𑀢𑁆𑀣𑀸 𑁋

‘‘𑀳𑁄𑀢𑀺 𑀧𑀸𑀦𑀲𑀔𑀸 𑀦𑀸𑀫,

𑀳𑁄𑀢𑀺 𑀲𑀫𑁆𑀫𑀺𑀬𑀲𑀫𑁆𑀫𑀺𑀬𑁄;

𑀬𑁄 𑀘 𑀅𑀢𑁆𑀣𑁂𑀲𑀼 𑀚𑀸𑀢𑁂𑀲𑀼,

𑀲𑀳𑀸𑀬𑁄 𑀳𑁄𑀢𑀺 𑀲𑁄 𑀲𑀔𑀸.

‘‘𑀉𑀲𑁆𑀲𑀽𑀭𑀲𑁂𑀬𑁆𑀬𑀸 𑀧𑀭𑀤𑀸𑀭𑀲𑁂𑀯𑀦𑀸,

𑀯𑁂𑀭𑀧𑁆𑀧𑀲𑀯𑁄 [𑀯𑁂𑀭𑀧𑁆𑀧𑀲𑀗𑁆𑀕𑁄 (𑀲𑀻. 𑀲𑁆𑀬𑀸. 𑀧𑀻.)] 𑀘 𑀅𑀦𑀢𑁆𑀣𑀢𑀸 𑀘;

𑀧𑀸𑀧𑀸 𑀘 𑀫𑀺𑀢𑁆𑀢𑀸 𑀲𑀼𑀓𑀤𑀭𑀺𑀬𑀢𑀸 𑀘,

𑀏𑀢𑁂 𑀙 𑀞𑀸𑀦𑀸 𑀧𑀼𑀭𑀺𑀲𑀁 𑀥𑀁𑀲𑀬𑀦𑁆𑀢𑀺.

‘‘𑀧𑀸𑀧𑀫𑀺𑀢𑁆𑀢𑁄 𑀧𑀸𑀧𑀲𑀔𑁄,

𑀧𑀸𑀧𑀆𑀘𑀸𑀭𑀕𑁄𑀘𑀭𑁄;

𑀅𑀲𑁆𑀫𑀸 𑀮𑁄𑀓𑀸 𑀧𑀭𑀫𑁆𑀳𑀸 𑀘,

𑀉𑀪𑀬𑀸 𑀥𑀁𑀲𑀢𑁂 𑀦𑀭𑁄.

‘‘𑀅𑀓𑁆𑀔𑀺𑀢𑁆𑀣𑀺𑀬𑁄 𑀯𑀸𑀭𑀼𑀡𑀻 𑀦𑀘𑁆𑀘𑀕𑀻𑀢𑀁,

𑀤𑀺𑀯𑀸 𑀲𑁄𑀧𑁆𑀧𑀁 𑀧𑀸𑀭𑀺𑀘𑀭𑀺𑀬𑀸 𑀅𑀓𑀸𑀮𑁂;

𑀧𑀸𑀧𑀸 𑀘 𑀫𑀺𑀢𑁆𑀢𑀸 𑀲𑀼𑀓𑀤𑀭𑀺𑀬𑀢𑀸 𑀘,

𑀏𑀢𑁂 𑀙 𑀞𑀸𑀦𑀸 𑀧𑀼𑀭𑀺𑀲𑀁 𑀥𑀁𑀲𑀬𑀦𑁆𑀢𑀺.

‘‘𑀅𑀓𑁆𑀔𑁂𑀳𑀺 𑀤𑀺𑀩𑁆𑀩𑀦𑁆𑀢𑀺 𑀲𑀼𑀭𑀁 𑀧𑀺𑀯𑀦𑁆𑀢𑀺,

𑀬𑀦𑁆𑀢𑀺𑀢𑁆𑀣𑀺𑀬𑁄 𑀧𑀸𑀡𑀲𑀫𑀸 𑀧𑀭𑁂𑀲𑀁;

𑀦𑀺𑀳𑀻𑀦𑀲𑁂𑀯𑀻 𑀦 𑀘 𑀯𑀼𑀤𑁆𑀥𑀲𑁂𑀯𑀻 [𑀯𑀼𑀤𑁆𑀥𑀺𑀲𑁂𑀯𑀻 (𑀲𑁆𑀬𑀸.), 𑀩𑀼𑀤𑁆𑀥𑀺𑀲𑁂𑀯𑀻 (𑀓.)],

𑀦𑀺𑀳𑀻𑀬𑀢𑁂 𑀓𑀸𑀴𑀧𑀓𑁆𑀔𑁂𑀯 𑀘𑀦𑁆𑀤𑁄.

‘‘𑀬𑁄 𑀯𑀸𑀭𑀼𑀡𑀻 𑀅𑀤𑁆𑀥𑀦𑁄 𑀅𑀓𑀺𑀜𑁆𑀘𑀦𑁄,

𑀧𑀺𑀧𑀸𑀲𑁄 𑀧𑀺𑀯𑀁 𑀧𑀧𑀸𑀕𑀢𑁄 [𑀧𑀺𑀧𑀸𑀲𑁄𑀲𑀺 𑀅𑀢𑁆𑀣𑀧𑀸𑀕𑀢𑁄 (𑀲𑁆𑀬𑀸.), 𑀧𑀺𑀧𑀸𑀲𑁄𑀧𑀺 𑀲𑀫𑀧𑁆𑀧𑀧𑀸𑀕𑀢𑁄 (𑀓.)];

𑀉𑀤𑀓𑀫𑀺𑀯 𑀇𑀡𑀁 𑀯𑀺𑀕𑀸𑀳𑀢𑀺,

𑀅𑀓𑀼𑀮𑀁 [𑀆𑀓𑀼𑀮𑀁 (𑀲𑁆𑀬𑀸. 𑀓.)] 𑀓𑀸𑀳𑀺𑀢𑀺 𑀔𑀺𑀧𑁆𑀧𑀫𑀢𑁆𑀢𑀦𑁄.

‘‘𑀦 𑀤𑀺𑀯𑀸 𑀲𑁄𑀧𑁆𑀧𑀲𑀻𑀮𑁂𑀦, 𑀭𑀢𑁆𑀢𑀺𑀫𑀼𑀝𑁆𑀞𑀸𑀦𑀤𑁂𑀲𑁆𑀲𑀺𑀦𑀸 [𑀭𑀢𑁆𑀢𑀺𑀦𑀼𑀝𑁆𑀞𑀸𑀦𑀤𑀲𑁆𑀲𑀺𑀦𑀸 (𑀲𑀻. 𑀧𑀻.), 𑀭𑀢𑁆𑀢𑀺𑀦𑀼𑀝𑁆𑀞𑀸𑀦𑀲𑀻𑀮𑀺𑀦𑀸 (?)];

𑀦𑀺𑀘𑁆𑀘𑀁 𑀫𑀢𑁆𑀢𑁂𑀦 𑀲𑁄𑀡𑁆𑀟𑁂𑀦, 𑀲𑀓𑁆𑀓𑀸 𑀆𑀯𑀲𑀺𑀢𑀼𑀁 𑀖𑀭𑀁.

‘‘𑀅𑀢𑀺𑀲𑀻𑀢𑀁 𑀅𑀢𑀺𑀉𑀡𑁆𑀳𑀁, 𑀅𑀢𑀺𑀲𑀸𑀬𑀫𑀺𑀤𑀁 𑀅𑀳𑀼;

𑀇𑀢𑀺 𑀯𑀺𑀲𑁆𑀲𑀝𑁆𑀞𑀓𑀫𑁆𑀫𑀦𑁆𑀢𑁂, 𑀅𑀢𑁆𑀣𑀸 𑀅𑀘𑁆𑀘𑁂𑀦𑁆𑀢𑀺 𑀫𑀸𑀡𑀯𑁂.

‘‘𑀬𑁄𑀥 𑀲𑀻𑀢𑀜𑁆𑀘 𑀉𑀡𑁆𑀳𑀜𑁆𑀘, 𑀢𑀺𑀡𑀸 𑀪𑀺𑀬𑁆𑀬𑁄 𑀦 𑀫𑀜𑁆𑀜𑀢𑀺;

𑀓𑀭𑀁 𑀧𑀼𑀭𑀺𑀲𑀓𑀺𑀘𑁆𑀘𑀸𑀦𑀺, 𑀲𑁄 𑀲𑀼𑀔𑀁 [𑀲𑀼𑀔𑀸 (𑀲𑀩𑁆𑀩𑀢𑁆𑀣) 𑀅𑀝𑁆𑀞𑀓𑀣𑀸 𑀑𑀮𑁄𑀓𑁂𑀢𑀩𑁆𑀩𑀸] 𑀦 𑀯𑀺𑀳𑀸𑀬𑀢𑀻’’𑀢𑀺.

