𑁯. 𑀆𑀝𑀸𑀦𑀸𑀝𑀺𑀬𑀲𑀼𑀢𑁆𑀢𑀁

𑀧𑀞𑀫𑀪𑀸𑀡𑀯𑀸𑀭𑁄

𑁨𑁭𑁫. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂. 𑀅𑀣 𑀔𑁄 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸 [𑀫𑀳𑀸𑀭𑀸𑀚𑀸𑀦𑁄 (𑀓.)] 𑀫𑀳𑀢𑀺𑀬𑀸 𑀘 𑀬𑀓𑁆𑀔𑀲𑁂𑀦𑀸𑀬 𑀫𑀳𑀢𑀺𑀬𑀸 𑀘 𑀕𑀦𑁆𑀥𑀩𑁆𑀩𑀲𑁂𑀦𑀸𑀬 𑀫𑀳𑀢𑀺𑀬𑀸 𑀘 𑀓𑀼𑀫𑁆𑀪𑀡𑁆𑀟𑀲𑁂𑀦𑀸𑀬 𑀫𑀳𑀢𑀺𑀬𑀸 𑀘 𑀦𑀸𑀕𑀲𑁂𑀦𑀸𑀬 𑀘𑀢𑀼𑀤𑁆𑀤𑀺𑀲𑀁 𑀭𑀓𑁆𑀔𑀁 𑀞𑀧𑁂𑀢𑁆𑀯𑀸 𑀘𑀢𑀼𑀤𑁆𑀤𑀺𑀲𑀁 𑀕𑀼𑀫𑁆𑀩𑀁 𑀞𑀧𑁂𑀢𑁆𑀯𑀸 𑀘𑀢𑀼𑀤𑁆𑀤𑀺𑀲𑀁 𑀑𑀯𑀭𑀡𑀁 𑀞𑀧𑁂𑀢𑁆𑀯𑀸 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸 𑀓𑁂𑀯𑀮𑀓𑀧𑁆𑀧𑀁 𑀕𑀺𑀚𑁆𑀛𑀓𑀽𑀝𑀁 𑀧𑀩𑁆𑀩𑀢𑀁 𑀑𑀪𑀸𑀲𑁂𑀢𑁆𑀯𑀸 [𑀕𑀺𑀚𑁆𑀛𑀓𑀽𑀝𑀁 𑀑𑀪𑀸𑀲𑁂𑀢𑁆𑀯𑀸 (𑀲𑀻. 𑀲𑁆𑀬𑀸. 𑀧𑀻.)] 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀢𑁂𑀧𑀺 𑀔𑁄 𑀬𑀓𑁆𑀔𑀸 𑀅𑀧𑁆𑀧𑁂𑀓𑀘𑁆𑀘𑁂 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼, 𑀅𑀧𑁆𑀧𑁂𑀓𑀘𑁆𑀘𑁂 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀁𑀲𑀼, 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼, 𑀅𑀧𑁆𑀧𑁂𑀓𑀘𑁆𑀘𑁂 𑀬𑁂𑀦 𑀪𑀕𑀯𑀸 𑀢𑁂𑀦𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼, 𑀅𑀧𑁆𑀧𑁂𑀓𑀘𑁆𑀘𑁂 𑀦𑀸𑀫𑀕𑁄𑀢𑁆𑀢𑀁 𑀲𑀸𑀯𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼, 𑀅𑀧𑁆𑀧𑁂𑀓𑀘𑁆𑀘𑁂 𑀢𑀼𑀡𑁆𑀳𑀻𑀪𑀽𑀢𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼.

𑁨𑁭𑁬. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀯𑁂𑀲𑁆𑀲𑀯𑀡𑁄 𑀫𑀳𑀸𑀭𑀸𑀚𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀦𑁆𑀢𑀺 𑀳𑀺, 𑀪𑀦𑁆𑀢𑁂, 𑀉𑀴𑀸𑀭𑀸 𑀬𑀓𑁆𑀔𑀸 𑀪𑀕𑀯𑀢𑁄 𑀅𑀧𑁆𑀧𑀲𑀦𑁆𑀦𑀸. 𑀲𑀦𑁆𑀢𑀺 𑀳𑀺, 𑀪𑀦𑁆𑀢𑁂, 𑀉𑀴𑀸𑀭𑀸 𑀬𑀓𑁆𑀔𑀸 𑀪𑀕𑀯𑀢𑁄 𑀧𑀲𑀦𑁆𑀦𑀸. 𑀲𑀦𑁆𑀢𑀺 𑀳𑀺, 𑀪𑀦𑁆𑀢𑁂, 𑀫𑀚𑁆𑀛𑀺𑀫𑀸 𑀬𑀓𑁆𑀔𑀸 𑀪𑀕𑀯𑀢𑁄 𑀅𑀧𑁆𑀧𑀲𑀦𑁆𑀦𑀸. 𑀲𑀦𑁆𑀢𑀺 𑀳𑀺, 𑀪𑀦𑁆𑀢𑁂, 𑀫𑀚𑁆𑀛𑀺𑀫𑀸 𑀬𑀓𑁆𑀔𑀸 𑀪𑀕𑀯𑀢𑁄 𑀧𑀲𑀦𑁆𑀦𑀸. 𑀲𑀦𑁆𑀢𑀺 𑀳𑀺, 𑀪𑀦𑁆𑀢𑁂, 𑀦𑀻𑀘𑀸 𑀬𑀓𑁆𑀔𑀸 𑀪𑀕𑀯𑀢𑁄 𑀅𑀧𑁆𑀧𑀲𑀦𑁆𑀦𑀸. 𑀲𑀦𑁆𑀢𑀺 𑀳𑀺, 𑀪𑀦𑁆𑀢𑁂, 𑀦𑀻𑀘𑀸 𑀬𑀓𑁆𑀔𑀸 𑀪𑀕𑀯𑀢𑁄 𑀧𑀲𑀦𑁆𑀦𑀸. 𑀬𑁂𑀪𑀼𑀬𑁆𑀬𑁂𑀦 𑀔𑁄 𑀧𑀦, 𑀪𑀦𑁆𑀢𑁂, 𑀬𑀓𑁆𑀔𑀸 𑀅𑀧𑁆𑀧𑀲𑀦𑁆𑀦𑀸𑀬𑁂𑀯 𑀪𑀕𑀯𑀢𑁄. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀪𑀕𑀯𑀸 𑀳𑀺, 𑀪𑀦𑁆𑀢𑁂, 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀺𑀬𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀅𑀤𑀺𑀦𑁆𑀦𑀸𑀤𑀸𑀦𑀸 𑀯𑁂𑀭𑀫𑀡𑀺𑀬𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀯𑁂𑀭𑀫𑀡𑀺𑀬𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀫𑀼𑀲𑀸𑀯𑀸𑀤𑀸 𑀯𑁂𑀭𑀫𑀡𑀺𑀬𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑁆𑀧𑀫𑀸𑀤𑀝𑁆𑀞𑀸𑀦𑀸 𑀯𑁂𑀭𑀫𑀡𑀺𑀬𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀬𑁂𑀪𑀼𑀬𑁆𑀬𑁂𑀦 𑀔𑁄 𑀧𑀦, 𑀪𑀦𑁆𑀢𑁂, 𑀬𑀓𑁆𑀔𑀸 𑀅𑀧𑁆𑀧𑀝𑀺𑀯𑀺𑀭𑀢𑀸𑀬𑁂𑀯 𑀧𑀸𑀡𑀸𑀢𑀺𑀧𑀸𑀢𑀸, 𑀅𑀧𑁆𑀧𑀝𑀺𑀯𑀺𑀭𑀢𑀸 𑀅𑀤𑀺𑀦𑁆𑀦𑀸𑀤𑀸𑀦𑀸, 𑀅𑀧𑁆𑀧𑀝𑀺𑀯𑀺𑀭𑀢𑀸 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸, 𑀅𑀧𑁆𑀧𑀝𑀺𑀯𑀺𑀭𑀢𑀸 𑀫𑀼𑀲𑀸𑀯𑀸𑀤𑀸, 𑀅𑀧𑁆𑀧𑀝𑀺𑀯𑀺𑀭𑀢𑀸 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑁆𑀧𑀫𑀸𑀤𑀝𑁆𑀞𑀸𑀦𑀸. 𑀢𑁂𑀲𑀁 𑀢𑀁 𑀳𑁄𑀢𑀺 𑀅𑀧𑁆𑀧𑀺𑀬𑀁 𑀅𑀫𑀦𑀸𑀧𑀁. 𑀲𑀦𑁆𑀢𑀺 𑀳𑀺, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀸𑀯𑀓𑀸 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀦𑁆𑀢𑀺 𑀅𑀧𑁆𑀧𑀲𑀤𑁆𑀤𑀸𑀦𑀺 𑀅𑀧𑁆𑀧𑀦𑀺𑀕𑁆𑀖𑁄𑀲𑀸𑀦𑀺 𑀯𑀺𑀚𑀦𑀯𑀸𑀢𑀸𑀦𑀺 𑀫𑀦𑀼𑀲𑁆𑀲𑀭𑀸𑀳𑀲𑁆𑀲𑁂𑀬𑁆𑀬𑀓𑀸𑀦𑀺 [𑀫𑀦𑀼𑀲𑁆𑀲𑀭𑀸𑀳𑀲𑁂𑀬𑁆𑀬𑀓𑀸𑀦𑀺 (𑀲𑀻. 𑀲𑁆𑀬𑀸. 𑀧𑀻.)] 𑀧𑀝𑀺𑀲𑀮𑁆𑀮𑀸𑀦𑀲𑀸𑀭𑀼𑀧𑁆𑀧𑀸𑀦𑀺. 𑀢𑀢𑁆𑀣 𑀲𑀦𑁆𑀢𑀺 𑀉𑀴𑀸𑀭𑀸 𑀬𑀓𑁆𑀔𑀸 𑀦𑀺𑀯𑀸𑀲𑀺𑀦𑁄, 𑀬𑁂 𑀇𑀫𑀲𑁆𑀫𑀺𑀁 𑀪𑀕𑀯𑀢𑁄 𑀧𑀸𑀯𑀘𑀦𑁂 𑀅𑀧𑁆𑀧𑀲𑀦𑁆𑀦𑀸. 𑀢𑁂𑀲𑀁 𑀧𑀲𑀸𑀤𑀸𑀬 𑀉𑀕𑁆𑀕𑀡𑁆𑀳𑀸𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀆𑀝𑀸𑀦𑀸𑀝𑀺𑀬𑀁 𑀭𑀓𑁆𑀔𑀁 𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀉𑀧𑀸𑀲𑀓𑀸𑀦𑀁 𑀉𑀧𑀸𑀲𑀺𑀓𑀸𑀦𑀁 𑀕𑀼𑀢𑁆𑀢𑀺𑀬𑀸 𑀭𑀓𑁆𑀔𑀸𑀬 𑀅𑀯𑀺𑀳𑀺𑀁𑀲𑀸𑀬 𑀨𑀸𑀲𑀼𑀯𑀺𑀳𑀸𑀭𑀸𑀬𑀸’’𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦.

𑀅𑀣 𑀔𑁄 𑀯𑁂𑀲𑁆𑀲𑀯𑀡𑁄 𑀫𑀳𑀸𑀭𑀸𑀚𑀸 𑀪𑀕𑀯𑀢𑁄 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀆𑀝𑀸𑀦𑀸𑀝𑀺𑀬𑀁 𑀭𑀓𑁆𑀔𑀁 𑀅𑀪𑀸𑀲𑀺 𑁋

𑁨𑁭𑁭. ‘‘𑀯𑀺𑀧𑀲𑁆𑀲𑀺𑀲𑁆𑀲 𑀘 [𑀇𑀫𑁂 𑀘𑀓𑀸𑀭𑀸 𑀧𑁄𑀭𑀸𑀡𑀧𑁄𑀢𑁆𑀣𑀓𑁂𑀲𑀼 𑀦𑀢𑁆𑀣𑀺] 𑀦𑀫𑀢𑁆𑀣𑀼, 𑀘𑀓𑁆𑀔𑀼𑀫𑀦𑁆𑀢𑀲𑁆𑀲 𑀲𑀺𑀭𑀻𑀫𑀢𑁄.