𑀫𑀺𑀢𑁆𑀢𑀧𑀢𑀺𑀭𑀽𑀧𑀓𑀸

𑁨𑁫𑁪. ‘‘𑀘𑀢𑁆𑀢𑀸𑀭𑁄𑀫𑁂, 𑀕𑀳𑀧𑀢𑀺𑀧𑀼𑀢𑁆𑀢, 𑀅𑀫𑀺𑀢𑁆𑀢𑀸 𑀫𑀺𑀢𑁆𑀢𑀧𑀢𑀺𑀭𑀽𑀧𑀓𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀜𑁆𑀜𑀤𑀢𑁆𑀣𑀼𑀳𑀭𑁄 𑀅𑀫𑀺𑀢𑁆𑀢𑁄 𑀫𑀺𑀢𑁆𑀢𑀧𑀢𑀺𑀭𑀽𑀧𑀓𑁄 𑀯𑁂𑀤𑀺𑀢𑀩𑁆𑀩𑁄, 𑀯𑀘𑀻𑀧𑀭𑀫𑁄 𑀅𑀫𑀺𑀢𑁆𑀢𑁄 𑀫𑀺𑀢𑁆𑀢𑀧𑀢𑀺𑀭𑀽𑀧𑀓𑁄 𑀯𑁂𑀤𑀺𑀢𑀩𑁆𑀩𑁄, 𑀅𑀦𑀼𑀧𑁆𑀧𑀺𑀬𑀪𑀸𑀡𑀻 𑀅𑀫𑀺𑀢𑁆𑀢𑁄 𑀫𑀺𑀢𑁆𑀢𑀧𑀢𑀺𑀭𑀽𑀧𑀓𑁄 𑀯𑁂𑀤𑀺𑀢𑀩𑁆𑀩𑁄, 𑀅𑀧𑀸𑀬𑀲𑀳𑀸𑀬𑁄 𑀅𑀫𑀺𑀢𑁆𑀢𑁄 𑀫𑀺𑀢𑁆𑀢𑀧𑀢𑀺𑀭𑀽𑀧𑀓𑁄 𑀯𑁂𑀤𑀺𑀢𑀩𑁆𑀩𑁄.

𑁨𑁫𑁫. ‘‘𑀘𑀢𑀽𑀳𑀺 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀞𑀸𑀦𑁂𑀳𑀺 𑀅𑀜𑁆𑀜𑀤𑀢𑁆𑀣𑀼𑀳𑀭𑁄 𑀅𑀫𑀺𑀢𑁆𑀢𑁄 𑀫𑀺𑀢𑁆𑀢𑀧𑀢𑀺𑀭𑀽𑀧𑀓𑁄 𑀯𑁂𑀤𑀺𑀢𑀩𑁆𑀩𑁄.

‘‘𑀅𑀜𑁆𑀜𑀤𑀢𑁆𑀣𑀼𑀳𑀭𑁄 𑀳𑁄𑀢𑀺, 𑀅𑀧𑁆𑀧𑁂𑀦 𑀩𑀳𑀼𑀫𑀺𑀘𑁆𑀙𑀢𑀺;

𑀪𑀬𑀲𑁆𑀲 𑀓𑀺𑀘𑁆𑀘𑀁 𑀓𑀭𑁄𑀢𑀺, 𑀲𑁂𑀯𑀢𑀺 𑀅𑀢𑁆𑀣𑀓𑀸𑀭𑀡𑀸.

‘‘𑀇𑀫𑁂𑀳𑀺 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀘𑀢𑀽𑀳𑀺 𑀞𑀸𑀦𑁂𑀳𑀺 𑀅𑀜𑁆𑀜𑀤𑀢𑁆𑀣𑀼𑀳𑀭𑁄 𑀅𑀫𑀺𑀢𑁆𑀢𑁄 𑀫𑀺𑀢𑁆𑀢𑀧𑀢𑀺𑀭𑀽𑀧𑀓𑁄 𑀯𑁂𑀤𑀺𑀢𑀩𑁆𑀩𑁄.

𑁨𑁫𑁬. ‘‘𑀘𑀢𑀽𑀳𑀺 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀞𑀸𑀦𑁂𑀳𑀺 𑀯𑀘𑀻𑀧𑀭𑀫𑁄 𑀅𑀫𑀺𑀢𑁆𑀢𑁄 𑀫𑀺𑀢𑁆𑀢𑀧𑀢𑀺𑀭𑀽𑀧𑀓𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀢𑀻𑀢𑁂𑀦 𑀧𑀝𑀺𑀲𑀦𑁆𑀣𑀭𑀢𑀺 [𑀧𑀝𑀺𑀲𑀦𑁆𑀥𑀭𑀢𑀺 (𑀓.)], 𑀅𑀦𑀸𑀕𑀢𑁂𑀦 𑀧𑀝𑀺𑀲𑀦𑁆𑀣𑀭𑀢𑀺, 𑀦𑀺𑀭𑀢𑁆𑀣𑀓𑁂𑀦 𑀲𑀗𑁆𑀕𑀡𑁆𑀳𑀸𑀢𑀺, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀓𑀺𑀘𑁆𑀘𑁂𑀲𑀼 𑀩𑁆𑀬𑀲𑀦𑀁 𑀤𑀲𑁆𑀲𑁂𑀢𑀺. 𑀇𑀫𑁂𑀳𑀺 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀘𑀢𑀽𑀳𑀺 𑀞𑀸𑀦𑁂𑀳𑀺 𑀯𑀘𑀻𑀧𑀭𑀫𑁄 𑀅𑀫𑀺𑀢𑁆𑀢𑁄 𑀫𑀺𑀢𑁆𑀢𑀧𑀢𑀺𑀭𑀽𑀧𑀓𑁄 𑀯𑁂𑀤𑀺𑀢𑀩𑁆𑀩𑁄.

𑁨𑁫𑁭. ‘‘𑀘𑀢𑀽𑀳𑀺 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀞𑀸𑀦𑁂𑀳𑀺 𑀅𑀦𑀼𑀧𑁆𑀧𑀺𑀬𑀪𑀸𑀡𑀻 𑀅𑀫𑀺𑀢𑁆𑀢𑁄 𑀫𑀺𑀢𑁆𑀢𑀧𑀢𑀺𑀭𑀽𑀧𑀓𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀸𑀧𑀓𑀁𑀧𑀺𑀲𑁆𑀲 [𑀧𑀸𑀧𑀓𑀫𑁆𑀫𑀁𑀧𑀺𑀲𑁆𑀲 (𑀲𑁆𑀬𑀸.)] 𑀅𑀦𑀼𑀚𑀸𑀦𑀸𑀢𑀺, 𑀓𑀮𑁆𑀬𑀸𑀡𑀁𑀧𑀺𑀲𑁆𑀲 𑀅𑀦𑀼𑀚𑀸𑀦𑀸𑀢𑀺, 𑀲𑀫𑁆𑀫𑀼𑀔𑀸𑀲𑁆𑀲 𑀯𑀡𑁆𑀡𑀁 𑀪𑀸𑀲𑀢𑀺, 𑀧𑀭𑀫𑁆𑀫𑀼𑀔𑀸𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺. 𑀇𑀫𑁂𑀳𑀺 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀘𑀢𑀽𑀳𑀺 𑀞𑀸𑀦𑁂𑀳𑀺 𑀅𑀦𑀼𑀧𑁆𑀧𑀺𑀬𑀪𑀸𑀡𑀻 𑀅𑀫𑀺𑀢𑁆𑀢𑁄 𑀫𑀺𑀢𑁆𑀢𑀧𑀢𑀺𑀭𑀽𑀧𑀓𑁄 𑀯𑁂𑀤𑀺𑀢𑀩𑁆𑀩𑁄.

𑁨𑁫𑁮. ‘‘𑀘𑀢𑀽𑀳𑀺 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀞𑀸𑀦𑁂𑀳𑀺 𑀅𑀧𑀸𑀬𑀲𑀳𑀸𑀬𑁄 𑀅𑀫𑀺𑀢𑁆𑀢𑁄 𑀫𑀺𑀢𑁆𑀢𑀧𑀢𑀺𑀭𑀽𑀧𑀓𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀼𑀭𑀸𑀫𑁂𑀭𑀬 𑀫𑀚𑁆𑀚𑀧𑁆𑀧𑀫𑀸𑀤𑀝𑁆𑀞𑀸𑀦𑀸𑀦𑀼𑀬𑁄𑀕𑁂 𑀲𑀳𑀸𑀬𑁄 𑀳𑁄𑀢𑀺, 𑀯𑀺𑀓𑀸𑀮 𑀯𑀺𑀲𑀺𑀔𑀸 𑀘𑀭𑀺𑀬𑀸𑀦𑀼𑀬𑁄𑀕𑁂 𑀲𑀳𑀸𑀬𑁄 𑀳𑁄𑀢𑀺, 𑀲𑀫𑀚𑁆𑀚𑀸𑀪𑀺𑀘𑀭𑀡𑁂 𑀲𑀳𑀸𑀬𑁄 𑀳𑁄𑀢𑀺, 𑀚𑀽𑀢𑀧𑁆𑀧𑀫𑀸𑀤𑀝𑁆𑀞𑀸𑀦𑀸𑀦𑀼𑀬𑁄𑀕𑁂 𑀲𑀳𑀸𑀬𑁄 𑀳𑁄𑀢𑀺. 𑀇𑀫𑁂𑀳𑀺 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀘𑀢𑀽𑀳𑀺 𑀞𑀸𑀦𑁂𑀳𑀺 𑀅𑀧𑀸𑀬𑀲𑀳𑀸𑀬𑁄 𑀅𑀫𑀺𑀢𑁆𑀢𑁄 𑀫𑀺𑀢𑁆𑀢𑀧𑀢𑀺𑀭𑀽𑀧𑀓𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺.