𑀲𑀺𑀔𑀺𑀲𑁆𑀲𑀧𑀺 𑀘 [𑀇𑀫𑁂 𑀘𑀓𑀸𑀭𑀸 𑀧𑁄𑀭𑀸𑀡𑀧𑁄𑀢𑁆𑀣𑀓𑁂𑀲𑀼 𑀦𑀢𑁆𑀣𑀺] 𑀦𑀫𑀢𑁆𑀣𑀼, 𑀲𑀩𑁆𑀩𑀪𑀽𑀢𑀸𑀦𑀼𑀓𑀫𑁆𑀧𑀺𑀦𑁄.

‘‘𑀯𑁂𑀲𑁆𑀲𑀪𑀼𑀲𑁆𑀲 𑀘 [𑀇𑀫𑁂 𑀘𑀓𑀸𑀭𑀸 𑀧𑁄𑀭𑀸𑀡𑀧𑁄𑀢𑁆𑀣𑀓𑁂𑀲𑀼 𑀦𑀢𑁆𑀣𑀺] 𑀦𑀫𑀢𑁆𑀣𑀼, 𑀦𑁆𑀳𑀸𑀢𑀓𑀲𑁆𑀲 𑀢𑀧𑀲𑁆𑀲𑀺𑀦𑁄;

𑀦𑀫𑀢𑁆𑀣𑀼 𑀓𑀓𑀼𑀲𑀦𑁆𑀥𑀲𑁆𑀲, 𑀫𑀸𑀭𑀲𑁂𑀦𑀸𑀧𑀫𑀤𑁆𑀤𑀺𑀦𑁄.

‘‘𑀓𑁄𑀡𑀸𑀕𑀫𑀦𑀲𑁆𑀲 𑀦𑀫𑀢𑁆𑀣𑀼, 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀼𑀲𑀻𑀫𑀢𑁄;

𑀓𑀲𑁆𑀲𑀧𑀲𑁆𑀲 𑀘 [𑀇𑀫𑁂 𑀘𑀓𑀸𑀭𑀸 𑀧𑁄𑀭𑀸𑀡𑀧𑁄𑀢𑁆𑀣𑀓𑁂𑀲𑀼 𑀦𑀢𑁆𑀣𑀺] 𑀦𑀫𑀢𑁆𑀣𑀼, 𑀯𑀺𑀧𑁆𑀧𑀫𑀼𑀢𑁆𑀢𑀲𑁆𑀲 𑀲𑀩𑁆𑀩𑀥𑀺.

‘‘𑀅𑀗𑁆𑀕𑀻𑀭𑀲𑀲𑁆𑀲 𑀦𑀫𑀢𑁆𑀣𑀼, 𑀲𑀓𑁆𑀬𑀧𑀼𑀢𑁆𑀢𑀲𑁆𑀲 𑀲𑀺𑀭𑀻𑀫𑀢𑁄;

𑀬𑁄 𑀇𑀫𑀁 𑀥𑀫𑁆𑀫𑀁 𑀤𑁂𑀲𑁂𑀲𑀺 [𑀥𑀫𑁆𑀫𑀫𑀤𑁂𑀲𑁂𑀲𑀺 (𑀲𑀻. 𑀲𑁆𑀬𑀸. 𑀧𑀻.), 𑀥𑀫𑁆𑀫𑀁 𑀤𑁂𑀲𑁂𑀢𑀺 (?)], 𑀲𑀩𑁆𑀩𑀤𑀼𑀓𑁆𑀔𑀸𑀧𑀦𑀽𑀤𑀦𑀁.

‘‘𑀬𑁂 𑀘𑀸𑀧𑀺 𑀦𑀺𑀩𑁆𑀩𑀼𑀢𑀸 𑀮𑁄𑀓𑁂, 𑀬𑀣𑀸𑀪𑀽𑀢𑀁 𑀯𑀺𑀧𑀲𑁆𑀲𑀺𑀲𑀼𑀁;

𑀢𑁂 𑀚𑀦𑀸 𑀅𑀧𑀺𑀲𑀼𑀡𑀸𑀣 [𑀅𑀧𑀺𑀲𑀼𑀡𑀸 (𑀲𑀻. 𑀲𑁆𑀬𑀸. 𑀧𑀻.)], 𑀫𑀳𑀦𑁆𑀢𑀸 𑀯𑀻𑀢𑀲𑀸𑀭𑀤𑀸.

‘‘𑀳𑀺𑀢𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁, 𑀬𑀁 𑀦𑀫𑀲𑁆𑀲𑀦𑁆𑀢𑀺 𑀕𑁄𑀢𑀫𑀁;

𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑀁, 𑀫𑀳𑀦𑁆𑀢𑀁 𑀯𑀻𑀢𑀲𑀸𑀭𑀤𑀁.

𑁨𑁭𑁮. ‘‘𑀬𑀢𑁄 𑀉𑀕𑁆𑀕𑀘𑁆𑀙𑀢𑀺 𑀲𑀽𑀭𑀺𑀬𑁄 [𑀲𑀼𑀭𑀺𑀬𑁄 (𑀲𑀻. 𑀲𑁆𑀬𑀸. 𑀧𑀻.)], 𑀆𑀤𑀺𑀘𑁆𑀘𑁄 𑀫𑀡𑁆𑀟𑀮𑀻 𑀫𑀳𑀸.

𑀬𑀲𑁆𑀲 𑀘𑀼𑀕𑁆𑀕𑀘𑁆𑀙𑀫𑀸𑀦𑀲𑁆𑀲, 𑀲𑀁𑀯𑀭𑀻𑀧𑀺 𑀦𑀺𑀭𑀼𑀚𑁆𑀛𑀢𑀺;

𑀬𑀲𑁆𑀲 𑀘𑀼𑀕𑁆𑀕𑀢𑁂 𑀲𑀽𑀭𑀺𑀬𑁂, ‘𑀤𑀺𑀯𑀲𑁄’𑀢𑀺 𑀧𑀯𑀼𑀘𑁆𑀘𑀢𑀺.

‘‘𑀭𑀳𑀤𑁄𑀧𑀺 𑀢𑀢𑁆𑀣 𑀕𑀫𑁆𑀪𑀻𑀭𑁄, 𑀲𑀫𑀼𑀤𑁆𑀤𑁄 𑀲𑀭𑀺𑀢𑁄𑀤𑀓𑁄;

𑀏𑀯𑀁 𑀢𑀁 𑀢𑀢𑁆𑀣 𑀚𑀸𑀦𑀦𑁆𑀢𑀺, ‘𑀲𑀫𑀼𑀤𑁆𑀤𑁄 𑀲𑀭𑀺𑀢𑁄𑀤𑀓𑁄’.

‘‘𑀇𑀢𑁄 ‘𑀲𑀸 𑀧𑀼𑀭𑀺𑀫𑀸 𑀤𑀺𑀲𑀸’, 𑀇𑀢𑀺 𑀦𑀁 𑀆𑀘𑀺𑀓𑁆𑀔𑀢𑀻 𑀚𑀦𑁄;

𑀬𑀁 𑀤𑀺𑀲𑀁 𑀅𑀪𑀺𑀧𑀸𑀮𑁂𑀢𑀺, 𑀫𑀳𑀸𑀭𑀸𑀚𑀸 𑀬𑀲𑀲𑁆𑀲𑀺 𑀲𑁄.

‘‘𑀕𑀦𑁆𑀥𑀩𑁆𑀩𑀸𑀦𑀁 𑀅𑀥𑀺𑀧𑀢𑀺 [𑀆𑀥𑀺𑀧𑀢𑀺 (𑀲𑀻. 𑀲𑁆𑀬𑀸. 𑀧𑀻.) 𑀏𑀯𑀫𑀼𑀧𑀭𑀺𑀧𑀺], ‘𑀥𑀢𑀭𑀝𑁆𑀞𑁄’𑀢𑀺 𑀦𑀸𑀫𑀲𑁄;

𑀭𑀫𑀢𑀻 𑀦𑀘𑁆𑀘𑀕𑀻𑀢𑁂𑀳𑀺, 𑀕𑀦𑁆𑀥𑀩𑁆𑀩𑁂𑀳𑀺 𑀧𑀼𑀭𑀓𑁆𑀔𑀢𑁄.

‘‘𑀧𑀼𑀢𑁆𑀢𑀸𑀧𑀺 𑀢𑀲𑁆𑀲 𑀩𑀳𑀯𑁄, 𑀏𑀓𑀦𑀸𑀫𑀸𑀢𑀺 𑀫𑁂 𑀲𑀼𑀢𑀁;

𑀅𑀲𑀻𑀢𑀺 𑀤𑀲 𑀏𑀓𑁄 𑀘, 𑀇𑀦𑁆𑀤𑀦𑀸𑀫𑀸 𑀫𑀳𑀩𑁆𑀩𑀮𑀸.

𑀢𑁂 𑀘𑀸𑀧𑀺 𑀩𑀼𑀤𑁆𑀥𑀁 𑀤𑀺𑀲𑁆𑀯𑀸𑀦, 𑀩𑀼𑀤𑁆𑀥𑀁 𑀆𑀤𑀺𑀘𑁆𑀘𑀩𑀦𑁆𑀥𑀼𑀦𑀁;

𑀤𑀽𑀭𑀢𑁄𑀯 𑀦𑀫𑀲𑁆𑀲𑀦𑁆𑀢𑀺, 𑀫𑀳𑀦𑁆𑀢𑀁 𑀯𑀻𑀢𑀲𑀸𑀭𑀤𑀁.

‘‘𑀦𑀫𑁄 𑀢𑁂 𑀧𑀼𑀭𑀺𑀲𑀸𑀚𑀜𑁆𑀜, 𑀦𑀫𑁄 𑀢𑁂 𑀧𑀼𑀭𑀺𑀲𑀼𑀢𑁆𑀢𑀫;

𑀓𑀼𑀲𑀮𑁂𑀦 𑀲𑀫𑁂𑀓𑁆𑀔𑀲𑀺, 𑀅𑀫𑀦𑀼𑀲𑁆𑀲𑀸𑀧𑀺 𑀢𑀁 𑀯𑀦𑁆𑀤𑀦𑁆𑀢𑀺;

𑀲𑀼𑀢𑀁 𑀦𑁂𑀢𑀁 𑀅𑀪𑀺𑀡𑁆𑀳𑀲𑁄, 𑀢𑀲𑁆𑀫𑀸 𑀏𑀯𑀁 𑀯𑀤𑁂𑀫𑀲𑁂.

‘‘‘𑀚𑀺𑀦𑀁 𑀯𑀦𑁆𑀤𑀣 𑀕𑁄𑀢𑀫𑀁, 𑀚𑀺𑀦𑀁 𑀯𑀦𑁆𑀤𑀸𑀫 𑀕𑁄𑀢𑀫𑀁;

𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑀁, 𑀩𑀼𑀤𑁆𑀥𑀁 𑀯𑀦𑁆𑀤𑀸𑀫 𑀕𑁄𑀢𑀫𑀁’.

𑁨𑁭𑁯. ‘‘𑀬𑁂𑀦 𑀧𑁂𑀢𑀸 𑀧𑀯𑀼𑀘𑁆𑀘𑀦𑁆𑀢𑀺, 𑀧𑀺𑀲𑀼𑀡𑀸 𑀧𑀺𑀝𑁆𑀞𑀺𑀫𑀁𑀲𑀺𑀓𑀸.

𑀧𑀸𑀡𑀸𑀢𑀺𑀧𑀸𑀢𑀺𑀦𑁄 𑀮𑀼𑀤𑁆𑀤𑀸 [𑀮𑀼𑀤𑁆𑀥𑀸 (𑀧𑀻. 𑀓.)], 𑀘𑁄𑀭𑀸 𑀦𑁂𑀓𑀢𑀺𑀓𑀸 𑀚𑀦𑀸.

‘‘𑀇𑀢𑁄 ‘𑀲𑀸 𑀤𑀓𑁆𑀔𑀺𑀡𑀸 𑀤𑀺𑀲𑀸’, 𑀇𑀢𑀺 𑀦𑀁 𑀆𑀘𑀺𑀓𑁆𑀔𑀢𑀻 𑀚𑀦𑁄;

𑀬𑀁 𑀤𑀺𑀲𑀁 𑀅𑀪𑀺𑀧𑀸𑀮𑁂𑀢𑀺, 𑀫𑀳𑀸𑀭𑀸𑀚𑀸 𑀬𑀲𑀲𑁆𑀲𑀺 𑀲𑁄.

‘‘𑀓𑀼𑀫𑁆𑀪𑀡𑁆𑀟𑀸𑀦𑀁 𑀅𑀥𑀺𑀧𑀢𑀺, ‘𑀯𑀺𑀭𑀽𑀴𑁆𑀳𑁄’ 𑀇𑀢𑀺 𑀦𑀸𑀫𑀲𑁄;

𑀭𑀫𑀢𑀻 𑀦𑀘𑁆𑀘𑀕𑀻𑀢𑁂𑀳𑀺, 𑀓𑀼𑀫𑁆𑀪𑀡𑁆𑀟𑁂𑀳𑀺 𑀧𑀼𑀭𑀓𑁆𑀔𑀢𑁄.

‘‘𑀧𑀼𑀢𑁆𑀢𑀸𑀧𑀺 𑀢𑀲𑁆𑀲 𑀩𑀳𑀯𑁄, 𑀏𑀓𑀦𑀸𑀫𑀸𑀢𑀺 𑀫𑁂 𑀲𑀼𑀢𑀁;

𑀅𑀲𑀻𑀢𑀺 𑀤𑀲 𑀏𑀓𑁄 𑀘, 𑀇𑀦𑁆𑀤𑀦𑀸𑀫𑀸 𑀫𑀳𑀩𑁆𑀩𑀮𑀸.

𑀢𑁂 𑀘𑀸𑀧𑀺 𑀩𑀼𑀤𑁆𑀥𑀁 𑀤𑀺𑀲𑁆𑀯𑀸𑀦, 𑀩𑀼𑀤𑁆𑀥𑀁 𑀆𑀤𑀺𑀘𑁆𑀘𑀩𑀦𑁆𑀥𑀼𑀦𑀁;

𑀤𑀽𑀭𑀢𑁄𑀯 𑀦𑀫𑀲𑁆𑀲𑀦𑁆𑀢𑀺, 𑀫𑀳𑀦𑁆𑀢𑀁 𑀯𑀻𑀢𑀲𑀸𑀭𑀤𑀁.

‘‘𑀦𑀫𑁄 𑀢𑁂 𑀧𑀼𑀭𑀺𑀲𑀸𑀚𑀜𑁆𑀜, 𑀦𑀫𑁄 𑀢𑁂 𑀧𑀼𑀭𑀺𑀲𑀼𑀢𑁆𑀢𑀫;

𑀓𑀼𑀲𑀮𑁂𑀦 𑀲𑀫𑁂𑀓𑁆𑀔𑀲𑀺, 𑀅𑀫𑀦𑀼𑀲𑁆𑀲𑀸𑀧𑀺 𑀢𑀁 𑀯𑀦𑁆𑀤𑀦𑁆𑀢𑀺;

𑀲𑀼𑀢𑀁 𑀦𑁂𑀢𑀁 𑀅𑀪𑀺𑀡𑁆𑀳𑀲𑁄, 𑀢𑀲𑁆𑀫𑀸 𑀏𑀯𑀁 𑀯𑀤𑁂𑀫𑀲𑁂.

‘‘‘𑀚𑀺𑀦𑀁 𑀯𑀦𑁆𑀤𑀣 𑀕𑁄𑀢𑀫𑀁, 𑀚𑀺𑀦𑀁 𑀯𑀦𑁆𑀤𑀸𑀫 𑀕𑁄𑀢𑀫𑀁;

𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑀁, 𑀩𑀼𑀤𑁆𑀥𑀁 𑀯𑀦𑁆𑀤𑀸𑀫 𑀕𑁄𑀢𑀫𑀁’.

𑁨𑁮𑁦. ‘‘𑀬𑀢𑁆𑀣 𑀘𑁄𑀕𑁆𑀕𑀘𑁆𑀙𑀢𑀺 𑀲𑀽𑀭𑀺𑀬𑁄, 𑀆𑀤𑀺𑀘𑁆𑀘𑁄 𑀫𑀡𑁆𑀟𑀮𑀻 𑀫𑀳𑀸.

𑀬𑀲𑁆𑀲 𑀘𑁄𑀕𑁆𑀕𑀘𑁆𑀙𑀫𑀸𑀦𑀲𑁆𑀲, 𑀤𑀺𑀯𑀲𑁄𑀧𑀺 𑀦𑀺𑀭𑀼𑀚𑁆𑀛𑀢𑀺;

𑀬𑀲𑁆𑀲 𑀘𑁄𑀕𑁆𑀕𑀢𑁂 𑀲𑀽𑀭𑀺𑀬𑁂, ‘𑀲𑀁𑀯𑀭𑀻’𑀢𑀺 𑀧𑀯𑀼𑀘𑁆𑀘𑀢𑀺.

‘‘𑀭𑀳𑀤𑁄𑀧𑀺 𑀢𑀢𑁆𑀣 𑀕𑀫𑁆𑀪𑀻𑀭𑁄, 𑀲𑀫𑀼𑀤𑁆𑀤𑁄 𑀲𑀭𑀺𑀢𑁄𑀤𑀓𑁄;

𑀏𑀯𑀁 𑀢𑀁 𑀢𑀢𑁆𑀣 𑀚𑀸𑀦𑀦𑁆𑀢𑀺, ‘𑀲𑀫𑀼𑀤𑁆𑀤𑁄 𑀲𑀭𑀺𑀢𑁄𑀤𑀓𑁄’.

‘‘𑀇𑀢𑁄 ‘𑀲𑀸 𑀧𑀘𑁆𑀙𑀺𑀫𑀸 𑀤𑀺𑀲𑀸’, 𑀇𑀢𑀺 𑀦𑀁 𑀆𑀘𑀺𑀓𑁆𑀔𑀢𑀻 𑀚𑀦𑁄;

𑀬𑀁 𑀤𑀺𑀲𑀁 𑀅𑀪𑀺𑀧𑀸𑀮𑁂𑀢𑀺, 𑀫𑀳𑀸𑀭𑀸𑀚𑀸 𑀬𑀲𑀲𑁆𑀲𑀺 𑀲𑁄.

‘‘𑀦𑀸𑀕𑀸𑀦𑀜𑁆𑀘 𑀅𑀥𑀺𑀧𑀢𑀺, ‘𑀯𑀺𑀭𑀽𑀧𑀓𑁆𑀔𑁄’𑀢𑀺 𑀦𑀸𑀫𑀲𑁄;

𑀭𑀫𑀢𑀻 𑀦𑀘𑁆𑀘𑀕𑀻𑀢𑁂𑀳𑀺, 𑀦𑀸𑀕𑁂𑀳𑁂𑀯 𑀧𑀼𑀭𑀓𑁆𑀔𑀢𑁄.

‘‘𑀧𑀼𑀢𑁆𑀢𑀸𑀧𑀺 𑀢𑀲𑁆𑀲 𑀩𑀳𑀯𑁄, 𑀏𑀓𑀦𑀸𑀫𑀸𑀢𑀺 𑀫𑁂 𑀲𑀼𑀢𑀁;

𑀅𑀲𑀻𑀢𑀺 𑀤𑀲 𑀏𑀓𑁄 𑀘, 𑀇𑀦𑁆𑀤𑀦𑀸𑀫𑀸 𑀫𑀳𑀩𑁆𑀩𑀮𑀸.

𑀢𑁂 𑀘𑀸𑀧𑀺 𑀩𑀼𑀤𑁆𑀥𑀁 𑀤𑀺𑀲𑁆𑀯𑀸𑀦, 𑀩𑀼𑀤𑁆𑀥𑀁 𑀆𑀤𑀺𑀘𑁆𑀘𑀩𑀦𑁆𑀥𑀼𑀦𑀁;

𑀤𑀽𑀭𑀢𑁄𑀯 𑀦𑀫𑀲𑁆𑀲𑀦𑁆𑀢𑀺, 𑀫𑀳𑀦𑁆𑀢𑀁 𑀯𑀻𑀢𑀲𑀸𑀭𑀤𑀁.

‘‘𑀦𑀫𑁄 𑀢𑁂 𑀧𑀼𑀭𑀺𑀲𑀸𑀚𑀜𑁆𑀜, 𑀦𑀫𑁄 𑀢𑁂 𑀧𑀼𑀭𑀺𑀲𑀼𑀢𑁆𑀢𑀫;

𑀓𑀼𑀲𑀮𑁂𑀦 𑀲𑀫𑁂𑀓𑁆𑀔𑀲𑀺, 𑀅𑀫𑀦𑀼𑀲𑁆𑀲𑀸𑀧𑀺 𑀢𑀁 𑀯𑀦𑁆𑀤𑀦𑁆𑀢𑀺;

𑀲𑀼𑀢𑀁 𑀦𑁂𑀢𑀁 𑀅𑀪𑀺𑀡𑁆𑀳𑀲𑁄, 𑀢𑀲𑁆𑀫𑀸 𑀏𑀯𑀁 𑀯𑀤𑁂𑀫𑀲𑁂.

‘‘‘𑀚𑀺𑀦𑀁 𑀯𑀦𑁆𑀤𑀣 𑀕𑁄𑀢𑀫𑀁, 𑀚𑀺𑀦𑀁 𑀯𑀦𑁆𑀤𑀸𑀫 𑀕𑁄𑀢𑀫𑀁;

𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑀁, 𑀩𑀼𑀤𑁆𑀥𑀁 𑀯𑀦𑁆𑀤𑀸𑀫 𑀕𑁄𑀢𑀫𑀁’.

𑁨𑁮𑁧. ‘‘𑀬𑁂𑀦 𑀉𑀢𑁆𑀢𑀭𑀓𑀼𑀭𑀼𑀯𑁆𑀳𑁄 [𑀉𑀢𑁆𑀢𑀭𑀓𑀼𑀭𑀽 𑀭𑀫𑁆𑀫𑀸 (𑀲𑀻. 𑀲𑁆𑀬𑀸. 𑀧𑀻.)], 𑀫𑀳𑀸𑀦𑁂𑀭𑀼 𑀲𑀼𑀤𑀲𑁆𑀲𑀦𑁄.

𑀫𑀦𑀼𑀲𑁆𑀲𑀸 𑀢𑀢𑁆𑀣 𑀚𑀸𑀬𑀦𑁆𑀢𑀺, 𑀅𑀫𑀫𑀸 𑀅𑀧𑀭𑀺𑀕𑁆𑀕𑀳𑀸.