𑁨𑁫𑁯. 𑀇𑀤𑀫𑀯𑁄𑀘 𑀪𑀕𑀯𑀸, 𑀇𑀤𑀁 𑀯𑀢𑁆𑀯𑀸𑀦 𑀲𑀼𑀕𑀢𑁄 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑀲𑀢𑁆𑀣𑀸 𑁋

‘‘𑀅𑀜𑁆𑀜𑀤𑀢𑁆𑀣𑀼𑀳𑀭𑁄 𑀫𑀺𑀢𑁆𑀢𑁄, 𑀬𑁄 𑀘 𑀫𑀺𑀢𑁆𑀢𑁄 𑀯𑀘𑀻𑀧𑀭𑁄 [𑀯𑀘𑀻𑀧𑀭𑀫𑁄 (𑀲𑁆𑀬𑀸.)];

𑀅𑀦𑀼𑀧𑁆𑀧𑀺𑀬𑀜𑁆𑀘 𑀬𑁄 𑀆𑀳, 𑀅𑀧𑀸𑀬𑁂𑀲𑀼 𑀘 𑀬𑁄 𑀲𑀔𑀸.

𑀏𑀢𑁂 𑀅𑀫𑀺𑀢𑁆𑀢𑁂 𑀘𑀢𑁆𑀢𑀸𑀭𑁄, 𑀇𑀢𑀺 𑀯𑀺𑀜𑁆𑀜𑀸𑀬 𑀧𑀡𑁆𑀟𑀺𑀢𑁄;

𑀆𑀭𑀓𑀸 𑀧𑀭𑀺𑀯𑀚𑁆𑀚𑁂𑀬𑁆𑀬, 𑀫𑀕𑁆𑀕𑀁 𑀧𑀝𑀺𑀪𑀬𑀁 𑀬𑀣𑀸’’𑀢𑀺.

𑀲𑀼𑀳𑀤𑀫𑀺𑀢𑁆𑀢𑁄

𑁨𑁬𑁦. ‘‘𑀘𑀢𑁆𑀢𑀸𑀭𑁄𑀫𑁂, 𑀕𑀳𑀧𑀢𑀺𑀧𑀼𑀢𑁆𑀢, 𑀫𑀺𑀢𑁆𑀢𑀸 𑀲𑀼𑀳𑀤𑀸 𑀯𑁂𑀤𑀺𑀢𑀩𑁆𑀩𑀸. 𑀉𑀧𑀓𑀸𑀭𑁄 [𑀉𑀧𑀓𑀸𑀭𑀓𑁄 (𑀲𑁆𑀬𑀸.)] 𑀫𑀺𑀢𑁆𑀢𑁄 𑀲𑀼𑀳𑀤𑁄 𑀯𑁂𑀤𑀺𑀢𑀩𑁆𑀩𑁄, 𑀲𑀫𑀸𑀦𑀲𑀼𑀔𑀤𑀼𑀓𑁆𑀔𑁄 𑀫𑀺𑀢𑁆𑀢𑁄 𑀲𑀼𑀳𑀤𑁄 𑀯𑁂𑀤𑀺𑀢𑀩𑁆𑀩𑁄, 𑀅𑀢𑁆𑀣𑀓𑁆𑀔𑀸𑀬𑀻 𑀫𑀺𑀢𑁆𑀢𑁄 𑀲𑀼𑀳𑀤𑁄 𑀯𑁂𑀤𑀺𑀢𑀩𑁆𑀩𑁄, 𑀅𑀦𑀼𑀓𑀫𑁆𑀧𑀓𑁄 𑀫𑀺𑀢𑁆𑀢𑁄 𑀲𑀼𑀳𑀤𑁄 𑀯𑁂𑀤𑀺𑀢𑀩𑁆𑀩𑁄.

𑁨𑁬𑁧. ‘‘𑀘𑀢𑀽𑀳𑀺 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀞𑀸𑀦𑁂𑀳𑀺 𑀉𑀧𑀓𑀸𑀭𑁄 𑀫𑀺𑀢𑁆𑀢𑁄 𑀲𑀼𑀳𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀫𑀢𑁆𑀢𑀁 𑀭𑀓𑁆𑀔𑀢𑀺, 𑀧𑀫𑀢𑁆𑀢𑀲𑁆𑀲 𑀲𑀸𑀧𑀢𑁂𑀬𑁆𑀬𑀁 𑀭𑀓𑁆𑀔𑀢𑀺, 𑀪𑀻𑀢𑀲𑁆𑀲 𑀲𑀭𑀡𑀁 𑀳𑁄𑀢𑀺, 𑀉𑀧𑁆𑀧𑀦𑁆𑀦𑁂𑀲𑀼 𑀓𑀺𑀘𑁆𑀘𑀓𑀭𑀡𑀻𑀬𑁂𑀲𑀼 𑀢𑀤𑁆𑀤𑀺𑀕𑀼𑀡𑀁 𑀪𑁄𑀕𑀁 𑀅𑀦𑀼𑀧𑁆𑀧𑀤𑁂𑀢𑀺. 𑀇𑀫𑁂𑀳𑀺 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀘𑀢𑀽𑀳𑀺 𑀞𑀸𑀦𑁂𑀳𑀺 𑀉𑀧𑀓𑀸𑀭𑁄 𑀫𑀺𑀢𑁆𑀢𑁄 𑀲𑀼𑀳𑀤𑁄 𑀯𑁂𑀤𑀺𑀢𑀩𑁆𑀩𑁄.

𑁨𑁬𑁨. ‘‘𑀘𑀢𑀽𑀳𑀺 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀞𑀸𑀦𑁂𑀳𑀺 𑀲𑀫𑀸𑀦𑀲𑀼𑀔𑀤𑀼𑀓𑁆𑀔𑁄 𑀫𑀺𑀢𑁆𑀢𑁄 𑀲𑀼𑀳𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀕𑀼𑀬𑁆𑀳𑀫𑀲𑁆𑀲 𑀆𑀘𑀺𑀓𑁆𑀔𑀢𑀺, 𑀕𑀼𑀬𑁆𑀳𑀫𑀲𑁆𑀲 𑀧𑀭𑀺𑀕𑀽𑀳𑀢𑀺, 𑀆𑀧𑀤𑀸𑀲𑀼 𑀦 𑀯𑀺𑀚𑀳𑀢𑀺, 𑀚𑀻𑀯𑀺𑀢𑀁𑀧𑀺𑀲𑁆𑀲 𑀅𑀢𑁆𑀣𑀸𑀬 𑀧𑀭𑀺𑀘𑁆𑀘𑀢𑁆𑀢𑀁 𑀳𑁄𑀢𑀺. 𑀇𑀫𑁂𑀳𑀺 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀘𑀢𑀽𑀳𑀺 𑀞𑀸𑀦𑁂𑀳𑀺 𑀲𑀫𑀸𑀦𑀲𑀼𑀔𑀤𑀼𑀓𑁆𑀔𑁄 𑀫𑀺𑀢𑁆𑀢𑁄 𑀲𑀼𑀳𑀤𑁄 𑀯𑁂𑀤𑀺𑀢𑀩𑁆𑀩𑁄.

𑁨𑁬𑁩. ‘‘𑀘𑀢𑀽𑀳𑀺 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀞𑀸𑀦𑁂𑀳𑀺 𑀅𑀢𑁆𑀣𑀓𑁆𑀔𑀸𑀬𑀻 𑀫𑀺𑀢𑁆𑀢𑁄 𑀲𑀼𑀳𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀸𑀧𑀸 𑀦𑀺𑀯𑀸𑀭𑁂𑀢𑀺, 𑀓𑀮𑁆𑀬𑀸𑀡𑁂 𑀦𑀺𑀯𑁂𑀲𑁂𑀢𑀺, 𑀅𑀲𑁆𑀲𑀼𑀢𑀁 𑀲𑀸𑀯𑁂𑀢𑀺, 𑀲𑀕𑁆𑀕𑀲𑁆𑀲 𑀫𑀕𑁆𑀕𑀁 𑀆𑀘𑀺𑀓𑁆𑀔𑀢𑀺. 𑀇𑀫𑁂𑀳𑀺 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀘𑀢𑀽𑀳𑀺 𑀞𑀸𑀦𑁂𑀳𑀺 𑀅𑀢𑁆𑀣𑀓𑁆𑀔𑀸𑀬𑀻 𑀫𑀺𑀢𑁆𑀢𑁄 𑀲𑀼𑀳𑀤𑁄 𑀯𑁂𑀤𑀺𑀢𑀩𑁆𑀩𑁄.