‘‘𑀦 𑀢𑁂 𑀩𑀻𑀚𑀁 𑀧𑀯𑀧𑀦𑁆𑀢𑀺, 𑀦𑀧𑀺 𑀦𑀻𑀬𑀦𑁆𑀢𑀺 𑀦𑀗𑁆𑀕𑀮𑀸;

𑀅𑀓𑀝𑁆𑀞𑀧𑀸𑀓𑀺𑀫𑀁 𑀲𑀸𑀮𑀺𑀁, 𑀧𑀭𑀺𑀪𑀼𑀜𑁆𑀚𑀦𑁆𑀢𑀺 𑀫𑀸𑀦𑀼𑀲𑀸.

‘‘𑀅𑀓𑀡𑀁 𑀅𑀣𑀼𑀲𑀁 𑀲𑀼𑀤𑁆𑀥𑀁, 𑀲𑀼𑀕𑀦𑁆𑀥𑀁 𑀢𑀡𑁆𑀟𑀼𑀮𑀧𑁆𑀨𑀮𑀁;

𑀢𑀼𑀡𑁆𑀟𑀺𑀓𑀻𑀭𑁂 𑀧𑀘𑀺𑀢𑁆𑀯𑀸𑀦, 𑀢𑀢𑁄 𑀪𑀼𑀜𑁆𑀚𑀦𑁆𑀢𑀺 𑀪𑁄𑀚𑀦𑀁.

‘‘𑀕𑀸𑀯𑀺𑀁 𑀏𑀓𑀔𑀼𑀭𑀁 𑀓𑀢𑁆𑀯𑀸, 𑀅𑀦𑀼𑀬𑀦𑁆𑀢𑀺 𑀤𑀺𑀲𑁄𑀤𑀺𑀲𑀁;

𑀧𑀲𑀼𑀁 𑀏𑀓𑀔𑀼𑀭𑀁 𑀓𑀢𑁆𑀯𑀸, 𑀅𑀦𑀼𑀬𑀦𑁆𑀢𑀺 𑀤𑀺𑀲𑁄𑀤𑀺𑀲𑀁.

‘‘𑀇𑀢𑁆𑀣𑀺𑀁 𑀯𑀸 𑀯𑀸𑀳𑀦𑀁 [𑀇𑀢𑁆𑀣𑀻-𑀯𑀸𑀳𑀦𑀁 (𑀲𑀻. 𑀧𑀻.), 𑀇𑀢𑁆𑀣𑀻𑀁 𑀯𑀸𑀳𑀦𑀁 (𑀲𑁆𑀬𑀸.)] 𑀓𑀢𑁆𑀯𑀸, 𑀅𑀦𑀼𑀬𑀦𑁆𑀢𑀺 𑀤𑀺𑀲𑁄𑀤𑀺𑀲𑀁;

𑀧𑀼𑀭𑀺𑀲𑀁 𑀯𑀸𑀳𑀦𑀁 𑀓𑀢𑁆𑀯𑀸, 𑀅𑀦𑀼𑀬𑀦𑁆𑀢𑀺 𑀤𑀺𑀲𑁄𑀤𑀺𑀲𑀁.

‘‘𑀓𑀼𑀫𑀸𑀭𑀺𑀁 𑀯𑀸𑀳𑀦𑀁 𑀓𑀢𑁆𑀯𑀸, 𑀅𑀦𑀼𑀬𑀦𑁆𑀢𑀺 𑀤𑀺𑀲𑁄𑀤𑀺𑀲𑀁;

𑀓𑀼𑀫𑀸𑀭𑀁 𑀯𑀸𑀳𑀦𑀁 𑀓𑀢𑁆𑀯𑀸, 𑀅𑀦𑀼𑀬𑀦𑁆𑀢𑀺 𑀤𑀺𑀲𑁄𑀤𑀺𑀲𑀁.

‘‘𑀢𑁂 𑀬𑀸𑀦𑁂 𑀅𑀪𑀺𑀭𑀼𑀳𑀺𑀢𑁆𑀯𑀸,

𑀲𑀩𑁆𑀩𑀸 𑀤𑀺𑀲𑀸 𑀅𑀦𑀼𑀧𑀭𑀺𑀬𑀸𑀬𑀦𑁆𑀢𑀺 [𑀅𑀦𑀼𑀧𑀭𑀺𑀬𑀦𑁆𑀢𑀺 (𑀲𑁆𑀬𑀸.)];

𑀧𑀘𑀸𑀭𑀸 𑀢𑀲𑁆𑀲 𑀭𑀸𑀚𑀺𑀦𑁄.

‘‘𑀳𑀢𑁆𑀣𑀺𑀬𑀸𑀦𑀁 𑀅𑀲𑁆𑀲𑀬𑀸𑀦𑀁, 𑀤𑀺𑀩𑁆𑀩𑀁 𑀬𑀸𑀦𑀁 𑀉𑀧𑀝𑁆𑀞𑀺𑀢𑀁;

𑀧𑀸𑀲𑀸𑀤𑀸 𑀲𑀺𑀯𑀺𑀓𑀸 𑀘𑁂𑀯, 𑀫𑀳𑀸𑀭𑀸𑀚𑀲𑁆𑀲 𑀬𑀲𑀲𑁆𑀲𑀺𑀦𑁄.

‘‘𑀢𑀲𑁆𑀲 𑀘 𑀦𑀕𑀭𑀸 𑀅𑀳𑀼,

𑀅𑀦𑁆𑀢𑀮𑀺𑀓𑁆𑀔𑁂 𑀲𑀼𑀫𑀸𑀧𑀺𑀢𑀸;

𑀆𑀝𑀸𑀦𑀸𑀝𑀸 𑀓𑀼𑀲𑀺𑀦𑀸𑀝𑀸 𑀧𑀭𑀓𑀼𑀲𑀺𑀦𑀸𑀝𑀸,

𑀦𑀸𑀝𑀲𑀼𑀭𑀺𑀬𑀸 [𑀦𑀸𑀝𑀧𑀼𑀭𑀺𑀬𑀸 (𑀲𑀻. 𑀧𑀻.), 𑀦𑀸𑀝𑀧𑀭𑀺𑀬𑀸 (𑀲𑁆𑀬𑀸.)] 𑀧𑀭𑀓𑀼𑀲𑀺𑀝𑀦𑀸𑀝𑀸.

‘‘𑀉𑀢𑁆𑀢𑀭𑁂𑀦 𑀓𑀲𑀺𑀯𑀦𑁆𑀢𑁄 [𑀓𑀧𑀺𑀯𑀦𑁆𑀢𑁄 (𑀲𑀻. 𑀲𑁆𑀬𑀸. 𑀧𑀻)],

𑀚𑀦𑁄𑀖𑀫𑀧𑀭𑁂𑀦 𑀘;

𑀦𑀯𑀦𑀯𑀼𑀢𑀺𑀬𑁄 𑀅𑀫𑁆𑀩𑀭𑀅𑀫𑁆𑀩𑀭𑀯𑀢𑀺𑀬𑁄,

𑀆𑀴𑀓𑀫𑀦𑁆𑀤𑀸 𑀦𑀸𑀫 𑀭𑀸𑀚𑀥𑀸𑀦𑀻.

‘‘𑀓𑀼𑀯𑁂𑀭𑀲𑁆𑀲 𑀔𑁄 𑀧𑀦, 𑀫𑀸𑀭𑀺𑀲, 𑀫𑀳𑀸𑀭𑀸𑀚𑀲𑁆𑀲 𑀯𑀺𑀲𑀸𑀡𑀸 𑀦𑀸𑀫 𑀭𑀸𑀚𑀥𑀸𑀦𑀻;

𑀢𑀲𑁆𑀫𑀸 𑀓𑀼𑀯𑁂𑀭𑁄 𑀫𑀳𑀸𑀭𑀸𑀚𑀸, ‘𑀯𑁂𑀲𑁆𑀲𑀯𑀡𑁄’𑀢𑀺 𑀧𑀯𑀼𑀘𑁆𑀘𑀢𑀺.

‘‘𑀧𑀘𑁆𑀘𑁂𑀲𑀦𑁆𑀢𑁄 𑀧𑀓𑀸𑀲𑁂𑀦𑁆𑀢𑀺, 𑀢𑀢𑁄𑀮𑀸 𑀢𑀢𑁆𑀢𑀮𑀸 𑀢𑀢𑁄𑀢𑀮𑀸;

𑀑𑀚𑀲𑀺 𑀢𑁂𑀚𑀲𑀺 𑀢𑀢𑁄𑀚𑀲𑀻, 𑀲𑀽𑀭𑁄 𑀭𑀸𑀚𑀸 𑀅𑀭𑀺𑀝𑁆𑀞𑁄 𑀦𑁂𑀫𑀺.

‘‘𑀭𑀳𑀤𑁄𑀧𑀺 𑀢𑀢𑁆𑀣 𑀥𑀭𑀡𑀻 𑀦𑀸𑀫, 𑀬𑀢𑁄 𑀫𑁂𑀖𑀸 𑀧𑀯𑀲𑁆𑀲𑀦𑁆𑀢𑀺;

𑀯𑀲𑁆𑀲𑀸 𑀬𑀢𑁄 𑀧𑀢𑀸𑀬𑀦𑁆𑀢𑀺, 𑀲𑀪𑀸𑀧𑀺 𑀢𑀢𑁆𑀣 𑀲𑀸𑀮𑀯𑀢𑀻 [𑀪𑀕𑀮𑀯𑀢𑀻 (𑀲𑀻. 𑀲𑁆𑀬𑀸. 𑀧𑀻.)] 𑀦𑀸𑀫.

‘‘𑀬𑀢𑁆𑀣 𑀬𑀓𑁆𑀔𑀸 𑀧𑀬𑀺𑀭𑀼𑀧𑀸𑀲𑀦𑁆𑀢𑀺, 𑀢𑀢𑁆𑀣 𑀦𑀺𑀘𑁆𑀘𑀨𑀮𑀸 𑀭𑀼𑀓𑁆𑀔𑀸;

𑀦𑀸𑀦𑀸 𑀤𑀺𑀚𑀕𑀡𑀸 𑀬𑀼𑀢𑀸, 𑀫𑀬𑀽𑀭𑀓𑁄𑀜𑁆𑀘𑀸𑀪𑀺𑀭𑀼𑀤𑀸;

𑀓𑁄𑀓𑀺𑀮𑀸𑀤𑀻𑀳𑀺 𑀯𑀕𑁆𑀕𑀼𑀳𑀺.

‘‘𑀚𑀻𑀯𑀜𑁆𑀚𑀻𑀯𑀓𑀲𑀤𑁆𑀤𑁂𑀢𑁆𑀣, 𑀅𑀣𑁄 𑀑𑀝𑁆𑀞𑀯𑀘𑀺𑀢𑁆𑀢𑀓𑀸;

𑀓𑀼𑀓𑁆𑀓𑀼𑀝𑀓𑀸 [𑀓𑀼𑀓𑀼𑀢𑁆𑀣𑀓𑀸 (𑀲𑀻. 𑀧𑀻.)] 𑀓𑀼𑀴𑀻𑀭𑀓𑀸, 𑀯𑀦𑁂 𑀧𑁄𑀓𑁆𑀔𑀭𑀲𑀸𑀢𑀓𑀸.

‘‘𑀲𑀼𑀓𑀲𑀸𑀴𑀺𑀓𑀲𑀤𑁆𑀤𑁂𑀢𑁆𑀣, 𑀤𑀡𑁆𑀟𑀫𑀸𑀡𑀯𑀓𑀸𑀦𑀺 𑀘;

𑀲𑁄𑀪𑀢𑀺 𑀲𑀩𑁆𑀩𑀓𑀸𑀮𑀁 𑀲𑀸, 𑀓𑀼𑀯𑁂𑀭𑀦𑀴𑀺𑀦𑀻 𑀲𑀤𑀸.

‘‘𑀇𑀢𑁄 ‘𑀲𑀸 𑀉𑀢𑁆𑀢𑀭𑀸 𑀤𑀺𑀲𑀸’, 𑀇𑀢𑀺 𑀦𑀁 𑀆𑀘𑀺𑀓𑁆𑀔𑀢𑀻 𑀚𑀦𑁄;

𑀬𑀁 𑀤𑀺𑀲𑀁 𑀅𑀪𑀺𑀧𑀸𑀮𑁂𑀢𑀺, 𑀫𑀳𑀸𑀭𑀸𑀚𑀸 𑀬𑀲𑀲𑁆𑀲𑀺 𑀲𑁄.

‘‘𑀬𑀓𑁆𑀔𑀸𑀦𑀜𑁆𑀘 𑀅𑀥𑀺𑀧𑀢𑀺, ‘𑀓𑀼𑀯𑁂𑀭𑁄’ 𑀇𑀢𑀺 𑀦𑀸𑀫𑀲𑁄;

𑀭𑀫𑀢𑀻 𑀦𑀘𑁆𑀘𑀕𑀻𑀢𑁂𑀳𑀺, 𑀬𑀓𑁆𑀔𑁂𑀳𑁂𑀯 𑀧𑀼𑀭𑀓𑁆𑀔𑀢𑁄.

‘‘𑀧𑀼𑀢𑁆𑀢𑀸𑀧𑀺 𑀢𑀲𑁆𑀲 𑀩𑀳𑀯𑁄, 𑀏𑀓𑀦𑀸𑀫𑀸𑀢𑀺 𑀫𑁂 𑀲𑀼𑀢𑀁;

𑀅𑀲𑀻𑀢𑀺 𑀤𑀲 𑀏𑀓𑁄 𑀘, 𑀇𑀦𑁆𑀤𑀦𑀸𑀫𑀸 𑀫𑀳𑀩𑁆𑀩𑀮𑀸.

‘‘𑀢𑁂 𑀘𑀸𑀧𑀺 𑀩𑀼𑀤𑁆𑀥𑀁 𑀤𑀺𑀲𑁆𑀯𑀸𑀦, 𑀩𑀼𑀤𑁆𑀥𑀁 𑀆𑀤𑀺𑀘𑁆𑀘𑀩𑀦𑁆𑀥𑀼𑀦𑀁;

𑀤𑀽𑀭𑀢𑁄𑀯 𑀦𑀫𑀲𑁆𑀲𑀦𑁆𑀢𑀺, 𑀫𑀳𑀦𑁆𑀢𑀁 𑀯𑀻𑀢𑀲𑀸𑀭𑀤𑀁.

‘‘𑀦𑀫𑁄 𑀢𑁂 𑀧𑀼𑀭𑀺𑀲𑀸𑀚𑀜𑁆𑀜, 𑀦𑀫𑁄 𑀢𑁂 𑀧𑀼𑀭𑀺𑀲𑀼𑀢𑁆𑀢𑀫;

𑀓𑀼𑀲𑀮𑁂𑀦 𑀲𑀫𑁂𑀓𑁆𑀔𑀲𑀺, 𑀅𑀫𑀦𑀼𑀲𑁆𑀲𑀸𑀧𑀺 𑀢𑀁 𑀯𑀦𑁆𑀤𑀦𑁆𑀢𑀺;

𑀲𑀼𑀢𑀁 𑀦𑁂𑀢𑀁 𑀅𑀪𑀺𑀡𑁆𑀳𑀲𑁄, 𑀢𑀲𑁆𑀫𑀸 𑀏𑀯𑀁 𑀯𑀤𑁂𑀫𑀲𑁂.

‘‘‘𑀚𑀺𑀦𑀁 𑀯𑀦𑁆𑀤𑀣 𑀕𑁄𑀢𑀫𑀁, 𑀚𑀺𑀦𑀁 𑀯𑀦𑁆𑀤𑀸𑀫 𑀕𑁄𑀢𑀫𑀁;

𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑀁, 𑀩𑀼𑀤𑁆𑀥𑀁 𑀯𑀦𑁆𑀤𑀸𑀫 𑀕𑁄𑀢𑀫’’’𑀦𑁆𑀢𑀺.

‘‘𑀅𑀬𑀁 𑀔𑁄 𑀲𑀸, 𑀫𑀸𑀭𑀺𑀲, 𑀆𑀝𑀸𑀦𑀸𑀝𑀺𑀬𑀸 𑀭𑀓𑁆𑀔𑀸 𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀉𑀧𑀸𑀲𑀓𑀸𑀦𑀁 𑀉𑀧𑀸𑀲𑀺𑀓𑀸𑀦𑀁 𑀕𑀼𑀢𑁆𑀢𑀺𑀬𑀸 𑀭𑀓𑁆𑀔𑀸𑀬 𑀅𑀯𑀺𑀳𑀺𑀁𑀲𑀸𑀬 𑀨𑀸𑀲𑀼𑀯𑀺𑀳𑀸𑀭𑀸𑀬.

𑁨𑁮𑁨. ‘‘𑀬𑀲𑁆𑀲 𑀓𑀲𑁆𑀲𑀘𑀺, 𑀫𑀸𑀭𑀺𑀲, 𑀪𑀺𑀓𑁆𑀔𑀼𑀲𑁆𑀲 𑀯𑀸 𑀪𑀺𑀓𑁆𑀔𑀼𑀦𑀺𑀬𑀸 𑀯𑀸 𑀉𑀧𑀸𑀲𑀓𑀲𑁆𑀲 𑀯𑀸 𑀉𑀧𑀸𑀲𑀺𑀓𑀸𑀬 𑀯𑀸 𑀅𑀬𑀁 𑀆𑀝𑀸𑀦𑀸𑀝𑀺𑀬𑀸 𑀭𑀓𑁆𑀔𑀸 𑀲𑀼𑀕𑁆𑀕𑀳𑀺𑀢𑀸 𑀪𑀯𑀺𑀲𑁆𑀲𑀢𑀺 𑀲𑀫𑀢𑁆𑀢𑀸 𑀧𑀭𑀺𑀬𑀸𑀧𑀼𑀢𑀸 [𑀧𑀭𑀺𑀬𑀸𑀧𑀼𑀝𑀸 (𑀓.)]. 𑀢𑀁 𑀘𑁂 𑀅𑀫𑀦𑀼𑀲𑁆𑀲𑁄 𑀬𑀓𑁆𑀔𑁄 𑀯𑀸 𑀬𑀓𑁆𑀔𑀺𑀦𑀻 𑀯𑀸 𑀬𑀓𑁆𑀔𑀧𑁄𑀢𑀓𑁄 𑀯𑀸 𑀬𑀓𑁆𑀔𑀧𑁄𑀢𑀺𑀓𑀸 𑀯𑀸 𑀬𑀓𑁆𑀔𑀫𑀳𑀸𑀫𑀢𑁆𑀢𑁄 𑀯𑀸 𑀬𑀓𑁆𑀔𑀧𑀸𑀭𑀺𑀲𑀚𑁆𑀚𑁄 𑀯𑀸 𑀬𑀓𑁆𑀔𑀧𑀘𑀸𑀭𑁄 𑀯𑀸, 𑀕𑀦𑁆𑀥𑀩𑁆𑀩𑁄 𑀯𑀸 𑀕𑀦𑁆𑀥𑀩𑁆𑀩𑀻 𑀯𑀸 𑀕𑀦𑁆𑀥𑀩𑁆𑀩𑀧𑁄𑀢𑀓𑁄 𑀯𑀸 𑀕𑀦𑁆𑀥𑀩𑁆𑀩𑀧𑁄𑀢𑀺𑀓𑀸 𑀯𑀸 𑀕𑀦𑁆𑀥𑀩𑁆𑀩𑀫𑀳𑀸𑀫𑀢𑁆𑀢𑁄 𑀯𑀸 𑀕𑀦𑁆𑀥𑀩𑁆𑀩𑀧𑀸𑀭𑀺𑀲𑀚𑁆𑀚𑁄 𑀯𑀸 𑀕𑀦𑁆𑀥𑀩𑁆𑀩𑀧𑀘𑀸𑀭𑁄 𑀯𑀸, 𑀓𑀼𑀫𑁆𑀪𑀡𑁆𑀟𑁄 𑀯𑀸 𑀓𑀼𑀫𑁆𑀪𑀡𑁆𑀟𑀻 𑀯𑀸 𑀓𑀼𑀫𑁆𑀪𑀡𑁆𑀟𑀧𑁄𑀢𑀓𑁄 𑀯𑀸 𑀓𑀼𑀫𑁆𑀪𑀡𑁆𑀟𑀧𑁄𑀢𑀺𑀓𑀸 𑀯𑀸 𑀓𑀼𑀫𑁆𑀪𑀡𑁆𑀟𑀫𑀳𑀸𑀫𑀢𑁆𑀢𑁄 𑀯𑀸 𑀓𑀼𑀫𑁆𑀪𑀡𑁆𑀟𑀧𑀸𑀭𑀺𑀲𑀚𑁆𑀚𑁄 𑀯𑀸 𑀓𑀼𑀫𑁆𑀪𑀡𑁆𑀟𑀧𑀘𑀸𑀭𑁄 𑀯𑀸, 𑀦𑀸𑀕𑁄 𑀯𑀸 𑀦𑀸𑀕𑀻 𑀯𑀸 𑀦𑀸𑀕𑀧𑁄𑀢𑀓𑁄 𑀯𑀸 𑀦𑀸𑀕𑀧𑁄𑀢𑀺𑀓𑀸 𑀯𑀸 𑀦𑀸𑀕𑀫𑀳𑀸𑀫𑀢𑁆𑀢𑁄 𑀯𑀸 𑀦𑀸𑀕𑀧𑀸𑀭𑀺𑀲𑀚𑁆𑀚𑁄 𑀯𑀸 𑀦𑀸𑀕𑀧𑀘𑀸𑀭𑁄 𑀯𑀸, 𑀧𑀤𑀼𑀝𑁆𑀞𑀘𑀺𑀢𑁆𑀢𑁄 𑀪𑀺𑀓𑁆𑀔𑀼𑀁 𑀯𑀸 𑀪𑀺𑀓𑁆𑀔𑀼𑀦𑀺𑀁 𑀯𑀸 𑀉𑀧𑀸𑀲𑀓𑀁 𑀯𑀸 𑀉𑀧𑀸𑀲𑀺𑀓𑀁 𑀯𑀸 𑀕𑀘𑁆𑀙𑀦𑁆𑀢𑀁 𑀯𑀸 𑀅𑀦𑀼𑀕𑀘𑁆𑀙𑁂𑀬𑁆𑀬, 𑀞𑀺𑀢𑀁 𑀯𑀸 𑀉𑀧𑀢𑀺𑀝𑁆𑀞𑁂𑀬𑁆𑀬, 𑀦𑀺𑀲𑀺𑀦𑁆𑀦𑀁 𑀯𑀸 𑀉𑀧𑀦𑀺𑀲𑀻𑀤𑁂𑀬𑁆𑀬, 𑀦𑀺𑀧𑀦𑁆𑀦𑀁 𑀯𑀸 𑀉𑀧𑀦𑀺𑀧𑀚𑁆𑀚𑁂𑀬𑁆𑀬. 𑀦 𑀫𑁂 𑀲𑁄, 𑀫𑀸𑀭𑀺𑀲, 𑀅𑀫𑀦𑀼𑀲𑁆𑀲𑁄 𑀮𑀪𑁂𑀬𑁆𑀬 𑀕𑀸𑀫𑁂𑀲𑀼 𑀯𑀸 𑀦𑀺𑀕𑀫𑁂𑀲𑀼 𑀯𑀸 𑀲𑀓𑁆𑀓𑀸𑀭𑀁 𑀯𑀸 𑀕𑀭𑀼𑀓𑀸𑀭𑀁 𑀯𑀸. 𑀦 𑀫𑁂 𑀲𑁄, 𑀫𑀸𑀭𑀺𑀲, 𑀅𑀫𑀦𑀼𑀲𑁆𑀲𑁄 𑀮𑀪𑁂𑀬𑁆𑀬 𑀆𑀴𑀓𑀫𑀦𑁆𑀤𑀸𑀬 𑀦𑀸𑀫 𑀭𑀸𑀚𑀥𑀸𑀦𑀺𑀬𑀸 𑀯𑀢𑁆𑀣𑀼𑀁 𑀯𑀸 𑀯𑀸𑀲𑀁 𑀯𑀸. 𑀦 𑀫𑁂 𑀲𑁄, 𑀫𑀸𑀭𑀺𑀲, 𑀅𑀫𑀦𑀼𑀲𑁆𑀲𑁄 𑀮𑀪𑁂𑀬𑁆𑀬 𑀬𑀓𑁆𑀔𑀸𑀦𑀁 𑀲𑀫𑀺𑀢𑀺𑀁 𑀕𑀦𑁆𑀢𑀼𑀁. 𑀅𑀧𑀺𑀲𑁆𑀲𑀼 𑀦𑀁, 𑀫𑀸𑀭𑀺𑀲, 𑀅𑀫𑀦𑀼𑀲𑁆𑀲𑀸 𑀅𑀦𑀸𑀯𑀬𑁆𑀳𑀫𑁆𑀧𑀺 𑀦𑀁 𑀓𑀭𑁂𑀬𑁆𑀬𑀼𑀁 𑀅𑀯𑀺𑀯𑀬𑁆𑀳𑀁. 𑀅𑀧𑀺𑀲𑁆𑀲𑀼 𑀦𑀁, 𑀫𑀸𑀭𑀺𑀲, 𑀅𑀫𑀦𑀼𑀲𑁆𑀲𑀸 𑀅𑀢𑁆𑀢𑀸𑀳𑀺𑀧𑀺 𑀧𑀭𑀺𑀧𑀼𑀡𑁆𑀡𑀸𑀳𑀺 𑀧𑀭𑀺𑀪𑀸𑀲𑀸𑀳𑀺 𑀧𑀭𑀺𑀪𑀸𑀲𑁂𑀬𑁆𑀬𑀼𑀁. 𑀅𑀧𑀺𑀲𑁆𑀲𑀼 𑀦𑀁, 𑀫𑀸𑀭𑀺𑀲, 𑀅𑀫𑀦𑀼𑀲𑁆𑀲𑀸 𑀭𑀺𑀢𑁆𑀢𑀁𑀧𑀺𑀲𑁆𑀲 𑀧𑀢𑁆𑀢𑀁 𑀲𑀻𑀲𑁂 𑀦𑀺𑀓𑁆𑀓𑀼𑀚𑁆𑀚𑁂𑀬𑁆𑀬𑀼𑀁. 𑀅𑀧𑀺𑀲𑁆𑀲𑀼 𑀦𑀁, 𑀫𑀸𑀭𑀺𑀲, 𑀅𑀫𑀦𑀼𑀲𑁆𑀲𑀸 𑀲𑀢𑁆𑀢𑀥𑀸𑀧𑀺𑀲𑁆𑀲 𑀫𑀼𑀤𑁆𑀥𑀁 𑀨𑀸𑀮𑁂𑀬𑁆𑀬𑀼𑀁.