𑁨𑁬𑁪. ‘‘𑀘𑀢𑀽𑀳𑀺 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀞𑀸𑀦𑁂𑀳𑀺 𑀅𑀦𑀼𑀓𑀫𑁆𑀧𑀓𑁄 𑀫𑀺𑀢𑁆𑀢𑁄 𑀲𑀼𑀳𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀪𑀯𑁂𑀦𑀲𑁆𑀲 𑀦 𑀦𑀦𑁆𑀤𑀢𑀺, 𑀪𑀯𑁂𑀦𑀲𑁆𑀲 𑀦𑀦𑁆𑀤𑀢𑀺, 𑀅𑀯𑀡𑁆𑀡𑀁 𑀪𑀡𑀫𑀸𑀦𑀁 𑀦𑀺𑀯𑀸𑀭𑁂𑀢𑀺, 𑀯𑀡𑁆𑀡𑀁 𑀪𑀡𑀫𑀸𑀦𑀁 𑀧𑀲𑀁𑀲𑀢𑀺. 𑀇𑀫𑁂𑀳𑀺 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀘𑀢𑀽𑀳𑀺 𑀞𑀸𑀦𑁂𑀳𑀺 𑀅𑀦𑀼𑀓𑀫𑁆𑀧𑀓𑁄 𑀫𑀺𑀢𑁆𑀢𑁄 𑀲𑀼𑀳𑀤𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺.

𑁨𑁬𑁫. 𑀇𑀤𑀫𑀯𑁄𑀘 𑀪𑀕𑀯𑀸, 𑀇𑀤𑀁 𑀯𑀢𑁆𑀯𑀸𑀦 𑀲𑀼𑀕𑀢𑁄 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑀲𑀢𑁆𑀣𑀸 𑁋

‘‘𑀉𑀧𑀓𑀸𑀭𑁄 𑀘 𑀬𑁄 𑀫𑀺𑀢𑁆𑀢𑁄, 𑀲𑀼𑀔𑁂 𑀤𑀼𑀓𑁆𑀔𑁂 [𑀲𑀼𑀔𑀤𑀼𑀓𑁆𑀔𑁄 (𑀲𑁆𑀬𑀸. 𑀓.)] 𑀘 𑀬𑁄 𑀲𑀔𑀸 [𑀬𑁄 𑀘 𑀫𑀺𑀢𑁆𑀢𑁄 𑀲𑀼𑀔𑁂 𑀤𑀼𑀓𑁆𑀔𑁂 (𑀲𑀻. 𑀧𑀻.)];

𑀅𑀢𑁆𑀣𑀓𑁆𑀔𑀸𑀬𑀻 𑀘 𑀬𑁄 𑀫𑀺𑀢𑁆𑀢𑁄, 𑀬𑁄 𑀘 𑀫𑀺𑀢𑁆𑀢𑀸𑀦𑀼𑀓𑀫𑁆𑀧𑀓𑁄.

‘‘𑀏𑀢𑁂𑀧𑀺 𑀫𑀺𑀢𑁆𑀢𑁂 𑀘𑀢𑁆𑀢𑀸𑀭𑁄, 𑀇𑀢𑀺 𑀯𑀺𑀜𑁆𑀜𑀸𑀬 𑀧𑀡𑁆𑀟𑀺𑀢𑁄;

𑀲𑀓𑁆𑀓𑀘𑁆𑀘𑀁 𑀧𑀬𑀺𑀭𑀼𑀧𑀸𑀲𑁂𑀬𑁆𑀬, 𑀫𑀸𑀢𑀸 𑀧𑀼𑀢𑁆𑀢𑀁 𑀯 𑀑𑀭𑀲𑀁;

𑀧𑀡𑁆𑀟𑀺𑀢𑁄 𑀲𑀻𑀮𑀲𑀫𑁆𑀧𑀦𑁆𑀦𑁄, 𑀚𑀮𑀁 𑀅𑀕𑁆𑀕𑀻𑀯 𑀪𑀸𑀲𑀢𑀺.

‘‘𑀪𑁄𑀕𑁂 𑀲𑀁𑀳𑀭𑀫𑀸𑀦𑀲𑁆𑀲, 𑀪𑀫𑀭𑀲𑁆𑀲𑁂𑀯 𑀇𑀭𑀻𑀬𑀢𑁄;

𑀪𑁄𑀕𑀸 𑀲𑀦𑁆𑀦𑀺𑀘𑀬𑀁 𑀬𑀦𑁆𑀢𑀺, 𑀯𑀫𑁆𑀫𑀺𑀓𑁄𑀯𑀼𑀧𑀘𑀻𑀬𑀢𑀺.

‘‘𑀏𑀯𑀁 𑀪𑁄𑀕𑁂 𑀲𑀫𑀸𑀳𑀢𑁆𑀯𑀸 [𑀲𑀫𑀸𑀳𑀭𑀺𑀢𑁆𑀯𑀸 (𑀲𑁆𑀬𑀸.)], 𑀅𑀮𑀫𑀢𑁆𑀢𑁄 𑀓𑀼𑀮𑁂 𑀕𑀺𑀳𑀻;

𑀘𑀢𑀼𑀥𑀸 𑀯𑀺𑀪𑀚𑁂 𑀪𑁄𑀕𑁂, 𑀲 𑀯𑁂 𑀫𑀺𑀢𑁆𑀢𑀸𑀦𑀺 𑀕𑀦𑁆𑀣𑀢𑀺.

‘‘𑀏𑀓𑁂𑀦 𑀪𑁄𑀕𑁂 𑀪𑀼𑀜𑁆𑀚𑁂𑀬𑁆𑀬, 𑀤𑁆𑀯𑀻𑀳𑀺 𑀓𑀫𑁆𑀫𑀁 𑀧𑀬𑁄𑀚𑀬𑁂;

𑀘𑀢𑀼𑀢𑁆𑀣𑀜𑁆𑀘 𑀦𑀺𑀥𑀸𑀧𑁂𑀬𑁆𑀬, 𑀆𑀧𑀤𑀸𑀲𑀼 𑀪𑀯𑀺𑀲𑁆𑀲𑀢𑀻’’𑀢𑀺.

𑀙𑀤𑁆𑀤𑀺𑀲𑀸𑀧𑀝𑀺𑀘𑁆𑀙𑀸𑀤𑀦𑀓𑀡𑁆𑀟𑀁

𑁨𑁬𑁬. ‘‘𑀓𑀣𑀜𑁆𑀘, 𑀕𑀳𑀧𑀢𑀺𑀧𑀼𑀢𑁆𑀢, 𑀅𑀭𑀺𑀬𑀲𑀸𑀯𑀓𑁄 𑀙𑀤𑁆𑀤𑀺𑀲𑀸𑀧𑀝𑀺𑀘𑁆𑀙𑀸𑀤𑀻 𑀳𑁄𑀢𑀺? 𑀙 𑀇𑀫𑀸, 𑀕𑀳𑀧𑀢𑀺𑀧𑀼𑀢𑁆𑀢, 𑀤𑀺𑀲𑀸 𑀯𑁂𑀤𑀺𑀢𑀩𑁆𑀩𑀸. 𑀧𑀼𑀭𑀢𑁆𑀣𑀺𑀫𑀸 𑀤𑀺𑀲𑀸 𑀫𑀸𑀢𑀸𑀧𑀺𑀢𑀭𑁄 𑀯𑁂𑀤𑀺𑀢𑀩𑁆𑀩𑀸, 𑀤𑀓𑁆𑀔𑀺𑀡𑀸 𑀤𑀺𑀲𑀸 𑀆𑀘𑀭𑀺𑀬𑀸 𑀯𑁂𑀤𑀺𑀢𑀩𑁆𑀩𑀸, 𑀧𑀘𑁆𑀙𑀺𑀫𑀸 𑀤𑀺𑀲𑀸 𑀧𑀼𑀢𑁆𑀢𑀤𑀸𑀭𑀸 𑀯𑁂𑀤𑀺𑀢𑀩𑁆𑀩𑀸, 𑀉𑀢𑁆𑀢𑀭𑀸 𑀤𑀺𑀲𑀸 𑀫𑀺𑀢𑁆𑀢𑀸𑀫𑀘𑁆𑀘𑀸 𑀯𑁂𑀤𑀺𑀢𑀩𑁆𑀩𑀸, 𑀳𑁂𑀝𑁆𑀞𑀺𑀫𑀸 𑀤𑀺𑀲𑀸 𑀤𑀸𑀲𑀓𑀫𑁆𑀫𑀓𑀭𑀸 𑀯𑁂𑀤𑀺𑀢𑀩𑁆𑀩𑀸, 𑀉𑀧𑀭𑀺𑀫𑀸 𑀤𑀺𑀲𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀯𑁂𑀤𑀺𑀢𑀩𑁆𑀩𑀸.