‘‘𑀲𑀦𑁆𑀢𑀺 𑀳𑀺, 𑀫𑀸𑀭𑀺𑀲, 𑀅𑀫𑀦𑀼𑀲𑁆𑀲𑀸 𑀘𑀡𑁆𑀟𑀸 𑀭𑀼𑀤𑁆𑀥𑀸 [𑀭𑀼𑀤𑁆𑀤𑀸 (𑀲𑀻. 𑀧𑀻.)] 𑀭𑀪𑀲𑀸, 𑀢𑁂 𑀦𑁂𑀯 𑀫𑀳𑀸𑀭𑀸𑀚𑀸𑀦𑀁 𑀆𑀤𑀺𑀬𑀦𑁆𑀢𑀺, 𑀦 𑀫𑀳𑀸𑀭𑀸𑀚𑀸𑀦𑀁 𑀧𑀼𑀭𑀺𑀲𑀓𑀸𑀦𑀁 𑀆𑀤𑀺𑀬𑀦𑁆𑀢𑀺, 𑀦 𑀫𑀳𑀸𑀭𑀸𑀚𑀸𑀦𑀁 𑀧𑀼𑀭𑀺𑀲𑀓𑀸𑀦𑀁 𑀧𑀼𑀭𑀺𑀲𑀓𑀸𑀦𑀁 𑀆𑀤𑀺𑀬𑀦𑁆𑀢𑀺. 𑀢𑁂 𑀔𑁄 𑀢𑁂, 𑀫𑀸𑀭𑀺𑀲, 𑀅𑀫𑀦𑀼𑀲𑁆𑀲𑀸 𑀫𑀳𑀸𑀭𑀸𑀚𑀸𑀦𑀁 𑀅𑀯𑀭𑀼𑀤𑁆𑀥𑀸 𑀦𑀸𑀫 𑀯𑀼𑀘𑁆𑀘𑀦𑁆𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀫𑀸𑀭𑀺𑀲, 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀯𑀺𑀚𑀺𑀢𑁂 𑀫𑀳𑀸𑀘𑁄𑀭𑀸. 𑀢𑁂 𑀦𑁂𑀯 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀆𑀤𑀺𑀬𑀦𑁆𑀢𑀺, 𑀦 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀧𑀼𑀭𑀺𑀲𑀓𑀸𑀦𑀁 𑀆𑀤𑀺𑀬𑀦𑁆𑀢𑀺, 𑀦 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀧𑀼𑀭𑀺𑀲𑀓𑀸𑀦𑀁 𑀧𑀼𑀭𑀺𑀲𑀓𑀸𑀦𑀁 𑀆𑀤𑀺𑀬𑀦𑁆𑀢𑀺. 𑀢𑁂 𑀔𑁄 𑀢𑁂, 𑀫𑀸𑀭𑀺𑀲, 𑀫𑀳𑀸𑀘𑁄𑀭𑀸 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀅𑀯𑀭𑀼𑀤𑁆𑀥𑀸 𑀦𑀸𑀫 𑀯𑀼𑀘𑁆𑀘𑀦𑁆𑀢𑀺. 𑀏𑀯𑀫𑁂𑀯 𑀔𑁄, 𑀫𑀸𑀭𑀺𑀲, 𑀲𑀦𑁆𑀢𑀺 𑀅𑀫𑀦𑀼𑀲𑁆𑀲𑀸 𑀘𑀡𑁆𑀟𑀸 𑀭𑀼𑀤𑁆𑀥𑀸 𑀭𑀪𑀲𑀸, 𑀢𑁂 𑀦𑁂𑀯 𑀫𑀳𑀸𑀭𑀸𑀚𑀸𑀦𑀁 𑀆𑀤𑀺𑀬𑀦𑁆𑀢𑀺, 𑀦 𑀫𑀳𑀸𑀭𑀸𑀚𑀸𑀦𑀁 𑀧𑀼𑀭𑀺𑀲𑀓𑀸𑀦𑀁 𑀆𑀤𑀺𑀬𑀦𑁆𑀢𑀺, 𑀦 𑀫𑀳𑀸𑀭𑀸𑀚𑀸𑀦𑀁 𑀧𑀼𑀭𑀺𑀲𑀓𑀸𑀦𑀁 𑀧𑀼𑀭𑀺𑀲𑀓𑀸𑀦𑀁 𑀆𑀤𑀺𑀬𑀦𑁆𑀢𑀺. 𑀢𑁂 𑀔𑁄 𑀢𑁂, 𑀫𑀸𑀭𑀺𑀲, 𑀅𑀫𑀦𑀼𑀲𑁆𑀲𑀸 𑀫𑀳𑀸𑀭𑀸𑀚𑀸𑀦𑀁 𑀅𑀯𑀭𑀼𑀤𑁆𑀥𑀸 𑀦𑀸𑀫 𑀯𑀼𑀘𑁆𑀘𑀦𑁆𑀢𑀺. 𑀬𑁄 𑀳𑀺 𑀓𑁄𑀘𑀺, 𑀫𑀸𑀭𑀺𑀲, 𑀅𑀫𑀦𑀼𑀲𑁆𑀲𑁄 𑀬𑀓𑁆𑀔𑁄 𑀯𑀸 𑀬𑀓𑁆𑀔𑀺𑀦𑀻 𑀯𑀸…𑀧𑁂… 𑀕𑀦𑁆𑀥𑀩𑁆𑀩𑁄 𑀯𑀸 𑀕𑀦𑁆𑀥𑀩𑁆𑀩𑀻 𑀯𑀸 … 𑀓𑀼𑀫𑁆𑀪𑀡𑁆𑀟𑁄 𑀯𑀸 𑀓𑀼𑀫𑁆𑀪𑀡𑁆𑀟𑀻 𑀯𑀸… 𑀦𑀸𑀕𑁄 𑀯𑀸 𑀦𑀸𑀕𑀻 𑀯𑀸 𑀦𑀸𑀕𑀧𑁄𑀢𑀓𑁄 𑀯𑀸 𑀦𑀸𑀕𑀧𑁄𑀢𑀺𑀓𑀸 𑀯𑀸 𑀦𑀸𑀕𑀫𑀳𑀸𑀫𑀢𑁆𑀢𑁄 𑀯𑀸 𑀦𑀸𑀕𑀧𑀸𑀭𑀺𑀲𑀚𑁆𑀚𑁄 𑀯𑀸 𑀦𑀸𑀕𑀧𑀘𑀸𑀭𑁄 𑀯𑀸 𑀧𑀤𑀼𑀝𑁆𑀞𑀘𑀺𑀢𑁆𑀢𑁄 𑀪𑀺𑀓𑁆𑀔𑀼𑀁 𑀯𑀸 𑀪𑀺𑀓𑁆𑀔𑀼𑀦𑀺𑀁 𑀯𑀸 𑀉𑀧𑀸𑀲𑀓𑀁 𑀯𑀸 𑀉𑀧𑀸𑀲𑀺𑀓𑀁 𑀯𑀸 𑀕𑀘𑁆𑀙𑀦𑁆𑀢𑀁 𑀯𑀸 𑀅𑀦𑀼𑀕𑀘𑁆𑀙𑁂𑀬𑁆𑀬, 𑀞𑀺𑀢𑀁 𑀯𑀸 𑀉𑀧𑀢𑀺𑀝𑁆𑀞𑁂𑀬𑁆𑀬, 𑀦𑀺𑀲𑀺𑀦𑁆𑀦𑀁 𑀯𑀸 𑀉𑀧𑀦𑀺𑀲𑀻𑀤𑁂𑀬𑁆𑀬, 𑀦𑀺𑀧𑀦𑁆𑀦𑀁 𑀯𑀸 𑀉𑀧𑀦𑀺𑀧𑀚𑁆𑀚𑁂𑀬𑁆𑀬. 𑀇𑀫𑁂𑀲𑀁 𑀬𑀓𑁆𑀔𑀸𑀦𑀁 𑀫𑀳𑀸𑀬𑀓𑁆𑀔𑀸𑀦𑀁 𑀲𑁂𑀦𑀸𑀧𑀢𑀻𑀦𑀁 𑀫𑀳𑀸𑀲𑁂𑀦𑀸𑀧𑀢𑀻𑀦𑀁 𑀉𑀚𑁆𑀛𑀸𑀧𑁂𑀢𑀩𑁆𑀩𑀁 𑀯𑀺𑀓𑁆𑀓𑀦𑁆𑀤𑀺𑀢𑀩𑁆𑀩𑀁 𑀯𑀺𑀭𑀯𑀺𑀢𑀩𑁆𑀩𑀁 𑁋 ‘𑀅𑀬𑀁 𑀬𑀓𑁆𑀔𑁄 𑀕𑀡𑁆𑀳𑀸𑀢𑀺, 𑀅𑀬𑀁 𑀬𑀓𑁆𑀔𑁄 𑀆𑀯𑀺𑀲𑀢𑀺, 𑀅𑀬𑀁 𑀬𑀓𑁆𑀔𑁄 𑀳𑁂𑀞𑁂𑀢𑀺, 𑀅𑀬𑀁 𑀬𑀓𑁆𑀔𑁄 𑀯𑀺𑀳𑁂𑀞𑁂𑀢𑀺, 𑀅𑀬𑀁 𑀬𑀓𑁆𑀔𑁄 𑀳𑀺𑀁𑀲𑀢𑀺, 𑀅𑀬𑀁 𑀬𑀓𑁆𑀔𑁄 𑀯𑀺𑀳𑀺𑀁𑀲𑀢𑀺, 𑀅𑀬𑀁 𑀬𑀓𑁆𑀔𑁄 𑀦 𑀫𑀼𑀜𑁆𑀘𑀢𑀻’𑀢𑀺.

𑁨𑁮𑁩. ‘‘𑀓𑀢𑀫𑁂𑀲𑀁 𑀬𑀓𑁆𑀔𑀸𑀦𑀁 𑀫𑀳𑀸𑀬𑀓𑁆𑀔𑀸𑀦𑀁 𑀲𑁂𑀦𑀸𑀧𑀢𑀻𑀦𑀁 𑀫𑀳𑀸𑀲𑁂𑀦𑀸𑀧𑀢𑀻𑀦𑀁?

‘‘𑀇𑀦𑁆𑀤𑁄 𑀲𑁄𑀫𑁄 𑀯𑀭𑀼𑀡𑁄 𑀘, 𑀪𑀸𑀭𑀤𑁆𑀯𑀸𑀚𑁄 𑀧𑀚𑀸𑀧𑀢𑀺;

𑀘𑀦𑁆𑀤𑀦𑁄 𑀓𑀸𑀫𑀲𑁂𑀝𑁆𑀞𑁄 𑀘, 𑀓𑀺𑀦𑁆𑀦𑀼𑀖𑀡𑁆𑀟𑀼 𑀦𑀺𑀖𑀡𑁆𑀟𑀼 𑀘.

‘‘𑀧𑀦𑀸𑀤𑁄 𑀑𑀧𑀫𑀜𑁆𑀜𑁄 𑀘, 𑀤𑁂𑀯𑀲𑀽𑀢𑁄 𑀘 𑀫𑀸𑀢𑀮𑀺;

𑀘𑀺𑀢𑁆𑀢𑀲𑁂𑀦𑁄 𑀘 𑀕𑀦𑁆𑀥𑀩𑁆𑀩𑁄, 𑀦𑀴𑁄 𑀭𑀸𑀚𑀸 𑀚𑀦𑁂𑀲𑀪𑁄 [𑀚𑀦𑁄𑀲𑀪𑁄 (𑀲𑁆𑀬𑀸.)].

‘‘𑀲𑀸𑀢𑀸𑀕𑀺𑀭𑁄 𑀳𑁂𑀫𑀯𑀢𑁄, 𑀧𑀼𑀡𑁆𑀡𑀓𑁄 𑀓𑀭𑀢𑀺𑀬𑁄 𑀕𑀼𑀴𑁄;

𑀲𑀺𑀯𑀓𑁄 𑀫𑀼𑀘𑀮𑀺𑀦𑁆𑀤𑁄 𑀘, 𑀯𑁂𑀲𑁆𑀲𑀸𑀫𑀺𑀢𑁆𑀢𑁄 𑀬𑀼𑀕𑀦𑁆𑀥𑀭𑁄.

‘‘𑀕𑁄𑀧𑀸𑀮𑁄 𑀲𑀼𑀧𑁆𑀧𑀭𑁄𑀥𑁄 𑀘 [𑀲𑀼𑀧𑁆𑀧𑀕𑁂𑀥𑁄 𑀘 (𑀲𑀻. 𑀲𑁆𑀬𑀸. 𑀧𑀻.)], 𑀳𑀺𑀭𑀺 𑀦𑁂𑀢𑁆𑀢𑀺 [𑀳𑀺𑀭𑀻 𑀦𑁂𑀢𑁆𑀢𑀻 (𑀲𑀻. 𑀧𑀻.)] 𑀘 𑀫𑀦𑁆𑀤𑀺𑀬𑁄;

𑀧𑀜𑁆𑀘𑀸𑀮𑀘𑀡𑁆𑀟𑁄 𑀆𑀴𑀯𑀓𑁄, 𑀧𑀚𑁆𑀚𑀼𑀦𑁆𑀦𑁄 𑀲𑀼𑀫𑀦𑁄 𑀲𑀼𑀫𑀼𑀔𑁄;

𑀤𑀥𑀺𑀫𑀼𑀔𑁄 𑀫𑀡𑀺 𑀫𑀸𑀡𑀺𑀯𑀭𑁄 [𑀫𑀡𑀺 𑀫𑀸𑀦𑀺𑀘𑀭𑁄 (𑀲𑁆𑀬𑀸. 𑀧𑀻.)] 𑀤𑀻𑀖𑁄, 𑀅𑀣𑁄 𑀲𑁂𑀭𑀻𑀲𑀓𑁄 𑀲𑀳.

‘‘𑀇𑀫𑁂𑀲𑀁 𑀬𑀓𑁆𑀔𑀸𑀦𑀁 𑀫𑀳𑀸𑀬𑀓𑁆𑀔𑀸𑀦𑀁 𑀲𑁂𑀦𑀸𑀧𑀢𑀻𑀦𑀁 𑀫𑀳𑀸𑀲𑁂𑀦𑀸𑀧𑀢𑀻𑀦𑀁 𑀉𑀚𑁆𑀛𑀸𑀧𑁂𑀢𑀩𑁆𑀩𑀁 𑀯𑀺𑀓𑁆𑀓𑀦𑁆𑀤𑀺𑀢𑀩𑁆𑀩𑀁 𑀯𑀺𑀭𑀯𑀺𑀢𑀩𑁆𑀩𑀁 𑁋 ‘𑀅𑀬𑀁 𑀬𑀓𑁆𑀔𑁄 𑀕𑀡𑁆𑀳𑀸𑀢𑀺, 𑀅𑀬𑀁 𑀬𑀓𑁆𑀔𑁄 𑀆𑀯𑀺𑀲𑀢𑀺, 𑀅𑀬𑀁 𑀬𑀓𑁆𑀔𑁄 𑀳𑁂𑀞𑁂𑀢𑀺, 𑀅𑀬𑀁 𑀬𑀓𑁆𑀔𑁄 𑀯𑀺𑀳𑁂𑀞𑁂𑀢𑀺, 𑀅𑀬𑀁 𑀬𑀓𑁆𑀔𑁄 𑀳𑀺𑀁𑀲𑀢𑀺, 𑀅𑀬𑀁 𑀬𑀓𑁆𑀔𑁄 𑀯𑀺𑀳𑀺𑀁𑀲𑀢𑀺, 𑀅𑀬𑀁 𑀬𑀓𑁆𑀔𑁄 𑀦 𑀫𑀼𑀜𑁆𑀘𑀢𑀻’𑀢𑀺.

‘‘𑀅𑀬𑀁 𑀔𑁄 𑀲𑀸, 𑀫𑀸𑀭𑀺𑀲, 𑀆𑀝𑀸𑀦𑀸𑀝𑀺𑀬𑀸 𑀭𑀓𑁆𑀔𑀸 𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀉𑀧𑀸𑀲𑀓𑀸𑀦𑀁 𑀉𑀧𑀸𑀲𑀺𑀓𑀸𑀦𑀁 𑀕𑀼𑀢𑁆𑀢𑀺𑀬𑀸 𑀭𑀓𑁆𑀔𑀸𑀬 𑀅𑀯𑀺𑀳𑀺𑀁𑀲𑀸𑀬 𑀨𑀸𑀲𑀼𑀯𑀺𑀳𑀸𑀭𑀸𑀬. 𑀳𑀦𑁆𑀤 𑀘 𑀤𑀸𑀦𑀺 𑀫𑀬𑀁, 𑀫𑀸𑀭𑀺𑀲, 𑀕𑀘𑁆𑀙𑀸𑀫 𑀩𑀳𑀼𑀓𑀺𑀘𑁆𑀘𑀸 𑀫𑀬𑀁 𑀩𑀳𑀼𑀓𑀭𑀡𑀻𑀬𑀸’’𑀢𑀺. ‘‘𑀬𑀲𑁆𑀲𑀤𑀸𑀦𑀺 𑀢𑀼𑀫𑁆𑀳𑁂 𑀫𑀳𑀸𑀭𑀸𑀚𑀸𑀦𑁄 𑀓𑀸𑀮𑀁 𑀫𑀜𑁆𑀜𑀣𑀸’’𑀢𑀺.

𑁨𑁮𑁪. 𑀅𑀣 𑀔𑁄 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀺𑀁𑀲𑀼. 𑀢𑁂𑀧𑀺 𑀔𑁄 𑀬𑀓𑁆𑀔𑀸 𑀉𑀝𑁆𑀞𑀸𑀬𑀸𑀲𑀦𑀸 𑀅𑀧𑁆𑀧𑁂𑀓𑀘𑁆𑀘𑁂 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀺𑀁𑀲𑀼. 𑀅𑀧𑁆𑀧𑁂𑀓𑀘𑁆𑀘𑁂 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀁𑀲𑀼, 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀺𑀁𑀲𑀼. 𑀅𑀧𑁆𑀧𑁂𑀓𑀘𑁆𑀘𑁂 𑀬𑁂𑀦 𑀪𑀕𑀯𑀸 𑀢𑁂𑀦𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀺𑀁𑀲𑀼. 𑀅𑀧𑁆𑀧𑁂𑀓𑀘𑁆𑀘𑁂 𑀦𑀸𑀫𑀕𑁄𑀢𑁆𑀢𑀁 𑀲𑀸𑀯𑁂𑀢𑁆𑀯𑀸 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀺𑀁𑀲𑀼. 𑀅𑀧𑁆𑀧𑁂𑀓𑀘𑁆𑀘𑁂 𑀢𑀼𑀡𑁆𑀳𑀻𑀪𑀽𑀢𑀸 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀺𑀁𑀲𑀽𑀢𑀺.

𑀧𑀞𑀫𑀪𑀸𑀡𑀯𑀸𑀭𑁄 𑀦𑀺𑀝𑁆𑀞𑀺𑀢𑁄.