𑁨𑁬𑁭. ‘‘𑀧𑀜𑁆𑀘𑀳𑀺 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀞𑀸𑀦𑁂𑀳𑀺 𑀧𑀼𑀢𑁆𑀢𑁂𑀦 𑀧𑀼𑀭𑀢𑁆𑀣𑀺𑀫𑀸 𑀤𑀺𑀲𑀸 𑀫𑀸𑀢𑀸𑀧𑀺𑀢𑀭𑁄 𑀧𑀘𑁆𑀘𑀼𑀧𑀝𑁆𑀞𑀸𑀢𑀩𑁆𑀩𑀸 𑁋 𑀪𑀢𑁄 𑀦𑁂 [𑀦𑁂𑀲𑀁 (𑀩𑀳𑀽𑀲𑀼)] 𑀪𑀭𑀺𑀲𑁆𑀲𑀸𑀫𑀺, 𑀓𑀺𑀘𑁆𑀘𑀁 𑀦𑁂𑀲𑀁 𑀓𑀭𑀺𑀲𑁆𑀲𑀸𑀫𑀺, 𑀓𑀼𑀮𑀯𑀁𑀲𑀁 𑀞𑀧𑁂𑀲𑁆𑀲𑀸𑀫𑀺, 𑀤𑀸𑀬𑀚𑁆𑀚𑀁 𑀧𑀝𑀺𑀧𑀚𑁆𑀚𑀸𑀫𑀺, 𑀅𑀣 𑀯𑀸 𑀧𑀦 𑀧𑁂𑀢𑀸𑀦𑀁 𑀓𑀸𑀮𑀗𑁆𑀓𑀢𑀸𑀦𑀁 𑀤𑀓𑁆𑀔𑀺𑀡𑀁 𑀅𑀦𑀼𑀧𑁆𑀧𑀤𑀲𑁆𑀲𑀸𑀫𑀻𑀢𑀺. 𑀇𑀫𑁂𑀳𑀺 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀧𑀜𑁆𑀘𑀳𑀺 𑀞𑀸𑀦𑁂𑀳𑀺 𑀧𑀼𑀢𑁆𑀢𑁂𑀦 𑀧𑀼𑀭𑀢𑁆𑀣𑀺𑀫𑀸 𑀤𑀺𑀲𑀸 𑀫𑀸𑀢𑀸𑀧𑀺𑀢𑀭𑁄 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀧𑀜𑁆𑀘𑀳𑀺 𑀞𑀸𑀦𑁂𑀳𑀺 𑀧𑀼𑀢𑁆𑀢𑀁 𑀅𑀦𑀼𑀓𑀫𑁆𑀧𑀦𑁆𑀢𑀺. 𑀧𑀸𑀧𑀸 𑀦𑀺𑀯𑀸𑀭𑁂𑀦𑁆𑀢𑀺, 𑀓𑀮𑁆𑀬𑀸𑀡𑁂 𑀦𑀺𑀯𑁂𑀲𑁂𑀦𑁆𑀢𑀺, 𑀲𑀺𑀧𑁆𑀧𑀁 𑀲𑀺𑀓𑁆𑀔𑀸𑀧𑁂𑀦𑁆𑀢𑀺, 𑀧𑀢𑀺𑀭𑀽𑀧𑁂𑀦 𑀤𑀸𑀭𑁂𑀦 𑀲𑀁𑀬𑁄𑀚𑁂𑀦𑁆𑀢𑀺, 𑀲𑀫𑀬𑁂 𑀤𑀸𑀬𑀚𑁆𑀚𑀁 𑀦𑀺𑀬𑁆𑀬𑀸𑀤𑁂𑀦𑁆𑀢𑀺 [𑀦𑀺𑀬𑁆𑀬𑀸𑀢𑁂𑀦𑁆𑀢𑀺 (𑀓. 𑀲𑀻.)]. 𑀇𑀫𑁂𑀳𑀺 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀧𑀜𑁆𑀘𑀳𑀺 𑀞𑀸𑀦𑁂𑀳𑀺 𑀧𑀼𑀢𑁆𑀢𑁂𑀦 𑀧𑀼𑀭𑀢𑁆𑀣𑀺𑀫𑀸 𑀤𑀺𑀲𑀸 𑀫𑀸𑀢𑀸𑀧𑀺𑀢𑀭𑁄 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀞𑀸𑀦𑁂𑀳𑀺 𑀧𑀼𑀢𑁆𑀢𑀁 𑀅𑀦𑀼𑀓𑀫𑁆𑀧𑀦𑁆𑀢𑀺. 𑀏𑀯𑀫𑀲𑁆𑀲 𑀏𑀲𑀸 𑀧𑀼𑀭𑀢𑁆𑀣𑀺𑀫𑀸 𑀤𑀺𑀲𑀸 𑀧𑀝𑀺𑀘𑁆𑀙𑀦𑁆𑀦𑀸 𑀳𑁄𑀢𑀺 𑀔𑁂𑀫𑀸 𑀅𑀧𑁆𑀧𑀝𑀺𑀪𑀬𑀸.

𑁨𑁬𑁮. ‘‘𑀧𑀜𑁆𑀘𑀳𑀺 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀞𑀸𑀦𑁂𑀳𑀺 𑀅𑀦𑁆𑀢𑁂𑀯𑀸𑀲𑀺𑀦𑀸 𑀤𑀓𑁆𑀔𑀺𑀡𑀸 𑀤𑀺𑀲𑀸 𑀆𑀘𑀭𑀺𑀬𑀸 𑀧𑀘𑁆𑀘𑀼𑀧𑀝𑁆𑀞𑀸𑀢𑀩𑁆𑀩𑀸 𑁋 𑀉𑀝𑁆𑀞𑀸𑀦𑁂𑀦 𑀉𑀧𑀝𑁆𑀞𑀸𑀦𑁂𑀦 𑀲𑀼𑀲𑁆𑀲𑀼𑀲𑀸𑀬 𑀧𑀸𑀭𑀺𑀘𑀭𑀺𑀬𑀸𑀬 𑀲𑀓𑁆𑀓𑀘𑁆𑀘𑀁 𑀲𑀺𑀧𑁆𑀧𑀧𑀝𑀺𑀕𑁆𑀕𑀳𑀡𑁂𑀦 [𑀲𑀺𑀧𑁆𑀧𑀁 𑀧𑀝𑀺𑀕𑁆𑀕𑀳𑀡𑁂𑀦 (𑀲𑁆𑀬𑀸.), 𑀲𑀺𑀧𑁆𑀧𑀉𑀕𑁆𑀕𑀳𑀡𑁂𑀦 (𑀓.)]. 𑀇𑀫𑁂𑀳𑀺 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀧𑀜𑁆𑀘𑀳𑀺 𑀞𑀸𑀦𑁂𑀳𑀺 𑀅𑀦𑁆𑀢𑁂𑀯𑀸𑀲𑀺𑀦𑀸 𑀤𑀓𑁆𑀔𑀺𑀡𑀸 𑀤𑀺𑀲𑀸 𑀆𑀘𑀭𑀺𑀬𑀸 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀧𑀜𑁆𑀘𑀳𑀺 𑀞𑀸𑀦𑁂𑀳𑀺 𑀅𑀦𑁆𑀢𑁂𑀯𑀸𑀲𑀺𑀁 𑀅𑀦𑀼𑀓𑀫𑁆𑀧𑀦𑁆𑀢𑀺 𑁋 𑀲𑀼𑀯𑀺𑀦𑀻𑀢𑀁 𑀯𑀺𑀦𑁂𑀦𑁆𑀢𑀺, 𑀲𑀼𑀕𑁆𑀕𑀳𑀺𑀢𑀁 𑀕𑀸𑀳𑀸𑀧𑁂𑀦𑁆𑀢𑀺, 𑀲𑀩𑁆𑀩𑀲𑀺𑀧𑁆𑀧𑀲𑁆𑀲𑀼𑀢𑀁 𑀲𑀫𑀓𑁆𑀔𑀸𑀬𑀺𑀦𑁄 𑀪𑀯𑀦𑁆𑀢𑀺, 𑀫𑀺𑀢𑁆𑀢𑀸𑀫𑀘𑁆𑀘𑁂𑀲𑀼 𑀧𑀝𑀺𑀬𑀸𑀤𑁂𑀦𑁆𑀢𑀺 [𑀧𑀝𑀺𑀯𑁂𑀤𑁂𑀦𑁆𑀢𑀺 (𑀲𑁆𑀬𑀸.)], 𑀤𑀺𑀲𑀸𑀲𑀼 𑀧𑀭𑀺𑀢𑁆𑀢𑀸𑀡𑀁 𑀓𑀭𑁄𑀦𑁆𑀢𑀺. 𑀇𑀫𑁂𑀳𑀺 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀧𑀜𑁆𑀘𑀳𑀺 𑀞𑀸𑀦𑁂𑀳𑀺 𑀅𑀦𑁆𑀢𑁂𑀯𑀸𑀲𑀺𑀦𑀸 𑀤𑀓𑁆𑀔𑀺𑀡𑀸 𑀤𑀺𑀲𑀸 𑀆𑀘𑀭𑀺𑀬𑀸 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀞𑀸𑀦𑁂𑀳𑀺 𑀅𑀦𑁆𑀢𑁂𑀯𑀸𑀲𑀺𑀁 𑀅𑀦𑀼𑀓𑀫𑁆𑀧𑀦𑁆𑀢𑀺. 𑀏𑀯𑀫𑀲𑁆𑀲 𑀏𑀲𑀸 𑀤𑀓𑁆𑀔𑀺𑀡𑀸 𑀤𑀺𑀲𑀸 𑀧𑀝𑀺𑀘𑁆𑀙𑀦𑁆𑀦𑀸 𑀳𑁄𑀢𑀺 𑀔𑁂𑀫𑀸 𑀅𑀧𑁆𑀧𑀝𑀺𑀪𑀬𑀸.

𑁨𑁬𑁯. ‘‘𑀧𑀜𑁆𑀘𑀳𑀺 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀞𑀸𑀦𑁂𑀳𑀺 𑀲𑀸𑀫𑀺𑀓𑁂𑀦 𑀧𑀘𑁆𑀙𑀺𑀫𑀸 𑀤𑀺𑀲𑀸 𑀪𑀭𑀺𑀬𑀸 𑀧𑀘𑁆𑀘𑀼𑀧𑀝𑁆𑀞𑀸𑀢𑀩𑁆𑀩𑀸 𑁋 𑀲𑀫𑁆𑀫𑀸𑀦𑀦𑀸𑀬 𑀅𑀦𑀯𑀫𑀸𑀦𑀦𑀸𑀬 [𑀅𑀯𑀺𑀫𑀸𑀦𑀦𑀸𑀬 (𑀲𑁆𑀬𑀸. 𑀧𑀻.)] 𑀅𑀦𑀢𑀺𑀘𑀭𑀺𑀬𑀸𑀬 𑀇𑀲𑁆𑀲𑀭𑀺𑀬𑀯𑁄𑀲𑁆𑀲𑀕𑁆𑀕𑁂𑀦 𑀅𑀮𑀗𑁆𑀓𑀸𑀭𑀸𑀦𑀼𑀧𑁆𑀧𑀤𑀸𑀦𑁂𑀦. 𑀇𑀫𑁂𑀳𑀺 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀧𑀜𑁆𑀘𑀳𑀺 𑀞𑀸𑀦𑁂𑀳𑀺 𑀲𑀸𑀫𑀺𑀓𑁂𑀦 𑀧𑀘𑁆𑀙𑀺𑀫𑀸 𑀤𑀺𑀲𑀸 𑀪𑀭𑀺𑀬𑀸 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀧𑀜𑁆𑀘𑀳𑀺 𑀞𑀸𑀦𑁂𑀳𑀺 𑀲𑀸𑀫𑀺𑀓𑀁 𑀅𑀦𑀼𑀓𑀫𑁆𑀧𑀢𑀺 𑁋 𑀲𑀼𑀲𑀁𑀯𑀺𑀳𑀺𑀢𑀓𑀫𑁆𑀫𑀦𑁆𑀢𑀸 𑀘 𑀳𑁄𑀢𑀺, 𑀲𑀗𑁆𑀕𑀳𑀺𑀢𑀧𑀭𑀺𑀚𑀦𑀸 [𑀲𑀼𑀲𑀗𑁆𑀕𑀳𑀺𑀢𑀧𑀭𑀺𑀚𑀦𑀸 (𑀲𑀻. 𑀲𑁆𑀬𑀸. 𑀧𑀻.)] 𑀘, 𑀅𑀦𑀢𑀺𑀘𑀸𑀭𑀺𑀦𑀻 𑀘, 𑀲𑀫𑁆𑀪𑀢𑀜𑁆𑀘 𑀅𑀦𑀼𑀭𑀓𑁆𑀔𑀢𑀺, 𑀤𑀓𑁆𑀔𑀸 𑀘 𑀳𑁄𑀢𑀺 𑀅𑀦𑀮𑀲𑀸 𑀲𑀩𑁆𑀩𑀓𑀺𑀘𑁆𑀘𑁂𑀲𑀼. 𑀇𑀫𑁂𑀳𑀺 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀧𑀜𑁆𑀘𑀳𑀺 𑀞𑀸𑀦𑁂𑀳𑀺 𑀲𑀸𑀫𑀺𑀓𑁂𑀦 𑀧𑀘𑁆𑀙𑀺𑀫𑀸 𑀤𑀺𑀲𑀸 𑀪𑀭𑀺𑀬𑀸 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀞𑀸𑀦𑁂𑀳𑀺 𑀲𑀸𑀫𑀺𑀓𑀁 𑀅𑀦𑀼𑀓𑀫𑁆𑀧𑀢𑀺. 𑀏𑀯𑀫𑀲𑁆𑀲 𑀏𑀲𑀸 𑀧𑀘𑁆𑀙𑀺𑀫𑀸 𑀤𑀺𑀲𑀸 𑀧𑀝𑀺𑀘𑁆𑀙𑀦𑁆𑀦𑀸 𑀳𑁄𑀢𑀺 𑀔𑁂𑀫𑀸 𑀅𑀧𑁆𑀧𑀝𑀺𑀪𑀬𑀸.

𑁨𑁭𑁦. ‘‘𑀧𑀜𑁆𑀘𑀳𑀺 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀞𑀸𑀦𑁂𑀳𑀺 𑀓𑀼𑀮𑀧𑀼𑀢𑁆𑀢𑁂𑀦 𑀉𑀢𑁆𑀢𑀭𑀸 𑀤𑀺𑀲𑀸 𑀫𑀺𑀢𑁆𑀢𑀸𑀫𑀘𑁆𑀘𑀸 𑀧𑀘𑁆𑀘𑀼𑀧𑀝𑁆𑀞𑀸𑀢𑀩𑁆𑀩𑀸 𑁋 𑀤𑀸𑀦𑁂𑀦 𑀧𑁂𑀬𑁆𑀬𑀯𑀚𑁆𑀚𑁂𑀦 [𑀯𑀺𑀬𑀯𑀚𑁆𑀚𑁂𑀦 (𑀲𑁆𑀬𑀸. 𑀓.)] 𑀅𑀢𑁆𑀣𑀘𑀭𑀺𑀬𑀸𑀬 𑀲𑀫𑀸𑀦𑀢𑁆𑀢𑀢𑀸𑀬 𑀅𑀯𑀺𑀲𑀁𑀯𑀸𑀤𑀦𑀢𑀸𑀬. 𑀇𑀫𑁂𑀳𑀺 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀧𑀜𑁆𑀘𑀳𑀺 𑀞𑀸𑀦𑁂𑀳𑀺 𑀓𑀼𑀮𑀧𑀼𑀢𑁆𑀢𑁂𑀦 𑀉𑀢𑁆𑀢𑀭𑀸 𑀤𑀺𑀲𑀸 𑀫𑀺𑀢𑁆𑀢𑀸𑀫𑀘𑁆𑀘𑀸 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀧𑀜𑁆𑀘𑀳𑀺 𑀞𑀸𑀦𑁂𑀳𑀺 𑀓𑀼𑀮𑀧𑀼𑀢𑁆𑀢𑀁 𑀅𑀦𑀼𑀓𑀫𑁆𑀧𑀦𑁆𑀢𑀺 𑁋 𑀧𑀫𑀢𑁆𑀢𑀁 𑀭𑀓𑁆𑀔𑀦𑁆𑀢𑀺, 𑀧𑀫𑀢𑁆𑀢𑀲𑁆𑀲 𑀲𑀸𑀧𑀢𑁂𑀬𑁆𑀬𑀁 𑀭𑀓𑁆𑀔𑀦𑁆𑀢𑀺, 𑀪𑀻𑀢𑀲𑁆𑀲 𑀲𑀭𑀡𑀁 𑀳𑁄𑀦𑁆𑀢𑀺, 𑀆𑀧𑀤𑀸𑀲𑀼 𑀦 𑀯𑀺𑀚𑀳𑀦𑁆𑀢𑀺, 𑀅𑀧𑀭𑀧𑀚𑀸 𑀘𑀲𑁆𑀲 𑀧𑀝𑀺𑀧𑀽𑀚𑁂𑀦𑁆𑀢𑀺. 𑀇𑀫𑁂𑀳𑀺 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀧𑀜𑁆𑀘𑀳𑀺 𑀞𑀸𑀦𑁂𑀳𑀺 𑀓𑀼𑀮𑀧𑀼𑀢𑁆𑀢𑁂𑀦 𑀉𑀢𑁆𑀢𑀭𑀸 𑀤𑀺𑀲𑀸 𑀫𑀺𑀢𑁆𑀢𑀸𑀫𑀘𑁆𑀘𑀸 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀞𑀸𑀦𑁂𑀳𑀺 𑀓𑀼𑀮𑀧𑀼𑀢𑁆𑀢𑀁 𑀅𑀦𑀼𑀓𑀫𑁆𑀧𑀦𑁆𑀢𑀺. 𑀏𑀯𑀫𑀲𑁆𑀲 𑀏𑀲𑀸 𑀉𑀢𑁆𑀢𑀭𑀸 𑀤𑀺𑀲𑀸 𑀧𑀝𑀺𑀘𑁆𑀙𑀦𑁆𑀦𑀸 𑀳𑁄𑀢𑀺 𑀔𑁂𑀫𑀸 𑀅𑀧𑁆𑀧𑀝𑀺𑀪𑀬𑀸.