𑀤𑀼𑀢𑀺𑀬𑀪𑀸𑀡𑀯𑀸𑀭𑁄

𑁨𑁮𑁫. 𑀅𑀣 𑀔𑁄 𑀪𑀕𑀯𑀸 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀇𑀫𑀁, 𑀪𑀺𑀓𑁆𑀔𑀯𑁂, 𑀭𑀢𑁆𑀢𑀺𑀁 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸 𑀫𑀳𑀢𑀺𑀬𑀸 𑀘 𑀬𑀓𑁆𑀔𑀲𑁂𑀦𑀸𑀬 𑀫𑀳𑀢𑀺𑀬𑀸 𑀘 𑀕𑀦𑁆𑀥𑀩𑁆𑀩𑀲𑁂𑀦𑀸𑀬 𑀫𑀳𑀢𑀺𑀬𑀸 𑀘 𑀓𑀼𑀫𑁆𑀪𑀡𑁆𑀟𑀲𑁂𑀦𑀸𑀬 𑀫𑀳𑀢𑀺𑀬𑀸 𑀘 𑀦𑀸𑀕𑀲𑁂𑀦𑀸𑀬 𑀘𑀢𑀼𑀤𑁆𑀤𑀺𑀲𑀁 𑀭𑀓𑁆𑀔𑀁 𑀞𑀧𑁂𑀢𑁆𑀯𑀸 𑀘𑀢𑀼𑀤𑁆𑀤𑀺𑀲𑀁 𑀕𑀼𑀫𑁆𑀩𑀁 𑀞𑀧𑁂𑀢𑁆𑀯𑀸 𑀘𑀢𑀼𑀤𑁆𑀤𑀺𑀲𑀁 𑀑𑀯𑀭𑀡𑀁 𑀞𑀧𑁂𑀢𑁆𑀯𑀸 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸 𑀓𑁂𑀯𑀮𑀓𑀧𑁆𑀧𑀁 𑀕𑀺𑀚𑁆𑀛𑀓𑀽𑀝𑀁 𑀧𑀩𑁆𑀩𑀢𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦𑀸𑀳𑀁 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀢𑁂𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀬𑀓𑁆𑀔𑀸 𑀅𑀧𑁆𑀧𑁂𑀓𑀘𑁆𑀘𑁂 𑀫𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀅𑀧𑁆𑀧𑁂𑀓𑀘𑁆𑀘𑁂 𑀫𑀬𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀁𑀲𑀼, 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀅𑀧𑁆𑀧𑁂𑀓𑀘𑁆𑀘𑁂 𑀬𑁂𑀦𑀸𑀳𑀁 𑀢𑁂𑀦𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀅𑀧𑁆𑀧𑁂𑀓𑀘𑁆𑀘𑁂 𑀦𑀸𑀫𑀕𑁄𑀢𑁆𑀢𑀁 𑀲𑀸𑀯𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀅𑀧𑁆𑀧𑁂𑀓𑀘𑁆𑀘𑁂 𑀢𑀼𑀡𑁆𑀳𑀻𑀪𑀽𑀢𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼.

𑁨𑁮𑁬. ‘‘𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄, 𑀪𑀺𑀓𑁆𑀔𑀯𑁂, 𑀯𑁂𑀲𑁆𑀲𑀯𑀡𑁄 𑀫𑀳𑀸𑀭𑀸𑀚𑀸 𑀫𑀁 𑀏𑀢𑀤𑀯𑁄𑀘 𑁋 ‘𑀲𑀦𑁆𑀢𑀺 𑀳𑀺, 𑀪𑀦𑁆𑀢𑁂, 𑀉𑀴𑀸𑀭𑀸 𑀬𑀓𑁆𑀔𑀸 𑀪𑀕𑀯𑀢𑁄 𑀅𑀧𑁆𑀧𑀲𑀦𑁆𑀦𑀸…𑀧𑁂… 𑀲𑀦𑁆𑀢𑀺 𑀳𑀺, 𑀪𑀦𑁆𑀢𑁂 𑀦𑀻𑀘𑀸 𑀬𑀓𑁆𑀔𑀸 𑀪𑀕𑀯𑀢𑁄 𑀧𑀲𑀦𑁆𑀦𑀸. 𑀬𑁂𑀪𑀼𑀬𑁆𑀬𑁂𑀦 𑀔𑁄 𑀧𑀦, 𑀪𑀦𑁆𑀢𑁂, 𑀬𑀓𑁆𑀔𑀸 𑀅𑀧𑁆𑀧𑀲𑀦𑁆𑀦𑀸𑀬𑁂𑀯 𑀪𑀕𑀯𑀢𑁄. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀪𑀕𑀯𑀸 𑀳𑀺, 𑀪𑀦𑁆𑀢𑁂, 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀺𑀬𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺… 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑁆𑀧𑀫𑀸𑀤𑀝𑁆𑀞𑀸𑀦𑀸 𑀯𑁂𑀭𑀫𑀡𑀺𑀬𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀬𑁂𑀪𑀼𑀬𑁆𑀬𑁂𑀦 𑀔𑁄 𑀧𑀦, 𑀪𑀦𑁆𑀢𑁂, 𑀬𑀓𑁆𑀔𑀸 𑀅𑀧𑁆𑀧𑀝𑀺𑀯𑀺𑀭𑀢𑀸𑀬𑁂𑀯 𑀧𑀸𑀡𑀸𑀢𑀺𑀧𑀸𑀢𑀸… 𑀅𑀧𑁆𑀧𑀝𑀺𑀯𑀺𑀭𑀢𑀸 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑁆𑀧𑀫𑀸𑀤𑀝𑁆𑀞𑀸𑀦𑀸. 𑀢𑁂𑀲𑀁 𑀢𑀁 𑀳𑁄𑀢𑀺 𑀅𑀧𑁆𑀧𑀺𑀬𑀁 𑀅𑀫𑀦𑀸𑀧𑀁. 𑀲𑀦𑁆𑀢𑀺 𑀳𑀺, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀸𑀯𑀓𑀸 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀦𑁆𑀢𑀺 𑀅𑀧𑁆𑀧𑀲𑀤𑁆𑀤𑀸𑀦𑀺 𑀅𑀧𑁆𑀧𑀦𑀺𑀕𑁆𑀖𑁄𑀲𑀸𑀦𑀺 𑀯𑀺𑀚𑀦𑀯𑀸𑀢𑀸𑀦𑀺 𑀫𑀦𑀼𑀲𑁆𑀲𑀭𑀸𑀳𑀲𑁆𑀲𑁂𑀬𑁆𑀬𑀓𑀸𑀦𑀺 𑀧𑀝𑀺𑀲𑀮𑁆𑀮𑀸𑀦𑀲𑀸𑀭𑀼𑀧𑁆𑀧𑀸𑀦𑀺. 𑀢𑀢𑁆𑀣 𑀲𑀦𑁆𑀢𑀺 𑀉𑀴𑀸𑀭𑀸 𑀬𑀓𑁆𑀔𑀸 𑀦𑀺𑀯𑀸𑀲𑀺𑀦𑁄, 𑀬𑁂 𑀇𑀫𑀲𑁆𑀫𑀺𑀁 𑀪𑀕𑀯𑀢𑁄 𑀧𑀸𑀯𑀘𑀦𑁂 𑀅𑀧𑁆𑀧𑀲𑀦𑁆𑀦𑀸, 𑀢𑁂𑀲𑀁 𑀧𑀲𑀸𑀤𑀸𑀬 𑀉𑀕𑁆𑀕𑀡𑁆𑀳𑀸𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀆𑀝𑀸𑀦𑀸𑀝𑀺𑀬𑀁 𑀭𑀓𑁆𑀔𑀁 𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀉𑀧𑀸𑀲𑀓𑀸𑀦𑀁 𑀉𑀧𑀸𑀲𑀺𑀓𑀸𑀦𑀁 𑀕𑀼𑀢𑁆𑀢𑀺𑀬𑀸 𑀭𑀓𑁆𑀔𑀸𑀬 𑀅𑀯𑀺𑀳𑀺𑀁𑀲𑀸𑀬 𑀨𑀸𑀲𑀼𑀯𑀺𑀳𑀸𑀭𑀸𑀬𑀸’𑀢𑀺. 𑀅𑀥𑀺𑀯𑀸𑀲𑁂𑀲𑀺𑀁 𑀔𑁄 𑀅𑀳𑀁, 𑀪𑀺𑀓𑁆𑀔𑀯𑁂, 𑀢𑀼𑀡𑁆𑀳𑀻𑀪𑀸𑀯𑁂𑀦. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑁂𑀲𑁆𑀲𑀯𑀡𑁄 𑀫𑀳𑀸𑀭𑀸𑀚𑀸 𑀫𑁂 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀆𑀝𑀸𑀦𑀸𑀝𑀺𑀬𑀁 𑀭𑀓𑁆𑀔𑀁 𑀅𑀪𑀸𑀲𑀺 𑁋

𑁨𑁮𑁭. ‘𑀯𑀺𑀧𑀲𑁆𑀲𑀺𑀲𑁆𑀲 𑀘 𑀦𑀫𑀢𑁆𑀣𑀼, 𑀘𑀓𑁆𑀔𑀼𑀫𑀦𑁆𑀢𑀲𑁆𑀲 𑀲𑀺𑀭𑀻𑀫𑀢𑁄.

𑀲𑀺𑀔𑀺𑀲𑁆𑀲𑀧𑀺 𑀘 𑀦𑀫𑀢𑁆𑀣𑀼, 𑀲𑀩𑁆𑀩𑀪𑀽𑀢𑀸𑀦𑀼𑀓𑀫𑁆𑀧𑀺𑀦𑁄.

‘𑀯𑁂𑀲𑁆𑀲𑀪𑀼𑀲𑁆𑀲 𑀘 𑀦𑀫𑀢𑁆𑀣𑀼, 𑀦𑁆𑀳𑀸𑀢𑀓𑀲𑁆𑀲 𑀢𑀧𑀲𑁆𑀲𑀺𑀦𑁄;

𑀦𑀫𑀢𑁆𑀣𑀼 𑀓𑀓𑀼𑀲𑀦𑁆𑀥𑀲𑁆𑀲, 𑀫𑀸𑀭𑀲𑁂𑀦𑀸𑀧𑀫𑀤𑁆𑀤𑀺𑀦𑁄.

‘𑀓𑁄𑀡𑀸𑀕𑀫𑀦𑀲𑁆𑀲 𑀦𑀫𑀢𑁆𑀣𑀼, 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀼𑀲𑀻𑀫𑀢𑁄;

𑀓𑀲𑁆𑀲𑀧𑀲𑁆𑀲 𑀘 𑀦𑀫𑀢𑁆𑀣𑀼, 𑀯𑀺𑀧𑁆𑀧𑀫𑀼𑀢𑁆𑀢𑀲𑁆𑀲 𑀲𑀩𑁆𑀩𑀥𑀺.

‘𑀅𑀗𑁆𑀕𑀻𑀭𑀲𑀲𑁆𑀲 𑀦𑀫𑀢𑁆𑀣𑀼, 𑀲𑀓𑁆𑀬𑀧𑀼𑀢𑁆𑀢𑀲𑁆𑀲 𑀲𑀺𑀭𑀻𑀫𑀢𑁄;

𑀬𑁄 𑀇𑀫𑀁 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀲𑀩𑁆𑀩𑀤𑀼𑀓𑁆𑀔𑀸𑀧𑀦𑀽𑀤𑀦𑀁.

‘𑀬𑁂 𑀘𑀸𑀧𑀺 𑀦𑀺𑀩𑁆𑀩𑀼𑀢𑀸 𑀮𑁄𑀓𑁂, 𑀬𑀣𑀸𑀪𑀽𑀢𑀁 𑀯𑀺𑀧𑀲𑁆𑀲𑀺𑀲𑀼𑀁;

𑀢𑁂 𑀚𑀦𑀸 𑀅𑀧𑀺𑀲𑀼𑀡𑀸𑀣, 𑀫𑀳𑀦𑁆𑀢𑀸 𑀯𑀻𑀢𑀲𑀸𑀭𑀤𑀸.

‘𑀳𑀺𑀢𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁, 𑀬𑀁 𑀦𑀫𑀲𑁆𑀲𑀦𑁆𑀢𑀺 𑀕𑁄𑀢𑀫𑀁;