𑁨𑁭𑁧. ‘‘𑀧𑀜𑁆𑀘𑀳𑀺 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀞𑀸𑀦𑁂𑀳𑀺 𑀅𑀬𑁆𑀬𑀺𑀭𑀓𑁂𑀦 [𑀅𑀬𑀺𑀭𑀓𑁂𑀦 (𑀲𑀻. 𑀲𑁆𑀬𑀸. 𑀧𑀻.)] 𑀳𑁂𑀝𑁆𑀞𑀺𑀫𑀸 𑀤𑀺𑀲𑀸 𑀤𑀸𑀲𑀓𑀫𑁆𑀫𑀓𑀭𑀸 𑀧𑀘𑁆𑀘𑀼𑀧𑀝𑁆𑀞𑀸𑀢𑀩𑁆𑀩𑀸 𑁋 𑀬𑀣𑀸𑀩𑀮𑀁 𑀓𑀫𑁆𑀫𑀦𑁆𑀢𑀲𑀁𑀯𑀺𑀥𑀸𑀦𑁂𑀦 𑀪𑀢𑁆𑀢𑀯𑁂𑀢𑀦𑀸𑀦𑀼𑀧𑁆𑀧𑀤𑀸𑀦𑁂𑀦 𑀕𑀺𑀮𑀸𑀦𑀼𑀧𑀝𑁆𑀞𑀸𑀦𑁂𑀦 𑀅𑀘𑁆𑀙𑀭𑀺𑀬𑀸𑀦𑀁 𑀭𑀲𑀸𑀦𑀁 𑀲𑀁𑀯𑀺𑀪𑀸𑀕𑁂𑀦 𑀲𑀫𑀬𑁂 𑀯𑁄𑀲𑁆𑀲𑀕𑁆𑀕𑁂𑀦. 𑀇𑀫𑁂𑀳𑀺 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀧𑀜𑁆𑀘𑀳𑀺 𑀞𑀸𑀦𑁂𑀳𑀺 𑀅𑀬𑁆𑀬𑀺𑀭𑀓𑁂𑀦 𑀳𑁂𑀝𑁆𑀞𑀺𑀫𑀸 𑀤𑀺𑀲𑀸 𑀤𑀸𑀲𑀓𑀫𑁆𑀫𑀓𑀭𑀸 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀧𑀜𑁆𑀘𑀳𑀺 𑀞𑀸𑀦𑁂𑀳𑀺 𑀅𑀬𑁆𑀬𑀺𑀭𑀓𑀁 𑀅𑀦𑀼𑀓𑀫𑁆𑀧𑀦𑁆𑀢𑀺 𑁋 𑀧𑀼𑀩𑁆𑀩𑀼𑀝𑁆𑀞𑀸𑀬𑀺𑀦𑁄 𑀘 𑀳𑁄𑀦𑁆𑀢𑀺, 𑀧𑀘𑁆𑀙𑀸 𑀦𑀺𑀧𑀸𑀢𑀺𑀦𑁄 𑀘, 𑀤𑀺𑀦𑁆𑀦𑀸𑀤𑀸𑀬𑀺𑀦𑁄 𑀘, 𑀲𑀼𑀓𑀢𑀓𑀫𑁆𑀫𑀓𑀭𑀸 𑀘, 𑀓𑀺𑀢𑁆𑀢𑀺𑀯𑀡𑁆𑀡𑀳𑀭𑀸 𑀘. 𑀇𑀫𑁂𑀳𑀺 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀧𑀜𑁆𑀘𑀳𑀺 𑀞𑀸𑀦𑁂𑀳𑀺 𑀅𑀬𑁆𑀬𑀺𑀭𑀓𑁂𑀦 𑀳𑁂𑀝𑁆𑀞𑀺𑀫𑀸 𑀤𑀺𑀲𑀸 𑀤𑀸𑀲𑀓𑀫𑁆𑀫𑀓𑀭𑀸 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀞𑀸𑀦𑁂𑀳𑀺 𑀅𑀬𑁆𑀬𑀺𑀭𑀓𑀁 𑀅𑀦𑀼𑀓𑀫𑁆𑀧𑀦𑁆𑀢𑀺. 𑀏𑀯𑀫𑀲𑁆𑀲 𑀏𑀲𑀸 𑀳𑁂𑀝𑁆𑀞𑀺𑀫𑀸 𑀤𑀺𑀲𑀸 𑀧𑀝𑀺𑀘𑁆𑀙𑀦𑁆𑀦𑀸 𑀳𑁄𑀢𑀺 𑀔𑁂𑀫𑀸 𑀅𑀧𑁆𑀧𑀝𑀺𑀪𑀬𑀸.

𑁨𑁭𑁨. ‘‘𑀧𑀜𑁆𑀘𑀳𑀺 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀞𑀸𑀦𑁂𑀳𑀺 𑀓𑀼𑀮𑀧𑀼𑀢𑁆𑀢𑁂𑀦 𑀉𑀧𑀭𑀺𑀫𑀸 𑀤𑀺𑀲𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀧𑀘𑁆𑀘𑀼𑀧𑀝𑁆𑀞𑀸𑀢𑀩𑁆𑀩𑀸 𑁋 𑀫𑁂𑀢𑁆𑀢𑁂𑀦 𑀓𑀸𑀬𑀓𑀫𑁆𑀫𑁂𑀦 𑀫𑁂𑀢𑁆𑀢𑁂𑀦 𑀯𑀘𑀻𑀓𑀫𑁆𑀫𑁂𑀦 𑀫𑁂𑀢𑁆𑀢𑁂𑀦 𑀫𑀦𑁄𑀓𑀫𑁆𑀫𑁂𑀦 𑀅𑀦𑀸𑀯𑀝𑀤𑁆𑀯𑀸𑀭𑀢𑀸𑀬 𑀆𑀫𑀺𑀲𑀸𑀦𑀼𑀧𑁆𑀧𑀤𑀸𑀦𑁂𑀦. 𑀇𑀫𑁂𑀳𑀺 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀧𑀜𑁆𑀘𑀳𑀺 𑀞𑀸𑀦𑁂𑀳𑀺 𑀓𑀼𑀮𑀧𑀼𑀢𑁆𑀢𑁂𑀦 𑀉𑀧𑀭𑀺𑀫𑀸 𑀤𑀺𑀲𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀙𑀳𑀺 𑀞𑀸𑀦𑁂𑀳𑀺 𑀓𑀼𑀮𑀧𑀼𑀢𑁆𑀢𑀁 𑀅𑀦𑀼𑀓𑀫𑁆𑀧𑀦𑁆𑀢𑀺 𑁋 𑀧𑀸𑀧𑀸 𑀦𑀺𑀯𑀸𑀭𑁂𑀦𑁆𑀢𑀺, 𑀓𑀮𑁆𑀬𑀸𑀡𑁂 𑀦𑀺𑀯𑁂𑀲𑁂𑀦𑁆𑀢𑀺, 𑀓𑀮𑁆𑀬𑀸𑀡𑁂𑀦 𑀫𑀦𑀲𑀸 𑀅𑀦𑀼𑀓𑀫𑁆𑀧𑀦𑁆𑀢𑀺, 𑀅𑀲𑁆𑀲𑀼𑀢𑀁 𑀲𑀸𑀯𑁂𑀦𑁆𑀢𑀺, 𑀲𑀼𑀢𑀁 𑀧𑀭𑀺𑀬𑁄𑀤𑀸𑀧𑁂𑀦𑁆𑀢𑀺, 𑀲𑀕𑁆𑀕𑀲𑁆𑀲 𑀫𑀕𑁆𑀕𑀁 𑀆𑀘𑀺𑀓𑁆𑀔𑀦𑁆𑀢𑀺. 𑀇𑀫𑁂𑀳𑀺 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀧𑀜𑁆𑀘𑀳𑀺 𑀞𑀸𑀦𑁂𑀳𑀺 𑀓𑀼𑀮𑀧𑀼𑀢𑁆𑀢𑁂𑀦 𑀉𑀧𑀭𑀺𑀫𑀸 𑀤𑀺𑀲𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀇𑀫𑁂𑀳𑀺 𑀙𑀳𑀺 𑀞𑀸𑀦𑁂𑀳𑀺 𑀓𑀼𑀮𑀧𑀼𑀢𑁆𑀢𑀁 𑀅𑀦𑀼𑀓𑀫𑁆𑀧𑀦𑁆𑀢𑀺. 𑀏𑀯𑀫𑀲𑁆𑀲 𑀏𑀲𑀸 𑀉𑀧𑀭𑀺𑀫𑀸 𑀤𑀺𑀲𑀸 𑀧𑀝𑀺𑀘𑁆𑀙𑀦𑁆𑀦𑀸 𑀳𑁄𑀢𑀺 𑀔𑁂𑀫𑀸 𑀅𑀧𑁆𑀧𑀝𑀺𑀪𑀬𑀸’’𑀢𑀺.

𑁨𑁭𑁩. 𑀇𑀤𑀫𑀯𑁄𑀘 𑀪𑀕𑀯𑀸. 𑀇𑀤𑀁 𑀯𑀢𑁆𑀯𑀸𑀦 𑀲𑀼𑀕𑀢𑁄 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑀲𑀢𑁆𑀣𑀸 𑁋

‘‘𑀫𑀸𑀢𑀸𑀧𑀺𑀢𑀸 𑀤𑀺𑀲𑀸 𑀧𑀼𑀩𑁆𑀩𑀸, 𑀆𑀘𑀭𑀺𑀬𑀸 𑀤𑀓𑁆𑀔𑀺𑀡𑀸 𑀤𑀺𑀲𑀸;

𑀧𑀼𑀢𑁆𑀢𑀤𑀸𑀭𑀸 𑀤𑀺𑀲𑀸 𑀧𑀘𑁆𑀙𑀸, 𑀫𑀺𑀢𑁆𑀢𑀸𑀫𑀘𑁆𑀘𑀸 𑀘 𑀉𑀢𑁆𑀢𑀭𑀸.

‘‘𑀤𑀸𑀲𑀓𑀫𑁆𑀫𑀓𑀭𑀸 𑀳𑁂𑀝𑁆𑀞𑀸, 𑀉𑀤𑁆𑀥𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸;

𑀏𑀢𑀸 𑀤𑀺𑀲𑀸 𑀦𑀫𑀲𑁆𑀲𑁂𑀬𑁆𑀬, 𑀅𑀮𑀫𑀢𑁆𑀢𑁄 𑀓𑀼𑀮𑁂 𑀕𑀺𑀳𑀻.

‘‘𑀧𑀡𑁆𑀟𑀺𑀢𑁄 𑀲𑀻𑀮𑀲𑀫𑁆𑀧𑀦𑁆𑀦𑁄, 𑀲𑀡𑁆𑀳𑁄 𑀘 𑀧𑀝𑀺𑀪𑀸𑀦𑀯𑀸;

𑀦𑀺𑀯𑀸𑀢𑀯𑀼𑀢𑁆𑀢𑀺 𑀅𑀢𑁆𑀣𑀤𑁆𑀥𑁄, 𑀢𑀸𑀤𑀺𑀲𑁄 𑀮𑀪𑀢𑁂 𑀬𑀲𑀁.

‘‘𑀉𑀝𑁆𑀞𑀸𑀦𑀓𑁄 𑀅𑀦𑀮𑀲𑁄, 𑀆𑀧𑀤𑀸𑀲𑀼 𑀦 𑀯𑁂𑀥𑀢𑀺;

𑀅𑀘𑁆𑀙𑀺𑀦𑁆𑀦𑀯𑀼𑀢𑁆𑀢𑀺 𑀫𑁂𑀥𑀸𑀯𑀻, 𑀢𑀸𑀤𑀺𑀲𑁄 𑀮𑀪𑀢𑁂 𑀬𑀲𑀁.

‘‘𑀲𑀗𑁆𑀕𑀸𑀳𑀓𑁄 𑀫𑀺𑀢𑁆𑀢𑀓𑀭𑁄, 𑀯𑀤𑀜𑁆𑀜𑀽 𑀯𑀻𑀢𑀫𑀘𑁆𑀙𑀭𑁄;

𑀦𑁂𑀢𑀸 𑀯𑀺𑀦𑁂𑀢𑀸 𑀅𑀦𑀼𑀦𑁂𑀢𑀸, 𑀢𑀸𑀤𑀺𑀲𑁄 𑀮𑀪𑀢𑁂 𑀬𑀲𑀁.

‘‘𑀤𑀸𑀦𑀜𑁆𑀘 𑀧𑁂𑀬𑁆𑀬𑀯𑀚𑁆𑀚𑀜𑁆𑀘, 𑀅𑀢𑁆𑀣𑀘𑀭𑀺𑀬𑀸 𑀘 𑀬𑀸 𑀇𑀥;

𑀲𑀫𑀸𑀦𑀢𑁆𑀢𑀢𑀸 𑀘 𑀥𑀫𑁆𑀫𑁂𑀲𑀼, 𑀢𑀢𑁆𑀣 𑀢𑀢𑁆𑀣 𑀬𑀣𑀸𑀭𑀳𑀁;

𑀏𑀢𑁂 𑀔𑁄 𑀲𑀗𑁆𑀕𑀳𑀸 𑀮𑁄𑀓𑁂, 𑀭𑀣𑀲𑁆𑀲𑀸𑀡𑀻𑀯 𑀬𑀸𑀬𑀢𑁄.

‘‘𑀏𑀢𑁂 𑀘 𑀲𑀗𑁆𑀕𑀳𑀸 𑀦𑀸𑀲𑁆𑀲𑀼, 𑀦 𑀫𑀸𑀢𑀸 𑀧𑀼𑀢𑁆𑀢𑀓𑀸𑀭𑀡𑀸;

𑀮𑀪𑁂𑀣 𑀫𑀸𑀦𑀁 𑀧𑀽𑀚𑀁 𑀯𑀸, 𑀧𑀺𑀢𑀸 𑀯𑀸 𑀧𑀼𑀢𑁆𑀢𑀓𑀸𑀭𑀡𑀸.

‘‘𑀬𑀲𑁆𑀫𑀸 𑀘 𑀲𑀗𑁆𑀕𑀳𑀸 [𑀲𑀗𑁆𑀕𑀳𑁂 (𑀓.) 𑀅𑀝𑁆𑀞𑀓𑀣𑀸𑀬𑀁 𑀇𑀘𑁆𑀙𑀺𑀢𑀧𑀸𑀞𑁄] 𑀏𑀢𑁂, 𑀲𑀫𑁆𑀫𑀧𑁂𑀓𑁆𑀔𑀦𑁆𑀢𑀺 [𑀲𑀫𑀯𑁂𑀓𑁆𑀔𑀦𑁆𑀢𑀺 (𑀲𑀻. 𑀧𑀻. 𑀓.)] 𑀧𑀡𑁆𑀟𑀺𑀢𑀸;

𑀢𑀲𑁆𑀫𑀸 𑀫𑀳𑀢𑁆𑀢𑀁 𑀧𑀧𑁆𑀧𑁄𑀦𑁆𑀢𑀺, 𑀧𑀸𑀲𑀁𑀲𑀸 𑀘 𑀪𑀯𑀦𑁆𑀢𑀺 𑀢𑁂’’𑀢𑀺.

𑁨𑁭𑁪. 𑀏𑀯𑀁 𑀯𑀼𑀢𑁆𑀢𑁂, 𑀲𑀺𑀗𑁆𑀕𑀸𑀮𑀓𑁄 𑀕𑀳𑀧𑀢𑀺𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑀦𑁆𑀢𑁂! 𑀅𑀪𑀺𑀓𑁆𑀓𑀦𑁆𑀢𑀁, 𑀪𑀦𑁆𑀢𑁂! 𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 𑀯𑀸 𑀉𑀓𑁆𑀓𑀼𑀚𑁆𑀚𑁂𑀬𑁆𑀬, 𑀧𑀝𑀺𑀘𑁆𑀙𑀦𑁆𑀦𑀁 𑀯𑀸 𑀯𑀺𑀯𑀭𑁂𑀬𑁆𑀬, 𑀫𑀽𑀴𑁆𑀳𑀲𑁆𑀲 𑀯𑀸 𑀫𑀕𑁆𑀕𑀁 𑀆𑀘𑀺𑀓𑁆𑀔𑁂𑀬𑁆𑀬, 𑀅𑀦𑁆𑀥𑀓𑀸𑀭𑁂 𑀯𑀸 𑀢𑁂𑀮𑀧𑀚𑁆𑀚𑁄𑀢𑀁 𑀥𑀸𑀭𑁂𑀬𑁆𑀬 ‘𑀘𑀓𑁆𑀔𑀼𑀫𑀦𑁆𑀢𑁄 𑀭𑀽𑀧𑀸𑀦𑀺 𑀤𑀓𑁆𑀔𑀦𑁆𑀢𑀻’𑀢𑀺. 𑀏𑀯𑀫𑁂𑀯𑀁 𑀪𑀕𑀯𑀢𑀸 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑁄 𑀧𑀓𑀸𑀲𑀺𑀢𑁄. 𑀏𑀲𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺 𑀥𑀫𑁆𑀫𑀜𑁆𑀘 𑀪𑀺𑀓𑁆𑀔𑀼𑀲𑀁𑀖𑀜𑁆𑀘. 𑀉𑀧𑀸𑀲𑀓𑀁 𑀫𑀁 𑀪𑀕𑀯𑀸 𑀥𑀸𑀭𑁂𑀢𑀼, 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢’’𑀦𑁆𑀢𑀺.

𑀲𑀺𑀗𑁆𑀕𑀸𑀮𑀲𑀼𑀢𑁆𑀢𑀁 [𑀲𑀺𑀗𑁆𑀕𑀸𑀮𑁄𑀯𑀸𑀤𑀲𑀼𑀢𑁆𑀢𑀦𑁆𑀢𑀁 (𑀧𑀻.)] 𑀦𑀺𑀝𑁆𑀞𑀺𑀢𑀁 𑀅𑀝𑁆𑀞𑀫𑀁.